Yiwalaheremɔ Gbi lɛ Nɛ!
“Naa, be ni sa jogbaŋŋ nɛ; naa, walaheremɔ gbi nɛ.”—2 KORINTOBII 6:2.
1. Mɛni he hiaa koni wɔná shidaamɔ kpakpa yɛ Nyɔŋmɔ kɛ Kristo hiɛ?
YEHOWA eto kojomɔ gbi kɛha adesai. (Bɔfoi lɛ Asaji 17:31) Kɛji akɛ ebaafee yiwalaheremɔ gbi kɛha wɔ lɛ, belɛ nɔ ni he hiaa wɔ ji shidaamɔ ni nɔkpɛlɛmɔ yɔɔ mli yɛ lɛ kɛ e-Kojolɔ ni ehala lɛ, ni ji Yesu Kristo hiɛ. (Yohane 5:22) Shidaamɔ ni tamɔ nɛkɛ biɔ jeŋba ni kɛ Nyɔŋmɔ Wiemɔ lɛ kpãa gbee kɛ hemɔkɛyeli ni tsirɛɔ wɔ koni wɔye wɔbua mɛi krokomɛi ni amɛtsɔmɔ Yesu anɔkwa kaselɔi.
2. Mɛni hewɔ adesai aje lɛ etsi ehe kɛjɛ Nyɔŋmɔ he lɛ?
2 Yɛ esha ni aná kɛjɛ fɔmɔ mli hewɔ lɛ, adesai aje lɛ etse ehe kɛjɛ Nyɔŋmɔ he. (Romabii 5:12; Efesobii 4:17, 18) No hewɔ lɛ, kɛji akɛ mɛi ni wɔshiɛɔ wɔhaa amɛ lɛ baaná yiwalaheremɔ lɛ, ja asaa amɛkɛ lɛ teŋ. Bɔfo Paulo fee enɛ faŋŋ yɛ be mli ni eŋmaa wolo eyaha Kristofoi ni yɔɔ Korinto lɛ. Nyɛhaa wɔpɛia 2 Korintobii 5:10–6:10 mli ni wɔkwɛ nɔ ni Paulo wie yɛ kojomɔ, Nyɔŋmɔ ni akɛ lɛ aaakpãta, kɛ yiwalaheremɔ he lɛ.
‘Wɔyaa nɔ Wɔtsɔɔ Gbɔmɛi Ayiŋ’
3. Mɛɛ gbɛ nɔ Paulo tsɔ ‘etsɔ mɛi ayiŋ,’ ni mɛni hewɔ esa akɛ wɔfee nakai ŋmɛnɛ?
3 Paulo kɛ kojomɔ to shiɛmɔ he beni eŋma akɛ: “Ja wɔ fɛɛ wɔpue faŋŋ yɛ Kristo kojomɔsɛi lɛ hiɛ, koni mɔ fɛɛ mɔ aná nii ni efee yɛ gbɔmɔtso mli lɛ, bɔbɔ ni efee lɛ, ekpakpa jio, efɔŋ jio. No hewɔ lɛ, akɛni wɔle Nuntsɔ lɛ he ni yɔɔ gbeyei hewɔ lɛ, wɔwieɔ wɔtsɔɔ gbɔmɛi.” (2 Korintobii 5:10, 11) Bɔfoi lɛ ‘tee nɔ amɛtsɔ̃ gbɔmɛi ayiŋ’ kɛtsɔ sanekpakpa lɛ shiɛmɔ nɔ. Ni wɔ hu? Akɛni wɔkɛ nɛkɛ yiwalɛ nibii agbɛjianɔtoo nɛɛ naagbee miikpe hewɔ lɛ, esa akɛ wɔfee nɔ fɛɛ nɔ ni wɔɔnyɛ ni wɔkɛtsɔ mɛi krokomɛi ayiŋ koni amɛkɔ gbɛ ni he hiaa ni baaha amɛná kojomɔ kpakpa yɛ Yesu hiɛ kɛ yiwalaheremɔ Jɛɛhe, Yehowa Nyɔŋmɔ nɔkpɛlɛmɔ.
4, 5. (a) Mɛni hewɔ esaaa akɛ wɔshwãa yɛ nii ni wɔnyɛ wɔtsu yɛ Yehowa sɔɔmɔ mli lɛ he lɛ? (b) Te eba lɛ tɛŋŋ ni Paulo shwã ‘efɔ̃ Nyɔŋmɔ nɔ’ lɛ?
4 Shi kɛji akɛ Nyɔŋmɔ ejɔɔ wɔsɔɔmɔ nitsumɔ lɛ nɔ lɛ, esaaa akɛ wɔshwãa. Mɛi komɛi hole amɛhe nɔ ni amɛ diɛŋtsɛ amɛbɔi shwãa loo yɛ hii krokomɛi amli yɛ Korinto, ni enɛ kɛ mligbalamɔ ba asafo lɛ mli. (1 Korintobii 1:10-13; 3:3, 4) Beni ewieɔ shihilɛ nɛɛ he lɛ, Paulo ŋma akɛ: “Jeee wɔ diɛŋtsɛ wɔhe yi wɔjieɔ wɔhaa nyɛ ekoŋŋ, shi moŋ wɔkɛmiiha nyɛ gbɛ ni nyɛŋɔ-shwã nyɛfɔ wɔnɔ, koni nyɛná eko nyɛkɛɛ mɛi ni shwãa yɛ hiɛaŋ shi jeee tsui mli lɛ. Ejaakɛ kɛ sɛkɛ wɔyeɔ jiŋŋ, Nyɔŋmɔ wɔyeɔ wɔhaa; ni kɛ wɔhiɛ kã shi hu jiŋŋ, ekã shi eha nyɛ.” (2 Korintobii 5:12, 13) Henɔwolɔi lɛ bɛ asafo lɛ ekomefeemɔ kɛ mumɔŋ hilɛ-kɛhamɔ he miishɛɛ. Amɛmiisumɔ ni amɛshwã yɛ kponɔgbɛ nibii amli fe ni amɛaaye amɛbua nanemɛi heyelilɔi lɛ ni amɛná tsuii kpakpai yɛ Nyɔŋmɔ hiɛ. No hewɔ lɛ, Paulo kã asafo lɛ hiɛ, ni ekɛɛ yɛ sɛɛ mli akɛ: “Mɔ ni shwãa lɛ [Yehowa, NW] nɔ eshwã efɔ̃!”—2 Korintobii 10:17.
5 Ani Paulo diɛŋtsɛ eshwãaa? Ekolɛ mɛi komɛi susu nakai yɛ nɔ ni ewie yɛ bɔfo ni eji lɛ he lɛ hewɔ. Shi esa akɛ eshwã ‘efɔ̃ Nyɔŋmɔ nɔ.’ Eshwã yɛ hegbɛ ni ená akɛ bɔfo lɛ hewɔ, koni Korintobii lɛ akashi Yehowa. Paulo fee enɛ koni ekɛ amɛ aba Nyɔŋmɔ ŋɔɔ ekoŋŋ, ejaakɛ apasa bɔfoi miigbala amɛ kɛmiiya gbɛ ni ejaaa lɛ nɔ. (2 Korintobii 11:16-21; 12:11, 12, 19-21; 13:10) Kɛlɛ, Paulo ebɔɔɔ mɔdɛŋ be fɛɛ be akɛ eeeha mɔ fɛɛ mɔ ale nɔ ni enyɛ etsu.—Abɛi 21:4.
Ani Kristo Suɔmɔ lɛ Nyɛɔ Onɔ?
6. Te esa akɛ Kristo suɔmɔ lɛ aná wɔnɔ hewalɛ aha tɛŋŋ?
6 Ákɛ anɔkwa bɔfo lɛ, Paulo tsɔɔ mɛi krokomɛi Yesu kpɔmɔ afɔleshãa lɛ he nii. Ená Paulo shihilɛ nɔ hewalɛ, ejaakɛ eŋma akɛ: “Kristo suɔmɔ lɛ nyɛɔ wɔnɔ, ni wɔkojoɔ nɛkɛ, akɛ, kɛ mɔ kome gbo mɛi fɛɛ yigbele lɛ, belɛ mɛi lɛ fɛɛ egboi. Ni egbo mɛi fɛɛ yigbele, koni mɛi ni hiɛ kamɔ lɛ ahiɛ akakamɔ miiha amɛ diɛŋtsɛ amɛhe dɔŋŋ, shi moŋ amɛhiɛ akamɔ aha mɔ ni gbo ni atee lɛ shi ekoŋŋ aha amɛ lɛ.” (2 Korintobii 5:14, 15) Mɛɛ suɔmɔ po Yesu jie lɛ kpo yɛ ewala ni ekɛha wɔ lɛ hewɔ nɛkɛ! Yɛ anɔkwale mli lɛ esa akɛ enɛ afee hewalɛ ko ni nyɛɔ wɔnɔ yɛ wɔshihilɛ mli. Esa akɛ shidaa ni wɔkɛhaa Yesu yɛ ewala ni ekɛha wɔ hewɔ lɛ atsirɛ wɔ kɛya ekãa kɛ nitsumɔ mli yɛ yiwalaheremɔ he sanekpakpa lɛ ni Yehowa tsɔ esuɔmɔ Bi lɛ nɔ ekɛha lɛ jajemɔ mli. (Yohane 3:16; okɛto Lala 96:2 he.) Ani “Kristo suɔmɔ” lɛ nyɛɔ onɔ koni oná Maŋtsɛyeli shiɛmɔ kɛ kaselɔ feemɔ nitsumɔ lɛ mli gbɛfaŋnɔ yɛ ekãa naa?—Mateo 28:19, 20.
7. Akɛ ‘aleee mɔ ko mɔ kɔ dɔŋŋ yɛ heloo mli’ lɛ tsɔɔ mɛni?
7 Akɛni amɛkɛ amɛwala tsuɔ nii yɛ gbɛ ni tsɔɔ shidaa ni amɛjieɔ lɛ kpo yɛ nɔ ni Kristo fee kɛha amɛ lɛ hewɔ lɛ, mɛi ni afɔ amɛ mu lɛ ‘ehiii shi kɛhaaa amɛ diɛŋtsɛ amɛhe dɔŋŋ, shi kɛha lɛ.’ Paulo kɛɛ: “No hewɔ lɛ, kɛjɛ ŋmɛnɛ nɔ kɛyaa nɛɛ, wɔleee mɔ ko mɔ ko dɔŋŋ yɛ heloo mli; ni kɛ heloo mli wɔle Kristo yɛ tete lɛ, kɛlɛ agbɛnɛ lɛ wɔleee lɛ nakai dɔŋŋ.” (2 Korintobii 5:16) Esaaa akɛ Kristofoi susuɔ gbɔmɛi ahe yɛ heloo naa, ekolɛ ni amɛduro Yudafoi fe Jeŋmajiaŋbii, aloo niiatsɛmɛi fe ohiafoi. Mɛi ni afɔ amɛ mu lɛ “leee mɔ ko mɔ ko dɔŋŋ yɛ heloo mli,” ejaakɛ mumɔŋ wekukpaa ni kã amɛkɛ amɛnanemɛi heyelilɔi lɛ ateŋ lɛ ji nɔ ni he hiaa. Mɛi ni ‘le Kristo yɛ heloo mli lɛ’ jeee gbɔmɛi ni na Yesu beni eyɔɔ shikpɔŋ nɔ lɛ kɛkɛ. Kɛji akɛ mɛi ni hiɛ kã Mesia lɛ nɔ lɛ ateŋ mɛi komɛi kwɛ Kristo be ko akɛ gbɔmɔ folo ko kɛkɛ po lɛ, amɛfeŋ nakai dɔŋŋ. Ekɛ egbɔmɔtso ha akɛ kpɔmɔnɔ, ni atee lɛ shi akɛ mumɔ ni haa wala. Mɛi krokomɛi ni ateeɔ amɛ shi kɛyaa ŋwɛi wala mli lɛ baaŋmɛɛ amɛ heloo gbɔmɔtsei lɛ ahe beni amɛnako Yesu Kristo yɛ heloo mli po dã.—1 Korintobii 15:45, 50; 2 Korintobii 5:1-5.
8. Te eba lɛ tɛŋŋ ni aŋkroaŋkroi ebatsɔmɔ ‘mɛi ni yɔɔ Kristo mli’ lɛ?
8 Beni ewieɔ etsɔɔ mɛi ni afɔ amɛ mu lɛ lolo lɛ, Paulo kɛfata he akɛ: “Kɛ mɔ ko yɛ Kristo mli lɛ, bɔɔ nɔ̃ hee ji lɛ; blema nii lɛ eho; naa, nibii fɛɛ etsɔmɔ ehee.” (2 Korintobii 5:17) ‘Kristo mli ni mɔ ko hiɔ’ lɛ tsɔɔ akɛ ekɛ lɛ feɔ ekome. (Yohane 17:21) Wekukpaa nɛɛ ba shihilɛ mli kɛha gbɔmɔ lɛ, beni Yehowa gbala lɛ kɛba e-Bi lɛ ŋɔɔ ni ekɛ mumɔ krɔŋkrɔŋ fɔ́ nakai mɔ lɛ. Ákɛ Nyɔŋmɔ bi ni akɛ mumɔ efɔ́ lɛ lɛ, etsɔ “bɔɔ nɔ̃ hee” kɛ gbɛkpamɔ akɛ ekɛ Kristo baaná gbɛfaŋnɔ yɛ ŋwɛi Maŋtsɛyeli lɛ mli. (Yohane 3:3-8; 6:44; Galatabii 4:6, 7) Akɛ sɔɔmɔ hegbɛ ni yɔɔ nyam waa eha Kristofoi ni afɔ amɛ mu nɛɛ.
“Nyɛhãa Akpataa Nyɛ kɛ Nyɔŋmɔ Teŋ”
9. Mɛni Nyɔŋmɔ efee koni eha mɔ kɛ lɛ teŋ kpatamɔ lɛ afee nɔ ni baanyɛ ahi?
9 Kwɛ bɔ ni Yehowa eduro “bɔɔ nɔ̃ hee” lɛ eha! Paulo kɛɛ: “Nibii fɛɛ jɛ Nyɔŋmɔ dɛŋ, mɔ ni tsɔ Yesu Kristo nɔ ekpata lɛ diɛŋtsɛ ekɛ wɔ teŋ, ni ekɛ kpatamɔ sɔɔmɔ lɛ ha wɔ lɛ; no ji akɛ Nyɔŋmɔ tsɔ Kristo nɔ ekpata lɛ diɛŋtsɛ ekɛ je lɛ teŋ, ni abuuu amɛnɔtɔmɔi lɛ ehaaa amɛ, ni etu kpatamɔ wiemɔ lɛ ewo wɔdɛŋ.” (2 Korintobii 5:18, 19) Adesai etsi amɛhe kɛjɛ Nyɔŋmɔ he kɛjɛ beni Adam fee esha lɛ. Shi Yehowa jɛ suɔmɔ mli ekɛ hegbɛ lɛ tsu nii koni ekɛgbele kpatamɔ gbɛ kɛtsɔ Yesu afɔleshãa lɛ nɔ.—Romabii 5:6-12.
10. Namɛi Yehowa kɛ kpatamɔ sɔɔmɔ lɛ wo amɛdɛŋ, ni mɛni ámɛfee koni amɛtsu enɛ he nii?
10 Yehowa kɛ kpatamɔ sɔɔmɔ lɛ ewo mɛi ni afɔ amɛ mu lɛ adɛŋ, no hewɔ lɛ, Paulo baanyɛ akɛɛ akɛ: “No hewɔ lɛ, wɔji bɔfoi yɛ Kristo najiaŋ, tamɔ akɛ Nyɔŋmɔ etsɔ wɔnɔ ekɛ mɛi miiwie: nyɛhaa akpataa nyɛ kɛ Nyɔŋmɔ teŋ.” (2 Korintobii 5:20) Yɛ blema bei amli lɛ, atsuɔ bɔfoi yɛ basabasafeemɔ bei amli titri, koni akɛkwɛ akɛ ani abaanyɛ atsĩ tawuu naa lo. (Luka 14:31, 32) Akɛni adesai esha je lɛ etsi ehe kɛjɛ Nyɔŋmɔ he hewɔ lɛ, etsu ebɔfoi ni afɔ amɛ mu lɛ koni amɛyagba gbɔmɛi nɔ ni edamɔɔ nɔ etaoɔ kpatamɔ. Ákɛ Kristo najiaŋdamɔlɔi lɛ, mɛi ni afɔ amɛ mu lɛ kpaa fai akɛ: “Nyɛhaa akpataa nyɛ kɛ Nyɔŋmɔ teŋ.” Nɛkɛ faikpamɔ nɛɛ ji hewalɛwoo ni mɔbɔnalɛ yɔɔ mli koni mɔ atao ekɛ Nyɔŋmɔ teŋ toiŋjɔlɛ, koni mɔ lɛ akpɛlɛ yiwalaheremɔ ni ehaa ebaa kɛtsɔɔ Kristo nɔ lɛ nɔ.
11. Namɛi náa jalɛ shidaamɔ yɛ Nyɔŋmɔ hiɛ, yɛ kpɔmɔnɔ lɛ mli hemɔkɛyeli hewɔ?
11 Abaanyɛ akpãta adesai fɛɛ ni náa kpɔmɔnɔ lɛ mli hemɔkɛyeli lɛ kɛ Nyɔŋmɔ teŋ. (Yohane 3:36) Paulo kɛɔ akɛ: “[Yesu] mɔ ni leee esha lɛ, wɔ hewɔ lɛ [Yehowa] ha etsɔ esha, koni wɔ lɛ wɔtsɔmɔ Nyɔŋmɔ jalɛ yɛ emli.” (2 Korintobii 5:21) Yesu ni ji gbɔmɔ ni yeɔ emuu lɛ ji esha he afɔleshãa nɔ kɛha Adam shwiei fɛɛ ni ahereɔ amɛyiwala kɛjɛɔ esha ni amɛna kɛjɛ fɔmɔ mli lɛ mli. Amɛbatsɔmɔɔ “Nyɔŋmɔ jalɛ” kɛtsɔɔ Yesu nɔ. Nɛkɛ jalɛ loo jalɛ shidaamɔ yɛ Nyɔŋmɔ hiɛ nɛɛ baa Kristo nanemɛi niyelɔi 144,000 lɛ aŋɔɔ klɛŋklɛŋ. Yɛ Afii Akpe Nɔyeli lɛ mli lɛ, adesai ni yeɔ emuu ni yɔɔ jalɛ shidaamɔ baatsɔmɔ Naanɔ Tsɛ, Yesu Kristo, shikpɔŋ nɔ bii. Ebaahole amɛnɔ kɛya jalɛ shidaamɔ mli yɛ emuuyeli mli koni amɛye Nyɔŋmɔ anɔkwa, koni amɛnine ashɛ naanɔ wala nikeenii lɛ nɔ.—Yesaia 9:7; Kpojiemɔ 14:1; 20:4-6, 11-15.
“Be ni Sa Jogbaŋŋ Nɛ”
12. Mɛɛ sɔɔmɔ ko ni he hiaa Yehowa bɔfoi kɛ najiaŋdamɔlɔi lɛ tsuɔ he nii?
12 Bɔni afee ni ahere wɔyiwala lɛ, esa akɛ wɔfee nii ni kɛ Paulo wiemɔi nɛɛ kpãa gbee: “Akɛ nɔ ni [Yehowa, NW] hefatalɔi nitsulɔi ji wɔ hewɔ lɛ, wɔwieɔ wɔtsɔɔ nyɛ hu, ni nyɛkahé Nyɔŋmɔ duromɔ lɛ yakatswaa; ejaakɛ ekɛɛ akɛ: ‘Be ni sa mli mibo bo toi yɛ, ni walaheremɔ gbi nɔ hu miye mibuao yɛ.’ Naa, be ni sa jogbaŋŋ nɛ; naa, walaheremɔ gbi nɛ.” (2 Korintobii 6:1, 2) Yehowa bɔfoi ni afɔ amɛ mu lɛ kɛ enajiaŋdamɔlɔi ni ji “tooi krokomɛi” lɛ heee amɛŋwɛi Tsɛ lɛ duromɔ lɛ yakatswaa koni amɛhiɛ akpa yiŋtoo ni yɔɔ sɛɛ lɛ nɔ. (Yohane 10:16) Amɛtsɔɔ amɛjeŋba ni ja lɛ kɛ ekãa sɔɔmɔ yɛ “be ni sa jogbaŋŋ” nɛɛ mli lɛ nɔ amɛtaoɔ ŋwɛi duromɔ, ni amɛmiikɛɛ mɛi ni hiɔ shikpɔŋ lɛ nɔ lɛ akɛ “walaheremɔ gbi nɛ.”
13. Mɛni ji Yesaia 49:8 lɛ mli sane titri, ni eba mli klɛŋklɛŋ kwraa yɛ mɛɛ gbɛ nɔ?
13 Paulo tsɛ́ wiemɔi kɛjɛ Yesaia 49:8, ni kaneɔ akɛ: “Bɔ ni Yehowa kɛɛ nɛ: Be ni sa mli miboo toi yɛ, ni yiwalaheremɔ gbi nɔ hu miye mibuao yɛ: ni mibaa oyi, ni miha otsɔ̃ maŋ lɛ kpaŋmɔ, koni otee shikpɔŋ lɛ shi oma shi, ni okɛ gboshinii ni efee amaŋfɔ lɛ aha amɛ.” Nɛkɛ gbalɛ nɛɛ ba mli klɛŋklɛŋ yɛ be mli ni aŋmɛɛ Israelbii lɛ ahe kɛjɛ nomŋɔɔ mli yɛ Babilon, ni yɛ sɛɛ mli lɛ amɛku amɛsɛɛ kɛtee amɛmaŋ shikpɔŋ ni etsɔ amaŋfɔ lɛ nɔ ekoŋŋ lɛ.—Yesaia 49:3, 9.
14. Yesaia 49:8 ba mli yɛ Yesu sane lɛ mli yɛ mɛɛ gbɛ nɔ?
14 Yɛ Yesaia gbalɛ lɛ mlibaa lolo mli lɛ, Yehowa kɛ ‘etsulɔ’ Yesu ha akɛ ‘jeŋmaji lɛ ala, koni Nyɔŋmɔ yiwalaheremɔ ayashɛ shikpɔŋ lɛ naagbeehei lɛ.’ (Yesaia 49:6, 8; okɛto Yesaia 42:1-4, 6, 7; Mateo 12:18-21 he.) Eka shi faŋŋ akɛ “yiwalaheremɔ gbi” loo “be ni sa mli” lɛ kɔɔ Yesu he yɛ be mli ni eyɔɔ shikpɔŋ nɔ lɛ. Esɔle, ni Nyɔŋmɔ ‘ha lɛ hetoo.’ No bafee “walaheremɔ gbi” kɛha Yesu, ejaakɛ ehiɛ emuuyeli ni yeɔ emuu mli ni “etsɔ mɔ mli ni naanɔ yiwalaheremɔ jɛɔ eha mɛi fɛɛ ni boɔ lɛ toi lɛ.”—Hebribii 5:7, 9; Yohane 12:27, 28.
15. Kɛjɛ mɛɛ be mumɔŋ Israelbii lɛ ebɔ mɔdɛŋ koni amɛtsɔɔ akɛ amɛsa Nyɔŋmɔ duromɔ lɛ, ni kɛ mɛɛ yiŋtoo ni ma amɛhiɛ hewɔ?
15 Paulo kɛ Yesaia 49:8 to Kristofoi ni afɔ amɛ mu lɛ ahe, ni ekpa amɛ fai ‘koni amɛhiɛ akakpa yiŋtoo ni yɔɔ Nyɔŋmɔ duromɔ lɛ sɛɛ lɛ nɔ’ kɛtsɔ etsuijurɔ lɛ ni amɛtaoŋ esɛɛgbɛ yɛ “be ni sa mli” kɛ “walaheremɔ gbi” ni ekɛhaa lɛ nɔ. Paulo kɛfata he akɛ: “Naa, be ni sa jogbaŋŋ nɛ; naa, walaheremɔ gbi nɛ.” (2 Korintobii 6:2) Kɛjɛ Pentekoste afi 33 Ŋ.B. kɛbaa nɛɛ, mumɔŋ Israelbii lɛ ebɔ mɔdɛŋ koni amɛjie amɛhe kpo akɛ amɛsa Nyɔŋmɔ duromɔ lɛ, koni “be ni sa jogbaŋŋ” lɛ afee “walaheremɔ gbi” kɛha amɛ.
‘Wɔhe ni Wɔkɛtsɔɔ akɛ Nyɔŋmɔ Sɔɔlɔi’
16. Mɛɛ shihilɛi ni mli wawai ashishi Paulo kɛjie lɛ diɛŋtsɛ ehe yi akɛ Nyɔŋmɔ sɔɔlɔ?
16 Hii komɛi ni kɛ amɛhe bɔɔ Korinto asafo lɛ he lɛ ejieee amɛhe kpo akɛ amɛsa Nyɔŋmɔ duromɔ lɛ. Amɛgbe Paulo he guɔ yɛ mɔdɛŋ ni amɛbɔɔ koni amɛfite hegbɛ ni eyɔɔ akɛ bɔfo lɛ hewɔ, eyɛ mli akɛ ‘etooo mɔ ko mɔ ko pampi yɛ nɔ ko mli.’ Yɛ anɔkwale mli lɛ ená yijiemɔ kɛha lɛ diɛŋtsɛ ehe akɛ Nyɔŋmɔ sɔɔlɔ “yɛ tsuishiŋmɛɛ babaoo mli, yɛ amanehului amli, yɛ fimɔi amli, yɛ haomɔi amli, yɛ yii amli, yɛ gboklɛfoi atsũi amli, yɛ hoofeemɔi amli, yɛ deŋmegbomɔi amli, yɛ kpeshii amli, yɛ buadayelii amli.” (2 Korintobii 6:3-5) Yɛ sɛɛ mli lɛ, Paulo wie akɛ, kɛji akɛ mɛi ni teɔ shi woɔ lɛ lɛ ji sɔɔlɔi lɛ, belɛ ‘efe no,’ yɛ amanehului ni ena yɛ tsuŋwoi, yii, osharai, kɛ ohiayeli babaoo mli lɛ hewɔ.—2 Korintobii 11:23-27.
17. (a) Mɛɛ sui kpakpai ni wɔɔjie amɛ kpo wɔtsɔɔ baaha wɔjie wɔhe kpo wɔtsɔɔ akɛ Nyɔŋmɔ sɔɔlɔi? (b) Mɛni ji “jalɛ tawuu nii” lɛ?
17 Taakɛ Paulo kɛ enanemɛi lɛ ji lɛ, wɔbaanyɛ wɔjie wɔ diɛŋtsɛ wɔhe yi akɛ Nyɔŋmɔ sɔɔlɔi. Yɛ mɛɛ gbɛ nɔ? ‘Yɛ krɔŋŋfeemɔ mli,’ loo hetsemɔ mli, kɛ nifeemɔ ni kɛ Biblia mli anɔkwale nilee kpãa gbee lɛ naa. Wɔbaanyɛ wɔjie wɔ diɛŋtsɛ wɔhe yi kɛtsɔ ‘tsuishitoo babaoo’ nɔ, wɔŋmɛ wɔtsui shi yɛ efɔŋ loo mlilawoo mli, yɛ “mlihilɛ mli” yɛ be mli ni wɔfeɔ nibii ni yeɔ buaa mɛi krokomɛi lɛ. Agbɛnɛ hu wɔbaanyɛ wɔjie wɔhe yi akɛ Nyɔŋmɔ sɔɔlɔi kɛtsɔ emumɔ lɛ gbɛtsɔɔmɔ ni wɔɔkpɛlɛ nɔ lɛ nɔ, ni wɔjie “suɔmɔ ni pasaaa” kpo, wɔwie anɔkwale, ni wɔkɛ wɔhe afɔ̃ enɔ kɛha hewalɛ ni wɔkɛaatsu sɔɔmɔ nitsumɔ lɛ he nii. Nɔ ni yɔɔ miishɛɛ ji akɛ, Paulo ye sɔɔmɔ ni akɛwo edɛŋ lɛ he odase “kɛtsɔ jalɛ tawuu nii ni ji ninejurɔnɔ̃ kɛ nine abɛkunɔ̃” lɛ nɔ. Yɛ blema tawuu mli lɛ, ninejurɔ titri akɛfɔ̃ɔ klante beni abɛku lɛ hiɛ tsɛ̃ŋ lɛ mli. Paulo kɛ esha heloo lɛ tawuu nii—kutumpɔo, shishiumɔ, kɛ lakamɔ, wuuu ta yɛ be mli ni ewuɔ mumɔŋ ta eshiɔ nɛkɛ apasa tsɔɔlɔi nɛɛ lɛ. (2 Korintobii 6:6, 7; 11:12-14; Abɛi 3:32) Ekɛ jalɛ “tawuu nii” loo nɔ ni tamɔ nakai tsu nii ni ekɛlɛɛ anɔkwa jamɔ mli. Nakai esa akɛ wɔfee.
18. Kɛ Nyɔŋmɔ sɔɔlɔi ji wɔ lɛ, te wɔɔba wɔjeŋ wɔha tɛŋŋ?
18 Kɛji akɛ wɔji Nyɔŋmɔ sɔɔlɔi lɛ, wɔbaaba wɔjeŋ tamɔ bɔ ni Paulo kɛ enanemɛi nitsulɔi lɛ fee lɛ. Wɔbaafee wɔnii tamɔ Kristofoi kɛji akɛ abuɔ wɔ loo abuuu wɔ. Wɔhe sane fɔŋ ni abaawie lɛ etsiŋ wɔshiɛmɔ nitsumɔ lɛ naa, ni asaŋ wɔshwãŋ kɛji akɛ awie wɔhe ekpakpa. Wɔbaawie anɔkwale lɛ, ni ekolɛ abaayoo wɔ yɛ nitsumɔi ni Nyɔŋmɔ gbeyeishemɔ yɔɔ mli lɛ hewɔ. Kɛji akɛ wɔbaje gbele he gbeyeiwoo shishi yɛ henyɛlɔ lɛ tutuamɔ hewɔ lɛ, wɔkɛ wɔhe baafɔ̃ Yehowa nɔ. Ni wɔkɛ shidaa baakpɛlɛ tsɔsemɔ nɔ.—2 Korintobii 6:8, 9.
19. Te ebaa lɛ tɛŋŋ ni ‘afeɔ mɛi pii niiatsɛmɛi’ yɛ mumɔŋ lɛ?
19 Yɛ be mli ni ekɛ ewiemɔ ni kɔɔ kpãtamɔ sɔɔmɔ lɛ he lɛ baa naagbee lɛ, Paulo wie lɛ diɛŋtsɛ kɛ ehefatalɔi lɛ ahe akɛ “tamɔ ŋkɔmɔyelɔi, shi wɔmii shɛɔ daa; tamɔ ohiafoi, shi wɔtsakeɔ mɛi pii wɔfeɔ amɛ niiatsɛmɛi; tamɔ mɛi ni bɛ nɔ ko, ni kɛlɛ wɔyɛ nii fiaa.” (2 Korintobii 6:10) Yɛ be mli ni nakai sɔɔlɔi lɛ yeɔ awerɛho yɛ amɛpiŋmɔi lɛ ahewɔ lɛ, kɛlɛ amɛyɛ miishɛɛ yɛ amɛ mligbɛ. Amɛji ohiafoi yɛ heloo gbɛfaŋ, shi ‘amɛha mɛi pii tsɔmɔ niiatsɛmɛi’ yɛ mumɔŋ. Yɛ anɔkwale mli lɛ, ‘amɛyɛ nii fiaa,’ ejaakɛ amɛhemɔkɛyeli lɛ kɛ mumɔŋ ninámɔ baha amɛ—gbɛkpamɔ akɛ amɛaatsɔmɔ Nyɔŋmɔ bii po yɛ ŋwɛi. Ni amɛyɛ shihilɛ kpakpa kɛ miishɛɛ akɛ sɔɔlɔi Kristofoi. (Bɔfoi lɛ asaji 20:35) Taakɛ amɛji lɛ, wɔbaanyɛ wɔha ‘mɛi pii atsɔmɔ niiatsɛmɛi’ kɛtsɔ kpãtamɔ sɔɔmɔ lɛ ni wɔkɛ wɔhe aaawo mli bianɛ—yɛ yiwalaheremɔ gbi nɛɛ nɔ lɛ nɔ!
Okɛ Ohiɛ Afɔ̃ Yehowa Yiwalaheremɔ lɛ Nɔ
20. (a) Mɛni Paulo shweɔ waa, ni mɛni hewɔ be bɛ ni aaafite lɛ lɛ? (b) Mɛni kadiɔ yiwalaheremɔ gbi ni wɔyɔɔ mli bianɛ lɛ
20 Beni Paulo ŋma ewolo ni ji enyɔ lɛ eyaha Korintobii lɛ aaafee afi 55 Ŋ.B. lɛ, no mli lɛ eshwɛ aaafee afii 15 pɛ kɛha Yudafoi anibii agbɛjianɔtoo lɛ. Bɔfo lɛ miisumɔ waa ni atsɔ Kristo nɔ akpãta Yudafoi kɛ Jeŋmajiaŋbii lɛ kɛ Nyɔŋmɔ teŋ. Eji yiwalaheremɔ gbi, ni be fitemɔ ko bɛ. Ojogbaŋŋ, wɔhi nibii agbɛjianɔtoo ko naagbee ni tamɔ nakai nɔŋŋ mli kɛjɛ 1914. Jeŋ muu fɛɛ Maŋtsɛyeli shiɛmɔ nitsumɔ ni yaa nɔ bianɛ lɛ kadiɔ enɛ akɛ yiwalaheremɔ gbi lɛ.
21. (a) Mɛɛ afi ŋmalɛ ahala ahã 1999? (b) Mɛni esa akɛ ana wɔ akɛ wɔmiifee yɛ yiwalaheremɔ gbi nɛɛ nɔ?
21 Ehe miihia ni gbɔmɛi ni yɔɔ je lɛŋ fɛɛ anu Nyɔŋmɔ gbɛjianɔtoo kɛha yiwalaheremɔ kɛtsɔ Yesu Kristo nɔ lɛ he. Be ni akɛaashashao shi bɛ. Paulo ŋma akɛ: “Naa, walaheremɔ gbi nɛ.” Nakai wiemɔi ni yɔɔ 2 Korintobii 6:2 lɛ baafee Yehowa Odasefoi afi ŋmalɛ kɛha 1999. Kwɛ bɔ ni esa ha, ejaakɛ wɔkɛ nɔ ko ni yɔɔ gbeyei kwraa fe Yerusalem kɛ esɔlemɔtsu lɛ hiɛkpatamɔ lɛ baakpe! Nɔ ni kã wɔhiɛ nɔŋŋ ji nibii agbɛjianɔtoo nɛɛ fɛɛ hiɛkpatamɔ, ni ekɔɔ mɔ fɛɛ mɔ ni yɔɔ shikpɔŋ nɔ lɛ he. Amrɔ nɛɛ—ji be ni akɛaafee he nɔ ko—jeee wɔ́. Kɛji akɛ wɔheɔ wɔyeɔ akɛ yiwalaheremɔ ji Yehowa nɔ̃, kɛji akɛ wɔsumɔɔ lɛ, ni kɛji akɛ wɔbuɔ naanɔ wala lɛ, wɔhiɛ kpaŋ yiŋtoo ni yɔɔ Nyɔŋmɔ duromɔ lɛ sɛɛ lɛ nɔ. Akɛni wɔkɛ wɔtsui fɛɛ miisumɔ ni wɔwo Yehowa hiɛ nyam hewɔ lɛ, wɔkɛ wɔwiemɔ kɛ nifeemɔ baatsɔɔ akɛ nakai pɛpɛɛpɛ wɔtaoɔ wɔfee beni wɔbolɔɔ akɛ: “Naa, walaheremɔ gbi nɛ” lɛ.
Te Obaaha Hetoo Oha Tɛŋŋ?
◻ Mɛni hewɔ mɔ kɛ Nyɔŋmɔ teŋ kpãtamɔ lɛ he hiaa waa lɛ?
◻ Namɛi ji bɔfoi kɛ najiaŋdamɔlɔi ni kɛ amɛhe ewo kpãtamɔ sɔɔmɔ lɛ mli lɛ?
◻ Te wɔɔfee tɛŋŋ wɔjie wɔhe yi wɔtsɔɔ akɛ Nyɔŋmɔ sɔɔlɔi?
◻ Mɛni Yehowa Odasefoi afi ŋmalɛ kɛha 1999 lɛ tsɔɔ kɛha bo?
[Mfoniri ni yɔɔ baafa 17]
Taakɛ Paulo ji lɛ, ani ooshiɛ yɛ ekãa naa ni ooye oobua mɛi krokomɛi koni akpãta amɛ kɛ Nyɔŋmɔ teŋ?
United States
France
Côte d’Ivoire
[Mfoniri ni yɔɔ baafa 18]
Ani ofata gbɔmɛi babaoo ni akpãtaa amɛ kɛ Yehowa Nyɔŋmɔ teŋ yɛ yiwalaheremɔ gbi nɛɛ nɔ lɛ ahe?