Mɛni Hewɔ Saulo Wa Kristofoi Ayi Lɛ?

‘MISUSU LƐƐLƐŊ AKƐ ESA AKƐ

mafee nibii pii koni mikɛte shi mawo Yesu Nazarenyo lɛ gbɛi; ni miná mifee nakai lɛɛlɛŋ yɛ Yerusalɛm. Akɛni miná hegbɛ yɛ osɔfonukpai lɛ adɛŋ hewɔ lɛ, miwo mɛi krɔŋkrɔŋi lɛ ateŋ mɛi pii tsũŋ. Kɛ abaagbe kaselɔi lɛ, minine yɛ mli eko. Mifɔ̃ɔɔ amɛ yiwaa yɛ kpeehei lɛ fɛɛ, koni mikɛbɔ mɔdɛŋ ni amɛkwa amɛhemɔkɛyeli lɛ. Akɛni miye amɛhe sɛkɛ ko ni wa hewɔ lɛ, miwa amɛyi aahu kɛtee mɛikpɔji amaji amli tete.’​—Bɔfoi lɛ Asaji 26:​9-​11.

NAKAI ji bɔ ni Saulo ni jɛ Tarso, ni ale lɛ hu akɛ bɔfo Paulo lɛ kɛɛ. Be mli ni ewie enɛ lɛ, yɛ anɔkwale mli lɛ, eji nuu ni etsake. Ejeee mɔ ni teɔ shi ewoɔ Kristojamɔ dɔŋŋ, shi moŋ eji mɛi ni kɛ ekãa haa eyaa hiɛ waa lɛ ateŋ mɔ kome. Shi tsutsu lɛ mɛni kanya Saulo koni ewa Kristofoi lɛ ayi lɛ? Mɛni hewɔ esusu akɛ ‘esa akɛ efee’ nakai nibii lɛ? Ani abaanyɛ akase nɔ ko kɛjɛ esane lɛ mli?

Stefano Tɛ Tswiamɔ

Saulo he sane bote Biblia wolo ni aŋma afɔ̃ shi lɛ mli akɛ mɔ ni fata mɛi ni gbe Stefano lɛ he. “Ni amɛtsirɛ [Stefano] yisɛɛ kɛjɛ maŋ lɛŋ, ni amɛyatswia lɛ tɛi. Ni odasefoi lɛ ŋɔ amɛmamai lɛ amɛshwie oblanyo ko ni atsɛɔ lɛ Saulo lɛ naji anaa.” “Shi egbee lɛ ŋɔɔ Saulo hu naa.” (Bɔfoi lɛ Asaji 7:​58; 8:1) Mɛni kɛ nakai tutuamɔ lɛ ba? Yudafoi, ní Kilikiabii komɛi fata he lɛ, kɛ Stefano ná naataamɔ shi amɛnyɛɛɛ ehiɛ amɛdamɔ. Kɛji Saulo, ni ji Kilikianyo lɛ hu fata he jiŋŋ, awieee he. Yɛ fɛɛ mli lɛ, amɛkɛ amale odaseyelii folɔ Stefano naa akɛ ebɔ musu ni amɛgbala lɛ kɛtee Akuashɔŋ lɛ hiɛ. (Bɔfoi lɛ Asaji 6:​9-​14) Nɛkɛ gwabɔɔ nɛɛ ni esɛinɔtalɔ ji osɔfonukpa lɛ, tsuɔ nii akɛ Yudafoi lɛ asaneyelihe wulu. Ákɛ jamɔŋ saneyelihe ni nɔ kwɔ lɛ, emli bii lɛ buɔ nɔ ni amɛheɔ amɛyeɔ akɛ tsɔɔmɔi ni yɔɔ krɔŋŋ lɛ he. Yɛ amɛ susumɔ naa lɛ Stefano sa gbele. Ená ekãa ni ekɛaafolɔ amɛnaa akɛ amɛyeee Mla lɛ nɔ, ani efee nakai? (Bɔfoi lɛ Asaji 7:​53) Amɛbaatsɔɔ lɛ bɔ ni amɛyeɔ Mla lɛ nɔ amɛhaa diɛŋtsɛ!

Nakai yiŋkpɛɛ lɛ ni Saulo kpɛlɛ nɔ lɛ ji susumɔ ni jɛ nɔ ni aheɔ ayeɔ lɛ mli kɛba. Eji Farisifonyo. Nɛkɛ jamɔ kuu ni yɔɔ hewalɛ nɛɛ kɛ veveevefeemɔ biɔ mla lɛ kɛ kusum nifeemɔ lɛ anɔyeli. Akɛ Kristojamɔ tsuɔ nii akɛ susumɔi ni teɔ shi woɔ nakai hemɔkɛyeli lɛ, ni tsɔɔ gbɛ hee ni kɛ mɔ yaa yiwalaheremɔ mli kɛtsɔ Yesu nɔ. Klɛŋklɛŋ afii oha lɛ mli Yudafoi lɛ kwɛ Mesia lɛ gbɛ akɛ eji anunyam Maŋtsɛ ko ni baaha amɛye amɛhe kɛjɛ Roma nɔyeli kɔŋtso ni amɛsumɔɔɔ lɛ shishi. Ní mɔ ni Akuashɔŋ Kpeteŋkpele lɛ bu lɛ fɔ́ kɛ naafolɔmɔ akɛ ebɔ musu ni fee sɛɛ lɛ akala lɛ akpɛtɛ sɛŋmɔtso nɔ tamɔ awuiyelɔ ko ni alomɔ lɛ lɛ aaanyɛ ebafee Mesia lɛ ji nɔ ko ni kɛ ehe kpãaa gbee kwrakwra, akpɛlɛɛɛ nɔ, ni eji nihii nii kɛha amɛjwɛŋmɔŋ susumɔ.

Mla lɛ jaje akɛ nuu ni asɛŋ lɛ yɛ tso nɔ lɛ “Nyɔŋmɔ loomɔ kã enɔ.” (5 Mose 21:​22, 23; Galatabii 3:​13) Yɛ Saulo susumɔ naa lɛ, “nɛkɛ wiemɔi nɛɛ kɔɔ Yesu he yɛ faŋŋ mli,” taakɛ Frederick F. Bruce tsɔɔ lɛ. “Egbo yɛ Nyɔŋmɔ loomɔ lɛ shishi, ni no hewɔ lɛ anyɛŋ asusu akɛ lɛ ji mɔ ni baafee Mesia lɛ, mɔ ni, yɛ amɛsusumɔ naa lɛ, Nyɔŋmɔ jɔɔmɔ ba enɔ yɛ gbɛ srɔto kwraa nɔ lɛ. No hewɔ lɛ, ní aaawie akɛ Yesu ji Mesia lɛ ji musubɔɔ; mɛi ni wieɔ wiemɔ ni tamɔ nɛkɛ ni jwɛŋmɔ bɛ mli lɛ sa piŋmɔ akɛ musubɔlɔi.” Taakɛ Saulo diɛŋtsɛ kɛɛ sɛɛ mli lɛ, susumɔ diɛŋtsɛ ni ji “Kristo ni asɛŋ lɛ lɛ . . . tsɔ pampi eha Yudafoi” lɛ.​—⁠1 Korintobii 1:​23.

Saulo nifeemɔ yɛ nakai tsɔɔmɔ lɛ he ji koni ekɛ faishitswaa ni fe fɛɛ ni eeenyɛ ate shi awo. Esa akɛ akɛ yiwalɛ nɔnyɛɛ atsu nii po ni akɛbɔ mɔdɛŋ koni akɛjie nɛkɛ tsɔɔmɔ nɛɛ kɛya kwraa. Eyɛ nɔmimaa akɛ nɛkɛ ji bɔ ni Nyɔŋmɔ taoɔ. Beni etsɔɔ henumɔ ni etee lɛ shi yɛ emli lɛ he lɛ, Saulo kɛɛ: “Mɔdɛŋbɔɔ gbɛfaŋ lɛ asafo lɛ yiwalɔ ji mi, ni mla mli jalɛ gbɛfaŋ lɛ mihe bɛ shwamɔ ko.” “Bɔ ni miwa Nyɔŋmɔ asafo lɛ yi babaoo ni mikpata ehiɛ, ni mife mitipɛŋfoi pii yɛ Yudafoi ajamɔ lɛ mli yɛ mijakubii ateŋ, ni mihiɛ dɔɔ naakpa yɛ wɔtsɛmɛi ablema saji ni aŋɔha wɔ lɛ hewɔ.”​​—⁠Filipibii 3:6; Galatabii 1:​13, 14.

Mɔ ni Nyiɛ Yiwaa lɛ Hiɛ

Yɛ Stefano gbele sɛɛ lɛ, Saulo ebafeee mɔ ni yeɔ buaa dɔŋŋ kɛha yiwaa kɛkɛ shi moŋ akɛ mɔ ni kɛ ehe woɔ mli waa. Taakɛ eji lɛ, ekolɛ ená gbɛi gbonyo ko, akɛni yɛ etsakemɔ lɛ sɛɛ po, beni eka kaselɔi lɛ ahe kpɛtɛmɔ lɛ, ‘amɛ fɛɛ amɛmiishe lɛ gbeyei, ejaakɛ amɛheee amɛyeee akɛ eji kaselɔ.’ Beni ebafee faŋŋ akɛ lɛɛlɛŋ eji Kristofonyo lɛ, etsakemɔ lɛ bafee nɔ ni haa anáa miishɛɛ kɛ shidaa yɛ kaselɔi lɛ ateŋ mɛi ni jeee ni amɛnu akɛ tsutsu shitee-kɛ-wolɔ ko ená tsui tsakemɔ kɛkɛ, shi moŋ akɛ “nuu ni tsutsu lɛ ewaa wɔyi lɛ agbɛnɛ miijaje hemɔkɛyeli ni sá ni ekpataa hiɛ lɛ he sanekpakpa lɛ eetsɔɔ.”​​—⁠Bɔfoi lɛ Asaji 9:​26, wɔma efã ko nɔ mi; Galatabii 1:​23, 24, NW.

Damasko kã aaafee kilomitai 220​—⁠gbii kpawo loo kpaanyɔ nyiɛmɔ​—⁠​kɛjɛ Yerusalɛm. Ni kɛlɛ, akɛni Saulo ‘miimu hegbeyeiwoo kɛ gbee mumɔ eeeshwie kaselɔi lɛ anɔ’ hewɔ lɛ, eyiŋ kɛtee osɔfonukpa lɛ ŋɔɔ ni eyabi lɛ woji ni ekɛya Damasko kpeehei lɛ. Mɛɛba? Bɔni afee ni kɛji Saulo na mɛi komɛi ni hiɛ “Nɛkɛ Tsɔɔmɔ” nɛɛ mli lɛ ni efimɔ amɛ ni ekpala amɛ kɛba Yerusalɛm. Yɛ hegbɛ ni ená kɛjɛ maŋ onukpai lɛ adɛŋ hewɔ lɛ, “ekpata asafo lɛ hiɛ butuu, eboteɔ shiai ni eyagbalaa hii kɛ yei ni eyawoɔ amɛ tsũŋ.” Mɛi krokomɛi lɛ ‘ehaa ayiɔ amɛ yɛ kpeehei lɛ,’ ni ‘efɔ̃ɔ oshiki lɛ eko’ (yɛ anɔkwale mli lɛ, ‘efɔ̃ɔ oshiki lɛ’) koni ekɛfĩ amɛgbee lɛ sɛɛ.​—⁠Bɔfoi lɛ Asaji 8:​3; 9:​1, 2, 14; 22:​5, 19; 26:​10, shishigbɛ niŋmaa.

Kɛji wɔɔsusu skul tsɔsemɔ ni Saulo ná yɛ Gamaliel najianaa kɛ hewalɛi ni ehiɛ agbɛnɛ lɛ, woloŋlelɔi komɛi heɔ amɛyeɔ akɛ etee hiɛ kɛjɛ Mla lɛ kaselɔ kɛkɛ ni eji lɛ mli, kɛyashɛ hegbɛ ko ni da he nitsumɔ yɛ Yudafoi ajamɔ mli. Ákɛ nɔkwɛmɔnɔ lɛ, mɔ ko susumɔ ji akɛ kulɛ Saulo baaba abatsɔ tsɔɔlɔ yɛ Yerusalɛm kpeehe ko. Kɛlɛ, mɛni Saulo ‘naa ni yɔɔ mli’ loo ‘eshiki ni efɔ̃ɔ’ lɛ tsɔɔ​—⁠ákɛ kojomɔhe ko mlinyo jio loo akɛ mɔ ko ni miijie esɛɛfimɔ kpakpa kpo kɛha Kristofoi lɛ agbee lɛ​​—⁠​wɔnyɛŋ wɔma nɔ mi.a

Akɛni kɛjɛ shishijee lɛ Yudafoi loo mɛi ni atsake amɛ kɛba Yuda jamɔ mli lɛ ji Kristofoi fɛɛ hewɔ lɛ, eyɛ faŋŋ akɛ Saulo nu Kristojamɔ shishi akɛ eji hemɔkɛyeli kwamɔ gbɛjianɔtoo ko ni yɔɔ Yuda jamɔ mli, ni eŋɔ lɛ akɛ eji Yuda jamɔ ni akpɛlɛɔ nɔ lɛ nitsumɔ ákɛ ejaje mɛi ni kɛ amɛhe ebakpɛtɛ he lɛ ajwɛŋmɔ. Woloŋlelɔ Arland J. Hultgren kɛɛ akɛ: “Enyɛŋ efee nɔ ni baaba mli, ákɛ kulɛ Paulo ni ji yiwalɔ lɛ baate shi awo Kristojamɔ ejaakɛ ena lɛ akɛ eji jamɔ ni yɔɔ Yuda jamɔ sɛɛ, ni kɛ lɛ shiɔ mple. Kulɛ lɛ kɛ mɛi krokomɛi baaná Kristofoi agbɛjianɔtoo lɛ akɛ eyɛ hegbɛ ni Yudafoi yɔɔ lɛ kudɔmɔ shishi lolo.” Eyiŋtoo yɛ nakai beaŋ ji, ní enyɛ Yudafoi ni edu gbɛ lɛ anɔ ni amɛŋmɛɛ he ni amɛku amɛsɛɛ kɛba hemɔkɛyeli krɔŋŋ lɛ he, ni ekɛ hegbɛ fɛɛ hegbɛ ni yɔɔ lɛ baatsu he nii. (Bɔfoi lɛ Asaji 26:11) Gbɛ kome ni naa gbele eha lɛ ji tsuŋwoo. Gbɛ kroko hu ji yii yɛ kpeehei lɛ, tsɔsemɔ ni fɔɔ kaa ni abaanyɛ akɛha akɛ toigbalamɔ kɛha toigbele ni afeɔ ashiɔ hegbɛ ni rabifoi lɛ yɔɔ yɛ maŋ lɛ saneyelihei lɛ ateŋ eko fɛɛ eko kɛ emli kojolɔi etɛ lɛ.

Lɛɛlɛŋ Yesu he kpo ni ejie etsɔɔ Saulo yɛ gbɛ ni yaa Damasko lɛ nɔ lɛ, kɛ nakai nibii lɛ fɛɛ ba naagbee. Kɛjɛ eshihilɛ akɛ Kristojamɔ lɛ henyɛlɔ ni hiɛ yɔɔ klamaklama lɛ, trukaa lɛ Saulo batsɔ mɔ ni kɛ ekãa fiɔ sɛɛ waa, ni amrɔ nɔŋŋ lɛ Yudafoi ni yɔɔ Damasko lɛ miitao lɛ agbe. (Bɔfoi lɛ Asaji 9:​1-​23) Ákɛ nɔ ni akpaaa gbɛ lɛ, esa kɛ Saulo ana nɔ̃ yɛ nibii babaoo ni lɛ diɛŋtsɛ ekɛfee mɛi akɛ yiwalɔ lɛ mli akɛ Kristofonyo koni yɛ afii komɛi asɛɛ lɛ enyɛ ewie akɛ: “Yudafoi yi mi kpãai, shwɛ ekome ni afee nyɔŋmai-ejwɛ, shii enumɔ.”​​—⁠2 Korintobii 11:​24.

Abaanyɛ Aha Ekãa Afee Nɔ ni Ejaaa

Saulo ŋma yɛ etsakemɔ lɛ sɛɛ, beni ale lɛ jogbaŋŋ akɛ Paulo lɛ akɛ: “Tsutsu lɛ miji musubɔlɔ kɛ yiwalɔ kɛ mɛi aniseniianii feelɔ, shi kɛlɛ ana mi mɔbɔ, ejaakɛ mileee ni mifee, yɛ hé ni miheee miyeee mli.” (1 Timoteo 1:​13) No hewɔ lɛ, ni mɔ ko aaafee anɔkwafo kɛ kamkam yɛ jamɔ ni ekɛhaa mli lɛ, jeee nɔdaamɔ nɔ kɛha Nyɔŋmɔ nɔkpɛlɛmɔ. Saulo ji ekãalɔ ni efeɔ enii yɛ henilee naa, shi no efeee lɛ mɔ ni sa. Ekãa ni naa wa waa ni efeɔ lɛ ejaaa. (Okɛto Romabii 10:​2, 3 he.) Esa akɛ no aha wɔsusu sane he.

Ŋmɛnɛ mɛi babaoo hiɛ yiŋtsɔmɔ ni yɔɔ shiŋŋ akɛ ní aaafee gbɔmɔ kpakpa lɛ pɛ ji nɔ ni Nyɔŋmɔ taoɔ yɛ amɛdɛŋ. Shi nakai eji? Mɔ fɛɛ mɔ baafee jogbaŋŋ akɛ eeefee toiboo kɛha Paulo ŋaawoo nɛɛ akɛ: “Nyɛkaa nii fiaa nyɛkwɛa, ni nɔ ni hi lɛ nyɛmɔa mli.” (1 Tesalonikabii 5:​21) No tsɔɔ akɛ ni aaato be ni akɛna Nyɔŋmɔ Wiemɔ lɛ he anɔkwale nilee ni ja kɛ agbɛnɛ ni aaahi shi yɛ ekɛ gbeekpãmɔ naa. Kɛji wɔyɔse kɛjɛ Biblia lɛ mli kwɛmɔ mli akɛ wɔyɛ tsakemɔi ni esa akɛ wɔfee lɛ, no lɛ esa akɛ bɔ fɛɛ bɔ ni fee lɛ wɔfee tsakemɔi lɛ ni wɔkaha eekpe sɛɛ. Ekolɛ wɔteŋ mɛi fioo lɛ musubɔlɔi ji wɔ be ko, yiwalɔi, loo hii toigbolɔi kɛyashɛ bɔ ni Saulo fee enii eha lɛ. Shi kɛlɛ, ni wɔɔfee nii kɛtsɔ hemɔkɛyeli kɛ anɔkwa nilee nɔ pɛ dani wɔbaanyɛ wɔná Nyɔŋmɔ hiɛ duromɔ tamɔ lɛ.​​—⁠Yohane 17:​3, 17.

[Shishigbɛ niŋmai]