Fɔlɔi—Nyɛnine Ashɛa Nyɛbi lɛ Tsui nɔ Kɛjɛa Egbekɛbiiashi
“Nyɛyaa nɔ nyɛlɛa [nyɛbii Iɛ] yɛ Yehowa tsɔsemɔ kɛ ŋaawoo lɛ mli.”—EFESOBII 6:4.
1. Mɛni ba yɛ be pɔtɛɛ ko ni mli wa yɛ Yesu shihilɛ he lɛ mli?
YESU KRISTO kɛ ekaselɔi lɛ nyiɛ gbɛ kɛmiiya Yerusalem. Be fioo ko mli dani enɛ aaaba lɛ, no mli lɛ Yesu ekɛɛ ekaselɔi lɛ yɛ bei sɔrɔtoi enyɔ mli akɛ ebaana amanehulu pii ni abaagbe lɛ yɛ nakai maŋ lɛ mli. (Marko 8:31; 9:31) Biblia mli sane lɛ kɛɔ yɛ nɛkɛ be krɛdɛɛ ni mli wa kɛha Yesu nɛɛ mli akɛ: “Ni amɛkɛ abifabii hu ba eŋɔɔ, koni etara amɛhe.”—Luka 18:15.
2. (a) Mɛni hewɔ kaselɔi lɛ baabɔ mɔdɛŋ ni amɛshwie gbɔmɛi lɛ? (b) Te Yesu tsu nakai shihilɛ lɛ he nii eha tɛŋŋ?
2 Mɛɛ nifeemɔ jɛ enɛ mli ba? Kaselɔi lɛ famɔ gbɔmɛi lɛ ni amɛbɔ mɔdɛŋ ni amɛshwie amɛ, ni ŋwanejee ko bɛ he akɛ amɛhe amɛye akɛ amɛmiifee Yesu ejurɔ ko akɛni amɛmiibu ehe kɛmiijɛ naagba kɛ haomɔ ni he ehiaaa lɛ hewɔ. Shi Yesu mli fu ekaselɔi lɛ ni ekɛɛ amɛ akɛ: “Nyɛhaa gbekɛbii lɛ abaa miŋɔɔ, ni nyɛkatsia amɛ gbɛ . . . ni eloo amɛ atuu, ni eŋɔ eniji eshwie amɛnɔ, ni ejɔɔ amɛ.” (Marko 10:13-16) Hɛɛ, yɛ nɔ fɛɛ nɔ ni ekolɛ eyɔɔ ejwɛŋmɔ kɛ etsui mli lɛ fɛɛ sɛɛ lɛ, Yesu na be eha gbekɛbii.
Mɛni Fɔlɔi Kaseɔ Kɛjɛɔ Enɛ Mli?
3. Mɛni esa akɛ fɔlɔi akase kɛjɛ nɔ ni ba nɛɛ mli?
3 Nɔ ni esa akɛ fɔlɔi akase kɛjɛ enɛ mli ji: Yɛ gbɛnaanii krokomɛi ni oyɔɔ loo haomɔi ni okɛkpeɔ lɛ fɛɛ sɛɛ lɛ, esa akɛ obu bei ni oooye yɛ obii amasɛi lɛ akɛ no he hiaa fe fɛɛ. Be ni okɛ amɛ yeɔ yɛ hekome lɛ baaŋmɛ gbɛ ni otɛo mumɔŋ hiamɔnii ni baabu obii lɛ atsui he ni ekɛ amɛ ayi gbɛ ni ja lɛ nɔ lɛ yɛ amɛmli. (5 Mose 6:4-9; Abɛi 4:23-27) Eunike kɛ Loise, ni ji Timoteo nyɛ kɛ enaa fɛɛ lɛ he be ni amɛkɛ tsɔsemɔ ni sa etsui bibioo lɛ he lɛ ha lɛ ni no kudɔ eshihilɛ ni enɛ ha eda ebatsɔ Nyɔŋmɔ sɔɔlɔ ni etuu ehe eha lɛ.—2 Timoteo 1:5; 3:15.
4. Te gbekɛbii ajara wa ha tɛŋŋ, ni mɛɛ gbɛ nɔ fɔlɔi baatsɔ atsɔɔ akɛ amɛhiɛ sɔɔ amɛ?
4 Fɔlɔi ni ji Kristofoi nyɛŋ aku amɛhiɛ amɛshwie gbekɛbii ni Yehowa Nyɔŋmɔ kɛha amɛ lɛ anɔ. Hɛɛ, gbekɛbii ji nikeenii ni jara wa ni jɛ Yehowa ŋɔɔ. (Lala 127:3) No hewɔ lɛ, okɛ amɛ aye bei—ha onine ashɛ amɛtsui nɔ—taakɛ bɔni Timoteo nyɛ kɛ enaa to okadi lɛ amɛfɔ shi lɛ. Jeee akɛ esa akɛ ohe be ni okɛ obii lɛ awie yɛ amɛjeŋba kɛ amɛtsɔsemɔ he pɛ shi moŋ ehe miihia hu ni okɛ amɛ aye nii, ni okɛ amɛ akane nii, ni okɛ amɛ ashwɛ, ye obua amɛ ni amɛwɔ gbekɛ. Be ni okɛ obii nɛɛ yeɔ nɛɛ fɛɛ he hiaa.
5. Okɛ tsɛ ko ni tsɔɔ hiɛsɔɔ kɛha fɔlɔi agbɛnaanii ni jwere enɔ lɛ he nɔkwɛmɔ nɔ aha.
5 Japannyo nitsumɔtsɛ ko ni ehe gbɛi waa ni ebatsɔ Yehowa Odasefoi lɛ ateŋ mɔ kome lɛ yɔse anɔkwa sane nɛɛ. Mainichi Daily News ni ji adafitswaa wolo ni aŋma yɛ February 10, 1986 lɛ bɔ amaniɛ ko yɛ saneyitso ni ji “J N R Nitsumɔŋ Onukpa Eshi Koni Ekɛ Eweku Ayahi Shi” lɛ shishi akɛ: “Japan oketeke nitsumɔ he J N R lɛ mli onukpa titri ko ehala akɛ, eeekpa nitsumɔ moŋ fe ni ekɛ eweku lɛ aaagbala mli . . . Nɛkɛ ji bɔni Tamura kɛɛ, ‘Mɔ fɛɛ mɔ baanyɛ ahala nitsumɔ lɛ nɔkwɛmɔ lɛ. Shi mi pɛ ji tsɛ kɛha mibii lɛ.’” Ani oŋɔɔ ogbɛnaa nii akɛ fɔlɔ lɛ akɛ hiɛdɔɔ sane taakɛ efee lɛ?
Nɔ Hewɔ ni Mɔdɛŋbɔɔ Krɛdɛɛ He Hiaa Bianɛ
6. Mɛni hewɔ ewa waa akɛ aaatsɔse gbekɛbii jogbaŋŋ yɛ gbɛ ni hi nɔ ŋmɛnɛ lɛ?
6 Ekolɛ be bako yɛ adesa yinɔsane mli ni gbekɛbii atsɔsemɔ yɛ Nyɔŋmɔ Wiemɔ lɛ mli, “yɛ Nuŋtsɔ [Yehowa] lɛ tsɔsemɔ kɛ ŋaawoo lɛ mli” ewa tamɔ eyɔɔ nɛɛ da. (Efesobii 6:4) Yiŋtoo ni haa ebaa lɛ nakai ji akɛ “naagbee gbii” lɛ amli wɔyɔɔ lɛ, ni Satan kɛ edaimonioi lɛ kɛ haomɔi babaoo miiba ejaakɛ amɛmli efu, ejaakɛ amɛle akɛ be fioo ko pɛ kɛkɛ amɛyɔɔ. (2 Timoteo 3:1-5; Kpojiemɔ 12:7-12) No hewɔ lɛ, okadi “kɔɔyɔɔ” ni Satan yeɔ nɔ lɛ miifite mɔdɛŋ ni fɔlɔi bɔɔ koni amɛtsɔse amɛbii yɛ Nyɔŋmɔ gbeyeishemɔ mli lɛ. Nakai “kɔɔyɔɔ” aloo pɛsɛmkunya kɛ toigbele mumɔ lɛ egbɛ eshwa he fɛɛ he tamɔ bɔni kɔɔyɔɔ diɛŋtsɛ ni wɔmuɔ nɛɛ ji lɛ.—Efesobii 2:2.
7, 8. (a) Mɛni ji nɔ ni televishin baanyɛ ekɛba shia lɛ mli, ni kɛlɛ mɛni ji nɔ ni fɔlɔi pii feɔ? (b) Mɛni hewɔ televishin ni akɛtsuɔ nii akɛ nɔ ni haa gbekɛbii taa shi diŋŋ lɛ ji fɔlɔi agbɛnaanii lɛ kpoomɔ yɛ gbɛ ni yɔɔ mɔbɔ nɔ lɛ?
7 Televishin titri ji nɔ ni kɛ nɛkɛ “je nɛŋ mumɔ lɛ,” nɛkɛ “kɔɔyɔɔ” ni ebɔɔ yɔɔ mli nɛɛ yaa shiai. (1 Korintobii 2:12) Yɛ anɔkwale mli lɛ, bɔlɛnamɔ mli jeŋba shara kɛ hii-kɛ-hii kɛ yei-kɛ-yei ni kɛ amɛhe feɔ yakayakanii lɛ ji nɔ ni naa nibii ni jeɔ kpo yɛ televishin nɔ lɛ nɔ hewalɛ yɛ bei babaoo mli. (Romabii 1:24-32) Jwɛŋmɔ ni Nyɔŋmɔ gbeyeishemɔ bɛ mli kɛ jeŋba mli mujiwoo ni jeɔ kpo lɛ naa obii lɛ anɔ hewalɛ titri, taakɛ bɔ ni kɔɔyɔɔ diɛŋtsɛ ni mli ewo muji naa amɛnɔ hewalɛ lɛ. Shi mɛni ji nɔ ni fɔlɔi babaoo feɔ?
8 Amɛkɛ televishin tsuɔ nii akɛ nɔ ni haa gbekɛbii taa shi diŋŋ. Amɛkɛɔ amɛbii lɛ akɛ: “Jeee bianɛ, misuɔlɔ. Mibɛ deka. Yaa ni oyakwɛ televishin.” Mɔ ko ni wieɔ yɛ televishin nɔ ni ehe gbɛi waa kɛɛ akɛ enɛɛmɛi ji “wiemɔi ni afɔɔ wiemɔ yɛ Amerikabii pii ashiai amli.” Ni kɛlɛ ni oootsu ogbekɛbii ni amɛyakwɛ nɔ fɛɛ nɔ ni ajieɔ yɛ televishin nɔ lɛ tamɔ nɔ ni akpoo amɛjeŋba aha amɛ. (Abɛi 29:16) Etsɔɔ fɔlɔ lɛ gbɛnaanii ni ekuɔ ehiɛ eshwie nɔ yɛ gbɛ ni ehiii kwraa nɔ. Taakɛ TV nɔ wielɔi nɛɛ kadi yɛ gbekɛbii atsɔsemɔ he lɛ: “Nɛkɛ fɔlɔi anitsumɔ nɛɛ heɔ be ni eji gbɛnaanii ni da waa ni esaaa akɛ aŋmɛɔ he, eka shi faŋŋ akɛ esaaa akɛ aŋmɛɔ he ahaa televishin adeka.”
9. Mɛɛ kɔɔyɔɔŋ fitemɔ esa akɛ abu gbekɛbii titri he kɛjɛ he lɛ?
9 Shi, yɛ nɔnyɛɛ ni yɔɔ jeŋ ni wɔyɔɔ mli nɛɛ mli lɛ hewɔ lɛ, eeeha ofee nakai, taakɛ kaselɔi lɛ, fee lɛ, oshwie gbekɛbii koni otsɔ kɛya nɔ ni osusuɔ akɛ nomɛi ji nitsumɔ ni he hiaa fe fɛɛ lɛ ahe. Shi mɛni ji nɔ ni he hiaa fe fɛɛ fe bo diɛŋtsɛ ogbekɛbii? Oshara eba amɛmumɔŋ shihilɛ he. Ekolɛ obaakai akɛ be ni Chernobyl nuklea oshara lɛ ba yɛ Soviet Union ni ji Russia, yɛ 1986 lɛ, ajie gbekɛbii fɛɛ kɛjɛ jɛmɛ koni akɛbu amɛhe kɛjɛ kɔɔyɔɔŋ fitemɔ he. Nakai nɔŋŋ hu kɛji akɛ ooonyɛ obu obii lɛ amumɔŋ hewalɛnamɔ he lɛ, ehe baahia ni obu amɛhe kɛjɛ je nɛŋ “kɔɔyɔɔ” ni ebɔɔ yɔɔ mli ni afɛ̃ɔ ashwieɔ kɛjɛɔ televishin adekai anɔ yɛ be fɛɛ mli lɛ ahe.—Abɛi 13:20.
10. Mɛɛ “kɔɔyɔɔ” ni ebɔɔ yɔɔ mli jɛɛhei krokomɛi feɔ oshara kɛhaa gbekɛbii, ni mɛɛ Biblia mli nɔkwɛmɔ nɔ feɔ enɛ he mfoniri?
10 Shi “kɔɔyɔɔ” ni ebɔɔ yɔɔ mli nɛɛ jɛɛhei krokomɛi yɛ ni baanyɛ afite jeŋba kpakpa ni ebaanyɛ eha jwɛŋmɔi ni darako lɛ akpiliŋ. Naanyobɔɔ ni esaaa ni akɛ gbekɛbii ni yɔɔ akutsoŋ he ni ayɔɔ lɛ kɛ skul aaabɔ lɛ baanyɛ aha Biblia mli anɔkwalei ni atɛo yɛ gbekɛbii atsui mli lɛ anɔ. (1 Korintobii 15:33) Abaanyɛ akase nɔ ko kɛjɛ Yakob biyoo Dina, ni “je kpo etee shikpɔŋ lɛ nɔ biyei lɛ akwɛmɔ” ni yɛ no hewɔ lɛ, obalahii lɛ ateŋ mɔ ko kɛ lɛ wɔ ni efite lɛ lɛ he sane lɛ mli. (1 Mose 34:1, 2) Ehe miihia ni akɛ famɔ kɛ tsɔsemɔ ni sa aha gbekɛbii lɛ koni amɛkɛjo jeŋ ni eba shi kwraa ŋmɛnɛ fe bɔ ni eji yɛ blema lɛ jeŋba shara tsɔnei lɛ anaa foi.
Mɛni Hewɔ Esa Akɛ Atsɔse lɛ Kɛjɛ Gbekɛbiiashi?
11. (a) Mɛɛ be mli esa akɛ fɔlɔi atsɔsemɔ aje shishi? (b) Mɛɛ nɔ kpakpa ni baajɛ mli aba abaanyɛ akpa gbɛ?
11 Shi mɛɛ be esa akɛ fɔlɔi aje amɛtsɔsemɔ shishi? Biblia lɛ kɛɔ akɛ Timoteo nine shɛ tsɔsemɔ lɛ nɔ “kɛjɛ gbekɛbiiashi.” (2 Timoteo 3:15) Nɔ ni yɔɔ miishɛɛ lɛ, Hela wiemɔ bre’phos ni akɛtsu nii yɛ biɛ lɛ ji wiemɔ ni afɔɔ kɛ nitsumɔ akɛhaa gbekɛ ni afɔko lɛ taakɛ eji yɛ Luka 1:41, 44 lɛ. Jɛmɛ ji he ni awie yɛ akɛ gbekɛ ni ji Yohane lɛ huru yɛ enyɛ musuŋ. Shi akɛ bre’phos lɛ hu tsuɔ nii ahaa Israel abifabii ni afɔ amɛ ehee ni awo amɛwala he gbeyei yɛ Mizraim yɛ be mli ni afɔ Mose lɛ. (Bɔfoi lɛ Asaji 7:19, 20) Yɛ Timoteo gbɛfaŋ lɛ, sane lɛ kɔɔ abifao loo fufɔoo he yɛ faŋŋ mli, shi jeee gbekɛ fioo he. Timoteo nine shɛ tsɔsemɔ nɔ kɛjɛ ŋmalɛi krɔŋkrɔŋi lɛ amli kɛjɛ shishijee bɔni ejwɛŋmɔ aaaŋmɛ lɛ gbɛ ni emɔ mli, kɛjɛ be mli ni eji abifao. Ni mɛɛ nɔ kpakpa po jɛ mli ba nɛkɛ! (Filipibii 2:19-22) Ni kɛlɛ, ani nitsɔɔmɔ yɛ mra be mli nɛkɛ lɛ he aaanyɛ aba sɛɛnamɔ diɛŋtsɛ aha abifabii ni afɔ amɛ ehee lɛ?
12. (a) Mɛɛ be mli abifabii baanyɛ aje shishi akase nii? (b) Mɛɛ be mli ni yɛ mɛɛ gbɛ nɔ esa akɛ fɔlɔi aje shishi ni amɛkɛ mumɔŋ tsɔsemɔ aha amɛbii lɛ?
12 Dr. Edward Zigler, nilelɔ yɛ Yale University lɛ bɔ amaniɛ yɛ 1984 akɛ: “Nibii ni yɔɔ naakpɛɛ kɛ miishɛɛ fɛɛ yɛ jwɛŋmɔ lɛ he nikasemɔ mli lɛ ateŋ ekome ji wɔshishinumɔ hee ni wɔna yɛ nyɛmɔ kpele ni abifao yɔɔ ni ekɛaakase nii lɛ.” Yɛ anɔkwale mli lɛ, wolo tɛtrɛɛ Health lɛ kɛɔ akɛ: “Abifabii ni yɔɔ musuŋ lolo lɛ baanyɛ ana nii, anu nii, amɛkɛ nii asa amɛnaa—ni ‘amɛnu’ henumɔi ahe, taakɛ sanemlipɛimɔ heei lɛ tsɔɔ lɛ.” Eka shi faŋŋ akɛ anyɛŋ akɛɛ akɛ fɔlɔi eje amɛbii atsɔsemɔ shishi mra tsɔ. (5 Mose 31:12) Amɛbaanyɛ amɛje shishi kɛtsɔ mfonirii ni yɔɔ woji amli ni amɛaatsɔɔ amɛ kɛ saji ni amɛkɛamɛ aaagba lɛ nɔ. Masaru Ibuka, mɔ ni ŋma wolo ni egbɛi ji Kindergarten Is Too Late lɛ kɛɛ akɛ: “Afii ni he hiaa waa lɛ ji kɛjɛ fɔmɔ mli kɛyashi afii etɛ.” Nɔ hewɔ lɛ ji akɛ abaanyɛ atɛo nii awo jwɛŋmɔ ni edako lɛ mli titri, ebaanyɛ emɔ adafitswaa mli yɛ gbɛ ni waaa nɔ, taakɛ ejeɔ kpo yɛ bɔ ni gbekɛbii nuɔ wiemɔi heei mramra lɛ. Nilelɔ ko ni kaseɔ gbekɛbii atsɔsemɔ yɛ mra be mli he nii yɛ New York University lɛ po kɛɛ akɛ “esa akɛ fɔlɔi aje shishi atsɔɔ amɛbii gbɛ ni atsɔɔ nɔ akaneɔ nii kɛ amɛkɛ amɛjɛ helatsamɔ he lɛ kɛba shia pɛ”!
13. Mɛni feɔ nyɛmɔ ni abifabii yɔɔ ni amɛkɛaakase nii lɛ he nɔkwɛmɔ nɔ?
13 Nyɛ ko ni jɛ Kanada ŋma yɛ nyɛmɔ ni ebi lɛ yɔɔ ni ekɛkaseɔ nii lɛ he akɛ: “Be ko lɛ miikane sane ko kɛmiijɛ My Book of Bible Stories lɛ mli kɛmiitsɔɔ mibi nuu, Shaun, ni eye afii ejwɛ kɛ fa lɛ. Beni miwa fioo yɛ heko lɛ, minaa kpɛ mihe beni mina akɛ eje shishi eekane wolo lɛ pɛpɛɛpɛ, taakɛ ejeɔ kpo yɛ Bible Stories wolo lɛ mli lɛ. . . . Mika ekroko kanemɔ kɛ ekroko hu, ni ekase fɛɛ eko ewo eyitsoŋ. . . . Ekase saji 33 lɛ fɛɛ ewo eyitsoŋ kɛ hei kɛ gbɔmɛi agbɛi ni wawai lɛ po.” Jeeŋmɔ beebe dani eeenyɛ ekane lɛ, no mli lɛ ekase nakai saji lɛ momo kɛtsɔ nɔ ni yɔɔ wolo lɛ mli lɛ ni amɔmɔ awo kpaa nɔ ni etswaa eboɔ toi lɛ nɔ.
14. (a) Namɛi nɔ ni abifabii nyɛɔ tsuɔ lɛ efeee amɛ naakpɛɛ lɛ? (b) Mɛni ji nɔ ni esa akɛ efee oti ni ma fɔlɔi ni ji Kristofoi ahiɛ? (d) Esa akɛ asaa gbekɛbii aha mɛni, ni mɛni hewɔ?
14 Mɛi ni le bɔ ni abifabii nyɛɔ amɛkaseɔ nii jogbaŋŋ lɛ anaa ekpɛɛɛ amɛhe tsɔ yɛ mɔdɛŋbɔi nɛɛ amli. Dr. Glenn Doman, onukpa ni kwɛɔ The Institutes for the Achievement of Haman Potential lɛ nɔ lɛ kɛɛ akɛ: “Je lɛ baanyɛ ayi obɔ kɛ nilelɔi kpanakpanaai tamɔ Einstein, Shakespeare, Beethoven kɛ Leonardo da Vinci kɛ wɔtsɔɔ fufɔoobii anii moŋ fe gbekɛbii.” Shi oti ni ma fɔlɔi ni ji Kristofoi ahiɛ lɛ jeee ni amɛna nilelɔi kpanakpanaai, shi moŋ ni amɛnine ashɛ amɛbii lɛ atsui nɔ bɔni afee ni gbekɛbii lɛ akakpalaŋ kɛmiijɛ Nyɔŋmɔ sɔɔmɔ he. (Abɛi 22:6) Esa akɛ mɔdɛŋbɔi nɛɛ aje shishi dani gbekɛ lɛ aje skul shishi, bɔni afee ni no asaa lɛ aha kaai ni ekɛbaakpe yɛ jɛmɛ lɛ. Akɛ nɔkwɛmɔ nɔ lɛ, Kindergarten aloo gbekɛbii akwɛmɔ daa gbi he gbɛjianɔtoi lɛ mli fai komɛi ji fɔmɔgbi kɛ gbijuji ayeli he okpɔlɔŋmɛɛ ni akɛjieɔ gbekɛbii lɛ ahiɛtserɛ lɛ. No hewɔ lɛ ehe miihia ni gbekɛ lɛ anu nɔ hewɔ ni Yehowa tsuji kɛ amɛhe wooo enɛ mli lɛ shishi. Kɛjeee nakai lɛ ebaada akɛ mɔ ni nyɛɔ efɔlɔi ajamɔ lɛ.
Bɔ Ni Ooofee ni Onine Ashe Gbekɛ lɛ Tsui Nɔ
15, 16. Mɛni ji nɔ ni fɔlɔi baanyɛ amɛkɛtsu nii ni eye ebua amɛ ni amɛnine ashɛ amɛbi lɛ tsui nɔ, ni mɛɛ gbɛ nɔ amɛbaatsɔ ni amɛkɛ enɛɛmɛi atsu nii yɛ gbɛ ni mɔɔ shi nɔ?
15 Bɔni afee ni aye abua fɔlɔi ni amɛnine ashɛ gbekɛ lɛ tsui nɔ lɛ, woji tamɔ Tsɔɔlɔ Kpele lɛ Toiboo lɛ nɛkɛ ni Yehowa Odasefoi lɛ kɛhaa lɛ yɛ. Nɛkɛ wolo nɛɛ wieɔ okpɔlɔŋmɛɛ kɛ “bɔ ni aaana miishɛɛ babaoo yɛ shishi” lɛ he yɛ eyitso ni ji “Hii Enyɔ ni ye Fɔmɔgbii lɛ” mli. Ni kɛlɛ yitso lɛ tsɔɔ mli akɛ fɔmɔgbii enyɔ pɛ he okpɔlɔŋmɛɛ ni atsi ta yɛ Biblia lɛ mli lɛ ji nɔ ni wɔŋjalɔi ni jaaa Yehowa lɛ ye, ni yɛ okpɔlɔŋmɛɛ nɛɛ eko fɛɛ eko shishi lɛ, ‘afo mɔ ko yitso.’ (Marko 6:17-29; 1 Mose 40:20-22) Te ooofee tɛŋŋ okɛ nɛkɛ sane nɛɛ atsu nii ni onine ashɛ obi lɛ tsui nɔ?
16 Obaanyɛ okɛ gbɛ ni Tsɔɔlɔ Kpele wolo lɛ kɛɔ ni ŋɔɔ lɛ atsu nii: “Agbɛnɛ, wɔle akɛ nɔ fɛɛ nɔ ni yɔɔ Biblia lɛ mli lɛ yɛ jɛmɛ yɛ yiŋtoo ko hewɔ.” Ni obi akɛ: “No hewɔ lɛ, mɛni ji nɔ ni obaakɛɛ akɛ Nyɔŋmɔ miikɛɛ wɔ yɛ fɔmɔgbii ayeli he?” Enɛ yeɔ buaa obi lɛ koni ejwɛŋ sane lɛ he ni emu sane naa yɛ gbɛ ni ja nɔ. Yɛ Tsɔɔlɔ Kpele wolo lɛ sɛɛ lɛ, afee woji komɛi aha fɔlɔi, ni nɔ ni fata he ji My Book of Bible Stories lɛ kɛ “Yesu Shihilɛ kɛ Esɔɔmɔ Nitsumɔ” ni jeɔ kpo yɛ Buu-Mɔɔ lɛ ekomɛi amli kɛjɛ April 1985 lɛ. Ani okɛ nɛkɛ saji nɛɛ miitsu nii kɛmiitsɔɔ obii lɛ anii kɛ bo diɛŋtsɛ hu?
17. Mɛɛ ŋaawoi ni anyɛɔ atsuɔ he nii akɛhaa fɔlɔi yɛ biɛ?
17 Yɛ obi lɛ gbɛfaŋ lɛ, ehe miihia ni okɛ lɛ ati saji kɛ shihilɛi ni ekɛbaakpe yɛ skul lɛ mli shii abɔ. Ha obi lɛ ale akɛ bo kɛ lɛ fɛɛ baabu nyɛhe akɔntaa nyɛha Yehowa. (Romabii 14:12) Maa nibii kpakpai ni Yehowa feɔ kɛhaa wɔ lɛ nɔ mi, koni etsirɛ gbekɛ lɛ tsui bibioo lɛ ni esumɔ akɛ eeesa Yehowa hiɛ. (Bɔfoi lɛ Asaji 14:17) Ha nikasemɔ be lɛ afee miishɛɛ be. Gbekɛbii sumɔɔ ni agba amɛ saji, no hewɔ lɛ tsu nilee ni okɛhaa nɛɛ he nii yɛ miishɛɛ gbɛ nɔ koni eshɛ obi lɛ tsui mli. Wekui pii lajeɔ hegbɛ fɛfɛo nɛɛ yɛ nɛkɛ bei nɛɛ amli akɛni amɛyeee nii kutuu yɛ he kome yɛ be fɛɛ mli lɛ hewɔ. Ani nyɛyeɔ nii kutuu akɛ weku? Kɛ jeee nakai lɛ, ani obaanyɛ osaa shihilɛ lɛ?—Okɛto Bɔfoi lɛ Asaji 2:42, 46, 47 he.
18, 19. (a) Te esa akɛ fɔlɔi ato be ni amɛkɛtsɔɔ amɛbii lɛ anii lɛ ahe gbɛjianɔ amɛha tɛŋŋ, ni mɛni nyɛŋ afee nɔ ni ama nɔ nii tsɔ? (b) Mɛɛ ŋmɛnɛŋmɛnɛ beaŋ fɔlɔi atsɔsemɔ he nɔkwɛmɔ nɔ ko lɛ mli fa ko esa ohiɛ, ni mɛni ji nɔ ni oheɔ oyeɔ akɛ ebaajɛ mli aba kɛ fɔlɔ ko kɛtsu nii?
18 Esa akɛ akudɔ nikasemɔ be lɛ koni ekɛ afiii ni gbekɛ lɛ eye lɛ aye egbɔ. No hewɔ lɛ, yɛ abifao ni nyɛɛɛ ekɛ ejwɛŋmɔ ama nɔ ko nɔ yɛ be kakadaŋŋ mli lɛ gbɛfaŋ lɛ, ha nikasemɔ lɛ afee kukuji daa gbi. Kɛkɛ lɛ ha amɛkɛlɛ fiofio ni oha emli saji lɛ hu afa. Bɔ ni ehe hiaa akɛ aaatsɔɔ gbekɛbii lɛ anii yɛ bei kɛ bei amli daa lɛ nyɛŋ afee nɔ ni ama nɔ mi tsɔ. (1 Mose 18:19; 5 Mose 11:18-21) Tsɛ ko ni amrɔ nɛɛ eye kɛjɛ afii nyɔŋmai kpawo kɛyaa lɛ to okadi kpakpa yɛ ebinuu ko ni amrɔ nɛɛ eji Kristofonyo onukpa lɛ tsɔsemɔ mli. Afii pii nɛ ni etsɔɔ bɔ ni efeɔ lɛ lɛ mli akɛ:
19 “Beni wɔbi nuu lɛ eye aaafee afi kome lɛ ni mije shishi migba lɛ Biblia mli saji kɛ ebaawɔ, ni migbaa lɛ yɛ gbɛ ni ŋɔɔ enaa koni eka ejwɛŋmɔ mli lɛ nɔ. Beni ebɔi wiemɔ beni ena afii enyɔ lɛ, wɔkulaa shi yɛ esaatso lɛ masɛi ni mihaa ekɛɔ ‘Nuŋtsɔ lɛ sɔlemɔ lɛ’ kɛnyiɛɔ misɛɛ. . . . Beni ena afii etɛ lɛ kɛkɛ ni mije shishi ni mikɛ lɛ bɔi daa Biblia kasemɔ. Ekwɛɔ lɛ diɛŋtsɛ ewolo lɛ mli, ni etsɛɔ wiemɔi lɛ kɛnyiɛɔ misɛɛ. Kɛkɛ ni enyɛ etsɛ wiemɔi lɛ jogbaŋŋ ni etsɛ wiemɔi ni dara lɛ po yɛ gbɛ ni mli ka shi nɔ. Bɔni afee ni maye mabua lɛ ni Biblia mli anɔkwalei abote etsui mli vii lɛ, beni eye afii etɛ lɛ, kɛkɛ ni wɔje shishi wɔha ebɔi Biblia mli ŋmalɛi akasemɔ yɛ eyitsoŋ. Beni eboteɔ Kindergarten akɛ eyaaje skul shishi lɛ, no mli lɛ ele ŋmalɛi aaafee nyɔŋmai etɛ, ni yɛ nyɛsɛɛ afi ni ji September mli beni eje eklɛŋklɛŋ maaŋoo lɛ shishi lɛ no mli lɛ ekase ŋmalɛi nyɔŋmai kpawo ewo eyitsoŋ. . . . Kɛ wɔbinuu lɛ baawɔ lɛ, mihaa etiɔ eŋmalɛi lɛ ekomɛi amli. Nakai nɔŋŋ hu kɛji ete shi leebi lɛ, etiɔ Biblia mli ŋmalɛi fioo komɛi amli akɛ eleebi ŋamɔ lɛ fa.”
20. Mɛni esa akɛ akɛfata nitsɔɔmɔ he gbɛjianɔtoo lɛ he, ni te gbekɛ ko aaafee tɛŋŋ ana shia-kɛ-shia sɔɔmɔ nitsumɔ lɛ mli gbɛfaŋ nɔ?
20 Nitsɔɔmɔ he gbɛjianɔ ni yaa nɔ fiofio, ni fɔlɔi anɔkwɛmɔ nɔ kpakpa fata he kɛ tsɔsemɔ ni sa lɛ kɛ shihilɛ shishijee ni baaha edao shi kɛya naanɔ lɛ baaha obi lɛ. (Abɛi 22:15; 23:13, 14) Esa akɛ gbɛjianɔtoo lɛ fa afee tsɔsemɔ yɛ maŋ sɔɔmɔ nitsumɔ lɛ mli kɛjɛ mra be mli. Ha efee niiashikpamɔ ko ni miishɛɛ yɔɔ mli akɛ ooosaa obi lɛ koni ekɛ ehe awo mli yɛ gbɛ ni shishinumɔ yɔɔ mli nɔ. Tsɛ ni atsi eta yɛ yiteŋgbɛ nɛɛ wie ekoŋŋ yɛ ebinuu lɛ he akɛ: “Nyɛmɔ ni eyɔɔ ni ekɛtsɛɔ ŋmalɛi lɛ ha efee mɔ ni he esa jogbaŋŋ yɛ shia-kɛ-shia sɔɔmɔ lɛ mli, ejaakɛ shiatsɛmɛi pii anaa kpɛ amɛhe ni amɛnyɛɛɛ amɛkpoo woji tɛtrɛbii ni akɛkaseɔ Biblia lɛ ni ekɛhaa amɛ lɛ. Ekɛ ehe wo Kristofoi asɔɔmɔ nɛɛ mli be mli ni eye afii etɛ, ni amrɔ nɛɛ [eye afii 6] ebɔɔ mɔdɛŋ waa yɛ woji ni akɛkaseɔ Biblia lɛ kɛhamɔ mli fe mi kɛ miŋa.”—Awake!, January 22, 1965, baafai 3-4.
21. (a) Mɛni ji nikeenii ni hi fe fɛɛ ni fɔlɔi baanyɛ ashi aha amɛbii? (b) Mɛɛ ŋaa awoɔ fɔlɔi, ni mɛni esa akɛ fɔlɔi fɛɛ ni yɔɔ bii bibii lɛ ana ni amɛhiɛ efeemɔ mli?
21 Yɛ anɔkwale mli lɛ, fɔlɔi ni ji Kristofoi lɛ yɛ gboshinii ko ni yɔɔ naakpɛɛ, Yehowa he nilee ni amɛaashi amɛha amɛbii kɛ naanɔ wala, toiŋjɔlɛ, kɛ miishɛɛ yɛ anunyam jeŋ hee ko mli gbɛkpamɔ. (Abɛi 3:1-6, 13-18; 13:22) Yɛ fɛɛ sɛɛ lɛ, tswaa hekɛnɔfɔɔ yɛ nakai wɔsɛɛ be gbɛkpamɔ ni ji anɔkwale lɛ yɛ obii bibii lɛ atsuii amli, kɛ suɔmɔ ni amɛaana akɛ amɛaasɔmɔ Yehowa. Ha anɔkwale jamɔ afee miishɛɛ niiashikpamɔ ni yɔɔ diɛŋtsɛ kɛha amɛ. (1 Timoteo 1:11) Tɛomɔ Yehowa mli hekɛnɔfɔɔ yɛ amɛmli kɛjɛ gbekɛbiiashi. Ni kaaku ohiɛ oshwie daa nikasemɔ ni okɛamɛ aaafee lɛ nɔ kɔkɔɔkɔ, dabi, kɔkɔɔkɔ! Ha enɛɛmɛi afee nɔ ni he hiaa bo fe fɛɛ, ni oya nɔ opɛi saji ni he hiaa obii lɛ amli yɛ be fɛɛ mli kɛ gbɛ ni hi fe fɛɛ ni oootsɔ nɔ ni onine ashɛ amɛtsui nɔ. Obɛ deka ni nɔnyɛɛ ka onɔ; Satan kɛ je lɛ kwɛɔ koni ebalɛ nakai. Shi kaimɔ Yesu nɔkwɛmɔ nɔ lɛ! Okafee mɔ ni bɛ deka tsɔ akɛ okɛ obii lɛ aaakase nii daa!a
[Shishigbɛ niŋmai]
a Ajie kɛjɛ August 1, 1988 Watchtower lɛ mli.
Te Obaaha Hetoo Oha Tɛŋŋ?
□ Mɛɛ Biblia mli odaseyeli tsɔɔ akɛ esa akɛ fɔlɔi aha amɛbii lɛ ahiamɔnii afee nɔ ni he hiaa amɛ fe fɛɛ?
□ Mɛni hewɔ fɔlɔi amɔdɛŋbɔɔ krɛdɛɛ he hiaa bianɛ ni amɛkɛbu amɛbii lɛ ahe lɛ?
□ Mɛni hewɔ ehe hiaa waa akɛ aaatsɔse gbekɛbii kɛaajɛ amɛ gbekɛbiiashi lɛ?
□ Mɛni ji ŋaawoi ni anyɛɔ atsuɔ he nii ni fɔlɔi baanyɛ atsɔ nɔ ni amɛnine ashɛ amɛbi lɛ tsui nɔ?
□ Mɛni ji nɔni esaaa akɛ fɔlɔi ni ji Kristofoi kuɔ amɛhiɛ amɛshwie nɔ kɔkɔɔkɔ lɛ?
[Mfoniri ni yɔɔ baafa 21]
Tsɔsemɔ ni fɔlɔi kɛaaba Iɛ nyɛŋ afee nɔ ni aje shishi mra tsɔ