Sanebimɔi ni Jɛ Kanelɔi Adɛŋ

Namɛi ahe Paulo wieɔ yɛ 2 Korintobii 6:14 lɛ, beni ekɛ wiemɔ ni ji “mɛi ni heee yeee” lɛ tsu nii lɛ?

Wɔkaneɔ yɛ 2 Korintobii 6:14 lɛ akɛ: “Nyɛkɛ mɛi ni heee yeee lɛ akagbalaa kɔŋtso kome ni yeee egbɔ!” Kɛji akɛ wɔsusu wiemɔi ni fata he lɛ ahe lɛ, ebafeɔ faŋŋ akɛ Paulo miiwie aŋkroaŋkroi ni fataaa Kristofoi asafo lɛ mlibii lɛ ahe lɛ he. Biblia lɛ kukuji krokomɛi ni Paulo kɛ wiemɔi ni ji “mɔ ni heee yeee” loo “mɛi ni heee yeee” tsu nii yɛ mli lɛ fiɔ shishinumɔ nɛɛ sɛɛ.

Ákɛ nɔkwɛmɔnɔ lɛ, Paulo kã Kristofoi lɛ yɛ kojomɔhe ni amɛkɛ amɛhe yaa “yɛ mɛi ni heee yeee lɛ aŋɔɔ” lɛ hewɔ. (1 Korintobii 6:6) Mɛi ni heee yeee ni awieɔ amɛhe yɛ biɛ lɛ ji kojolɔi ni sɔmɔɔ yɛ Korinto kojomɔhe gbɛjianɔtoo lɛ mli lɛ. Paulo wie yɛ ewolo ni ji enyɔ ni eŋma lɛ mli akɛ, Satan “eshwila mɛi ní heee yeee lɛ ajwɛŋmɔi.” ‘Ahà’ mɛi ni heee yeee nɛɛ ahiɛ koni amɛkana sanekpakpa lɛ. Mɛi ni heee yeee nɛɛ efeko nɔ ko ni tsɔɔ akɛ amɛmiisumɔ ni amɛsɔmɔ Yehowa, ejaakɛ Paulo tsɔ hiɛ etsɔɔ mli akɛ: “Kɛ́ amɛku amɛsɛɛ kɛba Nuŋtsɔ [Yehowa] ŋɔɔ lɛ, aaajie hiɛhaa nɔ lɛ.”—2 Korintobii 3:16; 4:4.

Mɛi ni heee yeee lɛ ateŋ mɛi komɛi kɛ amɛhe ewo mlakwamɔ kɛ wɔŋjamɔ mli. (2 Korintobii 6:15, 16) Shi kɛlɛ, jeee amɛ fɛɛ amɛteɔ shi amɛwoɔ Yehowa tsuji. Amɛteŋ mɛi komɛi jieɔ miishɛɛ kpo yɛ anɔkwale lɛ he. Amɛteŋ mɛi babaoo yɛ hefatalɔi ni ji Kristofoi, ni amɛyɛ he miishɛɛ akɛ amɛkɛ amɛ aaakã he ahi shi. (1 Korintobii 7:12-14; 10:27; 14:22-25; 1 Petro 3:1, 2) Shi kɛlɛ, Paulo kɛ wiemɔ ni ji “mɔ ni heee yeee” lɛ tsu nii kpitiokpitio yɛ aŋkroaŋkroi ní taakɛ atsɔɔ mli yɛ yiteŋgbɛ lɛ, amɛjeee Kristofoi asafo lɛ mlibii ni feɔ “mɛi ni heɔ Nuŋtsɔ lɛ nɔ yeɔ” lɛ ahe.—Bɔfoi lɛ Asaji 2:41; 5:14; 8:12, 13.

Shishitoo mla ni anaa yɛ 2 Korintobii 6:14 lɛ he yɛ sɛɛnamɔ kɛha Kristofoi yɛ shihilɛi fɛɛ amli, ni atsɛ yisɛɛ shii abɔ akɛ eji ŋaawoo ni nilee yɔɔ mli kɛha Kristofoi ni taoɔ gbalashihilɛ mli hefatalɔi lɛ. (Mateo 19:4-6) Kristofonyo ni ejɔɔ ehe nɔ ni abaptisi lɛ lɛ kɛ nilee tsuɔ nii ni etaooo gbalashihilɛ mli hefatalɔ yɛ mɛi ni heee yeee lɛ ateŋ, akɛni shishitoo mlai, otii, kɛ hemɔkɛyelii ni mɛi ni heee yeee lɛ yɔɔ lɛ yɛ srɔto kwraa yɛ nɔ ni anɔkwa Kristofonyo lɛ hiɛ lɛ he lɛ hewɔ.

Ni aŋkroaŋkroi ni kaseɔ Biblia lɛ ni amɛkɛ Kristofoi asafo lɛ bɔɔ lɛ hu? Ni mɛi ni ji shiɛlɔi ni abaptisiko amɛ lɛ hu? Ani amɛji mɛi ni heee yeee? Dabi. Esaaa akɛ atsɛɔ aŋkroaŋkroi ni ekpɛlɛ sanekpakpa lɛ mli anɔkwale lɛ nɔ ni miiya amɛhiɛ fiofio kɛmiibɛŋkɛ baptisimɔ he lɛ akɛ mɛi ni heee yeee. (Romabii 10:10; 2 Korintobii 4:13) Dani abaabaptisi Kornelio lɛ atsɛ lɛ akɛ “Nyɔŋmɔ jálɔ . . . ni . . . sheɔ Nyɔŋmɔ gbeyei.”—Bɔfoi lɛ Asaji 10:2.

Belɛ, ani ebaafee nɔ ni nilee yɔɔ mli kɛha Kristofonyo ko ni ejɔɔ ehe nɔ lɛ akɛ ekɛ mɔ ko ni akpɛlɛ enɔ akɛ shiɛlɔ ni abaptisiko lɛ lɛ aje nyiɛmɔ ni tsɔɔ gbalashihilɛ hiɛ lɛ shishi ni ekɛ lɛ abote gbalashihilɛ mli, akɛni kɛ́ wɔɔwie he yɛ faŋŋ mli lɛ Paulo ŋaawoo ni aŋma yɛ 2 Korintobii 6:14 lɛ kɔɔɔ amɛhe lɛ hewɔ? Dabi, nilee bɛ mli. Mɛni hewɔ nilee bɛ mli lɛ? Enɛ jɛ ŋaawoo ni yɔɔ tɛ̃ɛ ni Paulo kɛha ni kɔɔ Kristofoi okulafoi ahe lɛ hewɔ. Paulo ŋma akɛ: “Eyɛ hegbɛ akɛ eeegbã mɔ ni esumɔɔ, shi ja afee yɛ Nuŋtsɔ lɛ mli.” (1 Korintobii 7:39, wɔma efã ko nɔ mi.) Awo Kristofoi ni ejɔɔ amɛhe nɔ lɛ hewalɛ yɛ nakai ŋaawoo lɛ kɛ gbeekpamɔ naa akɛ, amɛkɛ mɛi ni ‘yɔɔ Nuŋtsɔ lɛ mli’ lɛ pɛ abote gbalashihilɛ mli.

Mɛni ji wiemɔ “yɛ Nuŋtsɔ lɛ mli” kɛ wiemɔ ni kɛ lɛ yɔɔ tsakpaa ni ji “yɛ Kristo mli” lɛ shishinumɔ? Paulo wie aŋkroaŋkroi ni ‘yɛ Kristo mli’ loo ‘yɛ Nuŋtsɔ lɛ mli’ lɛ ahe yɛ Romabii 16:8-10 kɛ Kolosebii 4:7. Kɛji akɛ okane nakai kukuji lɛ, obaana akɛ nakai mɛi lɛ ji ‘nanemɛi nitsulɔi,’ ‘mɛi ni akpɛlɛ amɛnɔ,’ ‘nyɛmimɛi ni asumɔɔ,’ ‘anɔkwa sɔɔlɔi,’ kɛ ‘nanemɛi tsuji.’

Mɛɛ be mli mɔ ko batsɔɔ “tsulɔ yɛ Nuŋtsɔ lɛ mli”? Enɛ baa mli beni ejɛɔ esuɔmɔ mli efeɔ nɔ ni esa akɛ tsulɔ afee, ni ekwaa lɛ diɛŋtsɛ ehe lɛ. Yesu tsɔɔ mli akɛ: “Kɛji mɔ ko miisumɔ akɛ enyiɛɔ misɛɛ lɛ, ha ní ekwa ehe ní ewó esɛŋmɔtso lɛ ní enyiɛ misɛɛ.” (Mateo 16:24) Mɔ ko jeɔ Kristo sɛɛnyiɛmɔ shishi, ni ebaa ehe shi kwraa ehaa Nyɔŋmɔ suɔmɔnaa nifeemɔ beni ejɔɔ ehe nɔ eha Nyɔŋmɔ. No sɛɛ lɛ, ekɛ ehe haa kɛha baptisimɔ ni ebatsɔɔ sɔɔlɔ ni ahala lɛ ni hiɛ shidaamɔ kpakpa yɛ Yehowa Nyɔŋmɔ hiɛ.a No hewɔ lɛ, agbɛnɛ, ní ‘aaabote gbalashihilɛ mli yɛ Nuŋtsɔ lɛ mli’ lɛ tsɔɔ ákɛ akɛ mɔ ko ni eha efee faŋŋ akɛ eji heyelilɔ lɛɛlɛŋ, ni eji “Nyɔŋmɔ kɛ Nuŋtsɔ Yesu Kristo” sɔɔlɔ ni ejɔɔ ehe nɔ lɛ aaabote gbalashihilɛ mli.—Yakobo 1:1.

Mɔ ni kɛ Yehowa Odasefoi miikase Biblia lɛ ni eená mumɔŋ nɔyaa ni sa jogbaŋŋ lɛ sa yijiemɔ. Shi kɛlɛ, ejɔko ehe nɔ ehako Yehowa ni ekɛ ehe fɛɛ hako kɛha wala shihilɛ be-fɛɛ sɔɔmɔ kɛ afɔleshaa. Ekã he eefee tsakemɔi ni he hiaa lolo. Ehe miihia ni egbe tsakemɔi wuji ni haa abatsɔɔ Kristofonyo ni ejɔɔ ehe nɔ ni abaptisi lɛ lɛ naa, dani esusu shihilɛ mli tsakemɔ wulu kroko ni tamɔ gbalashihilɛ mlibotemɔ he.

Ani ebaafee nɔ ni nilee yɔɔ mli akɛ Kristofonyo ko kɛ mɔ ko ni etamɔ nɔ ni mɛ ni amɛɔ lɛ koni ená baptisimɔ, koni akɛ lɛ abote gbalashihilɛ mli lɛ hewɔ ekolɛ eyaa ehiɛ yɛ e-Biblia nikasemɔ mli lɛ—aaaje nyiɛmɔ ni tsɔɔ gbalashihilɛ hiɛ shishi? Dabi. Biblia nikaselɔ ko jwɛŋmɔ baanyɛ afutu lɛ kɛji ená ele akɛ Kristofonyo ko ni ejɔɔ ehe nɔ lɛ miisumɔ ni ekɛ lɛ abote gbalashihilɛ mli, shi eemɛ ni abaptisi lɛ dani efee nakai lɛ.

Bei pii lɛ, mɔ aŋkro ko kɛ be fioo ko pɛ hiɔ shi akɛ shiɛlɔ ni abaptisiko lɛ, dani eyaa ehiɛ kɛyashɛɔ baptisimɔ he. No hewɔ lɛ nilee yɛ ŋaawoo ni yɔɔ yiteŋgbɛ akɛ abote gbalashihilɛ mli yɛ Nuŋtsɔ lɛ mli lɛ mli. Shi, kɛ́ mɔ ko eshɛ gbalashihilɛ mlibotemɔ, atsɔse lɛ yɛ Kristofoi aweku mli, eji mɔ ko ni yɔɔ ekãa yɛ asafo lɛ mli afii babaoo, ni esɔmɔɔ akɛ shiɛlɔ ni abaptisiko lɛ hu? Ojogbaŋŋ, mɛni ji nɔ ni tsĩɔ enaa koni ekajɔɔ ewala nɔ eha Yehowa? Mɛni hewɔ eshashaoɔ shi? Ani eyiŋ feɔ lɛ kɔshikɔshi? Yɛ be mli ni ejeee mɔ ni heee yeee lɛ, anyɛŋ awie ehe akɛ ‘eyɛ Nuŋtsɔ lɛ mli.’

Ŋaawoo ni Paulo kɛha yɛ gbalashihilɛ he lɛ yɛ kɛha wɔsɛɛnamɔ. (Yesaia 48:17) Beni mɛi enyɔ ni taoɔ amɛbote gbalashihilɛ mli lɛ fɛɛ ejɔɔ amɛhe nɔ amɛha Yehowa lɛ, amɛhe ni amɛaatuu amɛha amɛhe yɛ gbalashihilɛ mli lɛ yɛ mumɔŋ shishitoo kpakpa. Amɛnáa sui kɛ otii kometoo lɛ nɔŋŋ. Enɛ haa anáa gbalashihilɛ ni miishɛɛ yɔɔ mli. Kɛfata he lɛ, kɛ́ mɔ ko ‘bote gbalashihilɛ mli yɛ Nuŋtsɔ lɛ mli’ lɛ, ekɛ no tsɔɔ anɔkwa ni eyeɔ Yehowa ni no haa anáa naanɔ jɔɔmɔi, ejaakɛ “mɔ ni yeɔ anɔkwa lɛ, [Yehowa] kɛ lɛ baaye yɛ anɔkwayeli mli.”—Lala 18:25, NW.

[Shishigbɛ niŋmaa]

[Mfoniri ni yɔɔ baafa 31]

“Mɔ ni yeɔ anɔkwa lɛ, [Yehowa] kɛ lɛ baaye yɛ anɔkwayeli mli”