Nyɔŋmɔ Nilee He Ŋmajee Ni Agbɛɔ Ashwaa He Fɛɛ He

“Shidaa aha Nyɔŋmɔ, mɔ ni haa wɔyeɔ kunim daa lɛ yɛ Kristo mli, ni ehaa ehe nilee he ŋmajee lɛ tsɔɔ wɔnɔ jeɔ kpo yɛ he fɛɛ he lɛ.”​—2 KORINTOBII 2:⁠14.

 1. Mɛɛ ŋmajee wɔwieɔ he yɛ biɛ lɛ, ni te esa akɛ abu hegbɛ ni ana akɛ akɛaagbɛ ashwa lɛ tɛŋŋ?

FŨU, fũu okwɛ! M-m-m-m! Ani onuɔ bɔ ni eŋma ŋɔɔ ha lɛ he? Jeee fɔfɔii ni egba he ŋma he wɔwieɔ yɛ biɛ lɛ, shi moŋ okadi ŋmajee ko ni jeɔ kpo kɛjɛɔ niŋmaai ni hi fe fɛɛ yɛ shikpɔŋ nɔ lɛ mli. Nɛkɛ niŋmaai nɛɛ jeee nɔ ni jɛ gbɔmɛi foji komɛi kɛkɛ, shi moŋ amɛji okadi fɔfɔi kusha ni afi ni Mɔ ni kɛ ehewalɛ tsirɛ enɛ ŋmaa ji Mɔ ni bɔ fɔfɔii ni jeɔ ŋma ni haa shikpɔŋ lɛ nɔ feɔ fɛo lɛ. Hegbɛ ni mɔ ko aaana ni ekɛaagbɛ nɛkɛ Nyɔŋmɔ nilee he ŋma nɛɛ eshwa lɛ ji jwetri kpeteŋkpele. Hɛɛ, eji sɔɔmɔ ko ni sɛɛnamɔ babaoo yɔɔ he​—jeee mɔ fɛɛ mɔ yɔɔ enɛ, jeee adesai fɛɛ naa enɛ mli gbɛfaŋnɔ.

 2. Mɛɛ be mli Kristo kaselɔi lɛ je shishi akɛ amɛaagbɛ okadi ŋma nɛɛ amɛshwa, ni mɛni jɛ mli ba?

² Akɛ nɛkɛ jwetri ni jara waa nɛɛ ha Kristo kaselɔi lɛ beni aŋɔ amɛ awo Yehowa Nyɔŋmɔ sɔɔmɔ ni yɔɔ ekãa lɛ mli yɛ Pentekoste gbi lɛ nɔ yɛ afi 33 yɛ wɔ Ŋmɛnɛŋmɛnɛ Be nɛɛ mli lɛ. Akɛni mumɔ krɔŋkrɔŋ eyimɔ amɛ fɛɛ obɔbɔ hewɔ lɛ, amɛje shishi amɛgbɛ okadi ŋma nɛɛ amɛshwa, ni amɛtsɔɔ “Nyɔŋmɔ niwuji” lɛ mli. (Bɔfoi lɛ Asaji 2:​1-4, 11) Nyɔŋmɔ nilee lɛ he ŋmajee tsɔɔ amɛnɔ kɛyaa mɛi krokomɛi anɔ, jeee kɛmiiha heloo naa Yudafoi ni afolɔ amɛ ketia lɛ pɛ, shi moŋ kɛmiiha jeŋmajiaŋbii, wekui, gbɔmɛi kɛ lilɛii sɔrɔtoi ni afolɔko amɛ ketia lɛ hu. (Bɔfoi lɛ Asaji 10:​34, 35) Anɔkwa kaselɔi lɛ bu nɛkɛ sɔɔmɔ nɛɛ akɛ nɔ ni sɛɛnamɔ yɔɔ he fe heloo gbɛfaŋ ninamɔ fɛɛ ni mɛi baanyɛ abua naa aha amɛhe.

 3. Nyɔŋmɔ nilee lɛ he ŋmajee lɛ gbɛɛ-kɛ-shwamɔ eyashɛ nɛgbɛ, ni mɛɛ sane ehe hiaa ni wɔbi wɔ diɛŋtsɛ wɔhe?

³ Ŋmɛnɛ, aatsu Nyɔŋmɔ nilee lɛ he ŋmajee ni agbɛɔ ashwaa lɛ he nii yɛ shikpɔŋ lɛ fɛɛ nɔ​—yɛ gbɛ ni da fe fɛɛ eko yɛ adesa yinɔsane mli lɛ nɔ. Ekɔɔ odase ni aaaye adesai fɛɛ yɛ Nyɔŋmɔ Maŋtsɛyeli ni ato ama shi bianɛ yɛ e-Maŋtsɛ ni awo lɛ, Yesu Kristo dɛŋ lɛ he. (Mateo 6:​10; Bɔfoi lɛ Asaji 1:⁠8) Ani obuɔ Maŋtsɛ lɛ kɛ Maŋtsɛyeli lɛ he adafitswaa lɛ he sɔɔmɔ lɛ akɛ jwetri ko ni jara wa waa? Yesu Kristo, mɔ ni nyiɛ nakai Maŋtsɛyeli lɛ he sanekpakpa lɛ shiɛmɔ hiɛ lɛ yoo akɛ nakai eji, ni eto okadi efɔ shi eha wɔ.​—Mateo 4:​17; 6:​19-21.

Kunimyeli Shifoo Gbɛ lɛ ni Ahaa enɔ Jeɔ Ŋma

 4. Taakɛ 2 Korintobii 2:14 tsɔɔ lɛ, mɛɛ gbɛ nɔ Nyɔŋmɔ nyiɛɔ etsuji ahiɛ yɛ shikpɔŋ nɔ amrɔ nɛɛ, ni mɛɛ blema nifeemɔ ko Paulo wiemɔ lɛ gbalaa jwɛŋmɔ kɛyaa nɔ?

⁴ Mɛni hewɔ esa akɛ abu Nyɔŋmɔ ni asɔmɔɔ lɛ lɛ akɛ jwetri ko lɛ? Yiŋtoi lɛ ekome ji akɛ, amrɔ nɛɛ po, mɛi ni sɔmɔɔ Yehowa lɛ naa hegbɛ ko ni ekaaa ni ji amɛhiɛ ni Nyɔŋmɔ nyiɛɔ yɛ kunimyeli shifoo mli. Taakɛ New International Version lɛ tsɔɔ lɛ, 2 Korintobii 2:14 lɛ kɛɔ akɛ: “Shidaa aha Nyɔŋmɔ, mɔ ni nyiɛɔ wɔhiɛ daa yɛ kunimyeli shifoo mli yɛ Kristo mli ni etsɔɔ wɔnɔ egbɛɔ ehe nilee lɛ ŋmajee lɛ eshwaa yɛ he fɛɛ he lɛ [“ehaa ehe nilee ni wɔyɔɔ lɛ gbɛɔ shwaa je lɛ mli fɛɛ tamɔ ŋma ni ŋɔɔ!” Phillips].” Etamɔ nɔ ni nakai bɔfo Paulo wiemɔi lɛ miigbala jwɛŋmɔ kɛmiiya blema nifeemɔ ko ni kɔɔ ‘kunimyeli shifooi ahe lɛ nɔ.a

 5, 6. (a) Mɛni yaa nɔ yɛ blema Roma kunimyeli shifooi amli, ni ŋma ni jeɔ kpo loo efãa lɛ tsɔɔ mɛni kɛhaa gbɔmɛi sɔrɔtoi lɛ fɛɛ? (b) Abaanyɛ akɛ nɔkwɛmɔ nɔ ni jeɔ kpo yɛ 2 Korintobii 2:​14-16 lɛ ato mɛni he yɛ mumɔŋ?

⁵ Yɛ Roma nɔyeli lɛ gbii lɛ amli lɛ, woo ni da fe fɛɛ ni Akuashɔŋ lɛ nyɛɔ ekɛhaa tatsɛ kunimyelɔ lɛ ateŋ ekome ji ni aŋmɛ lɛ gbɛ ni eye ekunimyeli lɛ he gbijurɔ kɛ shifoo ni afiteɔ shika babaoo yɛ mli. Roma shifoo lɛ yaa blɛoo yɛ Via Triumphalis gbɛ lɛ nɔ kɛlɔgɔɔ shi kɛkwɔɔ kɛyaa Jupiter gbatsu lɛ he yɛ Kapitolain Gɔŋ lɛ nɔ. Maŋtsɛmɛi, abladei kɛ tatsɛmɛi ni aŋɔ amɛ nom yɛ tawuu lɛ mli lɛ kɛ amɛbii kɛ amɛsɔɔlɔi lɛ, akɛ kɔsɔŋkɔsɔ fimɔɔ amɛ, ni ato amɛ srɛnɛɛ, yɛ bei komɛi amli lɛ ajieɔ amɛhe yayai ni akɛshwieɔ amɛhiɛ shi ni akɛwoɔ amɛ hiɛgbele.

⁶ Yɛ be mli ni shifoo lɛ tsɔɔ Roma maŋtiase lɛ mli lɛ, gbɔmɛi lɛ fɔ̃ɔ fɔfɔii amɛshwieɔ kunimyelɔ lɛ tashwiili lɛ hiɛ, ni tsofa kɛ ŋma ni ashãa yimɔɔ egbɛ lɛ fɛɛ nɔ obɔ. Nɛkɛ ŋma ni ŋɔɔ ni gbɛɔ eshwaa nɛɛ woɔ asraafoi ni eye kunim lɛ ahiɛ nyam ni ehaa amɛshihilɛ feɔ nɔ ni yɔ shweshweeshwe. Shi etsɔɔ gbele kɛhaa nomii ni anaaa amɛ mɔbɔ ni abaakpata amɛhiɛ yɛ shifoo lɛ naagbee lɛ. Enɛ haa wɔleɔ bɔ ni Paulo kɛ enɛ to he yɛ mumɔŋ yɛ 2 Korintobii 2:​14-16 lɛ. Nakai mfoniri lɛ haa anaa Paulo kɛ enanemɛi Kristofoi ni amɛtu amɛhe amɛha lɛ akɛ Nyɔŋmɔ tsuji, “yɛ Kristo mli,” ni amɛ fɛɛ amɛnyiɛ Nyɔŋmɔ kunimyeli shifoo ni ato lɛ srɛnɛɛ lɛ sɛɛ ni E-nyiɛ amɛhiɛ yɛ kunimyeli shifoo mli yɛ gbɛ ni nɔ jeɔ ŋma nɔ.

Wala Ŋmajee loo Gbele Ŋma

 7, 8. (a) Yehowa Odasefoi miigbɛ Nyɔŋmɔ he nilee ni jeɔ ŋma ni ŋɔɔ lɛ amɛmiishwa yɛ mɛɛ gbɛ nɔ? (b) Yɛ be mli ni Odasefoi lɛ gbɛɔ ŋma nɛɛ amɛshwaa lɛ, te mɛi ni ehereɔ amɛyiwala lɛ feɔ amɛnii yɛ he amɛhaa tɛŋŋ? (d) Te mɛi ni hiɛ kpataa lɛ feɔ amɛnii yɛ he amɛhaa tɛŋŋ?

⁷ Kɛtsɔ Biblia mli anɔkwalei ni kɔɔ Nyɔŋmɔ Maŋtsɛyeli ni yɔɔ Kristo shishilɛ he ni amɛgbɛɔ amɛshwaa he fɛɛ he lɛ nɔ lɛ, belɛ Yehowa Odasefoi miigbɛ duromɔ Nyɔŋmɔ lɛ ni enɔkwalei eha amɛye amɛhe kɛjɛ apasa jamɔ mli lɛ he ŋmajee ni ŋɔɔ lɛ miishwa he fɛɛ he ni amɛmiijie lɛ kpo. Amɛfoɔ shi yɛ kunimyeli mli yɛ Yehowa sɔɔmɔ mli. Amɛsɔɔmɔ ni ji afɔlei ni amɛshaa amɛhaa lɛ akɛ lɛ kɛ e-Maŋtsɛ lɛ Odasefoi lɛ tamɔ tsofa kɛ ŋma ni saa Yehowa hiɛ. No hewɔ lɛ wɔbaanyɛ wɔyoo nɔ ni bɔfo lɛ tsɔɔ beni ekɛɛ akɛ: “Ejaakɛ Kristo ŋmajee kpakpa ji wɔ kɛha Nyɔŋmɔ yɛ mɛi ni ehereɔ amɛyiwala kɛ mɛi ni laajeɔ lɛ fɛɛ mli: Mɛnɛɛmɛi lɛ wɔji gbele ŋma ni jeɔ kɛyaa gbele mlibaa amɛ; shi mɛi krokomɛi lɛ, wɔji wala ŋma [“ŋmajee ko ni kɛ wala baa,” The New English Bible; “wala ŋma diɛŋtsɛ ni shɛjeɔ mɔ mii,” Phillips], ni jeɔ kɛyaa wala mli ha amɛ.”​—2 Korintobii 2:​15, 16.

⁸ Gbɔmɛi anɔkwafoi ni tamɔ gwantɛŋi lɛ nuɔ Yehowa he nilee lɛ he ŋma ni e-Dasefoi lɛ gbɛɔ shwaa lɛ. Kɛha gbɔmɛi ni tamɔ nɛkɛ lɛ, odaseyeli nitsumɔ lɛ tamɔ gbɔmɔtsoŋ hewalɛnamɔ kɛ wala ŋma, shihilɛ, anɔkwale ni haa wala ŋma. Amɛkɛ shidaa haa Yehowa kɛ e-Maŋtsɛ lɛ, mɔ ni amɛfata ekunimyeli shifoo lɛ he lɛ, ni amɛkɛ gbee ni naa wa bolɔɔ akɛ: “Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ kɛ toobi lɛ nɔ!” (Kpojiemɔ 7:10) Amɛmuɔ Maŋtsɛyeli anɔkwale ni ji wala ŋma ni shɛjeɔ mɔ mii ni nyiɛɔ mɔ hiɛ kɛyaa wala mli lɛ. Shi Satan kɛ edaimonioi lɛ efite nyɛmɔ ni mɛi ni kɛ amɛhe kpɛtɛɔ apasa jamɔ he lɛ yɔɔ ni amɛkɛaanu nɔ̃ he ŋma lɛ, no hewɔ lɛ amɛmɔɔ amɛgugɔji kɛ heguɔgbee ni amɛkpooɔ anɔkwale lɛ. “Kɛha mɛi ni laajeɔ lɛ,” anɔkwale lɛ kɛ mɛi ni gbɛɔ shwaa lɛ miigbɛ gbele ŋma ni kɛ mɔ yaa gbele mli amɛmiishwa. Aloo taakɛ New International Version lɛ kɛɔ lɛ: “Kɛha amɛ lɛ, wɔji gbele ŋma.” Phillips shishitsɔɔmɔ lɛ tsɔɔ shishi akɛ: “Kɛha sɛɛkpee bii lɛ, etamɔ gbele ŋma ni kɛ mɔ yaa hiɛkpatamɔ mli.”

 9. Mɛɛ sane Paulo biɔ agbɛnɛ, ni te obaaha hetoo oha tɛŋŋ, ni mɛni hewɔ?

⁹ Kɛkɛ ni bɔfo lɛ bi akɛ: “Ni namɔ sa kɛha enɛɛmɛi?” (2 Korintobii 2:16) Ni ji akɛ, “ni namɔ he baasa kɛha nitsumɔ ni tamɔ nɛkɛ?” (The Jerusalem Bible) “Ni namɔ he esa kɛha sɔɔmɔ ni tamɔ nɛkɛ?” (Weymouth) Ŋmalɛ naa hetoo lɛ ji: Yehowa Odasefoi! Mɛni hewɔ? Ejaakɛ mɛi pɛ ni amɛjɔɔ amɛhe nɔ ni ji anɔkwafoi, ni yeɔ anɔkwale, ni taooo pɛsɛmkunya sɛɛnamɔ ko, ni wieɔ anɔkwale, yɛ faŋŋ mli, ni amɛkɛ apasa jamɔ esaaa lɛ ji mɛi ni amɛhe esa kɛha nitsumɔ nɛɛ ni ji Nyɔŋmɔ nilee lɛ he ŋmajee lɛ gbɛɛ-kɛ-shwamɔ lɛ.​—Kolosebii 1:​3-6, 13; 2 Timoteo 2:⁠15.

10. Mɛni hewɔ osɔfoi lɛ jeee mɛi ni he esa akɛ amɛgbɛɔ Nyɔŋmɔ he nilee Iɛ he ŋma lɛ amɛshwaa lɛ?

¹⁰ Kristendom osɔfoi lɛ ni taoɔ ni amɛna shidaamɔ kpakpa yɛ je nɛŋ lɛ nyɛɛɛ afee mɛi ni sa kɛ mɛi ni he esa kɛha nɛkɛ sɔɔmɔ ni pɛsɛmkunya bɛ mli nɛɛ. Mɛni hewɔ? Ejaakɛ anaaa taomɔ nii ni Paulo wiemɔi lɛ kɛbaa lɛ yɛ amɛhe: “Ejaakɛ wɔhooɔ Nyɔŋmɔ wiemɔ lɛ taakɛ mɛi pii feɔ lɛ, shi moŋ, wɔwieɔ lɛ ŋmiiŋmi, bɔ ni ejɛ Nyɔŋmɔ mli lɛ, yɛ Nyɔŋmɔ hiɛ, yɛ Kristo mli.” (2 Korintobii 2:​17, New World Translation). Aloo taakɛ The New International Version lɛ wieɔ he lɛ: “Wɔtamɔɔɔ mɛi pii, ejaakɛ wɔhɔɔɔ Nyɔŋmɔ wiemɔ lɛ wɔheee sɛɛnamɔ ko. Shi nɔ ni tamɔɔɔ nakai lɛ, wɔwieɔ yɛ Kristo mli yɛ Nyɔŋmɔ hiɛ, yɛ anɔkwayeli mli, tamɔ mɛi ni Nyɔŋmɔ tsu amɛ.”

11, 12. (a) Mɛni hewɔ Odasefoi lɛ jeee “mɛi ni hɔɔ Nyɔŋmɔ wiemɔ lɛ” akɛni amɛheɔ too ni ayeɔ yɛ he lɛ hewɔ lɛ? (b) Nɔ ni tamɔɔɔ Kristojamɔ ni afutu mli ni mɛi pii heɔ lɛ, mɛni Yehowa Odasefoi kɛhaa?

¹¹ Nyɔŋmɔ tsu Yehowa Odasefoi, ni amɛmiitsu amɛ odaseyeli nitsumɔ lɛ yɛ Nyɔŋmɔ hiɛ. Yɛ be mli ni amɛkɛ woji sɔrɔtoi ni sɛɛnamɔ yɔɔ he ni tsɔɔ Nyɔŋmɔ Wiemɔ lɛ mli haa mɛi ni yɔɔ wiemɔ lɛ he miishɛɛ ni agbɛnɛ amɛkpɛlɛɔ tooyeli ni jɛ suɔmɔ mli ni akɛhaa kɛha jeŋ muu fɛɛ Maŋtsɛyeli shiɛmɔ nitsumɔ lɛ nɔ lɛ, nifeemɔ nɛɛ jeee wolo hɔɔmɔ aloo Nyɔŋmɔ Wiemɔ lɛ mlifutumɔ. Yɛ anɔkwale mli lɛ, nɛkɛ onia ni atsuɔ nɛɛ ji nii ni akɛyeɔ abuaa ni akɛgbɛɔ Nyɔŋmɔ he nilee lɛ ashwaa ahaa mɛi krokomɛi lolo.

¹² Mɛi pii yɛ ni ŋmɛnɛ amɛhe Kristojamɔ ni afutu mli lɛ yɛ gbɛ ni amɛle loo amɛleee nɔ, ejaakɛ ehi kɛha amɛ pɛsɛmkunya taomɔ nii ni etsiii amɛshihilɛ gbɛ lɛ gbɛ. Amɛheɔ amɛyeɔ akɛ Nyɔŋmɔ kpɛlɛɔ amɛnɔ ejaakɛ amɛkɛɔ akɛ amɛsumɔɔ lɛ kɛjɛɔ amɛtsuii amli. Shi, kɛji aha amɛle akɛ Nyɔŋmɔ Wiemɔ lɛ kɛ amɛhemɔkɛyelii kɛ jeŋba kpaaa gbee lɛ, amɛtsɔmɔɔ Ŋmalɛi lɛ bɔni afee ni ehole amɛ diɛŋtsɛ amɛsusumɔi anɔ kɛteke Biblia mli shishinumɔ kpakpa lɛ. (Mateo 15:​8, 9; 2 Petro 3:16) Shi Yehowa Odasefoi kɛ anɔkwale ni yɔɔ krɔŋŋ ni afutuko mli ni jɛ Biblia lɛ mli lɛ haa, no hewɔ lɛ ejeɔ ŋma ni ŋɔɔ ni saa Nyɔŋmɔ kɛ ejalɔi anɔkwafoi lɛ ahiɛ. No hewɔ lɛ amɛshwieɔ jamɔ mli kusum nifeemɔi fɛɛ kɛ gbɛtsii nii ni haaa ana Nyɔŋmɔ he anɔkwa nilee lɛ kɛyaa.

13. Yɛ Kristofoi ni afɔ amɛ mu lɛ asɛɛ lɛ, namɛi hu yɔɔ Nyɔŋmɔ kunimyeli shifoo lɛ mli, ni mɛni amɛfeɔ yɛ he fɛɛ he ni amɛyaa?

¹³ Yɛ anɔkwale mli lɛ, Nyɔŋmɔ kunimyeli shifoo lɛ ni wɔkɛ Kristo yɔɔ mli lɛ ji hegbɛ ni ekaaa ni anaa mli ŋɔɔmɔ ni jeee Kristofoi ni afɔ amɛ mu lɛ pɛ, shi moŋ “asafo babaoo” ko ni ji “tooi krokomɛi” lɛ po miina enɛ mli ŋɔɔmɔ bianɛ, ejaakɛ Maŋtsɛyeli kunimyeli lɛ ebɛŋkɛ. (Kpojiemɔ 7:​4, 9; Yohane 10:16) Yɛ be mli ni wɔkpaa kunimii krokomɛi ni wɔ-Maŋtsɛ kunimyelɔ lɛ baaye lɛ gbɛ lɛ, wɔyaa nɔ wɔgbɛɔ Nyɔŋmɔ he nilee ni haa wala lɛ wɔshwaa he fɛɛ he tamɔ anowatɛrɛ ni jeɔ ŋma loo tsofa-kɛ-ŋma ni jara wa wɔhaa mɛi fɛɛ ni tsuii shweɔ anɔkwale kɛ jalɛ nifeemɔ lɛ. Mɛɛ hegbɛ po enɛ ji kɛha mɛi ni sa kɛha nitsumɔ ni ekaaa nɛɛ!​—Yohane 17:3; Kolosebii 3:​16, 17.

Aha Wɔ Hegbɛ akɛ Wɔtsɔmɔ Gbɔmɛi ni Gbɛɔ Ŋma Amɛshwaa

14. Mɛni hewɔ yijiemɔ wolo loo hegbɛ wolo ni jɛ gbɔmɛi aŋɔɔ ahe ehiaaa mɛi ni gbɛɔ Nyɔŋmɔ he nilee lɛ he ŋma lɛ amɛshwaa lɛ?

¹⁴ Shi ani yijiemɔ wolo ko loo hegbɛ ko ni jɛ gbɔmɛi adɛŋ ahe miihia mɛi ni gbɛɔ Nyɔŋmɔ kɛ e-Maŋtsɛyeli lɛ he nilee lɛ he ŋmalɛ amɛshwaa lɛ? Dabi! Akɛ nitsumɔ ewo wɔdɛŋ momo, aloo ahala wɔ akɛ Odasefoi kɛha Mɔ ni Fe Fɛɛ yɛ jeŋ muu fɛɛ lɛ. No hewɔ lɛ ehe ehiaaa akɛ wɔshashao shi akɛ wɔɔje kpo koni wɔya ni wɔyagbɛ Maŋtsɛyeli lɛ he sanekpakpa lɛ he ŋma lɛ wɔshwa he fɛɛ he. Ha ahi ojwɛŋmɔ mli akɛ Yehowa nyiɛɔ wɔhiɛ. Yesu tsu esɔɔmɔ lɛ yɛ “naashai ni eshafeelɔi ŋmɛ lɛ” lɛ fɛɛ sɛɛ. (Hebribii 12:⁠3) Ni kɛlɛ, Yesu sɔɔmɔ nitsumɔ lɛ he nii ni aŋma taakɛ anaa yɛ Biblia lɛ mli lɛ ka he eji anɔkwale, ni enitsumɔ yɛ sɔɔmɔ lɛ mli lɛ hu jieɔ eyi ni efaa ehe akɛ eji Yehowa Nyɔŋmɔ anɔkwa sɔɔlɔ.

15. Mɛɛ gbɛ nɔ bɔfo Paulo tsɔɔ yɛ akɛ “yijiemɔ woji” ahe ehiaaa anɔkwa Kristofoi?

¹⁵ Bɔfo Paulo kɛ shihilɛ ni kaa mɔ ni tamɔ nakai nɔŋŋ kpe yɛ egbii lɛ amli ni ekɛ sanenaatsɔɔmɔ nɛɛ ha akɛ: “Aso wɔsaa wɔbɔi wɔhe yijiemɔ? Aloo ehia wɔ, tamɔ mɛi komɛi, akɛ wɔhiɛɔ yijiemɔ woji wɔkɛbaha nyɛ aloo nɛkɛ woji nɛɛ kɛjɛ nyɛdɛŋ lo? Nyɛji wɔwolo ni aŋma awo wɔtsuii amli ni mɛi fɛɛ le ni amɛkaneɔ; ni ajie nyɛ faŋŋ atsɔɔ akɛ nyɛji Kristo wolo ni wɔsɔmɔ yɛ he, ni jeee blɛgi, shi moŋ Nyɔŋmɔ hiɛkalɔ lɛ mumɔ lɛ akɛŋma, jeee yɛ tɛ taoi anɔ, shi moŋ tsui ni ji heloo taoi anɔ.”​—2 Korintobii 3:​1-3.

16. Mɛɛ wolo nɛkɛ Yehowa Odasefoi kɛhaa akɛ yijiemɔ wolo he odaseyeli ni tsɔɔ akɛ amɛsɔɔmɔ lɛ jɛ Nyɔŋmɔ ŋɔɔ?

¹⁶ Hegbɛi ni yɔɔ je lɛŋ lɛ ekpɛlɛɛɛ wɔnitsumɔ akɛ Yehowa Odasefoi lɛ nɔ. Shi nyɛhaa wɔnitsumɔ akɛ mɛi ni gbɛɔ Yehowa he nilee lɛ he ŋma lɛ amɛshwaa lɛ diɛŋtsɛ ewie aha ehe! Anyɛŋ atsumɔ nitsumɔ ni tamɔ nɛkɛ, eyɛ mli akɛ mɛi komɛi sumɔɔɔ ni amɛkaneɔ wɔsɔɔmɔ nitsumɔ lɛ he odaseyeli nɛɛ. Osɔfoi kɛ amɛyijiemɔ woji ni jɛ amɛ nɔyeli kui adɛŋ haa. Shi enɛɛmɛi lɛ woji foji kɛkɛ ni, gbɔmɔ wiemɔ ko kɛkɛ. Shi, kɛfata ŋmalɛi ni Yehowa Odasefoi tsɛɔ kɛjɛɔ Nyɔŋmɔ Wiemɔ lɛ mli ni amɛkɛfiɔ amɛsɛɛ lɛ ahe lɛ, amɛdamɔ shi akɛ odaseyelii loo yijiemɔ woji yɛ heloo kɛ la mli. Asafo babaoo lɛ ni ji tooi krokomɛi lɛ ni amɛhe Maŋtsɛyeli lɛ he sanekpakpa lɛ amɛye lɛ hu ji mɛi ni abua amɛnaa kɛba Yehowa Maŋtsɛ lɛ ninejurɔ gbɛ. (Mateo 25:​33, 34) Enɛɛmɛi fɛɛ ji wɔ yijiemɔ woji, woji ni wɔ, akɛ Yehowa Odasefoi lɛ hiɛ kɛyaa he fɛɛ he ni yɔɔ wɔtsuii kɛ jwɛŋmɔi amli ni abaanyɛ akɛ hekɛnɔfɔɔ ajie amɛ kpo. Mɛi ni damɔɔ shi amɛhaa Nyɔŋmɔ jeŋ muu fɛɛ Maŋtsɛyeli lɛ ni amɛkɛ amɛhe haa akɛ amɛaasɔmɔ Nyɔŋmɔ kɛ Yehowa Odasefoi lɛ koni gbɔmɛi fɛɛ ale lɛ naa foi.

17. Mɛɛ gbɛ nɔ atsɔ aŋmala wɔ “Kristo wolo” lɛ, ni mɛni hewɔ Paulo kɛɛ akɛ aŋmala enɛ yɛ tsuii anɔ lɛ?

¹⁷ Yɛ anɔkwale mli lɛ, enɛ haa apasa Nyɔŋmɔjalɔi lɛ amli fuɔ ni amɛnyɛɔ wɔ kɛ amɛkane. Kɛlɛ, asafo babaoo lɛ ni ji tooi krokomɛi ni amɛyi faa daa nɛɛ lɛ ji yijiemɔ woji ni jɛ Kristo Yesu, Tookwɛlɔ Kpakpa lɛ ŋɔɔ, ni lɛ ji mɔ ni kɛ Yehowa Odasefoi fɛɛ tsuɔ nii yɛ etookwɛmɔ nitsumɔ lɛ mli lɛ. Wɔ ji niŋmaa tsei lɛ, aloo dɛŋdadei ni ji adesai ni ekɛtsuɔ nii bɔni afee ni eŋma nɛkɛ wolo nɛɛ lɛ. Jeee blɛgi loo inki akɛŋmaa nɛkɛ wolo nɛɛ bɔni afee ni anyɛ atsumɔ, shi moŋ akɛ Nyɔŋmɔ mumɔ lɛ loo enifeemɔ hewalɛ ni tsuɔ nii yɛ wɔmli lɛ ŋmaa loo akɛkalaa. Etamɔɔɔ Mose nɔ lɛ, beni akɛ Kitai Nyɔŋma lɛ mla lɛ ni akɛ Nyɔŋmɔ wao ŋma yɛ tɛi tɛtrɛbii anɔ ha lɛ. Aŋmaa wɔ wolo lɛ yɛ heloo taoi ni ji adesai atsuii anɔ, ejaakɛ wɔmumɔŋ sɔɔmɔ nitsumɔ lɛ tsakeɔ gbɔmɛi ajwɛŋmɔi kɛ tsuii kɛ amɛnine shɛ sanekpakpa lɛ ni jeɔ ŋma lɛ nɔ lɛ.

18. Mɛni haa mɛi ni nine shɛɔ wɔ sanekpakpa lɛ nɔ lɛ tsɔmɔɔ yijiemɔ woji lɛ?

¹⁸ Wɔ nitsumɔ ni wɔkɛ Nyɔŋmɔ Wiemɔ lɛ tsuɔ lɛ eka mɛi ni hiɛ esɔ ni amɛhere sanekpakpa lɛ nɔ lɛ ahe ni ekɛ tsakemɔi ni yɔɔ naakpɛɛ eba amɛshihilɛi amli. Amɛyiŋkpɛɛ akɛ amɛbaasɔmɔ Nyɔŋmɔ lɛ jeee nɔ ko ni jɛɔ henumɔ mli baa kɛkɛ ni kanyaa amɛ kɛtsɔɔ sanekpakpa shiɛlɔ ko ni miibolo nɔ. Shi moŋ, edamɔ shi kɛha tsakemɔ ni hiɔ shi daa yɛ amɛshihilɛi amli ni damɔ Ŋmalɛ Krɔŋkrɔŋ lɛ mli anɔkwalei ni mli tse keŋkeŋ nɔ. Suɔmɔ kɛha anɔkwa Nyɔŋmɔ lɛ, Yehowa, tsirɛɔ amɛ koni ‘amɛjie gbɔmɔtso momo lɛ kɛ ekɔnɔi ni lakaa mɔ lɛ, koni amɛwo gbɔmɔ hee lɛ,’ ni jieɔ “mumɔ lɛ yibii” lɛ kpo lɛ. (Efesobii 4:​20-24; Galatabii 5:​22, 23) No hewɔ lɛ nɔ ni jɛɔ mli baa lɛ feɔ amɛyijiemɔ wolo. Ewieɔ faŋŋ fe wolo fɛɛ wolo ni wɔkɛ wɔniji ŋmala aloo nɔ ni gbɛjianɔtoo ko ni anaa ni tsu wɔ lɛ ŋmala.

19. Te Paulo tsɔɔ “kpaŋmɔ hee lɛ he sɔɔlɔi” lɛ ahesaa lɛ mli eha tɛŋŋ, ni amɛnitsumɔ lɛ esa asafo babaoo lɛ ahe yɛ mɛɛ gbɛ nɔ?

¹⁹ Paulo tee nɔ yɛ 2 Korintobii 3:​4-6 akɛ: “Kristo hewɔ wɔyɔɔ nɛkɛ hekɛnɔfɔɔ nɛɛ yɛ Nyɔŋmɔ gbɛfaŋ: jeee akɛ wɔ diɛŋtsɛ lɛ wɔsa, ni wɔjwɛŋ akɛ nɔ ko jɛ wɔ diɛŋtsɛ wɔmli, ni wɔsalɛ lɛ, Nyɔŋmɔ mli ejɛ; lɛ nɔŋŋ eha wɔsa ni wɔtsɔmɔ kpaŋmɔ hee lɛ he sɔɔlɔi.” Eyɛ mli akɛ shwɛɛnii ni afɔ amɛ mu lɛ pɛ ji “kpaŋmɔ hee lɛ he sɔɔlɔi” moŋ, shi amɛnitsumɔ lɛ ena asafo babaoo lɛ ni ji tooi krokomɛi lɛ anɔ hewalɛ, ni ebaaya nɔ ena hewalɛ yɛ tooi krokomɛi babaoo ni anyɛŋ akane amɛ ni abaabua amɛnaa lɛ anɔ. Enɛ ji hekɛnɔfɔɔ ni Yehowa Odasefoi fɛɛ yɔɔ kɛtsɔ Kristo Yesu nɔ yɛ Yehowa Nyɔŋmɔ hiɛ. Shwɛɛnii lɛ kɛ shidaa woɔ asafo babaoo lɛ ni ji tooi krokomɛi lɛ hewalɛ ni amɛjɛ amɛtsuiŋ fɛɛ amɛkɛ amɛhe awo ‘woloŋmaa’ sɔɔmɔ ni Yesu Kristo gba fɔ shi yɛ Mateo 24:14 kɛ Mateo 28:​19, 20 lɛ mli.

20. (a) Mɛni Yearbook lɛ mli amaniɛbɔɔ lɛ tsɔɔ yɛ mɛi ni gbɛɔ Nyɔŋmɔ he nilee lɛ he ŋma lɛ amɛshwaa lɛ ahe? (b) Mɛni wɔ fɛɛ wɔbaanyɛ wɔwie yɛ wɔhesaa kɛha sɔɔmɔ nitsumɔ ni akɛŋmalaa woji lɛ he?

²⁰ No ji nɔ ni amɛfee taakɛ ejeɔ kpo yɛ 1990 Yearbook lɛ mli amaniɛbɔɔ ni anaa yɛ mli akɛ Yehowa Odasefoi miigbɛ Nyɔŋmɔ he nilee lɛ he ŋmajee lɛ kɛmiishwa maji 212 nɔ lɛ. Amɛyibɔ fe shiɛlɔi 3,787,000 ni yɔɔ ekaa, ni yɛ nyɛsɛɛ afi lɛ pɛ mli lɛ, amɛkɛ ŋmlɛtswaai ni shɛɔ 835,000,000 shiɛ Maŋtsɛyeli lɛ he sanekpakpa lɛ. Mɛi ni ba Nuŋtsɔ lɛ Gbɛkɛnaashi Niyenii lɛ shishi yɛ nyɛsɛɛ afi lɛ mli ji 9,479,064. Ni shwɛɛnii ni afɔ amɛ mu lɛ kɛ asafo babaoo ni ji tooi krokomɛi lɛ amlibii lɛ baanyɛ akɛɛ akɛ: “Wɔsalɛ lɛ Nyɔŋmɔ mli ejɛ.” Aloo, taakɛ The Jerusalem Bible lɛ tsɔɔ lɛ: “Wɔhesaa lɛ fɛɛ ba kɛjɛ Nyɔŋmɔ ŋɔɔ.”

21. Mɛni esa akɛ wɔ fɛɛ wɔfee, ni mɛni hewɔ?

²¹ No hewɔ lɛ, gbɛɛ Nyɔŋmɔ he nilee lɛ he ŋmajee ni ŋɔɔ ni haa wala lɛ eshwa he fɛɛ he! Ha osafo lɛ shikpɔŋkuku lɛ mli kɔɔyɔɔ lɛ atsii kɛ nɛkɛ Nyɔŋmɔ he nilee lɛ he ŋmajee lɛ. Kɛkɛ lɛ akɛ teokrase Tatsɛnukpa kunimyelɔ lɛ, ebaanyiɛ ohiɛ yɛ kunimyeli shifoo lɛ mli yɛ be mli ni e-Dasefoi lɛ fɛɛ yaa amɛhiɛ yɛ ŋmɛnɛŋmɛnɛ beaŋ anunyam sɔɔmɔ lɛ mli lɛ!

[Shishigbɛ niŋmai]

Te obaaha Hetoo Oha Tɛŋŋ?

◻ Mɛɛ nɔkwɛmɔ nɔ Paulo kɛtsu nii yɛ 2 Korintobii 2:​14-16?

◻ Te Nyɔŋmɔ he nilee Iɛ ŋmajee Iɛ ni agbɛɔ ashwaa Iɛ naa mɛi krokomɛi anɔ hewalɛ ehaa tɛŋŋ?

◻ Namɛi pɛ ji mɛi ni he saa kɛhaa nitsumɔ nɛɛ, ni mɛni hewɔ?

◻ Mɛni hewɔ yijiemɔ woji ni akɛ niji eŋmala Iɛ ahe ehiaaa mɛi ni gbɛɔ nɛkɛ ŋma nɛɛ amɛshwaa Iɛ?