Yitso 5
Heyeli ni Yehowa Jalɔi Naa Mli Ŋɔɔmɔ
1, 2. (a) Mɛɛ heyeli Nyɔŋmɔ kɛha klɛŋklɛŋ nuu kɛ yoo lɛ? (b) Tsii mlai ni ye amɛshihilɛ nɔ lɛ ekomɛi ata.
BENI Yehowa bɔ klɛŋklɛŋ nuu kɛ yoo lɛ, amɛna heyeli mli ŋɔɔmɔ ni fe fɛɛ eko ni adesai naa mli ŋɔɔmɔ ŋmɛnɛ. Amɛshia lɛ, Paradeiso ni. Hela ko gbaaa amɛnaa yɛ shihilɛ mli ŋɔɔmɔ ni amɛnaa lɛ mli. Gbele emɛɛɛ amɛ. Shi bulɛ kɛha Nyɔŋmɔ mlai lɛ ji nɔ ni he hiaa kɛji amɛaaka he amɛhiɛ nakai heyeli lɛ mli.
2 Ekolɛ nakai mlai lɛ ekomɛi jeee nɔ ni ajaje atsɔɔ yɛ wiemɔi amli, shi abɔ Adam kɛ Hawa bɔ ni amɛ adebɔɔ su baaha amɛye nɔ. Enɛ tsɔɔ akɛ hɔmɔ baaha niyenii aba amɛtsine; kumai ni yeɔ mɔ lɛ baaha amɛtao nu amɛnu. Hulu shinyɔɔ baaha amɛyawɔ ni amɛjɔɔ amɛhe. Agbɛnɛ Yehowa kɛ amɛ wie ni ekɛ nitsumɔ ko wo amɛdɛŋ. Yɛ anɔkwale mli lɛ, nakai nitsumɔ lɛ mla ni, ejaakɛ enɛ baaye amɛnifeemɔ nɔ. Shi, mɛɛ mlihilɛ mla ni sɛɛnamɔ yɔɔ he po ji enɛ! Enɛ ha amɛna nitsumɔ ni baaha amɛtsui anyɔ amɛmli, ni no baaha amɛna hegbɛ ni amɛkɛ amɛjwɛŋmɔ atsu nii yɛ gbɛi kpakpai anɔ. Esa akɛ amɛfɔ bii, ni amɛye shikpɔŋ nɔ kooloi anɔ ni amɛlɛɛ Paradeiso lɛ mli fiofio kɛyashi shikpɔŋ lɛ naagbee hei lɛ tɔɔ. (1 Mose 1:28; 2:15) Nyɔŋmɔ kɛ enɛ mlitsɔɔmɔ babaoo efɔɔɔ amɛnɔ. Eha amɛ hegbɛ bɔ ni sa koni amɛkɛkpɛ amɛyiŋ. Mɛni ekoŋŋ mɔ ko baanyɛ abi?
3. Mɛɛ gbɛ nɔ atsɔ aye abua Adam ní ekɛ heyeli ni eyɔɔ lɛ akpɛ eyiŋ yɛ nilee mli?
3 Shi, beni akɛ hegbɛ ha Adam akɛ ekpɛ eyiŋ lɛ, no etsɔɔɔ akɛ, bɔ fɛɛ bɔ ni eji lɛ, yiŋkpɛɛ fɛɛ yiŋkpɛɛ ni ebaafee lɛ he baaba sɛɛnamɔ. Heyeli ni eyɔɔ akɛ ekpɛɔ eyiŋ lɛ kɛ gbɛnaa nii bafɔɔ enɔ. Ebaanyɛ ekase nii kɛtsɔ eŋwɛi Tsɛ lɛ toiboo kɛ E-nitsumɔi ashikpamɔ nɔ, ni Nyɔŋmɔ eha Adam nilee ni baaha ekɛ nɔ ni ekaseɔ lɛ atsu nii. Akɛni abɔ Adam “yɛ Nyɔŋmɔ subaŋ nɔ” hewɔ lɛ, edebɔɔ su baatsirɛ lɛ koni ejie Nyɔŋmɔ sui akpo beni ekpɛɔ eyiŋ lɛ. Yɛ anɔkwale mli lɛ kɛ ehiɛ sɔɔ nɔ ni Nyɔŋmɔ efee eha lɛ lɛ ni eesumɔ ni esa Nyɔŋmɔ hiɛ lɛ ebaakwɛ jogbaŋŋ yɛ enɛ feemɔ mli.—1 Mose 1:26, 27; okɛto Yohane 8:29 he.
4. (a) Ani kita ni awo Adam ni tsiɔ enaa lɛ haaa ena heyeli? (b) Mɛni hewɔ enɛ ji taomɔ nii ni sa lɛ?
4 Akɛ nɔ ni baakai gbɔmɔ akɛ eshihilɛ damɔ e-Bɔlɔ kɛ Wala-Halɔ lɛ nɔ lɛ, Yehowa wo lɛ kita nɛɛ akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!” (1 Mose 2:16, 17) Ani mla nɛɛ he heyeli kɛjɛ gbɔmɔ dɛŋ? Dabi kwraa. Adam yɛ hegbɛ akɛ eboɔ toi aloo ebooo toi. Naatsii nɛɛ kɛ jatsu ko ni tsii efɔɔɔ enɔ. Eyɛ niyenii babaoo ni ebaanyɛ eye kɛ etaaa nakai tso kome lɛ he. Shi, esa akɛ ele akɛ Nyɔŋmɔ nɔ ji shikpɔŋ ni eyɔɔ nɔ lɛ, ni akɛ Bɔlɔ lɛ, Nyɔŋmɔ ji ebɔɔ nii lɛ anɔ Nɔyelɔ yɛ gbɛ ni ja nɔ.—Lala 24:1, 10.
5. (a) Te fee tɛŋŋ ni Adam kɛ Hawa laaje heyeli ni yɔɔ nyam ni amɛyɔɔ lɛ? (b) Mɛni baye enɛ najiaŋ, ni te enɛ esa wɔhe eha tɛŋŋ?
5 Shi mɛni ba? Pɛsɛmkunya kanyamɔ tsirɛ ŋwɛibɔfo ko ni elaka Hawa kɛtsɔ ehe ni efee tamɔ gbɛtsɔɔlɔ kpakpa, ni ekɛ shiwoo ko ha lɛ ni teɔ shi woɔ Nyɔŋmɔ suɔmɔnaa nifeemɔ lɛ nɔ. Ni eeebo e-Tsɛ lɛ toi moŋ lɛ, Adam yafata Hawa he yɛ nɔtɔmɔ mli. Kɛtsɔ nɔ ko ni jeee amɛnɔ ni amɛyaye lɛ nɔ lɛ, Adam kɛ Hawa laaje anunyam heyeli ni amɛyɔɔ lɛ. Esha batsɔ amɛnuŋtsɔ, ni taakɛ Nyɔŋmɔ bɔ amɛ kɔkɔ lɛ, gbele ba amɛnɔ kɛ̃. No hewɔ lɛ, mɛɛ gboshinii amɛshi amɛha amɛseshibii? Esha ni jieɔ ehe kpo yɛ nɔ fɔŋ feemɔ fɔmɔ su mli, yɛ gbɔjɔmɔi ni kɛ hela baa, kɛ naagbee fitemɔ kɛtsɔ gbɔlɛ nɔ. Agbɛnɛ hu, kɛ gbele. Nɔ fɔŋ feemɔ henumɔ ni ana kɛtsɔ fɔmɔ nɔ, ni Satan hewalɛ woɔ mli wu lɛ eha shihilɛ ni gbɔmɔ yɔɔ mli lɛ etsɔ oshara kɛha mɔ fɛɛ mɔ. Kwɛ bɔ ni enɛ tamɔɔɔ heyeli ni Nyɔŋmɔ kɛha adesa yɛ shishijee lɛ kwraa!—Rom. 5:12; Hiob 14:1; Kpoj. 12:9.
HE NI ABAANYƐ ANA HEYELI YƐ
6. (a) Nɛgbɛ abaanyɛ aná heyeli diɛŋtsɛ lɛ kɛjɛ? (b) Mɛɛ heyeli nɛkɛ Yesu wieɔ he yɛ Yohane 8:31, 32 lɛ?
6 Yɛ bɔ ni shihilɛ lɛ yɔɔ ŋmɛnɛ hewɔ lɛ, ebɛ naakpɛɛ akɛ gbɔmɛi shweɔ heyeli babaoo fe bɔ ni amɛyɔɔ. Shi nɛgbɛ abaanyɛ ana heyeli diɛŋtsɛ yɛ? Yesu Kristo kɛɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.” (Yoh. 8:31, 32) Enɛ jeee heyeli ni aje he husu tamɔ nɔ ni gbɔmɛi kɛ amɛhiɛ fɔɔ nɔ beni amɛkpooɔ maŋkwramɔŋ nɔyelɔ aloo nɔyeli ko yɛ ekroko najiaŋ lɛ. Shi moŋ, enɛ nyɛɔ etsuɔ adesai anaagbai ahe nii diɛŋtsɛ. Nɔ ni Yesu wieɔ he lɛ ji heyeli kɛmiijɛ esha nyɔŋyeli shishi. (Kwɛmɔ Yohane 8:24, 34-36.) No hewɔ lɛ, kɛ mɔ ko batsɔ Yesu Kristo anɔkwa kaselɔ lɛ, enɛ kɛ tsakemɔ ni sa kadimɔ baa eshihilɛ mli, eji heyeli.
7. (a) Yɛ mɛɛ shishinumɔ naa wɔbaanyɛ wɔye wɔhe yɛ esha he bianɛ? (b) Bɔni afee ni wɔna nakai heyeli lɛ, mɛni esa akɛ wɔfee?
7 Enɛ etsɔɔɔ akɛ amrɔ nɛɛ anɔkwa Kristofoi nuuu eshafeemɔ su ni yɔɔ amɛmli ni amɛna kɛtsɔ fɔmɔ nɔ lɛ he dɔŋŋ. Shi moŋ, amɛwuɔ amɛshiɔ enɛ. (Rom. 7:21-25) Shi kɛ mɔ ko hiɔ shi yɛ Yesu tsɔɔmɔi lɛ anaa yɛ anɔkwayeli mli lɛ, ebafeee mɔ ni esha yeɔ lɛ nyɔŋ dɔŋŋ. Esha yeee enɔ maŋtsɛ dɔŋŋ ni eeeha lɛ mlai ni eeeye nɔ. Ebafeee mɔ ni shihilɛ ni yiŋtoo bɛ mli edu lɛ ni ashi lɛ kɛ henilee ni ehao. Ebanaa henilee ni mli tse yɛ Nyɔŋmɔ hiɛ ejaakɛ akɛ enɔtɔmɔi ni eho lɛ keɔ lɛ yɛ hemɔkɛyeli ni enaa yɛ Kristo afɔleshaa lɛ mli lɛ hewɔ. Ekolɛ eshafeemɔ henumɔi komɛi baajie amɛhe kpo moŋ, shi kɛ etsuuu he nii akɛni ekaiɔ Kristo tsɔɔmɔi ni he tse lɛ hewɔ lɛ, ekɛ enɛ tsɔɔ akɛ esha jeee enuŋtsɔ dɔŋŋ.—Rom. 6:12-17.
8. (a) Mɛɛ heyeli kroko anɔkwa Kristojamɔ kɛhaa wɔ? (b) Te esa akɛ enɛ aná su ni wɔjieɔ lɛ kpo yɛ jeŋ nɔyelɔi ahe lɛ nɔ hewalɛ eha tɛŋŋ?
8 Akɛ Kristofoi lɛ, wɔnaa heyeli babaoo mli ŋɔɔmɔ. Akpɔ wɔ kɛjɛ hewalɛ ni apasa tsɔɔmɔi, hemɔkɛyeli gbonyo kɛ eshafeemɔ nyɔŋyeli naa yɛ wɔnɔ lɛ mli. Anɔkwalei wuji ni kɔɔ shihilɛ mli ni gbohii yɔɔ lɛ ahe kɛ gbohiiashitee lɛ haa wɔyeɔ wɔhe kɛjɛɔ yiwalɛ gbele he gbeyeishemɔ ni nyɛɔ gbɔmɛi ahenilee nɔ lɛ mli. Nilee ni wɔyɔɔ akɛ akɛ Nyɔŋmɔ jalɛ Maŋtsɛyeli baato adesa nɔyelii ni yeee emuu lɛ anajiaŋ lɛ haa wɔyeɔ wɔhe kɛjɛɔ shihilɛ ni hiɛnɔkamɔ bɛ mli lɛ he. Shi heyeli ni tamɔ nɛkɛ lɛ etsɔɔɔ bulɛ ni wɔbɛ kɛha mla loo amralofoi kɛ yiŋtoo akɛ etsɛŋ kwraa ni gbɛjianɔtoo momo nɛɛ baaho aya.—1 Pet. 2:16, 17; Tito 3:1, 2.
9. (a) Yehowa jɛɔ esuɔmɔ mli eyeɔ ebuaa wɔ ni wɔna heyeli babaoo ni adesai yɔɔ bianɛ lɛ mli ŋɔɔmɔ yɛ mɛɛ gbɛ nɔ? (b) Kɛ aakpɛ yiŋ lɛ, mɛɛ gbɛ nɔ wɔɔtsɔ wɔjie wɔhe kpo akɛ wɔnuɔ nɔ ni jɛ Adam heyeli ni ekɛtsuuu nii yɛ gbɛ ni ja nɔ lɛ mli ba lɛ shishi jogbaŋŋ?
9 Yehowa shiii wɔ akɛ wɔka wɔhiɛ wɔtao gbɛ ni hi fe fɛɛ ni wɔɔtsɔ nɔ wɔhi shi lɛ wɔkwɛ. Ele bɔ ni abɔ wɔ aha, nɔ ni baaha wɔna miishɛɛ diɛŋtsɛ ni wɔnu he akɛ wɔhiɛ eba nyam, kɛ nɔ ni he baaba sɛɛnamɔ fe fɛɛ aha wɔ. Agbɛnɛ hu, ele lɛ diɛŋtsɛ ebe kɛha eyiŋtoo he nitsumɔ ni yɛ no hewɔ lɛ, ele nitsumɔ ni he yɔɔ sɛɛnamɔ kɛha wɔ akɛ wɔtsu. Kɛfata he lɛ, ele jwɛŋmɔi kɛ jeŋbai ni baa gbɔmɔ shi aloo nɔ ni fiteɔ wekukpaa ni ka mɔ ko kɛ mɛi krokomɛi ateŋ lɛ, kɛ nɔ ni tsiɔ lɛ gbɛ kɛjɛɔ Nyɔŋmɔ Maŋtsɛyeli lɛ mli jɔɔmɔi ni eeena he. Ejɛɔ esuɔmɔ mli etswaa wɔ nɛkɛ nibii nɛɛ ahe adafi kɛtsɔɔ Biblia lɛ kɛ egbɛjianɔtoo ni anaa lɛ nɔ. (Gal. 5:19-23; Marko 13:10; okɛto 1 Timoteo 1:12, 13 he.) Kɛkɛ lɛ ashi enɛ aha wɔ koni wɔkɛ wɔ diɛŋtsɛ wɔheyeli ni Nyɔŋmɔ kɛha wɔ lɛ atsu nii ni wɔkpɛ wɔyiŋ yɛ bɔ ni wɔbaatsu he nii wɔha he. Kɛ wɔŋɔ nɔ ni Biblia lɛ kɛɔ wɔ yɛ bɔ ni fee ni Adam laaje heyeli ni akɛha adesa lɛ kɛjɛ shishijee lɛ wɔto wɔtsui mli lɛ, no lɛ wɔbaakpɛ wɔyiŋ yɛ nilee mli. Wɔbaajie lɛ kpo wɔtsɔɔ akɛ wekukpaa kpakpa ni aaaka wɔkɛ Yehowa teŋ lɛ ji oti ni wɔjwɛŋɔ he yɛ shihilɛ mli.
HEYELI KROKO NI ASHWEƆ
10. Mɛɛ heyeli kroko mɛi komɛi ni tsɛɔ amɛhe Kristofoi lɛ taoɔ?
10 Yɛ bei komɛi amli lɛ obalaŋtai komɛi ni atsɔse amɛ akɛ Yehowa Odasefoi, kɛ mɛi krokomɛi ni darako tsɔ lɛ nuɔ he akɛ amɛtao heyeli kroko. Ekolɛ je lɛ baafee nɔ ni yɔɔ fɛo aha amɛ, ni babaoo ni amɛsusuɔ he lɛ, babaoo ni akɔnɔ ni amɛna akɛ amɛfee amɛnii tamɔ jeŋbii feɔ amɛnii lɛ mli waa ji no. Ekolɛ amɛtoŋ amɛyiŋ akɛ amɛbaatsu tsofai ahe nii yɛ gbɛ fɔŋ nɔ, aloo amɛbaanu daa babaoo loo amɛbaabɔ ajwamaŋ. Shi amɛjeɔ shishi amɛfiteɔ be beni amɛkpa skul aloo nitsumɔ yɛ amɛnanemɛi jeŋbii amasɛi. Akɛni amɛsumɔɔ ni amɛnanemɛi heei nɛɛ asumɔ amɛ hewɔ lɛ, amɛjeɔ shishi amɛkaseɔ amɛwiemɔ kɛ amɛjeŋba.—3 Yoh. 11.
11. Yɛ bei komɛi amli lɛ, lakamɔ akɛ afee enɛ lɛ baa kɛjɛɔ nɛgbɛ?
11 Yɛ bei komɛi amli lɛ, lakamɔ akɛ akɛ he awo je lɛ jeŋbai amli lɛ baa kɛjɛɔ mɔ ko ni kɛɔ akɛ esɔmɔɔ Yehowa lɛ ŋɔɔ. Nakai ji bɔ ni eba yɛ Eden beni Satan laka Hawa, kɛ beni Hawa ha Adam fata ehe lɛ. Agbɛnɛ enɛ ji anɔkwale hu yɛ mra be mli Kristofoi lɛ ahe, ni nakai nɔŋŋ eji yɛ wɔgbii nɛɛ amli. Yɛ bei babaoo mli lɛ, gbɔmɛi ni tamɔ nɛkɛ sumɔɔ nibii ni kanyaa mɔ ni amɛshweɔ nibii ni kɛ miishɛɛ babaoo baa. Amɛtsirɛɔ mɛi krokomɛi ayisɛɛ akɛ “amɛjie amɛhiɛtserɛ.” ‘Amɛwoɔ amɛ shi akɛ amɛaaye amɛhe, tsɛ amɛ diɛŋtsɛ lɛ fitemɔ nyɔji ji amɛ.’—2 Pet. 2:18, 19.
12. (a) Mɛɛ awerɛho shihilɛ jɛɔ je lɛŋ jeŋba mli baa? (b) Kɛ mɛi ni kɛ amɛhe woɔ enɛ mli lɛ le nɔ ni jɛɔ mli baa lɛ, belɛ mɛni hewɔ amɛkaa he amɛkɛ amɛhe woɔ mli lɛ?
12 Nɔ ni jɛɔ enɛ mli baa lɛ bɛ miishɛɛ. Bɔlɛnamɔ yɛ gbɛ fɔŋ nɔ kɛ henumɔ mli piŋmɔ baa. Ebaanyɛ ekɛ hela, hɔ ni ataooo kɛ agbɛnɛ gbalamlitsemɔ aba. (Abɛi 6:32-35; 1 Kor. 6:18; 1 Tes. 4:3-8) Tsofai ni akɛtsuɔ nii yɛ gbɛ fɔŋ nɔ haa mɔ feɔ yeyeeye, mɔ ni nyɛɛɛ awie jogbaŋŋ, mɔ ni enaaa nii jogbaŋŋ, hiɛdimɔ, mu ni anyɛɛɛ amu jogbaŋŋ, ninamɔ ni tsakeɔ ni ekɛ gbele baa. (Okɛto Abɛi 23:29-35 he.) Sui nɛɛ baanyɛ aka mɔ he ni eha mɔ atsɔ awuiyelɔ yɛ esɛɛdii mli. Yɛ bei komɛi amli lɛ, mɛi ni kɛ amɛhe woɔ jeŋba ni tamɔ nɛkɛ mli lɛ le nɔ ni baanyɛ ajɛ mli aba. Shi bɔ ni amɛshweɔ nibii ni kanyaa mɔ kɛ bɔlɛnamɔ mli akɔnɔ lɛ haa amɛŋamɔɔ amɛjwɛŋmɔ naa yɛ nibii ni jɛɔ mli baa lɛ he. Amɛwieɔ amɛtsɔɔ amɛhe akɛ eji heyeli, shi amɛnaa beni ekpe sɛɛ tsɔ akɛ amɛji esha nyɔji, ni mɛɛ nuŋtsɔ yiwalɔ po esha ji nɛkɛ! Sane ni tamɔ nɛkɛ ni wɔɔsusu he bianɛ lɛ baaye abua wɔ ni ebu wɔhe kɛjɛ niiashikpamɔ ni tamɔ nɛkɛ mli.—Gal. 6:7, 8.
HE NI NAAGBAI LƐ JEƆ SHISHI KƐJƐƆ
13. (a) Akɔnɔ ni gbalaa mɔ kɛyaa nɛkɛ haomɔi nɛɛ amli lɛ teɔ shi yɛ mɛɛ gbɛ nɔ? (b) Bɔni afee ni wɔnu nɔ ni “naanyobɔɔ fɔŋ” ji shishi lɛ, namɔ susumɔ he hiaa wɔ? (d) Yɛ be mli ni ohaa sanebimɔi ni yɔɔ kuku nɛɛ naagbee lɛ ahetoo lɛ, maa bɔ ni Yehowa susuɔ sane he ehaa lɛ nɔ mi. Wiemɔ sanebimɔ kome he yɛ be kome mli.
13 Bo lɛ wa ni osusu he ni efɔɔ kaa akɛ naagbai nɛɛ jeɔ shishi kɛjɛɔ lɛ he okwɛ. Biblia lɛ tsɔɔ mli akɛ: “Shi mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ, akɔnɔ lɛ kɛ eŋɔ hɔ lɛ, efɔɔ esha, ni esha lɛ hu kɛ afee agbe naa lɛ, efɔɔ gbele.” (Yak. 1:14, 15) Shi te feɔ tɛŋŋ ni akɔnɔi nɛɛ teɔ shi lɛ? Kɛtsɔ nɔ ni boteɔ jwɛŋmɔ lɛ mli lɛ nɔ, ni yɛ be babaoo mli lɛ, naanyo ni akɛ gbɔmɛi ni kɛ Biblia shishitoo mlai tsuuu nii lɛ bɔɔ lɛ kɛbaa. Shi, wɔ fɛɛ wɔle akɛ esa akɛ wɔkwa “naanyobɔɔ fɔŋ.” Shi sanebimɔ lɛ ji akɛ, Mɛɛ naanyobɔɔ ji efɔŋ lɛ? Te Yehowa kwɛɔ sane nɛɛ ehaa tɛŋŋ? Esa akɛ sanebimɔi kɛ ŋmalɛi ni nyiɛ sɛɛ nɛɛ ahesusumɔ aye abua wɔ koni wɔmu sane naa yɛ gbɛ ni ja nɔ.
Ani anɔkwale ni eji akɛ mɛi komɛi buɔ amɛhe lɛ tsɔɔ akɛ amɛbaafee nanemɛi kpakpai? (Okɛto 1 Mose 34:1, 2, 18, 19 he.)
Ani amɛsanegbaa, ekolɛ amɛfɛoyeli tsɔɔ akɛ wɔbaanyɛ wɔkɛ amɛ abɔ? (Efes. 5:3, 4)
Ani esa akɛ wɔhɛle shi kɛji akɛ amɛheee nibii ni wɔheɔ wɔyeɔ ni kɔɔ Nyɔŋmɔ yiŋtoo he lɛ amɛyeee? (Okɛto 1 Korintobii 15:12, 32, 33 he.)
Te Yehowa baanu he aha tɛŋŋ kɛji wɔhala gbɔmɛi ni bɛ ehe suɔmɔ lɛ akɛ wɔnanemɛi? (Okɛto 2 Kronika 19:1, 2 he.)
Eyɛ mli akɛ ekolɛ wɔkɛ mɛi ni heee yeee baatsu nii aloo wɔkɛ amɛ baaya skul moŋ, shi te wɔɔfee tɛŋŋ wɔtsɔɔ akɛ wɔhalaaa amɛ akɛ wɔnanemɛi? (1 Pet. 4:3, 4)
Telivishin ni wɔkwɛɔ kɛ woji, woji tɛtrɛbii kɛ adafitswaa woji ni wɔkaneɔ lɛ ji gbɛi ni wɔtsɔɔ nɔ wɔkɛ mɛi krokomɛi bɔɔ. Te saji ni jɛɔ woji nɛɛ amli lɛ ateŋ nɔ ni esa akɛ okwɛ jogbaŋŋ yɛ he yɛ gbii nɛɛ amli lɛ? (Abɛi 3:31; Yes. 8:19; Efes. 4:17-19)
Mɛni ji nɔ ni mɛi ni wɔhalaa akɛ wɔnanemɛi lɛ kɛɔ Yehowa yɛ nɔ gbɔmɛi ni wɔji lɛ he? (Lala 26:1, 4, 5; 97:10)
14. Mɛɛ heyeli ni yɔɔ nyam ka mɛi ni kɛ Nyɔŋmɔ Wiemɔ lɛ mli ŋaawoo tsuɔ nii bianɛ lɛ ahiɛ?
14 Nyɔŋmɔ Gbɛjianɔtoo Hee lɛ ka wɔhiɛ kpaakpa. Adesa baana heyeli kɛjɛ Satan kɛ eyiwalɛ nibii agbɛjianɔtoo nɛɛ nɔnyɛɛ shishi kɛtsɔ E-Maŋtsɛyeli lɛ nɔ. Abaajie hewalɛ ni esha ena yɛ gbɔmɔ nɔ lɛ kɛya fiofio. Naanɔ wala yɛ Paradeiso baaka amɛhiɛ. Heyeli diɛŋtsɛ ni kɛ “Yehowa mumɔ lɛ” kpaa gbee baaba aha bɔɔ nii fɛɛ. (2 Kor. 3:17, NW) Ani eeeji nifeemɔ ni nilee yɔɔ mli akɛ wɔɔha enɛɛmɛi fɛɛ abɔ wɔ yɛ Nyɔŋmɔ Wiemɔ lɛ mli ŋaawoo ni wɔɔbu lɛ akɛ eji nɔ ko ni he ehiaaa bianɛ lɛ hewɔ? Eba akɛ wɔɔjie wɔhe kpo wɔtsɔɔ faŋŋ akɛ nɔ ni wɔsumɔɔ lɛlɛŋ ji “Nyɔŋmɔ bii lɛ anunyam heyeli lɛ” kɛtsɔ gbɛ ni wɔtsɔɔ nɔ wɔkɛ wɔ Kristofoi aheyeli lɛ tsuɔ nii wɔhaa ŋmɛnɛ lɛ nɔ.—Rom. 8:21.
Sanegbaa Ni Akɛtiɔ Mli
● Mɛɛ heyeli nɛkɛ klɛŋklɛŋ nuu kɛ yoo lɛ na mli ŋɔɔmɔ? Kɛ akɛto nɔ ni adesa naa bianɛ lɛ he lɛ, mɛni anaa?
● Kɛ akɛto je lɛ he lɛ, mɛɛ heyeli anɔkwa Kristofoi yɔɔ? Anyɛɔ anaa enɛ yɛ mɛɛ gbɛ nɔ?
● Mɛɛ nyɔmɔ mɛi ni diɔ heyeli ni yɔɔ je lɛ mli lɛ sɛɛ lɛ woɔ?
● Mɛni hewɔ ehe hiaa jogbaŋŋ akɛ aaakwa “naanyobɔɔ fɔŋ” lɛ? Akɛ mɛi ni tamɔɔɔ Adam lɛ, namɔ yiŋkpɛɛ yɛ nibii ni ehiii he wɔkpɛlɛɔ nɔ?