Yiwalaheremɔ Ji Yehowa Nɔ̃
“Lɛ, Mawu lɛ, ji wɔyiwalaheremɔ Mawu.”—LALA 68:21.
1, 2. (a) Mɛni hewɔ wɔbaanyɛ wɔkɛɛ akɛ Yehowa ji yiwalaheremɔ Jɛɛhe lɛ? (b) Te obaatsɔɔ Abɛi 21:31 mli oha tɛŋŋ?
YEHOWA ji adesai ni sumɔɔ lɛ lɛ a-Yiwalaherelɔ. (Yesaia 43:11) Israel Maŋtsɛ David ni ehe gbɛi lɛ le enɛ kɛjɛ eniiashikpamɔ diɛŋtsɛ mli ni ejɛ etsui muu fɛɛ mli ela akɛ: “Yehowa dɛŋ yiwalaheremɔ yɔɔ.” (Lala 3:9) Gbalɔ Yona kɛ nakai wiemɔi lɛ nɔŋŋ tsu nii yɛ sɔlemɔ ni mli wa mli beni eyɔɔ ŋshɔŋ loo kpeteŋkpele lɛ musuŋ lɛ.—Yona 2:10.
2 David binuu Salomo hu le akɛ Yehowa ji yiwalaheremɔ Jɛɛhe, ejaakɛ ekɛɛ akɛ: “Asaa okpɔŋɔ atoɔ tawuu gbi; shi kunimyeli lɛ, Yehowa dɛŋ ejɛɔ.” (Abɛi 21:31) Yɛ blema Boka Teŋgbɛ lɛ, akɛ tsina hii gbalaa tsinakɔi, tejii tereɔ jatsui ni tsii, gbɔmɛi taraa tejiokpɔŋɔi anɔ, ni akɛ okpɔŋɔi tsuɔ nii yɛ tawuu mli. Shi dani Israelbii lɛ aaabote Shiwoo Shikpɔŋ lɛ nɔ lɛ, Nyɔŋmɔ kɛ famɔ ha amɛ akɛ, amɛ wɔsɛɛ be mli maŋtsɛ lɛ ‘akaha ekpɔŋɔi miifa pii.’ (5 Mose 17:16) Tawuu okpɔŋɔi ahe ebahiaŋ ejaakɛ Yehowa baahere ewebii lɛ ayiwala.
3. Mɛɛ sanebimɔi esa akɛ wɔsusu he?
3 Nuntsɔ Maŋtsɛ Yehowa ji “wɔyiwalaheremɔ Mawu.” (Lala 68:21) Mɛɛ susumɔ ni woɔ mɔ hewalɛ po nɛ! Shi mɛɛ ‘yiwalaheremɔ nii’ Yehowa etsu? Ni namɛi ayiwala ehere?
Yehowa Hereɔ Mɛi ni Ja lɛ Ayiwala
4. Te wɔfeɔ tɛŋŋ wɔleɔ akɛ Yehowa hereɔ gbɔmɛi ni sheɔ Nyɔŋmɔ gbeyei lɛ ayiwala?
4 Mɛi fɛɛ ni diɔ jalɛ nifeemɔ gbɛ lɛ sɛɛ akɛ Nyɔŋmɔ tsuji ni amɛjɔɔ amɛhe nɔ lɛ baanyɛ ana miishɛjemɔ kɛjɛ bɔfo Petro wiemɔi lɛ amli, akɛ: “[Yehowa, NW] le bɔ ni efeɔ ejieɔ jalɔi yɛ kaa mli, kɛ bɔ ni efeɔ etoɔ mɛi fɔji yɛ piŋmɔ mli kɛyashi kojomɔ gbi lɛ nɔ.” Beni Petro tsɔɔ akɛ sane nɛɛ ji anɔkwale lɛ, ekɛɛ akɛ, Nyɔŋmɔ “eŋɔɔɔ blema je lɛ he ekeee lɛ, shi moŋ Noa ni ji jalɛ shiɛlɔ lɛ, mɔ ni gbe yi fee mɛi kpaanyɔ lɛ kɛkɛ yi ebaa, ni ekɛ nu afua lɛ ba mɛi ni kwa Nyɔŋmɔ lɛ aje lɛ nɔ.”—2 Petro 2:5, 9.
5. Mɛɛ shihilɛi ashishi Noa sɔmɔ yɛ akɛ “jalɛ shiɛlɔ” lɛ?
5 Susumɔ ohe akɛ ohɔ shihilɛi ni yɔɔ Noa gbii lɛ amli lɛ mli. Daimonioi ni amɛtsake amɛhe gbɔmɛi yɛ shikpɔŋ lɛ nɔ. Ŋwɛibɔfoi toigbolɔi lɛ ashwiei nɛɛ kɛ gbɔmɛi yeɔ yɛ yiwalɛ mli, ni ‘efɔŋfeemɔ eyi shikpɔŋ lɛ nɔ obɔ.’ (1 Mose 6:1-12) Shi kɛlɛ, anyɛŋ awo Noa he gbeyei koni ekwa Yehowa sɔɔmɔ lɛ. Yɛ no najiaŋ lɛ, eji “jalɛ shiɛlɔ.” Lɛ kɛ eweku lɛ kpɛ adeka, ni amɛyiŋ efeee amɛ kɔshikɔshi kɔkɔɔkɔ akɛ abaajie yiwalɛ kɛya yɛ amɛwala be mli. Noa hemɔkɛyeli buɔ nakai je lɛ fɔ. (Hebribii 11:7) Ŋmɛnɛŋmɛnɛ beaŋ shihilɛi lɛ tamɔ Noa gbii lɛ amli nɔ lɛ pɛpɛɛpɛ, ni ekadiɔ nɛkɛ gbii nɛɛ akɛ yiwalɛ nibii agbɛjianɔtoo nɛɛ naagbee gbii. (Mateo 24:37-39; 2 Timoteo 3:1-5) Taakɛ Noa ji yɛ no beaŋ lɛ, ani obaaye anɔkwa akɛ jalɛ shiɛlɔ ni kɛ Nyɔŋmɔ webii sɔmɔɔ yɛ be mli ni omɛɔ Yehowa yiwalaheremɔ lɛ?
6. Mɛɛ gbɛ nɔ 2 Petro 2:7, 8 tsɔɔ yɛ akɛ Yehowa hereɔ mɛi ni ja lɛ ayiwala?
6 Petro kɛ odaseyeli kroko hu haa akɛ Yehowa hereɔ mɛi ni ja lɛ ayiwala. Bɔfo lɛ kɛɛ: “[Nyɔŋmɔ] jie Lot, jalɔ lɛ, mɔ ni hao yɛ nɔtɔlɔi lɛ anyenyeŋtswibɔɔ jeŋba lɛ he lɛ, yɛ mli: (ejaakɛ amɛ mlatɔmɔ nitsumɔi lɛ ni jalɔ lɛ na ni enu, beni eyɔɔ amɛteŋ lɛ, pĩŋ esusuma ni ja lɛ daa nɛɛ.)” (2 Petro 2:7, 8; 1 Mose 19:1-29) Bɔlɛnamɔ mli jeŋba shara ebatsɔ̃ gbɔmɛi akpekpei abɔ shihilɛ yɛ naagbee gbii nɛɛ amli. Taakɛ Lot ji lɛ, ani bo hu ‘ohao waa yɛ jeŋba shara’ ni mɛi pii ‘kɛ amɛhe woɔ mli’ ŋmɛnɛ lɛ hewɔ? Kɛji akɛ nakai oji, ni kɛji akɛ oodi jalɛ sɛɛ lɛ, ekolɛ obaafata mɛi ni Yehowa baahere amɛyiwala beni akɛ yiwalɛ gbɛjianɔtoo nɛɛ eba enaagbee lɛ ahe.
Yehowa Hereɔ Ewebii Kɛjɛɔ Yiwalɔi Adɛŋ
7. Yɛ mɛɛ gbɛ nɔ bɔ ni Yehowa kɛ Israelbii lɛ ye ha yɛ Mizraim lɛ yeɔ odase akɛ ejieɔ ewebii lɛ kɛjɛɔ yiwaa mli?
7 Bei abɔ ni gbɛjianɔtoo momo nɛɛ hiɔ shi lɛ, Yehowa tsuji kɛ yiwaa kɛ henyɛlɔ lɛ nɔnyɛɛ baakpe. Shi amɛbaanyɛ amɛná hekɛnɔfɔɔ akɛ Yehowa baajie amɛ, ejaakɛ ehere ewebii ni awaa amɛyi lɛ yɛ bei ni eho lɛ amli. Ŋɔɔ lɛ akɛ oji Israelnyo ni miina amanehulu yɛ Mose gbii lɛ amli Mizraimbii lɛ adɛŋ. (2 Mose 1:1-14; 6:8) Nyɔŋmɔ kɛ haomɔi ni eko nyiɛ eko sɛɛ ba Mizraim nɔ. (2 Mose 8:5–10:29) Beni haomɔ ni ji nyɔŋma ni kɛ gbele baa lɛ gbe Mizraimbii akromɔbii lɛ, Farao ŋmɛ Israel gbɛ koni eya, shi sɛɛ mli lɛ ebua etai lɛ fɛɛ naa ni esha foi kɛtiu amɛ. Shi, etsɛɛɛ ni akpata lɛ kɛ emɛi lɛ fɛɛ ahiɛ yɛ Ŋshɔ Tsuru lɛ mli. (2 Mose 14:23-28) Fatamɔ Mose kɛ Israel fɛɛ he kɛlá lala nɛɛ: “Yehowa lɛ, tawulɔ ni; Yehowa ji egbɛi. Farao shwiilii lɛ kɛ eta lɛ eloo ewo ŋshɔŋ; eshwiiliiatsɛmɛi ni ahala lɛ hu ashiu amɛ yɛ Ŋshɔ Tsuru lɛŋ; bu kwɔŋkwɔŋ lɛ etsĩ amɛnɔ; ámɛshiu kɛtee shishi tamɔ tɛ.” (2 Mose 15:3-5) Hiɛkpatamɔ ni tamɔ nakai miimɛ mɛi fɛɛ ni waa Nyɔŋmɔ webii ayi yɛ naagbee gbii nɛɛ amli lɛ.
8, 9. Jɛɛ Kojolɔi awolo lɛ mli ni okɛ nɔkwɛmɔnɔ ni tsɔɔ akɛ Yehowa hereɔ ewebii lɛ kɛjɛɔ yiwalɔi adɛŋ aha.
8 Beni Israelbii lɛ bote Shiwoo Shikpɔŋ lɛ nɔ lɛ sɛɛ afii babaoo lɛ, kojolɔi ji mɛi ni kɛ jalɛ kojoɔ amɛ. Yɛ bei komɛi amli lɛ, gbɔmɛi lɛ naa nɔ̃ yɛ maŋsɛɛ yiwalɔi adɛŋ, ni kɛlɛ Nyɔŋmɔ kɛ kojolɔi anɔkwafoi tsuɔ nii koni amɛhere amɛyiwala. Eyɛ mli akɛ ‘wɔbaadɔmɔ ŋtsɔi yɛ yiwalɔi ni tsirɛɔ wɔ kɛyaa kɛbaa lɛ hewɔ’ moŋ, shi Yehowa baahere wɔyiwala akɛ etsuji anɔkwafoi. (Kojolɔi 2:16-18; 3:9, 15) Yɛ anɔkwale mli lɛ, Biblia mli wolo ni ji Kojolɔi lɛ kɛ enɛ he nɔmimaa, kɛ yiwalaheremɔ kpeteŋkpele ni Nyɔŋmɔ baatsɔ Kojolɔ, Yesu Kristo, ni ehala lɛ lɛ nɔ ekɛha lɛ haa wɔ.
9 Nyɛhaa wɔkua wɔsɛɛ kɛyaa Kojolɔ Barak gbii lɛ amli. Yɛ apasa jamɔ kɛ ŋwɛi nɔkpɛlɛmɔ ni bɛ hewɔ lɛ, Israelbii lɛ ehi Kanaan Maŋtsɛ Yabin yiwalɛ nɔyeli shishi afii 20. Sisera ji Kanaan asraafoi babaoo lɛ anɔ tatsɛ. Eyɛ mli akɛ maŋ lɛ yifalɛ baanyɛ ashɛ akpekpei ejwɛ moŋ, shi ‘anyɛŋ ana tsɛŋ loo akpɔlɔ ko yɛ mɛi akpei nyɔŋmai ejwɛ dɛŋ yɛ Israel.’ (Kojolɔi 5:6-8) Israelbii lɛ kɛ tsuitsakemɔ fó amɛtsɛ Yehowa. Ni taakɛ Nyɔŋmɔ tsɔ gbalɔyoo Debora nɔ etsɔɔ lɛ, Barak bua hii 10,000 anaa yɛ Tabor Gɔŋ lɛ nɔ, ni Yehowa gbala henyɛlɔi lɛ kɛtee jɔɔ lɛ mli yɛ Tabor ni kwɔ lɛ shishi. Sisera asraafoi babaoo lɛ kɛ ta shwiilii 900 ho kɛ hoofeemɔ kɛtsɔ ŋa lɛ nɔ kɛtsɔ Kishon faa ni egbi lɛ mli. Shi nugbɔnɛmɔ babaoo ha Kishon faa lɛ yi kɛje ŋa. Beni Barak kɛ ehii lɛ nyiɛ kɛkpelekeɔ Tabor Gɔŋ lɛ ni ahum ni tswaa lɛ eha amɛnɔ lɛ, amɛkɛ amɛhiŋmɛi ye fitemɔ ni Yehowa mlifu ni ejie lɛ kpo lɛ kɛba lɛ he odase. Barak hii lɛ tutua Kanaanbii ni tsui efa ni joɔ foi lɛ, ni amɛteŋ mɔ ko ejeee mli. Mɛɛ kɔkɔbɔɔ po enɛ ji kɛha wɔ yiwalɔi ni susuɔ akɛ amɛmiiwu amɛshi Nyɔŋmɔ lɛ!—Kojolɔi 4:3-16; 5:19-22.
10. Mɛni hewɔ wɔbaanyɛ wɔná nɔmimaa akɛ Nyɔŋmɔ baahere eŋmɛnɛŋmɛnɛ beaŋ tsuji lɛ ayiwala kɛjɛ mɛi ni waa amɛyi lɛ fɛɛ adɛŋ lɛ?
10 Yehowa baahere eŋmɛnɛŋmɛnɛ beaŋ tsuji lɛ ayiwala kɛjɛ amɛhenyɛlɔi ni waa amɛyi lɛ fɛɛ dɛŋ, tamɔ bɔ ni ehere Israel ni sheɔ Nyɔŋmɔ gbeyei lɛ yiwala yɛ amanehulu bei amli lɛ. (Yesaia 43:3; Yeremia 14:8) Nyɔŋmɔ here David yiwala kɛjɛ “ehenyɛlɔi lɛ fɛɛ adɛŋ.” (2 Samuel 22:1-3) No hewɔ lɛ, kɛji akɛ ahaoɔ wɔ loo awaa wɔyi akɛ Yehowa webii po lɛ, nyɛhaa wɔnaa ekãa, ejaakɛ e-Mesia Maŋtsɛ lɛ baaha wɔye wɔhe kɛjɛ yiwaa fɛɛ mli. Hɛɛ, “eeena ohiafo kɛ mɔ ni efi lɛ lɛ mɔbɔ, ni eeehere mɛi ni efi amɛ lɛ asusumai ayiwala.” (Lala 72:13, 14) Nakai yiwalaheremɔ lɛ ebɛŋkɛ.
Nyɔŋmɔ Hereɔ Mɛi ni kɛ Amɛhiɛ Fɔ̃ɔ Enɔ lɛ Ayiwalala
11. Mɛɛ nɔkwɛmɔnɔ oblanyo David fee ni tsɔɔ bɔ ni ekɛ ehe fɔ̃ɔ Yehowa nɔ?
11 Bɔni afee ni wɔna Yehowa yiwalaheremɔ lɛ, esa akɛ wɔkɛ wɔhiɛ afɔ̃ enɔ yɛ ekãa naa. David jie Nyɔŋmɔ nɔ ni akɛ he fɔ̃ɔ yɛ ekãa naa lɛ kpo beni eje kpo koni ekɛ Goliat oblaŋ lɛ ayakpe lɛ. Susumɔ nakai Filistinyo oblaŋ sasaraa ni damɔ gbekɛ nuu David hiɛ, ni miikɛɛ lɛ akɛ: “Bo lɛ ooba miŋɔɔ kɛ klante kɛ akpɔlɔ kɛ tsɛŋ; shi mi lɛ miiba oŋɔɔ yɛ Yehowa Zebaot ni ji Israel tai ni obɔɔ amɛ ahora lɛ a-Nyɔŋmɔ lɛ gbɛi amli! Ŋmɛnɛ gbi nɛɛ, Yehowa aaajieo awo midɛŋ, ni magbeo, ni mafo oyi, ni maŋɔ Filistibii ata lɛ mli gbohii lɛ maha ŋwɛi loofɔji kɛ shikpɔŋ lɛ nɔ kooloi awuiyelɔi ŋmɛnɛ, koni shikpɔŋ lɛ fɛɛ ana ale akɛ Nyɔŋmɔ ko yɛ Israel, ni asafo ni ekpe nɛɛ fɛɛ aaana ale akɛ, jeee klante loo akpɔlɔ Yehowa kɛhereɔ mɔ yiwala; ejaakɛ Yehowa nɔ̃ ji ta lɛ.” Etsɛɛɛ ni Goliat gbo, ni aye Filistibii lɛ anɔ kunim. Eyɛ faŋŋ akɛ, Yehowa here ewebii lɛ ayiwala.—1 Samuel 17:45-54.
12. Mɛni hewɔ ekolɛ ebaaye ebua akɛ wɔɔkai David nuu kakalɔ ni ji Eleazar lɛ?
12 Kɛji akɛ wɔkɛ yiwalɔi miikpe lɛ, ehe baahia ni ‘wɔfi shi yɛ ekãa naa’ ni wɔkɛ wɔhiɛ afɔ̃ Nyɔŋmɔ nɔ kɛmɔ shi. (Yesaia 46:8-13; Abɛi 3:5, 6) Kaimɔ nɔ ni ba yɛ he ko ni atsɛɔ jɛmɛ Pas-Damim lɛ. Israelbii lɛ epuu sɛɛsɛɛ kɛjɛ Filistibii atai lɛ ahiɛ. Shi Eleazar, ni ji David hii kakalɔi etɛ lɛ ateŋ mɔ kome lɛ sheee gbeyei kwraa. Eyadamɔ akoko ŋmɔ ko teŋ, ni ekome ekɛ klante tswia Filistibii lɛ anii. Kɛkɛ ni ‘Yehowa kɛ kunimyeli kpeteŋkpele here Israel yiwala.’ (1 Kronika 11:12-14; 2 Samuel 23:9, 10) Mɔ ko mɔ ko kpaaa wɔ gbɛ ni wɔ kome wɔye asraafoi ata nɔ kunim. Ni kɛlɛ, ekolɛ be shɛɔ ni wɔ kome wɔyɔɔ ni henyɛlɔi nyɛɛɔ wɔnɔ. Ani wɔbaatsɔ sɔlemɔ nɔ wɔkɛ wɔhe afɔ̃ Yehowa, yiwalaheremɔ nifeemɔi a-Nyɔŋmɔ lɛ nɔ? Ani wɔbaatao eyelikɛbuamɔ koni wɔkatsɔ̃ɔ yiwalɔi lɛ wɔnanemɛi heyelilɔi asɛɛgbɛ?
Yehowa Hereɔ Emuuyeli Mlihiɛlɔi Ayiwala
13. Mɛni hewɔ ewa akɛ aaahiɛ emuuyeli mli aha Nyɔŋmɔ yɛ Israel akutsei nyɔŋma maŋtsɛyeli lɛ mli lɛ?
13 Bɔni afee ni wɔnine ashɛ Yehowa yiwalaheremɔ nɔ lɛ, esa akɛ wɔhiɛ wɔ emuuyeli mli wɔha lɛ yɛ gbɛ fɛɛ gbɛ nɔ. Nyɔŋmɔ webii ni hi shi yɛ blema bei amli lɛ kɛ kaai srɔtoi kpe. Susumɔ nɔ ni ekolɛ okɛaakpe eji ohi shi yɛ Israel akutsei nyɔŋma maŋtsɛyeli lɛ mli lɛ he okwɛ. Rehabeam yiwalɛ lɛ eha akutsei nyɔŋma lɛ ekpa yɛ esɛɛ ni amɛyato Israel kooyigbɛ maŋtsɛyeli lɛ. (2 Kronika 10:16, 17; 11:13, 14) Yehu ji maŋtsɛ ni hi fe fɛɛ yɛ emaŋtsɛmɛi babaoo lɛ ateŋ, shi lɛ po ‘ekɛ etsui fɛɛ enyiɛɛɛ Yehowa mla lɛ sɛɛ.’ (2 Maŋtsɛmɛi 10:30, 31) Ni kɛlɛ, akutsei nyɔŋma maŋtsɛyeli lɛ yɛ amɛ emuuyeli mlihiɛlɔi. (1 Maŋtsɛmɛi 19:18) Amɛjie hemɔkɛyeli ni amɛyɔɔ yɛ Nyɔŋmɔ mli lɛ kpo, ni ekɛ amɛ hi shi. Yɛ kaai ni baa ohemɔkɛyeli nɔ lɛ fɛɛ sɛɛ lɛ, ani oohiɛ emuuyeli mli kɛmiiha Yehowa?
14. Mɛɛ yiwalaheremɔ Yehowa kɛha yɛ Maŋtsɛ Hezekia gbii lɛ amli, ni mɛni kɛ Yuda nɔ kunim ni Babiloniabii lɛ ye lɛ ba?
14 Nyɔŋmɔ Mla ni abuuu yɛ hei babaoo lɛ ha amanehulu ba Israel maŋtsɛyeli lɛ nɔ. Beni Ashurbii lɛ ye nɔ kunim yɛ afi 740 D.Ŋ.B. lɛ, ŋwanejee ko bɛ he akɛ aŋkroaŋkroi jɛ ekutsei nyɔŋma lɛ mli amɛjo foi kɛtee Yuda akutsei enyɔ maŋtsɛyeli lɛ mli, yɛ he ni amɛbaanyɛ ni amɛjá Yehowa yɛ esɔlemɔwe lɛ yɛ. Yuda maŋtsɛmɛi 19 ni jɛ David wekukpaa lɛ mli lɛ ateŋ mɛi ejwɛ—Asa, Yehoshafat, Hezekia, kɛ Yosia—ekaaa yɛ amɛhe ni amɛtu amɛha Nyɔŋmɔ lɛ mli. Ashurbii lɛ kɛ ta babaoo batutua Yuda yɛ emuuyeli mlihiɛlɔ Hezekia gbii lɛ amli. Yɛ Hezekia sɔlemɔi lɛ ahetoohamɔ mli lɛ, Nyɔŋmɔ kɛ ŋwɛibɔfo kome pɛ tsu nii ni ekɛgbe Ashurbii 185,000 gbɛkɛ kome kɛkɛ, ni ekɛhere E-jálɔi lɛ ayiwala! (Yesaia 37:36-38) Yɛ sɛɛ mli lɛ, Mla lɛ ni gbɔmɛi lɛ yeee nɔ kɛ Nyɔŋmɔ gbalɔi lɛ ni amɛbooo amɛ toi lɛ kɛ Yuda nɔ kunim ni Babilonbii lɛ baye kɛ emaŋtiase, Yerusalem kɛ sɔlemɔtsu lɛ hiɛkpatamɔ ba yɛ afi 607 D.Ŋ.B.
15. Mɛni hewɔ tsuishiŋmɛɛ he hiaa Yudafoi nomii ni yɔɔ Babilon lɛ, ni yɛ naagbee lɛ mɛɛ gbɛ nɔ Yehowa tsɔ ekpɔ̃ amɛ?
15 Tsuishiŋmɛɛ he bahia Yudafoi nomii lɛ bɔni afee ni amɛhiɛ amɛ emuuyeli mli amɛha Nyɔŋmɔ beni amɛyɔɔ nomŋɔɔ mli yɛ Babilon afii 70 ni yɔɔ mɔbɔ lɛ. (Lala 137:1-6) Emuuyeli mlihiɛlɔ kome ko ni sa kadimɔ ji gbalɔ Daniel. (Daniel 1:1-7; 9:1-3) Susumɔ emii ni baashɛ ehe lɛ he okwɛ, beni Persia Maŋtsɛ Koresh wo akpɔ ni bɔi nitsumɔ yɛ afi 537 D.Ŋ.B. ni ŋmɛ Yudafoi lɛ agbɛ akɛ amɛku amɛsɛɛ amɛya Yuda ni amɛyama sɔlemɔtsu lɛ ekoŋŋ lɛ! (Ezra 1:1-4) Daniel kɛ mɛi krokomɛi lɛ eŋmɛ amɛtsui shi afii babaoo, shi yɛ naagbee lɛ amɛna Babilon butumɔ kɛ Yehowa webii lɛ akpɔmɔ. Esa akɛ enɛ aye abua wɔ koni wɔjie tsuishiŋmɛɛ kpo beni wɔmɛɔ “Babilon Kpeteŋkpele,” jeŋ apasa jamɔ maŋtsɛyeli lɛ hiɛkpatamɔ lɛ.—Kpojiemɔ 18:1-5.
Yehowa Hereɔ Ewebii lɛ Ayiwala Be Fɛɛ Be
16. Mɛɛ yiwalaheremɔ Nyɔŋmɔ kɛha yɛ Maŋnyɛ Ester gbii lɛ amli?
16 Yehowa hereɔ ewebii lɛ ayiwala be fɛɛ be, kɛ́ amɛye lɛ anɔkwale. (1 Samuel 12:22; Yesaia 43:10-12) Susumɔ Maŋnyɛ Ester gbii lɛ ahe—afii ohai enumɔ D.Ŋ.B. lɛ. Maŋtsɛ Ahashwerosh (Xerxes I) ehala Haman akɛ maŋsɔɔlɔ nukpa. Akɛni Mordekai, Yudanyo lɛ kulaaa shi kɛhaaa Haman hewɔ lɛ, emli fũ naakpa, ni ekpaŋ akɛ ebaakpata ehiɛ kɛ Yudafoi lɛ fɛɛ ni yɔɔ Persia Maŋtsɛyeli lɛ mli lɛ. Etsɔɔ akɛ Yudafoi lɛ kuɔ mla mli, ekɛ shika ni baaha mɛi ate shi awo amɛ ha, ni aŋmɛ lɛ gbɛ koni ekɛ maŋtsɛ lɛ wolonaasɔomɔ ga lɛ asɔo wolo ni fãa akɛ akpata amɛhiɛ lɛ naa. Ester kɛ ekãa jie Yudanyo ni eji lɛ kpo etsɔɔ maŋtsɛ lɛ, ni ekpa Haman gbɔmɔgbee kpaŋmɔ lɛ he mama. Etsɛɛɛ ni akɛ Haman tsotsoro tso ni lɛ diɛŋtsɛ esaa koni asɛŋ Mordekai yɛ nɔ lɛ nɔ. Afee Mordekai maŋsɔɔlɔ nukpa, kɛ hegbɛ akɛ aŋmɛ Yudafoi lɛ agbɛ ni amɛfã amɛhe. Amɛye amɛhenyɛlɔi lɛ anɔ kunim kpeteŋkpele. (Ester 3:1–9:19) Esa akɛ nɔ ni ba nɛɛ awaje wɔhemɔkɛyeli akɛ Yehowa baatsu yiwalaheremɔ nitsumɔi yɛ eŋmɛnɛŋmɛnɛ beaŋ tsuji ni feɔ toiboo amɛhaa lɛ lɛ ahe.
17. Yɛ mɛɛ gbɛ nɔ toiboo tsu babaoo yɛ klɛŋklɛŋ afii oha lɛ mli Yudafoi Kristofoi ni yɔɔ Yudea lɛ ayiwalaheremɔ mli?
17 Yiŋtoo kroko hewɔ ni Nyɔŋmɔ hereɔ ewebii ayiwala ji akɛ, amɛboɔ lɛ kɛ e-Bi lɛ toi. Ŋɔɔ lɛ akɛ oji Yesu klɛŋklɛŋ afii oha lɛ mli kaselɔi Yudafoi lɛ ateŋ mɔ kome. Ekɛɔ amɛ akɛ: “Shi kɛ nyɛna akɛ abɔ nsara awo Yerusalem he lɛ, belɛ nyɛnaa nyɛlea akɛ efitemɔ lɛ eshɛ. No mli lɛ mɛi ni yɔɔ Yudea lɛ ajo foi aya gɔji lɛ anɔ.” (Luka 21:20-22) Afii ho, ni osusuɔ be mli ni nɛkɛ wiemɔi nɛɛ baaba mli lɛ ahe. Kɛkɛ ni Yudafoi atuatsemɔ ko ba yɛ afi 66 Ŋ.B. Roma asraafoi ni yɔɔ Cestius Gallus shishi lɛ babɔle Yerusalem he kɛkpe, ni amɛba sɔlemɔtsu lɛ gbogboi lɛ ahe. Trukaa ni Romabii lɛ ku amɛsɛɛ ni yiŋtoo ko kwraa bɛ he. Mɛni Yudafoi Kristofoi lɛ baafee? Eusebius kɛɔ yɛ ewolo ni ji Ecclesiastical History (Book III, chapter V, 3), lɛ mli akɛ, amɛjo foi kɛjɛ Yudea kɛ Yerusalem. Abaa amɛyi ejaakɛ amɛbo Yesu gbalɛ kɔkɔbɔɔ lɛ toi. Ani ohe feɔ oya kɛboɔ Ŋmalɛ naa gbɛtsɔɔmɔ, ni atsɔɔ “tsulɔ anɔkwafo” ni ahala lɛ ato Yesu ‘nibii’ fɛɛ nɔ lɛ nɔ akɛhaa lɛ toi nakai nɔŋŋ?—Luka 12:42-44.
Yiwalaheremɔ Kɛmiiya Naanɔ Wala Mli
18, 19. (a) Yesu gbele lɛ kɛ mɛɛ yiwalaheremɔ ba, ni kɛha namɛi? (b) Mɛni bɔfo Paulo etswa efai shi akɛ ebaafee?
18 Yesu kɔkɔbɔɔ lɛ toiboo here Yudafoi Kristofoi ni yɔɔ Yudea lɛ ayiwala. Shi Yesu gbele lɛ haa yiwalaheremɔ kɛmiiya naanɔ wala mli feɔ nɔ ni ‘gbɔmɛi srɔtoi fɛɛ’ baanyɛ aná. (1 Timoteo 4:10) Kpɔmɔnɔ he bahia adesai beni Adam fee esha, ni elaaje wala kɛha lɛ diɛŋtsɛ ehe, ni ehɔ̃ɔ adesai aweku lɛ ewo esha kɛ gbele nyɔŋyeli mli lɛ. (Romabii 5:12-19) Kooloi afɔlei ni ashãa yɛ Mose Mla lɛ shishi lɛ ji okadi kɛkɛ ni akɛhaa esha nɔ. (Hebribii 10:1-4) Akɛni Yesu bɛ adesa tsɛ ko, ni eka shi faŋŋ akɛ Nyɔŋmɔ mumɔ krɔŋkrɔŋ lɛ ‘baha’ Maria nɔ kɛjɛ be mli ni eŋɔ hɔ kɛyashi be mli ni efɔ Yesu hewɔ lɛ, afɔ lɛ akɛ mɔ ni eye ehe kwraa kɛjɛ esha loo emuu ni ayeee mli. (Luka 1:35; Yohane 1:29; 1 Petro 1:18, 19) Beni Yesu gbo akɛ emuuyeli mlihiɛlɔ ni yeɔ emuu lɛ, ekɛ lɛ diɛŋtsɛ ewala ni yeɔ emuu lɛ ha koni eku sɛɛ ekpɔ̃ adesai koni amɛye amɛhe ekoŋŋ. (Hebribii 2:14, 15) No hewɔ lɛ Kristo “ŋɔ ehe eha akɛ kpɔmɔnɔ ni yeɔ egbɔ eha mɛi fɛɛ.” (1 Timoteo 2:5, 6, NW) Jeee mɛi fɛɛ kɛ amɛhe baaha gbɛjianɔtoo kɛha yiwalaheremɔ nɛɛ, shi Nyɔŋmɔ kpɛlɛɔ nii ni akɛtsuɔ koni ehe aba sɛɛnamɔ aha mɛi ni kpɛlɛɔ nɔ yɛ hemɔkɛyeli mli lɛ nɔ.
19 Kɛtsɔ ekpɔmɔ afɔleshãa lɛ jara ni ekɛyaha Nyɔŋmɔ yɛ ŋwɛi lɛ nɔ lɛ, Kristo kpɔ̃ Adam seshibii lɛ ekoŋŋ. (Hebribii 9:24) Yesu nine shɛ Ayemforo, ni akɛ esɛɛnyiɛlɔi 144,000 ni atee amɛ shi kɛtee ŋwɛi wala mli lɛ fee lɛ anɔ. (Efesobii 5:25-27; Kpojiemɔ 14:3, 4; 21:9) Ebatsɔɔ “Naanɔ tsɛ” hu kɛhaa mɛi ni kpɛlɛɔ efɔleshãa lɛ nɔ ni amɛnine shɛɔ naanɔ wala nɔ yɛ shikpɔŋ nɔ lɛ. (Yesaia 9:5, 6; 1 Yohane 2:1, 2) Mɛɛ gbɛjianɔtoo ni suɔmɔ yɔɔ mli nɛ! Hiɛsɔɔ ni Paulo ná kɛha enɛ lɛ jeɔ kpo yɛ emumɔ naa wolo ni ji enyɔ ni eŋma eyaha Kristofoi ni yɔɔ Korinto lɛ mli, taakɛ nikasemɔ ni baanyiɛ sɛɛ lɛ baatsɔɔ lɛ. Yɛ anɔkwale mli lɛ, Paulo etswa efai shi akɛ, ehaŋ nɔ ko nɔ ko atsi enaa kɛjɛ gbɔmɛi ni eeeye ebua amɛ koni amɛnine ashɛ Yehowa gbɛjianɔtoo ni yɔɔ naakpɛɛ kɛha yiwalaheremɔ kɛmiiya naanɔ wala mli lɛ nɔ lɛ mli.
Te Obaaha Hetoo Oha Tɛŋŋ?
◻ Mɛɛ Ŋmalɛ mli odaseyeli yɔɔ ni tsɔɔ akɛ Nyɔŋmɔ hereɔ ewebii ni ja lɛ ayiwala?
◻ Te wɔfeɔ tɛŋŋ wɔleɔ akɛ Yehowa hereɔ mɛi ni kɛ amɛhiɛ fɔ̃ɔ enɔ ni hiɛɔ amɛ emuuyeli mli lɛ?
◻ Mɛɛ gbɛjianɔ Nyɔŋmɔ eto kɛha yiwalaheremɔ ni kɛ mɔ yaa naanɔ wala mli?
[Mfoniri ni yɔɔ baafa 12]
David kɛ ehe fɔ̃ Yehowa, ‘yiwalaheremɔ nifeemɔi a-Nyɔŋmɔ’ lɛ nɔ. Ani ofeɔ nakai?
[Mfoniri ni yɔɔ baafa 14]
Yehowa hereɔ ewebii lɛ ayiwala be fɛɛ be, taakɛ efee yɛ Maŋnyɛ Ester gbii lɛ amli lɛ