Yehowa Ji Wɔ-nuŋtsɔ Ofe!
“Mikɛ Nuŋtsɔ [Ofe] Yehowa efee mibobaahe.”—LALA 73:28.
1. Mɛni ekolɛ Paulo wiemɔ ni yɔɔ 1 Korintobii 7:31 lɛ kɔɔ he?
“JE NƐŊ subaŋ lɛ hoɔ yaa.” Bɔfo Paulo ji mɔ ni wie wiemɔ nɛɛ. (1 Kor. 7:31) Hela wiemɔ ni Paulo kɛtsu nii lɛ hewɔ lɛ, eeenyɛ efee akɛ ekɛ je lɛ miito kpoku ko ni mɛi ni feɔ drama yɛ nɔ lɛ tsuɔ amɛnifeemɔi lɛ ahe nii—kɛ́ nii kpakpa amɛfeɔ yɛ drama lɛ mli jio, nii fɔŋ ni jio—kɛkɛ lɛ kɛ́ amɛgbe amɛnifeemɔ lɛ naa lɛ, nifeemɔ kroko etsa nɔ lɛ he.
2, 3. (a) Mɛni he abaanyɛ akɛ naagba ni akɛba Yehowa nɔyeli lɛ nɔ lɛ ato? (b) Mɛɛ sanebimɔi wɔbaasusu he?
2 Ŋmɛnɛ lɛ, drama ko ni he hiaa waa miiya nɔ—ni ofata emlibii lɛ ahe! Ekɔɔ Yehowa Nyɔŋmɔ nɔyeli lɛ bembuu he titri. Abaanyɛ akɛ nibii ni yaa nɔ yɛ maŋ ko nɔ lɛ afee drama nɛɛ he nɔkwɛmɔnɔ. Ayɛ nɔyeli ko ni ahala ni kwɛɔ koni nɔ fɛɛ nɔ aya nɔ jogbaŋŋ yɛ maŋ nɛɛ nɔ. Shi yɛ nakai beaŋ nɔŋŋ lɛ, awuiyelɔi akuu ko yɛ maŋ nɛɛ mli, ní amɛkɛ ojotswaa, awuiyeli, kɛ gbɔmɔgbee yeɔ mɛi anɔ. Kuu nɛɛ ji naagba kɛha nɔyeli lɛ ejaakɛ amɛhaa ewaa kɛhaa maŋbii lɛ akɛ amɛaaya nɔ amɛye nɔyeli ni ahala lɛ anɔkwa.
3 Jeŋ muu lɛ fɛɛ tamɔ maŋ nɛɛ. “Nuŋtsɔ [Ofe] Yehowa” nɔyeli lɛ ji nɔyeli ni ja ni yɔɔ. (Lala 71:5) Shi amrɔ nɛɛ, awuiyelɔi akuu ko ni “mɔ fɔŋ lɛ” kwɛɔ nɔ lɛ kɛ adesai ashihilɛ ewo oshara mli. (1 Yoh. 5:19) Kuu nɛɛ ji naagba kɛha Nyɔŋmɔ nɔyeli lɛ, ni amɛhaa ewaa kɛhaa adesai akɛ amɛaaya nɔ amɛye Nyɔŋmɔ nɔyeli lɛ anɔkwa. Te fee tɛŋŋ eba lɛ nakai? Mɛni hewɔ Nyɔŋmɔ eŋmɛ enɛ gbɛ? Ákɛ aŋkroaŋkroi lɛ, mɛni wɔbaanyɛ wɔfee yɛ he?
Nibii ni Yaa Nɔ yɛ Drama lɛ Mli
4. Mɛɛ saji enyɔ drama ni yaa nɔ yɛ je lɛŋ fɛɛ lɛ kɔɔ he?
4 Drama ni yaa nɔ yɛ je lɛŋ fɛɛ lɛ kɔɔ saji enyɔ ni tsakpãa yɔɔ amɛteŋ lɛ ahe: Yehowa nɔyeli lɛ, kɛ emuuyeli mli ni adesai baahiɛ. Bei pii lɛ atsɛɔ Yehowa yɛ Ŋmalɛi lɛ amli akɛ, “Nuŋtsɔ [Ofe].” Ákɛ nɔkwɛmɔnɔ lɛ, akɛni lalatsɛ lɛ ná hekɛnɔfɔɔ kwraa yɛ Nyɔŋmɔ mli hewɔ lɛ, elá akɛ: “Mikɛ Nuŋtsɔ [Ofe] Yehowa efee mibobaahe.” (Lala 73:28) Ofe ji mɔ ni yɔɔ hegbɛ fe fɛɛ yɛ maŋtsɛyeli ko mli. Wɔyɛ yiŋtoi kpakpai ahewɔ ni esa akɛ wɔbu Yehowa Nyɔŋmɔ akɛ Ofe lɛ.—Dan. 7:22.
5. Mɛni hewɔ esa akɛ wɔkpɛlɛ Yehowa nɔyeli lɛ nɔ lɛ?
5 Ákɛ Bɔlɔ lɛ, Yehowa Nyɔŋmɔ ji Ofe yɛ shikpɔŋ lɛ kɛ jeŋ muu lɛ fɛɛ nɔ. (Nyɛkanea Kpojiemɔ 4:11.) Yehowa ji wɔ-Kojolɔ, wɔ-Mlawolɔ, kɛ wɔ-Maŋtsɛ, ni tsɔɔ akɛ lɛ pɛ ji mɔ ni kojoɔ saji, woɔ mlai, kɛ mɔ ni kwɛɔ koni nɔ fɛɛ nɔ aya nɔ jogbaŋŋ yɛ je lɛ mli. (Yes. 33:22) Akɛni Nyɔŋmɔ ni ha wɔba shihilɛ mli, ni wɔwala damɔ enɔ hewɔ lɛ, esa akɛ wɔna lɛ akɛ wɔ-Nuŋtsɔ Ofe. Kɛ́ wɔha ehi wɔjwɛŋmɔ mli be fɛɛ be akɛ “Yehowa lɛ, eŋɔ emaŋtsɛsɛi lɛ ema shi yɛ ŋwɛi, ni emaŋtsɛyeli lɛ yeɔ nii fɛɛ nɔ” lɛ, no baakanya wɔ koni wɔkpɛlɛ egbɛhe ni nɔ kwɔ lɛ nɔ.—Lala 103:19; Bɔf. 4:24.
6. Mɛni emuuyeli mlihiɛmɔ tsɔɔ?
6 Bɔni afee ni wɔfĩ Yehowa nɔyeli lɛ sɛɛ lɛ, esa akɛ wɔya nɔ wɔhiɛ emuuyeli mli wɔha lɛ. “Emuuyeli mlihiɛmɔ” tsɔɔ jeŋ ni abaa jogbaŋŋ kɛmɔɔ shi. Emuuyeli mlihiɛlɔ ji mɔ ko ni kpa ko bɛ ehe, ni eja. Blematsɛ Hiob ba ejeŋ yɛ nakai gbɛ nɔ.—Hiob 1:1.
Bɔ ni Drama lɛ Je Shishi
7, 8. Te Satan wie eshi gbɛ nɔ ni Yehowa tsɔɔ eyeɔ nɔ lɛ eha tɛŋŋ?
7 Nɔ ni fe afii 6,000 ni eho nɛ lɛ, mumɔŋ bɔɔ nɔ ko wie eshi gbɛ nɔ ni Yehowa tsɔɔ eyeɔ nɔ lɛ. Pɛsɛmkunya shwelɛ ni atuatselɔ nɛɛ ná akɛ ajá lɛ lɛ ji nɔ ni tsirɛ lɛ ni efee enii yɛ nakai gbɛ nɔ, ni ewie eshi Yehowa lɛ. Elaka Adam kɛ Hawa, ni ji klɛŋklɛŋ adesai enyɔ lɛ koni amɛtse Nyɔŋmɔ nɔyeli lɛ hiɛ atua, ni ebɔ mɔdɛŋ akɛ eeegbe Yehowa gbɛ́i lɛ he guɔ kɛtsɔ kɛɛmɔ ni ekɛɛ akɛ Yehowa emale lɛ nɔ. (Nyɛkanea 1 Mose 3:1-5.) Atuatselɔ lɛ batsɔ Henyɛlɔ kpele, Satan (Shiteekɛwolɔ), Abonsam (Heguɔgbelɔ), onufu (shishiulɔ), kɛ drako (hiɛkpatalɔ).—Kpoj. 12:9.
8 Satan fee ehe nɔyelɔ ni kɛ Yehowa miitswa. Mɛni Nuŋtsɔ Ofe Yehowa baafee yɛ Satan nifeemɔ nɛɛ he? Ani ebaakpata atuatselɔi etɛ nɛɛ—Satan, Adam, kɛ Hawa, hiɛ amrɔ nɔŋŋ? Ŋwanejee ko bɛ he akɛ ebaanyɛ efee nakai aahu, ni kulɛ no baaha efee faŋŋ akɛ Yehowa ji Ofe lɛ. Agbɛnɛ hu, no baatsɔɔ akɛ nɔ ni Yehowa wie akɛ no ji toigbalamɔ kɛha emla lɛ mlikuu lɛ ji anɔkwale. Shi mɛni hewɔ Nyɔŋmɔ efeee nakai lɛ?
9. Mɛni Satan tsɔɔ akɛ Yehowa bɛ hegbɛ akɛ enine shɛɔ nɔ?
9 Satan malemɔ lɛ, kɛ agbɛnɛ hu Adam kɛ Hawa ni eha amɛtse amɛhe kɛjɛ Nyɔŋmɔ he lɛ tsɔɔ akɛ eewie eeshi hegbɛ ni Yehowa yɔɔ akɛ ebi ni adesai abo lɛ toi lɛ. Kɛfata he lɛ, Satan tsɔ lakamɔ ni elaka klɛŋklɛŋ adesai enyɔ lɛ koni amɛgbo Nyɔŋmɔ nɔ toi lɛ nɔ etsɔɔ akɛ adesai kɛ ŋwɛi bɔfoi fɛɛ nyɛŋ aye Nyɔŋmɔ anɔkwa. Taakɛ wɔnaa yɛ Hiob ni fĩ Yehowa nɔyeli lɛ sɛɛ lɛ sane lɛ mli lɛ, Satan tsɔɔ akɛ ebaanyɛ eha adesai fɛɛ atse amɛhe kɛjɛ Nyɔŋmɔ he.—Hiob 2:1-5.
10. Akɛni Nyɔŋmɔ haaa ana amrɔ nɔŋŋ akɛ lɛ ji Ofe hewɔ lɛ, mɛɛ hegbɛ eha Satan?
10 Akɛni Yehowa kɛ hegbɛ ni eyɔɔ akɛ egbala atuatselɔi lɛ atoi koni ana akɛ lɛ ji Ofe lɛ tsuuu nii amrɔ nɔŋŋ hewɔ lɛ, eha Satan hegbɛ koni ekɛtsɔɔ kɛji nɔ ni ewieɔ lɛ ji anɔkwale. Agbɛnɛ hu Nyɔŋmɔ eha adesai hegbɛ koni amɛkɛtsɔɔ kɛji amɛbaafĩ enɔyeli lɛ sɛɛ. Mɛni eba yɛ afii ohai abɔ ni eho lɛ mli? Satan eto awuiyelɔi akuu ko ni yɔɔ hewalɛ waa shishi. Beni yi aaawula shi lɛ, Yehowa baakpata kuu nɛɛ kɛ Abonsam hiɛ, ni no baaha ana faŋŋ akɛ Nyɔŋmɔ ji mɔ ni esa akɛ eye wɔnɔ. Yehowa Nyɔŋmɔ le akɛ bɔ fɛɛ bɔ ni fee lɛ ebaaye bem, no hewɔ lɛ egba enɛ efɔ̃ shi beni atse ehiɛ atua yɛ Eden lɛ.—1 Mose 3:15.
11. Mɛɛ gbɛ nɔ adesai babaoo etsɔɔ akɛ amɛfĩɔ Yehowa nɔyeli lɛ sɛɛ?
11 Adesai babaoo etee nɔ amɛhiɛ amɛhemɔkɛyeli kɛ emuuyeli lɛ mli, ni amɛkɛtsɔɔ akɛ amɛfĩɔ Yehowa nɔyeli lɛ sɛɛ, ni amɛkɛtse egbɛ́i lɛ he. Amɛteŋ mɛi komɛi ji Habel, Henok, Noa, Abraham, Sara, Mose, Rut, David, Yesu, mra be mli Kristo kaselɔi lɛ, kɛ emuuyeli mlihiɛlɔi akpekpei abɔ ni yɔɔ ŋmɛnɛ lɛ. Mɛi ni fĩɔ Nyɔŋmɔ nɔyeli lɛ sɛɛ nɛɛ eha ana faŋŋ akɛ shwã ni Abonsam shwã akɛ ebaanyɛ etse adesai fɛɛ kɛjɛ Nyɔŋmɔ he, ni no kɛ heguɔgbee ba Yehowa gbɛ́i lɛ nɔ lɛ ji amale.—Abɛi 27:11.
Wɔle Bɔ ni Drama lɛ Naa Baayakpa Aha
12. Mɛni haa wɔnáa nɔmimaa akɛ Nyɔŋmɔ eŋmɛŋ gbɛ ni efɔŋfeemɔ aya nɔ kɛya naanɔ?
12 Wɔbaanyɛ wɔná nɔmimaa akɛ etsɛŋ Yehowa baaha ana akɛ lɛ ji Ofe. Eŋmɛŋ gbɛ ni efɔŋfeemɔ aya nɔ kɛya naanɔ, ni wɔle akɛ wɔyɛ naagbee gbii lɛ amli. Yehowa kpata efɔŋfeelɔi ahiɛ yɛ Nu Afua lɛ mli. Ekpata Sodom kɛ Gomora, kɛ Farao kɛ etabilɔi lɛ ahiɛ. Sisera kɛ etabilɔi lɛ, kɛ Sanherib kɛ Ashur asraafoi lɛ nyɛɛɛ Ofe lɛ hiɛ adamɔ. (1 Mose 7:1, 23; 19:24, 25; 2 Mose 14:30, 31; Koj. 4:15, 16; 2 Maŋ. 19:35, 36) No hewɔ lɛ, wɔbaanyɛ wɔná nɔmimaa akɛ Yehowa Nyɔŋmɔ eŋmɛŋ gbɛ ni aya nɔ agbe egbɛ́i lɛ he guɔ, ní awa e-Dasefoi lɛ ayi kɛya naanɔ. Kɛfata he lɛ, amrɔ nɛɛ wɔnaa okadi ni tsɔɔ akɛ Yesu eba, ni wɔyɛ jeŋ fɔŋ nɛɛ naagbee gbii lɛ amli.—Mat. 24:3.
13. Mɛni kɛ́ wɔfee lɛ, ehaŋ akpata wɔhiɛ ashi Yehowa henyɛlɔi lɛ anɔ?
13 Bɔni afee ni akakpata wɔhiɛ ashi Nyɔŋmɔ henyɛlɔi lɛ anɔ lɛ, esa akɛ wɔya nɔ wɔfĩ Yehowa nɔyeli lɛ sɛɛ. Te wɔɔfee tɛŋŋ wɔfee nakai? Kɛtsɔ wɔhe kwraa ni wɔɔtsi kɛjɛ Satan awuiyeli nɔyeli lɛ he, kɛ shi ni wɔɔfĩ koni esamaŋfoi lɛ akawo wɔhe gbeyei lɛ nɔ. (Yes. 52:11; Yoh. 17:16; Bɔf. 5:29) Ja wɔfee nakai pɛ dani wɔbaanyɛ wɔfĩ wɔŋwɛi Tsɛ lɛ nɔyeli lɛ sɛɛ, ni no baaha wɔná hiɛnɔkamɔ akɛ Yehowa kpataŋ wɔhiɛ beni etséɔ egbɛ́i lɛ he, ní etsɔɔ akɛ lɛ ji Jeŋ Muu lɛ fɛɛ Ofe lɛ.
14. Mɛni Biblia lɛ mli fãi srɔtoi lɛ haa wɔleɔ?
14 Agbála Yehowa nɔyeli lɛ, kɛ bɔ ni adesai feɔ amɛ nii yɛ he lɛ mli fitsofitso yɛ Biblia lɛ mli. Klɛŋklɛŋ yitsei etɛ lɛ wieɔ adebɔɔ, kɛ bɔ ni fee ni adesai yabote esha mli lɛ he, ni naagbee yitsei etɛ lɛ wieɔ bɔ ni abaafee ajie esha kɛya. Yitsei krokomɛi lɛ wieɔ nibii ni Nuŋtsɔ Ofe Yehowa feɔ koni ekɛha eyiŋtoo kɛha adesai, shikpɔŋ lɛ, kɛ jeŋ muu lɛ fɛɛ aba mli lɛ he. Mose Klɛŋklɛŋ Wolo lɛ tsɔɔ bɔ ni fee ni Satan ba je lɛ mli, kɛ bɔ ni fee ni efɔŋfeemɔ ba jeŋ, ni Kpojiemɔ Wolo lɛ naagbee yitsei lɛ haa wɔnaa bɔ ni abaafee ajie efɔŋfeemɔ kɛya, ni akpata Abonsam hiɛ, kɛ bɔ ni abaafee ni afee Nyɔŋmɔ suɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi lɛ. Hɛɛ, Biblia lɛ haa wɔnaa nɔ ni kɛ esha kɛ gbele ba, ni etsɔɔ bɔ ni abaafee ajie amɛ kɛjɛ shikpɔŋ lɛ nɔ, ní akɛ miishɛɛ ni sɛɛ efooo kɛ naanɔ wala ato najiaŋ aha emuuyeli mlihiɛlɔi lɛ.
15. Ákɛ aŋkroaŋkroi lɛ, mɛni esa akɛ wɔfee koni kɛ́ drama ni kɔɔ nɔyeli he lɛ ba naagbee lɛ, wɔná he sɛɛ?
15 Etsɛŋ ni je nɛŋ subaŋ lɛ baaho aya kwraa. Drama ni kɔɔ nɔyeli he, ní akɛ afii ohai abɔ efee lɛ baaba naagbee. Abaajie Satan kɛjɛ drama kpoku lɛ nɔ, ni abaakpata ehiɛ kwraa, ni abaafee Nyɔŋmɔ suɔmɔnaa nii yɛ jeŋ muu lɛ fɛɛ. Shi bɔ ni afee ni wɔná enɛ he sɛɛ, ní wɔná jɔɔmɔi babaoo ni agba afɔ̃ shi yɛ Nyɔŋmɔ Wiemɔ lɛ mli lɛ he sɛɛ lɛ, esa akɛ wɔfĩ Yehowa nɔyeli lɛ sɛɛ bianɛ. Esa akɛ wɔtsɔɔ mɔ ni sɛɛ ní wɔfĩɔ. Bɔni afee ni wɔnyɛ wɔkɛɛ akɛ “Yehowa yɛ misɛɛ” lɛ, esa akɛ wɔhi emasɛi daa.—Lala 118:6, 7.
Wɔbaanyɛ Wɔya Nɔ Wɔhiɛ Emuuyeli Mli!
16. Mɛni hewɔ wɔbaanyɛ wɔná nɔmimaa akɛ adesai baanyɛ ahiɛ emuuyeli mli amɛha Nyɔŋmɔ lɛ?
16 Wɔbaanyɛ wɔfĩ Yehowa nɔyeli lɛ sɛɛ, ni wɔya nɔ wɔhiɛ emuuyeli mli, ejaakɛ bɔfo Paulo ŋma akɛ: “Kaa ko bako nyɛnɔ ni jeee gbɔmɔ he nɔ̃; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ní nyɛje mli hu, koni nyɛnyɛ mli nyɛmɔ.” (1 Kor. 10:13) Nɛgbɛ kaa ni Paulo tsĩ tã lɛ jɛɔ kɛbaa, ni mɛɛ gbɛ nɔ Nyɔŋmɔ jeɔ gbɛ ehaa wɔ koni wɔnyɛ wɔje mli?
17-19. (a) Mɛɛ kaa Israelbii lɛ ŋmɛɛ amɛhe amɛha yɛ ŋa lɛ nɔ? (b) Mɛni hewɔ wɔbaanyɛ wɔya nɔ wɔhiɛ emuuyeli mli wɔha Yehowa lɛ?
17 Tamɔ bɔ ni niiashikpamɔ ni Israelbii lɛ ná yɛ ŋa lɛ nɔ lɛ tsɔɔ lɛ, “kaa” lɛ baa kɛtsɔ shihilɛi ni baanyɛ aha wɔku Nyɔŋmɔ mla mli lɛ anɔ. (Nyɛkanea 1 Korintobii 10:6-10.) Beni Yehowa tsɔ naakpɛɛ gbɛ nɔ eha Israelbii lɛ trakɔkɔi ni amɛbaanyɛ amɛye nyɔɔŋ muu fɛɛ lɛ, kulɛ shihilɛ lɛ efeŋ kaa kɛhaŋ amɛ, shi amɛha “nibii fɔji” fee amɛ akɔnɔ. Eyɛ mli akɛ amɛye loo etsɛ moŋ, shi Nyɔŋmɔ eha amɛ mana ni fa bɔ ni sa. Fɛɛ sɛɛ lɛ, amɛyayeee amɛhe nɔ, ni amɛkɛ hiɛkɔ̃ɔ bua trakɔkɔi lɛ babaoo naa.—4 Mose 11:19, 20, 31-35.
18 Dani sane nɛɛ aaaba lɛ, be ko beni akɛ Mla lɛ haa Mose yɛ Sinai Gɔŋ lɛ nɔ lɛ, Israelbii lɛ já tsinabi amaga, ni amɛbɔ ahoshwi, ni no ha amɛtsɔmɔ wɔŋjalɔi. Akɛni amɛhiɛnyiɛlɔ Mose bɛ hewɔ lɛ, ebafee kaa kɛha amɛ ni amɛkɛ amɛhe wo efɔŋfeemɔ mli vii. (2 Mose 32:1, 6) Beni eshwɛ fioo ni Israelbii lɛ baabote Shiwoo Shikpɔŋ lɛ nɔ lɛ, Moab yei lɛ laka amɛteŋ mɛi akpei abɔ, ni amɛkɛ amɛ bɔ ajwamaŋ. Yɛ nakai be lɛ mli lɛ, Israelbii akpei abɔ gboi yɛ esha nɛɛ ni amɛfee lɛ hewɔ. (4 Mose 25:1, 9) Bei komɛi lɛ, Israelbii lɛ ŋmɛɔ amɛhe amɛhaa kaa ni baaha amɛkɛ atuatsemɔ awie huhuuhu lɛ, ni be ko lɛ amɛwie amɛshi Mose kɛ Nyɔŋmɔ diɛŋtsɛ po! (4 Mose 21:5) Beni akpata efɔŋfeelɔi ni ji Kora, Datan, Abiram, kɛ mɛi krokomɛi ni fata amɛhe lɛ ahiɛ lɛ, Israelbii lɛ wie huhuuhu amɛshi akɛ toigbalamɔ ni akɛba amɛnɔ lɛ ejaaa. Nɔ ni jɛ mli ba ji akɛ, Nyɔŋmɔ ha gbele hela kpata Israelbii 14,700 hiɛ.—4 Mose 17:6, 14.
19 Kai ni atsĩ tã kɛtsɔ hiɛ ni Israelbii lɛ kɛkpe lɛ ji kai ni kulɛ amɛbaanyɛ amɛye nɔ. Akɛni amɛhiɛ kpa Yehowa, kɛ suɔmɔ mli ni ejɛɔ ekwɛɔ amɛ, kɛ bɔ ni egbɛi ja ha lɛ nɔ, ni hemɔkɛyeli ni amɛyɔɔ yɛ emli lɛ hu tã hewɔ lɛ, amɛnyɛɛɛ amɛye kai lɛ anɔ. Taakɛ eba lɛ yɛ Israelbii lɛ agbɛfaŋ lɛ, kai ni wɔkɛkpeɔ lɛ ji adesai ahe nɔ̃. Kɛ́ wɔfee bɔ fɛɛ bɔ ni wɔɔnyɛ koni wɔye nɔ, ni wɔkɛ wɔhe fɔ̃ Nyɔŋmɔ nɔ koni ewaje wɔ lɛ, wɔbaanyɛ wɔya nɔ wɔhiɛ emuuyeli mli. Wɔbaanyɛ wɔná nɔmimaa yɛ enɛ he ejaakɛ “anɔkwafo ji Nyɔŋmɔ,” ni eŋmɛɛɛ gbɛ ni ‘aka wɔ fe bɔ ni wɔɔnyɛ.’ Yehowa kwɛŋ ni aka wɔ aahu akɛ wɔkɛ shihilɛ ko ni adesa ko nyɛŋ afee Nyɔŋmɔ suɔmɔnaa nii yɛ mli lɛ akpe.—Lala 94:14.
20, 21. Kɛ́ wɔkɛ kai miikpe lɛ, mɛɛ gbɛi anɔ Yehowa tsɔɔ ‘ejeɔ gbɛ’ ehaa wɔ?
20 Yehowa ‘jeɔ gbɛ’ ehaa wɔ kɛtsɔ nyɛmɔ ni ekɛhaa wɔ koni wɔnyɛ wɔdamɔ kaa naa lɛ nɔ. Ákɛ nɔkwɛmɔnɔ lɛ, ekolɛ shiteekɛwolɔi baafee wɔ niseniianii koni wɔŋmɛɛ wɔhemɔkɛyeli lɛ he. Ekolɛ shihilɛ ni tamɔ nɛkɛ lɛ baaka wɔ koni wɔŋmɛɛ saji ahe kɛsaa bɔni afee ni akaya nɔ ayi wɔ, apiŋ wɔ, loo agbe wɔ po. Shi hewalɛwoo wiemɔ ni akɛ mumɔ tsirɛ Paulo ni ewie yɛ 1 Korintobii 10:13 lɛ haa wɔleɔ akɛ kaa lɛ eyaŋ nɔ daa. Yehowa eŋmɛŋ gbɛ ni kaa lɛ aya nɔ kɛyashi heni wɔnyɛŋ wɔye lɛ anɔkwa dɔŋŋ. Nyɔŋmɔ baanyɛ awaje wɔhemɔkɛyeli lɛ, ni ebaanyɛ ewaje wɔ yɛ mumɔŋ koni wɔnyɛ wɔya nɔ wɔhiɛ emuuyeli mli.
21 Yehowa tsɔɔ emumɔ krɔŋkrɔŋ lɛ nɔ ewajeɔ wɔ. Nakai mumɔ lɛ hu haa wɔkaiɔ Ŋmalɛ mli saji ni baaye abua wɔ koni wɔnyɛ wɔdamɔ kai anaa. (Yoh. 14:26) No hewɔ lɛ, alakaŋ wɔ koni wɔkɛ wɔhe awo nifeemɔ ko ní ejaaa mli. Ákɛ nɔkwɛmɔnɔ lɛ, wɔnuɔ sane ni kɔɔ Yehowa nɔyeli lɛ, kɛ nɔ hewɔ ni esa akɛ adesai ahiɛ emuuyeli mli lɛ he lɛ shishi. Nyɔŋmɔ etsɔ nilee nɛɛ nɔ ewaje mɛi babaoo ni amɛtee nɔ amɛye lɛ anɔkwa kɛtee gbele mli. Shi jeee gbo ni amɛgboi lɛ tsɔɔ akɛ amɛdamɔ kaa lɛ naa; Yehowa ji mɔ ni ye ebua amɛ ni amɛnyɛ amɛkpee kaa lɛ naa kɛyashi naagbee. Ebaanyɛ efee nakai nɔŋŋ kɛha wɔ. Nɔ ni esa akɛ wɔkadi hu ji akɛ, ehaa ebɔfoi anɔkwafoi lɛ sɔmɔɔ akɛ ‘mɛi ni yiwalaheremɔ lɛ yelɔi lɛ asɔɔmɔ hewɔ atsu amɛ.’ (Heb. 1:14) Taakɛ nikasemɔ ni nyiɛ sɛɛ lɛ baatsɔɔ lɛ, mɛi ni hiɛɔ emuuyeli mli pɛ baanyɛ akpá gbɛ akɛ amɛbaaná hegbɛ ni nɔ bɛ kɛfĩ Nyɔŋmɔ nɔyeli lɛ sɛɛ kɛya naanɔ. Kɛ́ wɔkpɛtɛ Yehowa he akɛ wɔ-Nuŋtsɔ Ofe lɛ, wɔbaanyɛ wɔfata mɛi nɛɛ ahe.
Te Obaaha Hetoo Oha Tɛŋŋ?
• Mɛni hewɔ esa akɛ wɔkpɛlɛ Yehowa nɔ akɛ lɛ ji wɔ-Nuŋtsɔ Ofe lɛ?
• Mɛni emuuyeli mli ni wɔɔya nɔ wɔhiɛ wɔha Nyɔŋmɔ lɛ biɔ ni wɔfee?
• Te wɔfeɔ tɛŋŋ wɔleɔ akɛ etsɛŋ ni Yehowa baaha ana akɛ lɛ ji mɔ ni yɔɔ hegbɛ akɛ eyeɔ nɔ lɛ?
• Taakɛ 1 Korintobii 10:13 lɛ tsɔɔ lɛ, mɛni hewɔ wɔbaanyɛ wɔya nɔ wɔhiɛ emuuyeli mli lɛ?
[Mfoniri ni yɔɔ baafa 24]
Satan laka Adam kɛ Hawa koni amɛgbo Yehowa nɔ toi
[Mfoniri ni yɔɔ baafa 26]
Tswaa ofai shi akɛ obaafĩ Yehowa nɔyeli lɛ sɛɛ