Sanebimɔi ni Jɛ Kanelɔi Adɛŋ

Yesu kɛɛ akɛ: “Mɛi ahe eshai ni nyɛaaŋɔfa amɛ lɛ, aŋɔfa amɛ; ni mɛi ahe eshai ni nyɛkɛaato lɛ, aŋɔto.” Ani wiemɔi nɛɛ tsɔɔ akɛ Kristofoi baanyɛ amɛkɛ eshai ake?

Ŋmalɛ naa nɔdaamɔ nɔ ko bɛ ni akɛaamu sane naa akɛ Kristofoi fɛɛ, loo onukpai po ni ahala amɛ yɛ asafoi lɛ amli lɛ yɛ hegbɛ ni jɛ ŋwɛi akɛ amɛkɛ eshai aaake. Ni kɛlɛ, nɔ ni Yesu kɛɛ ekaselɔi lɛ yɛ Yohane 20:23, ni atsi tã yɛ yiteŋgbɛ lɛ tsɔɔ akɛ Nyɔŋmɔ ha bɔfoi lɛ hewalɛi krɛdɛɛi komɛi yɛ enɛ gbɛfaŋ. Ni Yesu wiemɔ ni yɔɔ jɛmɛ lɛ baanyɛ akɔ nɔ ni ekɛɛ yɛ Mateo 18:18 ni kɔɔ ŋwɛi yiŋkpɛɛi ahe lɛ he.

Kristofoi baanyɛ amɛkɛ tɔmɔi komɛi ake, yɛ nɔ ni kɛ bɔfo Paulo ŋaawoo ni aŋma yɛ Efesobii 4:32 kpaa gbee lɛ naa, akɛ: “Nyɛmli ahia ahãa nyɛhe, nyɛmusuŋ atsɔa nyɛ yɛ nyɛhe, nyɛŋɔfafaa nyɛhe, taakɛ bɔ nɔŋŋ ni Nyɔŋmɔ ŋɔfa nyɛ yɛ Kristo mli lɛ.” Paulo miiwie mɔ kɛ mɔ teŋ naagbai ni aaakã Kristofoi ateŋ lɛ he yɛ biɛ, tamɔ wiemɔ ni asusuuu he nɛkɛ. Esa akɛ amɛbɔ mɔdɛŋ ni amɛsaa nɛkɛ saji nɛɛ, ni amɛkɛkekee amɛhe. Kaimɔ Yesu wiemɔi lɛ akɛ: “No hewɔ lɛ, kɛji okɛ onɔkeenɔ lɛ baaŋmɛ afɔleshaa latɛ lɛ nɔ, ni okai yɛ jɛi akɛ onyɛmi kɛo teŋ yɛ sane ko lɛ, shi onɔkeenɔ lɛ yɛ jɛi yɛ afɔleshaa latɛ lɛ hiɛ, ni oya okɛ onyɛmi lɛ ayakpata dã, koni oba ni okɛ onɔkeenɔ lɛ abaha.”—Mateo 5:23, 24; 1 Petro 4:8.

Shi kɛlɛ, Yohane 20:23 mli wiemɔi lɛ tsɔɔ akɛ Yesu miiwie eshai ni hiɛdɔɔ yɔɔ mli lɛ ahe, taakɛ nɔ kroko hu ni ekɛɛ toibolɔi krɛdɛɛ nɛɛ kɛfata he lɛ tsɔɔ lɛ. Ha wɔkwɛ nɔ hewɔ.

Yɛ gbi ni atee lɛ shi lɛ nɔ lɛ, Yesu jie ehe kpo etsɔɔ kaselɔi ni yɔɔ tsu ni aŋmɛ mli lɛ mli yɛ Yerusalem. Sane lɛ kɛɔ akɛ: “Agbɛnɛ Yesu saa kɛɛ amɛ ekoŋŋ akɛ: ‘Hejɔlɛ aha nyɛ! Bɔ ni tsɛ lɛ tsu mi lɛ, nakai mi hu mitsuɔ nyɛ nɛɛ.’ Ni beni ekɛɛ nakai lɛ, emu eshwie amɛnɔ, ni ekɛɛ amɛ akɛ: ‘Nyɛhea [mumɔ krɔŋkrɔŋ, NW] lɛ! Mɛi ahe eshai ni nyɛaaŋɔfa amɛ lɛ, aŋɔfaa amɛ; ni mɛi ahe eshai ni nyɛkɛaato lɛ, aŋɔto.’ ”—Yohane 20:21-23.

Ekolɛ, kaselɔi ni atsi amɛ tã lɛ ji bɔfoi anɔkwafoi lɛ titri. (Okɛto kuku 24 he.) Mu ni emu shwie amɛnɔ ni ekɛɛ akɛ ‘Nyɛhea mumɔ krɔŋkrɔŋ lɛ,’ tsɔɔ akɛ, Yesu tswa amɛ adafi yɛ mfoniri-feemɔ mli akɛ etsɛŋ ni abaafɔse mumɔ krɔŋkrɔŋ lɛ ashwie amɛnɔ. Yesu tee nɔ ekɛɛ akɛ amɛbaana hegbɛ yɛ eshai ni akɛaake lɛ mli. Shishinumɔ yɛ mli akɛ tsakpaa aaahi ewiemɔi enyɔ lɛ mli, ekome tsaa nɔ kɛyaa ekroko lɛ nɔ.

Eshitee lɛ sɛɛ gbii nyɔŋmai enumɔ, yɛ Pentekoste gbi lɛ nɔ lɛ, Yesu fɔse mumɔ krɔŋkrɔŋ eshwie shi. Mɛni no tsu? Nɔ kome ji akɛ, afɔ mɛi ni nine shɛ mumɔ lɛ nɔ lɛ ehee akɛ Nyɔŋmɔ mumɔŋ bii kɛ hiɛnɔkamɔ akɛ amɛkɛ Kristo baaye maŋtsɛ yɛ ŋwɛi. (Yohane 3:3-5; Romabii 8:15-17; 2 Korintobii 1:22) Shi nakai mumɔ ni afɔse ashwie shi lɛ tsu nii babaoo. Mɛi ni nine shɛ nɔ lɛ ateŋ mɛi komɛi na hewalɛi kɛha naakpɛɛ nifeemɔ. Kɛtsɔ no nɔ lɛ, mɛi komɛi nyɛ amɛwie maŋsɛɛ wiemɔi ni amɛleee momo sa. Mɛi komɛi nyɛ amɛgba. Ni mɛi krokomɛi hu nyɛ amɛtsa helatsɛmɛi loo amɛtee gbohii ashi kɛba wala mli.—1 Korintobii 12:4-11.

Akɛni Yesu wiemɔi ni yɔɔ Yohane 20:22 lɛ tsɔɔ mumɔ krɔŋkrɔŋ nɛɛ ni afɔse ashwie kaselɔi lɛ anɔ hewɔ lɛ, etamɔ nɔ ni ewiemɔi ni ekɛtsa nɔ ni kɔɔ eshai ni aaaŋɔ ake lɛ he lɛ tsɔɔ akɛ, atsɔ ŋwɛi gbɛtsɔɔmɔ nɔ akɛ hegbɛ sɔrɔto ko ni amɛaatsɔ nɔ amɛkɛ eshai ake loo ni akɛkake ha bɔfoi lɛ kɛtsɔ mumɔ lɛ nitsumɔ nɔ.—Kwɛmɔ March 1, 1949 Blɔfo Buu-Mɔɔ lɛ baafa 78.

Biblia lɛ egbaaa wɔ be fɛɛ be ni bɔfoi lɛ kɛ hegbɛ ni tamɔ nɛkɛ tsu nii lɛ he sane fitsofitso, ni asaŋ eŋmaaa sane fɛɛ sane ni kɔɔ be fɛɛ be ni bɔfoi lɛ kɛ naakpɛɛ nikeenii ko aaatsu nii ni amɛkɛwie lilɛii sɔrɔtoi, ni amɛkɛgba, loo amɛkɛtsa hela lɛ ahe.—2 Korintobii 12:12; Galatabii 3:5; Hebribii 2:4.

Sane kome ni kɔɔ hegbɛ ni bɔfoi lɛ yɔɔ ni amɛkɛ eshai aaake loo amɛtsi naa lɛ kɔɔ Anania kɛ Safira, ni male tsɔɔ mumɔ lɛ he. Petro, ni nu nɔ ni Yesu wie ni wɔkane yɛ Yohane 20:22, 23 lɛ, kpa Anania kɛ Safira he mama. Petro wie etsɔɔ Anania kɛtsɔ hiɛ, ni egbo amrɔ nɔŋŋ. Beni Safira ba sɛɛ mli ni ehiɛ amale lɛ mli lolo lɛ, Petro jaje ekojomɔ lɛ. Petro kɛ ehe esha lɛ ekeee lɛ shi ekɛɛ: “Naa, mɛi ni tee yafu owu lɛ anaji yɔɔ shinaa lɛ naa lɛ, ni amɛaawo bo hu kɛaatee.” Lɛ hu egbo amrɔ nɔŋŋ.—Bɔfoi lɛ Asaji 5:1-11.

Yɛ enɛ mli lɛ, bɔfo Petro kɛ hegbɛ krɛdɛɛ ko tsu nii ni ekɛtsɔɔ faŋŋ akɛ atsi esha naa, naakpɛɛ nilee ko ni tsɔɔ akɛ Nyɔŋmɔ kɛ Anania kɛ Safira ahe esha lɛ ekeŋ amɛ. Etamɔ nɔ ni bɔfoi lɛ hu yɛ nilee ni fe adesai anɔ̃ ni amɛkɛleɔ saji ni amɛyɔɔ nɔmimaa yɛ he akɛ akɛ eshai eke yɛ Kristo afɔleshaa lɛ hewɔ lɛ. No hewɔ lɛ nakai bɔfoi ni akɛ mumɔ kanyaa amɛ lɛ nyɛɔ amɛkɛ eshai faa loo amɛkɛfaaa.a

Enɛ etsɔɔɔ akɛ onukpai fɛɛ ni akɛ mumɔ efɔ amɛ mu yɛ nakai beaŋ lɛ yɛ naakpɛɛ hegbɛ ni tamɔ nɛkɛ. Wɔbaanyɛ wɔna enɛ yɛ nɔ ni bɔfo Paulo kɛɛ yɛ nuu ni ashwie lɛ kɛjɛ Korinto asafo lɛ mli lɛ he lɛ gbɛfaŋ. Paulo ekɛɛɛ akɛ ‘mikɛ nakai nuu lɛ he eshai eke lɛ’ aloo po akɛ ‘mile akɛ akɛ nuu lɛ he eshai eke lɛ yɛ ŋwɛi, no hewɔ lɛ nyɛŋɔa lɛ ekoŋŋ.’ Shi moŋ, Paulo wo asafo muu lɛ fɛɛ hewalɛ ni amɛkɛ Kristofonyo ni ahe lɛ ekoŋŋ lɛ he esha ake lɛ, ni amɛjie suɔmɔ kpo amɛtsɔɔ lɛ. Paulo kɛfata he akɛ: “Shi mɔ ni nyɛŋɔɔ nɔ ko nyɛfaa lɛ lɛ, mi hu miŋɔfaa lɛ.”—2 Korintobii 2:5-11.

Shii abɔ ni ahe nuu lɛ kɛba asafo lɛ mli ekoŋŋ nɛɛ, nyɛmimɛi Kristofoi hii kɛ yei lɛ fɛɛ baanyɛ aŋɔke lɛ kɛ jwɛŋmɔ lɛ akɛ amɛbɛŋ lɛ amɛwoŋ amɛmli yɛ nɔ ni efee lɛ hewɔ. Shi, klɛŋklɛŋ lɛ, esa akɛ eshwa ehe ni ahe lɛ ekoŋŋ. Te aaafee tɛŋŋ ni eeeba lɛ nakai?

Eshai ni hiɛdɔɔ yɔɔ mli ni esa akɛ asafoŋ onukpai atsu he nii lɛ yɛ, tamɔ juu, amale, loo jeŋba shara ni mli wa nɛkɛ. Amɛbɔɔ mɔdɛŋ ni amɛjaje efɔŋ feelɔi ni tamɔ nakai ni amɛkã amɛhiɛ, koni no aha amɛshwa amɛhe. Shi kɛ mɔ ko kɛ ehe woɔ esha ni mli wa mli ni etsakeee etsui lɛ, onukpai nɛɛ kɛ ŋwɛi gbɛtsɔɔmɔ akɛ ashwie efɔŋ feelɔ lɛ kɛjɛ asafo lɛ mli lɛ tsuɔ nii. (1 Korintobii 5:1-5, 11-13) Nɔ ni Yesu wie yɛ Yohane 20:23 lɛ kɔɔɔ saji ni tamɔ enɛɛmɛi ahe. Nɛkɛ onukpai nɛɛ bɛ mumɔŋ nikeenii kɛha naakpɛɛ nifeemɔ, tamɔ nyɛmɔ ni akɛaatsa mɛi ni bɛ gbɔmɔtsoŋ hewalɛ loo atee gbohii ashi nɛkɛ; nikeenii ni tamɔ nɛkɛ lɛ tsu amɛ yiŋtoo he nii yɛ klɛŋklɛŋ afii oha lɛ mli ni amɛba naagbee. (1 Korintobii 13:8-10) Kɛfata he lɛ, onukpai ni yɔɔ ŋmɛnɛ lɛ bɛ ŋwɛi hegbɛ ni amɛkɛ eshai ni hiɛdɔɔ yɔɔ mli aaake, kɛ jwɛŋmɔ lɛ akɛ amɛaajaje yɛ mɔ ko ni feɔ esha ni hiɛdɔɔ yɔɔ mli lɛ he akɛ ehe tse yɛ Yehowa hiɛ. Esa akɛ eshaifaa ni tamɔ nɛkɛ adamɔ kpɔmɔ afɔleshaa lɛ nɔ, ni Yehowa pɛ baanyɛ ekɛke yɛ no gbɛfaŋ.—Lala 32:5; Mateo 6:9, 12; 1 Yohane 1:9.

Taakɛ eji yɛ nuu ni yɔɔ blema Korinto lɛ he lɛ, kɛ mɔ ni feɔ esha ni hiɛdɔɔ yɔɔ mli lɛ kpoo akɛ eeetsake etsui lɛ, esa akɛ ashwie lɛ kɛjɛ asafo lɛ mli. Kɛ sɛɛ mli lɛ etsake etsui ni etsu nitsumɔi ni sa tsuitsakemɔ lɛ, esha ni ajɛɔ ŋwɛi akɛkeɔ lɛ baanyɛ aba kɛ̃. (Bɔfoi lɛ Asaji 26:20) Yɛ shihilɛ ni tamɔ nɛkɛ mli lɛ, Ŋmalɛi lɛ haa onukpai lɛ nɔ ni amɛaadamɔ nɔ amɛhe amɛye akɛ Yehowa kɛ efɔŋ feelɔ lɛ he esha eke lɛ lɛlɛŋ. Kɛkɛ lɛ, akɛni ahe mɔ lɛ kɛba ekoŋŋ hewɔ lɛ, onukpai lɛ baanyɛ aye abua lɛ yɛ mumɔŋ ni efi shi shiŋŋ yɛ hemɔkɛyeli lɛ mli. Mɛi krokomɛi ni yɔɔ asafo lɛ mli lɛ baanyɛ amɛkɛke lɛ tamɔ bɔ ni Korinto Kristofoi lɛ kɛke nuu ni ashwie lɛ kɛjɛ asafo lɛ mli lɛ ni ahe lɛ kɛba ekoŋŋ yɛ nakai be lɛ mli lɛ.

Yɛ be mli ni atsuɔ saji ahe nii nɛkɛ lɛ, onukpai lɛ folɔɔɔ amɛ diɛŋtsɛ amɛ kojomɔ he tɛi amɛshwieee shi. Amɛkɛ Biblia mli shishitoo mlai tsuɔ nii, ni amɛnyiɛɔ Ŋmalɛ mli gbɛtsɔɔmɔi ni Yehowa eto eshwie shi lɛ sɛɛ pɛpɛɛpɛ. No hewɔ lɛ, esha fɛɛ esha ni onukpai lɛ kɛaake loo amɛkɛkeŋ lɛ baaba yɛ shishinumɔ ni yɔɔ Yesu wiemɔ ni yɔɔ Mateo 18:18 lɛ mli lɛ naa, akɛ: “Lɛlɛŋ, miikɛɛ nyɛ akɛ: Nɔ fɛɛ nɔ ni nyɛaafi yɛ shikpɔŋ lɛ nɔ lɛ, aaafi yɛ ŋwɛi; ni nɔ fɛɛ nɔ ni nyɛaafɛne yɛ shikpɔŋ lɛ nɔ lɛ, aaafɛne yɛ ŋwɛi.” Amɛ nifeemɔi lɛ baatamɔ bɔ ni Yehowa susuɔ saji ahe ehaa ni atsɔɔ yɛ Biblia lɛ mli lɛ nɔŋŋ.

Yɛ enɛ hewɔ lɛ, nɔ ni Yesu wie ni aŋma yɛ Yohane 20:23 lɛ eteee shi ewooo Ŋmalɛi lɛ fãi krokomɛi lɛ, shi etsɔɔ akɛ bɔfoi lɛ ná hegbɛ krɛdɛɛ ko yɛ eshai ni akɛaake he, ni ekɛ gbɛfaŋnɔ krɛdɛɛ ni amɛtsu he nii yɛ Kristofoi asafo lɛ shishijee mli lɛ kpaa gbee.

[Shishigbɛ niŋmaa]