Mina “Mɔ Fioo” lɛ Ni Etsɔ “Maŋ ni Wa”

TAAKƐ WILLIAM DINGMAN GBA

Afi lɛ ji afi 1936; ni he ni miyɔɔ lɛ ji Salem, Oregon, U.S.A. No mli lɛ mitee Yehowa Odasefoi akpee ko. Abi sane akɛ: “Nɛgbɛ asafo kuu babaoo lɛ yɔɔ?” (Kpojiemɔ 7:9, King James Version) Mi pɛ ji mɔ hee ni yɔɔ jɛmɛ, no hewɔ lɛ amɛ fɛɛ amɛkɛ amɛniji tsɔɔ mi ni amɛkɛɛ, “Lɛ eyɔɔ jɛmɛ lɛ!”

YƐ AFI 1930 teŋgbɛ lɛ amli lɛ, no mli lɛ Yehowa Odasefoi lɛ ateŋ mɛi fioo pɛ yɔɔ Biblia mli hiɛnɔkamɔ ni ji shihilɛ kɛmiiya naanɔ yɛ Paradeiso yɛ shikpɔŋ nɔ. (Lala 37:29; Luka 23:43) Kɛjɛ nakai beaŋ kɛbaa nɛɛ lɛ, nibii etsake kwraa. Shi nyɛhaa magbaa nyɛ nibii ni ha mitee nakai kpee lɛ yɛ Salem, Oregon lɛ.

Mitsɛ shɛɔ The Golden Age lɛ, ni ji gbɛi ni akɛtsɛɔ Awake! wolo tɛtrɛɛ lɛ tsutsu ko lɛ. Beni miye kɛjɛ afii nyɔŋma-kɛ-etɛ kɛyaa lɛ, minyaa ekanemɔ he, ni mibakpɛlɛ nɔ akɛ Biblia anɔkwale ni he hiaa yɔɔ mli. No hewɔ lɛ, gbi ko lɛ, mikɛ wolo bibioo ni afoɔ ni yɔɔ Golden Age lɛ sɛɛ lɛ maje. Enɛ haa nikanelɔ lɛ nine shɛɔ woji bibii 20, wolo kome, kɛ Yehowa Odasefoi asafo ni bɛŋkɛ lɛ lɛ gbɛi anɔ. Beni minine shɛ woji lɛ anɔ sɛɛ lɛ, mitee shia kɛ shia ni mikɛ woji bibii lɛ fɛɛ kɛ wolo lɛ hu yaha.

Yɛ nakai be lɛ mli lɛ mɔ ko mɔ ko kɛ mi ekaseko Biblia lɛ. Yɛ anɔkwale mli lɛ, mikɛ Yehowa Odasefoi lɛ ateŋ mɔ ko egbako sane pɛŋ. Shi amrɔ nɛɛ, akɛni mihiɛ Maŋtsɛyeli Asa ni bɛŋkɛ mi fe fɛɛ lɛ adrɛs lɛ yɛ midɛŋ hewɔ lɛ, mifa gbɛ kilomitai 40 kɛtee Salem, Oregon, koni maya kpee. Jɛmɛ ji he ni beni miyé afii 18 lolo lɛ, ahala mi kɛjɛ kuu lɛ teŋ akɛ “asafo kuu babaoo lɛ.”

Eyɛ mli akɛ misako mihe kwraa kɛha sɔɔmɔ nitsumɔ lɛ moŋ, shi mikɛ Salem Asafo lɛ je shiɛmɔ shishi. Awo mi hewalɛ koni mikɛ saji otii etɛ ni amɛhe hiaa lɛ afata odase ni miyeɔ lɛ he. Klɛŋklɛŋ lɛ, Yehowa ji Nyɔŋmɔ; enyɔ, ákɛ Yesu Kristo ji Maŋtsɛ ni ehala lɛ; kɛ nɔ ni ji etɛ lɛ, ákɛ Maŋtsɛyeli lɛ ji hiɛnɔkamɔ pɛ ni yɔɔ kɛha je lɛ. Mibɔ mɔdɛŋ akɛ mikɛ mɔ fɛɛ mɔ aaagba shɛɛ sane nɛɛ he sane yɛ shinaa fɛɛ shinaa naa.

Beni mikɛ Yehowa Odasefoi ni yɔɔ Salem lɛ ebɔ afii enyɔ sɛɛ lɛ, abaptisi mi yɛ April 3, 1938. Nanemɛi ni yɔɔ Salem lɛ na miishɛɛ akɛ amɛmiina “asafo kuu babaoo lɛ” ateŋ mɛi pii ni aabaptisi amɛ. Yɛ February 1939 mli lɛ, mibatsɔ gbɛgbalɔ, loo be-fɛɛ sɔɔlɔ. Yɛ December yɛ nakai afi lɛ mli lɛ, mikpɛlɛ ninefɔɔ akɛ mishi kɛya Arizona, he ni Maŋtsɛyeli jajelɔi ahe miihia waa yɛ lɛ nɔ.

Gbɛgbamɔ Nitsumɔ lɛ yɛ Arizona

Yehowa Odasefoi anitsumɔ lɛ ji nɔ ko hee yɛ Arizona, ni anuuu wɔ shishi yɛ nibii pii amli, no hewɔ lɛ beni United States kɛ amɛhe wo Jeŋ Ta II lɛ mli lɛ, awa wɔ yi babaoo. Akɛ nɔkwɛmɔnɔ lɛ, yɛ afi 1942, beni misɔmɔɔ yɛ Stafford, Arizona lɛ, no mli lɛ aawie basabasafeelɔi anifeemɔ ni Mormons kuu lɛ kɛbaate shi ashi wɔ lɛ he. Eba lɛ akɛ mikɛ gbɛgbalɔ ni fata mihe lɛ yahi Mormon osɔfonukpa ko ni kɛ bulɛ haa wɔ lɛ shia lɛ masɛi tuuntu, ni ekɛɔ akɛ: “Kɛ Mormon maŋsɛɛ shiɛlɔi tsuɔ nii waa tamɔ Odasefoi lɛ, kulɛ, Mormon Sɔlemɔ lɛ baashwere.” No hewɔ lɛ ewie yɛ faŋŋ mli yɛ sɔlemɔ lɛ mli akɛ: “Minu akɛ aawie basabasafeelɔi anifeemɔ ni akɛbaate shi ashi Odasefoi obalahii lɛ he. Ojogbaŋŋ, mishia lɛ bɛŋkɛ obalahii nɛɛ, ni kɛ basabasafeelɔi anifeemɔ baaya nɔ lɛ, no lɛ abaata tu yɛ afabaŋ lɛ yiteŋ tuuntu. Akɛ nakai tu lɛ baatsu nii—shi jeee yɛ Odasefoi lɛ anɔ. Akɛbaatsu nii koni akɛte shi awo basabasafeelɔi lɛ. No hewɔ lɛ kɛ nyɛmiisumɔ koni nyɛtsu basabasafeelɔi anifeemɔ he nii lɛ, no lɛ, nyɛle nɔ ni gbɛ ni nyɛbaakpa.” Basabasafeelɔi lɛ baaa kɔkɔɔkɔ.

Yɛ afii etɛ ni mikɛhi Arizona lɛ mli lɛ, amɔmɔ wɔ ni awo wɔ tsuŋ shii abɔ. Be ko lɛ awo mi tsuŋ gbii 30. Bɔni afee ni wɔwuu wɔshi haomɔ ni polisifoi lɛ kɛbaa wɔsɔɔmɔ nitsumɔ lɛ nɔ lɛ hewɔ lɛ, wɔto kuu ko ni wɔtsɛɔ lɛ akɛ kuu bibioo ni filikiɔ lɛ he gbɛjianɔ. Odasefonyo ni kwɛɔ nɔ lɛ kɛɛ wɔ akɛ: “Taakɛ wɔgbɛi lɛ ji lɛ, nakai pɛpɛɛpɛ wɔyɔɔ. Wɔjeɔ shishi wɔyashiɔ dɛhiɛmɔ woji bibii yɛ shinaa fɛɛ shinaa naa yɛ leebi ŋmɛji enumɔ loo ekpaa mli, ni wɔshiɔ jɛmɛ oya.” Wɔ “kuu bibioo ni filikiɔ” lɛ tsu Arizona maŋ lɛ fã ni da saŋŋ mli nii. Shi, yɛ naagbee lɛ agu, ejaakɛ nakai gbɛ ni atsɔɔ nɔ ashiɛɔ lɛ eŋmɛɛɛ wɔ gbɛ koni wɔye wɔbua gbɔmɛi ni yɔɔ sane lɛ he miishɛɛ lɛ.

Gilead Skul kɛ Sɔɔmɔ Krɛdɛɛ

Yɛ December 1942 lɛ, mifata gbɛgbalɔi babaoo ni yɔɔ Arizona ni amɛnine shɛ ninefɔ̃ɔ he wolo kɛmiiya maŋsɛɛ sanekpakpa shiɛmɔ he skul hee ni Yehowa Odasefoi eto he gbɛjianɔ lɛ nɔ lɛ ahe. Beni aje shishi lɛ, no mli lɛ atsɛɔ skul lɛ akɛ, Buu Mɔɔ Biblia Gilead Kɔleji. Yɛ sɛɛ mli lɛ, atsake gbɛi lɛ kɛba Buu Mɔɔ Biblia Gilead Skul. Nikasemɔhe lɛ jɛkɛmɔ shɛɔ kilomitai 4,800, ni ebɛŋkɛ Ithaca maŋtiase lɛ yɛ New York kooyigbɛ.

Yɛ January 1943, beni mikɛ be fioo eyasara Oregon sɛɛ lɛ, wɔ mɛi ni ji gbɛgbalɔi lɛ ateŋ mɛi babaoo shi Arizona Shia-ŋa ni edɔ lɛ nɔ yɛ Greyhound bɔs ko mli. Yɛ gbii pii komɛi asɛɛ lɛ, wɔyashɛ he ni wɔyaa lɛ, ni New York kooyigbɛ snoo fɛi lɛ kpee wɔ. Skul lɛ je shishi yɛ February 1, 1943 beni esɛinɔtalɔ, Nathan H. Knorr wie yɛ eshishijee wiemɔ kɛha nikaselɔi oha lɛ mli akɛ: “JEEE nikasemɔhe wulu nɛɛ yiŋtoo ji koni esaa nyɛ jogbaŋŋ koni nyɛbatsɔmɔ sɔɔlɔi ni akpɛlɛ amɛnɔ. Sɔɔlɔi ji nyɛ momo, ni nyɛkɛ afii babaoo miitsu nii yɛ sɔɔmɔ lɛ mli. . . . Nikasemɔ he gbɛjianɔ ni ato yɛ nikasemɔhe wulu nɛɛ mli lɛ hiɛ yiŋtoo kome, ni ji koni asaa nyɛ ni nyɛtsɔmɔ sɔɔlɔi ni he esa jogbaŋŋ diɛŋtsɛ yɛ shikpɔŋkukuji amli ni nyɛbaaya lɛ.”

Akɛni miskulyaa faaa tsɔ hewɔ lɛ, klɛŋklɛŋ lɛ mihe ejɔɔɔ mi yɛ Gilead. Shi tsɔɔlɔi lɛ nuɔ mi shishi waa diɛŋtsɛ, ni mibana minikasemɔ lɛ he miishɛɛ waa diɛŋtsɛ. Wɔ klas lɛ gbe skul lɛ naa beni akɛ nyɔji enumɔ etsɔse wɔ waa lɛ sɛɛ. No sɛɛ lɛ, akɛ wɔteŋ mɛi fioo komɛi tee Yehowa Odasefoi ajeŋ muu fɛɛ nitsumɔhe yitso lɛ, yɛ Brooklyn, New York, he ni wɔnine shɛ tsɔsemɔ nɔ lolo yɛ koni akɛsaa wɔ ni wɔsɔmɔ yɛ gbɛfaa nitsumɔ lɛ mli ákɛ kpokpaa nɔkwɛlɔi lɛ. Klɛŋklɛŋ nitsumɔ ni akɛha mi lɛ yɛ Carolina Kooyigbɛ kɛ Wuoyigbɛ.

Yɛ nakai mra bei lɛ amli lɛ, kpokpaa nɔkwɛlɔ lɛ tsuɔ nii kɛtsaraa nɔ daa gbi. Wɔyeɔ gbi kome yɛ asafo bibioo mli, loo gbii enyɔ kɛ eji nɔ ni da. No mli lɛ asafoi ni yɔɔ lɛ babaoo daraaa. No hewɔ lɛ beni miye gbi muu fɛɛ ní bei pii lɛ mikɛhi shi aahu kɛbote maŋkɛ mli, ni mikɛmiisara gbɔmɛi, ni mikɛmiiha saji ahetoo lɛ sɛɛ lɛ, miteɔ shi aaafee leebi ŋmɛji enumɔ koni mafa gbɛ kɛya asafo kroko mli. Mikɛ aaafee afi sɔmɔ yɛ kpokpaa nitsumɔ lɛ mli, ni yɛ no sɛɛ lɛ, mikɛ be fioo ko sɔmɔ akɛ gbɛgbalɔ yɛ Tennessee kɛ New York.

Kɛtee Cuba kɛ Agbɛnɛ Puerto Rico

Yɛ May 1945 lɛ, mifata mɛi krokomɛi babaoo he, ni akɛ mi tee mi klɛŋklɛŋ maŋsɛɛ sanekpakpa jajemɔ nitsumɔ lɛ mli yɛ Cuba! Nakai gbi gbɛkɛ ni wɔyashɛ Havana, ni ji Cuba maŋtiase lɛ, wɔkɛ woji tɛtrɛbii lɛ yaha gbɔmɛi lɛ. Wɔhi shi yɛ Havana aahu kɛyashi be mli ni wɔnine nyɛ eshɛ shia ko nɔ yɛ Santa Clara. Shika ni ahaa wɔ daa nyɔŋ nɔ ji $25 pɛ kɛha wɔhe hiamɔ nibii fɛɛ, ni niyenii kɛ tsũ nyɔmɔwoo hu fata he. Wɔkɛ nibii ni wɔnine shɛ nɔ lɛ kpɛ saatsei kɛ sɛii, ni wɔkɛ adekai ni akɛ blɔfo atĩa woɔ mli lɛ fee drɔɔi ni wɔkɛ wɔtaadei woɔ mli.

Afi ni nyiɛ sɛɛ lɛ mli lɛ, atuu kpokpaa nitsumɔ lɛ awo midɛŋ. Yɛ nakai be mli lɛ, kpokpaa kome ji Cuba fɛɛ. Akɛni kpokpaa nɔkwɛlɔ ni tsɔ mihiɛ lɛ naji kɛlɛ, ni esumɔɔ nyiɛmɔ hewɔ lɛ, ehe bahia ni nyɛmimɛi hii kɛ yei lɛ ajo foi diɛŋtsɛ koni amɛnyɛ amɛkɛ lɛ anyiɛ pɛpɛɛpɛ. Eka shi faŋŋ akɛ amɛsusu akɛ nakai mi hu mi ji, no hewɔ lɛ, amɛto nɔ fɛɛ nɔ he gbɛjianɔ kɛha misaramɔ lɛ. Amɛ fɛɛ amɛkɛ amɛhe wooo shiɛmɔ nitsumɔ lɛ mli yɛ nakai gbi lɛ nɔŋŋ mli, shi amɛja amɛmli amɛwo kui sɔrɔtoi amli ni mɔ fɛɛ mɔ kɛ mi tsuɔ nii kɛ eshɛ enɔ. Yɛ klɛŋklɛŋ gbi lɛ nɔ lɛ, kuu kome kɛ mi tee shikpɔŋkuku ko ni yɔɔ he ko shɔŋŋ mli; gbi ni nyiɛ sɛɛ lɛ, kuu kroko kɛ mi tee shikpɔŋkuku kroko ni jɛkɛmɔ tamɔ nakai nɔŋŋ mli, ni etsara nɔ nakai. Beni migbe misaramɔ lɛ naa lɛ, etɔ mi waa, shi mina he miishɛɛ. Mikɛ miishɛɛ kaiɔ nakai asafo lɛ.

Beni afi 1950 shɛɔ lɛ, no mli lɛ wɔna Maŋtsɛyeli shiɛlɔi ni fa fe 7,000 yɛ Cuba, ni etamɔ yibɔ ni Mexico na lɛ nɔŋŋ. Yɛ July yɛ nakai afi lɛ nɔŋŋ mli lɛ, mitee Teokrase Nɔyaa majimaji ateŋ kpee wulu ni afee yɛ Yankee Stadium yɛ New York City lɛ. Yɛ no sɛɛ lɛ, minine shɛ maŋsɛɛ sanekpakpa jajemɔ nitsumɔ hee ni kɛ mi tee Puerto Rico lɛ nɔ. Gbɔmɛi ni fata maŋsɛɛ sanekpakpa jajelɔi hee ni jɛ Gilead klas ni ji 12 lɛ ahe lɛ ji Estelle kɛ Thelma Weakley, mɛi ni fata mihe yɛ kɔyɔɔŋ lɛlɛ gbɛfaa kɛmiiya Puerto Rico lɛ mli lɛ.

Afii kpaanyɔ sɛɛ lɛ, mikɛ Estelle bote gbalashihilɛ mli yɛ yookpeemɔ kusum nifeemɔ ni yɔɔ mlɛo mli yɛ Bayamón, Puerto Rico, ni afee yɛ wiemɔ kpoku lɛ nɔ beni aba hejɔɔmɔ yɛ wɔ kpokpaa nɔ kpee lɛ shishi lɛ. Dani wɔɔbote gbalashihilɛ mli kɛ no sɛɛ fɛɛ lɛ misɔmɔ yɛ kpokpaa nitsumɔ lɛ mli. Yɛ nɔ ni fe afii nyɔŋma ni wɔkɛhi shi yɛ Puerto Rico lɛ mli lɛ, mikɛ Estelle na shweremɔi babaoo—kɛjɛ shiɛlɔi fioo ni shɛɛɛ 500 kɛmiiya nɔ ni fa fe 2,000. Wɔnyɛ wɔye wɔbua gbɔmɛi babaoo kɛyashɛ henɔjɔɔmɔ kɛ baptisimɔ he, ni wɔfata he ni ato asafoi heei babaoo ama shi.

Yɛ December 1960 lɛ, Milton Henschel ni jɛ Yehowa Odasefoi ajeŋ muu fɛɛ nitsumɔhe yitso ni yɔɔ Brooklyn, New York lɛ basara wɔ yɛ Puerto Rico, ni ekɛ maŋsɛɛ sanekpakpa jajelɔi lɛ wie. Ebi kɛji mɛi krokomɛi baasumɔ ni amɛnine ashɛ nitsumɔ kroko nɔ. Mikɛ Estelle fata mɛi ni kɛ amɛhe ha lɛ ahe.

Wɔ Shia yɛ Dominican Republic

Dominican Republic ji nitsumɔ hee ni wɔnine shɛ nɔ lɛ, ni wɔto akɛ wɔbaafa kɛya jɛmɛ yɛ June 1, 1961. Yɛ May 30 lɛ aju shi agbe Dominican yiwalɛ nɔyelɔ, Rafael Trujillo, ni afo kɔɔyɔŋ lɛji kɛ gbɛfaa kɛmiiya maŋ lɛ mli lɛ mli. Shi etsɛɛɛ ni kɔɔyɔŋ lɛji kɛ gbɛfaa je shishi ekoŋŋ, ni wɔnyɛ wɔkɛ kɔɔyɔŋ lɛlɛ fa gbɛ kɛtee Dominican Republic lɛ yɛ June 1 taakɛ wɔto he gbɛjianɔ lɛ.

Beni wɔyashɛ maŋ lɛ mli lɛ, no mli lɛ tsakemɔ ko eba trukaa, ni asraafoi lɛ efee kamkam waa. Aashe gbeyei akɛ maŋ hiɛ tsakemɔ ko baaba, no hewɔ lɛ asraafoi miikwɛkwɛɛ mɔ fɛɛ mɔ nibii amli yɛ gbɛjegbɛ wulu lɛ nɔ. Awa wɔ adamɔ shi yɛ hei babaoo ni akwɛɔ mɛi anibii amli yɛ lɛ, ni yɛ he fɛɛ he lɛ, akwɛɔ wɔjatsui lɛ amli. Ajieɔ nɔ fɛɛ nɔ ni yɔɔ wɔgbɛfaa baagii lɛ amli lɛ ashwieɔ shi, kɛ nibii bibii kwraa lɛ po. Nɛkɛ ji bɔ ni afala wɔ kɛba Dominican Republic lɛ.

Wɔhi shi otsii abɔ yɛ Santo Domingo ni ji maŋtiase lɛ mli dani wɔtee wɔ klɛŋklɛŋ nitsumɔ ni yɔɔ La Romana ni atuu awo wɔdɛŋ lɛ mli. Yɛ be mli ni Trujillo yiwalɛ nɔyeli lɛ yeɔ nɔ lɛ, akɛɛ maŋbii lɛ akɛ Komunistbii ji Yehowa Odasefoi, ni amɛji gbɔmɛi lɛ ateŋ mɛi ni ehiii kwraa. Enɛ hewɔ lɛ awa Odasefoi lɛ ayi waa. Shi fiofio lɛ wɔnyɛ wɔku hetsɛ̃ ni yɔɔ lɛ naa.

Beni wɔkɛ be fioo ko etsu nii yɛ La Romana sɛɛ lɛ, wɔje sɔɔmɔ nitsumɔ lɛ shishi ekoŋŋ yɛ kpokpaa nɔ nitsumɔ lɛ mli. Kɛkɛ ni yɛ afi 1964 mli lɛ, atuu nitsumɔ awo wɔdɛŋ akɛ maŋsɛɛ sanekpakpa jajelɔi yɛ Santiago maŋtiase lɛ mli. Yɛ afi ni nyiɛ sɛɛ lɛ mli lɛ, Dominican Republic lɛ ná maŋ hiɛ tsakemɔ ko, ni hirihirifeemɔ ba maŋ lɛ mli shikome ekoŋŋ. Beni béi lɛ yaa nɔ lɛ, ajie wɔ kɛtee San Francisco de Macorís, ni ji maŋ ko ni ale yɛ emaŋkwramɔŋ nifeemɔ lɛ hewɔ lɛ mli. Shi kɛlɛ, wɔshiɛ yɛ heyeli mli ni wɔkɛ naagba ko ekpeee. Yɛ maŋkwramɔŋ naagbai ni yɔɔ lɛ fɛɛ sɛɛ lɛ, wɔto asafo hee po wɔma shi. Yɛ afii ni nyiɛ sɛɛ lɛ fɛɛ mli lɛ, atsake wɔnitsumɔ lɛ mli shii abɔ dani asaa atuu maŋ ni wɔyɔɔ mli amrɔ nɛɛ ni ji Santiago lɛ awo wɔdɛŋ ekoŋŋ.

Yɛ anɔkwale mli lɛ, wɔna Yehowa jɔɔmɔ yɛ nitsumɔ lɛ mli yɛ biɛ yɛ Dominican Republic lɛ mli. Beni wɔyashɛ jɛmɛ yɛ afi 1961 mli lɛ, no mli lɛ Odasefoi aaafee 600 kɛ asafoi 20 yɔɔ. Amrɔ nɛɛ, shiɛlɔi aaashɛ 20,000 miishiɛ Nyɔŋmɔ Maŋtsɛyeli lɛ he sanekpakpa lɛ yɛ asafoi ni fa fe 300 mli. Gbɛkpamɔi kɛha shweremɔ lolo lɛ yɛ gbeyei, taakɛ gbɔmɛi 69,908 ni tee Kristo gbele lɛ Kaimɔ lɛ yɛ 1996 lɛ ye he odase lɛ. Enɛ feɔ shiɛlɔi ayifalɛ ni ebɔ he aaafee toi etɛ kɛ fã!

Etsɔ Maŋ ni Wa Agbɛnɛ

Eyɛ mli akɛ je lɛŋ shihilɛ miiya nɔ eeetsake moŋ, shi Biblia lɛ mli shɛɛ sane ni Yehowa Odasefoi shiɛɔ lɛ kã he eji bɔ ni eyɔɔ lɛ nɔŋŋ. (1 Korintobii 7:31) Yehowa ji Nyɔŋmɔ lolo, Kristo ji Maŋtsɛ lolo, ni Maŋtsɛyeli lɛ efee faŋŋ fe bei fɛɛ ni eho akɛ eji hiɛnɔkamɔ pɛ ni yɔɔ kɛha je lɛ.

Yɛ nakai beaŋ nɔŋŋ lɛ, kɛjɛ be mli ni mitee nakai kpee lɛ, nɔ ni miihe ashɛ afii 60 ni eho nɛ, yɛ Salem, Oregon kɛbaa nɛɛ lɛ, tsakemɔ ko ni yɔɔ naakpɛɛ etee nɔ yɛ Yehowa webii lɛ ateŋ. Lɛɛlɛŋ, asafo babaoo, loo asafo kpeteŋkpele lɛ ebatsɔ agbo, ni amɛyifalɛ fe akpekpei enumɔ. Etamɔ bɔ pɛ ni Yehowa gba efɔ shi yɛ ewebii lɛ ahe lɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa: Kɛ shɛ ebe lɛ, mi, Yehowa, maha afee oya!”—Yesaia 60:22.

Yɛ nɔ ni miihe ashɛ afii 60 ni mikɛtsu nii yɛ be-fɛɛ sɔɔmɔ nitsumɔ lɛ mli lɛ sɛɛ lɛ, eŋɔɔ minaa akɛ mináa miishɛɛ ni yɔɔ shiɛmɔ ni miyaa daa, ni mitsɔɔ nii yɛ mi maŋsɛɛ sanekpakpa jajemɔ nitsumɔ lɛ mli lɛ. Mɛɛ hegbɛ kpele po eji nɛkɛ akɛ minaa nakai nitsumɔ lɛ mli gbɛfaŋnɔ, ni mina “mɔ fioo” lɛ ni etsɔ “maŋ ni wa”!

[Mfoniri ni yɔɔ baafa 21]

Mikɛ miŋa, yɛ Dominican Republic