Je Muu Fɛɛ Gbɛjianɔtolɔ Lɛ Ni Wɔkɛ Lɛ Aaatsu Nii
“Ejaakɛ Nyɔŋmɔ hefatalɔi nitsulɔi ji wɔ; Nyɔŋmɔ ŋmɔ, Nyɔŋmɔ tsu ji nyɛ.”—1 KORINTOBII 3:9.
1. Mɛɛ wiemɔ ko ni akɛtsu nii fe afii 60 ni eho nɛ ha mɛi ni nu lɛ na miishɛɛ, ni mɛɛ hewalɛ ena yɛ Biblia Kaselɔi ni kɛ hiɛdɔɔ tsuɔ nii yɛ nakai be lɛ mli lɛ anɔ?
1 “NYƆŊMƆ GBƐJIANƆTOO.” Buu Mɔɔ Asafo lɛ woji aŋmalalɔi lɛ ateŋ mɔ kome kɛ nakai wiemɔ lɛ tsu nii yɛ Biblia lɛ he susumɔ daa gbi ni afeɔ lɛ shishi yɛ be mli ni Betel weku lɛ yeɔ nii nɔ ni fe afii 60 ni eho nɛ. Ebafee sane ni Betel weku lɛ ni yɔɔ Asafo lɛ yitso yɛ Brooklyn, New York lɛ nyã he waa diɛŋtsɛ! Nakai wiemɔ kuku, ni ji “Nyɔŋmɔ gbɛjianɔtoo” lɛ bafee nɔ ko ni baakudɔ nakai Biblia Kaselɔi lɛ ajwɛŋmɔ, wiemɔ kɛ niŋmaa yɛ wɔsɛɛ be mli. Eha amɛmumɔŋ ninaa mli balɛɛ waa yɛ bɔɔ nii fɛɛ he ni ená hewalɛ kpele yɛ su ni amɛhiɛ yɛ je muu fɛɛ Gbɛjianɔtolɔ ni he yɔɔ naakpɛɛ lɛ, Yehowa Nyɔŋmɔ he.
2. Yɛ bɔ ni eji yɛ Hela wiemɔ mli lɛ hewɔ lɛ, mɛɛ gbɛ nɔ aaatsɔ atsɔɔ wiemɔ “gbɛjianɔtoo” mli aha?
2 Enɛ baafee naakpɛɛ sane ŋmɛnɛ, ejaakɛ nakai wiemɔ ni ji “gbɛjianɔtoo” lɛ ji wiemɔ ko ni Yehowa Odasefoi ni sumɔɔ hegbɛ ni amɛna akɛ amɛkɛ je muu fɛɛ Gbɛjianɔtolɔ lɛ aaatsu nii lɛ kɛtsuɔ nii daa. (1 Korintobii 3:5-9) Ana wiemɔ, “gbɛjianɔtoo” lɛ kɛjɛ Hela wiemɔ, orʹga·non mli. Nɔ ni edamɔ shi kɛha kɛfata nibii krokomɛi ahe ji dɛŋdade aloo nitsumɔ dade ko ni akɛtsuɔ nii agbeɔ naa. Ejeɔ kpo shii abɔ yɛ Septuagint Version lɛ mli ni akɛtsuɔ nii akɛtoɔ saŋku loo bɛlɛ ko he tamɔ David kpãi asaŋku lɛ nɛkɛ. Wiemɔ nɛɛ shishifa jɛ erʹgon ni eshishi ji “nitsumɔ” mli. No hewɔ lɛ gbɛjianɔtoo tsɔɔ nibii anaabuamɔ koni akɛfee nɔ ko loo akɛtsu nɔ ko yɛ gbɛ ni hi jogbaŋŋ nɔ ni be kɛ hewalɛ fitemɔ bɛ mli tsɔ̃.
Mra Be Mli Jwɛŋmɔ Ni Ahiɛ Yɛ Gbɛjianɔtoo He
3. Mɛni ji nɔ ni wolo tɛtrɛɛ nɛɛ nɔ̃ ni afee yɛ March 1888 lɛ wie yɛ “wɔ gbɛjianɔtoo” lɛ he?
3 Shi ewa kɛha Biblia Kaselɔi lɛ, yɛ afii komɛi ni eho lɛ amli, akɛ amɛkɛ wiemɔ “gbɛjianɔtoo” aaatsu nii loo amɛkɛ aaato nɔ ko he. Akɛ nɔkwɛmɔ nɔ lɛ, awie yɛ March 1883 Blɔfo Buu Mɔɔ lɛ mli akɛ:
“Eyɛ mli akɛ gbɔmɔ adesa nyɛŋ ana wɔ gbɛjianɔtoo lɛ moŋ, ejaakɛ enyɛŋ enu Nyɔŋmɔ Mumɔ lɛ nibii ashishi, shi wɔheɔ wɔyeɔ akɛ obaanyɛ ona akɛ anɔkwale Sɔlemɔ lɛ ji nɔ ni ato he gbɛjianɔ jogbaŋŋ, ni ásaa lɛ bɔ ni eeenyɛ etsu nii jogbaŋŋ. . . . Wɔye hemɔkɛyeli babaoo yɛ wɔ Tatsɛ lɛ mli; ni nɛkɛ gbɛjianɔtoo ni yeɔ emuu, ni je lɛ enaaa lɛ, nyiɛ kɛmiiya anunyam kunimyeli diɛŋtsɛ mli.”
4. Mɛɛ jwɛŋmɔ ni kɔɔ gbɛjianɔtoo he ejie lɛ kpo yɛ wolo tɛtrɛɛ nɛɛ December 1, 1894 nɔ̃ lɛ mli?
4 Shi, Blɔfo Buu Mɔɔ ni akala yɛ December 1, 1894 lɛ kɛɛ akɛ:
“Shi akɛni nakai Sanekpakpa hee lɛ jaa he nitsumɔ he gbɛjianɔ ni atoɔ lɛ jeee blema Yudafoi aŋmaakpamɔ nitsumɔ ni ji nijaa lɛ fã hewɔ lɛ, nakai nɔŋŋ hu ŋmɛnɛŋmɛnɛ ŋmaakpamɔ ni kɔɔ Sanekpakpa lɛ jaa nitsumɔ lɛ he lɛ hu ji nɔ ni yɔɔ sɔrɔto ni esoto no kwraa yɛ Afii Akpe hee lɛ nijaa nitsumɔ ni bɛŋkɛɔ bianɛ lɛ hu he. . . . Eka shi faŋŋ akɛ mɛi ni tamɔ nɛkɛ ni abua amɛnaa akɛ gbɛjianɔtoo ko ni anaa lɛ baafee nɔ ni ekɛ mumɔ ni yɔɔ ŋwɛi gbɛjianɔtoo Iɛ sɛɛ lɛ kpaaa gbee; ni kɛ afee nakai lɛ, ebaafee tamɔ nɔ ni sɔlemɔ lɛ miisumɔ ni ekɛ ehe abɔ jwɛŋmɔ ni ahiɛ bianɛ yɛ gbɛjianɔtoo loo maŋ ekomefeemɔ he lɛ he. (Kwɛmɔ Yes. 8:12) Nitsumɔ ni yɔɔ bianɛ lɛ jeee ni ato gbɛjianɔ, shi moŋ mligbalamɔ, taakɛ eji yɛ Yudafoi aŋmaa kpamɔ lɛ diɛŋtsɛ mli lɛ. (Mat. 10:34-36) . . .
“No hewɔ lɛ, yɛ be mli ni wɔbuuu mɛi ni abua amɛnaa lɛ agbɛjianɔtoo lɛ akɛ eji Nuŋtsɔ lɛ gbɛjianɔtoo yɛ ŋmaakpamɔ lɛ mli, tamɔ nɔ ni wɔmiikpa gbɛ akɛ wɔbaahi biɛ yɛ yinɔ kroko mli akɛ gbɛjianɔtoo lɛ fã lɛ, wɔbuɔ akɛ eji esuɔmɔnaa nii akɛ mɛi ni sumɔɔ Nuŋtsɔ lɛ kɛ amɛhe awie amɛhiɛnɔkamɔi kɛ miishɛɛi, aloo kaai kɛ naagbai lɛ ahe amɛtsɔɔ amɛhe shii abɔ ni amɛkɛ amɛhe agbagbaa saji ni kɔɔ e-Wiemɔ lɛ mli nibii ni jara wawai lɛ ahe akɛ kuu.”
5. Yɛ gbɛjianɔtoo he lɛ, mɛni awie yɛ wolo, The New Creation lɛ mli?
5 No hewɔ lɛ abuuu Kristofoi asafo lɛ yɛ no be lɛ mli akɛ eji gbɛjianɔtoo. Shi asusu he akɛ ehi jogbaŋŋ moŋ akɛ aaato asafo lɛ, aloo sɔlemɔ lɛ he gbɛjianɔ jogbaŋŋ ama shi. Akɛ nɔkwɛmɔ nɔ lɛ, wolo, The New Creation ni afee yɛ 1904 lɛ nikasemɔ 5 lɛ yitso ni ji ‘Nibɔɔ Hee lɛ He Gbɛjianɔtoo’, lɛ je shishi kɛ wiemɔ nɛɛ: “Akɛni Nibɔɔ Hee lɛ yeŋ emuu aloo ebaŋ naagbee ja Klɛŋklɛŋ Shitee lɛ eba da hewɔ lɛ, nakai be lɛ mli dani ehe gbɛjianɔtoo lɛ baaye emuu. Nɔ ni akɛto okadi yɛ sɔlemɔwe lɛ feɔ enɛ he mfoniri: ákɛ tɛi ni yɔɔ wala lɛ, aatsɛ wɔ bianɛ, aloo aafɔ nine aatsɛ wɔ ni wɔbana gbɛhei yɛ anunyam sɔlemɔtsu lɛ mli.”
6. Mɛɛ gbɛ nɔ wolo, Thy Kingdom Come lɛ yoo “nibɔɔ hee” lɛ mlibii lɛ “anyɛ” lɛ yɛ?
6 Nɔ ni yɔɔ miishɛɛ ji akɛ, wolo, Thy Kingdom Come, ni aŋma yɛ 1891 Iɛ kɛɛ yɛ nɛkɛ “nibɔɔ hee” nɛɛ mli mɛi ni afɔ amɛ mu lɛ ahe akɛ: “Bɔfo Paulo eha nilee ni fe adesa nɔ ekpɛ eshwie Yesaia 54:1-8 nɔ, ni ekɛto mumɔŋ Zion, wɔ nyɛ aloo kpaŋmɔ, ni Sara damɔ shi kɛha lɛ lɛ he. Áfo Abraham heloo naa seshibii lɛ ashɛ afɔ akɛ amɛkafee shiwoo lɛ yelɔi, ni akpɛlɛ anɔkwale seshi lɛ, Kristo (ni Isak kɛ Rebeka fee ehe mfoniri lɛ) nɔ akɛ lɛ pɛ ji shiwoo seshi lɛ.—Galatabii 4:22, 24, 26-31.”
7, 8. Namɔ ji Kristofoi asafo lɛ “nyɛ” lɛ wu lɛ, ni mɛni Yesaia 54:1-8 kɛɔ yɛ enɛ gbɛfaŋ?
7 Nɛkɛ wiemɔ nɛɛ kɛ Zion Jeŋ Gbɛjianɔtoo ni Theodor Herzl to shishi yɛ 1897 lɛ bɛ nɔ ko feemɔ. Nakai gbɛjianɔtoo lɛ kɛ Yerusalem ni yɔɔ biɛ lɛ ye, jeee “ŋwɛi Yerusalem” lɛ, Kristofoi asafo Iɛ “nyɛ” lɛ. (Galatabii 4:26) Wolo ni ji Thy Kingdom Come lɛ eyaaa nɔ etsɔɔɔ anɔkwale ni eji akɛ Kristofoi asafo lɛ “nyɛ” lɛ wu kɛ nɔtsɛ ji Nyɔŋmɔ, mɔ ni akɛ Abraham fee ehe mfoniri lɛ mli. Yehowa kɛ “ŋwɛi Yerusalem” ni akɛ Isak nyɛ Sara fee he mfonini lɛ ebote gbalashihilɛ mli, shi jeee Abraham kpaŋmɔ lɛ loo kpaŋmɔ hee lɛ. Akɛ “nyɛ” taakɛ Sara ji lɛ, esa akɛ “ŋwɛi Yerusalem” lɛ afee nɔ ko ni yɔɔ wala mli ni yɔɔ gbɔmɔtso su kɛ baŋ.
8 Belɛ namɔ ji “ŋwɛi Yerusalem” lɛ? Bɔni afee ni wɔna lɛ, klɛŋklɛŋ lɛ nyɛhaa wɔsusua Yesaia 54:1-8 ni efa ko kaneɔ nɛkɛ lɛ he:
“La nyamɔ lala, bo kene ni ofɔɔɔ! Wo nyamɔ lala nɔ, ni obolɔ kɛ miishɛɛ, bo ni okɔmɔko da! Ejaakɛ mɔ ni bɛ mɔ ko lɛ bii efa fe mɔ ni ɔɔ wu lɛ bii lɛ, Yehowa kɛɛ. . . . Ejaakɛ owu ji ofeelɔ lɛ, Yehowa Zebaot ji egbɛi; ni okpɔlɔ ji Israel Mɔ Krɔŋkrɔŋ lɛ: Aaatsɛ lɛ shikpɔŋ lɛ fɛɛ Nyɔŋmɔ! Shi Yehowa etsɛo tamɔ yoo ko ni akwa lɛ ni yeɔ ŋkɔmɔ yɛ mumɔ mli aloo tamɔ obalahiaŋ ŋa ni ashwie lɛ, o-Nyɔŋmɔ lɛ kɛɛ. Hiŋmɛitswaa kɛkɛ mikwao, shi musuŋtsɔlɛi kpelei mikɛ aaabua onaa. Mimlifu ni eteke nɔ lɛ mli lɛ, mikɛ mihiɛ teeo hiŋmɛitswaa, shi naanɔ mlihilɛ mimusuŋ kɛaatsɔ mi yɛ ohewɔ, Yehowa; o-Kpɔlɔ lɛ. kɛɛ.”
9. (a) Namɔ loo mɛni Yehowa wieɔ etsɔɔ lɛ ekɛshɛjeɔ emii yɛ Yesaia 54:1-8 lɛ? (b) Taakɛ Galatabii 4:25, 26 tsɔɔ lɛ, namɔ ji okadi “yoo” lɛ ni awie ehe yɛ nɔ ni akɛfee mfoniri lɛ mli lɛ?
9 Klɛŋklɛŋ lɛ, jeee kpaŋmɔ ko Yehowa kɛwieɔ yɛ biɛ lɛ. Eewie kɛmiitsɔɔ maŋ, ewebii ni ehala amɛ ni kɛ yɔɔ Mose Mla kpaŋmɔ lɛ mli lɛ. Yɛ Nyɔŋmɔ hiɛ lɛ, nakai maŋ lɛ feɔ okadi “yoo” ni mɛi pii yɔɔ mli ni tamɔ ŋa kɛha lɛ. Taakɛ Bɔfo Paulo wolo ni eŋma eyaha Galatabii lɛ tsɔɔ lɛ, nakai mfonirifeemɔ mli “yoo” lɛ ji nɔ ko he okadi, shi ekɛɛɛ akɛ yoo nɛɛ ji kpaŋmɔ ko loo yelikɛfuamɔ ko. Anyɛŋ ashɛje kpaŋmɔ ko mii aloo ni aaaha lɛ hiɛnɔkamɔ. Shi moŋ, Paulo miitsɔɔ akɛ nakai mfoniri-feemɔ mli yoo lɛ ji nɔ ko ni yɔɔ wala mli, tamɔ “nyɛ” ko, taakɛ ‘wu kɛ nɔtsɛ,’ Yehowa, hu ji Mɔ ni yɔɔ wala mli ni yɔɔ nilee kɛ nyɛmɔ ni ekɛaashɛje mɔ mii lɛ. Yɛ be mli ni ewieɔ blema yinɔsane mli yei ahe lɛ, bɔfo Paulo ŋma akɛ: “Ejaakɛ Hagar [tsulɔyoo ni akɛ lɛ to ewuraa Sara najiaŋ koni efɔ Ishmael eha Abraham] lɛ ji Sinai, gɔŋ ni yɔɔ Arabia, shi [Hagar] ekɛ ŋmɛnɛŋmɛnɛ Yerusalem [beni Paulo yɔɔ shikpɔŋ nɔ] lɛ tsaa nɔ, ejaakɛ ekɛ ebii lɛ ji nyɔji [kɛha Mose Mla kpaŋmɔ lɛ]; shi ŋwɛi Yerusalem lɛ ji odehe lɛ, mɔ nɔŋŋ ni ji wɔnyɛ lɛ.”—Galatabii 4:25, 26.
Yerusalem Ni Yɔɔ Nyɔŋyeli Mli
10, 11. (a) Mɛni nibii komɛi ni sa kadimɔ jogbaŋŋ ni kɔɔ Israelbii le ahe ba yɛ Sinai Gɔŋ Iɛ he? (b) Mɛni ba afi 33 Ŋ.B. yɛ Mla kpaŋmɔ lɛ he?
10 Hagar efeee Mose Mla kpaŋmɔ lɛ he mfoniri ni asaŋ edamɔɔɔ shi kɛhaaa no hu. Ni asaŋ nakai kpaŋmɔ lɛ kɛ e-Kitai Nyɔŋma lɛ efeee Sinai Gɔŋ, ni damɔ shi kɛha Hagar lɛ he mfoniri. Ejaakɛ Nyɔŋmɔ kɛ Sinai Gɔŋ lɛ efeee kpaŋmɔ ko. Shi jɛmɛ ekɛ Israelbii lɛ ni ekpɔ amɛ kɛjɛ Mizraim nyɔŋyeli mli lɛ ba, ni ekɛ amɛ bote kpaŋmɔ wekukpaa ko mli yɛ biɛ, ni ekɛ amɛ ye akɛ maŋ ni eye ehe. Enɛ ba mli beni Nyɔŋmɔ pɛ kɛ Abraham ekpaŋ, ni ewo shi akɛ ebaaha efɔ seshi ko ni ji nuu lɛ sɛɛ afii ohai abɔ.
11 Beni Mose, Mla kpaŋmɔ lɛ teŋdamɔlɔ lɛ jɛ Sinai Gɔŋ lɛ nɔ ekpeleke shi lɛ, no mli lɛ bɔ ni ehiɛ kpɛɔ waa ha lɛ haaa adesa ko anyɛ akwɛ ehiɛ, ni yɛ enɛ hewɔ lɛ ehe bahia ni ekɛ hiɛhaanɔ ko aha ehiɛ koni Israelbii lɛ anyɛ akwɛ lɛ. (2 Korintobii 3:12-16) Shi jeee Yehowa diɛŋtsɛ ji mɔ ni Mose kɛ lɛ wieɔ yɛ be mli ni eyɔɔ Sinai Gɔŋ lɛ nɔ lɛ, ejaakɛ ŋwɛibɔfo ko nɔ Nyɔŋmɔ tsɔ ekɛ Israelbii lɛ bote kpaŋmɔ mli. (Bɔfoi lɛ Asaji 7:37, 38; Hebribii 2:2) Israel maŋ lɛ baje Mla kpaŋmɔ lɛ shishi yɛ nɛkɛ gbɛ nɔ. Shi, yɛ afii ohai babaoo sɛɛ lɛ, ajie nakai kpaŋmɔ lɛ kɛtee, akala akpɛtɛ Yesu sɛŋmɔtso lɛ he yɛ afi 33 Ŋ.B.—Kolosebii 2:13, 14.
12. (a) Shikpɔŋ nɔ Yerusalem ji “nyɛ” kɛha namɛi? (b) Mɛɛ nyɔŋyeli shishi shikpɔŋ nɔ Yerusalem lɛ yɔɔ yɛ afii ohai 19 ni eho nɛ, ni mɛni hewɔ eyeee ehe kɛjɛɛɛ mli Iɛ?
12 Paulo ŋma akɛ Sinai Gɔŋ lɛ kɛ Yerusalem ni yɔɔ shikpɔŋ nɔ lɛ tsaa nɔ. Shi, Yerusalem jeee kpaŋmɔ ko; eji maŋtiase ni abuɔ waa ni Yudafoi yɔɔ mli. Ákɛ maŋtiase lɛ, edamɔ shi kɛha maŋ lɛ ni ebafee “nyɛ” kɛha “bii” ni ji Yudafoi fɛɛ aloo Israel maŋ lɛ yɛ okadi gbɛ nɔ. (Mateo 23:37) Yerusalem ji he ni Yehowa, Nyɔŋmɔ ni Israelbii lɛ kɛ lɛ yɔɔ kpaŋmɔ wekukpaa mli lɛ sɔlemɔtsu lɛ yɔɔ. Shi no mli lɛ Yudafoi lɛ bɛ maŋtsɛyeli ko amɛ diɛŋtsɛ, ní Maŋtsɛ David seshinyo ko yeɔ nɔ yɛ mli. No hewɔ lɛ amɛyeee amɛhe shi moŋ amɛhɔlɔ nyɔŋyeli mli yɛ Jeŋmaŋ ko nɔyeli shishi. Nɔ ni he hiaa fe fɛɛ lɛ, amɛhɔlɔ jamɔ nyɔŋyeli shishi. Mesia, Yesu Kristo, ni awo shi yɛ ehe lɛ pɛ ji mɔ ni baaha amɛye amɛhe kɛjɛ enɛ mli, kɛ agbɛnɛ hu kɛjɛ esha nyɔŋyeli hu mli. Shi nakai Yerusalem lɛ ekpɛlɛɛɛ Yesu nɔ akɛ Mesia kɛ Maŋtsɛ, ni amɛnyɛɛɛ amɛye amɛhe. Shi moŋ, ehiɛ kpata yɛ Romabii lɛ adɛŋ yɛ afi 70 Ŋ.B. ni kɛ oshara babaoo ba “ebii” lɛ anɔ lɛ.
Yerusalem Ni Eye Ehe Aloo Odehe Lɛ
13. Mɛni Paulo wie yɛ Yerusalem ni eye ehe aloo odehe lɛ he, ni mɛni mli ní aha amɛye amɛhe yɛ esa akɛ “ebii” lɛ adamɔ shi Shiŋŋ amɛha lɛ?
13 Paulo kɛ shikpɔŋ nɔ Yerusalem ni yɔɔ nyɔŋyeli mli lɛ to “ŋwɛi Yerusalem” ni ji “odehe” aloo mɔ ni eye ehe lɛ he. Yɛ be mli ni etsɛɔ wiemɔ kɛjɛɔ Yesaia 54:1-8 lɛ, eŋma akɛ:
“Shi ŋwɛi Yerusalem lɛ ji odehe (mɔ ni eye ehe) lɛ, mɔ nɔŋŋ ni ji wɔnyɛ lɛ. Ejaakɛ aŋma akɛ: ‘La nyamɔ lala bo kene ni ofɔɔɔ; tswaa nyamɔ lala ni obolɔ kɛ miishɛɛ, bo ni okɔmɔɔɔ; ejaakɛ mɔ ni bɛ mɔ ko lɛ moŋ bii fa fe mɔ ni yɔɔ wu lɛ po!’ Shi anyɛmimɛi, wɔ lɛ, shiwoo lɛ bii ji wɔ tamɔ Isak. Shi belɛ taakɛ bɔ ni no be lɛ mli hu mɔ ni afɔ lɛ yɛ heloo naa lɛ waa mɔ ni afɔ lɛ yɛ mumɔ naa lɛ yi lɛ, nakai nɔŋŋ kɛ yɔɔ ŋmɛnɛŋmɛnɛ hu. Shi te ŋmalɛ lɛ kɛɛ tɛŋŋ? ‘Shwiemɔ tsulɔyoo lɛ kɛ ebi lɛ ejaakɛ nyɔŋ yoo lɛ bi lɛ esaaa akɛ ekɛ odehe lɛ bi lɛ aye gboshinii lɛ.’ No hewɔ lɛ, anyɛmimɛi, wɔjeee tsulɔ yoo lɛ bii, shi moŋ odehe lɛ bii ji wɔ. Odehe Kristo eha wɔye, no hewɔ lɛ nyɛdamɔa shi shiŋŋ, ni nyɛkahaa abɔa nyɛ nyɔŋyeli apã lɛ dɔŋŋ.”—Galatabii 4:26–5:1.
14. Mɛni hewɔ Isak fɔmɔ lɛ ji “mumɔ naa” nɔ lɛ?
14 No hewɔ lɛ Galata Kristofoi ni awieɔ atsɔɔ amɛ lɛ ji “Nyɔŋmɔ bii yɛ shiwoo lɛ naa.” (Galatabii 4:2,8, Today’s English Version) Yɛ be mli ni efeɔ enɛ he mfoniri Iɛ, Abraham ni eye afii oha lɛ kɛ eŋa Sara ni eye afii 90 lɛ fɔ Isak koni Yehowa aha eshiwoo ni ekɛha nakai blematsɛ anɔkwafo lɛ aba mli. Hɛɛ, fɔ ni Abraham fɔ Isak lɛ ji naakpɛɛ nii, jeee yɛ “heloo naa.” (1 Mose 18:11-15) No hewɔ lɛ esa akɛ efee yɛ “mumɔ naa.” Hɛɛ, Abraham Kpeteŋkpele, Yehowa Nyɔŋmɔ mumɔ lɛ he miihia koni ekanya loo ewo yoo odehe ni eye ehe Sara kɛ agbɛnɛ Abraham fɔmɔ nii lɛ amli hewalɛ ekoŋŋ. (Romabii 4:19) Nɔ ni sa kadimɔ ji akɛ nakai “shiwoo” lɛ diɛŋtsɛ etsɛko kwraa yɛ be mli ni afɔ Isak yɛ afi 1918 D.Ŋ.B. lɛ, ejaakɛ ebafee beni Abraham ebote shiwoo shikpɔŋ ni ji Kanaan nɔ yɛ afi 1943 D.Ŋ.B., ní “shiwoo” lɛ ebɔi nitsumɔ lɛ sɛɛ afii 25 pɛ.
15. “Ŋwɛi Yerusalem” lɛ hi shi be enyiɛ akɛ mɔ ni bɛ bii, ni mɛɛ be mli eshwiei lɛ ayi bɔi famɔ?
15 “Ŋwɛi Yerusalem” lɛ etsɔ “mɔ ni bɛ mɔ ko,” kene, yɛ be kakadaŋŋ mli fe Sara. Yɛ anɔkwale mli lɛ, “ŋwɛi Yerusalem” lɛ yɛ nakai shihilɛ lɛ mli kɛjɛ afi 1943 D.Ŋ.B., beni shi ni awo Abraham lɛ bɔi nitsumɔ, aahu kɛyashi be mli ni abaptisi Yesu yɛ afi 29 Ŋ.B. Nakai beaŋ Abraham Kpeteŋkpele, Yehowa, mumɔ lɛ fɔ Yesu, ni akɛ E-mumɔ lɛ fɔlɛ mu koni ebafee Kristo aloo Mɔ ni Afɔ Lɛ Mu lɛ, Mesia lɛ. Shi “ŋwɛi Yerusalem” lɛ baaná mumɔŋ bii fe mumɔŋ bi kome pɛ. No hewɔ lɛ yɛ afi 33 Ŋ.B. Pentekoste lɛ, yɛ be mli ni átee Yesu shi ni ekwɔ kɛtee ŋwɛi lɛ sɛɛ lɛ, akɛ Abraham Kpeteŋkpele lɛ mumɔ lɛ fɔ́ ekaselɔi anɔkwafoi lɛ ateŋ mɛi aaafee 120. Kɛkɛ ni akɛ nakai mumɔ lɛ fɔ amɛ hu koni amɛbatsɔmɔ Isak Kpeteŋkpele,Yesu Kristo, mumɔŋ nyɛmimɛi. Yɛ sɛɛ mli yɛ nakai gbi lɛ nɔ nɔŋŋ Iɛ, abaptisi Yudafoi babaoo aaafee 3,000 akɛ Yesu kaselɔi ni akɛ mumɔ krɔŋkrɔŋ Iɛ fɔ amɛ mu. (Bɔfoi lɛ Asaji 2:1-42) No hewɔ lɛ, “ŋwɛi Yerusalem” batsɔ “nyɛ” kɛha bii babaoo yɛ nakai gbi lɛ nɔ.
16. Mɛni akɛyɔseɔ “ŋwɛi Yerusalem” lɛ?
16 Bɔfo Paulo jie lɛ kpo akɛ yoo ni awie ehe yɛ Yesaia 54:1-8 lɛ ji “ŋwɛi Yerusalem.” Yehowa Nyɔŋmɔ ji ‘ewu kɛ nɔtsɛ,’ kɛ agbɛnɛ hu e-Feelɔ. Kɛ aawie yɛ okadi gbɛ nɔ lɛ, lɛ ji ‘eyoo,’ ‘ŋa,’ aloo egbɛjianɔtoo ni tamɔ ŋa ni yɔɔ ŋwɛi shɔŋŋ lɛ. Ákɛ wu lɛ, lɛ ji Mɔ ni haa yoo nɛɛ naa shwiei koni efɔ anɔkwale “seshi” ni awo shi yɛ ehe yɛ Abraham gbii lɛ amli lɛ.—Galatabii 3:16, 26-29.
17. Te fee tɛŋŋ ni “ŋwɛi Yerusalem” lɛ batsɔ “nyɛ” kɛha Abraham Kpeteŋkpele lɛ klɛŋklɛŋ “seshi” lɛ?
17 Bɔni afee ni ebatsɔ Abraham Kpeteŋkpele lɛ klɛŋklɛŋ “seshi” Iɛ, Nyɔŋmɔ Bi koome lɛ fa kpo kɛjɛ Yehowa ŋwɛi gbɛjianɔtoo ni tamɔ ŋa lɛ mli. No hewɔ lɛ yoo nɛɛ batsɔɔ tamɔ “nyɛ” kɛhaa Nyɔŋmɔ Bi lɛ. Yesu Kristo jeee shikpɔŋ nɔ Yerusalem lɛ mfoniri-feemɔ mli bi yɛ egbii lɛ amli yɛ shikpɔŋ nɔ, ejaakɛ no mli lɛ nakai maŋtiase lɛ yɛ nyɔŋyeli mli, aloo ekɛ “ebii” lɛ etsɔmɔ nyɔji, ni Yesu tsɔko nyɔŋ da. (Galatabii 4:25) Shikpɔŋ nɔ Yerusalem ji “nyɛ” kɛha nakai heloo naa Yudafoi ni kpoo Yesu Kristo akɛ shiwoo “seshi” Iɛ, ni jeee “seshi” kɛha blematsɛ Abraham pɛ kɛkɛ shi moŋ kɛha Abraham Kpeteŋkpele, Yehowa Nyɔŋmɔ hu lɛ.—Mateo 23:37-39.
Okɛ Gbɛjianɔtolɔ Kpeteŋkpele Lɛ Atsu Nii
18. Mɛni hewɔ shikpɔŋ nɔ Yerusalem bafee he ko ni mɛi fɛɛ gbala amɛjwɛŋmɔ kɛtee nɔ yɛ Maŋtsɛ Salomo gbii lɛ amli lɛ?
18 Yesu Kristo, ni yɔɔ Nyɔŋmɔ ŋwɛi gbɛjianɔtoo lɛ akɛ ‘enyɛ’ lɛ da ni ele nii fe Maŋtsɛ Salomo, David bi ni he gbɛi waa ni ye blema shikpɔŋ nɔ Yerusalem nɔ maŋtsɛ lɛ. Yɛ anɔkwale mli lɛ Salomo anunyam kɛ nilee lɛ gbala jeŋmaji ni jeee Israelbii lɛ ajwɛŋmɔ, taakɛ Yesu po tsɔɔ yɛ ewiemɔ nɛɛ mli lɛ: “Wuoyigbɛ maŋnyɛ lɛ aaate shi awo nɛkɛ yinɔ bii nɛɛ yɛ kojomɔ lɛ mli, ni eeebu amɛ fɔ; ejaakɛ ejɛ shikpɔŋ lɛ naagbee he ebabo Salomo nilee lɛ toi; ni naa, mɔ ni fe Salomo yɛ biɛ.” (Mateo 12:42; Luka 11:31) Yɛ gbɛ ko no lɛ, Salomo jie nilee ni ekaaa kpo yɛ gbɛ ni etso nɔ eto emaŋnɔkwɛmɔ he saji ahe gbɛjianɔ lɛ mli. Bɔ ni eto nɔ fɛɛ nɔ he gbɛjianɔ yɛ nilee mli lɛ ha mɛi anaa kpɛ amɛhe.
19. Mɛni yɔɔ Maŋtsɛ Salomo nɔyeli lɛ he ni ha Sheba maŋnyɛ lɛ naa kpɛ ehe lɛ?
19 Taakɛ 1 Maŋtsɛmɛi 10:4. 5 tsɔɔ lɛ wɔkaneɔ akɛ: “Ni beni Sheba maŋnyɛ lɛ na Salomo nilee lɛ fɛɛ kɛ shia ni ema lɛ, kɛ ekpɔlɔ nɔ niyenii, kɛ etsuji ashitaramɔ, kɛ esɔɔlɔi ashidaamɔ kɛ amɛtadei, ke edaawolɔi, kɛ eshãa afɔlei ni eshãa yɛ Yehowa we lɛ, ehe jɔ̃ ehe naakpa.” (NW; Rotherham; Young; Revised Standard; Septuagint; Kwɛmɔ 2 Kronika 9:4 hu.) Sheba maŋnyɛ lɛ naa baakpɛ ehe lɛlɛŋ yɛ gbɛjianɔtoo ni yɔɔ Salomo sɔɔlɔi fee ateŋ lɛ hewɔ. Ni akɛni eto nɔ fɛɛ nɔ he gbɛjianɔ jogbaŋŋ yɛ gbɛjianɔtoo kpakpa naa hewɔ lɛ, ekɛ Nyɔŋmɔ ni ji Gbɛjianɔtolɔ Kpakpa lɛ kpaa gbee kwraa.—1 Korintobii 14:33.
20. (a) Yɛ Salomo sɔlemɔ lɛ hetoo hamɔ mli lɛ, mɛni Yehowa kɛha Iɛ? (b) Akɛ “mɔ ni fe Salomo” lɛ, mɛni ji nɔ ni Yesu Kristo feɔ, ni mɛni ji gbɛ ni esɛɛnyiɛlɔi lɛ tsɔɔ nɔ?
20 Yɛ Salomo heshibaa sɔlemɔ lɛ he nitsumɔ hewɔ lɛ. Yehowa ha Iɛ “tsui ni le nii ni yooɔ sane sɛɛ.” (1 Maŋtsɛmɛi 3:5-14) Gbɛjianɔtolɔ Kpeteŋkpele ni yɔɔ je muu fɛɛ lɛ haa Salomo nyɛmɔ ni ekɛaato nibii ahe gbɛjianɔ jogbaŋŋ, koni ato nɔ fɛɛ nɔ gbɛnaa gbɛnaa kɛ hesaa hu. No hewɔ lɛ, ebafee gbɛnaa nii ni ka Yehowa webii ni ekɛ amɛ efee kpaŋmɔ lɛ amaŋtsɛ lɛ nɔ akɛ ekɛ ŋwɛi Gbɛjianɔtolɔ lɛ ni to bɔɔ nii fɛɛ ni yɔɔ ŋwɛi kɛ shikpɔŋ nɔ lɛ he gbɛjianɔ lɛ atsu nii. Kɛ akɛaato he Iɛ, Yesu Kristo ni awo ehiɛ nyam, ni ji “mɔ ni fe Salomo” lɛ feɔ nakai yɛ nilee mli. No hewɔ lɛ, ehe miihia ni esɛɛnyiɛlɔi anɔkwafoi ni yɔɔ shikpɔŋ nɔ lɛ hu afee nakai, ni amɛfeɔ nakai hu.a
Mɛni Okɛɔ?
◻ Mɛɛ gbɛ nɔ oootsɔ otsɔɔ wiemɔ gbɛjianɔtoo” mli oha?
◻ Shikpɔŋ nɔ Yerusalem ji “nyɛ” kɛha namɛi, ni eyeee ehe kɛjɛɛɛ mɛɛ nyɔŋyeli mli?
◻ Mɛni akɛyooɔ “ŋwɛi Yerusalem” lɛ, ni namɛi ji “ebii”?
◻ Salomo kɛ nilee ni Nyɔŋmɔ kɛha lɛ lɛ tsu nii yɛ mɛɛ gbɛ nɔ, ni mɛni ji nɔ ni Salomo Kpeteŋkpele lɛ kɛ E-sɛɛnyiɛlɔi lɛ feɔ?
[Shishigbɛ niŋmaa]
a Ajie kɛjɛ March 15, 1985 Watchtower lɛ mli.
[Mfoniri ni yɔɔ baafa 22]
Shikpɔŋ nɔ Jerusalem yɛ nyɔŋyeli mli yɛ mɛɛ gbɛ nɔ?
[Mfoniri ni yɔɔ baafa 24]
Sheba maŋnyɛ lɛ naa kpɛ ehe beni eyasara Salomo lɛ. Salomo kɛ je muu fɛɛ Gbɛjianɔtolɔ lɛ tsu nii. Ani bo hu okɛ Yehowa Nyɔŋmɔ miitsu nii?