Ná Miishɛɛ—Naa Nɔnalɔi Amɔbɔ
“Mɔ ni gbeɔ enaanyo gbɔmɔ he guɔ lɛ, eefee esha, shi miishɛɛ ji mɔ ni naa nɔnalɔi amɔbɔ.”—ABƐI 14:21
1, 2. Mɛni ba Philippine wekui etɛ komɛi anɔ, ni enɛ baa wɔsusuɔ mɛɛ sanebimɔi ahe?
BENI Philippine wekui etɛ ko ni yɔɔ Pangasinan Niiaŋ lɛ etee Kristofoi akpee ko lɛ, la je yɛ amɛsɛɛ ni esha amɛtsui lɛ fɛɛ wɛlɛŋŋ. Amɛbana yɛ amɛsɛɛkuu mli akɛ amɛbɛ niyenii aloo wɔɔ he ko. Beni nanemɛi Kristofoi lɛ nu oshara ni eba nɛɛ he lɛ amɛkɛ oyaiyeli tao niyenii amɛbaha amɛ ni amɛto gbɛjianɔ koni amɛkɛ mɛi krokomɛi ni yɔɔ asafo lɛ mli lɛ awɔ. Enɔ jetsɛremɔ leebi pɛ ni Kristofoi lɛ ba kɛ pampolo kɛ tsumaa nibii krokomɛi. Nɛkɛ nyɛmimɛi ahe suɔmɔ nɛɛ sa akutsoŋ bii lɛ ahiɛ. Nɔkpakpa nɛɛ hu na wekui etɛ lɛ anɔ hewalɛ waa. La lɛ kpata amɛshiai ahiɛ, shi amɛhemɔkɛyeli kɛ Kristofoi asui krokomɛi lɛ je mli ni amɛdara agboi yɛ suɔmɔ mli ni mɛi krokomɛi jɛ amɛfee nii nɛɛ hewɔ—Mateo 6: 33; Okɛto 1 Korintobii 3:12-14 he.
2 Ani niiashikpamɔi ni tamɔ nɛkɛ jeee nɔ ni haa mɔ naa miishɛɛ diɛŋtsɛ kɛjɛɔ etsui mli? Amɛtswaa hemɔkɛyeli yɛ adesa mlihilɛ mli lɛ amɛmaa shi kɛ́ agbɛnɛ titri lɛ, yɛ hewalɛ ni Kristojamɔ diɛŋtsɛ yɔɔ lɛ mli. (Bɔfoi lɛ Asaji 28:2) Shi ani wɔle Ŋmalɛ nɔdaamɔ nɔ kɛha su ni ji akɛ ‘wɔfee mɛi fɛɛ ejurɔ shi titri lɛ mɛi ni kɛ wɔ yɔɔ hemɔkɛyeli lɛ mli lɛ’? (Galatabii 6:10) Ni te wɔɔfee tɛŋŋ ni wɔ diɛŋtsɛ lɛ wɔɔfee babaoo yɛ enɛ gbɛfaŋ?
Nɔkwɛmɔ Nɔ Ni Ekaaa Kɛha Wɔ
3. Mɛɛ nɔmimaa wɔbaanyɛ wɔna yɛ bɔ ni Yehowa susuɔ wɔhe lɛ he?
3 Kaselɔ Yakobo kɛɔ wɔ akɛ: “Duromɔ nii kpakpai fɛɛ kɛ nikee nii ni hi kɛwulaa shi fɛɛ lɛ, ŋwɛi ejɛɔ ekpelekeɔ shi” (Yakobo 1:17) Kwɛ bɔ ni enɛ ji anɔkwale ha ejaakɛ Yehowa haa wɔ mumɔŋ kɛ heloonaa nibii kpakpai babaoo! Shi te nɔ ni ekɛyeɔ klɛŋklɛŋ gbɛhe lɛ hu? Mumɔŋ nibii. Akɛ nɔkwɛmɔ nɔ lɛ, Lɛ ji mɔ ni kɛ Biblia lɛ ha wɔ bɔni afee ni wɔna mumɔŋ gbɛtsɔɔmɔ kɛ hiɛnɔkamɔ. Nakai hiɛnɔkamɔ lɛ damɔ e-Bi lɛ ni ekɛha wɔ akɛ nikeenii lɛ nɔ, ni efɔleshaa lɛ ji nɔ ni adamɔɔ nɔ akɛ wɔhe eshai keɔ wɔ ni wɔnaa naanɔ gbɛkpamɔ hu lɛ—Yohane 3:16; Mateo 20:28.
4. Eka shi faŋŋ akɛ Nyɔŋmɔ susuɔ wɔ heloo gbɛfaŋ hiamɔ nii ahe yɛ mɛɛ gbɛ nɔ?
4 Yehowa yɛ wɔheloo gbɛfaŋ nibii ahe miishɛɛ. Bɔfo Paulo kɛ mɛi ni yɔɔ blema Listra lɛ wie enɛ he. Eyɛ mli akɛ amɛjeee anɔkwale jalɔi moŋ, shi amɛnyɛŋ amɛkpoo anɔkwale ni eji akɛ Bɔlɔ lɛ ‘efee ejurɔ, ni ehawɔ nu ni nɛɔ kɛjɛɔ ŋwɛi kɛ tsei ni woɔ yibii ni ekɛ niyenii kɛ ejurɔ woɔ wɔtsuii amli obɔ lɛ.’ (Bɔfoi lɛ Asaji 14:15-17) Yehowa jɛɔ suɔmɔ mli ekɛ wɔmumɔŋ hiamɔ nii haa ni etoɔ gbɛjianɔ hu kɛhaa wɔgbɔmɔtsoŋ wala nɛɛ mli hiamɔ nii. Ani osusuuu akɛ enɛ fata he ni efeɔ “miishɛɛ Nyɔŋmɔ” lɛ?—1 Timoteo 1:11, NW.
5. Mɛni Wɔbaanyɛ wɔkase kɛjɛ bɔ ni Nyɔŋmɔ kɛ blema Israel ye ha lɛ mli?
5 Gbɛ ni Nyɔŋmɔ tsɔ nɔ ekɛ blema Israel ye lɛ tsɔɔ bɔ ni etsu ejalɔi lɛ amumɔŋ hiamɔ nii kɛ amɛheloo naa hiamɔ nii ahe nii yɛ gbɛ ni ŋmɛɔ pɛpɛɛpɛ nɔ lɛ. Klɛŋklɛŋ lɛ, ekɛ Mla lɛ ha ewebii lɛ. Esa akɛ emaŋtsɛmɛi lɛ aŋmala Mla lɛ ekomɛi amɛha amɛ diɛŋtsɛ amɛhe,ni abua gbɔmɛi lɛ anaa yɛ be kɛ bei amli ni amɛbo Mla lɛ kanemɔ toi (5 Mose 17:18; 31:9-13) Mla lɛ bi ni ana kpee buu loo sɔlemɔ we koni osɔfo lɛ atsu afɔleshai ahe nii bɔni ofee ni gbɔmɛi lɛ aŋa Nyɔŋmɔ hiɛ duromɔ Israelbii lɛ buaa amɛhe naa amɛhaa mumɔ gbijurɔyeli yɛ be fɛɛ mli, ejaakɛ nomɛi ji henaabuamɔ titri yɛ amɛ afi jamɔ mli. (5 Mose 16:1-17) Yɛ enɛɛmɛi fɛɛ hewɔ lɛ, Israelbii aŋkroaŋkroi lɛ baanyɛ atsɔmɔ mumɔŋ niiatsɛmɛi yɛ Nyɔŋmɔ hiɛ
6, 7. Yehowa jie bɔ ni esusuɔ Israelbii agbɔmɔtsoŋ hiamɔ nii ahe yɛ Mla lɛ mli lɛ kpo yɛ mɛɛ gbɛ nɔ?
6 Mla lɛ hu tsɔɔ bɔ ni Nyɔŋmɔ gbalaa ejwɛŋmɔ kɛyaa etsuji agbɔmɔtsoŋ hiamɔ nii anɔ ekolɛ nɔ ni baa ojwɛŋmɔ mli ji Mlai ni akɛha Israel ni kɔɔ falefale shihilɛ he kɛ nɔ ni esa akɛ amɛfee ni amɛtsi helai ni gbɛɔ shwaa lɛ anaa lɛ. (5 Mose 14:11-21; 23:10-14) Ni kɛlɛ esaaa akɛ wɔkuɔ wɔhiɛ wɔshweɔ gbɛjianɔ krɛdɛɛ ni Nyɔŋmɔ to koni akɛye abua ohiafoi kɛ nɔnalɔi lɛ anɔ. Hela loo oshara tamɔ la loɔ nu afua baanyɛ aha Israelnyo atsɔ ohiafo. Yehowa jaje yɛ e-Mla lɛ mli akɛ jeee mɔ fɛɛ mɔ baana heloo gbɛfaŋ nibii pɛpɛɛpɛ. (5 Mose 15:11) Shi efee babaoo fe ni eeena ohiafoi kɛ nɔnalɔi lɛ amɔbɔ kɛkɛ. Eto gbɛjianɔ kɛha yelikɛbuamɔ.
7 Niyenii ji nɔ ni baafee gbɔmɛi ni tamɔ nɛkɛ lɛ ahiamɔ nii titri. No hewɔ lɛ, Nyɔŋmɔ fa akɛ ohiafoi ni yɔɔ Israel lɛ yɛ hegbɛ akɛ amɛyeɔ kpɛkpɛo yɛ ŋmɔshi kɛ mutsei ayibii anɔ kɛ agbɛnɛ weintrom mli yibii amli (5 Mose 24:19-22; 3 Mose 19:9, 10; 23:22) Nyɔŋmɔ gbɛ lɛ wooo gbɔmɛi lɛ ahewalɛ ni amɛfee hejɔlɔi aloo amɛye nɔ ni gbɔmɛi kɛkeɔ amɛ lɛ yɛ be mli ni amɛbaanyɛ amɛtsu nii. Ebiɔ ni Isrealnyo ni yeɔ kpɛkpɛo lɛ abɔ mɔdɛŋ diɛŋtsɛ, ekolɛ efite ŋmɛlɛtswai abɔ yɛ hulu ni tsoɔ waa lɛ shishi koni ekɛbua eniyenii anaa kɛha gbi lɛ. Shi esaaa akɛ wɔkuɔ wɔhiɛ wɔshwieɔ nɔ akɛ Nyɔŋmɔ tsɔ mlihilɛ gbɛ nɔ eto gbɛjianɔ eha ohiafo lɛ yɛ nɛkɛ gbɛ nɔ.—Okɛto Rut 2:2-7; Lala 69:33; 102:18 he.
8. (a) Mɛni ji nɔ ni afa Yudafoi aŋkroaŋkroi ni amɛfee amɛha amɛnyɛmimɛi? (Okɛto Yeremia 5:26, 28 he.) (b) Te obaanyɛ okɛ subaŋ ni Nyɔŋmɔ wo he hewalɛ kɛha Yudafoi lɛ ato nɔ ni yɔɔ ŋmɛnɛ lɛ he oha tɛŋŋ?
8 Yehowa tee nɔ etsɔɔ miishɛɛ ni eyɔɔ yɛ nɔnalɔi lɛ ahe ekoŋŋ kɛtsɔ wiemɔi tamɔ nɔ ni yɔɔ Yesaia 58:6, 7 ni eha ajaje lɛ nɔ. Yɛ bɔ mli ni Israelbii lɛ ateŋ mɛi komɛi atsui enyɔ amɛmli ni amɛkwaa amɛfeɔ amɛhe mɛi ni miihi ŋmaa lɛ, Nyɔŋmɔ gbalɔ lɛ jaje akɛ: “Ani jeee enɛ ji ŋmaahilɛ ni sa mihiɛ? Akɛ nyɛfɛne efɔŋfeemɔ kpai lɛ ni nyɛkpɔlɔ gbokɛlɛi lɛ, nyɛha mɛi ni awaa amɛyi lɛ aye amɛhe, ni nyɛku apa fɛɛ mli? Ani jeee no ji akɛ okɛ oboloo akũma mɔ ni hɔmɔ yeɔ lɛ, ni oŋɔ ohiafoi ni bɛ shihilɛ he lɛ kɛba owe, ni kɛ ona mɔ ko nyiɛ lɛ, oha mama ni okɛ ohe akatee bo diɛŋtsɛ oheloo?” Ŋmɛnɛ, aŋkroaŋkroi komɛi buɔ nɔ ni aaanyɛ atsɛ lɛ ‘amɛmiishɛɛ shihilɛ’ lɛ he. Amɛmiisumɔ ni amɛyɛ amɛbua mɔ ni ehia lɛ lɛ shi ja no tsɔɔ akɛ amɛkɛ nɔ ko eshaŋ afɔle aloo nɔ ko gbaŋ amɛnaa yɛ enɛ mli da. Mɛɛ mumɔ ni yɔɔ sɔrɔto ama nɔ mi yɛ Nyɔŋmɔ wiemɔi ni etsɔ Yesaia nɔ ekɛha lɛ mli nɛkɛ!—Kwɛmɔ Ezekiel 18:5-9 hu.
9. Mɛni ji nɔ ni Mla lɛ wo ŋaa yɛ he yɛ shikafaa he, ni mɛɛ subaŋ Nyɔŋmɔ wo he hewalɛ?
9 Abaanyɛ ajie bɔ ni asusuɔ Israel nyɛmimɛi ohiafoi lɛ ahe Iɛ kpo kɛtsɔ shika ni akɛfaa amɛ lɛ nɔ. Israelnyo ni kɛ shika faa mɔ ni kɛ shika lɛ baatsu nii ni ekɛlɛɛ enitsumɔ mli lɛ baakpa hekpa gbɛ kɛjɛ nɛkɛ mɔ nɛɛ dɛŋ. Shi Yehowa kɛɛ akɛ akahe hekpa, kɛmiijɛ shika ni akɛfa ohiafo ni ji nyɛmi,ni ehao ni bɔ ni ehao lɛ baaha efee efɔŋ lɛ dɛŋ.(2 Mose 22 :25; 5 Mose 15:7, 8, 11; 23:19, 20; Abɛi 6:30, 31) Su ni Nyɔŋmɔ hiɛ yɛ ohiafoi ahe lɛ baafee nɔkwɛmɔ nɔ aha ewebii lɛ. Awoɔ shi po akɛ: “Mɔ ni naa ohiafo mɔbɔ lɛ ekɛmiifa Yehowa, ni nɔ ni eŋɔhaa lɛ, eeeto lɛ najiaŋ” (Abɛi 19:17) Bo lɛ susumɔ enɛ he—akɛ okɛmiifa Yehowa kɛ nɔmimaa akɛ ebaawo bo nyɔmɔ babaoo ekoŋŋ!
10. Yɛ be mli ni osusu Nyɔŋmɔ nɔkwɛmɔ nɔ lɛ he lɛ, mɛɛ sane obaanyɛ obi bo diɛŋtsɛ ohe?
10 No hewɔ lɛ esa akɛ wɔ fɛɛ wɔbi akɛ: Bɔni Nyɔŋmɔ buɔ ni efeɔ nɔnalɔi lɛ tsɔɔ mɛni kɛha mi? Ani miikase nii kɛmiijɛ enɔkwɛmɔ nɔ ni yeɔ emuu lɛ mli ni miibɔ mɔdɛŋ makase? Ani manyɛ mamia mihiɛ yɛ Nyɔŋmɔ subaŋ nɔ ni abɔmi yɛ yɛ enɛ mli lɛ gbɛfaŋ?—1 Mose 1:26.
Bɔ Ni Tsɛ Lɛ Yɔɔ Lɛ Nakai Bi Lɛ Yɔɔ
11. Yɛ mɛɛ gbɛ nɔ bɔ ni Yesu susuɔ mɛi ahe lɛ tamɔ e-Tsɛ lɛ nɔŋŋ? (2 Korintobii 8:9)
11 Yesu Kristo “ji [Yehowa] enunyam lɛ kpɛmɔ kɛ esu lɛ henɔ.” (Hebribii 1:3) No hewɔ lɛ, wɔbaakpa lɛ gbɛ akɛ ebaajie su ni e-Tsɛ yɔɔ yɛ mɛi ni yɔɔ anɔkwale jamɔ he miishɛɛ lɛ kpo. Efee nakai. Yesu tsɔɔ akɛ ohia ni he hiaa fe fɛɛ akɛ ana enaa tsabaa lɛ ji mumɔŋ ohia: “Miishɛɛ ji mɛi ni amɛhiɛ yɔɔ amɛmumɔŋ nibii ni he hiaa amɛ lɛ ana Iɛ, ejaakɛ ŋwɛi maŋtsɛyeli lɛ ji amɛ nɔ.” (Mateo 5:3; Okɛto Luka 6:20, NW he.) Kristo kɛɛ hu akɛ: “Enɛ hewɔ afɔmi, ni enɛ nɔŋŋ hewɔ miba je lɛ mli, koni maye anɔkwale lɛ he odase.” (Yohane 18:37) No hewɔ lɛ, aleee lɛ akɛ naakpɛɛ nitsulɔ loo tsalɔ pɛ kɛkɛ, shi moŋ, akɛ Tsɔɔlɔ. (Marko 10:17-21; 12:28-33) Kadimɔ Marko 6:30-34 yɛ enɛ gbɛfaŋ. Wɔkaneɔ be ko ni Yesu yatee ehe fioo koni eyajɔɔ ehe lɛ he sane. Kɛkɛ ni “ena mɛi babaoo [ni] tamɔ toi ni bɛ kwɛlɔ.” Te efee enii yɛ amɛhe eha tɛŋŋ? “ Ni ebɔi amɛ nibii pii tsɔɔmɔ.” Hɛɛ, Yesu kɛ ehe ha amɛ ni ekɛkpee amɛhiamɔ nii ni fe fɛɛ lɛ naa: anɔkwale ni baaha amɛhi shi kɛya naanɔ—Yohane 4:14; 6:51.
12. Mɛni wɔbaanyɛ wɔkase kɛjɛ jwɛŋmɔ ni Yesu hiɛ lɛ mli yɛ Marko 6:30-34 kɛ Marko 6:35-44?
12 Yɛ be mli ni Yesu gbala ejwɛŋmɔ kɛtee Yudafoi heshibalɔi lɛ amumɔŋ hiamɔ nii anɔ lɛ, ekuuu ehiɛ eshwieee amɛheloo gbɛfaŋ hiamɔ nii anɔ. Marko sane lɛ tsɔɔ akɛ Yesu hiɛ yɛ niyenii diɛŋtsɛ ni he hiaa gbɔmɛi lɛ anɔ, Bɔfoi lɛ tsɔ hiɛ amɛwo ŋaa akɛ awo asafoi lɛ agbɛ ni amɛya, “ni amɛyahe nii amɛye.” Yesu ekpɛlɛɛɛ nɔ. Kɛkɛ ni bɔfoi lɛ bi akɛ ani amɛbaanyɛ amɛkɛ shika ni amɛyɔɔ lɛ eko ayahe niyenii lo. Shi, Yesu hala moŋ, akɛ, eeefee naakpɛɛ nii ko ni he gbɛi ni no nɔ etsɔ elɛ hii 5,000 ni yei kɛ gbekɛbii fata he, kɛtsɔ aboloo kɛ loo pɛ nɔ lɛ. Ŋmɛnɛ mɛi komɛi baasusu akɛ ewaaa kɛhaaa Yesu akɛ eeetsu asafo babaoo lɛ ahiamɔ nii ahe nii yɛ naakpɛɛ gbɛ nɔ. Ni kɛlɛ, wɔkaku wɔhiɛ wɔshwie anɔkwale ni eji akɛ esusu gbɔmɛi lɛ ahe waa, ni etsu no he nii lɛ nɔ.—Marko 6:35-44; Mateo 14: 21.a
13. Mɛɛ odaseyeli kroko Yesu kɛha ni tsɔɔ bɔ ni esusuɔ mɛi ahe?
13 Eka shi faŋŋ akɛ okane Ŋmalɛ lɛ mli saji ni yeɔ odase akɛ henumɔ ni Yesu yɔɔ kɛha mɛi ni efi amɛ lɛ tekeɔ ohiafoi pɛ kɛkɛ. Eye ebua helatsɛmɛi kɛ nɔnalɔi. (Luka 6:17-19; 17:12-19; Yohane 5:2-9; 9:1-7) Ní asaŋ ejeee sane ni kɔɔ tsamɔ ni etsaa mɛi ni bɛŋkɛ lɛ lɛ pɛ he. Yɛ bei komɛi amli lɛ efaa gbɛ kɛyaa helatsɛ lɛ ŋɔɔ bɔni afee ni eye ebua lɛ.—Luka 8:41-55.
14, 15. (a) Mɛni hewɔ wɔbaanyɛ wɔna nɔmimaa akɛ Yesu miikpa gbɛ akɛ esɛɛnyiɛlɔi lɛ baajie mɛi ahe susumɔ kpo taakɛ efee lɛ? (b) Wɔɔfee jogbaŋŋ kɛ wɔbi wɔhe mɛɛ sane?
14 Shi ani ohiafoi kɛ nɔnalɔi kaselɔi (ni taoɔ anɔkwale lɛ) ahiamɔ nii lɛ ahe nitsumɔ yɛ kɛha mɛi pɛ ni baanyɛ atsɔ naakpɛɛ nifeemɔ nɔ amɛkɛ nɔ ko aha lɛ? Dabi, esa akɛ sane lɛ aka Yesu kaselɔi lɛ fɛɛ nɔ ni amɛtsu he nii amrɔ nɔŋŋ. Akɛ nɔkwɛmɔ nɔ lɛ, ewo niiatsɛ ko ni miitao naanɔ wala lɛ hewalɛ akɛ: “Yaahɔɔ nibii fɛɛ ni oyɔɔ lɛ ni oŋɔ-ja ohiafoi, ni ooona jwetri yɛ ŋwɛi.” (Luka 18:18-22) Yesu wo ŋaa hu akɛ: “Shi kɛ, ooŋmɛ okpɔlɔ lɛ, kpeemɔ ohiafoi kɛ kpajelɔi kɛ akpakei kɛ shwilafoi moŋ, ni aaajɔɔo, akɛni amɛ lɛ amɛbɛ nɔ ko ni amɛkɛaatoo najiaŋ lɛ; ejaakɛ aaatoo najiaŋ yɛ jalɔi ashitee lɛ mli.”—Luka 14:13, 14.
15 Kristofonyo lɛ ji Kristo sɛɛnyiɛlɔ, no hewɔ lɛ, wɔteŋ mɔ fɛɛ mɔ baanyɛ abi akɛ: Nɛgbɛ mikase Yesu sui kɛ nifeemɔi yɛ ohiafoi, nɔnalɔi, kɛ mɛi ni efi amɛ lɛ ahe nii kɛyashɛ? Ani manyɛ mawie yɛ anɔkwayeli mli, taakɛ bɔfo Paulo fee lɛ: “Nyɛkasea mi taakɛ bɔ ni mi hu mikaseɔ Kristo lɛ”?—1 Korintobii 11:1.
Paulo—Nɔkwɛmɔ Nɔ Ni Yɔɔ Miishɛɛ
16. Mɛni ji nɔ ni bɔfo Paulo naa he miishɛɛ waa?
16 Esa jogbaŋŋ akɛ wɔkɛ Paulo aaawo enɛ hu mli, ejaakɛ lɛ hu eji nɔkwɛmɔ nɔ kpakpa ni esa akɛ akase Taakɛ wɔbaakpa gbɛ lɛ, nɔ ni egbala ejwɛŋmɔ kɛtee nɔ titri ji mɛi krokomɛi amumɔŋ hiamɔ nii. Eji ‘bɔfo ni damɔ Kristo najiaŋ, ekpaa mɛi krokomɛi fai akɛ,“Nyɛhaa ekpataa nyɛ kɛ Nyɔŋmɔ teŋ.” ‘(2 Korintobii 5:20) Paulo nitsumɔ krɛdɛɛ ji ni eshiɛ ni etswa, asafoi emamɔ shi yɛ mɛi ni jeee Yudafoi lɛ ateŋ. Eŋma akɛ: “Atu foolɔi ateŋ sanekpakpa lɛ jajemɔ lɛ awo midɛŋ”—Galatabii 2:7.
17. Te wɔfeɔ tɛŋ wɔleɔ akɛ Paulo gbala ejwɛŋmɔ kɛtee gbɔmɔtsoŋ jamɔ nii anɔ hu?
17 Shi akɛni Paulo kɛɛ akɛ eekase Kristo hewɔ lɛ, ani etsu enanemɛi jalɔi lɛ agbɔmɔtsoŋ piŋmɔi loo naagbai lɛ ahe nii (taakɛ Yehowa kɛ Yesu fɛɛ lɛ) ? Ha Paulo diɛŋtsɛ aha hetoo. Etee nɔ yɛ Galatabii 2:9 akɛ: ‘Yakobo kɛ Kefa [Petro] kɛ Yohane kɛ naanyobɔɔ ninejurɔ lɛ ta mi kɛ Barnaba dɛ akɛ wɔya jeŋmaji lɛ aŋɔɔ.’ Kɛkɛ ni Paulo kɛfata he yɛ kuku ni nyiɛ sɛɛ lɛ mli akɛ: “Shi ohiafoi kɛkɛ amɛkɛɛ wɔkai, no nɔŋŋ he mɔdɛŋ mibɔɔ akɛ mafee.” (Galatabii 2:10) No hewɔ lɛ Paulo le akɛ, eyɛ mli akɛ eji maŋsɛɛ sanekpakpa shiɛlɔ kɛ bɔfo ni asafoi babaoo agbɛnaa nii ka enɔ moŋ, shi enyɛŋ efee mɔ ni bɛ deka tsɔ ni yɛ no hewɔ lɛ, ebɛ enyɛmimɛi hii kɛ yei lɛ agbɔmɔtsoŋ hiamɔ nii ahe miishɛɛ
18. Mɛɛ “ohiafoi” nɛkɛ eka shi faŋŋ akɛ Paulo wieɔ amɛhe yɛ Galatabii 2:10 lɛ, ni mɛni hewɔ eka shi faŋŋ akɛ atsu amɛhiamɔ nii ahe nii lɛ?
18 Eeenyɛ eba akɛ, “ohiafoi” ni ewie amɛhe yɛ Galatabii 2:10 lɛ ji Yudafoi Kristofoi titri ni yɔɔ Yerusalem kɛ Yudea lɛ. Dani enɛ aaaba lɛ “huhuuhu wiemɔ ko bate shi yɛ Helenbii lɛ ateŋ yɛ Hebribii lɛ ahewɔ, ejaakɛ hiɛ kpaa amɛkulafoyei lɛ anɔ yɛ daa kwɛmɔ [kɛ niyenii] lɛ gbɛfaŋ.” (Bɔfoi lɛ Asaji 6:1) No hewɔ lɛ, yɛ be mli ni etsiɔ bɔfo kɛha jeŋmaji ni eji lɛ ta lɛ, Paulo fee lɛ faŋŋ akɛ ekuuu ehiɛ eshwieee mɔ ko nɔ yɛ Kristofoi anyɛmifeemɔ lɛ mli. (Romabii 11:13) Ele akɛ nyɛmimɛi lɛ aheloo naa kwɛmɔ fata wiemɔi nɛɛ ahe: “Koni mligbalamɔ akaba gbɔmɔtso lɛ mli, shi he nii lɛ abaabaa amɛhe yi pɛpɛɛpɛ, ni kɛji henɔ kome miina nɔ lɛ, henii lɛ fɛɛ kɛ lɛ naa nɔ.”—1 Korintobii 12:25, 26.
19. Mɛɛ odaseyeli wɔyɔɔ ni tsɔɔ akɛ Paulo kɛ mɛi krokomɛi tsii ohiafoi ni amɛsusuɔ amɛhe lɛ ahiamɔ nii ahe nii?
19 Beni Kristofoi ni yɔɔ Yerusalem kɛ Yudea lɛ naa amanehulu yɛ ohia, hɔmɔ ni ba jɛmɛ, aloo yiwaa hewɔ lɛ, asafoi komɛi ni yɔɔ shɔŋŋ lɛ baye bua amɛ. Eka shi faŋŋ akɛ amɛkai amɛnyɛmimɛi ni ehia amɛ lɛ yɛ sɔlemɔ mli koni Nyɔŋmɔ ayɛ abua amɛ ni eshɛje amɛmii. Shi amɛwaaa jɛmɛ pɛ kɛkɛ. Paulo ŋma akɛ “Makedonia kɛ Akaia fɛɛ kɛ tsuijurɔ etsu onia ko amɛyaha krɔŋkrɔŋ bii ni yɔɔ Yerusalem lɛ ateŋ ohiafoi lɛ.” (Romabii 15:26, 27) Mɛi ni kɛ shika ni tamɔ nɛkɛ yeɔ buaa amɛnyɛmimɛi nɔnalɔi lɛ etsɔmɔ “niiatsɛmɛi yɛ nɔ fɛɛ nɔ mli, . . ni atsɔ wɔ nɔ akɛ shidaa aha Nyɔŋmɔ.” (2 Korintobii 9:1-13) Ani enɛ efeŋ nɔ ni abaadamɔ nɔ ana miishɛɛ lo?
20. Mɛni hewɔ nyɛmimɛi ni tsu onia koni akɛye abua “ohiafoi” lɛ baanya ana miishɛɛ lɛ?
20 Nyɛmimɛi ni kɛ shika ke “krɔŋkrɔŋ bii ni yɔɔ Yerusalem lɛ ateŋ ohiafoi lɛ” yɛ nɔ kroko hu ni amɛbaadamɔ nɔ amɛna miishɛɛ. Nɔnalɔi lɛ ni amɛkwɛ amɛ lɛ baaye abua mɛi ni tsu onia lɛ ni amɛna Nyɔŋmɔ nɔkpɛlɛmɔ. Wɔbaanyɛ wɔna nɔ hewɔ ni Hela wiemɔ ni atsɔɔ shishi akɛ ‘oniatsumɔ’ yɛ Romabii 15:26 kɛ 2 Korintobii 9:13 lɛ hiɛ jwɛŋmɔ ko ni ji “naanyobɔɔ he okadi, nyɛmimɛi ekomefeemɔ he odaseyeli kɛ nikee” po lɛ. Akɛtsuɔ nii yɛ Hebribii 13:16, (NW) ni kɛɔ akɛ: “Nyɛhiɛ aka kpaa ejurɔfeemɔ kɛ nii ni nyɛkɛaake mɛi krokomɛi lɛ nɔ, ejaakɛ afɔlei ni tamɔ nɛkɛ lɛ saa Nyɔŋmɔ hiɛ jogbaŋŋ.”
Ani Wɔbaana Miishɛɛ?
21. Mɛɛ sane naa wɔbaanyɛ wɔmu akɛ no baaha wɔ nɔdaamɔ nɔ kɛha miishɛɛnamɔ?
21 Wɔtao Ŋmalɛ mli odaseyeli lɛ mli yɛ nɔ ni wɔsusu he nɛɛ mli akɛ Yehowa Nyɔŋmɔ, Yesu Kristo kɛ bɔfo Paulo susuɔ nɔnalɔi lɛ ahe. Wɔyoɔ akɛ amɛteŋ mɔ fɛɛ mɔ yɔseɔ akɛ ehe hiaa ni asusu mumɔŋ nibii ahe klɛŋklɛŋ. Shi eji anɔkwale hu akɛ amɛ fɛɛ amɛtsɔɔ miishɛɛ ni amɛyɔɔ yɛ ohiafoi, helatsɛmɛi, kɛ mɛi ni amanehulu baa amɛnɔ lɛ ahe yɛ gbɛi krɛdɛɛ nɔ. Amɛnaa miishɛɛ yɛ yelikɛbuamɔ diɛŋtsɛ ni amɛkɛhaa Iɛ mli. Ani esaaa akɛ enɛ feɔ anɔkwale yɛ wɔhe lo? Bɔfo Paulo wo wɔ hewalɛ koni wɔkai “Nuŋtsɔ Yesu wiemɔi lɛ, akɛ lɛ diɛŋtsɛ ekɛɛ: ‘Nɔ hamɔ mli yɛ miishɛɛ fe hemɔ.’”—Bɔfoi lɛ Asaji 20:35, NW.
22. Mɛni yɔɔ sane nɛɛ mli ni biɔ ni ogbala ojwɛŋmɔ kɛya nɔ lolo?
22 No hewɔ lɛ, obaabi jogbaŋŋ akɛ: “Belɛ mɛni ji nɔ ni mi diɛŋtsɛ lɛ manyɛ mafee? Te mafee tɛŋŋ ni male mɛi ni ehia amɛ diɛŋtsɛ lɛ? Te mafee tɛŋŋ ni mikɛ yelikɛbuamɔ ni wooo hejɔfeemɔ he hewalɛ, ni mlihilɛ yɔɔ mli, ni sa, ni susuɔ mɛi krokomɛi ahenumɔi ahe, ni kɛ nii-Kristofoi anitsumɔ akɛ migbɛ sanekpakpa lɛ mishwã lɛ kpaa gbɛɛ aha? Nikasemɔ ni nyiɛ sɛɛ nɛɛ baatsu saji nɛɛ ahe nii ekɛ nɔ ni obaanyɛ odamɔ nɔ ona miishɛɛ babaoo ofata he aha.
[Shishigbɛ niŋmai]
a Nɔ ni yɔɔ miishɛɛ ji akɛ, Yesu diɛŋtsɛ hiɛ gbooo aloo ni eeefee mɔ ni woɔ ehe nɔ tsɔ akɛ eeekpɛlɛ heloo gbɛfaŋ yelikɛbuamɔ ni jɛ mɛi krokomɛi adɛ lɛ nɔ.—Luka 5:29; 7:36, 37; 8:3.
Ajie kɛjɛ October 15, 1986 Watchtower lɛ mli.
Ani Okadi?
◻ Yɛ mɛɛ gbɛ nɔ Nyɔŋmɔ yeɔ miishɛɛ ni eyɔɔ yɛ wɔmumɔŋ hiamɔ nii kɛ agbɛnɛ wɔgbɔmɔtsoŋ hiamɔ nii ahe lɛ he odase?
◻ Mɛni tsɔɔ akɛ Yesu susuɔ nibii babaoo he fe ni eeetsɔɔ amɛ anɔkwale lɛ pɛ?
◻ Mɛɛ nɔkwɛmɔ nɔ Paulo kɛfo shi yɛ ohiafoi ahe?
Yɛ he mli ni osusu Yehowa, Yesu kɛ bɔfo Paulo nɔkwɛmɔ nii lɛ ahe lɛ, mɛni ona akɛ ehe miihia ni ofee?
[Mfoniri ni yɔɔ baafa 13]
Esa okɛ Kristofoi onukpai kɛ mɛi krokomɛi kɛ Yesu ŋaawoo ni yɔɔ Luka 14:13, 14 lɛ otsu nii