‘Nyɛwoa Gbɔmɔ Hee Lɛ’
1 Kristofoi ahiɛ sɔɔ anɔkwale lɛ ní amɛle lɛ! Wɔkase bɔ ni esa akɛ wɔhi shi wɔha bɔni afee ni wɔkwa mɛi ni yɔɔ je lɛ mli lɛ agbɛ lɛ. Akɛni “amɛtsi amɛhe kɛjɛ Nyɔŋmɔ wala gbɛ lɛ nɔ” hewɔ lɛ, “amɛjwɛŋmɔ mli ewo duŋ.” (Efe. 4:18, NW) Átsɔɔ wɔ koni wɔtsake wɔjwɛŋmɔi kɛjɛ je lɛ susumɔ he kɛtsɔ gbɔmɔ momo lɛ ni wɔɔjie koni wɔwo ehee lɛ nɔ.—Efe. 4:22-24.
2 Gbɔmɔ momo lɛ kɛmɔ yaa jeŋba gbonyo mli daa, ni nɔ ni jɛɔ mli baa ji mɔhe mujiwoo kɛ gbele. No hewɔ lɛ, wɔkɛ hehiamɔ miibi mɛi ni baabo Maŋtsɛyeli shɛɛ sane lɛ toi lɛ koni amɛtsi amɛhe kɛjɛ mlifu, mlila, efɔŋfeemɔ, jɛmɔ wiemɔ, kɛ wiemɔ shara he. Esa akɛ mɛi ni miisumɔ ni amɛna Nyɔŋmɔ hiɛ duromɔ lɛ atswa amɛfai shi akɛ, amɛbaajie gbɔmɔ momo lɛ kwraa kɛmɔ shi taakɛ bɔ ni amɛbaajie atade ni ewo muji lɛ.—Kol. 3:8, 9.
3 Hewalɛ Hee ni Kanyaa Jwɛŋmɔ Lɛ: Nɔ ni fata gbɔmɔ hee lɛ ni wɔɔwo lɛ he ji hewalɛ ni kudɔɔ wɔjwɛŋmɔi ni wɔɔha etsɔ ehee lɛ. (Efe. 4:23) Mɛɛ gbɛ nɔ mɔ ko feɔ nakai mumɔ lɛ, loo jwɛŋmɔ lɛ ehee bɔni afee ni esumɔ ni enyiɛ jalɛ gbɛ nɔ lɛ? Afeɔ enɛ kɛtsɔ Nyɔŋmɔ Wiemɔ lɛ ni aaakase daa ni akɛ mɔdɛŋbɔɔ aaajwɛŋ nɔ ni etsɔɔ lɛ nɔ lɛ nɔ. Kɛkɛ lɛ, gbɛ hee ko ni atsɔɔ nɔ asusuɔ nii ahe eje shishi, ni mɔ lɛ naa nibii taakɛ Nyɔŋmɔ kɛ Kristo susuɔ nii ahe amɛhaa lɛ. Beni mɔ ko woɔ su ni tamɔ Kristo nɔ, ni nɔ ni fata he ji musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishiŋmɛɛ, kɛ suɔmɔ lɛ, mɔ lɛ shihilɛ tsakeɔ.—Kol. 3:10, 12-14.
4 Kɛtsɔ gbɔmɔ hee ni wɔwoɔ lɛ nɔ lɛ, wɔtsiɔ wɔhe kɛjɛɔ je lɛ he. Wɔshihilɛ gbɛ lɛ haa wɔfeɔ mɛi ni yɔɔ srɔto. Wɔwieɔ anɔkwale ni wɔkɛ wiemɔi kpakpai tswaa mɛi krokomɛi wɔmaa shi. Wɔyeɔ wɔ mlifu, mlijoomɔ, bolɔmɔ, musubɔɔ, kɛ efɔŋ fɛɛ efɔŋ nɔ, ni wɔkɛ jalɛnifeemɔ kɛ sui ni Nyɔŋmɔ gbeyeishemɔ yɔɔ mli yeɔ enɛɛmɛi anajiaŋ. Wɔyaa nɔ wɔtekeɔ nɔ ni ataoɔ yɛ wɔdɛŋ koni wɔkɛ sane ake lɛ nɔ. Afeɔ enɛɛmɛi fɛɛ kɛjɛɔ tsui ni efee klalo lɛ mli.—Efe. 4:25-32.
5 Kaajie gbɔmɔ hee lɛ oofɔ̃ shi kɔkɔɔkɔ. Kɛ efataaa he lɛ, wɔnyɛŋ wɔsɔmɔ Yehowa ni ekpɛlɛ wɔ nɔ. Ŋmɛɛ lɛ gbɛ koni egbala gbɔmɛi kɛba anɔkwale lɛ mli, ni oŋmɛ lɛ gbɛ koni ewo Yehowa, ni ji wɔ gbɔmɔ hee ni yɔɔ naakpɛɛ lɛ Bɔlɔ lɛ hiɛ nyam.—Efe. 4:24.