“Kwashiaiasane” Lɛ Ni Yehowa Kɛtsu Nii Koni Ekɛhere Mɛi Ni Heɔ Yeɔ Lɛ Ayiwala
“Akɛni je lɛ tsɔɔ Nyɔŋmɔ nilee lɛ nɔ ni ekɛ enilee lɛ ale Nyɔŋmɔ hewɔ lɛ, esa Nyɔŋmɔ hiɛ akɛ ekɛ kwashiaiasane lɛ ni ashiɛɔ lɛ ahere mɛi ni heɔ yeɔ lɛ ayiwala.”—1 KORINTOBII 1:21.
1. Yehowa kɛ “kwashiaiasane” baatsu nii yɛ mɛɛ shishinumɔ naa, ni te wɔfeɔ tɛŋŋ wɔleɔ akɛ je lɛ tsɔɔɔ enilee lɛ nɔ ni ekɛle Nyɔŋmɔ?
MƐNI? Ani Yehowa kɛ kwashiaiasane baatsu nii? Jeee nakai diɛŋtsɛ! Shi ebaanyɛ, ni enyɛɔ ekɛ nɔ ni tamɔ kwashiaiasane kɛha je lɛ tsuɔ nii. Efeɔ nakai koni ekɛhere gbɔmɛi ni le lɛ ni amɛsumɔɔ lɛ lɛ ayiwala. Je lɛ nyɛŋ atsɔ enilee lɛ nɔ ale Nyɔŋmɔ. Yesu Kristo fee enɛ faŋŋ beni ekɛɛ yɛ sɔlemɔ mli akɛ: “Ataa jalɔ, je lɛ leee bo.”—Yohane 17:25.
2. Yɛ mɛɛ gbɛ nɔ Yehowa gbɛ̀i kɛ je lɛ gbɛ̀i feɔ tamɔ amɛje amɛhe lɛ, shi mɛni ji anɔkwa saji ni yɔɔ mli?
2 Yesu wiemɔi lɛ tsɔɔ akɛ Yehowa gbɛ̀i yɛ sɔrɔto yɛ je lɛ nɔ̃ lɛ he. Kɛ akwɛ lɛ yɛ hiɛaŋhiɛaŋ lɛ etamɔ nɔ ni Nyɔŋmɔ yiŋtoo kɛ je lɛ nɔ je amɛhe. Efeɔ tamɔ nɔ ni Nyɔŋmɔ jɔɔmɔ yɛ je nɛɛ yiŋtoi lɛ anɔ. Akɛ nɔkwɛmɔ nɔ lɛ, Biblia lɛ kɛɔ akɛ Nyɔŋmɔ baato jalɛ nɔyeli ko ni kɛ shihilɛ yɛ toiŋjɔlɛ, miishɛɛ kɛ nɔyaa mli baaba aha adesai yɛ shikpɔŋ nɛɛ nɔ. (Yesaia 9:6, 7; Mateo 6:10) Nakai nɔŋŋ hu je lɛ tswaa eyiŋtoo akɛ ekɛ toiŋjɔlɛ, shweremɔ kɛ nɔyeli kpakpa baaba kɛtsɔ nɔ ni akɛɛ atsɛɔ lɛ jeŋ gbɛjianɔtoo hee lɛ nɔ lɛ he adafi. Shi Nyɔŋmɔ yiŋtoi kɛ je lɛ nɔ yeee egbɔ. Yehowa yiŋtoo ji ni ebu ehe bem akɛ Jeŋ Muu Fɛɛ Maŋtsɛ. Ebaatsɔ ŋwɛi nɔyeli ko ni baakpata shikpɔŋ nɔ nɔyelii fɛɛ hiɛ lɛ nɔ efee enɛ. (Daniel 2:44; Kpojiemɔ 4:11; 12:10) No hewɔ lɛ Nyɔŋmɔ kɛ je nɛɛ bɛ nɔ ko feemɔ, loo nɔ ko ni efeemɔ je amɛhe. (Yohane 18:36; 1 Yohane 2:15-17) No hewɔ ni Biblia lɛ wieɔ nilee sɔrɔtoi enyɔ he lɛ—“Nyɔŋmɔ nilee lɛ” kɛ “je lɛŋ nilee lɛ.”—1 Korintobii 1:20, 21.
Shishijee Fatɔɔ ni Yɔɔ Je Lɛŋ Nilee He
3. Eyɛ mli akɛ je lɛ nilee feɔ tamɔ eyɛ naakpɛɛ kɛ fɛo moŋ, shi mɛni hewɔ jeŋ gbɛjianɔtoo hee ni gbɔmɔ ewo shi yɛ he lɛ efeŋ nɔ ni baaha mɔ tsui anyɔ emli kɔkɔɔkɔ lɛ?
3 Je lɛŋ nilee feɔ mɛi ni Nyɔŋmɔ nilee kudɔɔɔ amɛ lɛ fɛo. Jeŋ nileei ni hiɛ gbɛi wuji yɛ ni gbalaa gbɔmɛi ajwɛŋmɔ. Nikasemɔ hei kɛha woloŋlee ni yaa hiɛ kɛ saji ni jɛ nɔ ni mɛi pii susuɔ akɛ eji adesai ajwɛŋmɔi ni nɔ kwɔlɔ fe fɛɛ amli lɛ haa mɛi. Adesai aniiashikpamɔ mli nilee yɛ afii ohai abɔ lɛ amli ni abua naa eyimɔ wojiatoohei wuji pii amli obɔbɔ. Shi, yɛ enɛɛmɛi fɛɛ sɛɛ lɛ, nɔ ni jeŋ hee gbɛjianɔtoo ni je lɛŋ nɔyelɔi lɛ toɔ he gbɛjianɔ lɛ baanyɛ afee pɛ ji adesai ni yeee emuu, ni esha yɔɔ amɛhe, ni amɛgboiɔ hu lɛ anɔyeli. No hewɔ lɛ nakai gbɛjianɔtoo lɛ baafee nɔ ni yeee emuu, ni miiti tsutsu tɔmɔi babaoo mli, ni enyɛɛɛ etsu adesai ahiamɔ nii fɛɛ he nii.—Romabii 3:10-12; 5:12.
4. Jeŋ gbɛjianɔtoo hee ni ato yiŋ yɛ he lɛ hɔ mɛni shishi, ni mɛni baajɛ mli aba?
4 Jeee akɛ jeŋ gbɛjianɔtoo hee ni gbɔmɔ kaa eyiŋ ni ekɛba lɛ hɔ adesai agbɔjɔmɔi ashishi kɛkɛ, shi ehɔ bɔɔnii ni ji mumɔi fɔji lɛ —hɛɛ, Satan Abonsam kɛ edaimonioi lɛ hu ahewalɛ shishi. Satan eshwila gbɔmɛi lɛ ajwɛŋmɔi, no hewɔ lɛ amɛheee “Kristo . . . anunyam sanekpakpa lɛ” amɛyeee. (2 Korintobii 4:3, 4; Efesobii 6:12) Nɔ ni ejɛ mli eba ji haomɔi ni eko nyiɛ eko sɛɛ ni baa je lɛ nɔ. Je lɛ wuɔ tai ni enaa piŋmɔi kɛ pilamɔi amli amanehulu yɛ yaka mɔdɛŋ ni ebɔɔ koni eye ehe nɔ ni Nyɔŋmɔ yelikɛbuamɔ kɛ ŋwɛi suɔmɔnaa nii bɛ mli lɛ mli. (Yeremia 10:23; Yakobo 3:15, 16) No hewɔ lɛ, taakɛ bɔfo Paulo kɛɛ lɛ, “je lɛ tsɔɔɔ Nyɔŋmɔ nilee lɛ nɔ ni ekɛ enilee lɛ ale Nyɔŋmɔ.”—1 Korintobii 1:21.
5. Mɛni ji shishijee fatɔɔ ni yɔɔ nɛŋ nilee lɛ he?
5 Belɛ mɛni ji shishijee fatɔɔ ni yɔɔ je nɛŋ nilee lɛ he, ni eŋaa kɛha jeŋ gbɛjianɔtoo hee lɛ hu fata he lɛ? No ji akɛ je lɛ kuɔ ehiɛ eshwieɔ nɔ ni anyɛŋ aku hiɛ ashwie nɔ, ni aye omanye kɔkɔɔkɔ lɛ nɔ—Yehowa Nyɔŋmɔ nɔyeli ni fe fɛɛ lɛ. Ekɛ hewoo kpooɔ akɛ eeeyɔse ŋwɛi nɔyeli ni fe fɛɛ lɛ. Je lɛ jeɔ gbɛ eshiɔ Yehowa yɛ egbɛjianɔtoo fɛɛ mli, ni ekɛ ehe fɔɔ lɛ diɛŋtsɛ enyɛmɔ kɛ ŋaatsɔɔi anɔ. (Okɛto Daniel 4:31-34; Yohane 18:37 he.) Biblia lɛ feɔ lɛ faŋŋ akɛ “Yehowa gbeyeishemɔ ji nilee shishijee.” (Abɛi 9:10; Lala 111:10) Ni kɛlɛ, je lɛ ekaseko nɛkɛ shishijee taomɔ nii kɛha nilee nɛɛ. No hewɔ lɛ, kɛ ŋwɛi sɛɛfimɔ bɛ lɛ, te eeefee tɛŋŋ eye omanye hu?—Lala 127:1.
Maŋtsɛyeli Shiɛmɔ—Kwashiaiasane loo Nilee Yɛ Mli
6, 7. (a) Mɛi ni Nyɔŋmɔ nilee dɔɔ amɛ lɛ miishiɛ mɛni, shi te je lɛ buɔ amɛ ehaa tɛŋŋ? (b) Kristendom osɔfoi lɛ shiɛɔ yɛ namɔ nilee naa, ni mɛni ejɛ mli eba?
6 Yɛ gbɛ kroko nɔ lɛ, mɛi ni le Nyɔŋmɔ lɛ jieɔ Nyɔŋmɔ nilee kpo ni amɛhalaa akɛ no atsɔɔ amɛ gbɛ. Taakɛ Yesu gba fɔ shi lɛ, amɛmiishiɛ “maŋtsɛyeli lɛ he sanekpakpa nɛɛ [amɛmii]tsɔɔ je nɛŋ fɛɛ.” (Mateo 24:14; 28:19, 20) Ani nilee yɛ shiɛmɔ ni tamɔ nɛkɛ mli bianɛ, yɛ be mli ni béi, mujiwoo, ohia, kɛ adesai apiŋmɔi eyi wɔ shikpɔŋ nɛɛ nɔ obɔ lɛ? Kɛha mɛi ni feɔ amɛhe nilelɔi yɛ je lɛŋ lɛ, Nyɔŋmɔ Maŋtsɛyeli lɛ he shiɛmɔ ni tamɔ nɛkɛ lɛ ji kwashiaiasane kɛkɛ, ni jwɛŋmɔ loo nilee bɛ mli. Amɛbuɔ Nyɔŋmɔ Maŋtsɛyeli lɛ he shiɛlɔi lɛ akɛ amɛtamɔ kakradai ni ekpɛtɛ lɛlɛ ni ji maŋ lɛ he waa, ni haa etɔɔ nɔyeli lɛ, gbɔmɛi ni gbaa mɔ naa ni tsĩɔ nɔyeli lɛ gbɛ, ni gbalaa maŋkwramɔŋ nɔyeli kpakpa ni eeena lɛ sɛɛ. Ni mɛi ni fiɔ amɛ sɛɛ yɛ enɛ mli ji Kristendom osɔfoi lɛ ni shiɛɔ je nɛŋ nilee, shi amɛkɛɛɛ gbɔmɛi lɛ nɔ ni esa akɛ amɛle yɛ Nyɔŋmɔ jeŋ hee lɛ kɛ e-Maŋtsɛyeli nɔyeli lɛ he, tsɛbelɛ enɛ ji Kristo tsɔɔmɔ titri lɛ.—Mateo 4:17; Marko 1: 14, 15.
7 Yinɔsaneŋmalɔ H. G. Wells gbala jwɛŋmɔ kɛtee Kristendom osɔfoi lɛ anine ni enyɛ shi nɛɛ nɔ. Eŋma akɛ: “Nɔ ni sa kadimɔ waa ji bɔ ni Yesu ha ale tsɔɔmɔ ni etsɛ lɛ Ŋwɛi Maŋtsɛyeli lɛ babaoo lɛ, kɛ bɔ ni kɛ akɛto he lɛ, ejeee nɔ ko kwraa yɛ Kristofoi asɔlemɔi lɛ babaoo anifeemɔi kɛ tsɔɔmɔi amli lɛ.” Ni kɛlɛ, kɛji akɛ gbɔmɛi ni yɔɔ yinɔ nɛɛ mli lɛ ayi aaana wala lɛ, klɛŋklɛŋ lɛ esa akɛ amɛnu Nyɔŋmɔ Maŋtsɛyeli ni ato ama shi lɛ he sane lɛ, ni kɛ amɛaanu lɛ, belɛ esa akɛ mɔ ko ashiɛ sanekpakpa ni kɔɔ enɛ he lɛ.—Romabii 10:14, 15.
8. Mɛni hewɔ Nyɔŋmɔ sanekpakpa lɛ shiɛmɔ ji nii ni nilee loo jwɛŋmɔ yɔɔ mli fe nɔ fɛɛ nɔ ni aaatsu ŋmɛnɛ lɛ, shi mɛɛ nifeemɔ gbɛ kɛ naanɔ sɛɛnamɔ baŋ?
8 No hewɔ lɛ, Nyɔŋmɔ sanekpakpa lɛ ni aaashiɛ lɛ ji nii ni nilee loo jwɛŋmɔ yɔɔ mli fe fɛɛ ni esa akɛ afee ŋmɛnɛ. Nakai enɛ ji, ejaakɛ Maŋtsɛyeli sane lɛ kɛ hiɛnɔkamɔ ni ji anɔkwale ni kɛ mlifilimɔ woɔ gbɔmɛi atsuii amli obɔ yɛ nɛkɛ naagbee gbii nɛɛ ni ji “jaramɔ bei” nɛɛ haa mɛi. (2 Timoteo 3:1-5; Romabii 12:12; Tito 2:13) Yɛ be mli ni shihilɛ yɛ je nɛɛ mli lɛ tsakeɔ ni eyɔɔ kuku hu lɛ, shihilɛ yɛ Nyɔŋmɔ jeŋ hee lɛ mli lɛ baahi shi daa, yɛ miishɛɛ mli, kɛ nibii ni aaana babaoo, kɛ toiŋjɔlɛ yɛ shikpɔŋ nɛɛ diɛŋtsɛ nɔ. (Lala 37:3, 4, 11) Taakɛ Yesu Kristo kɛɛ lɛ, “mɛɛ sɛɛ gbɔmɔ naa, kɛji enine shɛ jeŋ muu lɛ fɛɛ nɔ, shi elaaje esusuma lɛ? Aloo mɛni gbɔmɔ aaaŋɔ-ha ni ekɛkpɔ esusuma?” Kɛji akɛ mɔ ko laaje hegbɛ kɛha wala yɛ Nyɔŋmɔ jeŋ hee lɛ mli lɛ, mɛɛ sɛɛnamɔ yɔɔ je ni hoɔ eyaa nɛɛ he kɛha lɛ? Heloo gbɛfaŋ nibii amli ŋɔɔmɔ ni gbɔmɔ aŋkro ni tamɔ nɛkɛ naa lɛ efee nɔ ni sɛɛnamɔ bɛ he, yaka, kɛ nɔ ni hoɔ eyaa kɛ foi.—Mateo 16:26; Jajelɔ 1:14; Marko 10:29, 30.
9. (a) Beni nuu ko ni atsɛ lɛ akɛ ebafee Yesu sɛɛnyiɛlɔ lɛ kɛɛ atsi ato sɛɛ da lɛ, mɛni Yesu wo lɛ ŋaa ni efee? (b) Te esa akɛ Yesu hetoo lɛ asa wɔhe aha tɛŋŋ?
9 Nuu ko ni Yesu fɔ nine etsɛ lɛ koni ebafee esɛɛnyiɛlɔ lɛ kɛɛ: “Nuŋtsɔ, ŋmɛɛ mi gbɛ ni maya mayafu mi-tsɛ da.” Yesu wo lɛ ŋaa koni efee mɛni? Akɛni ele akɛ nuu lɛ miitsi nitsumɔ ni he hiaa waa ko miito sɛɛ kɛkɛ kɛyashi be mli ni efɔlɔi aaagboi da hewɔ lɛ, Yesu ha lɛ hetoo akɛ: “Ha ni gbohii afu amɛgbohii, shi bo lɛ yaa, ni oyashiɛ Nyɔŋmɔ maŋtsɛyeli lɛ.” (Luka 9:59, 60) Mɛi ni jieɔ nilee kpo kɛtsɔɔ Kristo toi ni amɛboɔ lɛ nɔ lɛ nyɛŋ atsi amɛhe kɛjɛ amɛ nitsumɔ akɛ amɛshiɛ Maŋtsɛyeli sane lɛ he. Ŋwɛi nilee haa amɛleɔ akɛ hiɛkpatamɔ miiba je nɛɛ kɛ enɔyelɔi lɛ anɔ. (1 Korintobii 2:6; 1 Yohane 2:17) Mɛi ni fiɔ Nyɔŋmɔ nɔyeli ni fe fɛɛ lɛ sɛɛ lɛ le akɛ anɔkwa hiɛnɔkamɔ kome pɛ kɛha adesai lɛ damɔ Nyɔŋmɔ nɔyeli lɛ kɛ ehe ni ekɛaawo mli lɛ nɔ. (Zakaria 9:10) No hewɔ lɛ, yɛ be mli ni mɛi ni yɔɔ je nɛŋ nilee lɛ heee Nyɔŋmɔ Maŋtsɛyeli lɛ amɛyeee ni amɛsumɔɔɔ nakai ŋwɛi nɔyeli lɛ, gbɔmɛi ni ŋwɛi nilee tsɔɔ amɛ gbɛ lɛ feɔ nii ni kɛ sɛɛnamɔ diɛŋtsɛ bahaa amɛnanemɛi adesai, ni amɛsaa amɛ kɛhaa naanɔ wala yɛ Yehowa jeŋ hee ni ewo shi yɛ he lɛ mli.—Yohane 3:16; 2 Petro 3:13.
“Kwashiaiasane Ha Mɛi ni Hiɛ Kpataa Lɛ”
10. (a) Beni atsake Saul ni jɛ Tarso lɛ, mɛɛ nitsumɔ ekɛ ehe wo mli, ni te ebu nɛkɛ nitsumɔ nɛɛ eha tɛŋŋ? (b) Blema Helabii lɛ hé gbɛi yɛ mɛni mli, shi te Nyɔŋmɔ bu amɛnilee lɛ tɛŋŋ?
10 Saul ni jɛ Tarso, ni batsɔ Paulo, Yesu Kristo bɔfo lɛ, kɛ ehe wo yiwalaheremɔ nitsumɔ nɛɛ mli. Ani shishinumɔ yɛ mli akɛ aaasusu akɛ beni Yesu Kristo tsake Saul lɛ, E-fee nakai ni ekɛ kwashiai anitsumɔ awo edɛŋ? Paulo susuuu nakai. (Filipibii 2:16) No mli lɛ abuɔ Helabii lɛ akɛ mɛi ni le nii jogbaŋŋ fe fɛɛ yɛ je lɛŋ. Amɛkɛ jeŋ nilelɔi ni amɛyɔɔ lɛ pupuu amɛhe. Eyɛ mli akɛ Paulo wie Hela wiemɔ moŋ, shi ediii Hela jeŋ nilee kɛ ekasemɔ asɛɛ. Mɛni hewɔ? Ejaakɛ je nɛŋ nilee ni tamɔ nɛkɛ lɛ ji kwashiaiasane yɛ Nyɔŋmɔ hiɛ.a Paulo tao ŋwɛi nilee, ni no tsirɛ lɛ koni eshiɛ sanekpakpa lɛ yɛ shia kɛ shia. Shiɛlɔ kpele ni fe fɛɛ yɛ be fɛɛ mli, Yesu Kristo, eto okadi efɔ shi ni etsɔɔ lɛ akɛ etsu nakai nitsumɔ lɛ nɔŋŋ.—Luka 4:43; Bɔfoi lɛ Asaji 20:20, 21; 26:15-20; 1 Korintobii 9:16.
11. Mɛni pɔtɛɛ Paulo wie yɛ shiɛmɔ nitsumɔ ni akɛwo edɛŋ lɛ kɛ je lɛ nilee he?
11 Paulo wieɔ nɛkɛ yɛ nitsumɔ ni akɛwo edɛŋ akɛ eshiɛ lɛ he: “Kristo tsu mi akɛ . . . miyashiɛ sanekpakpa lɛ, jeee yɛ nilee wiemɔ mli, koni Kristo sɛŋmɔtso lɛ akafee yaka. Shi sɛŋmɔtso lɛ he sane lɛ [Yesu kpɔmɔ afɔleshaa lɛ] ji kwashiaiasane ha mɛi ni hiɛ kpataa lɛ, shi wɔ mɛi ni ahereɔ wɔyiwala lɛ, eji Nyɔŋmɔ hewalɛ. Ejaakɛ aŋma akɛ: ‘Mafite nilelɔi anilee, ni ŋaalɔi aŋaa lɛ hu maha afee yaka.’ Nɛgbɛ nilelɔ [tamɔ jeŋ nilelɔ lɛ] yɔɔ? Nɛgbɛ woloŋmalɔ yɔɔ? Nɛgbɛ je nɛŋ naataolɔ lɛ yɔɔ? Ani Nyɔŋmɔ hako je nɛŋ nilee lɛ atsɔ kwashiaiasane? Shi akɛni je lɛ tsɔɔɔ Nyɔŋmɔ nilee lɛ nɔ ni ekɛ enilee lɛ ale Nyɔŋmɔ hewɔ lɛ, esa Nyɔŋmɔ hiɛ akɛ ekɛ kwashiaiasane lɛ ni ashiɛɔ lɛ ahere mɛi ni heɔ yeɔ lɛ ayiwala.”—1 Korintobii 1:17-21, NW.
12. Mɛni Yehowa haa ebaa mli loo etsuɔ yɛ “kwashiaiasane lɛ ni ashiɛɔ lɛ” hewɔ, ni te mɛi ni taoɔ “nilee ni jɛ ŋwɛi lɛ” baafee amɛnii yɛ he amɛha tɛŋŋ?
12 Bɔ fɛɛ bɔ ni etamɔ nɔ ni ewa akɛ aaahe aye ha lɛ, mɛi pɔtɛɛ ni je lɛ tsɛɔ amɛ kwashiai lɛ ji mɛi ni Yehowa kɛ amɛ tsuɔ nii akɛ eshiɛlɔi. Hɛɛ, Nyɔŋmɔ hereɔ mɛi ni heɔ yeɔ lɛ kɛtsɔɔ nɛkɛ shiɛlɔi nɛɛ asɔɔmɔ nitsumɔ ni ji kwashiaiasane lɛ nɔ. Yehowa toɔ saji ahe gbɛjianɔ koni “kwashiaiasane” nɛɛ he shiɛlɔi lɛ akawo amɛ diɛŋtsɛ amɛhiɛ nyam, ni adesai krokomɛi hu nyɛŋ awo mɛi ni amɛtsɔ amɛnɔ amɛnu sanekpakpa lɛ hu hiɛ nyam. Nakai enɛ ji “bɔni afee ni heloo ko heloo ko akashwã yɛ [Nyɔŋmɔ] hiɛ.” (1 Korintobii 1:28-31; 3:6, 7) Shiɛlɔ lɛ tsuɔ nitsumɔ ko ni he hiaa waa lɛlɛŋ, shi sane ni akɛwo edɛŋ akɛ eshiɛ lɛ ji nɔ ni tsuɔ mɔ ko yiwalaheremɔ he nii, kɛ mɔ lɛ heɔ eyeɔ. Mɛi ni taoɔ “nilee ni jɛ ŋwɛi lɛ” egbeŋ shiɛlɔ lɛ sane lɛ he guɔ, akɛni etamɔ kwashia ko kɛ mɔ ni baa shi, awaa lɛ yi, ni eyaa shia kɛ shia lɛ hewɔ. Shi moŋ mɛi ni he jɔ lɛ kɛ bulɛ baaha Maŋtsɛyeli jajelɔ ko akɛ shiɛlɔ ni Yehowa kɛ nitsumɔ ewo edɛŋ, ni baa yɛ Nyɔŋmɔ gbɛi amli. Amɛbaabu shɛɛ sane ni shiɛlɔ lɛ kɛbaa kɛtsɔ ewiemɔ kɛ woji ni akala lɛ anɔ lɛ akɛ nɔ ko ni he hiaa waa diɛŋtsɛ.—Yakobo 3:17; 1 Tesalonikabii 2:13.
13. (a) Te Yudafoi kɛ Helabii buɔ Kristo ni asɛŋ lɛ lɛ ni ashiɛɔ lɛ amɛhaa tɛŋŋ? (b) Mɛɛ gbɔmɛi akui amli nɛkɛ atsɛɛɛ mɛi pii koni amɛbaafee Yesu sɛɛnyiɛlɔi lɛ, ni mɛni hewɔ?
13 Yɛ be mli ni eyaa nɔ ewieɔ Nyɔŋmɔ gbɛ̀i lɛ ahe lɛ, Paulo kɛɛ: “Ejaakɛ Yudafoi lɛ, okadii amɛbiɔ, ni Helabii hu taoɔ nilee, shi wɔ lɛ, Kristo ni asɛŋ lɛ lɛ wɔshiɛɔ, mɔ ni tsɔ pampi eha Yudafoi, kɛ kwashiaiasane eha jeŋmaji lɛ, shi mɛi ni atsɛ amɛ lɛ fɛɛ, Yudafoi jio, Helabii jio, Kristo ni ji Nyɔŋmɔ hewalɛ kɛ Nyɔŋmɔ nilee lɛ wɔshiɛɔ wɔtsɔɔ amɛ. Ejaakɛ Nyɔŋmɔ kwashiaiasane lɛ mli yɛ nilee fe gbɔmɛi, ni Nyɔŋmɔ gbɔjɔmɔ nɔ lɛ he wa fe gbɔmɛi. Shi anyɛmimɛi, nyɛkwɛa akɛ nyɛtsɛmɔ lɛ, jeee heloo gbɛfaŋ nilelɔi pii, jeee hewalɔi pii, jeee abladei pii, shi moŋ je nɛŋ kwashiaianii lɛ Nyɔŋmɔ hala, koni ekɛwo nilelɔi lɛ ahiɛgbele; ni je nɛŋ gbɔjɔmɔ nii lɛ hu Nyɔŋmɔ hala, koni ekɛwo nii ni he wa lɛ ahiɛgbele.”—1 Korintobii 1:22-27; okɛto Yesaia 55:8, 9 he.
14. (a) Kɛ abi ni Yehowa Odasefoi kɛ amɛyijiemɔ woji atsɔɔ lɛ, mɛni amɛkɛ amɛniji tsɔɔ? (b) Mɛni hewɔ Paulo kpoo akɛ ekɛ jeŋ nilee kpojiemɔ ko aaasa Helabii ahiɛ lɛ?
14 Beni Yesu yɔɔ shikpɔŋ nɛɛ nɔ lɛ, Yudafoi lɛ bi lɛ ni eha amɛ okadi ko ni jɛ ŋwɛi. (Mateo 12:38, 39; 16:1) Shi Yesu haaa amɛ okadi ko. Nakai nɔŋŋ hu ŋmɛnɛ, Yehowa Odasefoi kɛ okadii komɛi haaa ni amɛkɛjie amɛhe yi. Shi moŋ, amɛkɛ amɛniji tsɔɔ nitsumɔ ni akɛwo amɛdɛŋ akɛ amɛshiɛ sanekpakpa lɛ, taakɛ aŋma afɔ shi yɛ Biblia mli kukuji tamɔ Yesaia 61:1, 2; Marko 13:10; kɛ Kpojiemɔ 22:17 lɛ. Blema Helabii lɛ tao nilee, je nɛŋ nibii ahe nikasemɔ ni yaa hiɛ. Eyɛ mli akɛ atsɔse Paulo yɛ je nɛŋ nilee mli moŋ, shi ejieee enɛ kpo etsɔɔɔ Helabii lɛ koni ekɛsa amɛhiɛ. (Bɔfoi lɛ Asaji 22:3) Ewie ni eŋma nii yɛ Hela ni gbɔmɛi foji lɛ wieɔ lɛ mli, shi jeee yɛ Hela woloŋlelɔi lɛ aniŋmaai amli. Paulo kɛɛ Korintobii lɛ akɛ: “Anyɛmimɛi, beni miba nyɛŋɔɔ lɛ, jeee wiemɔ flɛmii loo nilee tuutu mikɛba ni mibajaje Nyɔŋmɔ odase lɛ mitsɔɔ nyɛ. . . . Ni miwiemɔ kɛ misane shiɛmɔ lɛ hu jɛɛɛ gbɔmɛi anilee wiemɔi ni kɔneɔ mɔ yiŋ mli, shi moŋ ejɛ mumɔ kɛ hewalɛ tsɔɔmɔ mli, bɔni afee ni nyɛhemɔkɛyeli lɛ akadamɔ gbɔmɛi anilee nɔ, shi moŋ edamɔ Nyɔŋmɔ hewalɛ nɔ.”—1 Korintobii 2:1-5.
15. Petro kaiɔ mɛi ni yeɔ sanekpakpa lɛ he fɛo lɛ yɛ mɛni he, ni shihilɛ ni yɔɔ ŋmɛnɛ lɛ tamɔ Noa gbii lɛ amli nɔ̃ lɛ nɔŋŋ yɛ mɛɛ gbɛ nɔ?
15 Bɔfo Petro kaiɔ mɛi ni yeɔ Nyɔŋmɔ jeŋ hee ni baa lɛ kɛ je nɛŋ naagbee ni bɛŋkɛɔ lɛ he fɛo yɛ naagbee gbii nɛɛ amli lɛ akɛ, “nu ŋɔ no be lɛŋ je lɛ ni ehiɛ kpata” yɛ Noa gbii lɛ amli. (2 Petro 3:3-7) Mɛni Noa fee, beni nakai hiɛkpatamɔ lɛ ka ehiɛ lɛ? Mɛi pii susuɔ ehe akɛ eji adeka loo lɛlɛ kpɛlɔ kɛkɛ. Shi Petro kɛɔ akɛ heni Nyɔŋmɔ kɛ Nu Afua lɛ ba blema je lɛ nɔ lɛ, “E-baa Noa ni ji jalɛ shiɛlɔ lɛ kɛ mɛi krokomɛi kpawo lɛ ayi shweshweeshwe.” (2 Petro 2:5, NW) Ŋwanejee ko bɛ he akɛ, nakai gbɔmɛi ni leee Nyɔŋmɔ ni hi shi dani nu afua lɛ ba lɛ kɛ amɛjeŋ nilee lɛ ye nɔ ni Noa shiɛ lɛ he fɛo, ni amɛtsɛ lɛ kwashia, mɔ ni susuuu nii ahe jogbaŋŋ, kɛ mɔ ni bɛ jwɛŋmɔ. Ŋmɛnɛ, anɔkwa Kristofoi kɛ shihilɛ ni tamɔ nakai nɔŋŋ miikpe, ejaakɛ Yesu kɛ wɔyinɔ nɛɛ to Noa gbii lɛ amli nɔ lɛ he. Shi yɛ hefɛoyelɔi lɛ fɛɛ sɛɛ lɛ, Maŋtsɛyeli sanekpakpa lɛ shiɛmɔ fe wiemɔ folo ko kɛkɛ. Taakɛ Noa shiɛmɔ lɛ ji lɛ, eji yiwalaheremɔ kɛha shiɛlɔ lɛ kɛ mɛi ni boɔ lɛ toi lɛ!—Mateo 24:37-39; 1 Timoteo 4:16.
‘Atsɔmɔɔ Kwashiai Koni Atsɔmɔ Nilelɔi’
16. Mɛni baaba je nɛɛ nilee lɛ nɔ yɛ Harmagedon, ni namɛi baaje mli kɛyabote Nyɔŋmɔ jeŋ hee lɛ mli?
16 Etsɛŋ, yɛ Harmagedon lɛ, Yehowa Nyɔŋmɔ “baafite nilelɔi lɛ anilee” lɛ fɛɛ. Ebaaha “ŋaalɔi” ni gba bɔ ni amɛ jeŋ gbɛjianɔtoo hee lɛ kɛ shihilɛi kpakpai baaba aha adesai lɛ “aŋaa” lɛ hu afee yaka. “Nyɔŋmɔ Ofe lɛ gbi wulu lɛ nɔ ta lɛ” baashã je nɛŋ nilee kɛ ŋaa lɛ fɛɛ. (1 Korintobii 1:19; Kpojiemɔ 16:14-16) Mɛi pɛ ni baaje nakai ta lɛ mli ni amɛna wala yɛ Nyɔŋmɔ jeŋ hee lɛ mli lɛ ji mɛi ni boɔ nɔ ni je nɛɛ tsɛɔ lɛ akɛ kwashiaiasane—hɛɛ, Yehowa anunyam Maŋtsɛyeli lɛ he sanekpakpa lɛ toi lɛ.
17. Yehowa Odasefoi etsɔmɔ ‘kwashiai’ yɛ mɛɛ gbɛ nɔ, ni Nyɔŋmɔ shiɛlɔi ni shiɛɔ sanekpakpa lɛ etswa amɛfai shi akɛ amɛbaafee mɛni?
17 Yehowa Odasefoi, ni emumɔ lɛ nyiɛɔ amɛhiɛ lɛ ahiɛ gbooo akɛ amɛaashiɛ nɔ ni je lɛ tsɛɔ lɛ kwashiaiasane lɛ. Ni amɛaabɔ mɔdɛŋ ni amɛfee amɛhe jeŋ nilelɔi lɛ, amɛtsɔmɔ ‘kwashiai’ moŋ. Yɛ mɛɛ gbɛ nɔ? Kɛtsɔ Maŋtsɛyeli shiɛmɔ nitsumɔ lɛ ni amɛtsuɔ lɛ nɔ, koni amɛtsɔmɔ nilelɔi, taakɛ Paulo ŋma lɛ: “Kɛji mɔ ko susuɔ akɛ nilelɔ ji lɛ yɛ nyɛteŋ yɛ je nɛŋ lɛ, ha etsɔ ehe kwashia, koni etsɔ nilelɔ.” (1 Korintobii 3:18-20) Yehowa shiɛlɔi ni shiɛɔ sanekpakpa lɛ le bɔ ni amɛsane lɛ hereɔ mɔ yiwala lɛ, ni amɛbaaya nɔ amɛshiɛ enɛ ni amɛkpaaa kɛyashi be mli ni je nɛɛ kɛ enilee lɛ naagbee aaaba yɛ Harmagedon ta lɛ mli. Etsɛŋ, Yehowa Nyɔŋmɔ baabu je muu fɛɛ maŋtsɛ ni eji lɛ bem, koni ekɛ naanɔ wala abaha mɛi fɛɛ ni bianɛ amɛheɔ “kwashiaiasane lɛ ni ashiɛɔ lɛ” amɛyeɔ ni amɛtsuɔ he nii lɛ.
[Shishigbɛ niŋmai]
a Yɛ blema Hela nilelɔi lɛ ajeŋ nilee mli naataomɔi kɛ nibii amlipɛimɔi lɛ fɛɛ sɛɛ lɛ, amɛ niŋmaai tsɔɔ akɛ amɛnaaa anɔkwa nɔdaamɔ nɔ kɛha hiɛnɔkamɔ. Jeŋ nilelɔi J. R. S. Sterrett kɛ Samuel Angus tsɔɔ mli akɛ: “Wolo ko bɛ ni ŋkɔmɔ ni ayeɔ yɛ shihilɛ mli awerɛho he babaoo, suɔmɔ ni tãa, bɔ ni hiɛnɔkamɔ shishiuɔ mɔ haa, kɛ bɔ ni gbele yi wa ha fa yɛ mli tamɔ amɛnɔ lɛ.”—Funk and Wagnalls New “Standard” Bible Dictionary, 1936, baafa 313.
Mɛni Ji Ohetooi?
◻ Mɛɛ nilee sɔrɔtoi enyɔ yɔɔ?
◻ Mɛni ji shishijee fatɔɔ ni yɔɔ je lɛ nilee he?
◻ Mɛni hewɔ sanekpakpa lɛ shiɛmɔ lɛ ji nii ni jwɛŋmɔ yɔɔ mli fe fɛɛ ni esa akɛ atsu lɛ?
◻ Mɛni etsɛŋ ebaaba je lɛ nilee fɛɛ nɔ?
◻ Mɛni hewɔ Yehowa Odasefoi ahiɛ gbooo akɛ amɛaashiɛ nɔ ni je lɛ tsɛɔ lɛ kwashiaiasane lɛ?
[Mfoniri ni yɔɔ baafa 23]
Helabii lɛ taoɔ jeŋ nilee ni amɛbuɔ Paulo shiɛmɔ lɛ akɛ kwashiaiasane yɛ bei babaoo mli