Kwɛmɔ Ohe Nɔ Jogbaŋŋ yɛ “Epikuromɛi” lɛ Ahe
“Eji gbɔmɔ kpakpa! Ehiɔ shi yɛ jeŋba kpakpa he tɛi ni nɔ kwɔlɔ naa. Eshɛreee sigaret, ekɛ tsofai fɔji tsuuu nii, ni ewieee yakayaka wiemɔi. Yɛ anɔkwale mli lɛ, ehi fe mɛi komɛi ni tsɛɔ amɛhe Kristofoi lɛ po!”
ANI onu ni gbɔmɛi komɛi miisusu nii ahe yɛ nɛkɛ gbɛ nɔ koni amɛkɛtsɔɔ naanyobɔɔ fɔŋ ni amɛbɔɔ lɛ mli? Ani ekɛ Ŋmalɛ mli sane mli pɛimɔ kpaa gbee? Nɔkwɛmɔnɔ ni jɛ mra be mli Kristofoi asafo ko mli lɛ haa anuɔ sane nɛɛ shishi.
Yɛ klɛŋklɛŋ afii oha lɛ mli lɛ, bɔfɔ Paulo bɔ Korintobii asafo lɛ kɔkɔ akɛ: “Nyɛkahaa alakaa nyɛ. Naanyobɔɔ fɔŋ fiteɔ jeŋba kpakpa.” Ekolɛ, Kristofoi komɛi kɛ aŋkroaŋkroi ni Hela jeŋ nilee ena amɛnɔ hewalɛ, ni Epikuromɛi lɛ hu fata he lɛ miibɔ naanyo gbagbalii. Namɛi ji Epikuromɛi lɛ? Mɛni hewɔ amɛbaanyɛ amɛwo Kristofoi ni yɔɔ Korinto lɛ amumɔŋ shidaamɔ he gbeyei lɛ? Ani gbɔmɛi ni tamɔ amɛ yɛ ŋmɛnɛ ni esa akɛ wɔkwɛ wɔhe nɔ jogbaŋŋ yɛ amɛhe?—1 Korintobii 15:33.
Namɛi Ji Epikuromɛi Lɛ?
Epikuromɛi lɛ ji Hela jeŋ nilelɔ, ni ji Epikuro ni hi shi kɛjɛ afi 341 kɛyashi 270 D.Ŋ.B. lɛ sɛɛnyiɛlɔi. Etsɔɔ akɛ hiɛtserɛjiemɔ ji shihilɛ mli nɔ kpakpa ni hi fe fɛɛ. Ani no tsɔɔ akɛ Epikuromɛi lɛ hiɔ heguɔgbee shihilɛ ni shishitoo mlai kudɔɔɔ lɛ lɛ mli, ni amɛkɛ amɛhe woɔ nifeemɔi gbohii amli yɛ be mli ni amɛyaa nɔ amɛtiuɔ hiɛtserɛjiemɔ sɛɛ lɛ? Naakpɛɛ sane ji akɛ, Epikuro etsɔɔɔ esɛɛnyiɛlɔi lɛ ni amɛhi shi yɛ nakai gbɛ nɔ! Yɛ no najiaŋ lɛ, etsɔɔ akɛ anaa hiɛtserɛjiemɔ ni hi fe fɛɛ kɛtsɔɔ nilee, ekãa, henɔyeli, kɛ jalesaneyeli ni ahiɔ shi yɛ naa lɛ nɔ. Efiii amrɔamrɔ kɛ be kuku hiɛtserɛjiemɔ ni atiuɔ sɛɛ lɛ sɛɛ, shi moŋ efi hiɛtserɛjiemɔ ni hiɔ shi yɛ wala shihilɛ be fɛɛ mli lɛ sɛɛ. Enɛ hewɔ lɛ, kɛ akɛ amɛ to gbɔmɛi ni feɔ eshai wuji lɛ ahe lɛ, Epikuromɛi lɛ bafeɔ tamɔ gbɔmɛi kpakpai.—Okɛto Tito 1:12 he.
Ani Etamɔ Kristojamɔ?
Kɛ oji mra be mli Korinto asafo lɛ mlinyo lɛ, ani Epikuromɛi lɛ baanyɛ ana onɔ hewalɛ? Ekolɛ, gbɔmɛi komɛi susu akɛ Epikuromɛi lɛ ajeŋba ni nɔ kwɔlɔ ni yɔɔ faŋŋ lɛ ha amɛfee tamɔ gbɔmɛi ni kɛ akɛ amɛ bɔ nanemɛi lɛ eyɛ shweshweeshwe kɛha Kristofoi. Kɛ aaasusu he lolo lɛ, ekolɛ Korintobii lɛ yɔse akɛ Epikuromɛi lɛ ajeŋba he tɛi lɛ kɛ nɔ ni yɔɔ Nyɔŋmɔ Wiemɔ lɛ mli lɛ je amɛhe.
Akɛ nɔkwɛmɔnɔ lɛ, Epikuromɛi lɛ kɛ hiɛshikamɔ tsuɔ nii yɛ amɛ miishɛnamɔ sɛɛtiumɔ mli. Amɛbuɔ jwɛŋmɔŋ miishɛɛnamɔi akɛ nɔ ni jara wa fe gbɔmɔtsoŋ miishɛɛnamɔi. Nɔ ni gbɔmɔ eye lɛ he ehiaaa tamɔ wekukpaa ni kã mɔ ni ekɛye nii lɛ teŋ. Epikuromɛi lɛ tsiɔ amɛhe kɛjɛɔ maŋkwramɔ mli gbɛjianɔtoo ni amɛkɛ amɛhe aaawo mli lɛ he, kɛ efɔŋ ni afeɔ yɛ teemɔŋ lɛ ahe po. Kwɛ bɔ ni ewaaa kwraa akɛ aaamu sane naa akɛ: “Amɛ tamɔ wɔ nɔŋŋ!”
Shi kɛlɛ, ani Epikuromɛi lɛ tamɔ mra be mli Kristofoi lɛ lɛɛlɛŋ? Dabi kwraa. Gbɔmɛi ni yɔɔ henilee ni atsɔse lɛ jogbaŋŋ lɛ baana sɔrɔtofeemɔi ni he hiaa waa ni kã amɛteŋ lɛ. (Hebribii 5:14) Ani obaanyɛ? Nyɛhaa wɔsusuɔ Epikuro tsɔɔmɔi lɛ ahe jogbaŋŋ wɔkwɛa.
Nibii ni Ehiii yɛ Epikuro Tsɔɔmɔi lɛ Ahe
Bɔni afee ni Epikuro aye abua gbɔmɛi koni amɛkashe nyɔŋmɔi kɛ gbele gbeyei lɛ, etsɔɔ akɛ nyɔŋmɔi lɛ bɛ adesai ahe jwɛŋmɔ ko, ni amɛkɛ amɛhe wooo adesai asaji amli. Epikuro tsɔɔ akɛ, jeee nyɔŋmɔi lɛ bɔ je lɛ, ni ákɛ wala ba shihilɛ mli yɛ heniianaa. Ani enɛ eteee shi yɛ faŋŋ mli ewooo Biblia tsɔɔmɔ akɛ “Nyɔŋmɔ kome,” ni ji Bɔlɔ lɛ yɛ, ni ákɛ esusuɔ adesa ni ji ebɔɔnii lɛ ahe lɛ?—1 Korintobii 8:6; Efesobii 4:6; 1 Petro 5:6, 7.
Epikuro tsɔɔ hu akɛ shihilɛ ko nyɛŋ aba yɛ gbele sɛɛ. Yɛ faŋŋ mli lɛ, enɛ teɔ shi ewoɔ Biblia tsɔɔmɔ ni kɔɔ gbohiiashitee lɛ he lɛ. Yɛ anɔkwale mli lɛ, etamɔ nɔ ni beni bɔfɔ Paulo wieɔ yɛ Areopago lɛ, Epikuromɛi lɛ fata mɛi ni kɛ Paulo kpaaa gbee yɛ gbohiiashitee tsɔɔmɔ lɛ mli lɛ ahe.—Bɔfoi lɛ Asaji 17:18, 31, 32; 1 Korintobii 15:12-14.
Eeenyɛ efee akɛ Epikuro jeŋ nilee mli saji lɛ ateŋ nɔ ni he yɔɔ oshara fe fɛɛ lɛ hu ji nɔ ni yɔɔ nigii fe fɛɛ lɛ. Kpoomɔ ni ekpoo akɛ yɛ gbele sɛɛ lɛ shihilɛ ko bɛ dɔŋŋ lɛ ha emu sane naa akɛ esa akɛ gbɔmɔ ahi shi yɛ miishɛɛ mli bɔ ni eeenyɛ yɛ be kuku ni ekɛbaahi shi yɛ shikpɔŋ lɛ nɔ lɛ mli. Taakɛ wɔna lɛ, esusumɔ lɛ jeee koni ahi eshafeemɔ shihilɛ mli, shi moŋ, koni aná ŋmɛnɛŋmɛnɛ shihilɛ mli miishɛɛ, akɛni fɛɛ kwraa nɛ lɛ hewɔ.
No hewɔ lɛ, Epikuro wooo efɔŋ ni afeɔ yɛ teemɔ mli lɛ he hewalɛ bɔni afee ni atsi he kɛjɛ na ni aaana, ni ji nɔ ko ni bɔ fɛɛ bɔ ni fee lɛ ebaafite amrɔamrɔ miishɛɛnamɔ lɛ he. Ewo hewalɛ ni akɛ hiɛshikamɔ atsu nii bɔni afee ni atsi he kɛjɛ he ni akɛaawo mli fe nine lɛ he, ni no hu ji nɔ kroko ni tsiɔ ŋmɛnɛŋmɛnɛ miishɛɛnamɔ gbɛ. Ewo hewalɛ hu koni akɛ gbɔmɛi aná wekukpaa kpakpa, ejaakɛ sɛɛnamɔ yɛ najiaŋ ni amɛaato lɛ he. Yɛ anɔkwale mli lɛ, ni aaatsi he kɛaajɛ efɔŋ ni afeɔ yɛ teemɔ mli, ni akɛ hiɛshikamɔ aaatsu nii, kɛ agbɛnɛ ni aaabɔ naanyo lɛ ji sui kpakpai. No hewɔ lɛ, mɛni hewɔ ni Epikuro jeŋ nilee lɛ yɔɔ oshara kɛha Kristofonyo lɛ? Ejaakɛ eŋaawoo lɛ damɔ hemɔkɛyeli ni ebɛ lɛ nɔ: “Nyɛhaa wɔyea nii ni wɔnua dãi, ejaakɛ wɔ lɛ wɔbaagboi!”—1 Korintobii 15:32.
Wɔbaakpɛlɛ nɔ akɛ, Biblia lɛ tsɔɔ gbɔmɛi bɔ ni amɛaafee amɛhi shi yɛ miishɛɛ mli ŋmɛnɛ. Shi kɛlɛ, ewoɔ ŋaa akɛ: “Nyɛtoa nyɛhe yɛ Nyɔŋmɔ suɔmɔ lɛ mli, ni nyɛkwɛa wɔ-Nuntsɔ Yesu Kristo mɔbɔnalɛ lɛ gbɛ, koni nyɛna naanɔ wala.” (Yuda 21) Hɛɛ, Biblia lɛ maa wɔsɛɛ naanɔ shihilɛ lɛ nɔ mi babaoo, shi jeee ŋmɛnɛ shihilɛ ni hoɔ kɛyaa oya lɛ. Kɛha Kristofonyo lɛ, Nyɔŋmɔ ni eeesɔmɔ lɛ ji nɔ titri ni esumɔɔ, ni enaa akɛ, kɛ ekɛ Nyɔŋmɔ wo klɛŋklɛŋ gbɛhe lɛ, enaa miishɛɛ ni etɔɔ. Yɛ nakai gbɛ nɔŋŋ nɔ lɛ, yɛ nɔ najiaŋ ni Yesu baatsu nibii ni lɛ diɛŋtsɛ esumɔɔ lɛ ahe nii babaoo lɛ, ekɛ ehewalɛ ni pɛsɛmkunya bɛ mli lɛ tsu nii yɛ Yehowa sɔɔmɔ kɛ gbɔmɛi ayelikɛbuamɔ mli. Etsɔɔ ekaselɔi koni amɛfee ekpakpa amɛha mɛi krokomɛi, jeee kɛ hiɛnɔkamɔ akɛ abaato amɛ najiaŋ, shi moŋ yɛ anɔkwa suɔmɔ ni amɛyɔɔ kɛha amɛ lɛ hewɔ. Eyɛ faŋŋ akɛ, nɔ̃ diɛŋtsɛ ni kanyaa Epikuromɛi anifeemɔ kɛ Kristojamɔ lɛ yɛ sɔrɔto kwraa.—Marko 12:28-31; Luka 6:32-36; Galatabii 5:14; Filipibii 2:2-4.
Oshara ni Yɔɔ Nigii
Ákɛ nɔ ni kɛ ehe kpaaa gbee lɛ, yɛ be mli ni Epikuromɛi lɛ maa miishɛɛ ni aaana lɛ nɔ mi lɛ, yɛ shihilɛ ni hi fe fɛɛ po mli lɛ amɛnɔ̃ lɛ feɔ miishɛɛ ni yeee emuu. Akɛni amɛbɛ “Yehowa miishɛɛ lɛ” hewɔ lɛ, Epikuro tsɛɔ shihilɛ akɛ, “nikeenii ni piŋmɔ yɔɔ mli.” (Nehemia 8:10, NW) Kɛ akɛto he lɛ, kwɛ miishɛɛ ni mra be mli Kristofoi lɛ yɔɔ! Yesu ejieee shihilɛ ni miishɛɛ kɛ hiamɔ nii bɛ mli lɛ yi. Yɛ anɔkwale mli lɛ, gbɛ ni ekɔ lɛ sɛɛnyiɛmɔ ji gbɛ ni kɛ miishɛɛ ni fe fɛɛ lɛ baa.—Mateo 5:3-12.
Kɛ asafo ni yɔɔ Korinto lɛ mli bii lɛ ekomɛi susu akɛ amɛbaanyɛ amɛkɛ gbɔmɛi ni Epikuromɛi lɛ asusumɔi ena amɛnɔ hewalɛ lɛ abɔ ni eyeŋ amɛ hemɔkɛyeli awui lɛ, no lɛ amɛmiitɔ̃. Yɛ be mli ni Paulo ŋmaa eklɛŋklɛŋ wolo kɛyaha Korintobii lɛ, no mli lɛ amɛteŋ mɛi komɛi elaaje hemɔkɛyeli ni amɛyɔɔ yɛ gbohiiashitee lɛ mli lɛ momo.—1 Korintobii 15:12-19.
Ani Epikuromɛi Anifeemɔi Yɛ Ŋmɛnɛ?
Eyɛ mli akɛ Epikuromɛi anifeemɔi laaje yɛ afi ohai ejwɛ Ŋ.B. moŋ, shi mɛi komɛi yɛ ŋmɛnɛ ni amɛkpɛlɛ hii-shi-kɛha-ŋmɛnɛ susumɔ lɛ nɔ. Nɛkɛ gbɔmɛi nɛɛ yɛ Nyɔŋmɔ naanɔ wala he shiwoo lɛ mli hemɔkɛyeli fioo ko loo amɛbɛ eko kwraa. Kɛlɛ, ekolɛ amɛteŋ mɛi komɛi yɛ jeŋba he tɛi ni nɔ kwɔlɔ fioo komɛi.
Ebaanyɛ efee kaa kɛha Kristofonyo ko akɛ ekɛ gbɔmɛi ni tamɔ nakai aaabɔ gbagbalii, ni ekolɛ esusu akɛ amɛsui kpakpai lɛ tsɔɔ akɛ abaanyɛ akɛ amɛ abɔ naanyo. Kɛlɛ, eyɛ mli akɛ, wɔbuŋ wɔhe akɛ mɛi ni ja tsɔ moŋ, shi esa akɛ wɔha ehi wɔjwɛŋmɔ mli akɛ, ‘naanyobɔɔ fɔji’ fɛɛ—ni gbɔmɛi ni hewalɛ ni amɛnaa yɛ mɔ nɔ lɛ yɔɔ nigii waa lɛ hu fata he lɛ—‘fiteɔ jeŋba kpakpai.’
Jeŋ nilee, ni ji hii-shi-kɛha-ŋmɛnɛ lɛ hu baa trukaa yɛ jarayeli nitsumɔ he nikasemɔ kpeei ashishi, woji ni akɛyeɔ abuaa he, woji, sinii, tɛlivishin nɔ nifeemɔi, kɛ agbɛnɛ yɛ lala mli. Yɛ be mli ni ewooo eshafeemɔ jeŋba ko he hewalɛ lɛ, ani susumɔ ni hemɔkɛyeli bɛ mli nɛɛ baanyɛ ana wɔnɔ hewalɛ yɛ gbɛi ni yɔɔ nigii nɔ? Akɛ nɔkwɛmɔnɔ lɛ, ani wɔhaa nibii ni baaha wɔmii ashɛ wɔhe lɛ asɛɛdii yeɔ wɔnɔ aahu akɛ, jeŋ muu fɛɛ maŋtsɛ ni Yehowa ji lɛ he sane lɛ jeɔ wɔjwɛŋmɔ mli? Ani ebaanyɛ elaka wɔ koni ‘wɔkapele wɔhe tsɔ yɛ sɔɔmɔ lɛ mli’ fe ni ‘wɔɔteke nɔ yɛ Nuntsɔ lɛ nitsumɔ lɛ mli’? Aloo ani ebaanyɛ elaka wɔ koni wɔje ja ni Yehowa tɛi ni efolɔ lɛ ja ha, kɛ sɛɛnamɔi ni yɔɔ he lɛ ahe ŋwane? Ehe miihia koni wɔkwɛ wɔhe nɔ jogbaŋŋ ni wɔkɛ wɔhe akaha jeŋba shara, awuiyeli, kɛ mumɔi fɔji anifeemɔ ni jeɔ kpo faŋŋ lɛ, kɛ agbɛnɛ hu, gbɔmɛi ni je lɛŋ susumɔi ena amɛnɔ hewalɛ lɛ!—1 Korintobii 15:58; Kolosebii 2:8.
No hewɔ lɛ, nyɛhaa wɔkɛ mɛi ni jɛɔ amɛtsui muu fɛɛ mli amɛnyiɛɔ Yehowa gbɛtsɔɔmɔ sɛɛ lɛ titri abɔa naanyo. (Yesaia 48:17) Nɔ ni baajɛ mli aba ji akɛ, ebaawo wɔjeŋba kpakpa lɛ mli hewalɛ. Ebaawo wɔhemɔkɛyeli mli hewalɛ. Wɔbaahi shi yɛ miishɛɛ mli, jeee amrɔ nɛɛ pɛ, shi moŋ kɛ jwɛŋmɔ lɛ akɛ wɔbaahi shi kɛya naanɔ yɛ wɔsɛɛ shihilɛ mli.—Lala 26:4, 5; Abɛi 13:20.
[Mfoniri ni yɔɔ baafa 24]
Epikuro tsɔɔ akɛ, nyɔŋmɔi lɛ bɛ adesai ahe jwɛŋmɔ ko
[He ni Sane lɛ Jɛ]
Mɛi ni kɛha ji The British Museum