“Nyɛnyiɛa Tamɔ La Bii”
“Nyɛwo[a] gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.”—EFESOBII 4:24.
1. Mɛni akɛjɔɔ Yehowa jalɔi? Mɛni hewɔ?
YEHOWA NYƆŊMƆ ji “lai a-Tsɛ” lɛ, ni ji “duŋ ko bɛ emli kwraa.” (Yakobo 1:17;1 Yohane 1:5) E-Bi, Yesu Kristo wie lɛ diɛŋtsɛ ehe akɛ: “Mi ji je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeená wala la lɛ.” (Yohane 8:12) No hewɔ lɛ ajɔɔ Yehowa anɔkwa jalɔi, ni ji e-Bi lɛ sɛɛnyiɛlɔi lɛ waa kɛ sɛɛyoomɔ ni amɛna—yɛ jwɛŋmɔŋ, jeŋba mli, kɛ mumɔŋ fɛɛ lɛ—ni ‘amɛmiitso akɛ kanei yɛ je nɛŋ.’—Filipibii 2:15.
2. Mɛɛ sɔrɔto-feemɔ ni ka Nyɔŋmɔ webii kɛ je lɛ teŋ agba afɔ shi?
2 Jeeŋmɔ beebe ni akɛ mumɔ tsirɛ gbalɔ Yesaia ni egba nɛkɛ sɔrɔto-feemɔ nɛɛ efɔ shi akɛ: “Naa, duŋ ha shikpɔŋ lɛ nɔ, ni duŋ kpii ha majimaji lɛ anɔ; shi bo lɛ Yehowa miikpɛ yɛ onɔ, ni enunyam lɛ epue yɛ onɔ.” Yɛ anɔkwale mli lɛ, awieɔ adesai fɛɛ ni etsi amɛhe kɛjɛ Nyɔŋmɔ he lɛ ahe akɛ amɛyɛ “lumɛi ni yɔɔ benɛ-be duŋ lɛ mli lɛ” ahewalɛ kɛ amɛkudɔmɔ shishi.—Yesaia 60:2; Efesobii 6:12.
3. Mɛɛ yiŋtoi ahewɔ wɔyɔɔ Paulo ŋaawoo ni sa jogbaŋŋ lɛ he miishɛɛ waa lɛ?
3 Bɔfo Paulo susu enanemɛi Kristofoi lɛ ahe waa akɛ amɛya nɔ amɛtsi amɛhe kɛjɛ nɛkɛ duŋ nɛɛ he. Ewo amɛ hewalɛ akɛ “[amɛ]kanyiɛ tamɔ bɔ ni jeŋmajiaŋbii krokomɛi lɛ hu nyiɛɔ lɛ . . . dɔŋŋ” shi moŋ “[amɛ]nyiɛ tamɔ la bii.” (Efesobii 4:17; 5:8) Egbala bɔ ni amɛaafee amɛye omanye yɛ enɛ feemɔ mli lɛ hu mli eha amɛ. Ŋmɛnɛ, duŋ kɛ duŋ kpii ni eha jeŋmaji lɛ anɔ lɛ mli eti waa. Je lɛ emii kɛbote jeŋba kɛ mumɔŋ shwɛm-feemɔ ŋmɔtɔ lɛ mli vii diɛŋtsɛ. Enɛ hewɔ lɛ, Yehowa jalɔi yɛ ta kpele ko ni mli miiwa kɛmiiya hiɛ daa gbi, ni esa akɛ amɛwuu. No hewɔ lɛ, wɔyɛ nɔ ni Paulo yɔɔ kɛɛmɔ yɛ he lɛ he miishɛɛ waa.
Kasemɔ Kristo he Nii
4. Mɛni yɔɔ Paulo jwɛŋmɔ mli beni ekɛɛ akɛ: “Jeee nakai nyɛkase Kristo lɛ”?
4 Beni etsɔɔ je lɛŋ nibii asɛɛdii ni sɛɛnamɔ bɛ he kɛ nibii ni he tseee lɛ lɛ amli sɛɛ lɛ, bɔfo Paulo ku sɛɛ egbala ejwɛŋmɔ kɛba enanemɛi Kristofoi ni yɔɔ Efeso lɛ anɔ ekoŋŋ. (Ofainɛ kanemɔ Efesobii 4:20, 21.) Paulo kɛ aaafee afii etɛ eshiɛ ni ekɛtsɔɔ nii yɛ nakai maŋtiase lɛ mli, ni eka shi faŋŋ akɛ lɛ diɛŋtsɛ ele mɛi babaoo yɛ nakai asafo lɛ mli. (Bɔfoi lɛ Asaji 20:31-35) Enɛ hewɔ lɛ, beni ewie akɛ, “Jeee nakai nyɛkase Kristo lɛ,” no mli lɛ eewie nɔ ni lɛ diɛŋtsɛ ele lɛ he, akɛ jeee anɔkwale lɛ henɔ ko ni aŋmɛɔ nɔ fɛɛ nɔ feemɔ gbɛ yɛ mli, ni agbe hewalɛ ni yɔɔ mli lɛ, ni ŋmɛɔ jeŋba shara shihilɛ ní ewie he yɛ kukuji 17 kɛyashi 19 lɛ gbɛ lɛ atsɔɔ Efeso Kristofoi lɛ. Ele akɛ aje gbɛ atsɔɔ amɛ anɔkwa Kristofoi ashihilɛ gbɛ, taakɛ Yesu Kristo fee he mfoniri lɛ, jogbaŋŋ yɛ gbɛ ni ja kɛmɔ shi nɔ. No hewɔ lɛ, amɛnyiɛɛɛ duŋ mli dɔŋŋ tamɔ bɔ ni jeŋmaji lɛ nyiɛ mli lɛ, shi moŋ la bii ji amɛ.
5. Mɛɛ sɔrɔto-feemɔ yɔɔ anɔkwale lɛ ni wɔɔhi mli hiɛaŋhiɛaŋ kɛkɛ, kɛ anɔkwale lɛ ni wɔɔha ehi wɔmli lɛ teŋ?
5 Belɛ, kwɛ bɔ ni ehe hiaa akɛ “[a]kase Kristo lɛ” yɛ gbɛ kpakpa nɔ! Ani gbɛi ni ejaaa yɛ ni atsɔɔ nɔ akaseɔ Kristo lɛ? Hɛɛ, ekomɛi yɛ. Mra mli kɛtsɔ hiɛ, yɛ Efesobii 4:14 lɛ, Paulɔ etsɔ hiɛ ewo nyɛmimɛi lɛ ŋaa akɛ: “Wɔkakã he wɔfee abifabii ni tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ amɛ, ni ekpalaa amɛ kɛyaa kɛbaa yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa.” Eka shi faŋŋ akɛ, mɛi komɛi yɛ ni amɛkase Kristo lɛ, shi kɛlɛ amɛkã he amɛnyiɛ je lɛŋ gbɛi lɛ anɔ lolo, ni amɛbɔɔ mɔdɛŋ po akɛ amɛaalaka mɛi krokomɛi hu ni amɛfee nakai. Ani wɔnaa oshara ni yɔɔ anɔkwale lɛ mli kɛkɛ ni mɔ ko aaahi, taakɛ mɛi komɛi wieɔ lɛ, yɛ enɛ mli, kɛ akɛto anɔkwale lɛ ni wɔɔná yɛ wɔmli lɛ he? Mɛi krokomɛi nyɛ amɛlaka mɛi ni yɔɔ hiɛaŋhiɛaŋ shishinumɔ pɛ lɛ yɛ gbɛ ni waaa kwraa nɔ, ni amɛna amɛnɔ hewalɛ yɛ Paulo beaŋ, ni eji anɔkwale ŋmɛnɛ hu. Paulo tee nɔ ewie akɛ, kɛ́ amɛaatsĩ enɛ naa lɛ, no lɛ ehe miihia ni Efesobii lɛ ‘anu Kristo he ni atsɔɔ amɛ nii kɛtsɔ Yesu nɔ.’—Efesobii 4:21.
6. Mɛɛ gbɛ nɔ wɔɔtsɔ wɔkase nii, wɔnu wiemɔ, ni Kristo atsɔɔ wɔ nii ŋmɛnɛ?
6 Wiemɔi ‘akase nii,’ ‘anu wiemɔ,’ kɛ ‘atsɔɔ nii’ ni Paulo kɛtsu nii lɛ fɛɛ tsɔɔ nikasemɔ kɛ gbɛtsɔɔmɔ ni ayaa nɔ akɛhaa, tamɔ afeɔ yɛ skul lɛ. Yɛ anɔkwale mli lɛ, wɔnyɛŋ wɔnu Yesu diɛŋtsɛ gbee, ni wɔkase nii kɛjɛ eŋɔɔ, aloo etsɔɔ wɔ nii tɛɛ ŋmɛnɛ. Shi eekwɛ jeŋ muu fɛɛ Biblia mli tsɔsemɔ he gbɛjianɔtoo he tafaa ko nɔ kɛtsɔ “[e]tsulɔ anɔkwafo kɛ nilelɔ” lɛ nɔ. (Mateo 24:45-47; 28:19, 20) Kɛji wɔyeɔ mumɔŋ niyenii ni tsulɔ kuu lɛ kɛhaa yɛ ebe naa pɛpɛɛpɛ lɛ daa, ni wɔkase jogbaŋŋ yɛ wɔ teemɔŋ nikasemɔ mli aloo yɛ asafoŋ nikasemɔ mli, ni wɔjwɛŋ nɔ, ni wɔkɛ nɔ ni wɔkase lɛ tsu nii lɛ, no lɛ wɔbaanyɛ “[wɔ]kase Kristo lɛ” jogbaŋŋ yɛ gbɛ ni ja kɛmɔ shi nɔ. Nyɛhaa wɔkaia ni wɔkɛ nibii ni aha wɔ lɛ fɛɛ atsua nii jogbaŋŋ kɛmɔa shi bɔni afee ni wɔnyɛ wɔkɛ anɔkwayeli akɛɛ akɛ ‘wɔnu ehe ni atsɔɔ wɔ nii yɛ emli hu.’
7. Mɛɛ oti ni sa kadimɔ waa abaanyɛ ana yɛ Paulo wiemɔ, “anɔkwale yɛ Yesu mli” lɛ mli?
7 Nɔ ni yɔɔ miishɛɛ ji akɛ, beni Paulo ma nikasemɔ gbɛ lɛ nɔ mi yɛ Efesobii 4: 21 sɛɛ lɛ, ekɛfata he akɛ: “Taakɛ bɔ ni ji anɔkwale yɛ Yesu mli lɛ.” Biblia he wielɔi komɛi gbalaa jwɛŋmɔ kɛyaa anɔkwale ni eji akɛ Paulo kɛ gbɛi Yesu lɛ diɛŋtsɛ tsuuu nii yɛ eniŋmaai amli lɛ nɔ. Lɛlɛŋ, biɛ pɛ ji he ni ekɛtsu nii yɛ, yɛ wolo ni eŋma eyaha Efesobii lɛ mli. Ani enɛ he miihia yɛ gbɛ krɛdɛɛ ko nɔ? Ekolɛ Paulo miigbala jwɛŋmɔ kɛmiiya nɔkwɛmɔ nɔ ni Yesu fee beni eji adesa lɛ nɔ. Kaimɔ akɛ, be ko lɛ Yesu wie lɛ diɛŋtsɛ ehe akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ.” (Yohane 14:6; Kolosebii 2:3) Yesu kɛɛ: “Mi ji . . . anɔkwale lɛ” ejaakɛ jeee wiemɔ ewie aloo tsɔɔmɔ folo kɛkɛ etsɔɔ, shi moŋ ehi shi yɛ naa ni efee he mfoniri hu. Hɛɛ, anɔkwa Kristojamɔ jeee susumɔ ko kɛkɛ, shi moŋ eji shihilɛ gbɛ. Nɔ ni fata ‘Kristo kasemɔ’ he hu ji ni aaakase lɛ yɛ bɔ ni ehi shi yɛ anɔkwale lɛ naa eha lɛ. Ani ohiɔ shi yɛ Yesu sɛɛnyiɛmɔ mli? Ani onyiɛɔ enanemaa hei lɛ asɛɛ kpaakpa daa gbi? Ja wɔfee nakai dani wɔɔnyɛ wɔya nɔ wɔnyiɛ akɛ la bii.
‘Nyɛshɛa Nyɛsá Jeŋba lɛ Nyɛfɔa’
8. Mɛɛ mfoniri-feemɔ Paulo kɛtsu nii yɛ Efesobii 4:22, 24, ni mɛni hewɔ esa jogbaŋŋ lɛ?
8 Bɔni afee ni ekɛtsɔɔ bɔ ni wɔɔfee ‘wɔkase Kristo lɛ’ yɛ omanyeyeli mli ni wɔnyiɛ akɛ la bii lɛ, Paulo tee nɔ ewie yɛ Efesobii 4:22-24 akɛ, gbɛi titrii etɛ yɛ ni sa akɛ wɔtsɔ nɔ. Amɛteŋ klɛŋklɛŋ nɔ ji: “Nyɛshɛ nyɛsá jeŋba lɛ naa gbɔmɔ momo ni efite yɛ shishiumɔ sɛɛdii lɛ anaa lɛ nyɛfɔ.” (Efesobii 4:22) Wiemɔi ‘nyɛshɛ nyɛfɔ’ (“jiemɔ ofɔ shi,” Kingdom Interlinear) kɛ “nyɛwo” (kuku 24) lɛ tsɛɔ jwɛŋmɔ yisɛɛ kɛyaa atade loo hehaanɔ jiemɔ kɛ ekroko ni awoɔ ekoŋŋ lɛ he mfoniri nɔ. Mfoniri-feemɔŋ wiemɔ ni Paulo kɛfɔɔ nitsumɔ waa nɛ, ni eji nɔ ni mɔɔ shi jogbaŋŋ hu. (Romabii 13:12, 14; Efesobii 6:11-17; Kolosebii 3:8-12; 1 Tesalonikabii 5:8) Kɛ wɔ atade wo muji aloo nɔ ko tá mli, tamɔ ekolɛ beni wɔyeɔ nii lɛ, wɔtsakeɔ amrɔ nɔŋŋ ni wɔɔna hegbɛ. Ani esaaa ni wɔnuɔ he nakai nɔŋŋ yɛ wɔmumɔŋ shihilɛ ni aaawo muji lɛ he?
9. Mɛɛ gbɛ nɔ mɔ ko tsɔɔ ejieɔ gbɔmɔ momo lɛ yɛ ehe?
9 Belɛ, te mɔ ko feɔ tɛŋŋ eshɛɔ gbɔmɔ momo lɛ efɔɔ? Feemɔ-wiemɔ ‘shɛ ofɔ’ lɛ yɛ nɔ ni atsɛɔ lɛ nifeemɔ be kuku he wiemɔ mli, yɛ shishijee wiemɔ ni akɛtsu nii lɛ mli. Etsɔɔ nɔ ko ni afeɔ shikome pɛ aloo shikome nyɔŋlo. Enɛ kɛɔ wɔ akɛ esa akɛ wɔjie “ gbɔmɔ momo” (“tsutsu gbɔmɔ,” Kingdom Interlinear) lɛ, kɛ wɔ “sa jeŋba lɛ” wɔshɛ wɔfɔ kwraa kɛ nifeemɔ ni yiŋkpɛɛ yɔɔ sɛɛ, koni emɔ shi jogbaŋŋ ni eko akashwɛ. Ejeee nɔ ko ni wɔbaanyɛ wɔsusu efeemɔ he aloo wɔshashao shi yɛ he po ni wɔye omanye. Mɛni hewɔ?
10. Mɛni hewɔ esa akɛ akɛ yiŋkpɛɛ kɛ shiŋŋfeemɔ atsu nii yɛ gbɔmɔ momo lɛ jiemɔ mli lɛ?
10 Wiemɔ “efite” lɛ tsɔɔ akɛ “gbɔmɔ momo” lɛ yɛ jeŋba mli fitemɔ shihilɛ ko ni miiya nɔ daa mli, ni eeya nɔ eefite kwraa be fɛɛ be. Yɛ faŋŋ mli lɛ, akɛni amɛkpoo mumɔŋ sɛɛyoomɔ ni amɛaana lɛ hewɔ lɛ, adesai fɛɛ ashihilɛ miifite aloo eeba shi be fɛɛ be. Ní enɛ jɛ “shishiumɔ sɛɛdii” hewɔ, taakɛ Paulo kɛɛ lɛ. Heloonaa nibii asɛɛdii shishiuɔ mɔ ejaakɛ amɛtamɔ nibii ni yeee mɔ awui, shi amɛkpataa mɔ hiɛ yɛ naagbee kwraa. (Hebribii 3:13) Kɛji akuuu naa lɛ, enaagbee baafee hebulemɔ kɛ gbele. (Romabii 6:21; 8:13) No hewɔ ni esa akɛ ashɛ gbɔmɔ momo lɛ afɔ, ni akɛ yiŋkpɛɛ ni yɔɔ shiŋŋ ajie yɛ he kwraa kɛmɔ shi, tamɔ bɔ ni ajieɔ atade momo ni ewo muji lɛ.
“Jwɛŋmɔ lɛ Mumɔ” Hee Lɛ
11. Nɛgbɛ esa akɛ mumɔŋ ehee-feemɔ lɛ aje shishi kɛjɛ?
11 Kɛji mɔ ko gbee ŋmɔtɔ mli ni ete shi lɛ, jeee jiemɔ kɛkɛ ehe hiaa ni ejie etadei ni ewo muji lɛ, shi moŋ ehe hiaa hu ni eju ehe jogbaŋŋ dani ekɔ atade kroko ni he tse ni ewo. Nakai pɛpɛɛpɛ ji nɔ ni Paulo tsɔɔ akɛ gbɛ ni ji enyɔ ni atsɔɔ nɔ ashɛɔ mumɔŋ sɛɛyoomɔ namɔ mli lɛ: “Ni nyɛtsɔmɔ mɛi heei yɛ nyɛjwɛŋmɔ mumɔ lɛ mli.” (Efesobii 4:23) Taakɛ etsɔ hiɛ ewie momo, yɛ kukuji 17 kɛ 18 lɛ, jeŋmaji lɛ nyiɛɔ “yɛ amɛ yaka jwɛŋmɔ lɛ mli” ni “amɛjwɛŋmɔ mli ewo duŋ.” Yɛ shishinumɔ ni ja naa lɛ, jwɛŋmɔ lɛ, ni ji sɛɛyoomɔ kɛ shishinumɔ namɔ shishijee he lɛ, ji he ni esa akɛ ehee-feemɔ lɛ aje shishi kɛjɛ. Mɛɛ gbɛ nɔ aaatsɔ afee enɛ? Paulo tsɔɔ mli akɛ, kɛtsɔ mumɔ ni kudɔɔ wɔ jwɛŋmɔ lɛ ní wɔɔha efee ehee lɛ nɔ. Mɛni ji nakai mumɔ lɛ?
12. Mɛni ji mumɔ ni kudɔɔ jwɛŋmɔ lɛ?
12 Ani mumɔ krɔŋkrɔŋ lɛ ji mumɔ ni kudɔɔ wɔjwɛŋmɔ, ni Paulo wieɔ he lɛ? Dabi. Wiemɔ kuku ni ji “nyɛjwɛŋmɔ mumɔ lɛ” kaneɔ yɛ faŋŋ mli akɛ “nyɛjwɛŋmɔ lɛ mumɔ.” He ko bɛ Biblia lɛ mli ni awieɔ Nyɔŋmɔ mumɔ krɔŋkrɔŋ lɛ he yɛ akɛ adesa ko nɔ ni, aloo eji adesa gbɔmɔtso lɛ fã ko. Wiemɔ “mumɔ” lɛ klɛŋklɛŋ shishinumɔ ji “mumɔ ni amuɔ,” shi akɛtsuɔ nii yɛ Biblia lɛ mli hu “kɛhaa hewalɛ ni haa mɔ ko jieɔ su, kanyamɔ, loo henumɔ pɔtɛɛ ko kpo, aloo nɔ ni haa mɔ lɛ feɔ nɔ ko loo ekɔɔ gbɛ pɔtɛɛ ko.” (Insight on the Scriptures, Volume 2, baafa 1026) No hewɔ lɛ, “jwɛŋmɔ lɛ mumɔ” lɛ ji hewalɛ ni kanyaa loo ekudɔɔ wɔjwɛŋmɔ, ni ji wɔ diɛŋtsɛ wɔ henumɔ kɛ kanyamɔ lɛ.
13. Mɛni hewɔ esa akɛ wɔjwɛŋmɔ kanyamɔ lɛ afee ehee lɛ?
13 Adebɔɔ naa henumɔ kɛ kanyamɔ ni jwɛŋmɔ ni yeee emuu lɛ naa lɛ kpalaŋɔ kɛyaa gbɔmɔtsoŋ, kɛ heloonaa nibii anamɔ he. (Jajelɔ 7:20; 1 Korintobii 2:14; Kolosebii 1:21; 2:18) Kɛji mɔ ko jie gbɔmɔ momo lɛ kɛ enifeemɔi fɔji lɛ eshɛ efɔ po, ni esha henumɔ ni enaa yɛ ejwɛŋmɔ mli lɛ tsakeee lɛ, no lɛ etsɛŋ ni no baanyɛ enɔ koni eku esɛɛ kɛya nɔ ni eŋmɛɛ he lɛ he ekoŋŋ. Akɛ nɔkwɛmɔ nɔ lɛ, ani jeee niiashikpamɔ ni mɛi ni kaa akɛ amɛaakpa tawa shɛremɔ, daatɔɔ, kɛ nifeemɔi fɔji krokomɛi lɛ ateŋ mɛi pii naa nɛ? Akɛni amɛbɔɔɔ mɔdɛŋ kwraa akɛ amɛaatsɔmɔ mɛi heei yɛ mumɔ ni kudɔɔ amɛjwɛŋmɔ lɛ naa hewɔ lɛ, amɛnyɛɛɛ amɛtsĩ amɛsɛɛkuu kɛ nakai jeŋba lɛ mliyaa ekoŋŋ lɛ naa. Esa akɛ tsakemɔ diɛŋtsɛ ni amɛaafee lɛ asa jwɛŋmɔ lɛ ehee-feemɔ ni mɔɔ shi hu he.—Romabii 12:2.
14. Mɛɛ gbɛ nɔ aaatsɔ aha mumɔ ni kudɔɔ jwɛŋmɔ lɛ afee ehee?
14 Belɛ, te mɔ ko aaafee tɛŋŋ eha nakai mumɔ lɛ atsɔ ehee koni ekudɔ ejwɛŋmɔ yɛ gbɛ ni ja nɔ hu? Feemɔ-wiemɔ ni ji ‘afee ehee’ ni yɔɔ Hela ŋmalɛ lɛ mli lɛ miitsɔɔ amrɔ be mli nifeemɔ, ni ji nifeemɔ ni yaa nɔ be fɛɛ be. No hewɔ lɛ ja wɔtsɔ Nyɔŋmɔ Wiemɔ ni ji anɔkwale lɛ kasemɔ kɛ nɔ ni etsɔɔ lɛ nɔjwɛŋmɔ nɔ dani mumɔ ni kudɔɔ wɔjwɛŋmɔ lɛ baanyɛ afee ehee. Jeŋ nilelɔi kɛɔ wɔ akɛ, yɛ wɔ aŋsɔ lɛ mli lɛ, saji ni atsake lɛ afee lɛ srawa loo tsofa hewalɛi bibii nyiɛɔ kɛjɛɔ aŋsɔ lɛ mli wala yibii ni atsɛɔ lɛ neuron lɛ ekome mli kɛyaa ekroko mli, ni etsɔmɔɔ tsamɔhei pii ni atsɛɔ lɛ synaps lɛ amli. Wolo ko ni atsɛɔ lɛ The Brain lɛ wie akɛ: “Atoɔ nikaimɔ he gbɛjianɔ ko yɛ kpaai ni henumɔi tsɔɔ mli lɛ atsamɔ hei lɛ beni saji ni atsɔ lɛ srawa hewalɛ lɛ tsɔɔ mli lɛ, ni eshĩɔ ekadimɔ nii titri ko yɛ sɛɛ.” Kɛji nakai srawa hewalɛ kome too lɛ nɔŋŋ miiho ekoŋŋ be kroko lɛ, kpaai lɛ amli wala yibii lɛ yooɔ ni amɛtsuɔ he nii oya nɔŋŋ. Yɛ be ko sɛɛ lɛ, enɛ bafeɔ niiahesusumɔ gbɛ hee ko yɛ mɔ lɛ mli. Beni wɔyaa nɔ daa wɔheɔ mumɔŋ saji kpakpai wɔwoɔ wɔmli lɛ, belɛ eetswa niiahesusumɔ gbɛ hee ko eema shi, ni mumɔ ni kudɔɔ wɔjwɛŋmɔ lɛ hu miitsɔ ehee.—Filipibii 4:8.
“Ni Nyɛwo Gbɔmɔ Hee [Lɛ]”
15. Gbɔmɔ hee lɛ ebatsɔ ehee yɛ mɛɛ shishinumɔ naa?
15 Yɛ naagbee lɛ, Paulo kɛɛ: “Ni nyɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.” (Efesobii 4:24) Hɛɛ, Kristofonyo lɛ woɔ gbɔmɔtso hee. ‘Ehee’ ni atsɔɔ yɛ biɛ lɛ kɔɔɔ be he, shi moŋ ekɔɔ hilɛ he. Ni tsɔɔ akɛ, ejeee ehee kɛ shishinumɔ akɛ no ji nakai nii lɛ mli ehee fe fɛɛ ni eba. Eji gbɔmɔtso hee kwraa, kaŋŋ, “ni abɔ yɛ Nyɔŋmɔ subaŋ nɔ.” Paulo kɛ wiemɔ ni tamɔ nakai nɔŋŋ tsu nii yɛ Kolosebii 3:10, ni ewie akɛ “[e]tsɔɔ ehee ekoŋŋ kɛyaa nilee mli yɛ Mɔ ni bɔ lɛ lɛ subaŋ lɛ naa.” Te feɔ tɛŋŋ ni nɛkɛ gbɔmɔtso hee nɛɛ baa hu?
16. Mɛni hewɔ abaanyɛ akɛɛ akɛ gbɔmɔ hee lɛ, “abɔ yɛ Nyɔŋmɔ subaŋ nɔ” lɛ?
16 Yehowa Nyɔŋmɔ bɔ klɛŋklɛŋ adesai enyɔ, Adam kɛ Hawa, yɛ E-subaŋ kɛ ehenɔ. Aha amɛ jeŋba kɛ mumɔŋ sui komɛi ni haa esoroɔ amɛ kwraa yɛ kooloi ni abɔ lɛ ahe, ni amɛnɔ kwɔ kwraa hu fe amɛ. (1 Mose 1: 26, 27 ) Eyɛ mli akɛ amɛ atuatsemɔ lɛ kɛ adesai fɛɛ yawo esha kɛ emuu ní wɔyeee mli moŋ, shi ákɛ Adam seshibii lɛ, wɔyɛ nyɛmɔ ni wɔkɛjieɔ jeŋba kɛ mumɔŋ sui komɛi akpo lolo. Nyɔŋmɔ suɔmɔnaa nii ji akɛ, esa akɛ mɛi ni naa kpɔmɔ afɔleshaa lɛ mli hemɔkɛyeli lɛ ashɛ gbɔmɔ momo lɛ amɛfɔ̃ kwraa, ni amɛna “Nyɔŋmɔ bii lɛ anunyam heyeli lɛ” mli ŋɔɔmɔ.—Romabii 6:6; 8:19-21; Galatabii 5: 1, 24.
17. Mɛni hewɔ jalɛ kɛ anɔkwayeli ji gbɔmɔ hee lɛ sui ni sa kadimɔ waa lɛ?
17 Anɔkwa jalɛ kɛ anɔkwayeli ji sui enyɔ komɛi ni Paulo je gbɛ etsi tã akɛ anaa faŋŋ yɛ gbɔmɔtso hee lɛ he. Enɛ maa nɔ mi lolo akɛ aafee gbɔmɔtso hee lɛ ehee yɛ Mɔ ni bɔ lɛ lɛ subaŋ lɛ naa. Lala 145:17 kɛɔ wɔ akɛ: “Yehowa ja yɛ egbɛi fiaa mli, ni durolɔ ji lɛ yɛ enitsumɔi fiaa mli.” Ni Kpojiemɔ 16:5 (NW) wieɔ Yehowa he akɛ: “Mɔ ni yɔɔ kɛ mɔ ni yɛ lɛ, Anɔkwafo lɛ, jalɔ ji lɛ.” Lɛlɛŋ, jalɛ kɛ anɔkwayeli ji sui komɛi ni he hiaa waa kɛji wɔɔhi shi yɛ bɔ ni abɔ wɔ yɛ Nyɔŋmɔ subaŋ nɔ lɛ naa, ni wɔya nɔ wɔjie enunyam lɛ kpo. Eba akɛ wɔɔtamɔ Zakaria, Yohane Baptisilɔ lɛ tsɛ, mɔ ni mumɔ krɔŋkrɔŋ lɛ tsirɛ lɛ ni ejie Nyɔŋmɔ yi akɛni eha E-webii lɛ hegbɛ “ni [amɛ]sɔmɔ lɛ ni gbeyei shemɔ ko bɛ mli yɛ [anɔkwayeli] kɛ jalɛ mli yɛ ehiɛ” lɛ.—Luka 1:74, 75.
“Nyɛnyiɛa Tamɔ La Bii”
18. Mɛɛ gbɛ nɔ Paulo yeɔ ebuaa wɔ yɛ, koni wɔna je lɛ gbɛi lɛ taakɛ amɛji lɛ jogbaŋŋ?
18 Amrɔ nɛɛ ni wɔsusu Paulo wiemɔi ni yɔɔ Efesobii 4:17-24 lɛ he jogbaŋŋ nɛɛ, wɔyɛ nibii pii ni sa akɛ wɔjwɛŋ he. Yɛ kukuji 17 kɛyashi 19 lɛ, Paulo yeɔ ebuaa wɔ ni wɔnaa je lɛ gbɛi lɛ taakɛ amɛji lɛ jogbaŋŋ. Akɛni amɛkpoo Nyɔŋmɔ nilee lɛ ni amɛkpiliŋ amɛtsuii yɛ egbɛfaŋ hewɔ lɛ, mɛi ni yɔɔ je lɛŋ lolo lɛ etsi amɛhe kwraa kɛjɛ wala anɔkwa jɛɛhe lɛ he. Akɛni amɛbɛ anɔkwa yiŋtoo loo gbɛtsɔɔmɔ hewɔ lɛ, nɔ ni jɛɔ mli baa ji akɛ, amɛmɔdɛŋbɔi lɛ feɔ kwashiaianii kɛ yaka deŋmegbomɔ. Amɛmiimii waa kɛmiiya jeŋba kɛ mumɔŋ shwɛmfeemɔ lɛ shishi tɔŋŋ lolo. Mɛɛ mɔbɔ shihilɛ po nɛ! Ni mɛɛ yiŋtoo ni mli wa po wɔyɔɔ nɛkɛ, akɛ wɔɔtswa wɔfai shi akɛ wɔɔya nɔ wɔnyiɛ akɛ la bii!
19. Mɛɛ naagbee hewalɛwoo wɔnaa kɛjɛɔ Paulo ŋɔɔ koni wɔya nɔ wɔnyiɛ akɛ la bii?
19 Kɛkɛ ni, yɛ kukuji 20 kɛ 21 lɛ, Paulo ma bɔ ni ehe hiaa ni wɔkase anɔkwale lɛ kɛ ekaa, bɔni afee ni wɔkatsɔmɔ mɛi ni kɛ amɛhe ebɔ anɔkwale lɛ he kɛkɛ, shi moŋ wɔhiɔ shi yɛ naa, taakɛ Yesu fee lɛ nɔ mi. Yɛ naagbee lɛ, ewoɔ wɔ ŋaa yɛ kukuji 22 kɛyashi 24 lɛ akɛ wɔjie gbɔmɔtso momo lɛ ni wɔwo ehee lɛ—kɛ shiŋŋfeemɔ, kɛ yiŋkpɛɛ ni mli wa. Yɛ nakai beaŋ nɔŋŋ lɛ, esa akɛ wɔya nɔ wɔkudɔ wɔjwɛŋmɔŋ kanyamɔi lɛ yɛ mumɔŋ gbɛtsɔɔmɔ kpakpa naa. Nɔ ni fe fɛɛ lɛ, esa akɛ wɔkɛ wɔhe afɔ Yehowa nɔ kɛha yelikɛbuamɔ beni wɔyaa nɔ wɔnyiɛɔ akɛ la bii lɛ. “Ejaakɛ Nyɔŋmɔ ni kɛɛ akɛ: ‘La ajɛ duŋ mli akpɛ’ lɛ, lɛ nɔŋŋ ekpɛ yɛ wɔtsuii amli hu, koni Nyɔŋmɔ anunyam he nilee lɛ akpɛ yɛ Yesu Kristo hiɛ.”—2 Korintobii 4:6.
Ani Okaiɔ?
◻ Mɛɛ gbɛ nɔ wɔɔtsɔ ‘wɔkase Kristo lɛ’ ŋmɛnɛ?
◻ Mɛni hewɔ esa akɛ wɔkɛ yiŋkpɛɛ ajie gbɔmɔ momo lɛ wɔshɛ wɔfɔ lɛ‘?
◻ Mɛni ji mumɔ ni kudɔɔ jwɛŋmɔ lɛ, ni mɛɛ gbɛ nɔ ahaa efeɔ ehee yɛ?
◻ Mɛɛ sui kadiɔ gbɔmɔ hee lɛ?
[Mfoniri ni yɔɔ baafa 15]
Yesu kɛɛ: “Mi nɔŋŋ ji gbɛ lɛ kɛ anɔkwale lɛ kɛ wala Iɛ”
[Mfoniri ni yɔɔ baafa 16]
“Nyɛjie[a] gbɔmɔ momo lɛ kɛ enitsumɔi lɛ nyɛshwie[a]—mlifu, mlila, nishaianii, musubɔɔ wiemɔ, hiɛgbeji awiemɔ, kɛ malemɔ.—Kolosebii 3:8, 9
[Mfoniri ni yɔɔ baafa 17]
“Nyɛwo[a] gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli Iɛ.”—Efesobii 4:24