Nyɛyaa Nyɛhiɛ, Nyɛ Maŋtsɛyeli Lɛ He Sɔɔlɔi!
“Tsu sanekpakpa jajelɔ nitsumɔ lɛ, gbee osɔɔmɔ lɛ naa kwraa!”—2 Timoteo 4:5.
1. Mɛni ji sɔrɔtofeemɔ ni ka Babilon kpeteŋkpele Iɛ mumɔŋ shihilɛ kɛ Yehowa Odasefoi anɔ̃ lɛ teŋ?
1 Ŋmɛnɛ, apasa jamɔ mumɔŋ lɛɛhei lɛ egbi ni nui ni Babilon kpeteŋkpele lɛ ta nɔ lɛ miigbi yɛ shikpɔji babaoo nɔ. Ehaa wɔkaiɔ Yesaia gbalɛ ko ni miiba mli yɛ wɔbe nɛɛ mli, ni ji, nɔ ni anaa yɛ Yesaia 65:13 lɛ: “Naa, mitsuji lɛ aaaye nii, shi nyɛ lɛ hɔmɔ aaaye nyɛ; naa, mitsuji Iɛ aaanu nii, shi nyɛ lɛ kumai aaye nyɛ; naa, mitsuji lɛ aaanya, shi nyɛ lɛ nyɛhiɛ aaagboi.” Nɛkɛ sane lɛ ji, ejaakɛ Yehowa webii lɛ miitao Maŋtsɛyeli lɛ klɛŋklɛŋ lɛlɛŋ, amɛmiibɔ mɔdɛŋ ni amɛkwɛ akɛ aashiɛ Nyɔŋmɔ maŋtsɛyeli lɛ ni yɔɔ e-Maŋtsɛ kɛ e-Bi Kristo Yesu dɛŋ lɛ he sane kpakpa lɛ yɛ shikpɔŋ muu lɛ fɛɛ nɔ.—Kpojiemɔ 17:6-8; 16:12; 17:5, 15.
2. Gbɛnaa ni ka namɛi anɔ akɛ amɛya amɛhiɛ akɛ Maŋtsɛyeli lɛ he sɔɔlɔi?
2 Famɔ ni tamɔ tsɛmɔ ni yɔɔ wɔgbii nɛɛ amli lɛ ji ‘Nyɛyaa nyɛhiɛ, nyɛ Maŋtsɛyeli lɛ he sɔɔlɔi!’ Bɔni afee ni amɛbo nɛkɛ tsɛmɔ nɛɛ toi akɛ wɔ-Nuŋtsɔ Yesu Kristo sɛɛnyiɛlɔi akuu hewɔ lɛ, Yehowa Odasefoi fɛɛ, ni akɛ nɔkwɛmɔ nitsumɔ ko ewo amɛdɛŋ, kɛ mɛi krokomɛi fɛɛ, hii, yei, gbekɛbii hii kɛ gbekɛbii yei yɛ gbɛnaa nii akɛ amɛdamɔ shi amɛha Nyɔŋmɔ maŋtsɛyeli lɛ shishi. (Lala 145:10-12; 148:12, 13; 2 Timoteo 4:2, 5) Nɛkɛ sane lɛ ji, eyɛ mli akɛ yɛ shihilɛ mli naagbai komɛi ahewɔ lɛ mɛi pii nyɛɛɛ afee babaoo tamɔ mɛi krokomɛi. Shi kɛ lɛ, amɛnitsumɔ lɛ haa wɔkaiɔ yoo okulafo lɛ ni kɛ nɔ fɛɛ nɔ ni eyɔɔ lɛ ha, eyɛ mli akɛ fɛɛ jara ji tsaakpoo pɛ lɛ.—Luka 21:1-4.
3. Te Maŋtsɛyeli Iɛ he hiaa adesai ha tɛŋŋ yɛ nɛkɛ be nɛɛ mli, ni mɛni fata Maŋtsɛyeli lɛ he sane Iɛ he?
3 Ani Maŋtsɛyeli lɛ he miihia adesai ŋmɛnɛ? Oo, kwɛ bɔ ni Maŋtsɛyeli lɛ he hiaa amɛ ha! Ehe miihia amɛ, jeee ni ekɛ piŋmɔ, hela, awerɛho kɛ gbele aba naagbee pɛ kɛkɛ, shi moŋ ni ekɛ nii ni ejaaa fɛɛ, yiwalɛ fɛɛ, awuyeli fɛɛ, basabasafeemɔ kɛ ta, hɛɛ, ni ekɛ jalɛsane ni ayeee kɛ hiɛaŋkwɛmɔ ni yɔɔ lɛ fɛɛ aba naagbee. (Yesaia 9:6) Kɛtsɔ wɔhiɛ ni wɔyaa akɛ Maŋtsɛyeli lɛ he sɔɔlɔi hewɔ lɛ, wɔkɛ nɔ ko ni gbɔmɛi Iɛ ahiɛ baakã nɔ miiha amɛ, nɔ ko ni baawaje amɛ kɛyashi be mli ni Harmagedon kɛ Satan nibii agbɛjianɔtoo nɛɛ aaaba naagbee. Yɛ mlakwamɔ ni faa hewɔ lɛ esa akɛ wɔya wɔhiɛ, jeee kɛ suɔmɔ kɛ hiɛnɔkamɔ he sane lɛ pɛ kɛkɛ, shi moŋ kɛ kɔkɔbɔɔ sane ni kɔɔ ‘wɔ-Nyɔŋmɔ lɛ oweletɔɔ gbi’ lɛ he lɛ.—Yesaia 61:1, 2.
4. Mɛni esa akɛ efee kanyamɔ titri ni baaha mɔ ko afee Nyɔŋmɔ maŋtsɛyeli lɛ he sɔɔlɔ ni yɔɔ ekãa?
4 Shi yɛ mɛɛ gbɛ nɔ wɔɔnyɛ wɔkɛ he ni akɛshaa afɔle mumɔ atsu nii yɛ jeŋ ni kanyamɔi ni ejaaa kɛ hesuɔmɔ mumɔ eyi mli obɔ nɛɛ mli ákɛ Nyɔŋmɔ tsuji kɛha je lɛ? Klɛŋklɛŋ kwraa lɛ, yɛ duromɔ ni Yehowa ejie lɛ kpo etsɔɔ wɔ lɛ hewɔ lɛ, wɔbaasumɔ ni wɔjɛ wɔ suɔmɔ mli wɔya wɔhiɛ, yɛ hiɛsɔɔ ni wɔyɔɔ kɛha nibii fɛɛ ni efee lɛ hewɔ, ni eka he efeɔ, ni ebaafee lolo aha wɔ lɛ hewɔ. Taakɛ bɔfo Yohane kaiɔ wɔ lɛ, ni wɔɔsɔmɔ Nyɔŋmɔ lɛ tsɔɔ akɛ wɔɔye ekitai lɛ anɔ, ni ekitai Iɛ ekome ji ni wɔshiɛ emaŋtsɛyeli lɛ he sanekpakpa lɛ. (Mateo 24:14; 1 Yohane 5:3) Agbɛnɛ hu, aashwa Yehowa Nyɔŋmɔ yɛ adesai anaagbai ahewɔ ni aafolɔ enaa akɛ Nyɔŋmɔ ni kɛ naanɔ piŋmɔ baa mɛi anɔ. Yɛ anɔkwale mli lɛ, suɔmɔ kɛha Yehowa, wɔ ŋwɛi Tsɛ ni yɔɔ suɔmɔ lɛ baatsirɛ wɔ ni wɔya wɔhiɛ akɛ esɔɔlɔi, ni wɔye wɔbua ni atse egbɛi lɛ he kɛjɛ heguɔgbee ni ehiii kwraa nɛɛ mli.
5. Mɛɛ kanyamɔ kroko wɔyɔɔ ni baaha wɔya wɔhiɛ akɛ Nyɔŋmɔ sɔɔlɔi?
5 Suɔmɔ kɛha wɔnaanyo gbɔmɔ hu baatsirɛ wɔ ni wɔya wɔhiɛ akɛ Nyɔŋmɔ maŋtsɛyeli lɛ he sɔɔlɔi. Suɔmɔ kɛha wɔkuuŋnyo baaha wɔkɛ emumɔŋ nibii aye klɛŋklɛŋ gbɛhe, enaanɔ hiɛnɔkamɔ, aye wɔ diɛŋtsɛ wɔ miishɛɛ nibii ahiɛ. Suɔmɔ baatsirɛ wɔ ni wɔtsu nii yɛ wɔshikpɔŋkuku lɛ mli yɛ be kɛ bei amli shii abɔ ni wɔfee enɛ kɛmɔ shi. Suɔmɔ baakanya wɔ ni wɔfee sɛɛsaramɔi ni wɔkpɛlɛ gbɛnaa nii ni daa otsi shia Biblia mli nikasemɔi ni wɔkɛ mɛi ni sumɔɔ anɔkwale lɛ aaafee lɛ kɛfɔɔ wɔ nɔ lɛ nɔ. Enɛ tsɔɔ akɛ wɔmiisumɔ ni wɔmli ahi, wɔto wɔtsui shi, wɔhe ajɔ, ni wɔkɛ ŋaa atsu nii, ni wɔjie henumɔ kɛ mɔbɔnalɛ kpo.
6. Yɛ mɛɛ gbɛ nɔ wɔhiɛ ni wɔɔku wɔshwie wɔsɔɔmɔ lɛ nɔ lɛ aaaha wɔlaaje miishɛɛ?
6 Ani wɔheɔ Nyɔŋmɔ Wiemɔ lɛ wɔyeɔ Iɛlɛŋ? Ekɛɔ wɔ akɛ “nɔ hamɔ mli yɛ miishɛɛ fe hemɔ.” (Bɔfoi 20:35) Kɛji akɛ wɔku wɔhiɛ wɔshwie shiɛmɔ nitsumɔ lɛ nɔ lɛ, belɛ wɔkɛ wɔnifeemɔ miitsɔɔ akɛ wɔheee nakai Yesu wiemɔi lɛ diɛŋtsɛ wɔyeee. Amaa nɔ mi ahaa wɔ akɛ kɛji ‘wɔdũ babaoo lɛ, wɔbaakpa babaoo hu,’ ni ‘susuma ni haa mɛi shwereɔ lɛ, lɛ hu eeeshwere.’ Ni agbɛnɛ ‘mɔ ni haa mɛi tɔrɔɔ lɛ, lɛ hu eeetɔ.’ Enɛɛmɛi jeee wiemɔi ni ŋɔɔ kɛkɛ, shi amɛji anɔkwalei ni anyɛŋ ajo naa foi kɛ shishitoo mlai ni kaa suɔmɔ ni wɔyɔɔ kɛha Yehowa Nyɔŋmɔ kɛ wɔnaanyo, anɔkwale ni wɔyeɔ Nyɔŋmɔ maŋtsɛyeli lɛ ekwɛɔ.—2 Korintobii 9:6; Abɛi 11:25.
7. Yɛ mɛɛ gbɛ nɔ mɔ ko aaatsɔ afee mɔ ni eye ehe kɛjɛ adesai fɛɛ alá he?
7 Shi jeee mɛi awala pɛ kɛkɛ ka oshara mli. Esa akɛ wɔya wɔhiɛ akɛ Nyɔŋmɔ maŋtsɛyeli lɛ he sɔɔlɔi beni afee ni wɔye wɔhe kɛjɛ lá yi sɔ̃ mi wɔɔye lɛ he. Kaimɔ wiemɔ ɛni yɔɔ Ezekiel 33:2-4 lɛ: “Gbɔmɔ bi, wiemɔ otsɔɔ omaŋ lɛŋ bii lɛ ni okɛɛ amɛ akɛ: Kɛji miha klante ba shikpɔŋ lɛ nɔ, ni shikpɔŋ lɛ nɔ maŋ lɛ fa nuu kome yɛ amɛteŋ, ni amɛto lɛ bulɔ amɛha amɛhe, ni ena klante lɛ miiba shikpɔŋ lɛ nɔ, ni ekpa tɛtrɛmantrɛ, ni etswa maŋ lɛ adafi lɛ: no lɛ mɔ fɛɛ mɔ ni nuɔ tɛtrɛmantrɛ gbɛɛmɔ, ni ekpɛlɛɛɛ adafitswaa lɛ, kɛ klante lɛ ba ebaŋɔ lɛ kɛtee lɛ; elá aaabua lɛ diɛŋtsɛ eyiteŋ!” Wɔmiisumɔ ni wɔnyɛ wɔkɛɛ taakɛ bɔ ni bɔfo Paulo fee lɛ: “Miyeee nyɛteŋ mɔ ko mɔ ko Ia yi sɔ.”—Bɔfoi 20:26, 27.
Bɔ Ni Atsuɔ Sɔɔmɔ Masumɔ Lɛ He Nii
8. Mɛɛ saji abiɔ yɛ gbɛ ni ja nɔ ni kɔɔ gbɛ ni atsɔɔ nɔ atsuɔ sɔɔmɔ nitsumɔ lɛ he nii lɛ he?
8 Shi mɛɛ gbɛ nɔ wɔtsɔɔ wɔyaa wɔhiɛ? Yɛ wɔ diɛŋtsɛ wɔhewalɛ mli? Kɛ henɔwomɔ kɛ su ni tsɔɔ akɛ wɔ diɛŋtsɛ wɔkɛ wɔhe fɔɔ wɔhe nɔ? Ni wɔkɛ wɔhe miifɔ gbɔmɔ nɔ? Aloo yɛ gbɛ ni kɛ enɛ kpaaa gbee nɔ, shɔ̃ɔfeemɔ, tsui nta kɛ gbɔmɔ gbeyeishemɔ? Ani esa akɛ mɔ fɛɛ mɔ aya ehiɛ bɔ ni lɛ diɛŋtsɛ esumɔɔ, ni wɔku wɔhiɛ wɔshwie gbɛtsɔɔmɔ ni mɛi ni nyiɛɔ wɔhiɛ lɛ kɛhaa wɔ lɛ nɔ? Dabi! Saji titrii etɛ yɛ ni esa akɛ wɔha ahi wɔjwɛŋmɔ mli:
9. (a) Mɛɛ gbɛ nɔ mɔ ko boteɔ sɔɔmɔ lɛ mli yɛ Yehowa hewaIɛ mli? (b) Mɛɛ gbɛtsɔɔmɔ 1 Petro 3:15 kɛhaa yɛ wɔ jeŋba yɛ sɔɔmɔ nitsumɔ lɛ mli lɛ he?
9 Klɛŋklɛŋ nɔ̃ lɛ ji: Wɔyaa wɔhiɛ akɛ Nyɔŋmɔ maŋtsɛyeli lɛ sɔɔlɔi yɛ Yehowa Nyɔŋmɔ hewalɛ mli, ni wɔmiikwɛ emumɔ lɛ gbɛ koni ekanya wɔ, etsɔɔ wɔ nii ni ewo wɔ hewalɛ. Yehowa hewalɛ mli ni wɔnyiɛɔ yɛ lɛ hewɔ lɛ wɔbaanyɛ wɔjie nakai wiemɔ mli heyeli lɛ kpo, miishɛɛ kɛ ekãa kɛ wiemɔ ni Petro kɛ Yohane jie lɛ kpo yɛ be mli ni amɛkɛ jamɔ mli onukpai ni yɔɔ amɛgbii lɛ amli lɛ yeɔ lɛ. (Bɔfoi 4:13) Yɛ nakai beaŋ nɔŋŋ lɛ wɔbaasumɔ ni wɔkwɛ jogbaŋŋ ni wɔkɛ wɔ sane lɛ aha yɛ mlijɔlɛ kɛ bulɛ mumɔ mli.—1 Petro 3:15.
10. (a) Ni mɔ ko aaafee Yehowa ‘sane lɛ shiɛlɔ ni he tse’ Iɛ tsɔɔ mɛni? (b) Mɛɛ ŋaawoo ji nɔ ni yɔɔ Filipibii 1:10, 11 yɛ enɛ gbɛfaŋ?
10 Nɔ ni ji enyɔ lɛ ji: Wɔmiisumɔ ni wɔya wɔhiɛ akɛ mɛi ni shiɛɔ Yehowa sane lɛ ni he tse, koni ekɛ nɔ ni wɔkaneɔ yɛ Yesaia 52:11 Iɛ akpa gbee: “Nyɛ mɛi ni nyɛtereɔ Yehowa nibii lɛ, nyɛtsuaa nyɛhe.” Yehowa nibii ŋmɛnɛ, e-Wiemɔ lɛ mli anɔkwalei ni jara wa lɛ yɛ krɔŋŋ, amɛhe tse, amɛyɛ fɛo, amɛja. No hewɔ lɛ esa akɛ mɛi fɛɛ ni kɛ nɛkɛ nibii nɛɛ bahaa gbɔmɛi lɛ aha amɛhe atse yɛ jeŋba mli, kɛ mumɔŋ hefɛo mli. Ani jeee nine wɔfɔɔ gbɔmɛi ni amɛha amɛhe atse yɛ jeŋba mli, ni amɛjie heloo lɛ nitsumɔi amɛshwie taakɛ Yesu fee lɛ, ‘ni eetse eshafeelɔi ni amɛtsake amɛtsui’? (Luka 5:32) Belɛ ani esaaa akɛ wɔtoɔ okadi fɛfɛo wɔhaa amɛ yɛ nɛkɛ gbɛ nɔ? Kaimɔ akɛ Paulo wo Kristofoi ni yɔɔ Filipi lɛ ŋaa akɛ: “Nyɛyoo nii ni hi titri lɛ, koni nyɛfee krɔŋŋ ni nanetɔtɔmɔ ko akahi nyɛhe kɛyashi Kristo gbi Iɛ nɔ; ni jalɛ yibii ni awoɔ yɛ Yesu Kristo mli lɛ ayimɔnyɛ obɔbɔ aha Nyɔŋmɔ anunyam kɛ yijiemɔ.”—Filipibii 1:10, 11.
11. (a) Te hesaamɔ akɛ Nyɔŋmɔ sɔɔlɔ lɛ he hiaa ha tɛŋŋ? (b) Namɛi anɔkwɛmɔ nɔ kpakpa esa akɛ wɔnyɛ wɔnyiɛ sɛɛ yɛ enɛ gbɛfaŋ?
11 Nɔ ni ji etɛ lɛ ji: Yɛ be mli ni wɔyaa wɔhiɛ lɛ, esa akɛ wɔsaa wɔhe yɛ gbɛ ni ja nɔ yɛ be fɛɛ mli. Nɔ̃ hewɔ ni esa akɛ Yehowa tsulɔ ko asumɔ akɛ eeekase Abonsam jeŋ nɛɛ mli gbɔmɛi atuatselɔi ni bɛ jeŋba lɛ asubaŋi, nifeemɔi kɛ suɔmɔnaa nii lɛ ji nɔ ko ni ewa akɛ aaanu shishi. Mɛni hewɔ esa akɛ obɔ mɔdɛŋ akɛ oootamɔ jeŋ ni okɛɔ gbɔmɛi lɛ akɛ Nyɔŋmɔ baatsɔ ejalɛ nitsumɔ nɔ ni ekɛba naagbee lɛ? Mɛni hewɔ esa akɛ obɔ mɔdɛŋ ni otamɔ je lɛ, ni no hewɔ lɛ ofee mɔ ni yɔɔ sɔrɔto yɛ Yehowa webii ateŋ? Ani esaaa akɛ wɔpueɔ tamɔ Yehowa webii moŋ, ni no hewɔ lɛ wɔfee gbɔmɛi ni yɔɔ sɔrɔto yɛ je lɛŋ bii lɛ ateŋ? Namɔ wɔtaoɔ ni wɔsa ehiɛ? Namɔ hiɛ duromɔ wɔtao? Mɛni hewɔ ni okaseee nii kɛjɛɛɛ onyɛmimɛi hii kɛ yei ni amɛdara ni yɔɔ wɔteŋ yɛ asafoi lɛ amli lɛ atadewoo kɛ hesaamɔ fɛfɛo lɛ aŋɔɔ? Ani wɔsumɔŋ akɛ wɔɔkase nɔ ko kɛjɛ amɛ nɔkwɛmɔ nɔ kpakpa lɛ mli?—1 Timoteo 2:9; 1 Petro 3:3, 4, 16, 17.
12. Yɛ be mli ni ekolɛ shia kɛ shia sɔɔmɔ lɛ baanyɛ afee nɔ ni wa lɛ, mɛɛ sɛɛnamɔi jɛɔ mli baa haa mɛi ni kɛ amɛhe woɔ mli lɛ?
12 Wɔkpɛlɛ nɔ po akɛ ebɛ mlɛo kɛha mɛi komɛi akɛ amɛkɛ Nyɔŋmɔ maŋtsɛyeli lɛ he sanekpakpa lɛ aaaya shia kɛ shia. Shi sɛɛnamɔ kɛ nibii kpakpai ni jɛɔ enɛ feemɔ mli baa lɛ ji nɔ ni afee he nɔkwɛmɔ nɔ shii abɔ. (Mateo 10:7, 11-13; Bɔfoi 20:20, 21) Shia kɛ shia gbɛ ni wɔtsɔɔ nɔ wɔshiɛɔ Iɛ ebafee “kadimɔ nɔ” kɛha Yehowa tsuji. Ni jeee akɛ sɛɛnamɔ yɛ mli yɛ odase ni wɔyeɔ mɛi krokomɛi lɛ pɛ hewɔ, shi moŋ shia kɛ shia nitsumɔ lɛ he baa sɛɛnamɔ babaoo kɛhaa wɔ mɛi ni wɔkɛ wɔhɛ woɔ mli lɛ fɛɛ. Yɛ anɔkwale ni eji akɛ wɔ heloo po baanyɛ akũa yɛ enɛ hewɔ lɛ haa ebatsɔɔ kunimyeli be fɛɛ be ni Kristofonyo sɔɔlɔ kɛ ehe aaawo mli.—1 Korintobii 9:16, 27.
Weku Lɛ Nɔkwɛmɔ
13. Mɛɛ gbɛnaa nii bakaa mɛi pii anɔ kɛfata amɛgbɛnaa nii akɛ sɔɔlɔi lɛ ahe, ni enɛ biɔ mɛɛ pɛpɛɛpɛ ŋmɛɛ?
13 Gbɛnaa nii ni akɛfata Maŋtsɛyeli lɛ he sɔɔlɔi ni wɔji lɛ he aha wɔ ji nitsumɔ kroko ni baa mɛi ni hiɛ wekui fɛɛ nɔ lɛ. Esa akɛ Maŋtsɛyeli lɛ he sɔɔlɔi ni yaa amɛhiɛ ni hiɛ wekui lɛ atsu nitsumɔ ni Nyɔŋmɔ kɛfɔ amɛnɔ akɛ fɔlɔi lɛ he nii, ni amɛtsɔɔ amɛ diɛŋtsɛ amɛbii lɛ anii. Afi fɛɛ afi lɛ wɔnaa akɛ mɛi ni abaptisiɔ amɛ lɛ ateŋ mɛi ni fa ji obalaŋtai ni amɛfɔlɔi etsɔse amɛ “yɛ Nuŋtsɔ Yehowa” tsɔsemɔ kɛ ŋaawoo mli. (Efesobii 6:4) Nɔ ni yɔɔ awerɛho ni wɔɔkɛɛ ji, mɛi komɛi eku amɛhiɛ amɛshwie gbɛnaa nii kɛ nitsumɔ nɛɛ nɔ ni enɛ eha amɛye awerɛho babaoo. Lɛlɛŋ, ni wɔɔfee sɔɔlɔi ni yaa amɛhiɛ lɛ biɔ ni wɔŋmɛ pɛpɛɛpɛ. Wɔsumɔɔɔ ni wɔku wɔhiɛ wɔshwie shia kɛ shia nitsumɔ lɛ nɔ, kɛ naajiemɔ akɛ wɔfeɔ trukaa odaseyeli; ni asaŋ esaaa akɛ wɔkpooɔ hegbɛi ni wɔkɛaatsu trukaa odaseyeli he nii lɛ akɛni wɔyaa shia kɛ shia hewɔ. Nakai nɔŋŋ hu esaaa akɛ fɔlɔi ŋmɛɔ gbɛ koni shiɛmɔ loo asafo lɛ mli nitsumɔi kɛ nitsumɔi krokomɛi ahe amɛbe bɔ ni no aaaha amɛku amɛhiɛ amɛshwie amɛwekui anɔ. Fɛɛ sɛɛ lɛ, weku lɛ mumɔŋ kɛ heloo mli nibii ni aaatsu he nii lɛ ji amɛ gbɛnaa nii ni baa klɛŋklɛŋ.—1 Timoteo 5:8.
14. (a) Yɛ mɛɛ gbɛ nɔ mɛi ni ji fɔlɔi Iɛ baanyɛ alaaje be, kwɛmɔ kɛ shia ni amɛkɛwo amɛbii atsɔsemɔ mli lɛ? (b) Mɛɛ hiamɔ nii yaa nɔ lolo yɛ gbekɛbii atsɔsemɔ kɛjɛɔ fɔfɔbiiaŋ kɛyashiɔ be mli ni amɛaadara amɛtsɔmɔ onukpai?
14 Hɛɛ, gbekɛbii akwɛmɔ heɔ be, amɛhesusumɔ kɛ shika. Ábu naa akɛ eheɔ shika ni ji cedi akpekpei abɔ ni akɛtsɔse gbekɛ ni eda ebatsɔ onukpa. Gbɛ ni ooonyɛ otsɔ nɔ olaaje shika ni efite yɛ ehe nɛɛ fɛɛ, kɛ agbɛnɛ bɔ ni okɛtsu enɛ lɛ ji mumɔŋ nɔkwɛmɔ kpakpa ni okɛhaŋ mɛi ni okɛ amɛ eba je lɛ mli lɛ. Gbekɛbii fɔji ni amɛkwɛ̃ tamɔ jwɛi babaoo ni yɔɔ je lɛŋ ŋmɛnɛ lɛ yeɔ anɔkwale ni eji akɛ gbekɛbii babaoo yɛ ni amɛfɔlɔi kpoo amɛ lɛ he odase. (Abɛi 29:15) Fɔlɔi kɛ wekumɛi kɛ mɛi krokomɛi sumɔɔ ni amɛkɛ fufɔobii kɛ gbekɛbii bibii ashwɛ. ‘Amɛle nii waa! Kwɛ bɔ ni amɛhe yɔɔ fɛo ha! Awo biyoo fioo! Ataa binuu fioo!’ Enɛɛmɛi fɛɛ baanyɛ afee anɔkwale. Shi ehe miihia ni fɔlɔi akai akɛ, yɛ be mli ni nɛkɛ gbekɛbii nɛɛ dara ni amɛbatsɔmɔɔ gbekɛbii hii kɛ yei ni agbɛnɛ amɛtsɔɔ mli kɛtsɔmɔɔ obalahii kɛ obalayei lɛ, nɔkwɛmɔ kɛ amɛhe susumɔ he hiaa amɛ, suɔmɔ kɛ tsɔsemɔ, mumɔŋ tsɔsemɔ kɛ nitsɔɔmɔ he hia amɛ. (5 Mose 11:18-21) No ji fɔlɔi lɛ agbɛnaa nii akɛ Kristofoi. Nyɔŋmɔ sɔɔlɔi ahiɛ kpaŋ gbɛnaa nii ni ka amɛkɔŋ nɔ nɛɛ nɔ.
Jeŋ Fɛɛ Ekomefeemɔ Ni Yɔɔ Nyɔŋmɔ Sɔɔlɔi Ateŋ Lɛ
15, 16. (a) Te wɔɔfee tɛŋŋ wɔna nɔmimaa akɛ Maŋtsɛyeli lɛ he sane Iɛ ni wɔshiɛɔ lɛ mli tse keŋkeŋ kɛha mɛi ni nuɔ lɛ? (b) Mɛɛ yelikɛbuamɔ wɔyɔɔ ni baanyɛ awawɔ ni wɔwie yɛ ekomefeemɔ mli yɛ jeŋ fɛɛ?
15 Shi kɛ lɛ, susumɔ Kristofoi ni ji sɔɔlɔi lɛ agbɛnaa nii kroko he. “Ejaakɛ kɛji tɛtrɛmantrɛ egbɛɛɛ gbɛɛmɔ ni yɔɔ faŋŋ lɛ, namɔ aaasaa ehe ato ta?” (1 Korintobii 14:8) Bɔfo Paulo kɛ nakai wiemɔi lɛ miibi ni Kristo sɛɛnyiɛlɔi lɛ kɛ amɛlilɛi atsu nii yɛ gbɛ ni aaaha mɛi krokomɛi anu nɔ ni awieɔ lɛ shishi. Yɛ wɔgbii nɛɛ amli lɛ, kɛji akɛ Maŋtsɛyeli lɛ he sane lɛ ni wɔshiɛɔ lɛ mli baatse keŋkeŋ, tamɔ tɛtrɛmantrɛ-tsɛmɔ aha adesai lɛ, belɛ ehe miihia ni wɔfɛɛ wɔkpã gbee yɛ wiemɔ mli. Yesaia 52:8 (NW) kɛɔ akɛ: “Bo toi! Bo diɛŋtsɛ obulɔi lɛ ehole amɛgbeei anɔ. Amɛkɛ ekomefeemɔ yaa nɔ amɛlaa yɛ nyamɔ mli.” Gbɛfaŋnɔ ni wɔɔna yɛ tsɛmɔ yɛ ekomefeemɔ mli nɛɛ biɔ heshibaa kɛ nyɛmi suɔmɔ. Wɔle akɛ bɔni afee ni wɔ odaseyeli nitsumɔ lɛ afee nɔ ni sɛɛnamɔ yɔɔ he lɛ esa akɛ wɔfɛɛ wɔshiɛ shɛɛ sane kome too lɛ nɔŋŋ, wɔma Yehowa gbɛi Iɛ kɛ enilee kɛ esuɔmɔ kɛ e-Maŋtsɛyeli lɛ nɔ mi akɛ adesai ahiɛnɔkamɔ kome pɛ. Paulo wo ŋaa yɛ 1 Korintobii 1:10 akɛ wɔfɛɛ wɔmiisumɔ ni wɔwie yɛ gbeekpamɔ mli.
16 Esaaa akɛ wɔhaa wɔ sane lɛ feɔ nɔ ni miiwu wɔdaaŋ, akɛni emli bɛ faŋŋ hewɔ. Wɔyɛ famɔ shishi akɛ Nyɔŋmɔ sɔɔlɔi. Yesaia 61:1, 2 tsɔɔ nɔ ni wɔsane lɛ kɔɔ he lɛ mli faŋŋ. Yehowa tsulɔ anɔkwafo kɛ nilelɔ lɛ bɔɔ mɔdɛŋ yɛ gbɛ fɛɛ gbɛ nɔ ni eye ebua wɔ ni wɔwie kɛ gbee kome, ni efeɔ Biblia kɛ woji ni yeɔ buaa Biblia lɛ kasemɔ yɛ wiemɔi babaoo mli bɔni afee ni nine ashɛ gbɔmɛi lɛ anɔ kɛ wiemɔ ni anyɛɔ anuɔ shishi. Wɔbaanyɛ wɔfee wɔgbɛfaŋnɔ kɛtsɔ kwɛ ni wɔɔkwɛ ni wɔgbɛ “sanekpakpa” lɛ wɔshwã akɛ Yehowa jalɔi akuu kome lɛ nɔ.—Lala 66:1, 2; 68:12.
Ani Wɔkɛ Be Lɛ Baatsu Nii?
17. Mɛɛ he kaa kɛ kwɛmɔ yɛ anɔkwale mli esa akɛ wɔfee yɛ gbɛfaŋnɔ ni wɔnaa yɛ sɔɔmɔ lɛ mli lɛ mli?
17 Yɛ wɔ aŋkroaŋkro ni wɔɔya wɔhiɛ lɛ mli lɛ, ani eeenyɛ eba akɛ wɔbaanyɛ wɔya wɔhiɛ babaoo yɛ bei abɔ ni wɔkɛwoɔ sɔɔmɔ nitsumɔ lɛ mli lɛ mli? Wɔteŋ mɔ fɛɛ mɔ ni eji asafoŋ shiɛlɔ ni yɔɔ hewalɛ ni bii akwɛmɔ he gbɛnaa nii ko kaaa enɔ aloo ekwɛɛɛ suɔlɔi ni amɛdara lɛ anɔ lɛ baanyɛ afee jogbaŋŋ kɛ ebi ehe akɛ: Mɛni tsiɔ minaa kɛjɛɔ be fɛɛ sɔɔmɔ lɛ ni mikɛ mihe aaawo mli lɛ he? Ani eeenyɛ eba akɛ miyooo bɔ ni Maŋtsɛyeli lɛ he sɔɔmɔ lɛ he hiaa jogbaŋŋ ha lɛ? Ani eeenyɛ eba akɛ he ni akɛshaa afɔle mumɔ ji nɔ ni mibɛ? Kɛji akɛ hegbɛ baaa haaa bo akɛ ooosɔmɔ akɛ daa gbɛgbalɔ lɛ, ani ooonyɛ oto gbɛjianɔ ni okɛ ohe awo gbɛgbalɔi awamɔ sɔɔmɔ lɛ mli yɛ oshihilɛ be mli? Kɛ ooonyɛ ofee nakai lɛ, eka shi faŋŋ akɛ ooonyɛ oya ohiɛ akɛ Kristofonyo sɔɔlɔ. Anɔkwayeli mli ni okɛ aaaka bo diɛŋtsɛ ohe okwɛ lɛ baanyɛ ajie nɔ ni bo diɛŋtsɛ ákɛ aŋkro lɛ ooonyɛ ofee ni oha be ni okɛsɔmɔɔ wɔ ŋwɛi Tsɛ lɛ kɛ e-Bi lɛ Maŋtsɛyeli nɔyeli lɛ he nibii yɛ daa nyɔŋ nɔ lɛ afa Iɛ kpo.—Lala 26:1, 2, 11, 12; Marko 12:28-34.
18. Mɛni baaye abua wɔ ni wɔha wekukpaa kpakpa ahi wɔkɛ Yehowa kɛ Kristo Yesu teŋ?
18 Yehowa Nyɔŋmɔ kɛ Yesu Kristo eto okadi kɛha wɔ yɛ amɛhiɛ ni amɛkwɛɔ tɛ̃ɛ kɛ amɛhiɛ ni amɛyaa lɛ mli. Bɔni afee ni wɔ aŋkroaŋkroi lɛ wɔfee nakai nɔŋŋ lɛ, ehe miihia ni klɛŋklɛŋ kwraa lɛ, wekukpaa kpakpa aka wɔkɛ Yehowa Nyɔŋmɔ teŋ. Ani wɔbɔɔ mɔdɛŋ waa ni wɔna henilee kpakpa, ni wɔkuuu wɔhiɛ wɔshwieee nɔ ko nɔ ko kwraa ni aaabule wɔhenilee lɛ nɔ? Ani wɔkɛ hegbɛ ni jara wa ni ji sɔlemɔ lɛ tsuɔ nii yɛ gbɛ kpakpa nɔ, ni wɔkãa enɛ feemɔ he? (Romabii 12:12) Ani wɔkɛ be woɔ wɔ teemɔŋ nikasemɔ kɛ enɔjwɛŋmɔ mli? Ekolɛ esa akɛ wɔfee tsakemɔi komɛi yɛ wɔshihilɛ mli bɔni afee ni wɔnyɛ wɔgbala wɔjwɛŋmɔ kɛba nibii ni he hiaa titri anɔ bɔ ni sa, bɔni afee ni wɔ sɔɔmɔ nitsumɔ lɛ aye klɛŋklɛŋ gbɛhe yɛ wɔ shihilɛ mli, yɛ wiemɔ mli kɛ agbɛnɛ yɛ nifeemɔ mli.—Efesobii 4:22-24.
19, 20, (a) Mɛni ji “Nyɔŋmɔ wiemɔ” ni ewie he yɛ Hebribii yitso 4 lɛ? (b) Mɛɛ gbɛ nɔ nɛkɛ “wiemɔ” nɛɛ efee nɔ ni hiɛ ka ni enaa ba fe klante kɛ enaa nta, ni mɛni hewɔ ni wɔbaati nitsumɔi ni atsu yɛ 1981 sɔɔmɔ afi lɛ mli lɛ ekomɛi amli wɔkwɛ lɛ?
19 Eji miishɛɛ sane akɛ wɔɔbɔ amaniɛ akɛ Yehowa sɔɔlɔi kɛ ekãa ejaje Maŋtsɛyeli lɛ he sanekpakpa lɛ yɛ jeŋ fɛɛ ni deka bɛ mli kwraa yɛ afi ni ho lɛ mli. Shɛɛ sane nɛɛ ena hewalɛ yɛ gbɔmɛi akpei nyɔŋma-nyɔŋmai abɔ ashihilɛ nɔ. Tsakemɔi ni yɔɔ naakpɛɛ eba nɛkɛ gbɔmɛi nɛɛ ashihilɛ mli yɛ tsakemɔ hewalɛ ni Nyɔŋmɔ Wiemɔ lɛ yɔɔ lɛ hewɔ. Ŋwanejee ko kwraa bɛ he akɛ “sanekpakpa” lɛ he shɛɛ sane Iɛ hiɛ, ka ni hewalɛ yɛ mli ni enaa ba fe klante kɛ enaa nta. (Hebribii 4:2, 12, 13) Agbɛnɛ hu kɛji akɛ Nyɔŋmɔ Wiemɔ lɛ tsu enitsumɔ kpakpa lɛ yɛ sɔɔlɔi ni he esa adɛŋ lɛ, ewoɔ Yehowa gbɛi lɛ hiɛ nyam ni ewóɔ emaŋtsɛyeli lɛ no gojoo akɛ adesai ahiɛnɔkamɔ kome pɛ.—Efesobii 6:17.
20 Bɔni afee ni ole nɔ ni Yehowa Odasefoi enyɛ efee yɛ 1981 sɔɔmɔ afi ni he nyɔji 12 lɛ mli lɛ, amaniɛbɔɔ ni nyiɛ sɛɛ lɛ baatsɔɔ nɔ ni ba yɛ nakai bei lɛ amli kɛ mɔdɛŋ ni Kristofoi akuu fioo ni tsuɔ nii yɛ shikpɔji kɛ ŋshɔkpɔi 206 nɔ lɛ bɔ yɛ ekomefeemɔ mli. (Abɛi 25:25) Wɔheɔ wɔyeɔ akɛ obaanya Nyɔŋmɔ sɔɔlɔi anitsumɔ lɛ mlitii yɛ wɔ afii ohai 20 nɛɛ mli oya lɛ he.a
[Shishigbɛ niŋmai]
a Ajie kɛjɛ January 1, 1982 Blɔfo Buu-Mɔɔ lɛ mli
[Mfoniri ni yɔɔ baafa 8]
Wɔkɛ wɔhiɛ fɔɔ Yehowa nɔ koni ewo wɔ hewalɛ kɛha esɔɔmɔ lɛ
[Mfoniri ni yɔɔ baafa 9]
Atade ni ákpɛ lɛ jogbaŋŋ kɛ hesaamɔ kpakpa sa sɔɔlɔi ni ji Kristofoi
[Mfoniri ni yɔɔ baafa 10]
Sɔɔlɔi ni yaa amɛhiɛ lɛɔ amɛbii yɛ ‘Yehowa tsɔsemɔ mli’
[Mfoniri ni yɔɔ baafa 11]
Maŋtsɛyeli lɛ he sɔɔlɔi ni amɛdara yɛ afii amli ka he amɛmiiya amɛhiɛ