Ani Ooonyɛ Osumɔ Onaanyo Ni Oshɛre Sigaret

JEEE akɛ gbɔmɛi ni shɛrɛɔ sigaret lɛ woɔ kɔɔyɔɔ ni esa akɛ mɛi krokomɛi amu lɛ mli muji kɛkɛ, shi moŋ amɛyeɔ amɛ diɛŋtsɛ amɛ gbɔmɔtsoŋ hewalɛnamɔ awui. Kɛ amɛkpa shɛremɔ lɛ amɛhe baawa amɛ, ni amɛbaabaa shika babaoo yi ni amɛfiteŋ kɔɔyɔŋ kɛtsɔ shika ni amɛaafite aafee ¢1,925 afi kɛha sigaret shɛremɔ pɛ. No hewɔ lɛ gbɛ ni hi ni esa akɛ sigaret shɛrelɔ lɛ atsɔ nɔ pɛ ji ni ekpa shɛremɔ.

Susumɔ bɔni lasu ni faa kpo kɛjɛɔ sigaret nɛɛ naabu lɛ woɔ kɔɔyɔŋ muji ehaa lɛ he. Ebɔɔ yɛ mli kwraa po fe lasu ni shɛrelɔ lɛ gbalaa kɛwoɔ emli lɛ. Lasu ni faa yɛ sigaret lɛ naabu lɛ hiɛ tar kɛ nicotine ni yeɔ gbɔmɔtso la awui lɛ aaafee toi enyɔ fe nɔ ni agbalaa awoɔ gbɔmɔtso lɛ mli lɛ, kɛ carbon monoxide ni ji kɔɔyɔɔ ko ni ebɔɔ eyi mli obɔ kɛ ammonia ni ji kɔɔyɔɔ fɔŋ kroko toi 50 fe nɔ ni agbalaa awoɔ mli lɛ ni atsiii ebɔɔ krokomɛi po ta.

Kɛ ata kar mli ni aŋamɔ eshinaai lɛ ni ashɛre sigaret kome komei nyɔŋma lɛ, lasu ni faa kpo kɛjɛɔ mli lɛ fa kwraa fe nɔ ni U.S. Amerika kuu ni kwɛɔ kɔɔyɔŋ mujiwoo nɔ lɛ ŋmɛɔ gbɛ. New York Times lɛ tsɔɔ mli akɛ yɛ hiɛtserɛjiemɔ ko ni afee yɛ kpo ko nɔ lɛ ebɔɔ ni fa kpo kɛjɛ sigaret ni ashɛre yɛ jɛmɛ lɛ lasu mli lɛ fa fe nɔ ni U.S. Amerika kuu ni kwɛɔ kɔɔyɔŋ mujiwoo nɔ lɛ ŋmɛɔ gbɛ lɛ nɔ toi 40. Ni taakɛ bɔni atsɔɔ mli lɛ, awui ni nɛkɛ lasu nɛɛ yeɔ mɛi ni shɛreee sigaret lɛ eko lɛ ji nɔ ko ni ka shi yɛ faŋŋ mli ni ŋwanejee ko kwraa bɛ he.

Ani Ekɛ Naanyo Suɔmɔ Kpaa Gbee?

Biblia lɛ kɛɔ akɛ “mla lɛ mli otu” ji “suɔmɔ onaanyo tamɔ bɔni osumɔɔ bo diɛŋtsɛ ohe,” ni ekɛ enɛ miima bɔni mla nɛɛ he hiaa ha lɛ nɔ mi. (Yak. 2:⁠8) Ani eji naanyo suɔmɔ kpojiemɔ akɛ oooje gbɛ oshɛrɛ jwɛi oshwie eshikpɔŋ nɔ aloo ni ooofɛ lajɔ̃ oshwie ehiɛ? Obaakɛɛ akɛ, “Dabi!” Ani enɛ ni okɛaafee onaanyo lɛ aaafee esha lo?

Nɔ ni esha ji lɛ mlitsɔɔmɔ yeɔ ebuaa wɔ beni afee ni wɔha nɛkɛ sanebimɔ nɛɛ hetoo. “Esha ji mla lɛ mlikuu”​—Nyɔŋmɔ mla​—no ji nɔ ni Biblia lɛ kɛɔ. (1 Yoh. 3:​4, Today’s English Version) No hewɔ lɛ ni ooojɛ osuɔmɔ mli ofee nɔ ko ni asumɔɔɔ tamɔ lajɔ̃ ni ooofɛ̃ oshwie onaanyo hiɛ aloo jwɛi ni oooloo oshwie eshikpɔŋ nɔ lɛ baafee esha. Ebaafee “mla Iɛ mli otu” ni kɛɔ akɛ “Suɔmɔ onaanyo taakɛ bɔni osumɔɔ bo diɛŋtsɛ ohe lɛ” mlikuu.

Shi te enɛ kɔɔ sigaret loo tawa shɛremɔ he ehaa tɛɛŋ? Dr Isaac Asimov kɛ hewalɛ tsɔɔ bɔni enɛ yɔɔ lɛ mli faŋŋ yɛ sane ko ni eŋma yɛ Cancer News lɛ mli. Ekɛɛ akɛ, “Kɛji akɛ mɔ ko shɛre sigaret yɛ mihiɛ lɛ, efɔŋ ni efeɔ lɛ jeee nɔ ni kɔɔ lɛ diɛŋtsɛ ekome pɛ he. Efɔŋ ni efeɔ lɛ boteɔ miflufla kɛ milá mli. Efã lɛ bafeɔ mifũ ni ekaa mihe. Ni ehaa mibɛŋkɛɔ tsuihela kɛ flufla mli fala ni mana he.”

Yɛ hetoo ni mɛi ni Shɛreɔ sigaret lɛ aaaha akɛ amɛyɛ hegbɛ kɛ heyeli akɛ amɛshɛreɔ yɛ he fɛɛ he lɛ, Dr. Asimov kɛɛ akɛ: “Kɛji akɛ enu he akɛ esa ni eshɛre ni akɛni miite shi miiwo lɛ hewɔ lɛ miitsi lɛ enɛ mli heyeli ni eyɔɔ lɛ gbɛ lɛ, belɛ esa akɛ enu he ehami kɛji akɛ mishi lɛ ŋtia yɛ emlishi, ni kɛ ete shi ewo enɛ lɛ belɛ ani jeee miheyeli lɛ eshɔ̃ɔ yɛ midɛŋ lɛ? No hewɔ lɛ nyɛhaa wɔtsɔɔa mli yɛ nɛkɛ gbɛ nɔ: Oheyeli yɛ eshɛremɔ mli lɛ baa naagbee yɛ heni miflufla jeɔ shishi yɛ lɛ.”

Sanebimɔ ko kwraa bɛ he, ni ooshi mɔ ko mlishi ŋtia, ooofɛ̃ lajɔ̃ oshwie ehiɛ aloo oooshɛrɛ jwɛi oshwie eshikpɔŋ nɔ lɛ kɛ naanyo suɔmɔ kpaaa gbee. Ni nakai nɔŋŋ hu ji sigaret shɛremɔ. Eetɔ̃ hegbɛi krokomɛi ni mɛi yɔɔ lɛ hu nɔ​—eeye amɛ awui moŋ fe ni eeesumɔ amɛ. Hɛɛ, sigaret shɛremɔ lɛ esha ni.

Shi kɛlɛ, mɔ ni shɛreɔ lɛ aaatsɔɔ mli akɛ: “Miyoo akɛ sigaret shɛremɔ baanyɛ aye awui. No hewɔ ni mishɛreee yɛ mɛi ateŋ lɛ.” No hewɔ lɛ kɛji akɛ mɔ ko shɛre yɛ teemɔŋ lɛ eji esha lo? Eyeee mɔ ko awui.

Sigaret Shɛremɔ Yɛ Teemɔŋ Ji Esha?

Shi susumɔ enɛ he: Enɛ saa mɔ ni shɛrɛɔ lɛ wala he yɛ gbɛ fɔŋ nɔ. Ni nɔmɔ ji wala jɛɛhe? Biblia lɛ haa hetoo akɛ: “Ejaakɛ bo [Yehowa Nyɔŋmɔ] oŋɔɔ wala nubu yɔɔ.” “Lɛ moŋ edɛŋ wala kɛ mumɔ kɛ nii fɛɛ jɛɔ haa gbɔmɛi fɛɛ.” (Lala 36:​10; Bɔf. 17:25) Hɛɛ, wɔwala lɛ eji nikeenii ni yɔɔ naakpɛɛ ni jɛ Nyɔŋmɔ ŋɔɔ.

Mɛɛ gbɛ nɔ wɔtsɔɔ wɔjieɔ hiɛsɔɔ kpo yɛ wala ni ji Nyɔŋmɔ nikeenii nɛɛ he”? Kɛtsɔ ni wɔɔfee nɔ ni aaakpata wɔhiɛ lɛ nɔ? Dabi! Ni wɔɔɔjɛ wɔsuɔmɔ mli wɔfee nakai lɛ baafee tɔmɔ. Obaanyɛ odamɔ enɛ nɔ osusu sane ko ni Joseph Califano, tsutsu U.S. Amerika Gbɔmɔtsoŋ Hewalɛnamɔ, Tsɔsemɔ kɛ Nɔyaa he Woloŋmalɔ-nukpa lɛ wie lɛ he: “Ŋwanejeei ko kwraa bɛ he akɛ ŋmɛnɛ, sigaret shɛremɔ ji mɔ-he-gbee fiofio yɛ anɔkwale mli.”

Ni aaaje gbɛ akpata adesa wala hiɛ lɛ ejaaa​—eji esha. Biblia lɛ faa Kristofoi akɛ esaaa akɛ amɛwoɔ amɛgbɔmɔtsei amli muji. Ewoɔ hewalɛ akɛ: “Nyɛhaa wɔtsuuɔ wɔhe kɛjɛ heloo kɛ mumɔ fɛɛ he muji mli.” (2 Kor. 7:⁠1) Kɛji akɛ sigaret shɛrelɔ lɛ baabo nɛkɛ famɔ nɛɛ toi lɛ, belɛ esa akɛ etsi ehe kɛjɛ tawa shɛremɔ su lɛ he, ejaakɛ ewoɔ mɔ he muji. Ewoɔ sigaret shɛrelɔ lɛ waobii, enyanyɔji, emumɔ, etadei​—nɔ fɛɛ nɔ ni bɛŋkɛɔ enɛ he muji.

Shi kɛji akɛ sigaret shɛrelɔ lɛ miisumɔ ni ekpa, shi ekɛ ehe ewo mli vii bɔni agbɛnɛ enyɛɛɛ efee lɛ no hu? Ani Nyɔŋmɔ kɛ mlihilɛ aaanu lɛ shishi, akɛni Yesu Kristo kɛɛ akɛ, ‘Mumɔ lɛ miisumɔ shi heloo lɛ yɛ mlɛo’ lɛ?​—Mat. 26:⁠41.

Aŋmɛɔ Gbɛ Yɛ Enɛ Mli Gbɔjɔmɔ Hewɔ?

Sanebimɔ ko bɛ enɛ he, ní aaakpa shɛremɔ lɛ baanyɛ afee nɔ ko ni wa. Mɛi ni kɛ amɛhe ewo enɛ mli lɛ ekɛɛ akɛ, “Wee shɛremɔ kpamɔ waaa tamɔ sigaret. Haomɔ ni baa yɛ tawa shɛremɔ kpamɔ mli lɛ sɛɛ tsɛɔ. Wolo tɛtrɛɛ ni atsɛɔ lɛ Science 80 lɛ kɛɛ akɛ, “kɛ hoo kwraa lɛ akɔnɔ nɛɛ hiɔ shi aaafee nyɔŋ kome, ni nɛkɛ akɔnɔ nɛɛ hiɔ shi kɛjɛɔ afii enumɔ kɛyashiɔ nɛɛhu yɛ be mli ni amɛkpa lɛ sɛɛ yɛ mɛi oha mlijaa enumɔ mli.”

Enɛ yeɔ ebuaa wɔ ni wɔnaa nɔ hewɔ ni mɛi komɛi kpaa shɛremɔ be ko kɛkɛ lɛ amɛje shishi ekoŋŋ lɛ. Shɛrelɔi nɛɛ ateŋ nɛɛhu yɛ 10 fɛɛ mli baasumɔ ni amɛkpa Shi ni amɛaakpa kwraa lɛ ji daa gbi tawuu ni yɛ bei komɛi amli lɛ ehiɔ shi nakai afii pii. Akpekpei babaoo eye omanye yɛ tawuu nɛɛ mli. Akpekpei nyɔŋmanyɔŋmai abɔ ewuu shi amɛyeee omanye. Kɛji akɛ mɔ ko ebɔ mɔdɛŋ akɛ eeekpa ni enyɛɛɛ efee nakai lɛ, ani jwɛŋmɔ yɛ mli akɛ eeekɛɛ akɛ Nyɔŋmɔ baanu shishi ni ekɛ efãtɔɔi lɛ ake lɛ?

Naagba lɛ shishifa ji akɛ mɔ lɛ nyãa shɛremɔ lɛ he. Shi enyɛŋ ekɛ enɛ ajie enaa yɛ be mli ni Nyɔŋmɔ teɔ shi woɔ enɛ lɛ. Biblia lɛ kɛɔ akɛ, ni Mose, ni “eeeye esha mli ŋɔɔmɔ be fioo ko lɛ,” ekɛ nilee hala akɛ eeesɔmɔ Nyɔŋmɔ moŋ. (Heb. 11:​24-26) Nyɔŋmɔ miikpa gbɛ akɛ etsuji lɛ baawu ashi nibii ni tamɔ nɛkɛ ni amɛtsɔ eyelikɛbuamɔ nɔ amɛye nifeemɔi ni teɔ shi woɔ emla lɛ anɔ kunim.

Akɛ nɔkwɛmɔ nɔ lɛ, susumɔ ajwamaŋbɔɔ he. Eji nifeemɔ ko ni tamɔ nɔ ni eŋɔɔ yɛ be ko mli. Ni kɛji akɛ mɔ ko kɛ ehe wo mli lɛ, ekɔnɔ akɛ ekɛ mɛi sɔrɔtoi aaana bɔlɛ lɛ mli baawa tamɔ sigaret nɔŋŋ. Shi ajwamaŋbɔɔ ji Nyɔŋmɔ mla mlikuu, ni mɛi ni jɛɔ amɛsuɔmɔ mli amɛkɛ amɛhe woɔ ajwamaŋbɔɔ mli ni amɛtsakeee lɛ anine shɛŋ Nyɔŋmɔ nikeenii ni ji naanɔ wala nɔ. Nakai nɔŋŋ ji mɛi ni yaa nɔ amɛshɛreɔ sigaret.​—Heb. 13:4; Rom. 6:⁠23.

Ebiɔ mɔdɛŋbɔɔ diɛŋtsɛ dani mɔ ko afee toiboo aha Nyɔŋmɔ mlai. Enɛ ji anɔkwale hu yɛ Nyɔŋmɔ Bi, Yesu Kristo he. Ena amanehulu babaoo diɛŋtsɛ, yɛ naagbee lɛ egbo gbele ni yɔɔ nyaŋemɔ shi ehi shi akɛ anɔkwafo eha Nyɔŋmɔ. Kɛha mɛi komɛi lɛ piimɔ ni mɛi tsɔ mli dani amɛnyɛ amɛkpa sigaret shɛremɔ Iɛ baatamɔ amanehulu ni Kristo tsɔ mli lɛ.’ Shi kɛlɛ abaanyɛ aye tawa shɛremɔ su lɛ nɔ kunim. Yɛ mɛɛ gbɛ nɔ?