Fɔlɔi kɛ Bii: Nyɛhaa Nyɔŋmɔ Abaa Klɛŋklɛŋ!
“She Nyɔŋmɔ gbeyei ni oye ekitia lɛ anɔ.”—JAJELƆ 12:13.
1. Mɛɛ gbeyeishemɔ ehe hiaa ni fɔlɔi kɛ bii fɛɛ ana, ni mɛni ebaaha amɛna?
GBALƐ ko ni kɔɔ Yesu Kristo he wie akɛ “eeena Yehowa gbeyeishemɔ lɛ he miishɛɛ.” (Yesaia 11:3) Egbeyeishemɔ lɛ ji bulɛ kɛ woo titri ni mli kwɔ kɛha Nyɔŋmɔ, gbeyeishemɔ akɛ efeŋ nɔ ko ni esaaa Nyɔŋmɔ hiɛ ejaakɛ esumɔɔ lɛ. Esa akɛ fɔlɔi kɛ bii fɛɛ ana Kristo gbeyeishemɔ kɛha Nyɔŋmɔ, ni baaha amɛna miishɛɛ taakɛ eha Yesu na miishɛɛ lɛ eko. Ehe miihia ni amɛha Nyɔŋmɔ aba klɛŋklɛŋ yɛ amɛshihilɛ mli kɛtsɔ ekitai atoiboo nɔ. Taakɛ Biblia ŋmalɔ ko wie lɛ, “enɛ ji gbɔmɛi fɛɛ agbɛnaa.”—Jajelɔ 12:13.
2. Mɛni ji Mla lɛ mli kita ni he hiaa fe fɛɛ, ni namɛi titri akɛha?
2 Akɛ Mla lɛ mli kita ni he hiaa fe fɛɛ, ni ji akɛ, esa akɛ ‘wɔsumɔ Yehowa kɛ wɔtsui, wɔsusuma, kɛ wɔnyɛmɔ fɛɛ’ lɛ ha fɔlɔi titri. Nɔ ni tsɔɔ enɛ ji wiemɔi krokomɛi ni fata he yɛ Mla lɛ mli lɛ, akɛ: “Ni ojwɛŋ [wiemɔi ni ji suɔmɔ ni aaana aha Yehowa nɛɛ] nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni okã shi kɛ beni ote shi.” (5 Mose 6:4-7; Marko 12:28-30) Enɛ hewɔ lɛ akɛ famɔ ha fɔlɔi ni amɛkɛ Nyɔŋmɔ aye klɛŋklɛŋ gbɛhe kɛtsɔ suɔmɔ ni amɛ diɛŋtsɛ amɛaasumɔ lɛ lɛ nɔ, ni amɛtsɔɔ amɛbii lɛ hu ni amɛfee nakai.
Kristofoi Agbɛnaa Nii
3. Te Yesu fee bɔ ni ehe hiaa ni ana be aha gbekɛbii lɛ he nɔkwɛmɔ nɔ eha tɛŋŋ?
3 Yesu fee bɔ ni ehe hiaa ni ana be aha gbekɛbii bibii po lɛ he nɔkwɛmɔ nɔ. Yɛ be ko mli, kɛmiibɛŋkɛ Yesu shikpɔŋ nɔ sɔɔmɔ lɛ naagbee gbɛ lɛ, gbɔmɛi kɛ amɛbii abifabii bɔi eŋɔɔ baa. Akɛni eka shi faŋŋ akɛ amɛsusu akɛ Yesu bɛ deka kwraa bɔ ni akɛaagba enaa hewɔ lɛ, kaselɔi lɛ ka gbɔmɛi lɛ anaatsii. Shi Yesu kã ekaselɔi lɛ ahiɛ akɛ: “Nyɛhaa gbekɛbii lɛ abaa miŋɔɔ, ni nyɛkatsiã amɛ gbɛ.” Yesu “loo amɛ atuu” po, ni ekɛ nakai feemɔ tsɔɔ bɔ ni ehe hiaa ni ana be aha gbekɛbii lɛ, yɛ gbɛ ni henumɔ yɔɔ mli nɔ.—Luka 18:15-17; Marko 10:13-16.
4. Namɛi akɛ famɔ ha akɛ “nyɛyafea jeŋmaji fɛɛ mikaselɔi” lɛ, ni mɛni enɛ baabi ni amɛfee?
4 Yesu fee lɛ faŋŋ hu akɛ, yɛ amɛ diɛŋtsɛ amɛbii lɛ sɛɛ lɛ, gbɛnaa nii kã esɛɛnyiɛlɔi anɔ akɛ amɛtsɔɔ mɛi krokomɛi anii. Yɛ egbele kɛ eshitee lɛ sɛɛ lɛ, Yesu “jie ehe kpo etsɔɔ aaafee nyɛmimɛi ohai enumɔ loo nɔ shikome”—ni fɔlɔi komɛi fata he. (1 Korintobii 15:6) Eka shi faŋŋ akɛ enɛ ba yɛ gɔŋ ko nɔ yɛ Galilea he ni ebɔfoi 11 lɛ hu ebua amɛhe naa yɛ lɛ. Yesu wo amɛ fɛɛ hewalɛ yɛ jɛmɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, . . . ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:16-20) Kristofonyo ko nyɛŋ aku ehiɛ efɔ̃ famɔ nɛɛ nɔ yɛ gbɛ ni ja nɔ! Kɛ tsɛmɛi kɛ nyɛmɛi baatsu he nii lɛ, no lɛ ebiɔ ni amɛkwɛ amɛbii anɔ jogbaŋŋ, ni amɛkɛ amɛhe awo maŋ shiɛmɔ kɛ nitsɔɔmɔ nitsumɔ lɛ hu mli.
5. (a) Mɛni tsɔɔ akɛ kɛ jeee amɛ fɛɛ lɛ, bɔfoi lɛ ateŋ mɛi babaoo ebote gbalashihilɛ mli, no hewɔ lɛ eeenyɛ efee akɛ amɛyɛ bii? (b) Mɛɛ ŋaawoo ehe hiaa ni wekuyitsei kɛ hiɛdɔɔ asusu he?
5 Esa kadimɔ jogbaŋŋ akɛ, ehe bahia ni bɔfoi lɛ aha amɛ weku mli gbɛnaa nii kɛ sɔ̃ ni kã amɛnɔ akɛ amɛshiɛ ni amɛkwɛ Nyɔŋmɔ asafoku lɛ nɔ hu lɛ fɛɛ aŋmɛ pɛpɛɛpɛ. (Yohane 21:1-3, 15-17; Bɔfoi lɛ Asaji 1:8) Nɔ hewɔ ji akɛ, kɛ jeee amɛ fɛɛ po lɛ, amɛteŋ mɛi babaoo ji mɛi ni ebote gbalashihilɛ mli. Enɛ hewɔ lɛ bɔfo Paulo tsɔɔ mli akɛ: “Ani wɔbɛ hegbɛ akɛ wɔhiɛɔ nyɛmi yoo ni ji wɔŋa kɛnyiɛɔ, tamɔ bɔfoi krokomɛi lɛ hu kɛ Nuntsɔ lɛ nyɛmimɛi lɛ kɛ Kefa?” (1 Korintobii 9:5; Mateo 8:14) Ekolɛ bɔfoi lɛ ateŋ mɛi komɛi hu yɛ bii. Mra be mli yinɔsane ŋmalɔi, tamɔ Eusebius, kɛɔ akɛ Petro yɛ bii. Ehe bahia ni mra be mli Kristofoi ni ji fɔlɔi lɛ fɛɛ abo Ŋmalɛ mli ŋaawoo nɛɛ toi, akɛ: “Kɛ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.”—1 Timoteo 5:8.
Klɛŋklɛŋ Gbɛnaa Nii
6. (a) Mɛɛ kaa onukpai ni yɔɔ wekui lɛ kɛkpeɔ? (b) Mɛni ji onukpa lɛ klɛŋklɛŋ gbɛnaa nii?
6 Kristofoi onukpai ni yɔɔ wekui ŋmɛnɛ lɛ yɛ shihilɛ ni tamɔ bɔfoi lɛ anɔ lɛ pɛpɛɛpɛ mli. Esa akɛ amɛha amɛgbɛnaa nii ni ji akɛ amɛtsu amɛwekui lɛ amumɔŋ kɛ heloonaa hiamɔ nii ahe nii lɛ kɛ sɔ̃ ni kã amɛnɔ akɛ amɛshiɛ yɛ maŋ ni amɛkwɛ Nyɔŋmɔ asafoku lɛ nɔ hu lɛ aŋmɛ pɛpɛɛpɛ. Mɛɛ nitsumɔ esa akɛ amɛha eba klɛŋklɛŋ? Blɔfo Buu-Mɔɔ ni je kpo yɛ March 15, 1964 lɛ wie akɛ: “[Tsɛ lɛ] klɛŋklɛŋ sɔ̃ ni kã enɔ ji eweku lɛ, ni yɛ anɔkwale mli lɛ, enyɛŋ esɔmɔ yɛ gbɛ ni ja nɔ kɛji etsuuu sɔ̃ nɛɛ he nii.”
7. Mɛɛ gbɛ nɔ tsɛmɛi Kristofoi haa Nyɔŋmɔ baa klɛŋklɛŋ yɛ?
7 No hewɔ lɛ esa akɛ tsɛmɛi aha Nyɔŋmɔ aye klɛŋklɛŋ gbɛhe kɛtsɔ famɔ ni akɛha amɛ akɛ ‘amɛlɛ amɛbii lɛ yɛ Yehowa tsɔsemɔ kɛ ŋaawoo mli’ lɛ toiboo nɔ. (Efesobii 6:4) Anyɛŋ akpale nakai gbɛnaa nii lɛ aha mɔ kroko, eyɛ mli akɛ ekolɛ tsɛ lɛ yɛ nitsumɔ akɛ ekwɛɔ nitsumɔi anɔ yɛ Kristofoi asafo lɛ mli. Te tsɛmɛi ni tamɔ nɛkɛ aaafee tɛŋŋ amɛtsu amɛgbɛnaa nii ahe nii—ni amɛha amɛweku lɛ mli bii amɛ heloonaa, kɛ mumɔŋ, kɛ henumɔŋ hiamɔ nii—ni yɛ nakai beaŋ nɔŋŋ lɛ, amɛkwɛ asafo lɛ hu nɔ ni amɛkɛ hiɛnyiɛmɔ aha?
Sɛɛfimɔ ni He Hiaa Kɛhamɔ
8. Te onukpa ŋa aaafee tɛŋŋ afĩ esɛɛ?
8 Eyɛ faŋŋ akɛ, sɛɛfimɔ he baaba sɛɛnamɔ kɛha onukpai ni yɔɔ weku mli gbɛnaa nii lɛ waa. Buu-Mɔɔ ni wɔtsɛ yisɛɛ yɛ yiteŋgbɛ lɛ wie akɛ ŋa Kristofonyo baanyɛ afi ewu sɛɛ jogbaŋŋ. Ewie akɛ: “Ebaanyɛ eha efee mlɛo bɔ ni eeenyɛ kɛha nuu lɛ akɛ eeesaa ehe yɛ enitsumɔi sɔrɔtoi ni eyɔɔ lɛ amli, ni eye ebua hu ni akɛbaa be kpakpa yi kɛha nuu lɛ kɛ lɛ diɛŋtsɛ hu, kɛtsɔ gbɛjianɔ kpakpa ni eeeto yɛ shia, ni efee niyenii klalo yɛ be naa, ni efee klalo hu akɛ amɛaashi shia kɛha asafoŋ kpee yɛ be ni sa mli lɛ nɔ. . . . Ŋa Kristofonyo baanyɛ afee babaoo ni ekɛtsɔse gbekɛbii lɛ yɛ gbɛ ni esa akɛ amɛkɔ lɛ mli, yɛ ewu gbɛtsɔɔmɔ shishi, koni gbekɛbii lɛ asa Yehowa hiɛ.” (Abɛi 22:6) Hɛɛ, abɔ ŋa lɛ koni ebafee ‘yelikɛbualɔ,’ ni nilee yɛ mli akɛ ewu aaakpɛlɛ eyelikɛbuamɔ nɔ. (1 Mose 2:18) Yoo lɛ sɛɛfimɔ baanyɛ aye abua nuu lɛ koni enyɛ etsu gbɛnaa nii ni jwere enɔ yɛ eweku lɛ kɛ asafo lɛ gbɛfaŋ lɛ fɛɛ he nii jogbaŋŋ kɛmɔ shi.
9. Namɛi awo amɛ hewalɛ yɛ Tesalonika asafo lɛ mli akɛ amɛye amɛbua asafo lɛ mli bii krokomɛi lɛ?
9 Shi kɛlɛ, jeee Kristofoi onukpai aŋamɛi pɛ ji mɛi ni baanyɛ ana nitsumɔ ni akɛfiɔ nɔkwɛlɔ lɛ sɛɛ, koni enyɛ ‘elɛ Nyɔŋmɔ asafoku lɛ’ ni enyɛ ekwɛ lɛ diɛŋtsɛ eshia mli bii hu lɛ mli gbɛfaŋnɔ. (1 Petro 5:2) Namɛi hu baanyɛ afee nakai? Bɔfo Paulo wo nyɛmimɛi ni hi Tesalonika lɛ hewalɛ ni amɛna bulɛ amɛha mɛi ni ‘yeɔ amɛnɔ onukpai lɛ.’ Ni kɛlɛ, beni eyaa nɔ ekɛ nyɛmimɛi nɛɛ nɔŋŋ wieɔ—titri lɛ mɛi ni sɔmɔɔɔ akɛ onukpai lɛ—Paulo ŋma akɛ: “Shi wɔmiikpa nyɛ fai, anyɛmimɛi, nyɛwiea nyɛtsɔɔa mɛi ni bɛ gbɛjianɔ lɛ, nyɛshɛjea mɛi ni tsui fãa lɛ amii, nyɛherea mɛi ni feɔ gbedee lɛ, nyɛtoa nyɛtsui shi nyɛhaa mɛi fɛɛ.”—1 Tesalonikabii 5:12-14.
10. Mɛɛ hewalɛ kpakpa nyɛmimɛi fɛɛ ayelikɛbuamɔ ni jɛɔ suɔmɔ mli lɛ naa yɛ asafo lɛ nɔ?
10 Kwɛ bɔ ni ehi jogbaŋŋ kɛji nyɛmimɛi ni yɔɔ asafo mli lɛ ná suɔmɔ ni tsirɛɔ amɛ ni haa amɛshɛjeɔ mɛi ni ehao lɛ amii, ni amɛhereɔ mɛi ni egbede lɛ, ni amɛwoɔ mɛi ni bɛ gbɛjianɔtoo lɛ aŋaa, ni amɛtoɔ amɛtsui amɛhaa mɛi fɛɛ hu! Nyɛmimɛi ni yɔɔ Tesalonika, ni etsɛko tsɔ ni amɛkpɛlɛ Biblia mli anɔkwale lɛ nɔ, yɛ amanehulu kpele ni amɛkɛkpe lɛ fɛɛ sɛɛ lɛ, kɛ ŋaawoo ni Paulo kɛha amɛ akɛ amɛfee enɛ lɛ tsu nii. (Bɔfoi lɛ Asaji 17:1-9; 1 Tesalonikabii 1:6; 2:14; 5:11) Susumɔ hewalɛ fɛfɛo ni amɛ ekomefeemɔ ni jɛ suɔmɔ mli nɛɛ ná yɛ asafo muu lɛ fɛɛ hewalɛwoo kɛ ekomefeemɔ mli lɛ he okwɛ! Nakai hu kɛ́ nyɛmimɛi shɛje amɛhe mii, ni amɛye amɛbua amɛhe, ni amɛwowoo amɛhe ŋaa lɛ, ehaa onukpai lɛ, ni bei pii lɛ amɛyɔɔ amɛwekui ni amɛbaakwɛ amɛ lɛ, agbɛnaa nii ni ji nyɛmimɛi lɛ akwɛmɔ feɔ mlɛo.
11. (a) Mɛni hewɔ ni nilee yɔɔ mli akɛ aaamu sane naa akɛ yei fata wiemɔ “nyɛmimɛi” ni akɛtsu nii lɛ he lɛ? (b) Mɛɛ yelikɛbuamɔ Kristofonyo yoo ni eda lɛ baanyɛ ekɛha obalayoo ko ŋmɛnɛ?
11 Ani yei fata “nyɛmimɛi” ni bɔfo Paulo kɛ amɛ wie lɛ ahe? Hɛɛ, amɛfata he, ejaakɛ yei babaoo hu batsɔmɔ heyelilɔi. (Bɔfoi lɛ Asaji 17:1, 4; 1 Petro 2:17; 5:9) Mɛɛ yelikɛbuamɔ nɛkɛ yei nɛɛ baanyɛ amɛkɛha? Ojogbaŋŋ, ayɛ obalayei yɛ asafo lɛ mli ni amɛna naagba yɛ amɛ ‘bɔlɛnamɔ henumɔi’ anɔyeli mli, aloo amɛbatsɔmɔ ‘susumai ni ehao.’ (1 Timoteo 5:11-13) Yei komɛi yɛ naagbai ni tamɔ nakai ŋmɛnɛ. Ekolɛ nɔ ni he hiaa amɛ fe fɛɛ ji mɔ ko ni baabo amɛ toi aloo mɔ ko ni baanu he aha amɛ. Bei pii lɛ, Kristofonyo yoo ni eda yɛ mumɔŋ ji mɔ ni sa fe fɛɛ ni ebaanyɛ ekɛ yelikɛbuamɔ ni tamɔ nɛkɛ aha. Akɛ nɔkwɛmɔ nɔ lɛ, ebaanyɛ ekɛ Kristofonyo yoo kroko agba eteemɔŋ naagbai ahe sane, bɔ ni Kristofonyo nuu nyɛŋ atsu he nii jogbaŋŋ yɛ gbɛ ni sa nɔ. Beni emaa sɛɛnamɔ ni yɔɔ nakai yelikɛbuamɔ lɛ kɛhamɔ mli lɛ nɔ mi lɛ, Paulo ŋma akɛ: “Yeimeji hu nakai nɔŋŋ, . . . amɛfee mɛi ni tsɔɔ nii kpakpa; koni amɛtsɔɔ obalayei lɛ ni amɛsumɔ amɛwumɛi, amɛsumɔ amɛbii, amɛhiɛ akã shi, amɛhe atse, amɛbaa amɛwe yi jogbaŋŋ, amɛmli ahi, amɛba amɛhe shi amɛha amɛwumɛi, koni akawie Nyɔŋmɔ wiemɔ lɛ he musubɔɔ wiemɔ.”—Tito 2:3-5.
12. Namɔ gbɛtsɔɔmɔ ehe hiaa waa ni mɛi fɛɛ ni yɔɔ asafo lɛ mli lɛ anyiɛ sɛɛ?
12 Kwɛ jɔɔmɔ ni nyɛmimɛi yei ni baa amɛhe shi lɛ ji yɛ asafo lɛ mli kɛji amɛkɛ ekomefeemɔ fĩ amɛwumɛi kɛ onukpai lɛ hu asɛɛ! (1 Timoteo 2:11, 12; Hebribii 13:17) Onukpai ni yɔɔ weku mli gbɛnaa nii lɛ titri naa he sɛɛ waa kɛji mɛi fɛɛ fee ekome kɛye amɛbua amɛhe yɛ suɔmɔ mumɔ mli, ni mɛi fɛɛ baa amɛhe shi amɛhaa tookwɛlɔi ni ahala amɛ lɛ agbɛtsɔɔmɔ lɛ.—1 Petro 5:1, 2.
Fɔlɔi, Mɛni Nyɛkɛyeɔ Klɛŋklɛŋ Gbɛhe?
13. Mɛɛ gbɛ nɔ tsɛmɛi pii haa amɛwekui anine nyɛɔ shi yɛ?
13 Afii komɛi ni eho nɛ lɛ, mɛi ahiɛtserɛjielɔ ko ni ale lɛ waa lɛ wie akɛ: “Minaa akɛ hii ni eye omanye lɛ kɛ hii ohai abɔ tsuɔ amɛnitsumɔi lɛ ahe nii; amɛle bɔ ni amɛfeɔ amɛtsuɔ shihilɛ fɛɛ shihilɛ he nii amɛhaa, kɛ bɔ ni atsɔseɔ nitsulɔi ni ahaa amɛ nyɔmɔwoo hu. Shi nitsumɔ ni da ni he hiaa fe fɛɛ ni amɛkwɛɔ nɔ ji amɛweku lɛ, ni no lɛ amɛyeee omanye yɛ mli.” Mɛni hewɔ? Ani jeee akɛni amɛkɛ nitsumɔ kɛ nibii krokomɛi yeɔ klɛŋklɛŋ gbɛhe ni amɛkpooɔ Nyɔŋmɔ ŋaawoo lɛ hewɔŋ? E-Wiemɔ lɛ kɛɔ akɛ: “Nɛkɛ wiemɔi nɛɛ ni miwoɔo he kita . . . nɛɛ . . . ojwɛŋ nɔ otsɔɔ obii.” Ni esa akɛ afee enɛ daa gbi. Esa akɛ fɔlɔi kɛ amɛbe fɛɛ aha kwraa—kɛ titri lɛ amɛsuɔmɔ kɛ mɔ hesusumɔ hu.—5 Mose 6:6-9.
14. (a) Te esa akɛ fɔlɔi akwɛ amɛbii anɔ amɛha tɛŋŋ? (b) Mɛni fata tsɔsemɔ kpakpa ni akɛaaha gbekɛbii lɛ he?
14 Biblia lɛ kaiɔ wɔ akɛ bii ji gboshinii ni jɛ Yehowa dɛŋ. (Lala 127:3) Ani okwɛɔ obii lɛ akɛ Nyɔŋmɔ nii, ni ji nikeenii ko ni etuu ewo odɛŋ ni okwɛ nɔ? Kɛ owó obinuu loo obiyoo ohiɛ, ni okɛ nakai feemɔ tsɔɔ lɛ bɔ ni osumɔɔ lɛ ni onaa ehe miishɛɛ lɛ, eka shi faŋŋ akɛ obi lɛ hu baatsu he nii yɛ gbɛ kpakpa nɔ. (Marko 10:16) Shi ni ‘aaatsɔɔ gbekɛ gbɛ ni sa akɛ etsɔ nɔ’ lɛ biɔ babaoo fe fuamɔi kɛ enaashɔmɔi kɛkɛ. Kɛji gbekɛ lɛ baana nilee ni baanyɛ aha etsi ehe kɛjɛ shihilɛ mli tɛmɔtɛi ahe lɛ, no lɛ tsɔsemɔ ni jɛ suɔmɔ mli hu he miihia lɛ. Fɔlɔ tsɔɔ anɔkwa suɔmɔ ni eyɔɔ, kɛtsɔɔ ‘mra ni ejeɔ etsɔseɔ ebi lɛ’ nɔ.—Abɛi 13:1, 24; 22:6.
15. Mɛni tsɔɔ akɛ fɔlɔi atsɔsemɔ he hiaa waa?
15 Anaa bɔ ni fɔlɔi atsɔsemɔ he hiaa ha yɛ bɔ ni skul ŋaawolɔ ko tsɔɔ bɔ ni gbekɛbii ni baa e-ɔfis lɛ ji nɛɛ mli: “Amɛnii yɛ mɔbɔ, amɛhao kɛ tsuiyeli, ni amɛlaaje. Amɛfoɔ kɛji amɛmiiwie bɔ ni nibii ji diɛŋtsɛ kɛha amɛ lɛ he. Amɛteŋ mɛi babaoo—babaoo kwraa fe bɔ ni mɔ ko baasusu—eka amɛ diɛŋtsɛ amɛhe gbee, jeee akɛni amɛna miishɛɛ kɛteke nɔ, ní amɛnyɛɛɛ he nɔ ko amɛfee hewɔ; shi moŋ akɛni amɛnaaa miishɛɛ kwraa, ni amɛnyiɛ ni akwɛɛɛ amɛ, ni amɛhao waa lɛ hewɔ, ejaakɛ amɛgbekɛbiiashi tɔ̃ɔ nɛɛ, amɛ ‘amɛkwɛɔ nɔ fɛɛ nɔ nɔ̃,’ ni efa kwraa tsɔ̃ fe bɔ ni amɛbaanyɛ amɛtsu he nii.” Ekɛfata he akɛ: “Ewoɔ gbekɛ he gbeyei akɛ eeenu he akɛ lɛ etsuɔ shihilɛi komɛi ahe nii.” Eji anɔkwale akɛ gbekɛbii bɔɔ mɔdɛŋ ni amɛjo tsɔsemɔ naa foi, shi amɛhiɛ sɔɔ amɛfɔlɔi agbɛtsɔɔmɔi kɛ naatsii ni amɛkɛshwieɔ amɛnɔ lɛ waa diɛŋtsɛ. Amɛnaa miishɛɛ akɛ amɛfɔlɔi susuɔ amɛhe bɔ ni sa, ni no haa amɛfoɔ husui amɛhaa amɛ. Gbekɛ ko ni yeko afii nyɔŋmai enyɔ, ni efɔlɔi fo husui amɛha lɛ lɛ wie akɛ: “Eji jatsu agbo ko ni amɛwo kɛjɛ minɔ.”
16. (a) Mɛni baa gbekɛbii ni atsɔseɔ amɛ yɛ Kristofoi ashiai amli lɛ ekomɛi anɔ? (b) Mɛni hewɔ gbɛ fɔŋ ni gbekɛ ko kɔɔ lɛ etsɔɔɔ doo akɛ tsɔsemɔ ni efɔlɔi kɛha lɛ lɛ ehiii lɛ?
16 Ni kɛlɛ, yɛ fɔlɔi ni amɛyɔɔ ni sumɔɔ amɛ ni amɛkɛ tsɔsemɔ kpakpa haa amɛ lɛ fɛɛ sɛɛ lɛ, gbekɛbii lɛ ekomɛi kpooɔ amɛfɔlɔi agbɛtsɔɔmɔ ni amɛkɔɔ gbɛ fɔŋ, taakɛ bi nyenyeŋtswi lɛ fee yɛ Yesu abɛbua lɛ mli lɛ. (Luka 15:11-16) Shi ekolɛ, no etsɔɔɔ akɛ fɔlɔi lɛ tsuuu amɛgbɛnaa nii ni kã amɛnɔ akɛ amɛtsɔse amɛbi lɛ jogbaŋŋ lɛ he nii, taakɛ Abɛi 22:6 fãa amɛ akɛ amɛfee lɛ. Akɛ wiemɔ ni tsɔɔ akɛ ‘atsɔɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ kɔkɔɔkɔ’ lɛ ha akɛ mla ni kɔɔ mɔ fɛɛ mɔ he. Shi dɔlɛ sane ji akɛ, gbekɛbii lɛ ekomɛi ‘gbeɔ amɛfɔlɔi atoiboo he guɔ,’ tamɔ bi nyenyeŋtswi lɛ fee lɛ.—Abɛi 30:17.
17. Mɛni mli gbekɛbii ni ekɔ gbɛ fɔŋ lɛ afɔlɔi baanyɛ ana miishɛjemɔ kɛjɛ?
17 Binuu ko ni ekɔ gbɛ fɔŋ lɛ tsɛ kɛ dɔlɛ wie akɛ: “Mibɔ mɔdɛŋ aahu akɛ mashɛ etsui he. Mileee nɔ kwraa ni mafee ejaakɛ mika nibii sɔrɔtoi abɔ mikwɛ. Amɛteŋ eko kwraa yeee omanye.” Hiɛnɔkamɔ ji, yɛ be ni sa mli lɛ, nɛkɛ gbekɛbii ni ekɔ gbɛ fɔŋ nɛɛ baakai tsɔsemɔ ni ajɛ suɔmɔ mli akɛha amɛ lɛ, ní amɛku amɛsɛɛ taakɛ bi nyenyeŋtswi lɛ fee lɛ. Shi, anɔkwale lɛ ji akɛ, gbekɛbii lɛ ekomɛi tseɔ atua ni amɛkɛ amɛhe yawoɔ jeŋba shara mli ni enɛ dɔɔ amɛfɔlɔi waa. Fɔlɔi baanyɛ ana miishɛjemɔ kɛjɛ le ni amɛle akɛ tsɔɔlɔ kpele fe fɛɛ ni hi shikpɔŋ nɛɛ nɔ lɛ po miikwɛ ni ekaselɔ Yuda Iskariot ni etsɔɔ lɛ nii aahu lɛ tsɔɔ esɛɛ gbɛ lɛ mli. Ni ŋwanejee ko bɛ he akɛ Yehowa diɛŋtsɛ hu nu dɔlɛ he waa beni emumɔŋ bii lɛ pii kpoo eŋaawoo ni amɛfee amɛhe atuatselɔi, ní jeee Lɛ etɔmɔ hewɔ eba lɛ nakai lɛ.—Luka 22:47, 48; Kpojiemɔ 12:9.
Gbekɛbii—Namɔ Hiɛ Nyɛbaasa?
18. Te gbekɛbii baafee tɛŋŋ atsɔɔ akɛ amɛhaa Nyɔŋmɔ baa klɛŋklɛŋ?
18 Yehowa woɔ nyɛ gbekɛbii lɛ hewalɛ akɛ: “Nyɛboa nyɛfɔlɔi lɛ atoi yɛ Nuntsɔ lɛ mli.” (Efesobii 6:1) Gbekɛbii haa Nyɔŋmɔ baa klɛŋklɛŋ kɛtsɔɔ enɛ feemɔ nɔ. Kaafee buulu! Nyɔŋmɔ Wiemɔ lɛ kɛɔ akɛ: “Buulu gbeɔ etsɛ tsɔsemɔ he guɔ.” Nakai nɔŋŋ hu okɛ henɔwomɔ akasusu akɛ obaanyɛ ohi shi ni tsɔsemɔ he ehiaaa bo. Anɔkwale lɛ ji akɛ, “yinɔ ko yɛ ni naa akɛ amɛhe tse yɛ amɛ diɛŋtsɛ amɛhiŋmɛiiaŋ, shi kɛlɛ afɔko amɛhe kɛjɛko amɛhe muji lɛ mli.” (Abɛi 15:5; 30:12, American Standard Version) No hewɔ lɛ bo ŋwɛi gbɛtsɔɔmɔ toi—‘bo toi,’ ‘okɛto omasɛi,’ ‘ohiɛ akakpa nɔ,’ ‘feemɔ toi,’ ‘ye nɔ,’ ni ‘kaashɛ’ ofɔlɔi akitai kɛ tsɔsemɔ ‘ofɔ̃.’—Abɛi 1:8; 2:1; 3:1; 4:1; 6:20.
19. (a) Mɛɛ yiŋtoi ni mli wa gbekɛbii yɔɔ ni amɛaadamɔ nɔ amɛbo Yehowa toi? (b) Mɛɛ gbɛ nɔ gbekɛbii baatsɔɔ yɛ akɛ amɛdaa Nyɔŋmɔ shi?
19 Oyɛ yiŋtoi ni mli wa ni ooodamɔ nɔ obo Yehowa toi. Esumɔɔ bo, ni ekɛ emlai eha, ni amɛteŋ ekome ji mla ni biɔ ni gbekɛbii abo amɛfɔlɔi atoi lɛ, koni ebu ohe ni eye ebua bo ni ona miishɛɛ shihilɛ mli ŋɔɔmɔ. (Yesaia 48:17) Ekɛ e-Bi lɛ hu eha koni ebagbo eha bo, bɔni afee ni akɛhere oyiwala kɛjɛ esha kɛ gbele mli, ni ona naanɔ wala mli ŋɔɔmɔ. (Yohane 3:16) Ani odaa shi yɛ he? Nyɔŋmɔ miijɛ ŋwɛi eekwɛ bo, ni eeka otsui eekwɛ koni ena akɛ ani osumɔɔ lɛ lɛlɛŋ ni ohiɛ sɔɔ nibii ni ekɛha lɛ lo. (Lala 14:2) Satan hu miikwɛ bo, ni eebɔ Nyɔŋmɔ ahora, eewie akɛ oboŋ Lɛ toi. Kɛ obooo Nyɔŋmɔ toi lɛ, ohaa Satan naa miishɛɛ ni ofeɔ Yehowa “nidɔɔnii.” (Lala 78:40, 41) Yehowa kpaa bo fai akɛ: “Mibi, feemɔ ohe nilelɔ, ni oha mitsui anyɔ mimli [kɛtsɔ toiboo ni ooofee oha mi lɛ nɔ], ni mana hetoo maha mɔ ni bɔɔ mi ahora lɛ.” (Abɛi 27:11) Hɛɛ, sanebimɔ lɛ ji, Namɔ hiɛ obaasa, Satan loo Yehowa?
20. Mɛɛ gbɛ nɔ gbekɛ ko tsɔ ehiɛ ekãa ni ekɛsɔmɔɔ Yehowa lɛ mli yɛ be mli ni esheɔ gbeyei po?
20 Nyɔŋmɔ suɔmɔnaa nifeemɔ bɛ mlɛo yɛ nɔnyɛɛ ni Satan kɛ eje lɛ kɛbaa onɔ lɛ hewɔ. Ebaanyɛ ewo ohe gbeyei. Obalayoo fioo ko wie akɛ: “Gbeyei ni mɔɔ mɔ lɛ tamɔ fɛ̃i mɔɔ mɔ lɛ pɛpɛɛpɛ. Obaanyɛ ofee nɔ ko yɛ he.” Etsɔɔ mli akɛ: “Kɛ fɛ̃i miiye bo lɛ, owoɔ atade ni ti koni ohe adɔ. Kɛ fɛ̃i lɛ miiye bo lolo lɛ, owoɔ ekroko oshwieɔ nɔ. Ni oyaa onɔ owoɔ atadei krokomɛi ofataa he aahu kɛyashiɔ be mli ni onuuu fɛ̃i he dɔŋŋ. No hewɔ lɛ, sɔlemɔ ni ooosɔle oha Yehowa kɛ́ ooshe gbeyei lɛ tamɔ nɔ ni oowo atade ni ti yɛ be mli ni fɛ̃i yeɔ bo lɛ. Kɛ misɔle shikome ni miishe gbeyei lolo lɛ, misɔleɔ ekoŋŋ, kɛtsaraa nɔ aahu kɛyashiɔ be mli ni misheee gbeyei dɔŋŋ. Ni etsuɔ nii hu. Ejie mi kɛjɛ haomɔ mli!”
21. Mɛɛ gbɛ nɔ Yehowa baafi wɔ sɛɛ yɛ kɛ wɔbɔ mɔdɛŋ lɛlɛŋ akɛ wɔɔha eba klɛŋklɛŋ yɛ wɔshihilɛi amli?
21 Kɛ wɔbɔ mɔdɛŋ lɛlɛŋ akɛ wɔkɛ Nyɔŋmɔ baaye klɛŋklɛŋ gbɛhe yɛ wɔshihilɛ mli lɛ, Yehowa baafi wɔ sɛɛ. Ebaawaje wɔ, ni ebaaha wɔ ŋwɛibɔfoi ayelikɛbuamɔ yɛ be ni ehe hiaa wɔ lɛ mli, taakɛ efee eha e-Bi lɛ. (Mateo 18:10; Luka 22:43) Nyɛfea ekaa, nyɛ fɔlɔi kɛ bii fɛɛ. Nyɛnaa Kristo gbeyeishemɔ lɛ eko, ni ebaaha nyɛna miishɛɛ. (Yesaia 11:3) Hɛɛ, “she Nyɔŋmɔ gbeyei ni oye ekitai lɛ anɔ, shi enɛ ji gbɔmɛi fɛɛ agbɛnaa.”—Jajelɔ 12:13.
Ani Obaanyɛ Oha Hetoo?
◻ Mɛɛ gbɛnaa nii ehe bahia ni Yesu mra be mli sɛɛnyiɛlɔi lɛ aha eŋmɛ pɛpɛɛpɛ?
◻ Mɛɛ gbɛnaa nii esa akɛ fɔlɔi Kristofoi atsu he nii?
◻ Mɛɛ yelikɛbuamɔ yɔɔ kɛha Kristofoi onukpai ni yɔɔ wekui lɛ?
◻ Mɛɛ sɔɔmɔ ni he yɔɔ sɛɛnamɔ nyɛmimɛi yei baanyɛ amɛkɛha yɛ asafo lɛ mli?
◻ Mɛɛ ŋaawoo kɛ gbɛtsɔɔmɔ ehe hiaa ni gbekɛbii abo toi?
[Mfoniri ni yɔɔ baafa 15]
Bei pii lɛ, Kristofonyo yoo ni eda yɛ mumɔŋ lɛ baanyɛ aha obalayoo yelikɛbuamɔ ni he hiaa lɛ
[Mfoniri ni yɔɔ baafa 17]
Mɛɛ miishɛjemɔ fɔlɔi ni amɛbii ekɔ gbɛ fɔŋ lɛ baanyɛ ana kɛjɛ Ŋmalɛi lɛ amli?