Yehowa Weku Naa Ekomefeemɔ Ni Jara Wa Mli Ŋɔɔmɔ
“Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ!”—LALA 133:1.
1. Mɛɛ shihilɛ mli wekui pii yɔɔ ŋmɛnɛ?
WEKU lɛ yɛ haomɔ mli ŋmɛnɛ. Gbalashihilɛ tsakpaai miihe atse yɛ wekui pii amli. Gbalamlitsemɔ miifa babaoo kɛmiiya hiɛ, ni gbekɛbii pii ni amɛ fɔlɔi etse gbala mli lɛ miiye awerɛho babaoo. Wekui akpekpei abɔ bɛ miishɛɛ ni ekomefeemɔ bɛ amɛteŋ. Ni kɛlɛ, weku kome ko yɛ ni naa anɔkwa miishɛɛ kɛ ekomefeemɔ diɛŋtsɛ. No ji Yehowa Nyɔŋmɔ jeŋ muu fɛɛ weku lɛ. Emli ni ŋwɛibɔfoi akpekpei toi akpei abɔ tsuɔ amɛ nii, yɛ ŋwɛi suɔmɔnaa nifeemɔ kɛ gbeekpamɔ naa yɛ. (Lala 103:20, 21) Shi, ani weku ko yɛ shikpɔŋ nɔ ni naa ekomefeemɔ ni tamɔ nɛkɛ mli ŋɔɔmɔ?
2, 3. (a) Namɛi ebafee Nyɔŋmɔ jeŋ muu fɛɛ weku lɛ fa bianɛ, ni wɔbaanyɛ wɔkɛ Yehowa Odasefoi fɛɛ ato mɛni he ŋmɛnɛ? (b) Mɛɛ sanebimɔi wɔbaasusu he?
2 Bɔfo Paulo ŋma akɛ: “Midɔrɔɔ minakutsei mihaa Tsɛ lɛ, mɔ ni weku fɛɛ weku ni yɔɔ ŋwɛi kɛ shikpɔŋ lɛ nɔ lɛ ná egbɛi kɛjɛ eŋɔɔ lɛ.” (Efesobii 3:14, 15, NW) Wekukpaa fɛɛ wekukpaa ni yɔɔ shikpɔŋ nɔ lɛ ná egbɛi kɛjɛ Nyɔŋmɔ ŋɔɔ, ejaakɛ lɛ ji Bɔlɔ lɛ. Eyɛ mli akɛ adesa wekui bɛ ŋwɛi moŋ, shi kɛ aaawie yɛ okadi gbɛ nɔ lɛ, Nyɔŋmɔ kɛ eŋwɛi gbɛjianɔtoo lɛ ebote gbalashihilɛ mli, ni Yesu baaná mumɔŋ,ayemforo ni kɛ lɛ baafee ekome yɛ ŋwɛi. (Yesaia 54:5; Luka 20: 34, 35; 1 Korintobii 15:50; 2 Korintobii 11:2) Anɔkwafoi ni afɔ amɛ mũ ni yɔɔ shikpɔŋ nɔ lɛ ebafee Nyɔŋmɔ jeŋ muu fɛɛ weku lɛ fã bianɛ, ni Yesu “tooi krokomɛi” lɛ ni yɔɔ shikpɔŋ nɔ hiɛnɔkamɔi lɛ ji mɛi ni akpaa gbɛ akɛ amɛbaafee emli bii. (Yohane 10:16; Romabii 8:14-17; Buu-Mɔɔ, January 15, 1996, baafa 31) Shi, abaanyɛ akɛ Yehowa Odasefoi fɛɛ ni yɔɔ ŋmɛnɛ lɛ ato jeŋ muu fɛɛ weku ni efee ekome he.
3 Ani ofata Nyɔŋmɔ tsuji amajimaji ateŋ weku ni yɔɔ naakpɛɛ lɛ he? Kɛ nakai oji lɛ, belɛ onaa jɔɔmɔi ni fe fɛɛ ni mɔ ko baanyɛ ana lɛ mli ŋɔɔmɔ. Gbɔmɛi akpekpei abɔ baanyɛ aye odase akɛ, Yehowa jeŋ muu fɛɛ weku—egbɛjianɔtoo ni anaa lɛ ji toiŋjɔlɛ kɛ ekomefeemɔ shihilɛ he ni yɔɔ frɔ̃frɔ̃, yɛ béi kɛ mligbalamɔ shiaŋa je lɛ mli. Mɛɛ gbɛ nɔ aaatsɔ atsɔɔ Yehowa jeŋ muu fɛɛ weku lɛ ekomefeemɔ lɛ mli aha? Ni mɛɛ nibii haa ekomefeemɔ ni tamɔ nɛkɛ yaa nɔ?
Kwɛ Bɔ ni Ehi kɛ Bɔ ni Eyɔɔ Fɛo!
4. Mɛɛ gbɛ nɔ obaatsɔ otsɔɔ nɔ ni Lala 133 kɛɔ yɛ nyɛmimɛi a-ekomefeemɔ he lɛ mli yɛ bo diɛŋtsɛ owiemɔ mli?
4 Lalatsɛ David hiɛ sɔ nyɛmimɛi ateŋ ekomefeemɔ waa. Akɛ mumɔ kanya lɛ po, koni elá yɛ enɛ he! Susumɔ bɔ ni ehiɛ ekpãa saŋku ni elaa lɛ he okwɛ: “Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ! Tamɔ mũ kpakpa ni yɔɔ yiteŋ, ni tsereɔ shwieɔ tsɛŋ mli, ni ji Aaron tsɛŋ lɛ, ekpelekeɔ shi kɛba shwieɔ etade yuu lɛ naamuu lɛ nɔ; etamɔ Hermon bɔ́ ni nyɔ̃ɔ Zion gɔji lɛ anɔ lɛ. Ejaakɛ Yehowa ewo jɔɔmɔ kɛ wala shi eha jɛi kɛyashi naanɔ.”—Lala 133:1-3.
5. Yɛ nɔ ni Lala 133:1, 2 kɛɔ lɛ hewɔ lɛ, abaanyɛ akɛ Israelbii lɛ ato Nyɔŋmɔ tsuji ni yɔɔ ŋmɛnɛ lɛ ahe yɛ mɛɛ gbɛ nɔ?
5 Nakai wiemɔi lɛ kɔɔ nyɛmimɛi a-ekomefeemɔ ni Nyɔŋmɔ blema webii, ni ji lsraelbii lɛ naa mli ŋɔɔmɔ lɛ he. Amɛhiɔ shi yɛ ekomefeemɔ mli kɛ amɛba Yerusalem kɛha amɛ daa afi gbijuji etɛ lɛ yeli. Eyɛ mli akɛ amɛjɛ akutsei sɔrɔtoi amli kɛba moŋ, shi amɛji weku kome. He kome ni amɛhiɔ kutuu lɛ naa amɛnɔ hewalɛ kpakpa, tamɔ mũ kpakpa ni akɛfɔɔ mɔ, ni jeɔ ŋma ni ŋɔɔ. Beni afɔse mũ ni tamɔ nɛkɛ ashwie Aaron yiteŋ lɛ, etsere kɛtsɔ etsɛŋ mli aahu kɛbashi etade lɛ naamuu lɛ nɔ. Kɛha lsraelbii lɛ, amɛ kutuu shihilɛ lɛ na amɛnɔ hewalɛ kpakpa ni enɛ bote gbɔmɛi asafo ni amɛkpɛ lɛ fɛɛ mli. Asaa béi, ni ekomefeemɔ shwere. Ekomefeemɔ ni tamɔ nakai yɛ Yehowa jeŋ muu fɛɛ weku lɛ mli ŋmɛnɛ. Emli bii lɛ ni kɛ amɛhe kpeɔ be fɛɛ be lɛ naa amɛnɔ hewalɛ kpakpa yɛ mumɔŋ. Ajieɔ shishinumɔ ni ejaaa kɛ naagbai kɛyaa, yɛ be mli ni akɛ Nyɔŋmɔ Wiemɔ lɛ mli ŋaawoo lɛ tsuɔ nii lɛ. (Mateo 5:23, 24; 18:15-17) Yehowa webii ahiɛ sɔɔ hewalɛwoo ni amɛ fɛɛ amɛnaa ni jɛɔ amɛ nyɛmimɛi a-ekomefeemɔ lɛ mli baa lɛ waa.
6, 7. Israel ekomefeemɔ tamɔ Hermon Gɔŋ lɛ nɔ bɔ́ yɛ mɛɛ gbɛ nɔ, ni nɛgbɛ abaana Nyɔŋmɔ jɔɔmɔ yɛ ŋmɛnɛ?
6 Te ekomefeemɔ ni Israel hiɔ shi yɛ mli lɛ hu tamɔ Hermon Gɔŋ lɛ nɔ bɔ́ hu ha tɛŋŋ? Ojogbaŋŋ, akɛni nɛkɛ gɔŋ nɛɛ kwɔ fe mitai 2,800 fe ŋshɔ ŋɛlɛ nɔ hewɔ lɛ, snoo haa nɔ afi muu fɛɛ. Hermon yiteŋ snoo lɛ haa gbɛkɛ afua lɛ sereɔ ni ehãa bɔ́ fɔɔ shikpɔŋ lɛ, ni ebaa kwɛ̃ɛnii lɛ ayi yɛ hulutsoo be kakadaŋŋ lɛ mli. Kɔɔyɔɔ ni tswaa ŋanii kɛjɛɔ Hermon gɔji lɛ anɔ lɛ baanyɛ atswa afua ni tamɔ nɛkɛ lɛ kɛya wuoyigbɛ shɔŋŋ yɛ he ni Yerusalem yɔɔ lɛ, ni amɛsereɔ yɛ jɛmɛ tamɔ bɔ nɛɔ. No hewɔ lɛ, lalatsɛ lɛ wie ‘Hermon bɔ ni nɛɔ yɛ Zion Gɔji lɛ anɔ’ lɛ he yɛ gbɛ ni ja nɔ. Mɛɛ hewalɛ ni shɛjeɔ mɔ mii, ni haa ekomefeemɔ shwereɔ yɛ Yehowa jalɔi aweku lɛ mli lɛ he kaimɔ fɛfɛo po nɛ!
7 Dani aaato Kristofoi asafo lɛ shishi lɛ, no mli lɛ Zion, loo Yerusalem, ji anɔkwa jamɔ shikwɛ̃ɛ he. No hewɔ lɛ, jɛmɛ Nyɔŋmɔ fã yɛ akɛ jɔɔmɔ lɛ ahi. Akɛni jɔɔmɔi fɛɛ Jɛɛhe lɛ yɛ sɔlemɔwe ni yɔɔ Yerusalem lɛ, yɛ okadi gbɛ nɔ hewɔ lɛ, jɛmɛ jɔɔmɔi baafã kpo kɛaajɛ. Akɛni anɔkwa jamɔ bɛ he kome pɔtɛɛ ko dɔŋŋ hewɔ lɛ, abaana Nyɔŋmɔ tsuji ajɔɔmɔ, suɔmɔ, kɛ ekomefeemɔ lɛ yɛ shikpɔŋ muu lɛ fɛɛ nɔ ŋmɛnɛ. (Yohane 13:34, 35) Mɛni ji nibii komɛi ni haa ekomefeemɔ nɛɛ shwereɔ lɛ?
Nibii ni Haa Ekomefeemɔ Shwereɔ
8. Mɛni wɔkaseɔ yɛ ekomefeemɔ he yɛ Yohane 17: 20, 21?
8 Ekomefeemɔ ni yɔɔ Yehowa jalɔi ateŋ lɛ damɔ toiboo ni amɛfeɔ amɛhaa Nyɔŋmɔ Wiemɔ lɛ ni amɛnu shishi jogbaŋŋ, ni Yesu Kristo tsɔɔmɔi fata he lɛ nɔ. Akɛni Yehowa tsu e-Bi lɛ kɛbaje lɛŋ, koni ebaye anɔkwale lɛ he odase, ni ebagbo afɔleshãa gbele hewɔ lɛ, agbele gbɛ kɛha Kristofoi asafo ni efee ekome lɛ shishitoo. (Yohane 3:16; 18:37) Akɛ enɛ baafee ekomefeemɔ diɛŋtsɛ ni yɔɔ emli bii lɛ ateŋ lɛ, afee enɛ faŋŋ beni Yesu sɔle lɛ: “Shi jeee mɛnɛɛmɛi ahewɔ kɛkɛ mibiɔ lɛ, shi mɛi ni baahe minɔ aye yɛ amɛ wiemɔ naa lɛ hu ahewɔŋ; koni amɛ fɛɛ amɛfee ekome, taakɛ bɔ ni bo, Ataa, oyɔɔ mimli, ni mi hu miyɔɔ omli lɛ, koni amɛ hu amɛfee ekome yɛ wɔmli, koni je lɛ ahe aye akɛ bo otsu mi.” (Yohane 17:20, 21) Yesu sɛɛnyiɛlɔi lɛ anine shɛ ekomefeemɔ ni tamɔ nɔ ni ka Nyɔŋmɔ kɛ e-Bi lɛ teŋ lɛ nɔ. Enɛ ba lɛ nakai, ejaakɛ amɛye Nyɔŋmɔ Wiemɔ lɛ kɛ Yesu tsɔɔmɔi lɛ anɔ. Nakai su lɛ nɔŋŋ ji nɔ̃ titri ni yɔɔ Yehowa jeŋ muu fɛɛ weku ekomefeemɔ lɛ mli ŋmɛnɛ.
9. Mɛni mumɔ krɔŋkrɔŋ lɛ tsuɔ yɛ ekomefeemɔ ni yɔɔ Yehowa webii ateŋ ŋmɛnɛ lɛ he?
9 Nɔ kroko hu ni feɔ Yehowa webii ekome ji akɛ, wɔyɛ Nyɔŋmɔ mumɔ krɔŋkrɔŋ, loo enifeemɔ hewalɛ lɛ. Ehaa wɔnyɛɔ wɔnuɔ Yehowa Wiemɔ lɛ mli anɔkwale ni ajie lɛ kpo lɛ shishi,ni ehaa wɔsɔmɔɔ lɛ yɛ ekomefeemɔ mli. (Yohane 16:12, 13) Mumɔ lɛ yeɔ ebuaa wɔ ni wɔtsiɔ wɔhe kɛjɛɔ heloo lɛ nitsumɔi tamɔ béi, awuŋayelii, mlilawoi, kɛ ŋwanejeei ni haaa afee ekome lɛ ahe. Yɛ no najiaŋ lɛ, Nyɔŋmɔ mumɔ lɛ haa wɔwoɔ ekomefeemɔ yibii ni ji suɔmɔ, miishɛɛ, toiŋjɔlɛ, tsuishiŋmɛɛ, mlihilɛ, ejurɔfeemɔ, hemɔkɛyeli, mlijɔlɛ, kɛ henɔyeli.—Galatabii 5:19-23.
10. (a) Mɛni je amɛhe ni abaanyɛ ana yɛ suɔmɔ ni yɔɔ adesa weku ni efee ekome mli lɛ kɛ nɔ ni anaa yɛ mɛi ni amɛtu amɛhe amɛhã Yehowa lɛ anɔ̃ lɛ teŋ? (b) Te Nɔyeli Kuu lɛ mlinyo ko tsɔɔ ehenumɔi amli yɛ kpeei ni ekɛ emumɔŋ nyɛmimɛi lɛ kpeɔ lɛ mli eha tɛŋŋ?
10 Weku ni efee ekome mli bii sumɔɔ amɛhe, ni amɛnaa miishɛɛ kɛ amɛbua amɛhe naa kutuu. Kɛ akɛaato he lɛ, mɛi ni yɔɔ Yehowa jálɔi aweku ni amɛfee ekome lɛ ateŋ lɛ sumɔɔ lɛ, e-Bi lɛ, kɛ nanemɛi heyelilɔi. (Marko 12:30; Yohane 21:15-17; 1 Yohane 4:21) Taakɛ bɔ ni heloo naa weku ni yɔɔ suɔmɔ lɛ naa niyenii ni amɛyeɔ kutuu mli ŋɔɔmɔ lɛ, nakai mɛi ni amɛtu amɛhe amɛha Nyɔŋmɔ lɛ hu naa miishɛɛ akɛ amɛaahi Kristofoi akpeei, kpeei bibii, kɛ kpeei wuji ashishi, koni amɛna naanyobɔɔ kpakpa kɛ mumɔŋ niyenii ni nɔ bɛ lɛ ahe sɛɛ. (Mateo 24:45-47; Hebribii 10:24, 25) Yehowa Odasefoi a-Nɔyeli Kuu lɛ mlinyo ko wie saji ahe yɛ nɛkɛ gbɛ nɔ: “Nyɛmimɛi ni akɛ amɛ kpeɔ lɛ ji shihilɛ mli ŋɔɔmɔ nii kɛ hewalɛwoo jɛɛhe ni da fe fɛɛ kɛha mi. Misumɔɔ akɛ mahi Maŋtsɛyeli Asa lɛ nɔ ni mafata klɛŋklɛŋ bii ni bashɛ jɛmɛ lɛ ahe, ni mafata naagbee bii ni aaashi jɛmɛ lɛ ahe, kɛ manyɛ. Minuɔ mligbɛ miishɛɛ ko he kɛ mikɛ Nyɔŋmɔ webii miiwie. Kɛ miyɛ amɛteŋ lɛ mihe jɔɔ mi tamɔ mikɛ miweku.” Ani nakai ji bɔ ni onuɔ he ohaa?—Lala 27:4.
11. Mɛɛ nitsumɔ Yehowa Odasefoi naa miishɛɛ yɛ mli titri, ni mɛni jɛɔ Nyɔŋmɔ sɔɔmɔ ni wɔfeɔ lɛ wɔ shihilɛ mli nɔ̃ titri lɛ mli baa?
11 Weku ni efee ekome naa miishɛɛ yɛ nii ni amɛfeɔ kutuu mli. Nakai nɔŋŋ mɛi ni yɔɔ Yehowa jálɔi aweku lɛ mli lɛ naa miishɛɛ yɛ ekomefeemɔ ni amɛkɛtsuɔ amɛ Maŋtsɛyeli shiɛmɔ kɛ kaselɔi afeemɔ nitsumɔ lɛ mli. (Mateo 24:14; 28:19, 20) He ni akɛwoɔ mli daa lɛ gbalaa wɔ kɛbɛŋkɛɔ Yehowa Odasefoi krokomɛi ahe. Ni wɔɔfee Nyɔŋmɔ sɔɔmɔ, wɔ shihilɛ mli nitsumɔ titri, ni wɔfi Yehowa webii anitsumɔi fɛɛ sɛɛ lɛ hu haa weku mumɔ lɛ shwereɔ yɛ wɔteŋ.
Teokrase Gbɛjianɔtoo He Miihia
12. Mɛni ji sui komɛi ni anaa yɛ weku ni yɔɔ miishɛɛ ni efee ekome lɛ mli, ni mɛɛ gbɛjianɔtoo ha ekomefeemɔ shwere yɛ klɛŋklɛŋ afii oha lɛ mli Kristofoi asafoi lɛ amli?
12 Weku ni yɔɔ hiɛnyiɛmɔ ni mli wa, shi suɔmɔ fata he, kɛ gbɛjianɔtoo kpakpa hu lɛ baanyɛ afee weku ni yɔɔ ekomefeemɔ ni miishɛɛ yɔɔ mli. (Efesobii 5:22, 38; 6:1) Yehowa ji Nyɔŋmɔ ni toɔ gbɛjianɔ yɛ toiŋjɔlɛ mli, ni mɛi fɛɛ ni yɔɔ eweku lɛ mli lɛ buɔ lɛ akɛ “Mɔ ni Yɔɔ Ŋwɛi Shɔŋŋ.” (Daniel 7:18, 22, 25, 27; 1 Korintobii 14:33) Amɛyɔseɔ hu akɛ, ehala e-Bi, Yesu Kristo, akɛ mɔ ni yeɔ nibii fɛɛ nɔ, ni ekɛ ŋwɛi kɛ shikpɔŋ nɔ hegbɛ fɛɛ ewo edɛŋ. (Mateo 28:18; Hebribii 1:1, 2)Akɛni Kristo ji Kristofoi asafo lɛ Yitso hewɔ lɛ, eji nɔ ni ato he gbɛjianɔ jogbaŋŋ ni efee ekome.(Efesobii 5:23) Bɔni afee ni akwɛ klɛŋklɛŋ afii oha lɛ mli asafoi lɛ anɔ jogbaŋŋ hewɔ lɛ, ayɛ nɔyeli kuu ni feɔ bɔfoi lɛ kɛ “onukpai” krokomɛi ni edara yɛ mumɔŋ. Asafoi komekomei yɛ nɔkwɛlɔi, loo onukpai, kɛ asafoŋ sɔɔlɔi ni ahala amɛ. (Bɔfoi lɛ Asaji 15:6; Filipibii 1:1) Toiboo ni afeɔ ahaa mɛi ni nyiɛɔ hiɛ lɛ kɛ ekomefeemɔ baa.—Hebribii 13:17.
13. Mɛɛ gbɛ nɔ Yehowa tsɔɔ egbalaa gbɔmɛi, ni mɛni jɛɔ enɛ mli baa?
13 Ani nɛkɛ gbɛtsɔɔmɔ nɛɛ fɛɛ tsɔɔ akɛ, ekomefeemɔ ni yɔɔ Yehowa jálɔi ateŋ lɛ baanyɛ afee nɔ ni jɛ hiɛnyiɛmɔ kpakpa kɛkɛ ni miishɛɛ ko bɛ mli? Dabi kwraa! Nɔ ko bɛ ni suɔmɔ bɛ mli yɛ Nyɔŋmɔ loo egbɛjianɔtoo lɛ he. Yehowa gbalaa gbɔmɛi kɛbaa emasɛi kɛtsɔɔ suɔmɔ ni ejieɔ lɛ kpo lɛ nɔ, ni daa afi lɛ, gbɔmɛi akpei ohai abɔ jɛɔ amɛsuɔmɔ kɛ miishɛɛ mli amɛbatsɔmɔɔ Yehowa gbɛjianɔtoo lɛ fã, kɛtsɔɔ baptisimɔ ni abaptisiɔ amɛ akɛfeɔ amɛtsui muu fɛɛ mli ni amɛjɛ amɛjɔɔ amɛhe nɔ amɛha Nyɔŋmɔ lɛ he okadi lɛ nɔ. Amɛ subaŋ tamɔ Yoshua, mɔ ni wo enanemɛi lsraelbii lɛ hewalɛ nɛkɛ lɛ nɔ̃: “Ŋmɛnɛ gbi nɛɛ, nyɛkɔa mɔ ni nyɛaasɔmɔ, . . . shi mi lɛ, mikɛ miwe lɛ, wɔɔsɔmɔ Yehowa.”—Yoshua 24:15.
14. Mɛni hewɔ wɔbaanyɛ wɔkɛɛ akɛ Yehowa gbɛjianɔtoo lɛ ji teokrase nɔ̃ lɛ?
14 Ákɛ Yehowa weku lɛ fã lɛ, jeee akɛ wɔyɛ miishɛɛ kɛkɛ, shi wɔyɛ shweshweeshwe hu. Nakai eji, ejaakɛ egbɛjianɔtoo lɛ ji teokrase nɔ̃. Nyɔŋmɔ Maŋtsɛyeli lɛ ji teokrase (ejɛ Hela wiemɔ ni ji the·osʹ, nyɔŋmɔ, kɛ kraʹtos, nɔyeli. Eji nɔyeli ni jɛ Nyɔŋmɔ ŋɔɔ, lɛ ehala ni eto shishi. Yehowa “maŋ krɔŋkrɔŋ” ni efɔ amɛ mu lɛ baa ehe shi ehaa enɔyeli lɛ, no hewɔ lɛ eji teokrase hu. (1 Petro 2:9) Akɛni Teokrat Kpeteŋkpele, Yehowa, ji wɔ Kojolɔ, Mla-Halɔ, kɛ Maŋtsɛ hewɔ lɛ, wɔyɛ nɔ ni wɔɔdamɔ nɔ wɔnu he akɛ wɔyɛ shweshweeshwe (Yesaia 33:22) Kɛlɛ, kɛ naataomɔ ko aaate shi ni eeeka wɔ miishɛɛ, shweshweeshwe shihilɛ, kɛ ekomefeemɔ lɛ fitemɔ hu?
Nɔyeli Kuu lɛ Fee Nii Koni Ekɛbaa Ekomefeemɔ Yi
15, 16. Mɛɛ naataomɔ te shi yɛ klɛŋklɛŋ afii oha lɛ mli, ni mɛni hewɔ?
15 Bɔni afee ni abaa weku ekomefeemɔ yi lɛ, eshɛɔ be ni esa akɛ asaa béi. Ŋɔɔ lɛ akɛ, ekolɛ esa akɛ asaa Nyɔŋmɔ jamɔ mli naagba ko, koni akɛbaa Nyɔŋmɔ jálɔi aweku lɛ yi yɛ Ŋ.B. klɛŋklɛŋ afii oha lɛ mli. Mɛni esa akɛ afee? Nɔyeli kuu lɛ tsu he nii, ni ekpɛ yiŋ yɛ mumɔŋ saji ahe. Wɔyɛ Ŋmalɛ mli nifeemɔ ni tamɔ nɛkɛ.
16 Nɔyeli kuu lɛ kpe yɛ Yerusalem aaafee afi 49 Ŋ.B., koni amɛsaa sane ko ni hiɛdɔɔ yɔɔ mli, koni amɛkɛ nakai feemɔ abaa “Nyɔŋmɔ webii” lɛ ekomefeemɔ lɛ yi. (Efesobii 2:19) No mli lɛ bɔfo Petro etsɔ hiɛ eshiɛ etsɔɔ Kornelio aaafee afii 13 momo, ni klɛŋklɛŋ Jeŋmajiaŋbii, loo gbɔmɛi ni jɛ jeŋmaji lɛ amli batsɔmɔ heyelilɔi ni abaptisi amɛ. (Bɔfoi lɛ Asaji, yitso 10) Yɛ Paulo klɛŋklɛŋ maŋsɛɛ sanekpakpa shiɛmɔ gbɛfaa lɛ mli lɛ, Jeŋmajiaŋbii pii kpɛlɛ Kristojamɔ nɔ. (Bɔfoi lɛ Asaji 13: 1-14:28) Yɛ anɔkwale mli lɛ, no mli lɛ ato Jeŋmajiaŋbii Kristofoi asafo yɛ Antiokia, yɛ Siria. Yudafoi Kristofoi komɛi nu he akɛ, esa akɛ afolɔ Jeŋmajiaŋbii ni atsake amɛ lɛ ketia ni amɛye Mose Mla lɛ nɔ, shi mɛi krokomɛi kɛ amɛ kpaaa gbee. (Bɔfoi lɛ Asaji 15:1-5) Nɛkɛ naataomɔ nɛɛ baanyɛ ekɛ mligbalamɔ kwraa aba, ni ebaaha ato Yudafoi kɛ Jeŋmajiaŋbii asafoi sɔrɔtoi po. No hewɔ lɛ, nɔyeli kuu lɛ fee nii oya koni ekɛbaa Kristofoi a-ekomefeemɔ yi.
17. Mɛɛ teokrase nifeemɔ ni kɛ ehe kpaa gbee atsɔɔ mli yɛ Bɔfoi lɛ Asaji yitso 15?
17 Taakɛ Bɔfoi lɛ Asaji 15:6-22 tsɔɔ lɛ, “bɔfoi lɛ kɛ onukpai lɛ babua amɛhe naa, koni amɛtao nɛkɛ sane nɛɛ mli.” Mɛi krokomɛi hu yɛ jɛmɛ, ni najiaŋdamɔlɔi komɛi ni jɛ Antiokia fata he. Petro klɛŋklɛŋ tsɔɔ mli akɛ, ‘enaa atsɔ ni gbɔmɛi ni jɛ jeŋmaji lɛ amli lɛ nu sanekpakpa lɛ he ni amɛhe amɛye.’ Kɛkɛ ni ‘amɛ fɛɛ amɛbua amɛhe naa,’ koni amɛbo toi, beni Barnaba kɛ Paulo gbaa amɛ “okadii kɛ naakpɛɛ nii abɔ ni Nyɔŋmɔ tsɔ amɛnɔ efee yɛ jeŋmaji” loo Jeŋmajiaŋbii “lɛ amli lɛ” atoi lɛ. No sɛɛ lɛ, Yakobo tsɔɔ ejwɛŋmɔ yɛ gbɛ ni esa akɛ atsɔ nɔ atsu sanebimɔ lɛ he nii. Beni nɔyeli kuu lɛ kpɛ eyiŋ sɛɛ lɛ, akɛɛ wɔ akɛ: “Kɛkɛ ni esa bɔfoi lɛ kɛ onukpai lɛ kɛ asafo muu lɛ fɛɛ hiɛ akɛ, amɛaafamɔ hii komɛi yɛ amɛ diɛŋtsɛ amɛteŋ, ni atsu amɛ kɛ Paulo kɛ Barnaba kɛya Antiokia.” Nakai ‘hii ni amɛfamɔ yɛ amɛteŋ lɛ’—Yuda kɛ Sila—kɛ wolo ko ni woɔ mɔ hewalɛ yaha nanemɛi heyelilɔi lɛ.
18. Mɛɛ yiŋkpɛɛ ni kɔɔ Mose Mla lɛ he nɔyeli kuu lɛ kɛha, ni te enɛ sa Kristofoi ni ji Yudafoi kɛ Jeŋmajiaŋbii lɛ fɛɛ he eha tɛŋŋ?
18 Wolo ni tswaa nɔyeli kuu lɛ yiŋkpɛɛ lɛ he adafi lɛ je shishi kɛ wiemɔi nɛɛ: “Bɔfoi lɛ kɛ onukpai lɛ kɛ nyɛmimɛi lɛ miibi nyɛmimɛi ni jɛ jeŋmaji lɛ ateŋ ni yɔɔ Antiokia kɛ Siria kɛ Kilikia lɛ jogbaŋŋ!” Nyɛmimɛi krokomɛi ba kpee ni fee yinɔsane nɛɛ shishi, shi eyɛ faŋŋ akɛ, nɔyeli kuu lɛ mli bii feɔ “bɔfoi lɛ kɛ onukpai lɛ.” Nyɔŋmɔ mumɔ krɔŋkrɔŋ lɛ kudɔ amɛ, ejaakɛ wolo lɛ kɛɔ akɛ: “Esa [mumɔ krɔŋkrɔŋ, NW] lɛ hiɛ, ni esa wɔ hu wɔhiɛ akɛ, wɔkɛ jatsu ko akafɔ̃ nyɛnɔ dɔŋŋ, akɛ ja nii ni he hiaa nɛɛ nɔŋŋ: akɛ nyɛhi looi ni agbe aha wɔji, kɛ la, kɛ kooloi ni ashɔ̃tɔ̃, kɛ ajwamaŋbɔɔ.” (Bɔfoi lɛ Asaji 15:23-29) Abiii ni afolɔ Kristofoi ketia ni amɛye Mose Mla lɛ nɔ. Nɛkɛ yiŋkpɛɛ nɛɛ ye ebua Yudafoi kɛ Jeŋmajiaŋbii Kristofoi lɛ koni amɛfee nii ni amɛwie yɛ ekomefeemɔ mli. Asafoi lɛ na miishɛɛ, ni ekomefeemɔ ni jara wa lɛ tee nɔ, taakɛ eyaa nɔ yɛ Nyɔŋmɔ weku ni yɔɔ shikpɔŋ muu lɛ fɛɛ nɔ ŋmɛnɛ lɛ mli, yɛ Yehowa Odasefoi a-Nɔyeli Kuu lɛ mumɔŋ gbɛtsɔɔmɔ shishi lɛ.—Bɔfoi lɛ Asaji 15:30-35.
Sɔɔmɔ yɛ Teokrase Ekomefeemɔ Mli
19. Mɛni hewɔ ekomefeemɔ eshwere yɛ Yehowa jálɔi aweku mli lɛ?
19 Ekomefeemɔ shwereɔ kɛ weku ko mli bii kɛ amɛhe kpaa gbee. Nakai nɔŋŋ eji anɔkwale yɛ Yehowa jálɔi aweku lɛ mli. Akɛni amɛfeɔ amɛnii yɛ teokrase gbɛ nɔ hewɔ lɛ, onukpai lɛ kɛ mɛi krokomɛi ni yɔɔ klɛŋklɛŋ afii oha lɛ mli lɛ sɔmɔ Nyɔŋmɔ yɛ nɔyeli kuu lɛ kɛ gbeekpamɔ naa, ni amɛkpɛlɛ eyiŋkpɛi anɔ. Yɛ nɔyeli kuu lɛ yelikɛbuamɔ naa lɛ, onukpai lɛ ‘shiɛ wiemɔ lɛ,’ ni asafoi lɛ amli bii lɛ fɛɛ ‘wie kɛ gbeekpamɔ.’ (2 Timoteo 4:1, 2; 1 Korintobii 1:10) No hewɔ lɛ, akɛ nakai Ŋmalɛ naa anɔkwalei lɛ nɔŋŋ ha yɛ sɔɔmɔ lɛ mli kɛ agbɛnɛ yɛ Kristofoi akpeei ashishi, kɛ yɛ Yerusalem, Antiokia, Roma, Korinto, loo he kroko jio. Teokrase ekomefeemɔ ni tamɔ nɛkɛ yɛ ŋmɛnɛ.
20. Mɛni esa akɛ wɔfee, koni wɔkɛbaa wɔ Kristofoi a-ekomefeemɔ lɛ yi?
20 Bɔni afee ni wɔbaa wɔ ekomefeemɔ yi lɛ, esa akɛ wɔ fɛɛ ni wɔji Yehowa jeŋ muu fɛɛ weku lɛ fã lɛ atsu nii ni wɔkɛjie teokrase suɔmɔ kpo. (1 Yohane 4:16) Esa akɛ wɔba wɔhe shi wɔha Nyɔŋmɔ suɔmɔnaa nii, ni wɔjie bulɛ ni mli kwɔ kpo wɔha “tsulɔ anɔkwafo” lɛ kɛ Nɔyeli Kuu lɛ. Taakɛ Nyɔŋmɔ ni wɔjɔɔ wɔhe nɔ wɔha lɛ lɛ ji lɛ, wɔ toiboo lɛ jɛ wɔ suɔmɔ mli, ni miishɛɛ yɛ mli. (1 Yohane 5:3) Kwɛ bɔ ni lalatsɛ lɛ kɛ miishɛɛ to toiboo he jogbaŋŋ eha! Ela akɛ: “Nyɛjiea Yah yi, nyɛ gbɔmɛi! Miishɛɛ ji gbɔmɔ ni sheɔ Yehowa gbeyei, ni enyãa ekitai ahe jogbaŋŋ lɛ.”—Lala 112: 1, NW.
21. Mɛɛ gbɛ nɔ wɔɔtsɔ wɔjie wɔhe kpo akɛ wɔfeɔ wɔ nii yɛ teokrase gbɛ nɔ?
21 Yesu, asafo lɛ Yitso lɛ, feɔ enii yɛ teokrase gbɛ nɔ kɛyiɔ shi, ni efeɔ e-Tsɛ lɛ suɔmɔnaa nii be fɛɛ be. (Yohane 5:30) No hewɔ lɛ, nyɛhaa wɔnyiɛa wɔ Nɔkwɛmɔ Nɔ lɛ sɛɛ, kɛtsɔ Yehowa suɔmɔnaa nii ni wɔɔfee yɛ teokrase gbɛ nɔ yɛ ekomefeemɔ mli, yɛ E-gbɛjianɔtoo lɛ kɛ gbeekpamɔ ni mɔɔ shi mli lɛ nɔ. Kɛkɛ lɛ, wɔkɛ tsuiŋ miishɛɛ kɛ shidaa baaha lalatsɛ lɛ lala lɛ ajije akɛ: “Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ!”
Te Obaaha Hetoo Oha Tɛŋŋ?
◻ Abaanyɛ akɛ wɔ Kristofoi a-ekomefeemɔ lɛ ato Lala 133 he yɛ mɛɛ gbɛ nɔ?
◻ Mɛni ji nibii komɛi ni haa ekomefeemɔ shwereɔ?
◻ Mɛni hewɔ teokrase gbɛjianɔtoo he hiaa kɛha ekomefeemɔ yɛ Nyɔŋmɔ webii ateŋ lɛ?
◻ Mɛni klɛŋklɛŋ afii oha lɛ mli nɔyeli kuu lɛ fee koni ekɛbaa ekomefeemɔ yi?
◻ Mɛni sɔɔmɔ yɛ teokrase ekomefeemɔ mli lɛ tsɔɔ kɛhaa bo?
[Mfoniri ni yɔɔ baafa 13]
Nɔyeli kuu lɛ fee nii koni ekɛbaa ekomefeemɔ yi