Nii ni Akaseɔ Kɛjɛɔ Tsutsu Tɔ̃mɔi Amli

WƆ BƆLƆ lɛ jeŋba he mlai lɛ hiɔ shi kɛyaa naanɔ, ni etsakeee. Yɛ yiŋtoo nɛɛ hewɔ lɛ, shishitoo mla ni yɔɔ Galatabii 6:7 lɛ tsuɔ nii ŋmɛnɛ: “Nɔ̃ pɛ ni gbɔmɔ dũɔ lɛ, no nɔŋŋ ebaakpa hu.” Eji anɔkwale akɛ ekolɛ mɔ aŋkro ko baakpoo ehe akɔntaa ni eeebu eha Nyɔŋmɔ lɛ, shi ŋwɛi mla lɛ kã he eyɛ nakai nɔŋŋ. Yɛ naagbee lɛ adesa ko kwraa yeee ehe kɛjɛɛɛ nɔ ni jɛɔ enifeemɔi amli baa lɛ mli.

Shi mɛni baa gbɔmɔ ni yeɔ etsui naa sane ni sɛɛ mli lɛ etsakeɔ ebatsɔɔ Nyɔŋmɔ tsulɔ lɛ nɔ? Ekolɛ ebaabi ni eya nɔ ehi shi yɛ nɔ ni ejɛ etsutsu shihilɛ lɛ mli eba lɛ naa. Shi kɛlɛ, enɛ etsɔɔɔ akɛ Nyɔŋmɔ kɛ ehe ekeko lɛ. Gbala ni Maŋtsɛ David kɛ Batsheba fite lɛ kɛ amanehului babaoo ba eshihilɛ mli. Enyɛɛɛ ejo enɛ naa foi. Shi etsake etsui, ni Nyɔŋmɔ kɛ ehe ke lɛ.—2 Samuel 12:13-19; 13:1-31.

Ani onijiaŋ eje wui pɛŋ beni oná nɔ yɛ tɔ̃mɔ ko ni otɔ̃ hewɔ? Kɛ asusu he yɛ gbɛ ni ja nɔ lɛ, heshwamɔ henumɔ ni wɔɔná lɛ baanyɛ atsu nii akɛ kaimɔ nɔ̃ kɛha wɔ, koni ‘wɔkwɛ wɔhe ni ahi ni wɔkatsɔ wɔhiɛ wɔha nɔsha.’ (Hiob 36:21) Hɛɛ, heshwamɔ henumɔ baanyɛ aye abua wɔ koni wɔtsi wɔhe kɛjɛ esha ni wɔɔsaa wɔfee ekoŋŋ lɛ he. Nɔ ni fe fɛɛ lɛ, David kɛ niiashikpamɔ ni ená kɛjɛ esha ni efee lɛ mli lɛ tsuuu nii kɛyeee ebuaaa lɛ pɛ ehe, shi moŋ ekɛye ebua mɛi krokomɛi hu. Ekɛɛ akɛ: “Matsɔɔ nɔtɔ̃lɔi ogbɛ̀i lɛ, ni eshafeelɔi aaaku amɛsɛɛ kɛaaba oŋɔɔ.”—Lala 51:15.

[Mfoniri ni yɔɔ baafa 7]

David kase nii kɛjɛ esha ni ekɛ Batsheba fee lɛ mli