“Nyɛkawoa Nyɛbii Amlifu”
“TSƐMƐI lɛ, nyɛkawoa nyɛbii amlifu.” Nɛkɛ ji bɔ ni bɔfo Paulo kɛɛ. (Efesobii 6:4) Yɛ Anaigbɛ maji anɔ, he ni fɔlɔi hiɔ maji ni etee hiɛ yɛ tsɔnei ahe nitsumɔ mli lɛ amli nɔnyɛɛ kɛ naagbai ashishi lɛ, jeee be fɛɛ be ebafeɔ mlɛo kɛhaa amɛ akɛ amɛkɛ amɛbii lɛ aaaye kɛ mlihilɛ. Ni nakai nɔŋŋ bii atsɔse ji kaa kpele yɛ maji ni yaa amɛhiɛ lɛ hu amli. Eji anɔkwale, ekolɛ shihilɛ lɛ efeŋ oyayaayai tamɔ eji yɛ Anaigbɛ maji amli lɛ. Shi kusumii kɛ shihilɛ gbɛi ni ehi shi kɛjɛ blema lɛ baanyɛ ana fɔlɔi anɔ hewalɛ ni amɛkɛ amɛbii lɛ aye yɛ gbɛi ni eka shi faŋŋ akɛ ebaaha amɛnijiaŋ aje wui ni amɛmli awo la lɛ nɔ.
Abuɔ gbekɛbii yɛ maji ni kpaako amɛyaa amɛhiɛ lɛ ekomɛi amli akɛ amɛbaa shi fe mɛi fɛɛ yɛ nɔkpɛlɛmɔ kɛ bulɛ ni sa akɛ akɛha amɛ lɛ mli. Yɛ kusumii komɛi amli lɛ, atsuɔ gbekɛbii kɛyaa kɛbaa kɛ hegbeyeiwoo kɛ amɛyifamɔ gbee, ni abolɔɔ awoɔ amɛ ni ajɛɔ amɛ. Ekolɛ efɔɔɔ kaa akɛ aaana onukpa ko ni ekɛ gbekɛ miiwie kɛ mlihilɛ, aahu ni aaanu wiemɔi ni tsɔɔ bulɛ tamɔ “ofainɛ” kɛ “oyiwala dɔŋŋ” kɛjɛ enaa kɛmiiha gbekɛ. Tsɛmɛi nuɔ he akɛ esa akɛ amɛkɛ yitsoŋwalɛ kɛ yii aha gbekɛbii lɛ ale hegbɛ ni amɛyɔɔ lɛ; akɛ atswɛrɛ kalamɔ ni mli wa woɔ amɛyifamɔ wiemɔi lɛ amli hewalɛ.
Yɛ Afrika kusumii komɛi amli lɛ, abuɔ akɛ ehe ehiaaa kwraa akɛ gbekɛ aaajɛ lɛ diɛŋtsɛ ehegbɛ mli eŋa onukpa. Eji nɔ ni afɔɔ namɔ yɛ he fɛɛ he, obalaŋtai ni amɛtere jatsui ni tsii ni etɔ amɛ yɛ jatsui lɛ ashishi, ni amɛkɛ tsuishitoo damɔ shi amɛmiimɛ ni aha amɛ hegbɛ ni amɛŋa onukpai komɛi. Onukpai nɛɛ baaya nɔ yɛ amɛsanegbaa lɛ mli aahu ni amɛfooo obalaŋtai ni mɛɔ nɛɛ adaaŋ, ja amɛmiisumɔ ni amɛha amɛŋa amɛ da. Ni ja gbekɛbii lɛ eŋa amɛ hu dani amɛbaanyɛ amɛho kɛya he ni amɛyaa.
Ohia ji shihilɛ kroko ni nyɛɔ egbaa gbekɛbii ashihilɛ kpakpa naa. Ahaa obalaŋtai tsuɔ nii dɛŋdɛŋ akɛ gbekɛbii nitsulɔi, ni enɛ saa amɛgbɔmɔtsoŋ hewalɛnamɔ he loo enyɛɔ efiteɔ amɛskulyaa po. Bei komɛi po lɛ akɛ nitsumɔi ni wa fe nine shwieɔ gbekɛbii lɛ anɔ yɛ shia. Ni kɛji wekui ni yɔɔ akrowai amli lɛ kɛ amɛbii lɛ ha kɛtee maŋtiasei lɛ amli koni amɛwekumɛi lɛ akwɛ amɛnɔ beni amɛwoɔ amɛ skul hu lɛ,yɛ bei babaoo mli lɛ, ahaa amɛtsuɔ nii tamɔ nyɔji pɛpɛɛpɛ. Eka shi faŋŋ akɛ, nɛkɛ gbɛi fɔji ni akɛ gbekɛbii yeɔ yɛ nɔ nɛɛ woɔ gbekɛbii lɛ amlifu!
Nɔ ni ‘Amɛ Mlifuwoo’ Tsɔɔ
Fɔlɔi komɛi ŋmɛɔ gbɛ ni bɔ ni bii atsɔsemɔ kusumii ji yɛ je lɛŋ hei krokomɛi lɛ naa amɛnɔ hewalɛ, ni amɛsusuuu nɔ ni baajɛ mli aba lɛ he babaoo. Shi kɛlɛ, yiŋtoo kpakpa hewɔ ni Nyɔŋmɔ Wiemɔ lɛ woɔ fɔlɔi ahewalɛ ni amɛkawo amɛbii lɛ amlifu lɛ. Shishijee Hela wiemɔ ni atsɔɔ shishi akɛ “nyɛkawoa amɛ mlifu” lɛ shishitsɔɔmɔ diɛŋtsɛ ji “nyɛkatsɔa amɛnaa ni amɛmli miifu.” (Kingdom Interlinear) Atsɔɔ nakai feemɔ-wiemɔ lɛ nɔŋŋ shishi yɛ Romabii 10:19 akɛ “aaawo . . . mlila.”
Enɛ hewɔ lɛ, Today’s English Version lɛ kɛɔ akɛ: “Nyɛkɛ nyɛbii lɛ akayea bɔ ni eeeha amɛmli afu.” The Jerusalem Bible lɛ hu kɛɔ nakai nɔŋŋ akɛ: “Nyɛkatsirɛa nyɛbii lɛ nyɛwoa mlifu mli.” No hewɔ lɛ jeee mlilawoi bibii ni ekolɛ fɔlɔi ahiɛ ni bɛ amɛhe nɔ hewɔ lɛ amɛkɛfeɔ amɛbii lɛ yɛ emuu ni amɛyeee hewɔ lɛ he Biblia lɛ wieɔ lɛ, ni nakai nɔŋŋ hu ebuuu tsɔsemɔ ni akɛhaa yɛ jalɛ gbɛ nɔ lɛ fɔ. Taakɛ Lange’s Commentary on the Holy Scriptures lɛ tsɔɔ lɛ, nɛkɛ Biblia mli ŋmalɛ kuku nɛɛ miiwie “bɔ ni akɛ gbekɛbii yeɔ kɛ yiwalɛ kɛ mlifu, yɛ basabasa-feemɔ mli, ni no hewɔ lɛ . . . eshwieɔ amɛ kɛyaa sɛɛ ni egbalaa amɛ ewoɔ shitee-kɛ-woo, atuatsemɔ kɛ mlifu mli” lɛ he.
Taakɛ tsɔɔlɔ J. S. Farrant wie he lɛ: “Anɔkwale lɛ ji akɛ, gbekɛbii lɛ hu, adesai ji amɛ. Amɛhiii shi kɛkɛ ni jeee amɛhe sane ko ji shihilɛ mli ni amɛyɔɔ lɛ tamɔ bɔ ni tsei hiɔ shi yɛ he ni amɛyɔɔ lɛ kɛkɛ lɛ. Amɛfeɔ he nɔ ko.” Ni bei babaoo lɛ nɔ ni amɛfeɔ yɛ gbɛ nɔ ni akɛ amɛ yeɔ ni jalɛsaneyeli bɛ mli lɛ he lɛ kɛ mumɔŋ kɛ henumɔŋ fitemɔ kpele baa. Jajelɔ 7:7 (NW) kɛɔ akɛ: “Shi nɔnyɛɛ kɛkɛ po haa nilelɔ yeɔ sɛkɛ.”
Bii Alɛɛ yɛ Nyɔŋmɔ Tsɔsemɔ Mli
Esaaa akɛ fɔlɔi ni sumɔɔ ni amɛbii lɛ aya nɔ amɛnyiɛ yɛ anɔkwale lɛ mli lɛ ŋmɛɔ gbɛ ni amɛmaŋ kusum nibii ni afeɔ kɛ daa gbi shihilɛ mli nibii lɛ pɛ feɔ nibii titrii ni amɛdamɔɔ nɔ amɛkpɛɔ amɛyiŋ yɛ bɔ ni amɛaafee amɛtsɔse amɛbii lɛ he. (Okɛto 3 Yohane 4 he.) Yɛ be mli ni ebɔ fɔlɔi lɛ kɔkɔ yɛ amɛbii lɛ amlifuwoo he sɛɛ lɛ, Paulo kɛfata he akɛ: “Shi moŋ nyɛlɛa amɛ yɛ Nuŋtsɔ lɛ [Yehowa] tsɔsemɔ kɛ ŋaawoo lɛ mli.” (Efesobii 6:4) Enɛ hewɔ lɛ, tɛi ni Yehowa efolɔ eshwie shi lɛ anɔ kwɔlɔ kwraa fe maŋ ko mli kusum kɛ amɛniiashishinumɔ.
Eyɛ mli akɛ eji nɔ ni afɔɔ namɔ yɛ shikpɔji komɛi anɔ akɛ akɛ gbekɛbii yeɔ akɛ mɛi ni baa shi kɛ nyɔji nitsulɔi moŋ, shi Biblia lɛ jajeɔ yɛ Lala 127:3 akɛ: “Naa, Yehowa gboshinii ni ehaa ji bii, ni nikeenii ji musuŋbii.” Ani fɔlɔ ko aaanyɛ ahiɛ ekɛ Nyɔŋmɔ teŋ wekukpaa kpakpa mli kɛji ejieee bulɛ kpo yɛ egboshinii lɛ he? Dabi. Ni nakai nɔŋŋ ekɛ hegbɛ ko haaa ni akɛsusu akɛ gbekɛbii lɛ yɛ koni amɛtsu amɛfɔlɔi ahiamɔ nii ahe nii kɛkɛ. Biblia lɛ kaiɔ wɔ yɛ 2 Korintobii 12:14 akɛ: “Ejaakɛ esaaa akɛ bii tĩaa nii toɔ amɛfɔlɔi, shi moŋ fɔlɔi ni tĩaa nii toɔ amɛbii.”
Enɛ etsɔɔɔ akɛ esa akɛ aha gbekɛbii lɛ aye amɛhe kɛjɛ amɛgbɛfaŋnɔ yɛ shia nifeemɔi kɛ nitsumɔi amli. Shi ani esaaa ni asusuɔ nɔ ni baahi kɛha gbekɛ lɛ diɛŋtsɛ lɛ he? Akɛ nɔkwɛmɔ nɔ lɛ, beni abi Yaa, Kristofonyo gbekɛyoo ko ni jɛ Afrika lɛ, nɔ ni ebaasumɔ fe fɛɛ ni efɔlɔi afee amɛha lɛ lɛ, eha hetoo akɛ: “Mina ni kulɛ gbii ni miyɔɔ shiɛmɔyaa he gbɛjianɔtoo lɛ, atse mishia nitsumɔi lɛ anɔ fioo aha mi.” No hewɔ lɛ kɛji gbekɛ ko naa akɛ ewa waa kɛha lɛ akɛ eeeshɛ skul yɛ be naa aloo eya kpeei yɛ shia nitsumɔi babaoo ni etsuɔ lɛ hewɔ lɛ, ani ebahiŋ jogbaŋŋ akɛ aaafee tsakemɔi fioo komɛi aha lɛ?
Eji anɔkwale akɛ, bei komɛi lɛ gbekɛbii ahe nitsumɔ wa. Mɛɛ gbɛ nɔ fɔlɔi aaatsɔ amɛkɛ amɛ aye yɛ gbɛ ni tsɔɔ bulɛ ni ewooo amɛ mlifu hu lɛ nɔ yɛ? Abɛi 19:11 kɛɔ akɛ: “Gbɔmɔ ni yɔɔ jwɛŋmɔ lɛ, emli fuuu mra.” Hɛɛ, klɛŋklɛŋ lɛ obaanyɛ obɔ mɔdɛŋ ni onu obi lɛ shishi akɛ mɔ aŋkro. Esoro gbekɛ fɛɛ gbekɛ, kɛ nibii ni enaa he miishɛɛ, enyɛmɔi, kɛ ehiamɔ nii hu. Mɛni ji nomɛi? Ani ohe be akɛ okɛaale obi lɛ jogbaŋŋ koni okɛle sanebimɔ nɛɛ hetoo lɛ hu? Nitsumɔ kɛ jamɔ yɛ kutuu-feemɔ mli, ni nyɛkɛ nyɛhe aaawo weku hiɛtserɛjiemɔ mli—nɛkɛ nibii nɛɛ haa fɔlɔi naa hegbɛ ni amɛkɛbɛŋkɛɔ amɛbii lɛ kpaakpa.
Yɛ 2 Timoteo 2:22 lɛ, Paulo wie nɔ kroko hu ni yɔɔ miishɛɛ waa beni ekɛɛ Timoteo nɛkɛ lɛ: “Shi obalahiaŋ sɛɛdii lɛ hu, joo naa foi.” Hɛɛ, Paulo nu shishi akɛ obalaŋtaiaŋ be baanyɛ afee haomɔ be. Gbɔmɔtsoŋ kɛ henumɔŋ tsakemɔi baa trukaa. Kɛji nuu ni lɛ, miishɛɛ ni enaa yɛ yei ahe lɛ yaa hiɛ. Yɛ nɛkɛ be nɛɛ mli lɛ, onukpai agbɛtsɔɔmɔ ni suɔmɔ yɔɔ mli he hiaa obalaŋtai lɛ koni amɛtsi amɛhe kɛjɛ tɛmɔtɛi ni hiɛdɔɔ yɔɔ he lɛ ahe. Shi esaaa ni akɛ amɛ yeɔ tamɔ mɛi ni yɔɔ jeŋba shara momo. Kristofonyo nuu ko biyoo ni mli ewo la lɛ wie akɛ: “Kɛji mibɔko ajwamaŋ, shi mitsɛ miifolɔ minaa akɛ mifee nakai lɛ, no lɛ maya mayafee moŋ kwraa.” No hewɔ lɛ, yɛ nɔ najiaŋ ni ooona amɛhe susumɔi fɔji lɛ, jiemɔ hekɛnɔfɔɔ kpo yɛ obi lɛ mli. (Okɛto 2 Tesalonikabii 3:4 he.) Yɛ nɔ najiaŋ ni ooowie veveeve oshi amɛ lɛ, feemɔ mɔ ni nuɔ nii ahe ni eyɔɔ sɛɛyoomɔ yɛ suɔmɔ mli, akɛ odaa gbi shihilɛ.
Shi kɛlɛ, kɛji fɔlɔi tsɔ hiɛ amɛkɛ gbekɛ lɛ susu jeŋba he osharai ni ekɛkpeɔ lɛ ahe lɛ, enyɛɔ etsiɔ naagbai babaoo naa. Kaimɔ akɛ, Nyɔŋmɔ kɛ gbɛnaa nii fɔɔ fɔlɔi anɔ akɛ amɛtsɔse amɛshwiei lɛ ni amɛtsɔɔ amɛ Nyɔŋmɔ Wiemɔ lɛ. (5 Mose 6:6, 7) Ekolɛ enɛ baabi be kɛ mɔdɛŋbɔɔ babaoo. Dɔlɛ sane ji akɛ, fɔlɔi komɛi tsuuu amɛ nitsɔɔmɔ nitsumɔ lɛ he nii ejaakɛ amɛnaaa tsuishitoo. Ni kɛfata he lɛ, woloŋ ni aleee, ni ji naagba agbo yɛ shikpɔji ni yaa amɛhiɛ lɛ pii anɔ lɛ tsiɔ fɔlɔi komɛi hu gbɛ.
Yɛ shihilɛi lɛ ekomɛi amli lɛ abaanyɛ afɔ nine atsɛ Kristofonyo ko ni eda yɛ mumɔŋ ni ebaye ebua. Ekolɛ enɛ baafee ŋaawoo ko kɛkɛ ni ekɛaaha fɔlɔ ni bɛ niiashikpamɔ tsɔ lɛ. (Abɛi 27:17) Aloo ekolɛ ebaabi ni eye ebua yɛ weku nikasemɔ lɛ diɛŋtsɛ feemɔ mli. Shi enɛ ejieee gbɛnaa nii ni ka fɔlɔ lɛ diɛŋtsɛ nɔ akɛ etsɔɔ eshwiei lɛ Nyɔŋmɔ Wiemɔ lɛ kɛjɛɛɛ jɛmɛ. (1 Timoteo 5:8) Ebaanyɛ ebɔ mɔdɛŋ ni ebii lɛ afata ehe yɛ shiɛmɔ nitsumɔ lɛ mli koni ekɛ amɛ agba mumɔŋ nibii ahe sane hu yɛ niyenii ashishi aloo yɛ bei krokomɛi ni sa mli.
Yɛ adebɔɔ naa lɛ, obalaŋta ni miida kɛmiitsɔ onukpa lɛ sumɔɔ ni ena heyeli babaoo. Bei babaoo lɛ, fɔlɔi eyanuuu enɛ shishi, ni amɛbuɔ enɛ akɛ henɔwomɔ aloo kuɛŋtimɔ. Kwɛ bɔ ni eeefee mlilawoo eha kɛji efɔlɔi tsu enɛ he nii kɛtsɔ bɔ ni amɛkɛ lɛ aaaye tamɔ gbekɛ bibioo ni no hewɔ lɛ amɛhaaa lɛ heyeli ni fa bɔ ni sa yɛ enifeemɔ amli lɛ nɔ lɛ! Nakai nɔŋŋ eeefee mlilawoo kɛha amɛ diɛŋtsɛ hu akɛ amɛaakpɛ yiŋ amɛha lɛ yɛ eshihilɛ mli nibii fɛɛ mli—eskulyaa, enitsumɔ, kɛ gbalashihilɛ mlibotemɔ he—ni amɛkɛ lɛ susuuu saji ahe yɛ mlihilɛ kɛ bulɛ mli. (Abɛi 15:22) Bɔfo Paulo wo nanemɛi Kristofoi hewalɛ akɛ, “shi jwɛŋmɔ gbɛfaŋ lɛ, nyɛfea nyɛhe mɛi ni edara.” (1 Korintobii 14:20) Ani esaaa ni fɔlɔi shweɔ akɛ amɛ diɛŋtsɛ amɛbii lɛ aaadara—yɛ henumɔŋ kɛ mumɔŋ fɛɛ? Ni kɛlɛ, abaanyɛ atsɔse obalaŋta lɛ “henumɔ nii lɛ” kɛtsɔ “fɔ ni afɔɔ feemɔ” pɛ nɔ. (Hebribii 5:14) Kɛji eeenyɛ ekɛtsu nii lɛ, no lɛ esa akɛ aha lɛ heyeli bɔ ni sa ni ekɛhala nɔ ni esumɔɔ.
Bii atsɔsemɔ yɛ nɛkɛ jaramɔ gbii nɛɛ amli lɛ bɛ mlɛo. Shi fɔlɔi ni nyiɛɔ Nyɔŋmɔ Wiemɔ lɛ sɛɛ lɛ wooo amɛbii lɛ amlifu loo amɛwooo amɛmlila, “koni amɛtsuii akafã.” (Kolosebii 3:21) Shi moŋ, amɛbɔɔ mɔdɛŋ ni amɛkɛ amɛ aye kɛ mlihilɛ, shishinumɔ, kɛ bulɛ. Amɛnyiɛɔ amɛbii lɛ ahiɛ, ni amɛnyɛɛɛ amɛnɔ; amɛlɛɔ amɛ ni amɛkuuu amɛhiɛ amɛshwieee amɛnɔ; amɛkanyaa amɛ koni amɛna suɔmɔ, ni amɛtsɔɔɔ amɛnaa ni amɛmli afu aloo ni amɛnijiaŋ aje wui.
[Mfoniri ni yɔɔ baafa 31]
Ghana shwɛmɔ ko ni atsɛɔ Iɛ”aware” lɛ shwɛmɔ haa nɛkɛ fɔlɔi nɛɛ naa hegbɛ ni amɛkɛbɛŋkɛɔ amɛbii Iɛ kpaakpa