Obalaŋtai​—Mɛɛ Nibii Asɛɛ Nyɛtiuɔ?

“Shi oblahiaŋ sɛɛdii lɛ hu, joo naa foi: shi moŋ okɛ mɛi ni tsɛɔ Nuŋtsɔ lɛ kɛjɛɔ tsui ni mli tse mli lɛ atiu jalɛ, hemɔkɛyeli, suɔmɔ kɛ hejɔlɛ.”​—2 TIMOTEO 2:⁠22.

 1. Mɛni ji wɔhiɛnɔkamɔ kɛha obalaŋtai ni yɔɔ wɔteŋ lɛ?

SWEDEN Pentekost Sɔlemɔ lɛ adafitswaa wolo Dagen jaje akɛ “Yehowa Odasefoi ji kuu ni nine shɛɔ mɛi ni bafeɔ emlibii heei ni fa fe fɛɛ nɔ daa afi, ni amɛ amɛyɔɔ obalaŋtai ni fa fe fɛɛ.” Ekolɛ ofata nɛkɛ obalaŋtai akuu ni he tse, ni sheɔ Nyɔŋmɔ gbeyei nɛɛ ahe. Ekolɛ atsɔse bo yɛ Kristofoi agbɛ nɔ kɛjɛ ogbekɛbiiashi, aloo ekolɛ okome onu Maŋtsɛyeli lɛ he sane lɛ ni okpɛlɛ nɔ. Yɛ fɛɛ sɛɛ lɛ, eŋɔɔ wɔnaa akɛ obafata wɔhe. Ni wɔ hiɛnɔkamɔ ji akɛ obaatiu jalɛ gbɛ lɛ, taakɛ obalaŋtai Kristofoi ni hi shi yɛ klɛŋklɛŋ afii oha lɛ mli lɛ fee lɛ. Bɔfo Yohane wiemɔi lɛ baafee nɔ ni kɔɔ ohe jogbaŋŋ: “Ejaakɛ nyɛhe wa, ni Nyɔŋmɔ wiemɔ lɛ hiɔ nyɛmli, ni nyɛye mɔ fɔŋ lɛ nɔ kunim.”​—1 Yohane 2:⁠14.

 2. Mɛni nibii komɛi baanyɛ aha jalɛ sɛɛ ni atiuɔ lɛ afee nɔ ni wa beni obalaŋtai ‘eje nɔ’ lɛ?

² Obalaŋtai Kristofoi​—hɛɛ amɛteŋ mɛi ni fa​—miinyɛ amɛmiidamɔ je lɛŋ nɔnyɛɛi lɛ anaa ŋmɛnɛ. Shi obaana akɛ gbɛ ni tamɔ nɛkɛ mlihiɛmɔ bɛ mlɛo. Beni ‘oje nɔ’ ehee lɛ, obaanu he akɛ henumɔi hee ni mli wa ehe ojwɛŋmɔ fɛɛ. (1 Korintobii 7:36) Yɛ nakai beaŋ nɔŋŋ lɛ, ekolɛ obaanu he akɛ, akɛ skul, shia, kɛ asafo lɛ mli gbɛnaa nii ni tsii loo eyaa hiɛ miifɔ onɔ. Nɔnyɛɛ ni jɛ Satan Abonsam diɛŋtsɛ ŋɔɔ po baanyɛ aba onɔ. Akɛni etswa efai shi akɛ ebaashishiu mɛi babaoo bɔ ni eeenyɛ hewɔ lɛ, etutuaa mɛi ni he waaa lɛ​—taakɛ efee yɛ Eden abɔɔ lɛ mli Iɛ. No beaŋ lɛ, ekɛ eŋaatsɔɔ fɔŋ lɛ eyaaa Adam ni eda ni le nii lɛ nɔ, shi moŋ ekɛtee yoo ni edako ni bɛ niiashikpamɔ, ni ji Hawa nɔ. (1 Mose 3:​1-5) Afii ohai abɔ sɛɛ lɛ, Satan kɛ ŋaatsɔɔ ni tamɔ nakai nɔŋŋ tsu nii yɛ Kristofoi asafo ni yɔɔ Korinto ni amɛyi faa babaoo lɛ anɔ. Bɔfo Paulo kɛɛ: “Miishe gbeyei akɛ aleenɔ, taakɛ bɔ ni onufu lɛ kɛ ekutumpɔo lɛ laka Hawa lɛ, nakai nɔŋŋ aaafite nyɛ hu nyɛjwɛŋmɔi kɛjɛ krɔŋŋ-feemɔ ni nyɛjie nyɛtsɔɔ Kristo lɛ mli.”​—2 Korintobii 11:⁠3.

 3, 4. Mɛni ji dɛŋdadei komɛi ní Satan Abonsam kɛtsuɔ nii ni ekɛlakaa obalaŋtai lɛ, ni mɛni nyɛɔ ejɛɔ mli kɛbaa?

³ Ŋmɛnɛ hu, ekolɛ ofɔlɔi Kristofoi lɛ baanyɛ ashe gbeyei loo amɛhao yɛ ohewɔ. Jeee akɛ amɛsusuɔ akɛ efɔŋfeemɔ yɛ nyɛjwɛŋmɔ mli, shi moŋ amɛle kɛjɛ niiashikpamɔ mli akɛ Satan nine shɛɔ obalaŋtai anɔ oya kɛtsɔɔ “eŋaatsɔɔi” lɛ anɔ. (Efesobii 6:​11, NW shishigbɛ niŋmaa) Tsɔnei ni Satan kɛduɔ mɛi lɛ tamɔ nɔ ni efɔŋ ko kwraa bɛ he, shi nɔ ni ŋɔɔ ni abaasumɔ moŋ. Televishin tsɔɔ ŋaa gbɛ nɔ ekɛ heloo gbɛfaŋ nibii asɛɛdii, bɔlɛnamɔ ni yɔɔ faŋŋ, awuiyeli he mfonirii, kɛ mumɔi atsɛmɔi haa akɛ hiɛtserɛjiemɔ. Nɔ ni yimɔɔ jwɛŋmɔi ni darako nɛɛ amli obɔbɔ lɛ jeee ‘nii ni ji anɔkwa, ni sa woo, ni ja, ni he tse, ni adɔɔ he’ kwraa. (Filipibii 4:⁠8) Tipɛŋfoi anɔnyɛɛ hu ji Satan dɛŋdade ko ni yɔɔ hewalɛ waa. Tipɛŋfoi baanyɛ anyɛ onɔ waa koni oshihilɛ atamɔ amɛ yɛ atadewoo, hesaamɔ, kɛ hewulamɔ mli. (1 Petro 4:​3, 4) Adafitswaa wolo mli niŋmalɔ, William Brown kɛɛ: “Kɛ je lɛŋ Nyɔŋmɔ kome ko yɛ kɛha obalaŋta lɛ, no ji atamɔ amɛ Nyɔŋmɔ lɛ.. . . Kɛha obalaŋta lɛ, ni eeefee mɔ ni yɔɔ sɔrɔto yɛ etipɛŋfoi ateŋ lɛ ji nii ni ehiii fe gbele po ni aaaba enɔ.” Italia Odasefonyo gbekɛ yoo ko jaje akɛ: “Efee mi hiɛgbele akɛ maha miskulbii lɛ ale akɛ Odasefonyo ji mi. Ni akɛni mile akɛ Yehowa nyaaa enɛ he hewɔ lɛ, edɔ mi ni mihiɛ gbo.”

⁴ Kaaha aalaka bo​—Satan miisumɔ ni enyiɛ ohiɛ kɛya hiɛkpatamɔ mli. Obalaŋtai pii yɛ je lɛ mli ni amɛwala baaje amɛdɛŋ yɛ amanehulu kpeteŋkpele lɛ mli ejaakɛ amɛŋmɛ gbɛ ni alaka amɛ. (Ezekiel 9:⁠6) Gbɛ kome pɛ ni aaatsɔ nɔ aje mli ji ni atiu nɔ ni ja lɛ sɛɛ.

Kwɛmɔ Ohe Jogbaŋŋ yɛ Naanyobɔɔ Fɔŋ He

 5, 6. (a) Mɛɛ shihilɛi ni mli wawai obalanyo Timoteo kɛkpe beni eyɔɔ Efeso lɛ? (b) Mɛɛ ŋaawoo Paulo yɔɔ kɛha Timoteo?

⁵ No ji ŋaawoo ni bɔfo Paulo kɛha obalanyo Timoteo lɛ mli agugu loo sane titri. Timoteo efata Paulo he yɛ emaŋsɛɛ sanekpakpa shiɛmɔ gbɛfaai lɛ amli fe afii nyɔŋma. Be ko beni Timoteo sɔmɔɔ yɛ wɔŋjalɔi amaŋ ni ji Efeso mli lɛ, no mli lɛ Paulo ta Romabii agboklɛfoi atsuŋ eemɛ be ní abaagbe lɛ. Beni egbele be lɛ bɛŋkɛɔ lɛ, ŋwanejee ko bɛ he akɛ Paulo susu bɔ ni Timoteo baaya nɔ aha lɛ he. Efeso ji maŋ ko ni ale jogbaŋŋ yɛ eninamɔ, jeŋba shara, kɛ ehiɛtserɛjiemɔ fɔŋ lɛ hewɔ, ni Timoteo nine shɛŋ esuɔlɔ ŋaawolɔ nɛɛ yelikɛbualɔ nɔ dɔŋŋ.

⁶ No hewɔ lɛ Paulo ŋma wolo eyaha “esuɔmɔ bi” nɛɛ akɛ: “Shia wulu ko mli lɛ, jeee shika nii kɛ jwiɛtɛi nii kɛkɛ yɔɔ jɛmɛ, shi moŋ tso nii kɛ sũ nii hu yɛ mli, ni ekomɛi lɛ abuɔ amɛ, shi ekomɛi hu abuuu. Agbɛnɛ kɛji mɔ ko tsuu ehe kɛjɛ nɛkɛ nii nɛɛ amli lɛ, etsɔ nɔ ni abuɔ, ni atsuu ehe krɔŋŋ, ni ehi ha shiatsɛ lɛ jogbaŋŋ, ni asaa lɛ aha nitsumɔ kpakpa fɛɛ nitsumɔ kpakpa. Shi obalahiaŋ sɛɛdii lɛ hu, joo naa foi; shi moŋ okɛ mɛi ni tsɛɔ Nuŋtsɔ lɛ kɛjɛɔ tsui ni mli tse mli lɛ atiu jalɛ, hemɔkɛyeli, suɔmɔ kɛ hejɔlɛ.”​—2 Timoteo 1:2; 2:​20-22.

 7. (a) Mɛni ji ‘nii ni abuuu’ ni Paulo bɔ kɔkɔ yɛ he lɛ? (b) Te obalaŋtai ni yɔɔ ŋmɛnɛ lɛ aaafee tɛŋŋ amɛkɛ Paulo wiemɔi nɛɛ atsu nii?

⁷ No hewɔ lɛ Paulo bɔ Timoteo kɔkɔ akɛ ‘nii ni abuuu’​—aŋkroaŋkroi ni baaa amɛjeŋ jogbaŋŋ, baanyɛ ahi nanemɛi Kristofoi po ateŋ. No hewɔ lɛ, kɛ naanyo ni Timoteo kɛ Kristofoi komɛi ni afɔ amɛ mu lɛ aaabɔ lɛ baanyɛ aye lɛ awui lɛ, enyiɛ nɔŋŋ ni naanyo ni obalanyo loo obalayoo Kristofonyo kɛ je lɛŋ bii aaabɔ lɛ yeŋ lɛ awui babaoo ŋmɛnɛ! (1 Korintobii 15:33) Enɛ etsɔɔɔ akɛ okɛ oklasbii eŋmɔŋ loo okɛ amɛ shwɛŋ. Shi esa akɛ okwɛ jogbaŋŋ ni okɛ ohe akawo amɛ nifeemɔi amli fe nine, kɛ no aaaha ofee mɔ ni ekome enyiɛɔ yɛ bei komɛi amli po. Enɛ baanyɛ afee shihilɛ ni wa. Brazil gbekɛ yoo ko kɛɛ: “Ewa. Minanemɛi skulbii miifɔ mi nine daa kɛha hiɛtserɛjiemɔi ni aya hei ni esaaa haaa obalaŋtai Kristofoi. Amɛkɛɔ akɛ: ‘Mɛni! Oyaaa? Oye sɛkɛ!’

 8, 9. (a) Yɛ mɛɛ gbɛ nɔ naanyo ni akɛ je lɛŋ bii ni tamɔ mɛi ni hi lɛ po aaabɔ lɛ kɛ oshara aaaba Kristofonyo lɛ nɔ yɛ? (b) Nɛgbɛ obaana nanemɛi kpakpai yɛ?

⁸ Je lɛŋ obalaŋtai komɛi tamɔ mɛi ni hi ejaakɛ amɛshɛreee zigaret, amɛwieee wiemɔ sha, ni amɛkɛ amɛhe wooo ajwamaŋbɔɔ mli. Shi kɛ jeee jalɛ sɛɛ amɛtiuɔ lɛ, no lɛ amɛ helooŋ susumɔi kɛ subaŋi lɛ baanyɛ ana onɔ hewalɛ yɛ gbɛ ni waaa kwraa nɔ. Yɛ no sɛɛ lɛ, mɛni nibii yɔɔ mɛi ni heee yeee lɛ ahe ni obaanyɛ onya he? (2 Korintobii 6:​14-16) Ejaakɛ mumɔŋ nibii ni obuɔ amɛ akɛ nibii ni jara wa waa kɛha bo lɛ ji “kwashiaiasane” yɛ amɛhiɛ! (1 Korintobii 2:14) Ani obaanyɛ okɛ amɛ abɔ ni oŋmɛŋ shishitoo mlai ni ohiɛ mli lɛ ahe?

⁹ No hewɔ lɛ tsi ohe kwraa kɛjɛ nanemɛi ni ehiii lɛ ahe. Okɛ Kristofoi ni amɛjwɛŋmɔ yɔɔ mumɔŋ nibii anɔ ni sumɔɔ Yehowa diɛŋtsɛ lɛ pɛ abɔ. Ohiɛ ahi ohe nɔ yɛ asafo lɛ mli obalaŋtai ni susuuu nibii kpakpai ahe ni wieɔ shiɔ nii lɛ ahe. Yɛ be mli ni odaa yɛ mumɔŋ lɛ, eka shi faŋŋ akɛ nanemɛi ni okɛ amɛ baabɔ lɛ hu baatsake. Odasefonyo gbekɛ yoo fioo ko kɛɛ: “Miina nanemɛi heei yɛ asafoi sɔrɔtoi amli. Eha miyoo bɔ ni je lɛŋ nanemɛi ahe ehiaaa kwraa ha lɛ.”

Akɔnɔ Fɔŋ ni Aaajo Naa Foi

10, 11. (a) Akɛ ‘aaajo obalahiaŋ sɛɛdii lɛ naa foi’ lɛ tsɔɔ mɛni? (b) Te mɔ ko aaafee tɛŋŋ ‘ajo ajwamaŋbɔɔ naa foi’?

¹⁰ Paulo wo Timoteo hewalɛ hu akɛ, “obalahiaŋ sɛɛdii lɛ hu, joo naa foi.” Kɛ oji obalaŋta Iɛ, bɔ ni asumɔɔ ni ahe gbɛi, ajie hiɛtserɛ, loo agbe bɔlɛnamɔ mli akɔnɔi lɛ baanyɛ anyɛ mɔ nɔ waa. Kɛ akuuu naa lɛ, akɔnɔi ni tamɔ nɛkɛ kɛo baaya eshafeemɔ mli. No hewɔ ni Paulo kɛɛ joo akɔnɔi ni tamɔ nɛkɛ lɛ anaa foi ​—ni ojo foi kɛjɛ he tamɔ nɔ ni owala ka oshara mli.a

¹¹ Akɛ nɔkwɛmɔ nɔ lɛ, bɔlɛnamɔ he akɔnɔ eha obalaŋtai Kristofoi pii ahiɛ ekpata yɛ mumɔŋ. Belɛ yiŋtoo kpakpa hewɔ ni Biblia lɛ kɛɔ wɔ akɛ “nyɛjoa ajwamaŋbɔɔ naa foi” lɛ. (1 Korintobii 6:18) Kɛ mɛi enyɔ ko miitao ni amɛbote gbalashihilɛ mli, ni yɛ enɛ hewɔ lɛ amɛnyiɛɔ lɛ, amɛbaanyɛ amɛkɛ shishitoo mla nɛɛ atsu nii kɛtsɔ shihilɛi ni kaa mɔ ni amɛaakwa nɔ​—tamɔ mɛi enyɔ lɛ pɛ ní aaahi he ko tamɔ yɛ tsu mli loo ni amɛaatara kar ko mli. Ni mɔko aaafata nyɛhe lɛ feɔ tamɔ nii ni be eho, shi ebaanyɛ etsɔ hebuu nɔ diɛŋtsɛ aha nyɛ. Ni eyɛ mli akɛ suɔmɔ wiemɔi komɛi baafee nɔ ni sa moŋ, shi esa akɛ afo husui ni sa awo enɛɛmɛi’ ahe koni akwɛ nifeemɔi ni he tseee ni aaajɛ mli aba lɛ jogbaŋŋ. (1 Tesalonikabii 4:⁠7) Nɔ ni fata ajwamaŋbɔɔ ni aaajo naa foi lɛ he hu ji sinii loo TV nɔ nibii ni aaatee akɔnɔi ni ehiii lɛ ashi lɛ ni aaakwa. (Yakobo 1:​14, 15) Kɛ susumɔi gbohii ba’ ojwɛŋmɔ mli pɛ lɛ, tsakemɔ sanegbaa lɛ yɛ ojwɛŋmɔ mli. Tee shi ni oyashera shi; kanemɔ woji komɛi; tsu shia nitsumɔi komɛi. Sɔlemɔ ji yelikɛbuamɔ nɔ titri yɛ shihilɛ ni tamɔ nɛkɛ mli.​—Lala 62:⁠9.b

12. Te ofeɔ tɛŋŋ okaseɔ bɔ ni anyɛ̃ɔ efɔŋ? Feemɔ enɛ he nɔkwɛmɔ nɔ.

¹² Nɔ ni he hiaa fe fɛɛ lɛ, esa akɛ okase bɔ ni anyɛ̃ɔ, ahiɔ, ni anyaŋeɔ nɔ ni ehiii. (Lala 97:10) Te ofeɔ tɛŋŋ onyɛ̃ɔ nɔ ni kɛjɛ shishijee lɛ efeɔ tamɔ eji hiɛtserɛjiemɔ kɛ miishɛɛ nii lɛ? Kɛtsɔ nɔ ni baajɛ mli aba lɛ hesusumɔ nɔ! “Nyɛkalakaa nyɛhe: Nyɔŋmɔ lɛ, aliii lɛ yaka. Ejaakɛ nɔ pɛ ni gbɔmɔ duɔ lɛ, no nɔŋŋ ebaakpa hu. Ejaakɛ mɔ ní duɔ nii yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ.” (Galatabii 6: 7, 8) Kɛ aaka bo koni oŋmɛɛ ohe aha akɔnɔ lɛ, susumɔ nɔ ni he hiaa fe fɛɛ​—bɔ ni enɛ baadɔ Yehowa Nyɔŋmɔ waa aha lɛ he. (Okɛto Lala 78:41 he.) Agbɛnɛ hu susumɔ hɔŋɔɔ ni otaooo, loo hela tamɔ AIDS ni ooona lɛ he. Susumɔ ohenumɔ ni baafite kɛ bulɛ ni oyɔɔ kɛhaa ohe lɛ ni ooolaaje lɛ he okwɛ. Nibii ni sɛɛ tsɛɔ hu baanyɛ ajɛ mli aba. Kristofonyo yoo ko kpɛlɛ nɔ akɛ: “Mi kɛ miwu fɛɛ kɛ mɛi krokomɛi na bɔlɛ dani wɔbale wɔhe. Eyɛ mli akɛ Kristofoi ji wɔyi enyɔ lɛ fɛɛ ŋmɛnɛ moŋ, shi wɔ tsutsu nifeemɔ yɛ bɔlɛnamɔ he lɛ etsɔ nɔ ni kɛ bei kɛ awuŋayeli baa wɔ gbalashihilɛ lɛ mli.” Nɔ ni esaaa akɛ okuɔ ohiɛ oshwieɔ nɔ hu ji teokrase hegbɛi ni ooolaaje loo shwiemɔ ni aaashwie bo kɛaajɛ Kristofoi asafo lɛ mli lɛ! (1 Korintobii 5:​9-13) Ani be kukuoo mli miishɛɛnamɔ ko sa nyɔmɔ babaoo ni awoɔ nɛɛ?

Mɔ kɛ Yehowa Teŋ Wekukpaa ni Bɛŋkɛ Kpaakpa ni Aaatiu

13, 14. (a) Mɛni hewɔ efaaa kɛkɛ akɛ aaajo foi kɛjɛ efɔŋ he lɛ? (b) Te mɔ ko aaafee tɛŋŋ ‘atiu Yehowa ni ele lɛ’?

¹³ Shi akɛ aaajo foi kɛjɛ efɔŋ he lɛ kɛkɛ faaa. Awo Timoteo hewalɛ hu akɛ “[e]tiu jalɛ, hemɔkɛyeli, suɔmɔ kɛ hejɔlɛ” sɛɛ. Enɛ tsɔɔ nifeemɔ ni naa wa. Gbalɔ Hoshea kpa Israel maŋ ni yeee anɔkwa lɛ fai nakai nɔŋŋ akɛ: “Nyɛbaa ni wɔkua wɔsɛɛ wɔyaa Yehowa ŋɔɔ! . . . Nyɛhaa wɔlea ni wɔtiua Yehowa he nilee lɛ.” (Hoshea 6:​1-3) Ani otiu nɔ ko ni tamɔ nɛkɛ bo diɛŋtsɛ? Efe kpeei ni oooya kɛ ofɔlɔi ahe ni ooofata kɛaaya shiɛmɔ kɛkɛ. Kristofonyo yoo ko jaje akɛ: “Mifɔlɔi tsɔse mi yɛ anɔkwale lɛ mli, ni abaptisi mi beni midako tsɔ. . . . Miyaa kpeei daa kɛ shiɛmɔ hu yɛ daa nyɔŋ nɔ, shi minaaa mikɛ Yehowa teŋ wekukpaa ni bɛŋkɛ kpaakpa.”

¹⁴ Gbekɛ yoo kroko hu kpɛlɛ nɔ akɛ lɛ hu enaaa ele Yehowa akɛ Naanyo kɛ Tsɛ, ebuɔ lɛ Mumɔ ko ni etse ehe babaoo moŋ. Ekɛ ehe wo jeŋba shara mli, ni ebafɔ bi ni bɛ tsɛ beni eye afi 18. Kaatɔ tamɔ bɔ ni etɔ nɛɛ! ‘Tiumɔ Yehowa he nilee’ taakɛ Hoshea wo hewalɛ lɛ. Kɛ otsɔ sɔlemɔ nɔ okɛ Yehowa nyiɛ daa lɛ, obaanyɛ ofee lɛ oshieŋtsɛ ni okɛ lɛ yeɔ teemɔŋ sane. (Okɛto Mika 6:8; Yeremia 3:4 he.) Kɛ wɔtao lɛ lɛ, “ekɛ wɔteŋ mɔ fɛɛ mɔ teŋ jɛkɛɛɛ.” (Bɔfoi lɛ Asaji 17:27) No hewɔ lɛ, mɔ diɛŋtsɛ Biblia kasemɔ yɛ teemɔŋ ni ato he gbɛjianɔ daa he miihia. Esaaa akɛ nikasemɔ he gbɛjianɔtoo nɛɛ feɔ babaoo ni yɔɔ hwanyaŋŋ. Gbekɛ yoo ko ni atsɛɔ lɛ Melody kɛɛ: “Mikɛ minitii 15 kaneɔ Biblia lɛ daa gbi.” Too be oma shi ni okane Buu-Mɔɔ kɛ Awake! lɛ eko fɛɛ eko ni baa lɛ fɛɛ. Saamɔ ohe kɛha asafoŋ kpeei koni onyɛ “okanya mɛi krokomɛi kɛya suɔmɔ kɛ nitsumɔi kpakpa ahe.”​—Hebribii 10:​24, 25, New World Translation.

Okɛ Otsui Aha Ofɔlɔi

15. (a) Mɛni hewɔ ewa yɛ bei komɛi amli akɛ mɔ ko aaabo efɔlɔi atoi lɛ? (b) Mɛni hewɔ yɛ bei babaoo mli lɛ toiboo he baa sɛɛnamɔ kɛhaa obalaŋta lɛ?

¹⁵ Fɔlɔi ni sheɔ Nyɔŋmɔ gbeyei lɛ baanyɛ afee yelikɛbuamɔ kɛ sɛɛfimɔ diɛŋtsɛ jɛɛhe. Shi kadimɔ ogbɛfaŋnɔ ní obaatsu yɛ enɛ mli lɛ: “Nyɛboa nyɛfɔlɔi lɛ atoi yɛ Nuŋtsɔ lɛ mli; ejaakɛ enɛ ja. ‘Wo otsɛ kɛ onyɛ,’ no ji klɛŋklɛŋ kita ni hiɛ shiwoo akɛ: ‘Koni ahi ahao, ni otsɛ yɛ shikpɔŋ lɛ nɔ.’” (Efesobii 6:​1-3) Eji anɔkwale akɛ ooda ni eka shi faŋŋ akɛ obaasumɔ heyeli babaoo. Obaanyɛ oya nɔ oyoo ofɔlɔi lɛ afatɔi hu be fɛɛ be. Bɔfo Paulo kpɛlɛ nɔ akɛ, “nɔ ni wɔ heloo naa tsɛmɛi lɛ susuɔ akɛ ehi fe fɛɛ lɛ pɛ amɛnyɛɔ amɛfeɔ amɛhaa wɔ.” (Hebribii 12:​10, The Jerusalem Bible) Fɛɛ sɛɛ lɛ, kɛ asusu emli sɛɛnamɔi lɛ ahe lɛ, wɔnaa he sɛɛ kɛ wɔbo amɛ toi. Ofɔlɔi sumɔɔ bo ni amɛle bo jogbaŋŋ fe mɔ fɛɛ mɔ. Eyɛ mli akɛ okɛ amɛ kpaŋ gbee yɛ nɔ fɛɛ nɔ mli moŋ, shi kɛlɛ nibii ni baahi aha bo fe fee ji nɔ ni yɔɔ amɛtsui mli. Mɛni hewɔ esa akɛ ote shi owo mɔdɛŋ ni amɛbɔɔ koni amɛlɛ bo “yɛ Nuŋtsɔ [Yehowa] tsɔsemɔ kɛ ŋaawoo lɛ mli” lɛ? (Efesobii 6:⁠4) Yɛ anɔkwale mli lɛ, kwashia pɛ “gbeɔ etsɛ tsɔse mɔ he guɔ.” (Abɛi 15:⁠5) Bi nilelɔ lɛ baayoo hegbɛ ni efɔlɔi yɔɔ lɛ ni ejie bulɛ ni sa kpo etsɔɔ amɛ.​—Abɛi 1:8.

16. (a) Mɛni hewɔ nilee bɛ mli akɛ obalaŋtai kɛ amɛ naagbai aaatee amɛfɔlɔi lɛ? (b) Mɛni obalaŋtai baanyɛ afee koni sanegbaa yɛ amɛkɛ amɛfɔlɔi ateŋ lɛ aya hiɛ?

¹⁶ Nɔ ni fata he ji anɔkwale ni okɛ ofɔlɔi aaawie, ni oha amɛle kɛ okɛ naagbai miikpe, yɛ saji tamɔ oyiŋ ni feɔ bo kɔshikɔshi yɛ anɔkwale lɛ he loo jenba ko ni ehiii ni okɛ ohe woɔ mli lɛ nɛkɛ. (Efesobii 4:25) Shihilɛi ni gbaa mɔ naa nɛɛ ni okɛaatee ofɔlɔi lɛ kɛ naagbai loo haomɔi babaoo moŋ baa. (Lala 26:⁠4) Wɔkpɛlɛɔ nɔ akɛ, mɔdɛŋ fioo ko pɛ fɔlɔi komɛi bɔɔ yɛ amɛbii ni amɛkɛ amɛ aaagba sane lɛ mli. Gbekɛ yoo ko wie akɛ: “Minyɛ kɛ mi taaa shi ni ekɛ mi agba sane. Miishe gbeyei po akɛ makɛɛ lɛ bɔ ni minuɔ nɔ ko he mihaa, ejaakɛ miishe gbeyei akɛ ebaajɛ’ mi.” Kɛ oyɛ shihilɛ ni tamɔ nakai nɔŋŋ mli lɛ, okɛ nilee ahala be ni sa koni oha ofɔlɔi ale osusumɔi. Abɛi 23:26 woɔ hewalɛ akɛ: “Mibi, ŋɔɔ otsui oha mi.” Bɔɔ mɔdɛŋ ni okɛ amɛ agba nibii ni osusuɔ he lɛ ahe sane be fɛɛ be, dani naagbai ni hiɛdɔɔ yɔɔ mli lɛ aje shishi.

Yaa nɔ Otiu Jalɛ Sɛɛ!

17, 18. Mɛni baaye abua obalaŋta lɛ koni eya nɔ yɛ jalɛ sɛɛ ni etiuɔ lɛ mli?

¹⁷ Paulo wo Timoteo ŋaa kɛmiiba ewolo ni ji enyɔ lɛ naagbee gbɛ akɛ: “Hii shi yɛ nii ni okase ni oyɔɔ hewalɛ yɛ nɔ lɛ amli.” (2 Timoteo 3:14) Nakai pɛpɛɛpɛ esa akɛ ofee. Kaaha mɔ ko loo nɔ ko miilaka bo kɛmiijɛ jalɛ sɛɛ ni otiuɔ lɛ he. Satan je​—kɛ emli nibii fɛɛ ni lakaa mɔ lɛ mli eyi obɔ kɛ efɔŋfeemɔ. Etsɛŋ ni je lɛ kɛ mɛi fɛɛ ni ji efa lɛ ahiɛ baakpata. (Lala 92:⁠8) Tswaa ofai shi akɛ oŋmɛŋ gbɛ ni akpata okɛ Satan asafo lɛ hiɛ.

¹⁸ Akɛni ohiɛ yiŋtoo ni tamɔ nɛkɛ hewɔ lɛ, esa akɛ opɛi otii ni okɛmamɔ ohiɛ, okɔnɔi kɛ nibii ni onyaa he lɛ amli be fɛɛ be. Bi ohe akɛ, ‘Ani mikɛ wiemɔ kpakpa kɛ jeŋba kpakpa tsuɔ nii yɛ be mli ni mifɔlɔi kɛ asafo lɛ mlibii enaaa mi lɛ? Mɛɛ nanemɛi nɛkɛ mihalaa? Ani mitipɛŋfoi ni yɔɔ je lɛ mli lɛ tsɔɔ nɔ̃ atade ni miwo kɛ bɔ ni misaa mihe miha? Mɛɛ otii mikɛmamɔ shi miha mihe? Ani misumɔɔ be-fɛɛ sɔɔmɔ lɛ waa​—loo mikɛ mitsui ema Satan nibii agbɛjianɔtoo ni gboɔ nɛɛ mli nitsumɔ ko moŋ nɔ?

19, 20. (a) Mɛni hewɔ esaaa akɛ obalaŋta ko nuɔ he akɛ Yehowa taomɔ nii eye enɔ lɛ? (b) Mɛɛ gbɛjianɔtoi nɛkɛ obalaŋtai baanyɛ aha ehe aba sɛɛnamɔ aha amɛ?

¹⁹ Ekolɛ oona bɔ ni ehe hiaa ni ofee tsakemɔi komɛi yɛ osusumɔ mli lɛ. (2 Korintobii 13:11) Kaanu he akɛ aye onɔ. Kaimɔ akɛ Yehowa kpaaa babaoo gbɛ kɛjɛɛɛ odɛŋ fe bɔ ni sa. Gbalɔ Mika bi akɛ: “Nɔ ni Yehowa biɔ yɛ odɛŋ . . . ji akɛ ofee nɔ ni ja gbɛ, ni osumɔ ejurɔfeemɔ, ni okɛ o-Nyɔŋmɔ lɛ anyiɛ yɛ heshibaa mli.” (Mika 6:⁠8) Enɛ efeŋ nɔ ni wa kɛ okɛ gbɛjianɔ ni Yehowa eto koni ekɛye ebuao lɛ tsu nii. Okɛ ohe akpɛtɛ ofɔlɔi ahe. Okɛ Kristofoi asafo lɛ abɔ daa. Titri lɛ bɔɔ mɔdɛŋ ni ole asafo lɛ mli onukpai lɛ. Amɛsusuɔ ohilɛkɛhamɔ he ni amɛbaanyɛ amɛfee sɛɛfimɔ kɛ miishɛjemɔ jɛɛhe kɛha bo. (Yesaia 32:⁠2) Nɔ ni fe fɛɛ lɛ, taomɔ okɛ Yehowa Nyɔŋmɔ teŋ wekukpaa ni bɛŋkɛ kpaakpa ni miishɛɛ yɔɔ mli. Ebaaha bo hewalɛ kɛ nyɛmɔ ni okɛaatiu nɔ ni ja lɛ sɛɛ!

²⁰ Shi, obalaŋtai komɛi fiteɔ mɔdɛŋ ni amɛ bɔɔ koni amɛdara yɛ mumɔŋ lɛ kɛtsɔɔ lalai ni ehiii ni amɛboɔ toi lɛ nɔ. Nikasemɔ ni nyiɛ sɛɛ nɛɛ baaje gbɛ atsu nɛkɛ sane nɛɛ he nii.

[Shishigbɛ niŋmai]

Ani Okaiɔ?

◻ Mɛni hewɔ Satan “ŋaatsɔi” duɔ obalaŋtai tritri lɛ?

◻ Mɛni hewɔ je lɛŋ obalaŋtai ni akɛ amɛ aaabɔ gbagbalii lɛ yɔɔ ashara lɛ?

◻ Te ooofee teŋŋ ojo bɔlɛnamɔ mli jeŋba shara naa foi?

◻ Te oofee tɛŋŋ odi okɛ Yehowa teŋ wekukpaa ni bɛŋkɛ kpaakpa sɛɛ?

◻ Mɛni hewɔ ehe hiaa akɛ okɛ ofɔlɔi awie loo okɛ amɛ agba sane lɛ?

[Mfoniri ni yɔɔ baafa 16]

Mɛi enyɔ ni taoɔ amɛbote gbalashihilɛ mli lɛ leɔ amɛhe yɛ shwɛmɔ kɛ hiɛtserɛjiemɔ hei ni bɛ banee ni gbɔmɛi krokomɛi yɔɔ jɛmɛ