Yɛ je lɛŋ fɛɛ lɛ, mɛi hiɛ susumɔi srɔtoisrɔtoi yɛ dãanumɔ he. Mɛi komɛi lɛ, bei komɛi kɛ́ amɛkɛ amɛnanemɛi bua amɛhe naa lɛ, amɛnuɔ dãa. Mɛi komɛi hu ekpɛ mli akɛ amɛnuŋ dãa kwraa. Ni mɛi komɛi lɛ, amɛnuɔ aahu kɛyashiɔ amɛtɔɔ. Mɛni Biblia lɛ kɛɔ yɛ dãanumɔ he?

1. Ani eji tɔmɔ akɛ abaanu dãa?

Biblia lɛ ewieee eshiii dãanumɔ. Moŋ lɛ, be ni ewieɔ nibii babaoo ni Nyɔŋmɔ edro wɔ lɛ ahe lɛ, ekɛɛ edro wɔ “wain hu ni hãa gbɔmɔ tsui náa miishɛɛ.” (Lala 104:​14, 15) Hii kɛ yei anɔkwafoi komɛi ni atsĩ amɛtã yɛ Biblia lɛ mli lɛ nu dãa.​—1 Timoteo 5:23.

2. Mɛɛ ŋaa Biblia lɛ ewo mɛi ni sumɔɔ ni amɛnu dãa lɛ?

Yehowa wieɔ eshiɔ dãanumɔ babaoo kɛ dãatɔɔ. (Galatiabii 5:​21) E-Wiemɔ lɛ kɛɛ: “Okɛ ohe akafutu mɛi ni nuɔ wain babaoo” lɛ. (Abɛi 23:​20) No hewɔ lɛ, kɛ́ wɔkpɛ mli akɛ wɔbaanu dãa lɛ​—yɛ mɛi ateŋ jio, wɔkome pɛ jio lɛ​—esaaa akɛ wɔnuɔ babaoo bɔ ni hãŋ wɔnyɛ wɔjwɛŋ jogbaŋŋ, wɔkudɔ wɔwiemɔi kɛ wɔnifeemɔi, loo bɔ ni baaye wɔgbɔmɔtso lɛ awui. Kɛ́ wɔnyɛɛɛ wɔye wɔhe nɔ yɛ dãa falɛ ni wɔnuɔ lɛ he lɛ, ekolɛ ebaahi akɛ wɔbaakpa dãanumɔ kwraa.

3. Mɛni esa akɛ wɔfee yɛ yiŋ ni mɛi kpɛɔ yɛ dãanumɔ he lɛ he?

Wɔteŋ mɔ fɛɛ mɔ baakpɛ eyiŋ kɛji ebaanu dãa loo enuŋ. Kɛ́ mɔ ko kpɛ eyiŋ akɛ ebaanu dãa bɔ ni sa lɛ, esaaa akɛ wɔwieɔ wɔshiɔ lɛ, ni kɛ́ mɔ ko sumɔɔɔ ni enuɔ dãa hu lɛ, esaaa akɛ wɔnyɛɔ enɔ akɛ enu. (Romabii 14:​10) Kɛ́ wɔna akɛ dãa ni wɔbaanu lɛ baagba mɛi krokomɛi anaa lɛ, wɔnuuu kwraa. (Kanemɔ Romabii 14:​21.) Wɔtaooo ‘nɔ ni wɔ diɛŋtsɛ wɔbaaná he sɛɛ, shi moŋ nɔ ni mɔ kroko baaná he sɛɛ.’​—Kanemɔ 1 Korintobii 10:​23, 24.

KASEMƆ PII OFATA HE

4. Kpɛɛ oyiŋ kɛji obaanu dãa loo onuŋ

Te Yesu na dãanumɔ ehã tɛŋŋ? Eklɛŋklɛŋ naakpɛɛ nii lɛ baahã ona hetoo lɛ. Nyɛkanea Yohane 2:​1-11 lɛ, ni nyɛsusua sanebimɔi nɛɛ ahe:

• Mɛni naakpɛɛ nii nɛɛ tsɔɔ wɔ yɛ bɔ ni Yesu naa dãanumɔ kɛ mɛi ni nuɔ lɛ ehãa lɛ he?

• Akɛni Yesu ewieee eshiii dãanumɔ hewɔ lɛ, kɛ́ mɔ ko kpɛ eyiŋ akɛ ebaanu dãa lɛ, te esa akɛ wɔna mɔ lɛ wɔhã tɛŋŋ?

Eyɛ mli akɛ Kristofonyo yɛ hegbɛ ni enuɔ dãa moŋ, shi no hu etsɔɔɔ akɛ esa akɛ enu yɛ shihilɛ fɛɛ shihilɛ mli. Nyɛkanea Abɛi 22:3 lɛ, ni nyɛsusua shihilɛi ni nyiɛ sɛɛ lɛ ahe, ni okwɛ akɛ esa akɛ onu dãa yɛ nakai shihilɛi lɛ amli lo:

• Oyaadraivi loo okɛ tsɔne ko yaatsu nii.

• Ohiɛ hɔ.

• Dɔkitafonyo ekɛɛ bo akɛ okanu dãa.

• Onyɛɛɛ oye ohe nɔ yɛ dãa falɛ ni onuɔ lɛ he.

• Maŋ lɛ mla eŋmɛɛɛ bo gbɛ ni onu dãa.

• Oyɛ mɔ ko ni ekpɛ eyiŋ akɛ enuŋ dãa lɛ masɛi; ekpɛ nakai yiŋ lɛ, ejaakɛ be ko ni eho lɛ enyɛɛɛ eye ehe nɔ yɛ dãa falɛ ni enuɔ lɛ he.

Ani esa akɛ oja dãa yɛ yookpeemɔ loo henaabuamɔi krokomɛi ashishi? Bɔ ni afee ni ona nɔ ni baawa bo ni okpɛ oyiŋ lɛ, jiemɔ VIDIO lɛ.

VIDIO: Ani Esa Akɛ Mija Dãa Yɛ Jɛmɛ? (2:41)

Nyɛkanea Romabii 13:​13 kɛ 1 Korintobii 10:​31, 32 lɛ. Kɛ́ nyɛkane ŋmalɛi lɛ eko fɛɛ eko nyɛgbe naa lɛ, nyɛsusua sanebimɔ nɛɛ he:

• Mɛɛ gbɛ nɔ shishitoo mla nɛɛ baanyɛ awa bo ni okpɛ yiŋ ni baasa Yehowa hiɛ?

5. Kpɛɛ oyiŋ yɛ dãa falɛ ni esa akɛ onu lɛ he

Kɛ́ okpɛ oyiŋ akɛ obaanu dãa lɛ, kaimɔ enɛ: Eyɛ mli akɛ Yehowa ewieee eshiii dãanumɔ moŋ, shi ewieɔ eshiɔ dãanumɔ babaoo. Mɛni hewɔ? Nyɛkanea Hosea 4:​11, 18 lɛ, ni nyɛsusua sanebimɔ nɛɛ he:

• Kɛ́ mɔ ko nu dãa babaoo lɛ, mɛni baanyɛ aba?

Mɛni baawa wɔ ni wɔkanu dãa babaoo? Esa akɛ wɔle he ni wɔnyɛmɔ yawaa. Nyɛkanea Abɛi 11:2 lɛ, ni nyɛsusua sanebimɔ nɛɛ he:

• Mɛni hewɔ ehi akɛ okɛ husu baawo dãa falɛ ni onuɔ lɛ he lɛ?

6. Nɔ ni baawa bo ni okanu dãa babaoo

VIDIO: ‘Bɔ ni Mihiɔ Shi Hãa lɛ Baje Mitsine Kwraa’ (6:32)

• Kɛ́ Dmitry nu dãa lɛ, te efeɔ enii ehãa tɛŋŋ?

• Ani enyɛ ekpa dãa lɛ numɔ shi kome?

• Naagbee lɛ, mɛni wa lɛ ni enyɛ ekpa dãanumɔ babaoo?

Nyɛkanea 1 Korintobii 6:​10, 11 lɛ, ni nyɛsusua sanebimɔi nɛɛ ahe:

• Mɛni Biblia lɛ kɛɔ yɛ dãatɔɔ he?

• Mɛni tsɔɔ akɛ mɔ ko ni nuɔ dãa babaoo lɛ baanyɛ etsake?

Nyɛkanea Mateo 5:​30 lɛ, ni nyɛsusua sanebimɔ nɛɛ he:

• Nɔkwɛmɔnɔ ni Yesu kɛtsu nii ni kɔɔ mɔ nine ni ebaafo eshɛ efɔ̃ lɛ he lɛ, kɔɔ nɔ ko ni mɔ kɛbaashã afɔle koni enyɛ esa Yehowa hiɛ lɛ he. Kɛ́ ootao okpa dãanumɔ babaoo shi onyɛɛɛ lɛ, mɛni obaanyɛ ofee?a

Nyɛkanea 1 Korintobii 15:​33 lɛ, ni nyɛsusua sanebimɔ nɛɛ he:

• Ani mɛi ni okɛbɔɔ lɛ baanyɛ ahã onu dãa babaoo? Mɛni hewɔ okɛɔ nakai?

EMLI OTI

Yehowa dro wɔ dãa koni ehã wɔná miishɛɛ, shi ewieɔ eshiɔ dãanumɔ babaoo kɛ dãatɔɔ.

Mɛni Okase?

• Mɛni Biblia lɛ kɛɔ yɛ dãanumɔ he?

• Mɛɛ oshãrai yɔɔ daanumɔ babaoo he?

• Mɛni esa akɛ wɔfee yɛ yiŋ ni mɛi kpɛɔ yɛ dãanumɔ he lɛ he?

EHE SAJI KROKOMƐI

Te oblahii kɛ oblayei baafee tɛŋŋ amɛkpɛ yiŋ kpakpai yɛ dãanumɔ he?

Dãanumɔ​—Esɛɛ Sane Lɛ! (2:31)

Kɛ́ onyɛɛɛ oye ohe nɔ yɛ dãa falɛ ni onuɔ lɛ he lɛ, obaana nibii ni obaanyɛ ofee koni onyɛ oye ohe nɔ.

“Bɔ Ni Ooofee Okɛ Dãa Atsu Nii Jogbaŋŋ” (Buu-Mɔɔ, July 1, 2010)

Te esa akɛ Kristofonyo ana glase ni dãa yɔɔ mli ni awóɔ nɔ lɛ ehã tɛŋŋ?

“Sanebimɔi ni Jɛ Kanelɔi Adɛŋ” (Buu-Mɔɔ, February 15, 2007)

Kɛ́ okane sane ni ji, “Kulɛ Kpɛɛtsɛ Ji Mi” lɛ, obaana bɔ ni fee ni nuu ko kpa dãanumɔ babaoo.

“Biblia Lɛ Tsakeɔ Mɛi” (Buu-Mɔɔ, May 1, 2012)

Wɔ fɛɛ wɔyɛ bɔ ni wɔsumɔɔ ni wɔsaa wɔhe wɔhã kɛ bɔ ni wɔsumɔɔ ni wɔhiɛ wɔgbɔmɔtso wɔhã. Biblia mli shishitoo mlai fioo komɛi yɛ ni kɛ́ wɔkɛtsu nii lɛ, wɔbaanyɛ wɔsaa wɔhe bɔ ni wɔsumɔɔ, ni nakai beiaŋ nɔŋŋ lɛ wɔsa Yehowa hiɛ. Hã wɔsusu ekomɛi ahe wɔkwɛ.

1. Mɛɛ shishitoo mlai esa akɛ ekudɔ bɔ ni wɔsaa wɔhe kɛ bɔ ni wɔhiɛɔ wɔgbɔmɔtso wɔhãa?

Esa akɛ wɔkɛ “hiɛ ni gboɔ nɔ kɛ hiɛshikamɔ” ahala ‘atadei ni sa,’ ni wɔhiɛ wɔgbɔmɔtso jogbaŋŋ bɔ ni baahã ana akɛ wɔji “Nyɔŋmɔ jálɔi.” (1 Timoteo 2:​9, 10) Shishitoo mlai ejwɛ nɛɛ baanyɛ awa wɔ: (1) Esa akɛ wɔtadei lɛ afee nɔ ni “sa.” Ekolɛ okpa shi ona yɛ asafoŋ kpeei ashishi akɛ, Yehowa Odasefoi saa amɛhe yɛ gbɛi srɔtoi anɔ, shi atadei ni wɔwoɔ, kɛ bɔ ni wɔfeɔ wɔyitsɔi loo wɔkuɔ wɔyi wɔhãa lɛ, hãa anaa akɛ wɔyɛ bulɛ kɛhã Nyɔŋmɔ ni wɔjáa lɛ. (2) Kɛ́ akɛɛ mɔ ko kɛ “hiɛ ni gboɔ nɔ” saa ehe lɛ, etsɔɔ akɛ mɔ lɛ wooo atadei ni baahã mɛi aná bɔlɛnamɔ akɔnɔi loo ebaagbala mɛi ajwɛŋmɔ kɛba enɔ waa. (3) Kɛ́ jeee hesaamɔ fɛɛ hesaamɔ ni baaba nɔ wɔkɛyaa lɛ, belɛ, wɔkɛ “hiɛshikamɔ” miitsu nii ji no. (4) Be fɛɛ be lɛ, esa akɛ bɔ ni wɔhiɛɔ wɔgbɔmɔtso wɔhãa lɛ ahã mɛi ana faŋŋ akɛ, wɔji anɔkwa ‘Nyɔŋmɔ lɛ jálɔi.’​—1 Korintobii 10:31.

2. Mɛni hewɔ esa akɛ wɔsusu wɔnyɛmimɛi Kristofoi lɛ ahe kɛ́ wɔmiisaa wɔhe?

Eyɛ mli akɛ wɔbaanyɛ wɔhala nɔ ni wɔsumɔɔ ni wɔwo moŋ, shi esa akɛ wɔkwɛ akɛ wɔhesaamɔ lɛ baanyɛ agba mɛi krokomɛi anaa lo. Wɔfeɔ bɔ fɛɛ bɔ ni wɔbaanyɛ koni wɔkafee nɔ ko ni baagba mɔ ko naa, ejaakɛ wɔmiisumɔ ni ‘wɔsa wɔnyɛmi gbɔmɔ hiɛ koni ehi ehã lɛ, ni etswa lɛ ema shi hu.’​—Kanemɔ Romabii 15:​1, 2.

3. Mɛɛ gbɛ nɔ wɔhesaamɔ baanyɛ ahã mɛi abajá Yehowa?

Wɔbɔɔ mɔdɛŋ ni wɔwo atadei ni sa be fɛɛ be, titri lɛ, be ni wɔmiiya asafoŋ kpeei kɛ be ni wɔmiiya shiɛmɔ. Wɔsumɔɔɔ ni bɔ ni wɔsaa wɔhe wɔhãa lɛ gbalaa mɛi ajwɛŋmɔ kɛjeɔ sane kpakpa ni wɔshiɛɔ lɛ nɔ. Moŋ lɛ, wɔmiisumɔ ni bɔ ni wɔsaa wɔhe wɔhãa lɛ ahã mɛi anya anɔkwale lɛ he, ni ‘ewula wɔ-Yiwalaherelɔ lɛ tsɔɔmɔ lɛ.’​—Tito 2:​10.

KASEMƆ PII OFATA HE

4. Kɛ́ wɔhiɛɔ wɔgbɔmɔtso jogbaŋŋ lɛ, etsɔɔ akɛ wɔbuɔ Yehowa

Mɛni ji yiŋtoo titri hewɔ ni esa akɛ wɔhiɛ wɔgbɔmɔtso jogbaŋŋ? Nyɛkanea Lala 47:2 lɛ, ni nyɛsusua sanebimɔi nɛɛ ahe:

• Kɛ́ wɔkai akɛ Yehowa jálɔi ji wɔ lɛ, te no baahã wɔsaa wɔhe wɔhã tɛŋŋ?

• Kɛ́ okwɛ lɛ, jwɛŋmɔ yɛ mli akɛ wɔbaakwɛ jogbaŋŋ yɛ bɔ ni wɔsaa wɔhe wɔhãa lɛ he be ni wɔmiiya asafoŋ kpeei kɛ be ni wɔmiiya shiɛmɔ? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?

5. Mɛni baawa wɔ ni wɔsaa wɔhe ni wɔhiɛ wɔgbɔmɔtso jogbaŋŋ?

Jiemɔ VIDIO lɛ.

VIDIO: “Nyɛfea Nibii Fɛɛ Kɛwoa Nyɔŋmɔ Hiɛ Nyam” (10:18)

Wɔtadei lɛ ajara wa jio, amɛjara waaa jio, esa akɛ amɛhe atse ni amɛfee nɔ ni sa kɛhã nɔ ni wɔkɛfeɔ lɛ. Nyɛkanea 1 Korintobii 10:​24 kɛ 1 Timoteo 2:​9, 10 lɛ. No sɛɛ lɛ, nyɛsusua nɔ hewɔ ni esaaa ni wɔwoɔ atadei ni nyiɛ sɛɛ nɛɛ ahe. Atadei ni . . .

• awoɔ lɛ eko kɛ eko kɛkɛ loo atade ko kɛkɛ ni awoɔ.

• hãa mɛi náa bɔlɛnamɔ akɔnɔi, ni tsɔɔ akɛ, emɔ mɔ pampii, loo ehãa anaa gbɔmɔtso lɛ hei ni esaaa akɛ anaa.

Eyɛ mli akɛ Kristofoi bɛ Mose Mla lɛ shishi moŋ, shi ehãa anaa Yehowa susumɔ yɛ saji ahe. Nyɛkanea 5 Mose 22:5 lɛ, ni nyɛsusua sanebimɔ nɛɛ he:

• Mɛni hewɔ esaaa akɛ wɔsaa wɔhe loo wɔhiɛɔ wɔgbɔmɔtso bɔ ni baahã kɛ́ hii ji wɔ lɛ ana wɔ tamɔ yei, ni kɛ́ yei ji wɔ lɛ ana wɔ tamɔ hii?

Nyɛkanea 1 Korintobii 10:​32, 33 kɛ 1 Yohane 2:​15, 16 lɛ, ni nyɛsusua sanebimɔi nɛɛ ahe:

• Mɛni hewɔ esa akɛ wɔkwɛ jogbaŋŋ ni wɔhesaamɔ akagba wɔkutsoŋbii lɛ, loo wɔsafoŋbii lɛ anaa lɛ?

• Mɛɛ atadei mɛi woɔ yɛ he ni oyɔɔ lɛ, ni te amɛhiɛɔ amɛgbɔmɔtsei amɛhãa tɛŋŋ?

• Kɛ́ okwɛ lɛ, hesaamɔi nɛɛ ekomɛi yɛ ni esaaa kɛhã Kristofoi? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?

EMLI OTI

Kɛ́ wɔsaa wɔhe jogbaŋŋ, ni wɔhiɛɔ wɔgbɔmɔtso jogbaŋŋ hu lɛ, etsɔɔ akɛ wɔbuɔ Yehowa kɛ mɛi krokomɛi.

Mɛni Okase?

• Ani bɔ ni wɔsaa wɔhe kɛ bɔ ni wɔhiɛɔ wɔgbɔmɔtso wɔhãa lɛ kɔɔ Yehowa he eko? Mɛni hewɔ okɛɔ nakai?

• Mɛni ji shishitoo mlai komɛi ni esa akɛ ekudɔ bɔ ni wɔsaa wɔhe kɛ bɔ ni wɔhiɛɔ wɔgbɔmɔtso wɔhãa?

• Ani wɔhesaamɔ baanyɛ ahã mɛi abajá Yehowa? Mɛni hewɔ okɛɔ nakai?

EHE SAJI KROKOMƐI

Obaana nɔ ni ohesaamɔ kɛɔ mɛi yɛ ohe.

“Te Mɛi Naa Mihesaamɔ Tɛŋŋ?” (jw.org lɛ nɔ sane)

Obaana nɔ hewɔ ni esa akɛ okwɛ jogbaŋŋ dani ofee tatuu lɛ.

“Mɛni Biblia Lɛ Kɛɔ Yɛ Tatuu He?” (jw.org lɛ nɔ sane)

Obaana shishitoo mlai krokomɛi ni baanyɛ akudɔ wɔyiŋkpɛi.

“Ani Ohesaamɔ Woɔ Nyɔŋmɔ Hiɛ Nyam?” (Buu-Mɔɔ, September 2016)

Te fee tɛŋŋ ni yoo ko ni yɔɔ tsui kpakpa lɛ baná susumɔ ni ja yɛ bɔ ni mɛi krokomɛi saa amɛhe amɛhãa lɛ he?

“Kulɛ Bɔ Ni Mɛi Krokomɛi Saa Amɛhe Amɛhãa Lɛ Gbaa Minaa” (Awake!, December 22, 2003)