Ani Obaagbe Kane Mli Odonti ni Tsoɔ Sulii Lɛ?

YESU KRISTO jaje Nyɔŋmɔ Maŋtsɛyeli lɛ he sanekpakpa lɛ etsɔɔ gbɔmɛi sɔrɔtoi fɛɛ. Anyɛ amɛteŋ mɛi pii anɔ, ni amɛnijiaŋ je wui. Shi Yesu kɛ shɛɛ sane ni shɛjeɔ mɔ mii ha amɛ. Eyɛ musuŋtsɔlɛ kɛha gbɔmɛi ni miina nɔ.

Sanekpakpa ŋmalɔ Mateo ma Yesu musuŋtsɔlɛ lɛ nɔ mi kɛtsɔ jwɛŋmɔ ni egbala kɛtee gbalɛ ko ni Yesaia ŋma efɔ shi lɛ nɔ. Beni etsɛɔ wiemɔi ni Kristo ha amɛba mli lɛ ayi sɛɛ lɛ, Mateo ŋma akɛ: “Gala ni amia lɛ, ekuŋ, ni odonti hu ni tsoɔ sulii lɛ, egbeŋ, kɛyashi beyinɔ ni eeeha kojomɔ ashɛ kunimyeli mli.” (Mateo 12:20; Yesaia 42:3) Mɛni ji nɛkɛ wiemɔi nɛɛ ashishi, ni mɛɛ gbɛ nɔ Yesu ha nɛkɛ gbalɛ nɛɛ ba mli yɛ?

Gbalɛ lɛ Mlikwɛmɔ

Gãlã kwɛ̃ɔ yɛ he ni ŋmiamɔ yɔɔ titri, ni ejeee kwɛ̃ɛnii ni wa ni tsɛɔ. “Gala ni amia” baafee nɔ ni egbɔjɔ diɛŋtsɛ. No hewɔ lɛ, etamɔ nɔ ni edamɔ shi kɛha gbɔmɛi ni anyɛɛɔ amɛ nɔ ni naa nɔ̃ tamɔ nuu ni nine egbo ni Yesu tsa lɛ yɛ Hejɔɔmɔ Gbi nɔ lɛ. (Mateo 12:10-14) Shi kane mli odonti ni yɔɔ gbalɛ lɛ mli lɛ hu?

Kane ni afɔɔ kɛ nitsumɔ yɛ shia yɛ Ŋ.B. klɛŋklɛŋ afii oha lɛ mli lɛ yɛ bibioo tamɔ nu kpulu ni akɛ sũ efee kɛ enine ni edɔ ni fɔlɔ kã mli. Mũtso mũ titri akɛwoɔ kane lɛ mli. Ni gãlã ni akɛfee odonti lɛ gbalaa mu lɛ kɛyaa ŋwɛigbɛ koni eha la lɛ atso. Shi, ‘odonti ni tsoɔ sulii’ lɛ baafee nɔ ni miihe agbo.

Yesu jaje eshɛɛ sane ni shɛjeɔ mɔ mii lɛ etsɔɔ mɛi pii ni yɛ okadi gbɛ nɔ lɛ, amɛtamɔ gãlã ni amia, amɛdɔrɔ ni atswiaa amɛ shi kɛyaa kɛbaa. Gbɔmɛi nɛɛ tamɔ odonti ni tsoɔ sulii hu, ejaakɛ amɛ naagbee wala la-kpɛmɔ ni tsoɔ lɛ miihe agbo. Amɛji gbɔmɛi ni anyɛɛɔ amɛ nɔ ni nijiaŋ eje wui diɛŋtsɛ. Shi, Yesu miaaa loo egbeee okadi odonti ni tsoɔ sulii lɛ. Esuɔmɔ, mlijɔlɛ, kɛ mɔbɔnalɛ wiemɔi lɛ eyaaa nɔ ejeee gbɔmɛi anijiaŋ wui, ni enyɛ gbɔmɛi ni naa nɔ̃ lɛ anɔ. Shi moŋ, ewiemɔi kɛ bɔ ni ekɛ amɛ ye ha lɛ hole amɛ nɔ.—Mateo 11:28-30.

Ŋmɛnɛ hu, musuŋtsɔlɛ kɛ hewalɛwoo he miihia gbɔmɛi babaoo, ejaakɛ amɛkɛ naagbai ni kumɔɔ mɔ tsui miikpe. Ni jeee be fɛɛ be Yehowa tsuji po feɔ hewalɛ akulashiŋi. Yɛ bei komɛi amli lɛ amɛteŋ mɛi komɛi tamɔɔ odontii ni tsoɔ sulii. No hewɔ lɛ, esa akɛ Kristofoi afee mɛi ni woɔ mɔ hewalɛ—ni huuɔ la mli—ni woɔ amɛhe hewalɛ.—Luka 22:32; Bɔfoi lɛ Asaji 11:23.

Akɛ Kristofoi lɛ, wɔmiisumɔ ni wɔfee mɛi ni tswaa mɔ maa shi. Wɔjeŋ gbɛ wɔgbɔjɔŋ mɔ fɛɛ mɔ ni taoɔ mumɔŋ yelikɛbuamɔ. Yɛ anɔkwale mli lɛ, wɔmiisumɔ ni wɔkase Yesu nɔkwɛmɔ nɔ yɛ mɛi krokomɛi ahewalɛwoo mli lɛ. (Hebribii 12:1-3; 1 Petro 2:21) Yɛ anɔkwale ni eji akɛ wɔbaanyɛ wɔkumɔ mɔ ni kɛ ehiɛ fɔɔ wɔ nɔ kɛha hewalɛwoo yɛ be mli ni wɔleee lɛ ji yiŋtoo kpakpa hewɔ ni esa akɛ wɔkɛ hiɛdɔɔ asusu gbɛ ni wɔtsɔɔ nɔ wɔkɛ mɛi krokomɛi yeɔ haa lɛ he jogbaŋŋ. Eyɛ faŋŋ akɛ wɔsumɔɔɔ ni ‘wɔgbeɔ odonti ko ni miitso sulii.’ Mɛɛ Ŋmalɛ naa gbɛtsɔɔmɔi baanyɛ aye abua wɔ yɛ enɛ mli?

Nɔ ni Jɛɔ Wiemɔ-kɛ-shimɔ Mli Baa

Kɛ Kristofonyo ko ‘kɔ gbɛ ni ejaaa lɛ, esa akɛ mɛi ni he esa yɛ mumɔŋ lɛ abɔ mɔdɛŋ ni amɛjaje mɔ lɛ yɛ mlijɔlɛ mumɔ mli.’ (Galatabii 6:1) Shi, ani ebaafee nɔ ni sa akɛ aaatao mɛi krokomɛi afãtɔɔi ni wɔŋɔ hegbɛ fɛɛ hegbɛ ni wɔɔna ni wɔkɛjaje amɛ? Aloo ebaahi akɛ aaatsirɛ amɛ ni amɛfee nɔ ni hi, ni akɛmiitsɔɔ akɛ mɔdɛŋ ni amɛbɔɔ bianɛ lɛ faaa, ni ekolɛ eha amɛna fɔyeli henumɔi? Odaseyeli ko bɛ ni tsɔɔ akɛ Yesu fee nɔ ko ni tamɔ nakai. Eyɛ mli akɛ wɔjwɛŋmɔ ji ni wɔye wɔbua mɛi krokomɛi ni amɛya amɛhiɛ moŋ, shi mɛi ni awieɔ ashiɔ amɛ yɛ gbɛ ni mlihilɛ bɛ mli nɔ nɛɛ baanu he akɛ amɛgbɔjɔ moŋ fe ni awo amɛ hewalɛ. Wiemɔ-kɛ-shimɔ ni hi po baanyɛ aje mɔ nijiaŋ wui kwraa kɛ afee kɛteke nɔ. Kɛji akɛ nɔkpɛlɛmɔ ni bɛ ji nɔ ni akɛkpeeɔ Kristofonyo ni kɛ henilee kpakpa tsuɔ nii lɛ mɔdɛŋbɔɔi ni hi fe fɛɛ lɛ, no lɛ ekolɛ ebaahole eniji anɔ ni ekɛɛ akɛ, ‘Mɛni hewɔ esa akɛ abɔ efeemɔ he mɔdɛŋ kwraa po?’ Yɛ anɔkwale mli lɛ, ebaanyɛ eŋmɛɛ he kwraa po.

Yɛ be mli ni Ŋmalɛ naa ŋaawoo ni akɛhaa he hiaa lɛ, esaaa akɛ efeɔ su ni anaa yɛ onukpai ni ahala amɛ lɛ loo mɛi krokomɛi ni yɔɔ asafo lɛ mli lɛ ahe. Jeee yiŋtoo titri ni yɔɔ Kristofoi akpeei amli ji ni akɛ ŋaawoo ahã ni nine ashɛ nɔ. Shi moŋ, wɔkpeɔ kutuu be fɛɛ be koni wɔtswa wɔhe wɔma shi ni wɔwo wɔhe hewalɛ bɔni afee ni mɔ fɛɛ mɔ ana enaanyobɔɔ kɛ esɔɔmɔ krɔŋkrɔŋ ni ekɛhaa Nyɔŋmɔ lɛ mli ŋɔɔmɔ. (Romabii 1:11, 12; Hebribii 10:24, 25) Kwɛ bɔ ni ehi kɛ wɔɔyoo sɔrɔto feemɔ ni ka fãtɔɔ ni hiɛdɔɔ yɔɔ mli, kɛ emuu ni ayeee, ni nilee kɛ suɔmɔ yɔɔ mli akɛ wɔku wɔhiɛ wɔshwie nɔ lɛ teŋ lɛ!—Jajelɔ 3:1, 7; Kolosebii 3:13.

Gbɔmɛi hereɔ hewalɛwoo nɔ oya fe bɔ ni amɛfeɔ yɛ wiemɔ-kɛ-shimɔ he. Yɛ anɔkwale mli lɛ, kɛ aŋkroaŋkroi nu he akɛ awie ashi amɛ bɔ ni esaaa lɛ, ekolɛ amɛkɛ amɛhe baakpɛtɛ su ni no nɔ adamɔ awie ashi amɛ lɛ he kpɛŋŋ moŋ! Shi kɛ ajie amɛ yi yɛ gbɛ ni sa nɔ lɛ, ewóɔ amɛ mumɔ nɔ, ni ekanyaa amɛ koni amɛya amɛhiɛ. (Abɛi 12:18) No hewɔ lɛ, taakɛ Yesu ji lɛ, nyɛhaa wɔfea mɛi ni woɔ hewalɛ ni ‘wɔkagbe odonti ni tsoɔ sulii’ lɛ kɔkɔɔkɔ.

Mɛi ni Akɛtoɔ Mɛi Krokomɛi Ahe lɛ Hu?

Kristofoi krokomɛi aniiashikpamɔi ni ŋɔɔ lɛ atoiboo baanyɛ akanya mɔ waa. Yesu diɛŋtsɛ mli fili lɛ beni enu omanye ni ekaselɔi lɛ ye yɛ Maŋtsɛyeli shɛɛ sane lɛ shiɛmɔ mli lɛ. (Luka 10:17-21) Nakai nɔŋŋ hu kɛ wɔnu omanye ni mɛi krokomɛi ni yɔɔ hemɔkɛyeli lɛ mli lɛ eye, amɛ nɔkwɛmɔ nɔ kpakpa, loo emuuyeli mlihiɛmɔ he lɛ, ewoɔ wɔ hewalɛ ni wɔnuɔ he akɛ wɔbaatswa wɔfai shi babaoo ni wɔmɔ wɔ Kristofoi agbɛ lɛ mli.

Ni kɛlɛ, kɛ akɛ amaniɛbɔɔ ko ha yɛ gbɛ ni tsɔɔ akɛ, ‘Ojeee mɔ ni hi tamɔ nɛkɛ Kristofoi nɛɛ, ni esa akɛ ofee babaoo fe bɔ ni ofeɔ lɛ’ hu? Ani eeenyɛ eba akɛ toibolɔ lɛ kɛ hewalɛ baaje hiɛyaa he gbɛjianɔtoo ko shishi? Ebaanyɛ eje enijiaŋ wui moŋ, ni ekolɛ ebaaŋmɛɛ he kwraa, titri lɛ kɛ efɔɔ kaa ákɛ akɛ mɛi toɔ mɛi krokomɛi ahe loo nakai ataoɔ atsɔɔ. Enɛ baatamɔ fɔlɔ ni miibi ebi akɛ, ‘Mɛni hewɔ onyɛɛɛ otamɔ onyɛmi lɛ babaoo?’ Wiemɔ ni tamɔ nɛkɛ baanyɛ atee mlifu kɛ nijiaŋwujee shi, shi enyɛŋ eha subaŋ kpakpa aya hiɛ. Mɛi ni akɛtoɔ mɛi ahe lɛ baanyɛ ana hewalɛ ni tamɔ nakai nɔŋŋ yɛ mɛi ni edara lɛ anɔ, ni ebaaha amɛmli afu mɛi ni akɛ amɛ toɔ amɛhe lɛ po yɛ gbɛ ko nɔ.

Wɔnyɛŋ wɔkpa gbɛ akɛ mɔ fɛɛ mɔ baanyɛ afee nakai nɔŋŋ yɛ Nyɔŋmɔ sɔɔmɔ mli. Nuntsɔ ko kɛ jwiɛtɛi talenta kome, enyɔ, loo enumɔ ha etsuji, yɛ Yesu abɛbuai lɛ ekome mli. Akɛ enɛɛmɛi ha “yɛ mɔ fɛɛ mɔ nyɛmɔ naa.” Ajie tsuji enyɔ ni kɛtsu nii yɛ nilee mli ni amɛ talentai lɛ fá lɛ ayi, ejaakɛ amɛye anɔkwa, eyɛ mli akɛ nɔ ni jɛ amɛ nitsumɔ mli ba lɛ yɛ sɔrɔto.—Mateo 25:14-30, NW.

Bɔfo Paulo ŋma yɛ gbɛ ni sa nɔ akɛ: “Shi mɔ fɛɛ mɔ aka lɛ diɛŋtsɛ enitsumɔ ekwɛ, ni no dani eeena nɔ ko yɛ lɛ diɛŋtsɛ emli kɛkɛ ni eshwã efɔ nɔ, ni jeee mɔ kroko nɔ̃ lɛ nɔ.” (Galatabii 6:4) Kɛ wɔɔnyɛ wɔfee mɛi ni woɔ mɛi krokomɛi ahewalɛ lɛlɛŋ lɛ, belɛ, esa akɛ wɔbɔ mɔdɛŋ ni wɔkwa mɛi ni akɛtoɔ mɛi krokomɛi ahe bɔ ni esaaa lɛ.

Gbɛi Komɛi ni Atsɔɔ nɔ Atswaa Mɔ Amaa Shi

Mɛni wɔbaanyɛ wɔfee koni wɔtswa mɛi ni nijiaŋ eje wui lɛ wɔma shi, ni wɔkwa ‘odonti ni tsoɔ sulii lɛ gbee’? Ojogbaŋŋ, hewalɛwoo kɛhamɔ jeee gbɛjianɔtoo pɔtɛɛ ko sɛɛnyiɛmɔ. Shi, eyɛ faŋŋ akɛ wɔ wiemɔi baanyɛ atswa mɛi krokomɛi ama shi kɛ wɔkɛ Biblia mli shishitoo mlai tsu nii. Mɛni ji enɛɛmɛi ateŋ ekomɛi?

Ba ohe shi. Paulo wo wɔ ŋaa yɛ Filipibii 2:3 akɛ, ‘wɔkaŋmɛ naataomɔ loo yaka anunyam taomɔ gbɛ.’ Shi moŋ, wɔwie ni wɔfee wɔnii yɛ heshibaa mli. ‘Wɔkɛ heshibaa jwɛŋmɔ asusu mɛi krokomɛi ahe akɛ amɛ nɔ kwɔlɔ fe wɔ.’ Paulo ekɛɛɛ akɛ wɔkasusu nɔ ko nɔ ko he yɛ wɔhe. Ni kɛlɛ, esa akɛ wɔyoo akɛ mɔ fɛɛ mɔ yɛ nɔ ko ni enɔ kwɔ yɛ mli fe wɔ yɛ gbɛ ko nɔ. Hela wiemɔ ni akɛtsu nii yɛ biɛ akɛ ‘nɔ kwɔ’ lɛ tsɔɔ akɛ gbɔmɔ “jieɔ ehiŋmɛi kɛjɛɔ lɛ diɛŋtsɛ ehegbɛi anɔ, ni ekɛ hiɛdɔɔ susuɔ mɔ kroko nikeenii ni mɔ lɛ nɔ kwɔ yɛ mli lɛ ahe.” (New Testament Word Studies, ni John Albert Bengel ŋma, Kpo 2, baafa 432) Kɛ wɔfee enɛ ni wɔbu mɛi krokomɛi akɛ amɛ nɔ kwɔlɔ lɛ, wɔkɛ amɛ baaye yɛ heshibaa mli.

Jiemɔ bulɛ kpo otsɔɔ. Kɛ wɔwie wiemɔi ni ji anɔkwale lɛ, wɔbaanyɛ wɔfee lɛ faŋŋ akɛ, wɔyɛ hekɛnɔfɔɔ yɛ nanemɛi heyelilɔi anɔkwafoi amli, wɔbaabu amɛ akɛ aŋkroaŋkroi ni miisumɔ ni amɛsa Nyɔŋmɔ hiɛ. Shi kɛji akɛ mumɔŋ yelikɛbuamɔ he miihia amɛ hu? No lɛ nyɛhaa wɔkɛ yelikɛbuamɔ lɛ ahaa yɛ bulɛ kɛ woo mli. Paulo wie saji ahe yɛ nɛkɛ gbɛ nɔ: “Mɔ fɛɛ mɔ kɛ woo aha enaanyo tsutsu.”—Romabii 12:10.

Feemɔ toibolɔ kpakpa. Hɛɛ, bɔni afee ni wɔwo mɛi ni ekolɛ amɛkɛ naagbai ni jeɔ mɔ nijiaŋ wui kpeɔ lɛ hewalɛ lɛ, ehe hiaa ni wɔfee toibolɔi kpakpai, jeee wielɔi. Yɛ nɔ najiaŋ ni wɔkɛ hiɛaŋhiɛaŋ ŋaawoo aaaha yɛ oyaiyeli mli lɛ, nyɛhaa wɔŋɔa be ni sa ni wɔkɛ Ŋmalɛ mli gbɛtsɔɔmɔi ni tsuɔ hiamɔ nii ni yɔɔ lɛ ahe nii diɛŋtsɛ aha. Kɛ wɔleee nɔ ni wɔbaakɛɛ lɛ, Biblia mlipɛimɔ baaye abua wɔ ni wɔkɛ wiemɔ ni shɛjeɔ mɔ mii ni woɔ mɔ hewalɛ aha mɛi krokomɛi.

Feemɔ mɔ ni yɔɔ suɔmɔ. Ehe miihia ni wɔna suɔmɔ wɔha mɛi ni wɔsumɔɔ ni wɔwo amɛ hewalɛ lɛ. Kɛ wɔkɛ miitsu nanemɛi Yehowa tsuji ahe nii lɛ, esa akɛ wɔ suɔmɔ lɛ ateke nii ni wɔfeɔ ni ahi aha amɛ lɛ kɛkɛ. Esa akɛ henumɔ ni mli wa ahi mli. Kɛ wɔyɛ suɔmɔ ni tamɔ nɛkɛ kɛha Yehowa webii fɛɛ lɛ, wɔ wiemɔi baafee hewalɛwoo nii diɛŋtsɛ aha amɛ. Kɛji akɛ esa akɛ wɔkɛ ŋaawoo kɛha hiɛyaa aha po lɛ, enyɛŋ eba akɛ abaanu nɔ ni wɔkɛɔ lɛ shishi yɛ gbɛ kroko nɔ loo eeeye awui yɛ be mli ni wɔyiŋtoo jeee ni wɔtsɔɔ sane ko kɛkɛ shi ni wɔkɛ yelikɛbuamɔ ni suɔmɔ yɔɔ mli aha lɛ. Taakɛ Paulo wie yɛ gbɛ ni sa jogbaŋŋ nɔ lɛ, “suɔmɔ . . . haa mɔ nane mɔɔ shi.”—1 Korintobii 8:1; Filipibii 2:4; 1 Petro 1:22.

Feemɔ Mɔ ni Tswaa Mɔ Maa Shi Be Fɛɛ Be

Yehowa webii kɛ kaai babaoo miikpe yɛ “naagbee gbii” nɛɛ amli jaramɔ bei lɛ amli. (2 Timoteo 3:1-5) Ebɛ naakpɛɛ akɛ, yɛ bei komɛi amli lɛ amɛnaa amanehulu kɛyashɛɔ he ni efeɔ tamɔ nɔ ni jɛmɛ nɔŋŋ amɛ tsuishiŋmɛɛ baanyɛ ayashɛ. Akɛ Yehowa tsuji lɛ, wɔsumɔŋ ni wɔkɛɛ nɔ ko loo wɔfee nibii ni baaha wɔnanemɛi jálɔi lɛ ateŋ mɔ ko anu he tamɔ odonti ni miitso sulii ni miihe agbo.

Belɛ, kwɛ bɔ ni ehe hiaa ha, akɛ wɔwowoo wɔhe hewalɛ! Nyɛhaa wɔbɔa mɔdɛŋ fɛɛ ni wɔɔnyɛ ni wɔfee mɛi ni tswaa mɔ maa shi kɛtsɔ wɔhe shi ni wɔɔba kɛ bulɛ ni wɔkɛaaha nanemɛi jálɔi ni nijiaŋ eje wui lɛ nɔ. Eba akɛ wɔɔbo amɛ toi jogbaŋŋ beni amɛgbaa wɔ amɛ teemɔŋ saji lɛ, ni wɔbɔ mɔdɛŋ ni wɔye wɔbua amɛ be fɛɛ be kɛtsɔ Nyɔŋmɔ Wiemɔ ni ji Biblia lɛ ni wɔɔgbala jwɛŋmɔ kɛya nɔ lɛ nɔ. Nɔ ni fe fɛɛ lɛ, nyɛhaa wɔjiea suɔmɔ kpo, ejaakɛ nɛkɛ Yehowa mumɔ krɔŋkrɔŋ lɛ yibii nɛɛ baaye abua wɔ ni wɔwowoo wɔhe hewalɛ. Eba akɛ wɔwieŋ loo wɔfeŋ nii yɛ gbɛ ni ‘aaagbe odonti ni tsoɔ sulii’ lɛ nɔ.