‘Ha Ana Oshweremɔ Lɛ Faŋŋ’
“Beni mitsɔ nuu onukpa lɛ, mishɛrɛ abifabii anii lɛ mishwie sɛɛ.”—1 KORINTOBII 13:11.
1. Dalɛ yeɔ bɔ ni adebɔɔ yɔɔ naakpɛɛ ha lɛ he odase yɛ mɛɛ gbɛ nɔ?
EJEƆ shishi kɛjɛɔ wɔlɔ bibioo ni ja shwɛde pɛ anyɛɔ akɛnaa lɛ mli, ni bonso nyɛɔ edaa ni etsɔɔ bɔɔ nɔ ni kɛ fe ninetalɔi oha ni etsiimɔ hu feɔ tɔŋ 80. Nakai nɔŋŋ hu, sequoia tso ni daa agbo diɛŋtsɛ lɛ jɛɔ wui bibii fe fɛɛ ni yɔɔ lɛ ateŋ ekome mli, ni edaa ni ekɛɔ fe ninetalɔi 300. Lɛlɛŋ, dalɛ ji wala mli naakpɛɛ nibii ni yɔɔ lɛ ateŋ ekome. Taakɛ bɔ ni bɔfo Paulo wie lɛ, wɔbaanyɛ wɔdu ni wɔshwie nɔ nu, shi ‘Nyɔŋmɔ ji mɔ ni haa edaa.’—1 Korintobii 3:7.
2. Mɛɛ dalɛ ko agba afɔ shi yɛ Biblia lɛ mli?
2 Shi kɛlɛ, dalɛ kroko hu yɛ ni yɔɔ naakpɛɛ tamɔ nakai nɔŋŋ. No ji nɔ ni gbalɔ Yesaia tsɔ hiɛ egba yɛ he efɔ shi lɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa. Kɛ shɛ ebe lɛ, mi, Yehowa, maha afee oya!” (Yesaia 60:22) Nɛkɛ gbalɛ nɛɛ kɔɔ Nyɔŋmɔ webii ayifalɛ he, ni eena emlibaa krɛdɛɛ ko yɛ wɔgbii nɛɛ amli.
3. Mɛɛ bɛ nɔ 1991 sɔɔmɔ-afi akɔntaabuu lɛ tsɔɔ yɛ akɛ Yehowa miiha ewebii anitsumɔ miiya hiɛ kɛ foi?
3 Yehowa Odasefoi ajeŋ muu fɛɛ nitsumɔ lɛ he akɔntaabuu kɛha 1991 sɔɔmɔ afi lɛ tsɔɔ akɛ Maŋtsɛyeli shiɛlɔi ayifalɛ yashɛ yibɔ hee ni fe fɛɛ, ni ji 4,278,820, ni mɛi fɛɛ ni abaptisi yɛ afi lɛ mli ji mɛi 300,945. Akɛni mɛi heei pii miiba babaoo nɛkɛ hewɔ lɛ, ato asafoi heei 3,191 shishi, kɛ kpokpaa bibii kɛ kpokpaai wuji heei babaoo ni he hiaa nakai nɔŋŋ kɛha amɛhe nitsumɔ. Enɛ feɔ nɔ ni fa fe asafoi heei kpaanyɔ yɛ gbi kome mli, ni miihe ashɛ kpokpaa kome yɛ daa gbii enyɔ mli. Mɛɛ shweremɔ ni yɔɔ naakpɛɛ nɛ! Eyɛ faŋŋ akɛ, Yehowa miiha nibii miiya nɔ oya, ni ejɔɔmɔi yɛ ewebii amɔdɛŋbɔi anɔ.—Lala 127:1.
Be Kɛha He Kaa-kɛ-Kwɛmɔ
4. Mɛɛ saji esa akɛ wɔsusu he beni wɔkwɛɔ wɔsɛɛ be gbɛ lɛ?
4 Eyɛ mli akɛ eyɛ miishɛɛ akɛ wɔmiina nɛkɛ jɔɔmɔi nɛɛ moŋ, shi ekɛ gbɛnaa nii komɛi fataa he kɛbaa. Ani abaaná nyɛmimɛi ni amɛyi fa bɔ ni sa, ni amɛdara yɛ mumɔŋ ni amɛmiisumɔ ni amɛtsu nɛkɛ mɛi heei nɛɛ fɛɛ amumɔŋ hiamɔ nii ahe nii? Beni wɔkwɛɔ wɔsɛɛ be gbɛ lɛ, kɛji wɔsusu gbɛgbalɔi, asafoŋ sɔɔlɔi, onukpai, kɛ nɔkwɛlɔi gbɛfalɔi ni he baahia koni amɛtsu shweremɔ kɛ nɔyaa ni baa lɛ he nii, kɛ agbɛnɛ nitsulɔi ni kɛ amɛhe baaha yɛ nitsumɔ he niji kɛ Betel Shiai ni yɔɔ je lɛŋ fɛɛ lɛ amli koni amɛkɛfi nitsumɔ lɛ sɛɛ lɛ he lɛ, ehaa mɔ he jɔ̃ɔ ehe waa diɛŋtsɛ. Nɛgbɛ abaana nɛkɛ gbɔmɛi babaoo nɛɛ fɛɛ kɛjɛ? Ŋwanejee ko kwraa bɛ he akɛ nikpamɔ lɛ da naakpa. Shi namɛi yɔɔ ŋmɛnɛ ni amɛfee klalo akɛ amɛbaakwɛ nitsulɔi ni he hiaa ni amɛbakpa nii lɛ anɔ?—Mateo 9:37, 38.
5. Mɛɛ shihilɛi yɔɔ hei komɛi yɛ shweremɔ ni baa oyayaayai lɛ hewɔ?
5 Akɛ nɔkwɛmɔ nɔ lɛ, abɔ amaniɛ akɛ, yɛ je lɛŋ hei komɛi lɛ, asafoi komɛi yɛ ni Maŋtsɛyeli shiɛlɔi aaashɛ oha yɔɔ mli, shi onukpa kome kɛ ekolɛ asafoŋ sɔɔlɔ kome loo mɛi enyɔ ni fata ehe pɛ sɔmɔɔ amɛ. Bei komɛi lɛ, ehe hiaa po ni onukpa kome asɔmɔ yɛ asafoi enyɔ mli. Yɛ hei krokomɛi hu lɛ, hiamɔ ni yɔɔ yɛ Kristofoi sɔɔlɔi ni kɛ mɛi baafee shia Biblia mli nikasemɔi lɛ agbɛfaŋ lɛ da aahu akɛ ehaa atsiɔ mɛi komɛi atoɔ ni amɛnako mɛi ni kɛ amɛ baakase nii. Yɛ hei krokomɛi hu lɛ, aato asafoi heei ashishi oyayaayai akɛ ehaa ehe bahiaa ni asafoi etɛ, ejwɛ, loo enumɔ po aya kpeei yɛ Maŋtsɛyeli Asa kome nɔ. Ekolɛ ona shweremɔ ni tamɔ nɛkɛ yɛ he ni bo diɛŋtsɛ hu oyɔɔ lɛ.
6. Mɛni hewɔ wɔ diɛŋtsɛ wɔhe ni wɔɔka wɔkwɛ lɛ sa jogbaŋŋ lɛ?
6 Mɛni enɛɛmɛi fɛɛ kɛɔ wɔ? Akɛ yɛ bei ni wɔyɔɔ mli nɛɛ hewɔ lɛ, esa akɛ wɔteŋ mɔ fɛɛ mɔ aka eshihilɛi ekwɛ akɛ ani wɔkɛ wɔbe kɛ nibii ni wɔyɔɔ lɛ miitsu nii jogbaŋŋ kɛmiimɔ shi bɔni afee ni wɔkɛtsu hiamɔ lɛ he nii lo. (Efesobii 5:16-17) Bɔfo Paulo ŋma wolo eyaha klɛŋklɛŋ afii oha lɛ mli Hebri Kristofoi lɛ akɛ: “Ejaakɛ nyɛ ni kulɛ esa akɛ nyɛtsɔmɔ tsɔɔlɔi moŋ yɛ be lɛ naa lɛ, ehia akɛ atsɔɔ nyɛ Nyɔŋmɔ wiemɔi lɛ amli shishijee nibii lɛ ekoŋŋ, ni nyɛtsɔmɔ mɛi ni fufɔ ehia amɛ, ni jeee niyenii kpakpa.” (Hebribii 5:12) Taakɛ nakai wiemɔi lɛ tsɔɔ lɛ, ehe miihia ni Kristofoi aŋkroaŋkroi lɛ hu adara. Ni oshara diɛŋtsɛ yɛ he waa akɛ mɔ ko aaaka he ehi shi sɔŋŋ akɛ mumɔŋ abifao, yɛ nɔ najiaŋ ni eeeya ehiɛ kɛyashɛ Kristofoi adalɛ mli lɛ he. Yɛ enɛ kɛ gbeekpamɔ naa lɛ, Paulo woɔ wɔ hewalɛ akɛ: “Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo; nyɛkwɛa nyɛ diɛŋtsɛ nyɛhe ni ahia.” (2 Korintobii 13:5) Ani oka ohe okwɛ akɛ ani ooda yɛ mumɔŋ kɛjɛ be mli ni abaptisi bo kɛbaa nɛɛ lo? Aloo odamɔ he koome lɛ sɔŋŋ kɛkɛ? Shi te mɔ ko aaafee tɛŋŋ ena bɔ ni eshidaamɔ ji hu?
“Abifabii Anii Lɛ”
7. Kɛji abaana wɔmumɔŋ shweremɔ Iɛ faŋŋ lɛ, no lɛ mɛni esa akɛ wɔfee?
7 Bɔfo Paulo kɛɛ akɛ: “Beni miji abifao lɛ, miwieɔ tamɔ abifao, mijwɛŋɔ nii ahe tamɔ abifao, misusuɔ tamɔ abifao; shi beni mitsɔ nuu nukpa lɛ, mishɛre abifabii anii lɛ mishwie sɛɛ.” (1 Korintobii 13:11) Be ko lɛ, wɔ fɛɛ wɔtamɔ abifabii yɛ wɔsusumɔi kɛ wɔnifeemɔi amli, yɛ wɔmumɔŋ dalɛ loo shweremɔ lɛ mli. Shi, kɛji abaana wɔshweremɔ lɛ faŋŋ lɛ, no lɛ esa akɛ wɔjie “abifabii anii lɛ” wɔshwie, taakɛ Paulo kɛɛ lɛ. Mɛni ji nɛkɛ nibii nɛɛ ekomɛi?
8. Taakɛ Paulo wiemɔi ni yɔɔ Hebribii 5:13, 14 tsɔɔ lɛ, mɛni ji okadii ni akɛnaa mumɔŋ abifao lɛ ateŋ ekome?
8 Klɛŋklɛŋ lɛ, kadimɔ Paulo wiemɔi ni yɔɔ Hebribii 5:13, 14 lɛ: “Ejaakɛ mɔ fɛɛ mɔ ni yeɔ fufɔ lɛ, ekpako jalɛ wiemɔ lɛ shi, ejaakɛ fufɔoo ji lɛ. Shi mɛi ni edara lɛ anɔ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.” Ani ‘okpa jalɛ wiemɔ lɛ shi’ jogbaŋŋ? Ani ole Nyɔŋmɔ Wiemɔ, ni ji Biblia lɛ jogbaŋŋ bɔ ni sa, ni obaanyɛ okɛtsu nii ni okɛle “ekpakpa kɛ efɔŋ mlikpamɔ”? Paulo wie akɛ mɛi ni edara lɛ nyɛɔ nakai amɛfeɔ ejaakɛ amɛyeɔ “niyenii kpakpa” be fɛɛ be. Enɛ hewɔ lɛ, bɔ ni mɔ ko sumɔɔ mumɔŋ niyenii kpakpa loo ebaa etsine lɛ ji nɔ kpakpa ni tsɔɔ kɛji mɔ lɛ eda yɛ mumɔŋ aloo eka he eji mumɔŋ abifao lolo.
9. Mɔ diɛŋtsɛ mumɔŋ tsinebaa tsɔɔ bɔ ni emumɔŋ hiɛyaa ji yɛ mɛɛ gbɛ nɔ?
9 Belɛ, te omumɔŋ tsinebaa yɔɔ ha tɛŋŋ? Te obuɔ mumɔŋ niyenii babaoo ni Yehowa kɛhaa daa nɛɛ, ni wɔnaa kɛtsɔɔ Biblia kasemɔ he woji kɛ Kristofoi akpeei kɛ henaabuamɔi ni wɔyaa lɛ anɔ lɛ ohaa tɛŋŋ? (Yesaia 65:13) Ŋwanejee ko bɛ he akɛ, kɛji ajie woji heei akpo yɛ kpokpai wuji anɔ kpeei ashishi daa afi lɛ, onaa he miishɛɛ waa. Shi kɛji oyashɛ shia lɛ, mɛni okɛ woji nɛɛ feɔ? Kɛji Buu-Mɔɔ aloo Awake! woji tɛtrɛbii heei ba lɛ, mɛni ofeɔ? Ani oheɔ be ni okɛkaneɔ nɛkɛ woji nɛɛ fɛɛ, aloo ogbeleɔ amɛmli oyayaayai ni okwɛɔ amɛmli otii lɛ kɛkɛ, kɛkɛ lɛ okɛyafata ekrokomɛi ni yɔɔ owoji atoohe lɛ he? Abaanyɛ abi saji tamɔ enɛɛmɛi yɛ Kristofoi akpeei hu he. Ani oyaa kpeei lɛ eko fɛɛ eko daa? Ani osaa ohe kɛhaa kpeei lɛ, ni okɛ ohe woɔ mli hu? Etamɔ nɔ ni mɛi komɛi eyaje mumɔŋ niyeli shihilɛ ko ni ehiii kwraa mli, ni amɛkpaa niyenii lɛ hiɛ, ni tsɔɔ akɛ amɛkaneɔ woji lɛ hiɛaŋhiɛaŋ kɛkɛ, ni kɛji wɔɔkɛɛ lɛ, amɛkɛ oyaiyeli yeɔ nii lɛ. Kwɛ bɔ ni esoro amɛ yɛ lalatsɛ lɛ he, mɔ ni kɛɛ akɛ: “Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ.” Kɛfata he lɛ, Maŋtsɛ David kɛɛ: “Madao shi yɛ asafo kpele mli; majie oyi yɛ mɛi pii ateŋ.” (Lala 35:18; 119:97) Belɛ eyɛ faŋŋ akɛ bɔ ni wɔhiɛ sɔɔ mumɔŋ nibii wɔhaa lɛ ji nɔ ni tsɔɔ he ni wɔmumɔŋ dalɛ lɛ etee hiɛ kɛyashɛ.
10. Mɛɛ mumɔŋ abifao kadimɔ nɔ ko atsɔɔ yɛ Efesobii 4:14?
10 Paulo tsɔɔ mumɔŋ abifao tsɔmɔ he kadimɔ nɔ kroko beni ebɔ kɔkɔ nɛkɛ lɛ: “Wɔkakã he wɔfee abifabii ni tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ amɛ, ni ekpalaa amɛ kɛyaa kɛbaa yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa.” (Efesobii 4:14) Taakɛ fɔlɔi le jogbaŋŋ lɛ, gbekɛbii taoɔ akɛ amɛle nɔ fɛɛ nɔ. Yɛ gbɛ ko nɔ lɛ, kadimɔ nii kpakpa nɛ, ejaakɛ ehaa amɛnyɛɔ amɛtaoɔ nibii amli ni amɛkɛkaseɔ nii, ni fiofio lɛ amɛdaraa kɛtsɔmɔɔ onukpai. Shi kɛlɛ, he ni eshara lɛ yɔɔ ji bɔ ni nibii gbalaa amɛjwɛŋmɔ kɛjɛɔ nɔ kome he kɛyaa ekroko nɔ lɛ. Ni nɔ ni ehiii fe fɛɛ ji, akɛni amɛbɛ niiashikpamɔ hewɔ lɛ, bei pii lɛ, nɛkɛ nibii amli ni amɛtaoɔ amɛle nɛɛ kɛ amɛ yawoɔ haomɔ mli, ni ekɛ amɛ diɛŋtsɛ kɛ mɛi krokomɛi po woɔ oshara mli. Enɛ ji anɔkwale yɛ mumɔŋ abifabii hu ahe.
11. (a) Mɛni yɔɔ Paulo jwɛŋmɔ mli beni ekɛ wiemɔ tsɔɔmɔ kɔɔyɔɔ fɛɛ tsɔɔmɔ kɔɔyɔɔ” tsu nii lɛ? (b) Mɛɛ ‘kɔɔyɔɔi’ wɔkɛkpeɔ ŋmɛnɛ?
11 Shi, mɛni yɔɔ Paulo jwɛŋmɔ mli beni ewie akɛ “tsɔɔmɔ kɔɔyɔɔ fɛɛ tsɔɔmɔ kɔɔyɔɔ” nyɛɔ etswaa mumɔŋ abifabii lɛ? Atsɔɔ wiemɔ “kɔɔyɔɔ” lɛ shishi yɛ biɛ kɛjɛ Hela wiemɔ aʹne·mos mli, ni International Critical Commentary lɛ wieɔ yɛ he akɛ eka shi faŋŋ akɛ “ahala no akɛ nɔ ni nyɛɔ etsɔɔ jwɛŋmɔ ni ji tsakemɔ ni anyɛɔ atsakeɔ mɔ lɛ mli jogbaŋŋ.” Paulo wiemɔi ni nyiɛ no sɛɛ nɔŋŋ, ni ji “yɛ gbɔmɛi aŋaa fɔŋ too mli” lɛ feɔ enɛ he mfoniri jogbaŋŋ diɛŋtsɛ. Wiemɔ “ŋaa fɔŋ too” lɛ klɛŋklɛŋ shishinumɔ yɛ blema wiemɔ mli lɛ tsɔɔ “dais” (ludo-tɛ) loo “dais-shwɛmɔ,” aloo kɛji wɔɔkɛɛ lɛ, shwɛmɔ ni heniianaa akɛyeɔ. Oti lɛ ji akɛ, wɔkɛ susumɔi heei kɛ nibii ni ekolɛ amɛsɛɛdii baanyɛ afee nɔ ni yeee mɔ awui ko, ni kaa mɔ, aloo amɛtamɔ nɔ ni hi po lɛ kpeɔ be fɛɛ be. Paulo wiemɔi lɛ kɔɔ nibii ni saa wɔhemɔkɛyeli lɛ he titri lɛ ahe—kui ni atsɛɔ kɛhaa je lɛŋ jamɔi ekomefeemɔ, kɛ adesai ashihilɛ kɛ maŋkwramɔŋ otii asɛɛtiumɔ, kɛ ekrokomɛi ni tamɔ nakai. (Okɛto 1 Yohane 4:1 he.) Shi shishitoo mla ni yɔɔ mli lɛ feɔ anɔkwale yɛ je lɛŋ nifeemɔi kɛ kusumii ni mɛi pii kɛ amɛhe woɔ mli ni yaa nɔ etsakeɔ be fɛɛ be lɛ hu gbɛfaŋ—nifeemɔ sui, hiɛtserɛjiemɔ, niyenii, hewalɛnamɔ aloo kpɔiŋgbɔlemɔ mli nifeemɔi, kɛ nibii krokomɛi ni tamɔ nakai. Akɛni mumɔŋ abifao lɛ bɛ niiashikpamɔ kɛ nii ahe susumɔ ni ja hewɔ lɛ, nɛkɛ nibii nɛɛ baanyɛ agbala ejwɛŋmɔ waa, ni no baanyɛ atsi enaa koni ekanyɛ eshwere yɛ mumɔŋ ni enyɛ etsu egbɛnaa nii ni he hiaa waa akɛ Kristofonyo lɛ ahe nii.—Mateo 6:22-25.
12. Esoro gbekɛbii bibii yɛ onukpai ahe yɛ gbɛnaa nii agbɛfaŋ yɛ mɛɛ gbɛ nɔ?
12 Nɔ kroko ni afɔɔ namɔ yɛ gbekɛbii bibii ahe ji bɔ ni yelikɛbuamɔ kɛ hesusumɔ he hiaa amɛ be fɛɛ be lɛ. Amɛleee akɛ gbɛnaa nii komɛi jwere amɛnɔ, ni ehe sane ko hu kɔɔɔ amɛhe; gbekɛbiiashi ji wala be ko ni nɔ fɛɛ nɔ feɔ tamɔ fɛoyeli kɛ shwɛmɔ sɔŋŋ. Taakɛ Paulo kɛɛ lɛ, ‘amɛwieɔ tamɔ abifao, amɛjwɛŋɔ nii ahe tamɔ abifao, ni amɛsusuɔ tamɔ abifao.’ Amɛsusuɔ akɛ mɛi krokomɛi baatsu amɛhiamɔ nii ahe nii amɛha amɛ. Abaanyɛ awie nakai nɔŋŋ yɛ mumɔŋ abifao hu he. Kɛji mɔ hee ko ha eklɛŋklɛŋ Biblia mli wiemɔ aloo etee shiɛmɔ klɛŋklɛŋ kwraa lɛ, emumɔŋ fɔlɔ lɛ naa he miishɛɛ akɛ ebaafee nɔ fɛɛ nɔ ni ekɛye ebua lɛ. Shi kɛji mɔ hee nɛɛ tee nɔ ekɛ ehe fɔ yelikɛbuamɔ nɛɛ nɔ be fɛɛ be, ni efee lɛ faŋŋ akɛ enyɛɛɛ ekpɛlɛ gbɛnaa nii ni ji lɛ diɛŋtsɛ ehe nɔ ni eeekwɛ lɛ nɔ lɛ, mɛni jɛɔ mli baa? Eyɛ faŋŋ akɛ no baatsɔɔ akɛ enyɛɛɛ etsu lɛ diɛŋtsɛ ehe nii.
13. Mɛni hewɔ esa akɛ mɔ fɛɛ mɔ akase lɛ diɛŋtsɛ ejatsu teremɔ lɛ?
13 Yɛ enɛ gbɛfaŋ lɛ, kaimɔ ŋaawoo ni bɔfo Paulo kɛha lɛ, akɛ, eyɛ mli akɛ esa akɛ ‘wɔkpeekpee wɔhe kɛtere wɔjatsui’ lɛ moŋ, shi kɛlɛ, “mɔ fɛɛ mɔ aaatere lɛ diɛŋtsɛ ejatsu.” (Galatabii 6:2, 5) Yɛ anɔkwale mli lɛ, ebiɔ be kɛ mɔdɛŋbɔɔ dani mɔ ko anyɛ akase bɔ ni eeefee etere e-Kristofoi agbɛnaa nii eha, ni ekolɛ ebaabi afɔleshaa yɛ nibii komɛi amli. Shi kɛlɛ, ebaafee tɔmɔ ni hiɛdɔɔ yɔɔ mli waa akɛ mɔ ko aaaŋmɛ gbɛ ni ekɛ ehe awo shihilɛ mli fɛoyelii kɛ shwɛmɔi amli fe nine, kɛji hiɛtserɛjiemɔ jio, gbɛfaai, lala-tswaa tsɔnei sɔrɔtoi ahemɔ jio, aloo heloonaa nitsumɔ po sɛɛdii ni he ehiaaa, aahu akɛ eeeha, kɛji wɔɔkɛɛ lɛ, ehi shi ni ekɛ ehe wooo nifeemɔi amli, ni etaooo akɛ eeena gbɛfaŋnɔ babaoo yɛ kaselɔ-feemɔ nitsumɔ lɛ mli aloo ni eeeda kɛshɛ mumɔŋ shweremɔ kɛ gbɛnaa nii ahe nitsumɔ mli. Kaselɔ Yakobo woɔ wɔ hewalɛ akɛ: “Nyɛtsɔmɔa wiemɔ lɛ nɔ yelɔi, ni jeee wiemɔ lɛ nulɔi kɛkɛ, ni nyɛkɛmiishishiu nyɛ diɛŋtsɛ nyɛhe.”—Yakobo 1:22; 1 Korintobii 16:13.
14. Mɛni hewɔ esaaa akɛ wɔmii shɛɔ mumɔŋ abifao kadimɔ nii ni wɔɔjie lɛ kpo lɛ pɛ he lɛ?
14 Hɛɛ, kadimɔ nii babaoo yɛ ni amɛnamɔ waaa kwraa, ni haa anyɛɔ anaa gbekɛ kɛjɛɔ onukpa he. Shi, taakɛ Paulo wie lɛ, nɔ ni he hiaa ji ni wɔjie abifabii ahe nibii lɛ fɛɛ kɛjɛ wɔhe fiofio, ni wɔya nɔ wɔdara. (1 Korintobii 13:11; 14:20) Kɛ jeee nakai lɛ, wɔbaabɔi shɔ̃ɔ feemɔ yɛ mumɔŋ. Shi mɛɛ gbɛ nɔ mɔ ko baatsɔ aya ehiɛ? Mɛni ebiɔ dani mɔ anyɛ ahiɛ mumɔŋ shweremɔ mli kɛyashɛ dalɛ diɛŋtsɛ mli?
Bɔ ni Shweremɔ Jeɔ Kpo Faŋŋ ni Anaa
15. Mɛni ji shishijee nibii komɛi ni he hiaa yɛ nifeemɔ ni ji dalɛ lɛ mli?
15 Ojogbaŋŋ, mɛɛ gbɛ nɔ dalɛ tsɔɔ ebaa yɛ adebɔɔ je lɛŋ nibii agbɛfaŋ? The World Book Encyclopedia lɛ tsɔɔ mli akɛ: “Mɔ aŋkro fɛɛ mɔ aŋkro jeɔ wala shishi akɛ wala yibii kome pɛ. Wala yibii lɛ gbalaa nibii ewoɔ emli ni etsakeɔ lɛ efeɔ lɛ nibii ni ekɛbaatswa ehe ema shi ni he hiaa ni ekɛbaada. Enɛ hewɔ lɛ, wala yibii kome lɛ daa kɛjɛɔ emli gbɛ. Nɛkɛ wala yibii nɛɛ baanyɛ afa, ni ejara ehe mli efee lɛ wala yibii krokomɛi. Gbɛ ni etsɔɔ nɔ etswaa ehe emaa shi, ni efaa, ní ejaraa ehe mli babaoo lɛ ji nɔ ni atsɛɔ lɛ dalɛ lɛ.” Oti ni sa kadimɔ yɛ biɛ ji akɛ, dalɛ lɛ baa kɛjɛɔ mli gbɛ. Kɛji aye niyenii kpakpa ni hewalɛ yɔɔ mli, ni ebote fãi lɛ amli, ni akɛtsu nii lɛ, dalɛ jɛɔ mli baa. Anaa enɛ jogbaŋŋ yɛ abifao ŋmɔŋ ni afɔ lɛ lɛ gbɛfaŋ. Taakɛ wɔle lɛ, bi ŋmɔŋ yeɔ niyenii ko ni aje gbɛ afutu lɛ jogbaŋŋ yɛ gbɛ krɛdɛɛ nɔ daa gbi, ni ji fufɔ, ni fɔ kɛ wala yibii amli hewalɛ ni ji protein, ni he hiaa waa kɛha dalɛ lɛ fa yɛ mli. Mɛni jɛɔ mli baa? Dalɛ ni abifao lɛ baada yɛ ebɔɔ su naa yɛ ewala afii ni eshwɛ lɛ fɛɛ mli lɛ eko kwraa kɛ bɔ ni edaa yɛ etsiimɔ kɛ ekɛlɛ gbɛfaŋ yɛ eklɛŋklɛŋ afi lɛ mli lɛ yeee egbɔ kɔkɔɔkɔ.
16. Mɛɛ dalɛ afɔɔ namɔ yɛ Biblia kaselɔi pii agbɛfaŋ, ni enɛ nyɛɔ ebaa yɛ mɛɛ gbɛ nɔ?
16 Nibii babaoo yɛ ni wɔbaanyɛ wɔkase kɛjɛ adebɔɔ mli nifeemɔ ni ji dalɛ nɛɛ mli, ni wɔkɛtsu nii yɛ wɔmumɔŋ shweremɔ kɛjɛ shishijee nibii amli kɛyashɛ dalɛ mli lɛ mli. Klɛŋklɛŋ kwraa lɛ, daa gbi niyeli gbɛjianɔtoo he miihia. Kuu osɛɛ ni osusu be mli ni obɔi Biblia lɛ kasemɔ klɛŋklɛŋ kwraa lɛ he okwɛ. Kɛji otamɔ bɔ ni mɛi krokomɛi babaoo ji lɛ, belɛ no mli lɛ ekolɛ oleee Nyɔŋmɔ Wiemɔ lɛ he nɔ ko kwraa. Shi osaa ohe kɛha onikasemɔ lɛ daa otsi, ni akɛ bo fee o-Biblia mli nikasemɔ lɛ, ni yɛ be fioo sɛɛ lɛ, obanu Ŋmalɛi lɛ amli shishijee tsɔɔmɔi lɛ fɛɛ ashishi jogbaŋŋ. Esa akɛ okpɛlɛ nɔ akɛ, eji dalɛ ko ni sa kadimɔ waa, ni enɛ fɛɛ jɛ Nyɔŋmɔ Wiemɔ lɛ ni otee nɔ okase daa lɛ hewɔ!
17. Mɛni hewɔ anyɛŋ ashi daa gbi mumɔŋ niyeli gbɛjianɔtoo sɛɛ kɔkɔɔkɔ lɛ?
17 Shi, amrɔ nɛɛ hu? Ani oyaa nɔ onyiɛɔ daa gbi niyeli gbɛjianɔtoo sɛɛ pɛpɛɛpɛ? Esaaa akɛ mɔ ko susuɔ akɛ akɛni abaptisi lɛ hewɔ lɛ, ehe ehiaaa dɔŋŋ ni etoɔ gbɛjianɔ ni eyaa nɔ ekaseɔ nii, ni eyeɔ mumɔŋ niyenii ni hewalɛ yɔɔ mli hu lɛ kɛtsaraa nɔ daa gbi. Eyɛ mli akɛ Timoteo ji Kristofonyo nɔkwɛlɔ ni eda yɛ mumɔŋ moŋ, shi Paulo wo lɛ hewalɛ akɛ: “Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ faŋŋ.” (1 Timoteo 4:15) Belɛ kwɛ bɔ ni ehe hiaa akɛ wɔteŋ mɔ fɛɛ mɔ hu afee nakai! Kɛji oyɛ he miishɛɛ akɛ oooha mɛi fɛɛ ana eshweremɔ lɛ faŋŋ lɛ, no lɛ onyɛŋ oshi nɛkɛ mɔdɛŋbɔi nɛɛ asɛɛ.
18. Anaa mɔ aŋkro lɛ mumɔŋ shweremɔ faŋŋ yɛ mɛɛ gbɛ nɔ?
18 Ní mɔ ko baaha ana eshweremɔ faŋŋ lɛ etsɔɔɔ mɔdɛŋbɔɔ krɛdɛɛ ko ni ekɛaawo ehe nɔ ni ekɛtsɔɔ nɔ ni ele aloo ni eeebɔ mɔdɛŋ ni esa mɛi krokomɛi ahiɛ. Yesu wie akɛ: “Nyɛ ji je lɛŋ la lɛ. Maŋ ni ma gɔŋ nɔ lɛ, anyɛŋ aŋɔtee” ni “nɔ ni eyi tsui obɔ kɛteke nɔ lɛ, no nɔŋŋ naabu wieɔ.” (Mateo 5:14; 12:34) Kɛji Nyɔŋmɔ Wiemɔ lɛ mli nibii kpakpai lɛ yimɔ wɔtsuii kɛ wɔjwɛŋmɔi amli obɔbɔ lɛ, wɔnyɛŋ wɔtsi naa akɛ ja wɔjie lɛ kpo yɛ wɔnifeemɔ kɛ wɔwiemɔ fɛɛ mli.
19. Mɛni esa akɛ wɔtswa wɔfai shi akɛ wɔbaafee yɛ wɔmumɔŋ shweremɔ he, kɛ mɛni ni baajɛ mli aba ni ma wɔhiɛ?
19 No hewɔ lɛ, sanebimɔ lɛ ji: Ani okaseɔ Biblia lɛ daa, ni oyaa Kristofoi akpeei hu koni oyaye niyenii kpakpa ni asaa, ni baanyɛ akanya omligbɛ mumɔŋ dalɛ lɛ? Kɛ eba mumɔŋ shweremɔ loo hiɛyaa lɛ, kaaha shi ni ooodamɔ ni okɛ ohe wooo nɔ ko mli lɛ kɛkɛ miifa kɛha bo. Tsu he nii diɛŋtsɛ koni okɛna nɔmimaa akɛ okɛ mumɔŋ niyenii babaoo ni Yehowa haa wɔ lɛ miitsu nii jogbaŋŋ kɛmiimɔ shi. Kɛ oji mɔ ko ni ‘mii shɛɔ Yehowa mla lɛ he, ni okaneɔ ni ojwɛŋɔ nɔ nyɔɔŋ kɛ shwane’ lɛ, no lɛ abaanyɛ awie yɛ ohe hu akɛ: “Etamɔ tso ni atɛo yɛ faai atoi, ni woɔ yibii yɛ ebe lɛ mli, ni eyibaai kpɔŋ; ni nɔ fɛɛ nɔ ni efeɔ lɛ shwereɔ.” (Lala 1:2, 3) Shi kɛlɛ, mɛni obaanyɛ ofee koni okɛna nɔmimaa akɛ obaaya nɔ oshwere yɛ mumɔŋ? Abaasusu enɛ he yɛ nikasemɔ ni nyiɛ enɛ sɛɛ lɛ mli.
Ani Obaanyɛ Oha Hetoo?
◻ Mɛni hewɔ esa akɛ wɔka wɔmumɔŋ shweremɔ wɔkwɛ be fɛɛ be lɛ?
◻ Mumɔŋ dalɛ kɛ mumɔŋ niyenii ni baa mɔ tsina yɛ tsakpaa yɛ mɛɛ gbɛ nɔ?
◻ Wiemɔ “tsɔɔmɔ kɔɔyɔɔ fɛɛ tsɔɔmɔ kɔɔyɔɔ” lɛ tsɔɔ mɛni?
◻ Mɛni hewɔ esa akɛ mɔ fɛɛ mɔ atere lɛ diɛŋtsɛ ejatsu lɛ?
◻ Mɛɛ gbɛ nɔ otsɔɔ onaa mumɔŋ shweremɔ loo nɔyaa?
[Mfoniri ni yɔɔ baafa 10]
Ani oheɔ be ni okɛkaneɔ Biblia kasemɔ he woji lɛ?