Yitso 16
“Okadi” Ni Atsɔ Hiɛ Agba Afɔ Shi Lɛ Naagbee Ebɛŋkɛ
1. Mɛni hewɔ wɔbaanyɛ wɔda shi akɛ Yesu bɔfoi lɛ bi lɛ sane ni yɔɔ Mateo 24:3 lɛ?
1 WƆ NI WƆYƆƆ wala mli ŋmɛnɛ lɛ baanyɛ ada shi akɛ Yesu Kristo bɔfoi lɛ bi lɛ nɛkɛ sane nɛɛ: “Kɛɛmɔ wɔ, Mɛɛ be mli nibii nɛɛ baaba, ni mɛni ji beni oba lɛ kɛ nibii agbɛjianɔtoo nɛɛ naagbee lɛ he okadi?” (Mateo 24:3, NW) Amɛ sanebimɔ lɛ ha ekɛ gbalɛ kakadaŋŋ ko mlitsɔɔmɔ ni ji anɔkwale ni haa wɔnaa kpɛɔ wɔhe ha yɛ be mli ni wɔnaa emlibaa yɛ wɔ afii ohai nyɔŋmai enyɔ nɛɛ mli lɛ. Enɛ yeɔ ebuaa wɔ ni wɔleɔ he ni wɔshɛ yɛ Nyɔŋmɔ yiŋtoo he nii ni etsuɔ yɛ adesai ni naa nɔ̃ lɛ ahe lɛ mli jogbaŋŋ. Wɔ hemɔkɛyeli akɛ Kristo ‘ba ni eba’ yɛ mumɔŋ ni anaaa lɛ lɛ mli wɔyɔɔ nɛɛ diɛŋtsɛ yɛ “nibii agbɛjianɔtoo lɛ naagbee” mli lɛ woɔ wɔ hewalɛ waa, akɛni wɔmiina “okadi” lɛ ni egba efɔ shi lɛ hewɔ.
2. Nɛgbɛ ji he ni atsɔɔ “okadi” nɛɛ kɛ emli nibii Iɛ fɛɛ yɛ, no hewɔ lɛ mɛɛ sane lɛ fa wɔbaasusu he agbɛnɛ?
2 “Okadi” lɛ mli nibii fɛɛ miiba naagbee ni emli nɔ fɛɛ nɔ miifee faŋŋ ni nɔ ko bɛ ni mɛi ni naa nɔ ni yaa nɔ lɛ aaadamɔ nɔ ni amɛtɔ̃ yɛ mli yɛ gbɛ ko nɔ. Nibii sɔrɔtoi babaoo yɔɔ “okadi” lɛ mli, taakɛ eyɔɔ Mateo nɔ̃ ni ewie he lɛ mli lɛ, yɛ yitso nyɔŋmai enyɔ kɛ ejwɛ kɛ nyɔŋmai enyɔ kɛ enumɔ, Marko nɔ̃ lɛ, yɛ yitso nyɔŋma kɛ etɛ, kɛ Luka nɔ̃ lɛ, yitso nyɔŋmai enyɔ kɛ ekome; ni ehe adesa yinɔ kome wala be koni “okadi” nɛɛ mli nibii lɛ fɛɛ aba mli. Wɔsusu “okadi” lɛ mli nibii komɛi ahe yɛ Mateo sane lɛ mli, yɛ yitso nyɔŋmai enyɔ kɛ enumɔ yɛ wolo nɛɛ mli yitsei ni etsɔ hiɛ lɛ amli. Agbɛnɛ wɔmiisusu emli nibii ni awie he yɛ yitso nyɔŋmai enyɔ kɛ ejwɛ lɛ mli kɛ emli saji krokomɛi ni Marko kɛ Luka kɛha lɛ hu he.
3, 4. Beni amɛbiɔ Yesu akɛ, “Mɛɛ be mli nibii nɛɛ baaba” lɛ, belɛ mɛni nibii kaselɔi lɛ tsɔɔ lɛ?
3 Beni Kristo bɔfoi lɛ je amɛ sanebimɔ lɛ shishi akɛ, “Kɛɛmɔ wɔ, mɛɛ be mli nibii nɛɛ baaba” lɛ, no mli lɛ amɛmiiwie nibii ni Yesu etsɔ hiɛ egba yɛ nakai gbi lɛ anɔ nɔŋŋ, Jufɔ, Nisan 11, yɛ afi 33 Ŋ.B. lɛ he. Yerusalem sɔlemɔwe lɛ nɔŋŋ, yɛ be mli ni ewie eshi jamɔŋ woloŋmalɔi osatofoi lɛ kɛ Farisifoi lɛ sɛɛ lɛ, Yesu tee nɔ ekɛɛ akɛ: “No hewɔ lɛ, naa, miitsu gbalɔi kɛ nilelɔi kɛ woloŋmalɔi kɛba nyɛŋɔɔ, ni nyɛaagbe amɛteŋ mɛi komɛi, ni nyɛaasɛŋ mɛi komɛi, ni mɛi komɛi lɛ nyɛaayi amɛ kpelebii yɛ nyɛ kpee hei lɛ, ni nyɛaawa amɛ yi kɛaajɛ maŋ mli kɛaatee maŋ mli. Bɔni afee ni jalɔi alá lɛ fɛɛ ni ashwie shi yɛ shikpɔŋ lɛ nɔ kɛjɛ Habel, jalɔ lɛ, lá lɛ nɔ kɛbashi Zakaria, Barakia bi lɛ, ni nyɛgbe lɛ yɛ sɔlemɔtsu lɛ kɛ afɔleshaa latɛ lɛ teŋ lɛ lá lɛ aba nyɛnɔ. Lɛlɛŋ, miikɛɛnyɛ akɛ: Enɛɛmɛi fɛɛ baaba yinɔbii nɛɛ anɔ. Yerusalem, Yerusalem, bo mɔ ni ogbɛɔ gbalɔi lɛ ni otswiaa mɛi ni atsuɔ amɛ oŋɔɔ lɛ atɛi: shii enyiɛ mitao akɛ kulɛ mibuaa obii anaa tamɔ bɔ ni wuɔ buaa ebii anaa ewoɔ efiji ashishi lɛ, ni nyɛkpɛlɛɛɛ! Naa, aaashi nyɛ we lɛ amaŋfo ahanyɛ! Ejaakɛ miikɛɛnyɛ akɛ: Kɛjɛ be nɛɛ nɔ kɛyaa nɛɛ nyɛnaŋ mi dɔŋŋ kɛyashi beyinɔ ni nyɛaakɛɛ akɛ: ‘Ajɔɔ mɔ ni baa yɛ Nuŋtsɔ [Yehowa] gbɛi anɔ lɛ.’”
4 Dani Yesu baashi sɔlemɔwe lɛ aloo jamɔ we lɛ, ekɛ wiemɔi krokomɛi fata gbalɛ ni hiɛdɔɔ yɔɔ mli lɛ he, ni wɔkaneɔ yɛ enɛ he akɛ: “Ni Yesu miije kpo yɛ sɔlemɔwe lɛ, ni eya. Ni ekaselɔi lɛ ba eŋɔɔ ni amɛbatsɔɔ lɛ sɔlemɔwe lɛ tsui lɛ. Ni Yesu kɛɛ amɛ akɛ: Nto nyɛmiina nii nɛɛ fɛɛ? Lɛlɛŋ, miikɛɛnyɛ akɛ: Ashiŋ tɛ kome yɛ eko nɔ yɛ biɛ ni akpaŋ aluŋ shi.”—Mateo 23:34 kɛyashi 24:2.
5. Beni eta teji nɔ kɛbote Yerusalem yɛ kunimyeli mli Iɛ, no mli lɛ mɛni ji nɔ ni Yesu ewie yɛ maŋ lɛ he?
5 Gbii enyɔ pɛ dani eeewie enɛ lɛ, yɛ Hɔgbaa, Nisan 9 lɛ, ewa edamɔ shi yɛ be mli ni eta teji nɔ kɛbote Yerusalem yɛ kunimyeli mli lɛ, ni efo yɛ maŋ lɛ hewɔ, yɛ ehiɛkpatamɔ ni baa lɛ hewɔ. Beni egbaa ehiɛkpatamɔ ni yɔɔ gbeyei ni Romabii lɛ kɛbaaba yɛ afi 70 Ŋ.B. lɛ ekɛɛ akɛ: “Shi ogbii miiba, ni ohenyɛlɔi lɛ aaatsa bu awo ohe, ni amɛaabɔleo kpula ni amɛaasa oyi yɛ he fɛɛ he, ni amɛaaŋɔo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ ekroko nɔ yɛ omli, ejaakɛ oyooo osaramɔ be lɛ.”—Luka 19:41-44.
6. Mɛɛ gbalɛi enɛɛmɛi ji kɛha nakai heloo nɛɛ Yudafoi ni afo amɛ ketia ni ji kaselɔi Iɛ, ni mɛɛ jwɛŋmɔŋ naagbai enɛ kɛbafɔ amɛnɔ?
6 Kɛha heloo naa Yudafoi ni afo amɛ ketia taakɛ Kristo bɔfoi lɛ ji lɛ, enɛɛmɛi ji gbalɛi ni gbaa mɔ naa waa. Lá ni yeɔ bem ni amɛfɔse amɛshwie shi yɛ Yudafoi ayinɔsane be fɛɛ mli lɛ baaba yinɔ ni amɛyɔɔ mli lɛ nɔ. Shi mɛɛ be mli kwraa nɛkɛ nibii nɛɛ baaba mli? Amɛmiisumɔ ni amɛle. Amɛhe amɛye ni amɛkpɛlɛ nɔ akɛ Yesu ji Mesia loo Mɔ ni Afɔ lɛ Mu ni ji Kristo lɛ. Shi Yerusalem hiɛkpatamɔ ni egba efɔ shi lɛ tsɔɔ akɛ etoŋ e-Mesia Maŋtsɛyeli lɛ emaŋ nakai maŋ ni abu lɛ fɔ aha hiɛkpatamɔ lɛ mli. Ewie akɛ anaŋ lɛ dɔŋŋ “kɛjɛ be nɛɛ nɔ kɛyaa nɛɛ” ni ewie ba ni eeeba yɛ “Yehowa gbɛi anɔ” lɛ he. Mɛɛ be mli ebaaba ekoŋŋ ebatsu e-Mesia nitsumɔ lɛ? Yerusalem kɛ sɔlemɔtsu lɛ hiɛkpatamɔ ni baa lɛ baatsɔɔ Yudafoi anibii agbɛjianɔtoo lɛ naagbee diɛŋtsɛ. Akɛni amɛbɛ maŋ krɔŋkrɔŋ ko ni amɛbɛ sɔlemɔwe krɔŋkrɔŋ ko hewɔ lɛ, eka shi faŋŋ akɛ Yudafoi lɛ osɔfoyeli ni yɔɔ Aaron Levinyo lɛ weku mli lɛ baafata nɛkɛ Yerusalem “bii” ni aaaŋɔ amɛ ‘atswia shi’ aloo aaashɔ sɔlemɔwe sɔɔmɔ lɛ kɛaajɛ amɛdɛŋ lɛ ahe. Ŋwanejee kwraa bɛ he akɛ jeee Yerusalem kɛ esɔlemɔwe lɛ hiɛkpatamɔ lɛ pɛ kɛkɛ he sane bɔfoi lɛ bi, shi moŋ, “mɛni ji beni oba lɛ kɛ nibii agbɛjianɔtoo nɛɛ naagbee lɛ he okadi?”
7. Mɛni hewɔ ni bɔfoi lɛ asanebimɔ ni kɔɔ “nibii agbɛjianɔtoo lɛ naagbee” he Iɛ ji saji ni ábi jogbaŋŋ lɛ?
7 Saji ni amɛbibii yɛ nibii titri ahe lɛ ja, ejaakɛ Yesu baaa yɛ Yudafoi anibii agbɛjianɔtoo lɛ “naagbee” mli. Ŋmalɛi krokomɛi wieɔ shihilɛ lɛ he kɛ nakai shishinumɔ nɔŋŋ. Hebribii 9:26-28 tsɔɔ akɛ ehe ehiaaa ni Yesu aya nɔ ekɛ ehe asha afɔlei shii abɔ, ni ekɛɛ akɛ: “Kulɛ esa akɛ ena amanehulu kpitio kpitio kɛjɛ jeŋ shishijee beebe; shi agbɛnɛ lɛ shikome kɛkɛ ejie lɛ kpo yɛ jeŋbei lɛ anaagbee lɛ mli, koni ekɛ lɛ diɛŋtsɛ ehe ni ekɛsha afɔle lɛ ajie esha lɛ. . . . Nakai nɔŋŋ Kristo hu . . . aŋɔ lɛ aha shikome koni etere mɛi pii ahe eshai lɛ kɛya.” Agbɛnɛ hu, 1 Korintobii 10:11 kɛɔ akɛ: “Shi afee amɛ enɛɛmɛi fɛɛ ni akɛto okadi ahawɔ, ni aŋma ni aŋɔ bɔ wɔ kɔkɔ, wɔ mɛi ni je lɛ naagbee enina wɔ lɛ.” Kɛ akane kɛjɛ afi nɔ ni Yesu kɛ nakai gbalɛ ni kɔɔ sane lɛ he lɛ ha lɛ, no mli lɛ Yudafoi anibii agbɛjianɔtoo lɛ yɛ afii nyɔŋmai etɛ kɛ kpawo lolo ni ebaaya, nɔ ni shɛɛɛ yinɔ ni hiɛ wala sɛɛ kɛlɛ ni feɔ afii nyɔŋmai ejwɛ. Aye Yerusalem nɔ kunim ni Romabii lɛ kpata hiɛ yɛ Elul 7, (aloo August 30, 70 Ŋ.B., Gregoria Kalanda be) . Biblia mli niŋmaa etsɔɔɔ Kristo bɔfoi lɛ ateŋ mɛi abɔ ni jo lá odasefoi ni amɛaatsɔmɔ lɛ naa foi ni amɛhi shi aahu kɛyashi nakai hiɛkpatamɔ ni yɔɔ gbeyei lɛ mli.
June Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)