Kaaha Onijiaŋ Miije Wui!

“Nyɛkahaa ekpakpa feemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.”—GALATABII 6:9.

 1, 2. (a) Mɛɛ gbɛi anɔ jata tsɔɔ egbɔbiɔ? (b) Namɛi Abonsam sumɔɔ ni emɔ̃mɔ̃ amɛ titri?

JATA gbɔbiɔ yɛ gbɛi sɔrɔtoi anɔ. Bei komɛi lɛ, ewoɔ kooloo ni etaoɔ emɔ lɛ lɛ antɛo yɛ nu numɔ hei, aloo yɛ gbɛi ni amɛfɔɔ nɔ tsɔmɔ waa lɛ ahe. Shi taakɛ Portraits in the Wild wolo lɛ tsɔɔ lɛ, bei komɛi lɛ, jata “kɛ shihilɛ ni yɔɔ lɛ tsuɔ nii kɛkɛ—akɛ nɔkwɛmɔ nɔ lɛ, tamɔ be mli ni eyanina ŋaŋ-okpɔŋɔ bi ni ewɔ nɛkɛ.”

² Wɔ “henyɛlɔ, Abonsam,” taakɛ bɔfo Petro tsɔɔ mli lɛ, “nyiɛ tamɔ jata ni hũɔ eetao mɔ ni eeemi.” (1 Petro 5:8) Akɛni ele akɛ ebe ni eshwɛ lɛ faaa hewɔ lɛ, Satan kɛ nɔnyɛɛ ni naa wa waa miiba adesai anɔ koni ekɛtsi amɛnaa ni amɛkasɔmɔ Yehowa. Shi kɛlɛ, nɛkɛ “jata ni hũɔ” nɛɛ miisumɔ waa ni emɔ̃mɔ̃ Yehowa tsuji titri. (Kpojiemɔ 12:12, 17) Gbɛi ni etsɔɔ nɔ egbɔbiɔ lɛ tamɔ bɔ ni ehenɔ ni yɔɔ kooloi aje lɛ mli lɛ feɔ enii lɛ pɛpɛɛpɛ. Yɛ mɛɛ gbɛ nɔ?

 3, 4. (a) Mɛɛ gbɛ̀i Satan kɛtsuɔ nii ni ekɛmɔ̃mɔ̃ɔ Yehowa tsuji? (b) Akɛni “jaramɔ bei” nɛ hewɔ lɛ, mɛɛ sanebimɔi ateeɔ amɛ shi?

³ Bei komɛi lɛ, Satan bɔɔ mɔdɛŋ akɛ eeewo antɛo—no ji yiwaa loo shitee-kɛ-woo ni ekɛbɔɔ mɔdɛŋ akɛ eeeku wɔ emuuyeli mli koni wɔkpa Yehowa sɔɔmɔ. (2 Timoteo 3:12) Shi, taakɛ jata ji lɛ, bei krokomɛi amli lɛ, Abonsam kɛ hegbɛ ni yɔɔ lɛ tsuɔ nii jogbaŋŋ. Emɛɔ aahu kɛyashiɔ be mli ni wɔnijiaŋ aaaje wui, aloo wɔɔnu he akɛ etɔ wɔ, ni no sɛɛ lɛ agbɛnɛ ebɔɔ mɔdɛŋ akɛ ekɛ wɔ jwɛŋmɔŋ nɔnyɛɛ shihilɛ ni wɔyaje mli lɛ aaatsu nii ni ekɛha wɔnijiaŋ aje wui kwraa. Esaaa ni wɔhaa enine shɛɔ wɔnɔ kwraa yɛ gbɛ ni waaa nɔ!

⁴ Ni kɛlɛ, adesai ayinɔsane mli be ni mli wa waa fe fɛɛ mli wɔyɔɔ nɛɛ. Bei komɛi lɛ, wɔteŋ mɛi babaoo nuɔ nijiaŋwujee loo nɔnyɛɛ po he yɛ nɛkɛ “jaramɔ bei” ni mli wa nɛɛ amli. (2 Timoteo 3:1) Belɛ, te wɔɔfee tɛŋŋ ni wɔkaha eetɔ wɔ waa, bɔ ni eeeha Abonsam nine ashɛ wɔnɔ yɛ gbɛ ni waaa nɔ? Hɛɛ, te wɔɔfee tɛŋŋ wɔbo bɔfo Paulo ŋaawoo ni jɛ mumɔŋ lɛ toi, akɛ: “Nyɛkahaa ekpakpa feemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli”?—Galatabii 6:9.

Beni Mɛi Krokomɛi Eha Wɔnine Enyɛ Shi

 5. Mɛni ha David nu he akɛ etɔ lɛ lɛ, shi mɛni efeee?

⁵ Yɛ Biblia beaŋ lɛ, ekolɛ Yehowa tsuji anɔkwafoi fe fɛɛ lɛ po nu nɔnyɛɛ he. Lalatsɛ David ŋma akɛ: “Etɔ mi kɛ ŋtsɔidɔɔmɔ; mifɔɔ misaa daa nyɔɔŋ, mikɛ yaafonui shwieɔ misaatso lɛ nɔ. Awerɛho eha mihiŋmɛi eshiu.” Mɛni hewɔ ni David nu he nakai lɛ? “Mihaolɔi lɛ sɔŋŋ hewɔ,” taakɛ etsɔɔ mli lɛ. Mɛi krokomɛi awuiyeli nifeemɔi ha David nu dɔlɛ he waa yɛ etsui mli aahu akɛ eha yaafonui po jɛ ehiŋmɛiiaŋ. Shi kɛlɛ, David tsiii ehe kɛjɛɛɛ Yehowa he, yɛ nɔ ni enanemɛi adesai efee lɛ lɛ hewɔ.—Lala 6:7-10.

 6. (a) Te mɛi krokomɛi awiemɔi loo amɛnifeemɔi baanyɛ asa wɔhe aha tɛŋŋ? (b) Mɛɛ gbɛ nɔ mɛi komɛi tsɔɔ amɛfeɔ amɛhe mɛi ni amɛmɔ̃ɔmɔ̃ waaa kwraa kɛha Abonsam?

⁶ Nakai nɔŋŋ hu, ekolɛ mɛi krokomɛi awiemɔi loo nifeemɔi komɛi baanyɛ aha wɔnu tɔlɛ kɛ tsuiŋ dɔlɛ babaoo he. “Mɔ ko yɛ ni wieɔ bambam, taakɛ adumɔɔ klante,” taakɛ Abɛi 12:18 kɛɔ lɛ. Kɛji Kristofonyo nyɛmi nuu loo nyɛmi yoo ji mɔ ni susuuu nii ahe nɛɛ, no lɛ, ‘klante duumɔ’ lɛ mli baanyɛ awa waa. Ni ekolɛ adesa su ni wɔɔjie lɛ kpo ji ni wɔnu dɔlɛ he, ekolɛ ni wɔkɛ mlifu lɛ awo wɔmli. Enɛ feɔ anɔkwale, titri lɛ kɛji wɔnuɔ he akɛ gbɛ ni atsɔ nɔ akɛ wɔ ye lɛ etsɔɔɔ mlihilɛ loo jalɛsaneyeli lɛ. Ekolɛ ebaawa eha wɔ akɛ wɔkɛ mɔ ni tɔ̃ wɔnɔ lɛ aaawie; ekolɛ no baaha wɔje gbɛ wɔtsi wɔhe kwraa kɛjɛ nakai mɔ lɛ he. Akɛni amɛyaje nɔnyɛɛ shishi yɛ mlifu lɛ hewɔ lɛ, mɛi komɛi anijiaŋ eje wui ni amɛkpa Kristofoi akpeei baa kwraa. Dɔlɛ sane ji akɛ, amɛkɛ nakai feemɔ ‘eŋmɛ Abonsam gbɛ’ ni enine eshɛ amɛnɔ yɛ gbɛ ni waaa kwraa nɔ.—Efesobii 4:27.

 7. (a) Mɛɛ gbɛ nɔ wɔɔtsɔ wɔtsi wɔhe kɛjɛ Abonsam dɛŋ ni wɔɔgbee lɛ he, kɛji mɛi krokomɛi ha wɔnine nyɛ shi loo amɛfee wɔ efɔŋ? (b) Mɛni hewɔ esa akɛ wɔŋmɛɛ mlifu he lɛ?

⁷ Mɛɛ gbɛ nɔ wɔɔtsɔ wɔtsi wɔhe kɛjɛ Abonsam dɛŋ ni wɔɔgbee he, kɛji mɛi krokomɛi ha wɔnine nyɛ shi loo amɛfee wɔ efɔŋ? Esa akɛ wɔbɔ mɔdɛŋ ni wɔkɛ mlifu akawo wɔmli. Shi moŋ, esa akɛ wɔŋɔ hegbɛ lɛ ni wɔkɛtao toiŋjɔlɛ aloo wɔsaa sane lɛ oya nɔŋŋ. (Efesobii 4:26) Kolosebii 3:13 woɔ wɔ hewalɛ akɛ: “Kɛji mɔ ko kɛ mɔ ko ná sane ko lɛ, . . . nyɛkɛfafaa nyɛhe.” Sane ni akɛkeɔ lɛ sa jogbaŋŋ, titri lɛ kɛji mɔ ni etɔ̃ lɛ kpɛlɛ etɔmɔ lɛ nɔ ni ekɛ anɔkwayeli jie dɔlɛ kpo yɛ he. (Okɛ Lala 32:3-5 kɛ Abɛi 28:13 ato he.) Shi, kɛ wɔha ehi wɔjwɛŋmɔ mli akɛ, sane ni wɔkɛkeɔ lɛ etsɔɔɔ akɛ wɔkpɛlɛɔ tɔmɔi ni mɛi krokomɛi tɔ̃ɔ lɛ anɔ loo wɔbaa bɔ ni amɛmli wa ha lɛ shi lɛ, eyeɔ ebuaa. Nɔ ni fataa sane ni akɛkeɔ lɛ he ji ŋmɛɛmɔ ni aŋmɛɔ mlifu he kwraa. Mlifu lɛ, jatsu ni teremɔ tsii waa ni. Ebaanyɛ efite wɔ susumɔi kwraa, ni eha wɔ miishɛɛ alaaje. Ebaanyɛ esa wɔ gbɔmɔtsoŋ hewalɛnamɔ po he. Nɔ ni tamɔɔɔ nakai lɛ, sane ni akɛkeɔ, kɛji esa nakai lɛ, he baa sɛɛnamɔ kɛhaa wɔ diɛŋtsɛ. Eba akɛ, taakɛ David fee lɛ, wɔ hu wɔnijiaŋ ejeŋ wui ni wɔgbala wɔhe shi kɛjɛ Yehowa he, yɛ nɔ ni adesai krokomɛi ewie loo amɛfee wɔ lɛ hewɔ!

Be Mli ni Wɔtɔ Fã

 8. (a) Mɛni hewɔ mɛi komɛi nuɔ fɔyeli he waa bei komɛi lɛ? (b) Mɛɛ oshara yɔɔ fɔyeli henumɔ ni wɔɔha eye wɔnɔ kwraa ni eha wɔnijiaŋ aje wui lɛ he?

⁸ “Wɔ fɛɛ wɔtɔ̃ɔ babaoo,” taakɛ Yakobo 3:2 kɛɔ lɛ. Ni kɛ wɔtɔ̃ lɛ, eji adebɔɔ su akɛ wɔɔnu fɔyeli he. (Lala 38:4-9) Fɔyeli henumɔi lɛ amli baanyɛ awa waa, titri lɛ kɛji wɔmiiwuu wɔmiishi heloo lɛ gbɔjɔmɔ ko, ni wɔkuɔ sɛɛ wɔgbeɔ nakai tɔmɔ lɛ mli yɛ be kɛ bei amli lɛ.a Kristofonyo yoo ko ni kɛ kaa ni tamɔ nakai kpe lɛ tsɔɔ mli akɛ: “Misumɔɔɔ ni mahi wala mli dɔŋŋ, ejaakɛ mileee akɛ mifee esha ni akɛkeee lɛ loo mifeko. Minu he akɛ ehe ehiaaa ni mamia mihiɛ dɔŋŋ yɛ Yehowa sɔɔmɔ mli ejaakɛ ekolɛ benɛ hiɛnɔkamɔ ko kwraa bɛ dɔŋŋ kɛha mi.” Kɛ fɔyeli ye wɔnɔ kwraa yɛ gbɛ ni tamɔ nɛkɛ nɔ, ni eha wɔnijiaŋ je wui lɛ, wɔhaa Abonsam naa hegbɛ—ni ekolɛ ekɛbaatsu nii oya nɔŋŋ! (2 Korintobii 2:5-7, 11) Ekolɛ nɔ ni he hiaa ji susumɔ ni ŋmɛɔ pɛpɛɛpɛ ni wɔɔná yɛ fɔyeli he.

 9. Mɛni hewɔ esa akɛ wɔna Nyɔŋmɔ mɔbɔnalɛ lɛ mli hekɛnɔfɔɔ lɛ?

⁹ Kɛ wɔfee esha lɛ, esa jogbaŋŋ akɛ wɔɔnu fɔyeli he yɛ gbɛ ko nɔ. Shi, bei komɛi lɛ, fɔyeli henumɔi lɛ yaa nɔ aahu ejaakɛ Kristofonyo lɛ nuɔ he akɛ enyɛŋ efee mɔ ni Nyɔŋmɔ mɔbɔnalɛ sa lɛ kɔkɔɔkɔ. Ni kɛlɛ, Biblia lɛ maa nɔ mi ehaa wɔ akɛ: “Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli.” (1 Yohane 1:9) Ani yiŋtoo kpakpa ko yɛ ni wɔɔdamɔ nɔ wɔhe wɔye akɛ Nyɔŋmɔ efeŋ nakai yɛ wɔ gbɛfaŋ? Kaimɔ akɛ, Yehowa kɛɔ yɛ e-Wiemɔ lɛ mli akɛ “[e]ŋɔfaa mra.” (Lala 86:5; 130:3, 4) Akɛni enyɛŋ emale hewɔ lɛ, ebaafee taakɛ e-Wiemɔ lɛ ewo shi lɛ, shi ja wɔba eŋɔɔ kɛ tsuitsakemɔ dã.—Tito 1:2.

10. Mɛɛ hewalɛwoo wiemɔi ni haa mɔ tsui nyaa tsutsu Buu-Mɔɔ ko ŋma yɛ bɔ ni wɔɔfee wɔwuu wɔshi heloo lɛ gbɔjɔmɔ ko lɛ he?

¹⁰ Kɛ oowuu ooshi gbɔjɔmɔ ko, ni okuɔ osɛɛ ogbeɔ mli ekoŋŋ lɛ, mɛni esa akɛ ofee? Esaaa ni onijiaŋ jeɔ wui! Emli ni okuɔ sɛɛ ogbeɔ ekoŋŋ lɛ etsɔɔɔ doo akɛ efo hiɛyaa ni ona momo lɛ mli kwraa. Wolo tɛtrɛɛ nɛɛ mli nɔ ni je kpo yɛ February 15, 1954 lɛ kɛ hewalɛwoo wiemɔi ni haa mɔ tsui nyaa kɛ miishɛɛ nɛɛ ha akɛ: “[Ekolɛ] wɔnaa wɔhe akɛ wɔtɔ̃ɔ ni wɔgbeɔ shi shii abɔ yɛ su gbonyo ko ni ehe shi waa yɛ wɔ tsutsu shihilɛ gbɛ lɛ mli fe bɔ ni ekolɛ wɔhiɛ kã nɔ lɛ hewɔ. . . . Onijiaŋ akaje wui. Kaamu sane naa akɛ ofee esha ni akɛkeee. Nakai ji bɔ ni Satan baasumɔ ni osusu saji ahe. Anɔkwale ni eji akɛ onuɔ dɔlɛ he ni omli fuɔ bo diɛŋtsɛ ohe lɛ ji odaseyeli diɛŋtsɛ ni tsɔɔ akɛ oyako shɔŋŋ tsɔ fe nine. Kaaha eetɔ bo akɛ okɛ heshibaa kɛ ekaa aaatsɔ̃ ohe kɛya Nyɔŋmɔ ŋɔɔ, ni obi edɛŋ eshaifaa kɛ hetsuumɔ kɛ yelikɛbuamɔ. Yaa eŋɔɔ taakɛ gbekɛ bibioo yaa etsɛ ŋɔɔ kɛ ebote haomɔ mli lɛ, ekɔɔɔ he eko bɔ ni oyaa nɔtonɔto yɛ gbɔjɔmɔ koome lɛ nɔŋŋ he, ni Yehowa kɛ mɔbɔnalɛ baaye ebua bo yɛ emlihilɛ ni wɔsaaa lɛ hewɔ, ni kɛ oofee enɛ yɛ anɔkwayeli mli lɛ, ebaaha oyoo akɛ ona henilee ni mli tse ekoŋŋ.”

Be Mli ni Wɔnuɔ he akɛ Wɔfeee Babaoo bɔ ni Sa

11. (a) Te esa akɛ wɔnu Maŋtsɛyeli-shiɛmɔ nitsumɔ lɛ mli ni wɔkɛ wɔhe aaawo lɛ he wɔha tɛŋŋ? (b) Mɛɛ henumɔi ni kɔɔ sɔɔmɔ nitsumɔ lɛ mli ni akɛ he aaawo lɛ he Kristofoi komɛi kɛshĩɔ mple?

¹¹ Maŋtsɛyeli-shiɛmɔ nitsumɔ lɛ hiɛ gbɛhe ni hiaa waa yɛ Kristofonyo shihilɛ mli, ni emli ni akɛ he woɔ lɛ kɛ miishɛɛ baa. (Lala 40:9) Shi, Kristofoi komɛi nuɔ fɔyeli he waa yɛ babaoo ni amɛnyɛɛɛ amɛfee yɛ sɔɔmɔ nitsumɔ lɛ mli lɛ hewɔ. Fɔyeli ni tamɔ nɛkɛ baanyɛ afite wɔ miishɛɛ ni eha wɔnijiaŋ aje wui, ni wɔɔsusu akɛ Yehowa nuɔ he akɛ wɔfeee babaoo bɔ ni sa. Susumɔ henumɔi ni mɛi komɛi wuuɔ amɛshiɔ lɛ he okwɛ.

“Ani nyɛle bɔ ni ohia fiteɔ be babaoo ha?” taakɛ nyɛmiyoo Kristofonyo ko ni kɛ ewu miitsɔse gbekɛbii etɛ lɛ ŋma lɛ. “Esa akɛ mabaa shika yi be fɛɛ be ni eeehi nakai. Enɛ tsɔɔ akɛ esa akɛ mana be babaoo ni mikɛkpa nibii memeji ashwapoi, kɛ shwapoi ni etse amɛ nibii memeji anɔ koni ahe lɛ amli aahu, aloo makpɛ atadei heei po. Miyeɔ ŋmɛlɛtswaa kome loo enyɔ daa otsi ni mikɛtsuɔ woji ni akɛheɔ [niyenii ni atse nɔ] lɛ ahe nii—mifolɔɔ, ni miŋmalaa nɔ ni ataoɔ yɛ nɔ lɛ, ni mihɔ̃ɔ. Bei komɛi lɛ, minuɔ fɔyeli he waa akɛ mifeɔ nɛkɛ nibii nɛɛ, ejaakɛ misusuɔ akɛ kulɛ esa akɛ mikɛ nakai be lɛ atsu nii yɛ shiɛmɔ nitsumɔ lɛ mli.”

“Misusu akɛ misumɔɔɔ Yehowa bɔ ni sa kwraa,” taakɛ nyɛmiyoo ko ni hiɛ bii ejwɛ, ni ewu heee yeee hu lɛ tsɔɔ mli lɛ. “No hewɔ lɛ, mipele yɛ sɔɔmɔ ni mikɛhaa Yehowa lɛ mli. Mimia mihiɛ waa, shi minuuu he kɔkɔɔkɔ akɛ miibɔ mɔdɛŋ. Ole nɔ ko, minuuu he kwraa akɛ mihe yɛ sɛɛnamɔ ko, no hewɔ lɛ minyɛɛɛ mana bɔ ni Yehowa baafee ekpɛlɛ sɔɔmɔ ni mikɛhaa lɛ lɛ nɔ.”

Kristofonyo yoo ko ni na akɛ ehe miihia ni eŋmɛɛ be-fɛɛ sɔɔmɔ lɛ he lɛ wie akɛ: “Ewa waa kɛha mi akɛ masusu he akɛ minyɛɛɛ matsu mihe ni mikɛha akɛ masɔmɔ Yehowa kɛ mibe fɛɛ lɛ he nii. Nyɛleee bɔ ni minijiaŋ je wui hã! Kɛ mikai pɛ, kɛkɛ lɛ mibɔi yaafo.”

12. Mɛni hewɔ Kristofoi komɛi nuɔ fɔyeli he waa yɛ babaoo ni amɛnyɛɛɛ amɛtsu yɛ sɔɔmɔ nitsumɔ lɛ mli lɛ he lɛ?

¹² Eji adebɔɔ su akɛ mɔ ko aaasumɔ ni esɔmɔ Yehowa kɛmɔ shi bɔ ni eeenyɛ. (Lala 86:12) Shi, mɛni hewɔ mɛi komɛi nuɔ fɔyeli he waa, yɛ babaoo ni amɛnyɛɛɛ amɛfee hewɔ lɛ? Yɛ mɛi komɛi agbɛfaŋ lɛ, etamɔ nɔ ni ekɔɔ henumɔ ni amɛnaa akɛ amɛsaaa, ni ekolɛ ejɛ shihilɛ mli niiashikpamɔi ni eŋɔɔɔ ni amɛna lɛ ahewɔ. Yɛ shihilɛi krokomɛi amli hu lɛ, ekolɛ fɔyeli henumɔ ni esaaa lɛ jɛɔ jwɛŋmɔ kpakpa ni wɔnaaa yɛ nɔ ni Yehowa kpaa gbɛ yɛ wɔdɛŋ lɛ he lɛ hewɔ. “Minu he akɛ kɛ onuuu tɔlɛ kɛ deŋmegbomɔ he lɛ, no lɛ ekolɛ ofeee babaoo bɔ ni sa,” taakɛ Kristofonyo yoo ko kɛɛ lɛ. Nɔ ni jɛ mli ba ji akɛ, ekɛ otii ni nɔ kwɔlɔ fe nine mamɔ ehiɛ—ni enu fɔyeli lɛ he waa fe tsutsu lɛ, yɛ otii nɛɛ ni enyɛɛɛ eshɛ he lɛ hewɔ.

13. Mɛni Yehowa kpaa gbɛ yɛ wɔdɛŋ?

¹³ Mɛni Yehowa kpaa gbɛ yɛ wɔdɛŋ? Kɛ wɔɔwie kuku lɛ, Yehowa miikpa gbɛ akɛ wɔɔsɔmɔ lɛ kɛ wɔsusuma fɛɛ, ni wɔfee nɔ ni wɔ shihilɛi baaŋmɛ gbɛ. (Kolosebii 3:23) Shi, ekolɛ, sɔrɔto feemɔ agbo baanyɛ aba nɔ ni wɔbaasumɔ ni wɔfee, kɛ nɔ ni wɔbaanyɛ wɔfee diɛŋtsɛ lɛ teŋ. Ekolɛ nibii tamɔ afii abɔ ni wɔye, hewalɛnamɔ, gbɔmɔtsoŋ hewalɛ, aloo weku mli gbɛnaa nii baanyɛ atsi wɔnaa. Shi kɛlɛ, kɛ wɔfeɔ nɔ fɛɛ nɔ ni wɔɔnyɛ lɛ, no lɛ wɔbaanyɛ wɔna nɔmimaa akɛ susuma-muu fɛɛ sɔɔmɔ wɔkɛhaa Yehowa lɛ—ni ejeee nɔ ni shɛɛɛ loo efa fe susuma-muu fɛɛ sɔɔmɔ ni mɔ kroko ni gbɔmɔtsoŋ hewalɛ kɛ eshihilɛi ŋmɛɔ lɛ gbɛ ni ekɛ ehe woɔ be-fɛɛ sɔɔmɔ mli lɛ tsuɔ lɛ.—Mateo 13:18-23.

14. Kɛ ehe miihia ni ona yelikɛbuamɔ koni ona nɔ ni obaanyɛ okpa gbɛ diɛŋtsɛ yɛ ohe lɛ, mɛni obaanyɛ ofee?

¹⁴ Belɛ, te ooofee tɛŋŋ ona nɔ ni obaanyɛ okpa gbɛ diɛŋtsɛ kɛjɛ odɛŋ? Ekolɛ obaasumɔ ni okɛ onaanyo Kristofonyo ko ni eda yɛ mumɔŋ, ni onyɛɔ okɛ ohe fɔ̃ɔ enɔ asusu sane lɛ he, ekolɛ onukpa aloo nyɛmi yoo ni yɔɔ niiashikpamɔ, ni le onyɛmɔi, ogbɔjɔmɔi, kɛ oweku mli gbɛnaa nii. (Abɛi 15:22) Kaimɔ akɛ yɛ Nyɔŋmɔ hiɛ lɛ, jeee bɔ ni onyɛɔ otsuɔ yɛ shiɛmɔ nitsumɔ lɛ mli nɔ adamɔɔ asusuɔ bɔ ni osa akɛ mɔ aŋkro. Yehowa tsuji fɛɛ ajara wa waa kɛha lɛ. (Hagai 2:7; Maleaki 3:16, 17) Ekolɛ nɔ ni otsuɔ yɛ shiɛmɔ nitsumɔ lɛ mli lɛ baanyɛ afa fe, loo eshɛŋ nɔ ni mɛi krokomɛi tsuɔ, shi, shii abɔ ni no ji bɔ ni ohewalɛ fɛɛ baanyɛ lɛ, Yehowa naa he miishɛɛ, ni no hewɔ lɛ ehe ehiaaa ni onu he akɛ oyeɔ fɔ.—Galatabii 6:4.

Be Mli ni Ataoɔ Babaoo yɛ Wɔdɛŋ

15. Ataoɔ babaoo kɛjɛɔ asafoŋ onukpai adɛŋ yɛ mɛɛ gbɛi anɔ?

¹⁵ “Mɔ fɛɛ mɔ ni aŋɔ pii aha lɛ,” taakɛ Yesu kɛɛ lɛ, “pii aaatao yɛ edɛŋ.” (Luka 12:48) Eka shi faŋŋ akɛ ‘ataoɔ babaoo’ yɛ mɛi ni sɔmɔɔ akɛ asafoŋ onukpai lɛ adɛŋ. Taakɛ Paulo ji lɛ, amɛkɛ amɛhewalɛ fɛɛ tsuɔ nii yɛ asafo lɛ hewɔ. (2 Korintobii 12:15) Amɛyɛ wiemɔi ni esa akɛ amɛsaa amɛhe ni amɛbaha, nyɛmimɛi asaramɔi ni esa akɛ amɛya, kojomɔ saji ni esa akɛ atsu he nii—amɛbaatsu enɛɛmɛi fɛɛ, ni amɛkuuu amɛhiɛ amɛfɔ̃ɔɔ amɛ diɛŋtsɛ amɛwekui anɔ. (1 Timoteo 3:4, 5) Onukpai lɛ ekomɛi tsuɔ nii kɛyeɔ amɛbuaa Maŋtsɛyeli Asai amaamɔ, amɛsɔmɔɔ yɛ Hospital Liaison Committee sɔrɔtoi lɛ amli, ni amɛkɛ amɛhe haa kɛhaa kpeei bibii kɛ kpeei wuji ashishi nitsumɔ. Te nɛkɛ hii ni tsuɔ nii waa, ni kɛ amɛhe eha nɛɛ aaafee tɛŋŋ ni amɛkaha eetɔ amɛ yɛ gbɛnaa nii ni jwere amɛnɔ nɛɛ he nitsumɔ mli?

16. (a) Mɛɛ tsabaa ni abaanyɛ akɛtsu nii Yetro kɛha Mose? (b) Mɛɛ su baaye abua onukpa ni ekɛ mɛi krokomɛi aja gbɛnaa ni sa lɛ ahe nitsumɔ?

¹⁶ Beni Mose, nuu heshibalɔ kɛ humi lɛ gboɔ deŋme ni etɔɔ lɛ waa yɛ mɛi krokomɛi anaagbai ahe nitsumɔ mli lɛ, eshaanuu, Yetro, ha lɛ tsabaa ko ni ebaanyɛ ekɛtsu nii: ekɛ hii krokomɛi ni he esa aja gbɛnaa nii lɛ ahe nitsumɔ. (2 Mose 18:17-26; 4 Mose 12:3) Abɛi 11:2 kɛɔ akɛ: “Heshibalɔi moŋ yɔɔ nilee.” Ni mɔ ko aaaba ehe shi lɛ tsɔɔ akɛ eyooɔ egbɔjɔmɔi ni ekpɛlɛɔ nɔ. Nuu heshibalɔ shashaoo shi akɛ ekɛ nitsumɔ aaawo mɛi krokomɛi adɛŋ, ni nakai nɔŋŋ hu esheee gbeyei akɛ gbɛnaa nii ni sa ni ekɛ hii krokomɛi ni he esa aaaja lɛ baaha nɔkwɛmɔ hegbɛ ni eyɔɔ lɛ aje edɛŋ.b (4 Mose 11:16, 17, 26-29) Shi moŋ, efeɔ klalo akɛ eeeye ebua amɛ ni amɛya hiɛ.—1 Timoteo 4:15.

17. (a) Te asafo lɛ mli bii aaafee tɛŋŋ amɛha onukpai lɛ ajatsu lɛ afee huyɛɛ? (b) Mɛɛ nibii onukpai aŋamɛi kɛshaa afɔle, ni mɛɛ gbɛ nɔ wɔɔtsɔ wɔha amɛle akɛ wɔkuuu wɔhiɛ wɔshwieee amɛ afɔleshaai lɛ anɔ?

¹⁷ Asafo lɛ mli bii baanyɛ afee babaoo ni amɛkɛha onukpai lɛ ajatsu lɛ afee huyɛɛ. Kɛ mɛi krokomɛi nuɔ shishi akɛ onukpai lɛ yɛ amɛ diɛŋtsɛ amɛ wekui ni amɛkwɛɔ amɛnɔ lɛ, no lɛ ehaŋ amɛbi ni onukpai lɛ ana be kɛ deka babaoo amɛha amɛ fe bɔ ni sa. Nakai nɔŋŋ hu amɛbuŋ bɔ ni onukpai aŋamɛi jɛɔ amɛsuɔmɔ mli amɛkɛ amɛ nibii shaa afɔle, yɛ be mli ni amɛhaa amɛwumɛi kɛ bei ni kulɛ amɛaana amɛha amɛ lɛ eko tsuɔ asafo lɛ he nii lɛ akɛ nɔ ni he ehiaaa. Nyɛmi yoo ko ni hiɛ bii etɛ, ni ewu sɔmɔɔ akɛ onukpa lɛ tsɔɔ mli akɛ: “Nɔ ko ni migbigbliii mimli yɛ he kɔkɔɔkɔ ji nitsumɔ babaoo ni mijɛɔ misuɔmɔ mli mitsuɔ yɛ weku lɛ mli lɛ, bɔni afee ni miwu anyɛ asɔmɔ akɛ onukpa. Mile akɛ Yehowa jɔɔmɔi fa babaoo yɛ wɔ weku lɛ nɔ yɛ sɔɔmɔ ni esɔmɔɔ lɛ hewɔ, ni edɔɔɔ mi akɛ enaa be kɛ hewalɛ ekɛtsuɔ. Kɛlɛ, bɔ ni nibii yɔɔ diɛŋtsɛ ji akɛ, bei pii lɛ mitsuɔ shia mli nitsumɔ babaoo, ni wɔbii lɛ atsɔsemɔ bakãa minɔ babaoo fe bɔ ni kulɛ esa akɛ mafee, akɛni miwu bɛ deka ni ekɛaafee lɛ hewɔ.” Dɔlɛ sane ji akɛ, nyɛmi yoo nɛɛ na akɛ, yɛ nɔ najiaŋ ni amɛaana jatsu agbo ni kã enɔ nɛɛ moŋ lɛ, mɛi komɛi wie wiemɔi ni etsɔɔɔ henumɔ, tamɔ akɛ, “Mɛni hewɔ ni onyɛɛɛ ofee gbɛgbalɔ?” (Abɛi 12:18) Kwɛ bɔ ni ehi jogbaŋŋ akɛ wɔɔjie mɛi krokomɛi ayi yɛ nɔ ni amɛnyɛɔ amɛtsuɔ lɛ he, moŋ fe ni wɔɔwie amɛhiɛ yɛ nɔ ni amɛnyɛɛɛ amɛfee hewɔ!—Abɛi 16:24; 25:11.

Akɛni Naagbee lɛ Bako Lolo lɛ Hewɔ

18, 19. (a) Mɛni hewɔ jeee be ni akɛkpaa foijee nɛ, yɛ wala he foidamɔ lɛ mli? (b) Mɛɛ ŋaawoo ni sa jogbaŋŋ bɔfo Paulo kɛha Kristofoi ni hi Yerusalem lɛ?

¹⁸ Kɛ foidalɔ le akɛ ebɛŋkɛ foijee kakadaŋŋ ko naagbee lɛ, enijiaŋ ejeee wui. Ekolɛ egbɔmɔtso eyashɛ he ni ebaanyɛ emia ehiɛ fe fɛɛ kɛyashi—etɔ lɛ waa, latsaa miitsa lɛ, ni emli nu eta—shi akɛni ebɛŋkɛ naagbee hewɔ lɛ, jeee be ni akɛkpaa foijee lɛ nɛ. Nakai nɔŋŋ, akɛ Kristofoi lɛ, wɔmiida foi kɛha naanɔ wala jweremɔ nɔ lɛ, ni wɔbɛŋkɛ he ni agbeɔ naa yɛ lɛ kpaakpa. Jeee be ni esa akɛ wɔkɛkpa foijee lɛ nɛ!—Okɛto 1 Korintobii 9:24; Filipibii 2:16; 3:13, 14 he.

¹⁹ Kristofoi ni hi shi yɛ klɛŋklɛŋ afii oha lɛ mli lɛ kɛ shihilɛ ni tamɔ nɛkɛ kpe. Aaafee afi 61 Ŋ.B. lɛ, bɔfo Paulo ŋma wolo ko eyaha Kristofoi ni hi Yerusalem lɛ. Be lɛ miitã kwraa—eshwɛ fioo ni “yinɔ” fɔŋ, ni ji Yudafoi anibii agbɛjianɔtoo ni ekwa hemɔkɛyeli lɛ, ‘baaho aya.’ Esa akɛ Kristofoi ni hi Yerusalem lɛ titri ahiɛ ahi amɛhe nɔ jogbaŋŋ ni amɛye anɔkwa; ehe baahia ni amɛjo foi amɛshi maŋ lɛ mli kɛ amɛna akɛ asraafoi ebabɔ ŋsara amɛwo he lɛ. (Luka 21:20-24, 32) Belɛ, Paulo kɛ eŋaawoo ni jɛ mumɔŋ nɛɛ ha yɛ ebe naa pɛpɛɛpɛ, akɛ: ‘Nyɛkahaa ejea nyɛtsine ni nyɛsusumai lɛ anijiaŋ miije wui.’ (Hebribii 12:3) Bɔfo Paulo kɛ feemɔ-wiemɔi enyɔ ni mli ka shi faŋŋ tsu nii yɛ biɛ: “eje tsine” (kaʹmno) kɛ “nijiaŋ je wui” (e·klyʹo·mai). Taakɛ Biblia he woloŋlelɔ ko wie lɛ, “Aristotle” kɛ nɛkɛ Hela wiemɔi nɛɛ “tsu nii kɛkɔ foidalɔi ni gbɔjɔɔ amɛfoi mli ni amɛgbeɔ shi, yɛ be ni amɛtsɔ̃ he ni agbeɔ naa yɛ lɛ sɛɛ lɛ ahe. Mɛi ni kaneɔ [Paulo wolo] lɛ yɛ foidamɔ lɛ mli lolo. Esaaa ni amɛnijiaŋ jeɔ wui yɛ be ni esaaa mli. Esaaa ni amɛŋmɛɔ gbɛ ni amɛgbɔjɔɔ ni amɛgbeɔ shi yɛ tɔlɛ hewɔ. Akɛ hewalɛwoo miiha amɛ shikome ekoŋŋ ni amɛmia amɛhiɛ kɛji amɛkɛ jaramɔ shihilɛ miikpe.”

20. Mɛni hewɔ Paulo ŋaawoo lɛ sa kɛha wɔ ŋmɛnɛ lɛ?

²⁰ Kwɛ bɔ ni Paulo ŋaawoo lɛ sa jogbaŋŋ kɛha wɔ ŋmɛnɛ! Yɛ nɔnyɛɛ babaoo ni wɔkɛkpeɔ lɛ hewɔ lɛ, bei komɛi shɛɔ ni wɔnuɔ he tamɔ foidalɔ ko ni etɔ lɛ waa, ni enaji miihe akumɔ yɛ eshishi. Shi yɛ bɔ ni wɔbɛŋkɛ he ni agbeɔ naa yɛ kpaakpa lɛ hewɔ lɛ, esaaa ni wɔnijiaŋ jeɔ wui! (2 Kronika 29:11) Nakai pɛ wɔ Henyɛlɔ, “jata ni hũɔ” lɛ baasumɔ ni wɔfee. Shi wɔdaa shi babaoo akɛ, Yehowa eto gbɛjianɔ ni haa “mɔ ni egbɔjɔ lɛ hewalɛ.” (Yesaia 40:29) Wɔbaasusu nɔ ni nɛkɛ gbɛjianɔtoi nɛɛ ji, kɛ bɔ ni wɔɔfee ni wɔha ehe aba sɛɛnamɔ kɛha wɔ lɛ he yɛ nikasemɔ ni nyiɛ sɛɛ lɛ mli.

[Shishigbɛ niŋmai]

Mɛni Ji Ohetoo?

◻ Te wɔfee tɛŋŋ ni wɔkaha wɔnijiaŋ miije wui kɛji mɛi krokomɛi ha wɔnine nyɛ shi loo amɛfee wɔ efɔŋ?

◻ Mɛɛ susumɔ ni ŋmɛɔ pɛpɛɛpɛ yɛ fɔyeli he haŋ wɔnijiaŋ aje wui?

◻ Mɛni Yehowa kpaa gbɛ yɛ wɔdɛŋ?

◻ Heshibaa baanyɛ aye abua asafoŋ onukpai koni ekatɔ amɛ fe nine yɛ mɛɛ gbɛ nɔ?

◻ Mɛni hewɔ Paulo ŋaawoo ni yɔɔ Hebribii 12:3 lɛ sa jogbaŋŋ kɛha wɔ ŋmɛnɛ lɛ?