Okɛ Ohiɛ Afɔ Yehowa Nɔ Kɛha Miishɛjemɔ

“Tsuishiŋmɛɛ kɛ miishɛjemɔ Nyɔŋmɔ lɛ aha nyɛna jwɛŋmɔ kome yɛ nyɛteŋ tamɔ Kristo Yesu.”—ROMABII 15:5.

 1. Mɛni hewɔ gbi fɛɛ gbi ni hoɔ lɛ kɛ miishɛjemɔ he hiamɔ kpele baa lɛ?

GBI fɛɛ gbi ni hoɔ kɛyaa lɛ kɛ miishɛjemɔ he hiamɔ babaoo baa. Taakɛ Biblia ŋmalɔ ko wie nɔ ni fe afii 1,900 ni eho nɛ lɛ, “bɔɔ nii lɛ fɛɛ kɛ wɔ dɔmɔɔ ŋtsɔi ni amɛkɛ wɔ kɔmɔɔ kɛbashi ŋmɛnɛŋmɛnɛ.” (Romabii 8:22) ‘Ŋtsɔidɔɔmɔ’ kɛ ‘kɔɔmɔ’ lɛ mli ewa waa yɛ wɔbe nɛɛ mli fe bei fɛɛ ni eho. Kɛjɛ Jeŋ Ta I sɛɛ kɛbaa nɛɛ, adesai ena amanehulu kɛ piŋmɔi sɔrɔtoi ni eko nyiɛ ekroko sɛɛ, tamɔ tai, awuiyeli, kɛ adebɔɔ mli osharai ni bei pii lɛ awieɔ akɛ ejɛɔ bɔ ni adesai kwɛɛɛ shikpɔŋ lɛ nɔ jogbaŋŋ lɛ hewɔ.—Kpojiemɔ 11:18.

 2. (a) Namɔ esa akɛ ashwa lɛ fe fɛɛ, yɛ amanehulu ni adesai yɔɔ mli amrɔ nɛɛ hewɔ? (b) Mɛɛ anɔkwa sane ko haa wɔ nɔdaamɔ nɔ kɛha miishɛjemɔ?

² Mɛni hewɔ amanehulu efa babaoo yɛ wɔbe nɛɛ mli lɛ? Beni ewieɔ bɔ ni ashɛ Satan afɔ̃ kɛjɛ ŋwɛi yɛ Maŋtsɛyeli lɛ fɔmɔ sɛɛ yɛ afi 1914 lɛ he lɛ, Biblia lɛ ha hetoo akɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ, ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.” (Kpojiemɔ 12:12) Nakai gbalɛ lɛ mlibaa he odaseyeli ni mli kã shi faŋŋ lɛ tsɔɔ akɛ, wɔshɛ Satan yiwalɛ nɔyeli lɛ naagbee kwraa wɔtã agbɛnɛ. Kwɛ bɔ ni eshɛjeɔ wɔmii akɛ wɔɔle akɛ etsɛŋ ni shikpɔŋ lɛ nɔ shihilɛ baaku sɛɛ atsɔ̃ toiŋjɔlɛ shihilɛ ni hi shi dani Satan nyiɛ wɔ klɛŋklɛŋ fɔlɔi lɛ ahiɛ kɛtee atuatsemɔ mli lɛ ekoŋŋ!

 3. Mɛɛ be kulɛ miishɛjemɔ he ehiaaa adesai?

³ Kɛjɛ shishijee lɛ, adesai a-Bɔlɔ lɛ fee abɔɔ fɛfɛo ko akɛ klɛŋklɛŋ adesai enyɔ lɛ ashia. Eyɛ he ko ni atsɛɔ jɛmɛ akɛ Eden, ni shishi ji “Miishɛɛ” loo “Ŋɔɔmɔ.” (1 Mose 2:8, NW shishigbɛ niŋmaa) Kɛfata he lɛ, Adam kɛ Hawa ná gbɔmɔtsoŋ hewalɛ ni eye emuu mli ŋɔɔmɔ, kɛ gbɛkpamɔ akɛ amɛgboiŋ kɔkɔɔkɔ. Susumɔ nibii babaoo ni kulɛ amɛbaanyɛ amɛha amɛnyɛmɔi aya hiɛ yɛ mli lɛ he okwɛ—trom feemɔ, ŋaa nitsumɔi, tsumaa, lalafoo. Agbɛnɛ hu, susumɔ adebɔɔ mli nibii ni kulɛ amɛbaanyɛ amɛkase he nii beni amɛtsuɔ nitsumɔ ni akɛha amɛ akɛ amɛye shikpɔŋ lɛ nɔ, ni amɛha efee paradeiso lɛ hu he okwɛ. (1 Mose 1:28) Lɛlɛŋ, kulɛ Adam kɛ Hawa shihilɛ baayi obɔ, jeee kɛ ŋtsɔidɔɔmɔ kɛ piŋmɔ, shi moŋ kɛ ŋɔɔmɔ kɛ miishɛɛ. Eyɛ faŋŋ akɛ, kulɛ miishɛjemɔ he ehiaŋ amɛ.

4, 5. (a) Mɛni hewɔ Adam kɛ Hawa yeee toiboo he kaa lɛ mli kunim lɛ? (b) Te fee tɛŋŋ ni miishɛjemɔ he bahia adesai?

⁴ Shi kɛlɛ, nɔ ni ehe hiaa ni Adam kɛ Hawa afee ji ni amɛna suɔmɔ ni mli kwɔ kɛ hiɛsɔɔ kɛha amɛ ŋwɛi Tsɛ ni yɔɔ mlihilɛ lɛ. Kulɛ suɔmɔ ni tamɔ nɛkɛ baatsirɛ amɛ ni amɛbo Nyɔŋmɔ toi yɛ shihilɛi fɛɛ mli. (Okɛto Yohane 14:31 he.) Dɔlɛ sane ji akɛ, wɔ klɛŋklɛŋ fɔlɔi enyɔ lɛ fɛɛ booo Yehowa, amɛ Maŋtsɛ yɛ gbɛ ni ja nɔ lɛ toi. Shi moŋ, amɛŋmɛ gbɛ ni amɛyaje ŋwɛibɔfo ni aba lɛ shi, ni ji Satan Abonsam yiwalɛ nɔyeli shishi. Satan ji mɔ ni ka Hawa ni eha efee esha, ni eyaye tso yibii ni agu amɛ yeli lɛ. Kɛkɛ ni Adam fee esha beni lɛ hu eyaye tso lɛ yibii ni Nyɔŋmɔ ebɔ amɛ kɔkɔ yɛ faŋŋ mli akɛ: “Gbi nɔ ni oooye eko lɛ, gbo ooogbo!” lɛ.—1 Mose 2:17.

⁵ Nɛkɛ gbɛ nɔ eshafeelɔi enyɔ lɛ tsɔ̃ amɛbɔi gboimɔ. Beni ejajeɔ gbele fɔbuu lɛ, Nyɔŋmɔ kɛɛ Adam hu akɛ: “Alomɔ shikpɔŋ sũ yɛ ohewɔ, jaramɔ mli oooye enɔ nii yɛ, owala gbii abɔ fɛɛ. Ni ŋmeei kɛ aŋlɛŋlɛ eeewo ehao, ni ŋã nɔ baai oooye.” (1 Mose 3:17, 18) Enɛ hewɔ lɛ, Adam kɛ Hawa laaje gbɛkpamɔ ni amɛyɔɔ akɛ amɛaafee shikpɔŋ ni asaako nɔ lɛ paradeiso. Akɛni ashwie amɛ kɛjɛ Eden hewɔ lɛ, esa akɛ amɛkɛ amɛhewalɛ atsu nii waa koni amɛna niyenii kɛjɛ shikpɔŋ sũ ni alomɔ lɛ lɛ mli. Amɛshwiei, ni ná nɛkɛ esha, kɛ gbele shihilɛ nɛɛ akɛ gboshinii lɛ, batsɔmɔ mɛi ni miishɛjemɔ he miihia amɛ waa diɛŋtsɛ.—Romabii 5:12.

Aha Miishɛjemɔ he Shiwoo ko Ba Mli

 6. (a) Mɛɛ shiwoo ni shɛjeɔ mɔ mii Nyɔŋmɔ kɛha yɛ adesa shigbeemɔ kɛ esha mlibotemɔ lɛ sɛɛ? (b) Mɛɛ gbalɛ ni kɔɔ miishɛjemɔ he Lamek kɛha?

⁶ Beni Yehowa kojoɔ mɔ ni wo adesai atuatsemɔ lɛ he hewalɛ lɛ, etsɔɔ akɛ eji ‘Nyɔŋmɔ ni kɛ miishɛjemɔ hãa.’ (Romabii 15:5) Efee nakai kɛtsɔ shi ni ewo akɛ ebaatsu “seshi” ni naagbee lɛ, ebaakpɔ̃ Adam shwiei kɛjɛ amanehului ni ejɛ Adam atuatsemɔ lɛ mli kɛba lɛ mli lɛ nɔ. (1 Mose 3:15) Yɛ be ko sɛɛ lɛ, Nyɔŋmɔ kɛ nɛkɛ kpɔmɔ nɛɛ he mfonirii hu hã. Akɛ nɔkwɛmɔ nɔ lɛ, ekɛ mumɔ tsirɛ Lamek, ni ji Adam seshinyo ni kɛ lɛ teŋ jɛkɛ, kɛtsɔ ebinuu Set nɔ lɛ, ni egba yɛ nɔ ni Lamek binuu ko baafee lɛ he akɛ: “Mɔnɛ baashɛje wɔmii yɛ wɔ nitsumɔi kɛ wɔnijiaŋ tɔlɛi lɛ ni jɛ shikpɔŋ lɛ loomɔ ni Yehowa elomɔ lɛ lɛ hewɔ lɛ mli.” (1 Mose 5:29) Yɛ shiwoo nɛɛ kɛ gbeekpamɔ naa lɛ, awo gbekɛ nuu lɛ gbɛi akɛ Noa, ni anuɔ shishi akɛ etsɔɔ “Hejɔɔmɔ” loo “Miishɛjemɔ.”

7, 8. (a) Mɛɛ shihilɛ ha Yehowa shwa ehe waa akɛ ebɔ gbɔmɔ lɛ, ni mɛni E-kpɛ eyiŋ akɛ ebaafee yɛ he? (b) Noa hi shi yɛ egbɛi lɛ shishinumɔ naa yɛ mɛɛ gbɛ nɔ?

⁷ Yɛ nɛkɛ be nɛɛ mli lɛ, Satan miiná sɛɛnyiɛlɔi yɛ ŋwɛibɔfoi lɛ ekomɛi ateŋ. Mɛnɛɛmɛi tsake amɛhe gbɔmɛi ni amɛŋɔ Adam shwiei ni ji yei ni he yɔɔ fɛo waa akɛ ŋamɛi. Nɛkɛ shihilɛ ni jeee adebɔɔ mli nɔ̃ nɛɛ fite adesa shihilɛ kɛtee hiɛ, ni amɛbaná shwiei ni bɛ Nyɔŋmɔ gbeyeishemɔ, ni ji Nephilim, loo ‘mɛi ashitswialɔi,’ ni amɛwo shikpɔŋ lɛ obɔ kɛ yiwalɛ. (1 Mose 6:1, 2, 4, 11; Yuda 6) “Ni Yehowa na akɛ gbɔmɛi anɔ fɔŋ feemɔ fa yɛ shikpɔŋ lɛ nɔ . . . Kɛkɛ ni Yehowa shwa ehe akɛ efee gbɔmɔ yɛ shikpɔŋ lɛ nɔ, ni edɔ lɛ yɛ etsui mli.”—1 Mose 6:5, 6.

⁸ Yehowa to eyiŋ akɛ ebaakpata nakai yiwalɛ je lɛ hiɛ kɛtsɔ jeŋ fɛɛ nu afua nɔ, shi klɛŋklɛŋ lɛ, eha Noa kpɛ adeka koni akɛbaa wala yi. Nɛkɛ gbɛ nɔ atsɔ abaa adesai aweku lɛ kɛ kooloi sɔrɔtoi ayi. Kwɛ bɔ ni Noa kɛ eweku lɛ baanu he akɛ amɛna hejɔlɛ agbɛnɛ, yɛ Nu Afua lɛ sɛɛ, beni amɛjɛɔ adeka lɛ mli kɛbaa shikpɔŋ ni nɔ tse nɔ lɛ! Kwɛ miishɛjemɔ ni eji akɛ amɛaana akɛ ajie shikpɔŋ sũ lɛ loomɔ lɛ kɛjɛ enɔ, ni eha okwaayeli nitsumɔ efee mlɛo kwraa agbɛnɛ! Lɛlɛŋ, Lamek gbalɛ lɛ ba mli anɔkwale, ni Noa hi shi yɛ egbɛi lɛ shishinumɔ naa. (1 Mose 8:21) Ákɛ Nyɔŋmɔ tsulɔ anɔkwafo lɛ, Noa ná gbɛfaŋnɔ titri yɛ ‘miishɛjemɔ’ fioo ni aha adesai ná lɛ mli. Shi kɛlɛ, Nu Afua lɛ kɛ hewalɛ fɔŋ ni Satan kɛ edaimonioi lɛ ná yɛ mɛi anɔ lɛ baaa naagbee, ni adesai miiya nɔ amɛmiidɔmɔ ŋtsɔi yɛ jatsu ni ji esha, hela, kɛ gbele ni kã amɛnɔ lɛ shishi.

Mɔ ko ni Nɔ Kwɔ Fe Noa

 9. Yesu Kristo ebafee yelikɛbualɔ kɛ miishɛjelɔ kɛha adesai ni eshwa amɛhe lɛ yɛ mɛɛ gbɛ nɔ?

⁹ Yɛ naagbee lɛ, yɛ adesai ayinɔsane be ni miihe ashɛ afii 4,000 sɛɛ lɛ, shiwoo Seshi lɛ bashɛ shi. Suɔmɔ kpele ni Yehowa Nyɔŋmɔ yɔɔ kɛha adesai, ni tsirɛ lɛ lɛ hewɔ lɛ, etsu e-Bi koome lɛ kɛba shikpɔŋ nɔ koni ebagbo akɛ kpɔmɔ nɔ kɛha adesai eshafeelɔi. (Yohane 3:16) Yesu Kristo kɛ heyeli kpele haa eshafeelɔi ni etsake amɛtsui, ni naa efɔleshaa gbele lɛ mli hemɔkɛyeli lɛ. Mɛi fɛɛ ni jɔɔ amɛwala nɔ amɛhaa Yehowa, ni amɛbatsɔmɔɔ e-Bi lɛ kaselɔi lɛ, náa hejɔɔmɔ kɛ miishɛjemɔ ni sɛɛ tsɛɔ. (Mateo 11:28-30; 16:24) Yɛ emuu ni amɛyeee lɛ fɛɛ sɛɛ lɛ, amɛnaa miishɛɛ kpele yɛ Nyɔŋmɔ ni amɛsɔmɔɔ lɛ kɛ henilee ni mli tse lɛ mli. Kwɛ miishɛjemɔ ni eji kɛha amɛ akɛ amɛaale akɛ kɛ amɛtee nɔ amɛná Yesu mli hemɔkɛyeli lɛ, akɛ naanɔ wala baawo amɛ nyɔmɔ! (Yohane 3:36; Hebribii 5:9) Kɛji, yɛ gbɔjɔmɔ hewɔ lɛ, amɛfee esha ni yɔɔ hiɛdɔɔ lɛ, no lɛ amɛyɛ yelikɛbualɔ, loo miishɛjelɔ, ni ji Nuntsɔ Yesu Kristo ni atee lɛ shi lɛ. (1 Yohane 2:1, 2) Amɛtsɔɔ esha nɛɛ jajemɔ kɛ Ŋmalɛ mli gbɛi ni amɛtsɔɔ nɔ koni amɛkatsɔmɔ mɛi ni feɔ esha daa lɛ nɔ amɛnaa heyeli, ejaakɛ amɛle akɛ ‘anɔkwafo kɛ jalɔ ji Nyɔŋmɔ, koni ekɛ amɛhe esha lɛ ake amɛ.’—1 Yohane 1:9; 3:6; Abɛi 28:13.

10. Mɛni wɔkaseɔ kɛjɛɔ naakpɛɛ nii ni Yesu fee beni eyɔɔ shikpɔŋ nɔ lɛ mli?

¹⁰ Beni Yesu yɔɔ shikpɔŋ nɔ lɛ, ekɛ hejɔɔmɔ hu ha kɛtsɔ mɛi ni daimonioi yɔɔ amɛmli ni eha amɛye amɛhe, kɛ helai sɔrɔtoi fɛɛ ni etsa, kɛ suɔlɔi ni egboi ni etee amɛ shi kɛba wala mli lɛ nɔ. Lɛlɛŋ, nakai naakpɛɛ nii lɛ ahe ba sɛɛnamɔ yɛ be kukuoo pɛ mli, ejaakɛ sɛɛ mli lɛ, mɛi ni ná nakai jɔɔmɔi lɛ gbɔlɔ ni amɛgboi. Shi kɛlɛ, Yesu kɛ nakai nifeemɔ lɛ tsɔɔ wɔsɛɛ be mli jɔɔmɔi ni baahi shi daa, ni ebaafɔse eshwie adesai fɛɛ anɔ lɛ. Amrɔ nɛɛ eji ŋwɛi Maŋtsɛ ni yɔɔ hewalɛ, ni etsɛŋ ni ebaafee babaoo fe daimonioi lɛ ni eeefamɔ amɛ kɛkɛ. Ekɛ amɛ baafata amɛ hiɛnyiɛlɔ, Satan he kɛwo bu kwɔŋkwɔŋ, ni ji shihilɛ ni amɛnyɛŋ nɔ ko amɛfee dɔŋŋ mli. No sɛɛ lɛ, Kristo Afii Akpe Nɔyeli ni yɔɔ nyam lɛ baaje shishi.—Luka 8:30, 31; Kpojiemɔ 20:1, 2, 6.

11. Mɛni hewɔ Yesu tsɛ ehe akɛ “hejɔɔmɔ gbi lɛ nuntsɔ” lɛ?

¹¹ Yesu wie akɛ “hejɔɔmɔ gbi lɛ nuntsɔ” ji lɛ, ni etsu etsamɔi lɛ pii yɛ Hejɔɔmɔ gbi lɛ nɔ. (Mateo 12:8-13; Luka 13:14-17; Yohane 5:15, 16; 9:14) Mɛni hewɔ efee enɛ? Ojogbaŋŋ, Hejɔɔmɔ gbi lɛ fata Nyɔŋmɔ Mla ni ekɛha Israel lɛ he, ni no hewɔ lɛ ebafee “nii kpakpai ni baaba lɛ asusuma.” (Hebribii 10:1) Otsi lɛ mli gbii ekpaa ni akɛtsuɔ nii lɛ kaiɔ wɔ afii 6,000 ni eho, ni adesai kɛhi nyɔŋyeli mli yɛ Satan yiwalɛ nɔyeli shishi lɛ. Hejɔɔmɔ gbi ni baa yɛ otsi lɛ naagbee lɛ haa wɔkaiɔ hejɔɔmɔ ni shɛjeɔ mɔ mii, ni adesai baana yɛ Noa Kpeteŋkpele, Yesu Kristo Afii Akpe Nɔyeli lɛ shishi lɛ.—Okɛto 2 Petro 3:8 he.

12. Mɛɛ niiashikpamɔi ni shɛjeɔ mɔ mii wɔbaanyɛ wɔkpa gbɛ?

¹² Kwɛ heyeli ni Kristo nɔyeli lɛ shishibii ni yɔɔ shikpɔŋ nɔ lɛ baaná, beni yɛ naagbee lɛ, amɛnaa akɛ amɛye amɛhe kwraa kɛjɛ Satan hewalɛ fɔŋ lɛ shishi lɛ! Miishɛjemɔ babaoo baaba lolo, beni amɛnaa akɛ atsá amɛ gbɔmɔtsoŋ, henumɔŋ, kɛ jwɛŋmɔŋ helai hu fɛɛ lɛ. (Yesaia 65:17) Agbɛnɛ, susumɔ amɛmli ni aaafili amɛ beni amɛjeɔ shishi amɛhereɔ amɛsuɔlɔi ni egboi lɛ atuu kɛjɛɔ gbele mli lɛ hu he okwɛ! Nyɔŋmɔ “aaatsumɔ amɛhiɛaŋ yaafonui fɛɛ” yɛ nɛkɛ gbɛi anɔ. (Kpojiemɔ 21:4) Beni ayaa nɔ akɛ Yesu kpɔmɔ afɔleshaa lɛ mli sɛɛnamɔi lɛ tsuɔ nii fiofio lɛ, Nyɔŋmɔ Maŋtsɛyeli lɛ shishibii ni feɔ toiboo lɛ baaya hiɛ kɛshɛ emuuyeli mli, ni amɛbaaye amɛhe kwraa kɛjɛ nibii fɔji ni jɛ Adam esha lɛ mli kɛba lɛ he. (Kpojiemɔ 22:1-5) No sɛɛ lɛ abaafɛne Satan “be fioo ko.” (Kpojiemɔ 20:3, 7) Akɛ naanɔ wala baawo adesai fɛɛ ni kɛ anɔkwayeli fiɔ Yehowa maŋtsɛyeli ni ja lɛ sɛɛ lɛ nyɔmɔ. Bo diɛŋtsɛ feemɔ miishɛɛ ni anyɛŋ akɛ wiemɔ atsɔɔ mli, kɛ hejɔlɛ ni ji heyeli ni aaana kwraa “kɛjɛ fitemɔ nyɔŋyeli lɛ mli” lɛ he mfoniri okwɛ! Nɛkɛ gbɛ nɔ adesai toibolɔi aaatsɔ ana “Nyɔŋmɔ bii lɛ anunyam heyeli lɛ” mli ŋɔɔmɔ.—Romabii 8:21.

13. Mɛni hewɔ miishɛjemɔ ni Nyɔŋmɔ kɛhaa lɛ he hiaa anɔkwa Kristofoi fɛɛ lɛ?

¹³ Dani enɛ aaaba lɛ, wɔkã he wɔyɛ ŋtsɔidɔɔmɔ kɛ piŋmɔ ni mɛi fɛɛ ni yɔɔ Satan yiwalɛ gbɛjianɔtoo lɛ mli lɛ kɛkpeɔ lɛ shishi lolo. Gbɔmɔtsoŋ helai kɛ henumɔŋ naagbai ni efa babaoo lɛ saa gbɔmɛi sɔrɔtoi fɛɛ ahe, ni anɔkwa Kristofoi hu fata he. (Filipibii 2:25-27; 1 Tesalonikabii 5:14) Kɛfata he lɛ, akɛ Kristofoi lɛ, wɔnaa amanehulu yɛ hefɛoyeli fɔŋ kɛ yiwaa ni Satan kɛshwieɔ wɔnɔ, ákɛ mɛi ni ‘boɔ Nyɔŋmɔ moŋ toi akɛ nɔyelɔ fe gbɔmɛi’ lɛ hewɔ. (Bɔfoi lɛ Asaji 5:29) Enɛ hewɔ lɛ, kɛ wɔɔŋmɛ wɔtsui shi yɛ Nyɔŋmɔ suɔmɔnaa nifeemɔ mli aahu kɛyashi Satan je lɛ naagbee lɛ, no lɛ miishɛjemɔ, yelikɛbuamɔ, kɛ hewalɛ ni E-kɛhaa lɛ he miihia wɔ.

He ni Abaana Miishɛjemɔ Kɛjɛ

14. (a) Mɛɛ shiwoo Yesu kɛha yɛ gbɛkɛ ni tsɔ egbele lɛ hiɛ lɛ? (b) Kɛ wɔɔna miishɛjemɔ ni Nyɔŋmɔ mumɔ krɔŋkrɔŋ lɛ kɛhaa lɛ he sɛɛ kɛmɔ shi lɛ, no lɛ mɛni he hiaa?

¹⁴ Gbi gbɛkɛ ni tsɔ̃ egbele lɛ hiɛ lɛ, Yesu fee lɛ faŋŋ eha ebɔfoi anɔkwafoi lɛ akɛ etsɛŋ ni ebaashi amɛ ni ebaaku esɛɛ kɛya e-Tsɛ lɛ ŋɔɔ. Enɛ gba amɛnaa ni eha amɛye awerɛho. (Yohane 13:33, 36; 14:27-31) Beni ena akɛ miishɛjemɔ babaoo he miihia amɛ lɛ, Yesu wo amɛ shi akɛ: “Mabi Tsɛ lɛ ni eeeha nyɛ miishɛjelɔ kroko koni ekɛ nyɛ ahi shi kɛya naanɔ.” (Yohane 14:16, NW shishigbɛ niŋmaa) Yesu miiwie Nyɔŋmɔ mumɔ krɔŋkrɔŋ, ni afɔse ashwie ekaselɔi lɛ anɔ yɛ eshitee lɛ sɛɛ gbii 50 nɔ lɛ he yɛ biɛ.a Kɛfata nibii krokomɛi ahe lɛ, Nyɔŋmɔ mumɔ lɛ shɛje amɛmii yɛ amɛkaai lɛ amli ni ewo amɛ hewalɛ koni amɛya nɔ amɛfee Nyɔŋmɔ suɔmɔnaa nii. (Bɔfoi lɛ Asaji 4:31) Shi kɛlɛ, esaaa ni abuɔ yelikɛbuamɔ nɛɛ akɛ nɔ ni baa kɛkɛ. Kɛji abaana he sɛɛ kɛmɔ shi lɛ, esa akɛ Kristofonyo fɛɛ Kristofonyo aya nɔ asɔle kɛha yelikɛbuamɔ ni shɛjeɔ mɔ mii, ni Nyɔŋmɔ kɛhaa kɛtsɔɔ emumɔ krɔŋkrɔŋ lɛ nɔ lɛ.—Luka 11:13.

15. Mɛni ji gbɛi komɛi ni Yehowa tsɔɔ nɔ ehaa wɔ miishɛjemɔ?

¹⁵ Gbɛ kroko ni Nyɔŋmɔ tsɔɔ nɔ ekɛ miishɛjemɔ haa ji e-Wiemɔ, Biblia lɛ. Paulo ŋma akɛ: “Nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.” (Romabii 15:4) Enɛ tsɔɔ bɔ ni ehe hiaa ni wɔkase nibii ni aŋmala yɛ Biblia lɛ kɛ Biblia kasemɔ woji amli lɛ ni wɔjwɛŋ nɔ hu. Ehe miihia ni wɔya Kristofoi akpeei, he ni ajɛɔ Nyɔŋmɔ Wiemɔ lɛ mli akɛ miishɛjemɔ wiemɔi haa wɔ yɛ lɛ hu daa. Yiŋtoi titri ni yɔɔ henaabuamɔi nɛɛ asɛɛ lɛ ateŋ ekome ji ni wɔkɛwowoo wɔhe hewalɛ.—Hebribii 10:25.

16. Mɛni esa akɛ nibii ni Nyɔŋmɔ kɛha, ni shɛjeɔ wɔmii lɛ akanya wɔ ni wɔfee?

¹⁶ Paulo wolo ni eŋma eyaha Romabii lɛ yaa nɔ etsɔɔ nibii kpakpai ni wɔnaa kɛjɛɔ nibii ni shɛjeɔ mɔ mii, ni Nyɔŋmɔ kɛha lɛ amli. Paulo ŋma akɛ: “Tsuishiŋmɛɛ kɛ miishɛjemɔ Nyɔŋmɔ lɛ aha nyɛna jwɛŋmɔ kome yɛ nyɛteŋ tamɔ Kristo Yesu; koni nyɛkɛ jwɛŋmɔ kome kɛ naabu kome awo Nyɔŋmɔ kɛ wɔ-Nuntsɔ Yesu Kristo tsɛ lɛ hiɛ nyam.” (Romabii 15:5, 6) Hɛɛ, kɛ wɔkɛ nibii ni shɛjeɔ mɔ mii, ni Nyɔŋmɔ kɛha lɛ fɛɛ tsu nii kɛmɔ shi lɛ, wɔbaatsɔmɔ tamɔ wɔ-Hiɛnyiɛlɔ, Yesu Kristo ni yɔɔ ekãa lɛ babaoo. Enɛ baakanya wɔ ni wɔya nɔ wɔkɛ wɔnaabui atsu nii kɛwo Nyɔŋmɔ hiɛ nyam yɛ wɔ odaseyeli nitsumɔ lɛ mli, yɛ wɔkpeei ashishi, yɛ wɔkɛ wɔnanemɛi heyelilɔi asanegbaai amli, kɛ agbɛnɛ yɛ wɔsɔlemɔi amli.

Yɛ Kaa ni Mli Wa Waa Beaŋ

17. Yehowa shɛje e-Bi lɛ mii yɛ mɛɛ gbɛ nɔ, ni mɛni jɛ mli ba?

¹⁷ Yesu ‘hao waa’ ni ‘ewerɛ ho ehe’ hu yɛ gbɛkɛ ni tsɔ̃ epiŋmɔ gbele lɛ hiɛ lɛ. (Mateo 26:37, 38) No hewɔ lɛ, egbala ehe shi kɛjɛ ekaselɔi lɛ ahe kɛtee sɛɛ fioo ni esɔle eha e-Tsɛ lɛ kɛha yelikɛbuamɔ. “Abo lɛ toi hu, ejaakɛ ebuɔ Nyɔŋmɔ.” (Hebribii 5:7) Biblia lɛ bɔɔ amaniɛ akɛ “bɔfo ko jɛ ŋwɛi bajie ehe kpo etsɔɔ [Yesu], ni ebawo lɛ hewalɛ.” (Luka 22:43) Bɔ ni Yesu kɛ eshitee-kɛ-wolɔi lɛ kpe kɛ ekãa kɛ nuufeemɔ lɛ ji odaseyeli ni tsɔɔ akɛ gbɛ ni Nyɔŋmɔ tsɔ nɔ eshɛje e-Bi lɛ mii lɛ tsu nii jogbaŋŋ kɛmɔ shi.—Yohane 18:3-8, 33-38.

18. (a) Mɛɛ be bafee kaa be titri yɛ bɔfo Paulo shihilɛ mli? (b) Mɛɛ gbɛ nɔ wɔɔtsɔ wɔshɛje onukpai ni tsuɔ nii waa, ni amɛyɔɔ musuŋtsɔlɛ hu lɛ amii?

¹⁸ Bɔfo Paulo hu tsɔ̃ kaai ni mli wa waa bei amli. Akɛ nɔkwɛmɔ nɔ lɛ, nɔ ni kadiɔ esɔɔmɔ nitsumɔ yɛ Efeso lɛ ji “yaafonui pii kɛ kaai ni ba [enɔ] yɛ Yudafoi akawooi lɛ amli.” (Bɔfoi lɛ Asaji 20:17-20) Yɛ naagbee lɛ, beni nyɔŋmɔyoo Artemi sɛɛfilɔi lɛ ha gidigidi-feemɔ ba maŋ lɛ mli yɛ eshiɛmɔ nitsumɔ lɛ hewɔ lɛ, Paulo shi Efeso kɛtee. (Bɔfoi lɛ Asaji 19:23-29; 20:1) Beni Paulo yaa Troia maŋtiase lɛ mli yɛ kooyigbɛ lɛ, nɔ kroko hu gba ejwɛŋmɔ naa waa. Yɛ be ko mli, dani Efeso gidigidi-feemɔ lɛ aaaba lɛ, enine shɛ amaniɛbɔɔ ko ni haoɔ mɔ nɔ. Mligbalamɔ kɛ amanehulu eba asafo hee ni yɔɔ Korinto lɛ mli, ni eŋmɛɔ ajwamaŋbɔɔ gbɛ. No hewɔ lɛ Paulo jɛ Efeso eŋma wolo ni kãmɔ ni mli wa waa yɔɔ mli, kɛ hiɛnɔkamɔ akɛ ebaajaje shihilɛ lɛ. Enɛ jeee nɔ ko ni yɔɔ mlɛo kwraa kɛha lɛ. “Mitsuiŋ amanehulu kɛ fimɔ babaoo mli miŋma nyɛ yɛ,” taakɛ ejie lɛ kpo yɛ sɛɛ mli, yɛ wolo ni ji enyɔ lɛ mli lɛ. (2 Korintobii 2:4) Taakɛ Paulo ji lɛ, ebɛ mlɛo kɛha onukpai ni yɔɔ musuŋtsɔlɛ lɛ akɛ amɛkɛ ŋaawoo ni akɛjajeɔ mɔ kɛ kãmɔ aaaha, ejaakɛ amɛle gbɔjɔmɔi ni amɛ diɛŋtsɛ hu amɛyɔɔ lɛ jogbaŋŋ. (Galatabii 6:1) Belɛ, eba akɛ wɔɔfee mɛi ni shɛjeɔ mɛi ni nyiɛɔ hiɛ yɛ wɔteŋ lɛ amii kɛtsɔ klalo feemɔ ni wɔkɛaakpɛlɛ ŋaawoo ni suɔmɔ yɔɔ mli, ni damɔ Biblia nɔ lɛ nɔ.—Hebribii 13:17.

19. Mɛni hewɔ Paulo fã gbɛ kɛjɛ Troia kɛtee Makedonia lɛ, ni naagbee lɛ, te fee tɛŋŋ ni ena hejɔlɛ?

¹⁹ Beni eyɔɔ Efeso lɛ, jeee akɛ Paulo ŋma wolo eyaha nyɛmimɛi ni yɔɔ Korinto lɛ kɛkɛ, shi moŋ etsu Tito kɛtee koni eyaye ebua amɛ, ni eha lɛ nitsumɔ hu akɛ eku esɛɛ ebakɛɛ lɛ bɔ ni amɛtsuɔ wolo lɛ he nii amɛhaa. Paulo hiɛ kã nɔ akɛ ekɛ Tito baakpe yɛ Troia. Ajɔɔ Paulo yɛ jɛmɛ kɛ hegbɛi kpakpai ni ena ni ekɛfee mɛi kaselɔi. Shi enɛ ejieee eyeyeeye-feemɔ lɛ kɛyaaa ejaakɛ no mli lɛ Tito ebashɛko shi lolo. (2 Korintobii 2:12, 13) No hewɔ lɛ efã gbɛ kɛtee Makedonia, kɛ hiɛnɔkamɔ akɛ ekɛ Tito baakpe yɛ jɛmɛ. Shitee-kɛ-woo ni akɛba esɔɔmɔ nitsumɔ lɛ nɔ lɛ ha Paulo yeyeeye-feemɔ lɛ mli wo wu. “Beni wɔba Makedonia lɛ hu,” taakɛ etsɔɔ mli lɛ, “wɔnaaa wɔ hewojiaŋ dekã kwraa; shi moŋ he fɛɛ he lɛ amane sɔŋŋ wɔnaa: wɔ kponɔgbɛ lɛ nɔmɔi, wɔ mligbɛ lɛ gbeyeishemɔi. Shi Nyɔŋmɔ, mɔ ni shɛjeɔ mɛi ni baa amɛhe shi lɛ amii lɛ, ekɛ Tito baa lɛ shɛje wɔmii.” (2 Korintobii 7:5, 6) Kwɛ hejɔlɛ ni Paulo ná beni naagbee lɛ Tito bashɛ shi ni egba lɛ bɔ ni Korintobii lɛ tsuɔ ewolo lɛ he nii yɛ gbɛ kpakpa nɔ lɛ!

20. (a) Taakɛ eba yɛ Paulo gbɛfaŋ lɛ, mɛni ji gbɛ kroko ni he hiaa ni Yehowa tsɔɔ nɔ ehaa wɔ miishɛjemɔ? (b) Mɛni abaasusu he yɛ nikasemɔ ni nyiɛ sɛɛ lɛ mli?

²⁰ Paulo niiashikpamɔ lɛ shɛjeɔ Nyɔŋmɔ tsuji, ni amɛteŋ mɛi pii kɛ kaai ni haa ‘amɛbaa shi’ loo “enyɛɔ amɛnɔ” lɛ kpeɔ lɛ amii ŋmɛnɛ. (Phillips) Hɛɛ, ‘miishɛjemɔ Nyɔŋmɔ lɛ’ le wɔ hiamɔ nii aŋkroaŋkro, ni ebaanyɛ ekɛ wɔ atsu nii ni wɔkɛshɛjeshɛjee wɔhe mii, taakɛ Paulo na miishɛjemɔ kɛtsɔ Tito amaniɛbɔɔ ni tsɔɔ Korintobii lɛ aheshwamɔ su lɛ nɔ lɛ. (2 Korintobii 7:11-13) Wɔbaasusu miishɛɛ ni Paulo kɛhere Korintobii lɛ nɔ, kɛ bɔ ni ebaanyɛ eye ebua wɔ ni wɔfee mɛi ni naa Nyɔŋmɔ miishɛjemɔ lɛ eko kɛmɔɔ shi ŋmɛnɛ lɛ he, yɛ wɔ nikasemɔ ni nyiɛ sɛɛ lɛ mli.

[Shishigbɛ niŋmaa]

Ani Obaanyɛ Oha Hetoo?

◻ Te fee tɛŋŋ ni miishɛjemɔ he bahia adesai?

◻ Yesu bafee mɔ ni nɔ kwɔ fe Noa yɛ mɛɛ gbɛ nɔ?

◻ Mɛni hewɔ Yesu tsɛ ehe “hejɔɔmɔ gbi lɛ nuntsɔ” lɛ?

◻ Nyɔŋmɔ haa wɔ miishɛjemɔ ŋmɛnɛ yɛ mɛɛ gbɛ nɔ?

[Shikpɔŋ he mfoniri/Mfoniri ni yɔɔ baafa 10]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Paulo ná miishɛjemɔ kpele kɛtsɔ Tito amaniɛbɔɔ ni kɔɔ Korintobii lɛ ahe lɛ nɔ

MAKEDONIA

Filipi

HELA

Korinto

ASIA

Troia

Efeso