Omli Afili Bo yɛ Yehowa Mli!
“Nyɛmii ashɛa yɛ Nuŋtsɔ lɛ mli daa! Misaa miikɛɛ: Nyɛmii ashɛa!”—FILIPIBII 4:4.
1. Mɛni hewɔ ekolɛ wɔɔsusu nɔ ni Paulo tsɔɔ beni ewie akɛ esa akɛ Kristofoi amii ashɛ amɛhe daa lɛ he lɛ?
GBII etɛ nɛɛ, yiŋtoi ni haa anaa miishɛɛ lɛ faaa kwraa dɔŋŋ. Gbɔmɛi ni akɛ sũ fee amɛ, anɔkwa Kristofoi po, kɛ shihilɛi kpeɔ ni ekɛ awerɛho baa—nitsumɔ ni anaaa, hela, kɛ suɔlɔi agbele, mɔ teemɔŋ naagbai, aloo shitee-kɛ-woo ni jɛɔ weku mlibii ni heee yeee loo tsutsu nanemɛi aŋɔɔ kɛbaa. No hewɔ lɛ, te esa akɛ wɔnu Paulo ŋaawoo ni ekɛha akɛ, “Nyɛmii ashɛa” lɛ shishi wɔha tɛŋŋ? Yɛ shihilɛi ni yɔɔ dɔlɛ ni kaa mɔ hu, ni esa akɛ wɔteŋ mɔ fɛɛ mɔ kɛkpe lɛ hewɔ lɛ, ani wɔɔnyɛ wɔfee po? Nakai wiemɔi lɛ amli sane lɛ hesusumɔ baaye abua ni wɔnu sane lɛ shishi jogbaŋŋ.
Wɔmii Ashɛ—Mɛni Hewɔ, ni Yɛ Mɛɛ Gbɛ Nɔ?
2, 3. Te miishɛɛ he hiaa ha tɛŋŋ, taakɛ afee he mfoniri yɛ Yesu kɛ blema Israelbii lɛ ashihilɛ mli lɛ?
2 “Nyɛmii ashɛa yɛ Nuŋtsɔ lɛ mli daa! Misaa miikɛɛ: Nyɛmii ashɛa!” Ekolɛ enɛ baaha wɔkai wiemɔi ni akɛ Israelbii lɛ wie aaafee afii ohai 24 ni eho nɛ lɛ, akɛ: “Yehowa he nyamɔ lɛ ji nyɛ hewalɛ,” aloo taakɛ Moffatt shishitsɔɔmɔ lɛ eŋma lɛ: “Naanɔ Mɔ lɛ mli miishɛɛnamɔ lɛ ji nyɛ hewalɛ.” (Nehemia 8:10) Miishɛɛnamɔ haa mɔ hewalɛ, ni etamɔ abobaa he ni mɔ baanyɛ aya kɛha miishɛjemɔ kɛ hebuu. Miishɛɛ na gbɛfaŋnɔ titri ko kɛye ebua Yesu ní eye emuu lɛ po ni enyɛ eŋmɛ etsui shi. “Mɔ ni nyamɔ ni ka ehiɛ lɛ hewɔ lɛ, emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ní ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ.” (Hebribii 12:2) Eyɛ faŋŋ akɛ, ní aaanyɛ ana miishɛɛ yɛ be mli ni akɛ naagbai miikpe lɛ he miihia kɛha yiwalaheremɔ.
3 Dani amɛaabote Shiwoo Shikpɔŋ lɛ nɔ lɛ, no mli lɛ awo Israelbii lɛ kita akɛ: “Onya nii kpakpai fɛɛ ni Yehowa, o-Nyɔŋmɔ lɛ, eha bo kɛ owe lɛ he, bo kɛ Levinyo kɛ gbɔ ni kɛo yɔɔ lɛ.” Toigbalamɔ ni baajɛ Yehowa ni asɔmɔɔɔ lɛ kɛ miishɛɛ lɛ mli aba lɛ naa baawa waa. “Nɛkɛ loomɔi nɛɛ fɛɛ aaaba onɔ, ni amɛaanyiɛ osɛɛ ni amɛaaninao kɛyashi beyinɔ ni ohiɛ aaakpata, . . . ejaakɛ okɛ miishɛɛ kɛ tsuijurɔ sɔmɔɔɔ Yehowa, o-Nyɔŋmɔ lɛ, yɛ nii ni ehao babaoo lɛ hewɔ.”—5 Mose 26:11; 28:45-47.
4. Mɛni hewɔ ekolɛ wɔnaŋ miishɛɛ lɛ?
4 No hewɔ lɛ, ehe hiaa ni shwɛɛnii ni afɔ amɛ mu, ni yɔɔ ŋmɛnɛ lɛ kɛ amɛhefatalɔi “tooi krokomɛi” lɛ amii ashɛ amɛhe! (Yohane 10:16) Paulo tsɔ eŋaawoo ni etĩ mli ekoŋŋ akɛ, “misaa miikɛɛ” lɛ nɔ ema bɔ ni ehe hiaa ni wɔna miishɛɛ yɛ nibii kpakpai fɛɛ ni Yehowa efee kɛha wɔ lɛ he lɛ nɔ mi. Ani wɔfeɔ nakai? Aloo ani wɔkɛ wɔhe woɔ wɔ daa gbi shihilɛ mli nifeemɔi amli aahu akɛ bei komɛi lɛ, wɔhiɛ kpaa yiŋtoi kpakpai babaoo ni wɔyɔɔ ni wɔɔdamɔ nɔ wɔmii ashɛ wɔhe lɛ anɔ? Ani naagbai lɛ kwɔɔ gojoo aahu akɛ etsiɔ wɔhiɛ ni wɔnaaa Maŋtsɛyeli lɛ kɛ jɔɔmɔi ni ekɛbaaba lɛ kwraa dɔŋŋ? Ani wɔŋmɛɔ gbɛ ni nibii krokomɛi—Nyɔŋmɔ mlai anɔ toigbele, kɛ wɔhiɛ ni wɔkuɔ wɔfɔɔ ŋwɛi shishitoo mlai anɔ, loo Kristofoi agbɛnaa nii ni wɔkuɔ wɔhiɛ wɔshwieɔ nɔ lɛ—heɔ wɔmiishɛɛ lɛ yɛ wɔdɛŋ?
5. Mɛni hewɔ ewaa kɛhaa mɔ ko ni bɛ hiɛshikamɔ lɛ akɛ eeena miishɛɛ lɛ?
5 “Nyɛmlijɔlɛ lɛ nyɛhaa gbɔmɛi fɛɛ alea! Nuŋtsɔ lɛ ebɛŋkɛ.” (Filipibii 4:5) Gbɔmɔ ni bɛ mlijɔlɛ lɛ bɛ pɛpɛɛpɛ-ŋmɛɛ hu. Ekolɛ ekwɛɛɛ egbɔmɔtsoŋ hewalɛnamɔ nɔ jogbaŋŋ, ni enyɛɔ egbɔmɔtso nɔ ewoɔ nɔnyɛɛ kɛ yeyeeye-feemɔ ni he ehiaaa shishi. Ekolɛ ekaseko bɔ ni sa akɛ ekpɛlɛ egbɔjɔmɔi lɛ anɔ eha, koni ehi shi yɛ naa pɛpɛɛpɛ. Ekolɛ ekɛ otii ni nɔ kwɔlɔ tsɔ mamɔɔ ehiɛ, ni ebɔɔ mɔdɛŋ akɛ eeeshɛ he, ní nɔ ni baajɛ mli aba lɛ kɔɔɔ he eko. Aloo ekolɛ ekɛ egbɔjɔmɔi lɛ baafee naajiemɔ ni ekɛgbɔjɔ enitsumɔ mli aloo etsuuu nii kɛ ekaaa dɔŋŋ tamɔ tsutsu lɛ. Akɛni eŋmɛɛɛ pɛpɛɛpɛ ni ebɛ mlijɔlɛ hu hewɔ lɛ, ewaa ehaa lɛ akɛ eeena miishɛɛ.
6. (a) Mɛni esa akɛ nanemɛi Kristofoi ana yɛ wɔmli, ni mɛɛ be mli pɛ enɛ baaba lɛ nakai? (b) Paulo wiemɔi ni yɔɔ 2 Korintobii 1:24 kɛ Romabii 14:4 lɛ yeɔ ebuaa wɔ ni wɔnaa hiɛshikamɔ yɛ mɛɛ gbɛ nɔ?
6 Kɛji shitee-kɛ-wolɔi naa wɔ akɛ mɛi ni eye nifeemɔ ko he sɛkɛ po lɛ, esa akɛ nanemɛi Kristofoi anyɛ ana wɔ hiɛshikamɔ lɛ. Ni kɛ wɔŋmɛɔ pɛpɛɛpɛ, ni wɔkpaaa emuuyeli gbɛ kɛjɛɛɛ wɔ diɛŋtsɛ wɔhe aloo kɛjɛɛɛ mɛi krokomɛi aŋɔɔ lɛ, no lɛ amɛbaana wɔ nakai. Nɔ ni fe fɛɛ lɛ, esa akɛ wɔtsi wɔhe kɛjɛ jatsui ni fe nɔ ni Nyɔŋmɔ Wiemɔ lɛ biɔ, ni wɔkɛaafɔ mɛi anɔ lɛ he. Bɔfo Paulo kɛɛ: “Jeee akɛ nyɛ hemɔkɛyeli lɛ nyɔŋ wɔyeɔ, shi moŋ nyɛ miishɛɛ lɛ he nitsumɔ hefatalɔi ji wɔ.” (2 Korintobii 1:24) Akɛ tsutsu Farisinyo lɛ, Paulo le jogbaŋŋ akɛ mlai ni yɔɔ kpɛŋŋ, ni mɛi ni yɔɔ gbɛhei amli lɛ woɔ lɛ fiteɔ miishɛɛ, yɛ be mli ni ŋaawoi ni yeɔ buaa, ni nanemɛi nitsulɔi kɛhaa lɛ haa efaa babaoo. Esa akɛ anɔkwale ni eji akɛ “Nuŋtsɔ lɛ ebɛŋkɛ” lɛ akai gbɔmɔ ni hiɛ ka shi lɛ akɛ esaaa akɛ ‘wɔkojoɔ mɔ kroko wenuu. Lɛ diɛŋtsɛ enuŋtsɔ edamɔɔ shi loo egbeɔ shi ehaa.’—Romabii 14:4.
7, 8. Mɛni hewɔ esa akɛ Kristofoi akpa gbɛ akɛ amɛaana naagbai lɛ, ni kɛlɛ, amɛbaanyɛ amɛya nɔ amɛna miishɛɛ lolo yɛ mɛɛ gbɛ nɔ?
7 “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ.” (Filipibii 4:6) Ŋmɛnɛ, wɔkɛ “jaramɔ bei” ni Paulo ŋma he sane efɔ shi lɛ miikpe. (2 Timoteo 3:1-5) No hewɔ lɛ esa akɛ Kristofoi akpa gbɛ akɛ amɛkɛ naagbai baakpe. Paulo wiemɔi ni ewie akɛ “nyɛmii ashɛa” lɛ ejieee nyɛmɔ ni eeenyɛ eba akɛ Kristofoi anɔkwafoi kɛ hiɛnɔkamɔ ni tãa kwraa aloo nijiaŋwujee shihilɛ baakpe yɛ bei komɛi amli lɛ kɛjɛɛɛ sane lɛ mli. Yɛ Paulo diɛŋtsɛ shihilɛ he lɛ, ekɛ anɔkwayeli kpɛlɛ nɔ akɛ: “Afifiaa wɔ yɛ he fɛɛ he, shi kɛlɛ wɔtsuii esuuu; wɔfeɔ yeyeeye, shi kɛlɛ wɔnijiaŋ ejeko wui; awaa wɔ yi, shi kɛlɛ akwako wɔ; atswiaa wɔ shi, shi kɛlɛ wɔpleneeko.” (2 Korintobii 4:8, 9) Shi kɛlɛ, Kristofonyo miishɛɛ lɛ baa yeyeeye-feemɔ kɛ awerɛhoyeli ni baa yɛ bei kukuoo mli lɛ shi, ni yɛ naagbee lɛ eyeɔ nɔ kwraa. Ehaa mɔ hewalɛ ni he hiaa bɔni afee ni akã he aya hiɛ, ni hiɛ akaje yiŋtoi babaoo ni yɔɔ kɛha miishɛɛnamɔ lɛ nɔ.
8 Kɛ naagbai te shi lɛ, bɔ fɛɛ bɔ ni amɛji lɛ, Kristofonyo ni yɔɔ miishɛɛ lɛ kpaa Yehowa fai kɛhaa yelikɛbuamɔ kɛtsɔɔ sɔlemɔ nɔ. Eŋmɛɛɛ ehe ehaaa yeyeeye-feemɔ ni tekeɔ nɔ fe nine. Yɛ be mli ni efee nɔ ni lɛ diɛŋtsɛ eeenyɛ ejɛ nilee mli efee ni ekɛna naagba lɛ naa lɛ sɛɛ lɛ, eshiɔ nɔ ni baajɛ mli aba lɛ ewoɔ Yehowa dɛŋ yɛ ninefɔɔ nɛɛ kɛ gbeekpamɔ naa, akɛ: “Shɛ ojatsu lɛ ofɔ Yehowa nɔ, ni lɛ eeehiɛ omli.” Yɛ nakai beaŋ hu nɔŋŋ lɛ, Kristofonyo lɛ yaa nɔ edaa Yehowa shi yɛ ejurɔ fɛɛ ni E-feɔ wɔ lɛ he.—Lala 55:23; kwɛmɔ Mateo 6:25-34 hu.
9. Anɔkwale lɛ he nilee kɛ jwɛŋmɔŋ toiŋjɔlɛ baa yɛ mɛɛ gbɛ nɔ, ni mɛɛ hewalɛ kpakpa enɛ naa yɛ Kristofonyo lɛ nɔ?
9 “Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli.” (Filipibii 4:7) Biblia mli anɔkwale lɛ he nilee haa Kristofonyo lɛ jwɛŋmɔ yeɔ ehe kɛjɛɔ amalei ahe ni eyeɔ ebuaa lɛ ni enaa jwɛŋmɔ mli susumɔ gbɛi kpakpai. (2 Timoteo 1:13) Atsɔɔ enɛ nɔ ayeɔ abuaa lɛ ni etsiɔ ehe kɛjɛɔ su ni ehiii loo su ni nilee bɛ mli, ni baanyɛ afite ekɛ mɛi krokomɛi ateŋ wekukpaa kpakpa lɛ ahe. Yɛ nɔ najiaŋ ni jalɛ sane ni ayeee kɛ efɔŋ feemɔ baaha enijiaŋ aje wui lɛ, ekɛ ehiɛnɔkamɔ woɔ Yehowa mli akɛ lɛ ebaana adesai anaagbai lɛ anaa kɛtsɔ Maŋtsɛyeli lɛ nɔ. Nɛkɛ jwɛŋmɔŋ toiŋjɔlɛ nɛɛ buɔ etsui he, ni ehaa ehenumɔi feɔ krɔŋŋ, ni ekudɔɔ eniiahesusumɔ yɛ jalɛ gbɛ nɔ. Kɛkɛ lɛ, henumɔi ni yɔɔ krɔŋŋ kɛ susumɔi ni ja lɛ hu haa wɔ yiŋtoi babaoo ni wɔɔdamɔ nɔ wɔna miishɛɛ, yɛ naagbai kɛ nɔnyɛɛ ni jeŋ ni efee basabasa nɛɛ kɛbaa lɛ fɛɛ sɛɛ.
10. Abaanyɛ ana anɔkwa miishɛɛ mli ŋɔɔmɔ kɛtsɔ mɛni he wiemɔ loo ehesusumɔ nɔ?
10 “Nɔ ni eshwɛ lɛ, anyɛmimɛi, nii abɔ ni ji anɔkwa, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpai lɛ fɛɛ, kɛ jeŋba kpakpa ko yɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa!” (Filipibii 4:8) Kristofonyo naaa nibii fɔji ahe wiemɔ loo amɛhe susumɔ he miishɛɛ. Enɛ haa hiɛtserɛjiemɔ ni je lɛ kɛhaa lɛ mli babaoo bafeɔ nɔ ni esaaa kwraa. Mɔ ko mɔ ko nyɛŋ aya nɔ ahiɛ Kristofoi amiishɛɛ mli kɛji ekɛ amalei, kɛ wiemɔi ni esaaa, kɛ nibii ni ejaaa gbɛ, ni etsɔɔɔ jeŋba kpakpa, ni awieee he ekpakpa hu, nii ni anyɛɔ, kɛ nii anyaŋeɔ wo etsui kɛ ejwɛŋmɔ mli obɔ. Kɛ wɔɔwie faŋŋ lɛ, mɔ ko mɔ ko bɛ ni baanyɛ ana anɔkwa miishɛɛ kɛtsɔ muji ni ekɛaawo etsui kɛ ejwɛŋmɔ mli lɛ nɔ. Kwɛ bɔ ni etswaa mɔ emaa shi, yɛ Satan jeŋ ni ekpɔtɔ nɛɛ mli akɛ aaale akɛ Kristofoi yɛ nibii kpakpai babaoo ni amɛbaasusu he ni amɛgba he sane hu!
Yiŋtoi Babaoo ni Yɔɔ Kɛha Miishɛɛnamɔ
11. (a) Mɛni esaaa akɛ wɔbuɔ lɛ akɛ ehe ehiaaa, ni mɛni hewɔ esaaa ni wɔfeɔ nakai lɛ? (b) Mɛɛ hewalɛ majimaji ateŋ kpee ko ni atee lɛ na yɛ mɛi ni tee lɛ ateŋ mɔ ko kɛ eŋa nɔ?
11 Kɛ wɔmiiwie yiŋtoi ni wɔyɔɔ kɛha miishɛɛ namɔ lɛ he lɛ, nyɛkahaa wɔhiɛ kpaa wɔ majimaji ateŋ nyɛmifeemɔ lɛ nɔ. (1 Petro 2:17) Yɛ be mli ni je lɛŋ majimaji kɛ hewolo nɔ sui akui lɛ jieɔ nyɛɛ ni mli wa kpo amɛhaa amɛhe lɛ, belɛ Nyɔŋmɔ webii miibɛŋkɛ amɛhe waa yɛ suɔmɔ mli. Amɛ suɔmɔ lɛ he odaseyeli jeɔ kpo yɛ majimaji ateŋ kpeei ashishi titri. Mɔ ko ni jɛ United States etee eko lɛ ŋma yɛ nɔ ni afee yɛ 1993 mli, yɛ Kiev, yɛ Ukraine lɛ he akɛ: “Miishɛɛ yaafonui, hiŋmɛii ni miikwɛ nii faŋŋ, bɔ ni anaa ni mɛi fuafuaa amɛhe tamɔ wekumɛi, kɛ ŋamɔi ni jɛɔ shwɛmɔ he lɛ afã kome kɛyaa afã kroko, ni jɛ kui ni hiɛ akataŋwiai kɛ klaladukui fɛfɛji ni amɛmiifɔ̃fɔ̃i lɛ aŋɔɔ lɛ fee teokrase ekomefeemɔ ni yɔɔ amɛteŋ lɛ he odaseyeli ni anaa faŋŋ. Wɔtsuii yimɔɔ obɔ̃bɔ̃ kɛ mlifilimɔ yɛ nɔ ni Yehowa efee yɛ naakpɛɛ gbɛ nɔ, yɛ jeŋ muu fɛɛ nyɛmifeemɔ lɛ mli lɛ he. Enɛ esa mikɛ miŋa fɛɛ he waa diɛŋtsɛ, ni eha wɔhemɔkɛyeli lɛ esaa ena shishinumɔ hee kroko kwraa kɛfata he.”
12. Yesaia 60:22 baa mli yɛ wɔ diɛŋtsɛ wɔhiŋmɛiiaŋ yɛ mɛɛ gbɛ nɔ?
12 Kwɛ bɔ ni eji hemɔkɛyeli wajemɔ kɛha Kristofoi ŋmɛnɛ akɛ amɛaana Biblia mli gbalɛi ni miiba mli yɛ amɛ diɛŋtsɛ amɛhiŋmɛiiaŋ! Akɛ nɔkwɛmɔ nɔ lɛ, susumɔ Yesaia 60:22 mli wiemɔi lɛ ahe okwɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa. Kɛ shɛ ebe lɛ, mi, Yehowa, maha afee oya!” Beni afɔ Maŋtsɛyeli lɛ yɛ afi 1914 mli lɛ, no mli lɛ mɛi 5,100—mɔ bibioo ko—pɛ shiɛɔ kɛ ekaa. Shi yɛ afii enumɔ ni eho lɛ amli lɛ, jeŋ muu fɛɛ nyɛmifeemɔ lɛ dalɛ lɛ miiya hiɛ waa, kɛ aja mli lɛ, aaafee Odasefoi heei 5,628 ni abaptisiɔ amɛ daa otsi! Yɛ 1993 mli lɛ, ashɛ sɔɔlɔi ayifalɛ ni fe fɛɛ, ni ji 4,709,889 he. Bo diɛŋtsɛ susumɔ he okwɛ! Enɛ tsɔɔ akɛ “mɔ bibioo” ni hi shi yɛ 1914 mli lɛ miihe atsɔ “mɛi akpe” diɛŋtsɛ!
13. (a) Mɛni etee nɔ aahu kɛjɛ 1914 kɛbaa? (b) Te Yehowa Odasefoi yeɔ shishitoo mla ni yɔɔ Paulo wiemɔi ni yɔɔ 2 Korintobii 9:7 mli lɛ nɔ amɛhaa tɛŋŋ?
13 Kɛjɛ 1914 kɛbaa nɛɛ, Mesia Maŋtsɛ lɛ eje kpo ni eeye lumɔ yɛ ehenyɛlɔi ateŋ. Esɛɛnyiɛlɔi ni ji adesai ni jɛɔ amɛsuɔmɔ mli amɛkɛ amɛbe, hewalɛ, kɛ shika haa koni akɛtsu jeŋ muu fɛɛ shiɛmɔ nitsumɔ lɛ kɛ agbɛnɛ majimaji ateŋ tsũi amaamɔ he gbɛjianɔtoi ahe nii ji mɛi ni fiɔ emaŋtsɛyeli lɛ sɛɛ. (Lala 110:2, 3) Yehowa Odasefoi amli filiɔ amɛ akɛ akɛ shika tooyeli haa bɔni afee ni akɛtsu nitsumɔi nɛɛ ahe nii kɛgbe naa, eyɛ mli akɛ afɔɔɔ shika tã tsĩi yɛ amɛkpeei ashishi.a (Okɛto 1 Kronika 29:9 he.) Ehe ehiaaa ni atsirɛ anɔkwa Kristofoi ayisɛɛ dani amɛha nii; amɛbuɔ akɛ eji hegbɛ ni amɛna ni amɛkɛaafi amɛ Maŋtsɛ lɛ sɛɛ kɛyashɛ he ni amɛshihilɛ baaŋmɛ amɛ gbɛ ni amɛfee, mɔ fɛɛ mɔ lɛ, “bɔ ni ekpɛ mli momo yɛ etsui mli, ni [ejɛɛɛ] ŋkɔmɔyeli loo fimɔ mli.”—2 Korintobii 9:7.
14. Mɛɛ shihilɛ ko ni yɔɔ Nyɔŋmɔ webii ateŋ eje kpo faŋŋ kɛjɛ 1919 kɛbaa, ni mɛɛ yiŋtoo ehaa amɛ kɛhaa miishɛɛnamɔ?
14 Nɔ ni ejɛ anɔkwa jamɔ ni agba afɔ shi akɛ abaasaa akɛma shi ekoŋŋ yɛ Nyɔŋmɔ webii ateŋ lɛ mli eba ji mumɔŋ paradeiso shihilɛ ni afee. Kɛjɛ 1919 kɛbaa nɛɛ, etee nɔ elɛɛ ehusui lɛ amli aahu kɛtee hiɛ. (Lala 14:7; Yesaia 52:9, 10) Ni mɛni ejɛ mli eba? Anɔkwa Kristofoi naa “mlifilimɔ kɛ miishɛɛ” mli ŋɔɔmɔ. (Yesaia 51:11) Yibii kpakpai ni ewoɔ lɛ ji odaseyeli ni tsɔɔ nɔ ni Nyɔŋmɔ mumɔ krɔŋkrɔŋ lɛ baanyɛ atsɔ adesai ni yeee emuu lɛ anɔ etsu. Yijiemɔ kɛ woo fɛɛ yaa Yehowa ŋɔɔ, shi mɛɛ hegbɛ kpele yɔɔ, fe ni mɔ ko aaatsɔ Nyɔŋmɔ hefatalɔ nitsulɔ? (1 Korintobii 3:9) Yehowa yɛ hewalɛ bɔ ni sa ni eeenyɛ eha tɛi ajaje anɔkwale lɛ he shɛɛ sane lɛ amɛtsɔɔ, kɛ ehe miihia. Ni kɛlɛ, ehala akɛ ekɛ nɛkɛ gbɛ nɛɛ tsuŋ nii, shi moŋ, ebaakanya bɔɔ nii ni yɔɔ he miishɛɛ, ni ekɛ sũ fee amɛ lɛ koni amɛtsu esuɔmɔnaa nii ahe nii.—Luka 19:40.
15. (a) Mɛɛ ŋmɛnɛŋmɛnɛ beaŋ nifeemɔi komɛi wɔkɛ miishɛɛ kwɛɔ? (b) Mɛɛ nifeemɔ ko wɔkɛ miishɛɛ kpaa lɛ gbɛ?
15 Naakpɛɛ sɔŋŋ ni efeɔ amɛ hewɔ lɛ, amrɔ nɛɛ Yehowa tsuji kwɛɔ nibii ni yaa nɔ yɛ je lɛŋ lɛ, kɛ bɔ ni ekɔɔ Biblia mli gbalɛi ni sa kadimɔ lɛ ahe ehaa. Jeŋmaji lɛ miibɔ mɔdɛŋ waa—akɛ amɛnine aaashɛ toiŋjɔlɛ ni hiɔ shi daa nɔ—shi amɛyeee omanye. Nibii ni yaa nɔ lɛ miinyɛ amɛnɔ ní amɛtsɛ Jeŋmaji Ekomefeemɔ gbɛjianɔtoo lɛ ni eyajaje saji yɛ je lɛŋ hei ni awuɔ tai yɛ lɛ. (Kpojiemɔ 13:15-17) Yɛ nɛkɛ be nɛɛ mli fɛɛ lɛ, Nyɔŋmɔ webii miikwɛ wɔsɛɛ be gbɛ kɛ gbɛkpamɔ ni mli wa waa, kɛha nibii ni yɔɔ miishɛɛ fe eko fɛɛ eko ni eba dã lɛ mlibaa, nɔ ni miibɛŋkɛ kpaakpa daa gbi lɛ. “Nyɛhaa wɔmii ashɛa ni wɔmli afilia wɔ ni wɔwoa ehiɛ nyam, ejaakɛ Toobi lɛ yookpeemɔ lɛ eshɛ, ni eŋa lɛ esaa ehe eto.”—Kpojiemɔ 19:7.
Shiɛmɔ—Ani Eji Jatsu loo Eyɛ Miishɛɛ?
16. Feemɔ bɔ ni nɔ ni Kristofonyo lɛ ekase, shi ekɛtsuuu nii lɛ baanyɛ aha emiishɛɛ alaaje lɛ he nɔkwɛmɔ nɔ.
16 “Nii hu ni nyɛkase ni nyɛmɔ mli ni nyɛnu ni nyɛna yɛ mihe lɛ, nomɛi nɔŋŋ nyɛfea, ni hejɔlɛ Nyɔŋmɔ lɛ kɛ nyɛ aaahi shi.” (Filipibii 4:9) Kɛ Kristofoi kɛ nɔ ni amɛkaseɔ lɛ tsu nii lɛ, amɛbaanyɛ amɛkpa gbɛ akɛ amɛnine baashɛ Nyɔŋmɔ dɛŋ jɔɔmɔ nɔ. Nibii ni he hiaa fe fɛɛ ni amɛkase lɛ ateŋ ekome ji bɔ ni ehe hiaa ni ashiɛ sanekpakpa lɛ atsɔɔ mɛi krokomɛi lɛ. Lɛlɛŋ, namɔ baana jwɛŋmɔŋ toiŋjɔlɛ loo ena miishɛɛ, kɛji etsĩ sane ko naa, ní ehaaa mɛi ni yɔɔ jalɛ tsuii, ni amɛwala diɛŋtsɛ damɔ sane nɛɛ numɔ nɔ lɛ anu?—Ezekiel 3:17-21; 1 Korintobii 9:16; 1 Timoteo 4:16.
17. Mɛni hewɔ esa akɛ wɔshiɛmɔ nitsumɔ lɛ afee miishɛɛ jɛɛhe kɛha wɔ be fɛɛ be lɛ?
17 Kwɛ miishɛɛ ni eji akɛ wɔɔna gbɔmɛi ni tamɔ gwantɛŋi ni miisumɔ ni amɛle Yehowa he nii! Lɛlɛŋ, mɔ ni sɔmɔɔ kɛ henumɔ ni ja lɛ baana be fɛɛ be akɛ Maŋtsɛyeli sɔɔmɔ lɛ feɔ miishɛɛ jɛɛhe diɛŋtsɛ. Nɔ hewɔ ji akɛ, yiŋtoo titri hewɔ ni eji Yehowa Odasefonyo lɛ ji ni ejie E-gbɛi lɛ yi ni ewó E-gbɛhe akɛ Jeŋ Muu Fɛɛ Nɔyelɔ lɛ nɔ gojoo. (1 Kronika 16:31) Mɔ ni yooɔ anɔkwa sane nɛɛ mli baafili lɛ kɛji gbɔmɛi kɛ kwashiafeemɔ kpoo sanekpakpa ni ebaa ekɛbaha amɛ lɛ po. Ele akɛ shiɛmɔ ni ashiɛɔ atsɔɔ mɛi ni heee yeee nɛɛ baaba naagbee gbi ko; Yehowa gbɛi lɛ yijiemɔ baaya nɔ aahu kɛya naanɔ.
18. Mɛni kanyaa Kristofonyo ni efeɔ Yehowa suɔmɔnaa nii?
18 Anɔkwa jamɔ kanyaa mɛi ni tsuɔ he nii lɛ ni amɛfeɔ nibii ni Yehowa taoɔ, jeee akɛni esa akɛ amɛfee hewɔ, shi moŋ akɛni amɛmiisumɔ ni amɛfee lɛ hewɔ. (Lala 40:9; Yohane 4:34) Ewa kɛha mɛi pii akɛ amɛaanu enɛ shishi. Be ko lɛ, obalayoo ko kɛɛ Odasefonyo ko ni ba eŋɔɔ lɛ akɛ: “Ole sane ko, nyɛsa yijiemɔ waa diɛŋtsɛ. Bɔ fɛɛ bɔ ni fee lɛ, mijeŋ kpo akɛ miiya shia kɛ shia ni miyashiɛ mijamɔ lɛ matsɔɔ tamɔ bɔ ni nyɛfeɔ nɛɛ.” Kɛkɛ ni Odasefonyo lɛ kɛ ŋmɔlɔ to he eha lɛ akɛ: “Minuɔ bɔ ni onuɔ he ohaa lɛ shishi jogbaŋŋ. Dani mi hu mibatsɔ Yehowa Odasefonyo lɛ, kulɛ onaŋ mi kɔkɔɔkɔ ni miiya mɛi krokomɛi aŋɔɔ ni mikɛ amɛ ayagba jamɔ he sane. Shi amrɔ nɛɛ miisumɔ ni mafee nakai.” Obalayoo lɛ susu nii ahe fioo kɛkɛ ni emu sane naa akɛ: “Eka shi faŋŋ akɛ ojamɔ lɛ yɛ nɔ ko ni ekɛhaa mɛi, ni minɔ lɛ bɛ eko. Ekolɛ esa akɛ matao mli makwɛ.”
19. Mɛni hewɔ amrɔ nɛɛ ji be ni sa akɛ wɔna miishɛɛ fe bei fɛɛ ni eho lɛ?
19 Afi ŋmalɛ kɛha 1994, ni aŋma lɛ faŋŋ yɛ wɔ Maŋtsɛyeli Asai lɛ anɔ lɛ, kaiɔ wɔ be fɛɛ be akɛ: “Okɛ ohiɛ afɔ Yehowa nɔ kɛ otsui fɛɛ.” (Abɛi 3:5) Ani yiŋtoo ko yɛ ni fe enɛ, ni wɔɔdamɔ nɔ wɔna miishɛɛ, fe ni wɔɔnyɛ wɔkɛ wɔhiɛ afɔ Yehowa, mɔ ni ji wɔbobaahe ni wa, ni wɔyateɔ wɔhe yɛ eŋɔɔ lɛ nɔ? Lala 64:11 lɛ tsɔɔ mli akɛ: “Jalɔ lɛ aaanya yɛ Yehowa mli, ni eeeŋɔ ehiɛ efɔ enɔ.” Jeee be ni agbũgbãa loo ahaa nijiaŋ jeɔ wui nɛ. Nyɔŋ fɛɛ nyɔŋ ni hoɔ eyaa lɛ kɛ wɔ bɛŋkɛɔ nɔ ni Yehowa tsuji ekpa gbɛ aahu akɛ amɛaana kɛjɛ Habel gbii lɛ amli tɔ̃ɔ kɛbaa fɛɛ lɛ mlibaa diɛŋtsɛ he kpaakpa. Amrɔ nɛɛ ji be ni esa akɛ wɔkɛ wɔhe afɔ Yehowa nɔ kɛ wɔtsui fɛɛ, ejaakɛ wɔle akɛ be ko bako ni wɔna yiŋtoi babaoo ni wɔɔdamɔ nɔ wɔna miishɛɛ tamɔ nɛkɛ dã!
[Shishigbɛ niŋmai]
a Akaneɔ akɔntaabuu kuku yɛ kpeei ashishi, kɛ agbɛnɛ hu, shikome yɛ asafoi amli, ni akɛtsɔɔ tooyeli shika ni jɛ suɔmɔ mli ni nine eshɛ nɔ, kɛ agbɛnɛ nibii ni akɛ shika lɛ eko etsu he nii. Yɛ be kɛ bei amli lɛ, akɛ woji majeɔ ni akɛtsɔɔ bɔ ni akɛ shika ni akɛke lɛ tsuɔ nii ahaa. Enɛ hewɔ lɛ atsɔɔ nɛkɛ gbɛ nɔ akaiɔ mɔ fɛɛ mɔ yɛ Yehowa Odasefoi ajeŋ muu fɛɛ nitsumɔ lɛ shika shidaamɔ he.
Te Obaaha Hetoo Tɛŋŋ?
◻ Taakɛ Nehemia 8:10 tsɔɔ lɛ, mɛni hewɔ esa akɛ wɔna miishɛɛ lɛ?
◻ Te 5 Mose 26:11 kɛ 28:45-47 tsɔɔ bɔ ni miishɛɛnamɔ he hiaa ha tɛŋŋ?
◻ Filipibii 4:4-9 yeɔ ebuaa wɔ ni wɔmii ashɛ daa, yɛ mɛɛ gbɛ nɔ?
◻ Mɛɛ yiŋtoo 1994 afi ŋmalɛ lɛ haa wɔ kɛha miishɛɛnamɔ?
[Mfoniri ni yɔɔ baafa 16]
Russia kɛ Germany Odasefoi ena miishɛɛ akɛ amɛfata majimaji ateŋ nyɛmifeemɔ ko he
[Mfoniri ni yɔɔ baafa 17]
Anɔkwale lɛ ni akɛ mɛi krokomɛi gbaa he sane lɛ ji nɔdaamɔ nɔ kɛha miishɛɛnamɔ