Awula Amɛ Kɛha Maŋsɛɛ Sanekpakpa Shiɛmɔ Nitsumɔ Yɛ 1990 Afii Lɛ Amli

YINƆSANE be krɛdɛɛ ko miije shishi kɛha maŋsɛɛ sanekpakpa shiɛlɔi asɔɔmɔ lɛ. Akɛni hegbɛi heei miigbele kɛha hei pii amli nitsumɔ hewɔ lɛ, Yehowa Odasefoi anɔkwafoi fɛɛ miishwe ni amɛya amɛhiɛ waa yɛ nitsumɔi wuji po mli.

No hewɔ lɛ nikaselɔi 24 ni ji Watchtower Bible School of Gilead lɛ klasbii ni ji 89 nɔ lɛ kɛ gbɛkpamɔ ni mli wa tee amɛnikasemɔ lɛ naagbee lɛ he gbɛjianɔtoo lɛ shishi yɛ September 9, 1990. Mɛi fe 5,000 ni afɔ amɛ nine lɛ kɛ Betel weku lɛ mlibii lɛ bua amɛhe naa kɛha maŋsɛɛ sanekpakpa shiɛlɔi heei, ni aha amɛ nitsumɔ yɛ maji nyɔŋma mli momo nɛɛ anikasemɔ lɛ naagbee he nifeemɔ nɛɛ. Gbɛjianɔtoo lɛ tee nɔ kɛjɛ Yehowa Odasefoi a-Kpee Asa ni yɔɔ Jersey City, yɛ New Jersey lɛ mli, ni mɛi ni ebua amɛhe naa yɛ Brooklyn Betel, Watchtower Farms, kɛ Watchtower Educational Center ni yɔɔ Patterson, yɛ New York lɛ fɛɛ nu wiemɔi ni aha lɛ fɛɛ.

Leebi ŋmɛji 10:00 pɛpɛɛpɛ kɛkɛ ni Theodore Jaracz, ni eji Yehowa Odasefoi a-Nɔyeli Kuu lɛ mlibii lɛ ateŋ mɔ kome, kɛ sɛinɔtalɔ kɛha gbi lɛ mli nifeemɔ lɛ tsɛ lala ni akɛbaaje shishi lɛ. No sɛɛ lɛ, Arthur Worsley, ni eji Brooklyn Betel weku lɛ mlibii lɛ ateŋ mɔ kome lɛ sɔle. Kɛkɛ ni sɛinɔtalɔ lɛ wie Bɔfoi lɛ Asaji 10:​33, he ni Roma amralo Kornelio kɛ Petro wie nɛkɛ lɛ he: “No hewɔ lɛ agbɛnɛ wɔ fɛɛ wɔyɛ biɛ yɛ Nyɔŋmɔ hiɛ, koni wɔbo nibii fɛɛ ni [Yehowa] Nyɔŋmɔ ekɛo lɛ atoi.” Etsɔɔ mli akɛ nibii ni sa kadimɔ jogbaŋŋ ni ba yɛ Petro gbii lɛ amli lɛ baagbele gbɛ koni anyɛ ashiɛ sanekpakpa lɛ aha gbɔmɛi ni yɔɔ jeŋmaji fɛɛ amli lɛ hu.

Philip D. Wilcox, ni jɛ Watchtower Farms lɛ ha wiemɔi kpawo ni kanyaa mɔ waa lɛ mli klɛŋklɛŋ nɔ. Egbala jwɛŋmɔ kɛtee Filipibii 4:7 nɔ, ni ehala sane ni ji “Ha Nyɔŋmɔ Toiŋjɔlɛ lɛ Aye Abua Bo yɛ Onitsumɔ lɛ Mli” lɛ akɛ ewiemɔ lɛ yitso. Ekɛɛ: “Yehowa Nyɔŋmɔ ji anɔkwa toiŋjɔlɛ fɛɛ Jɛɛhe. Enaa toiŋjɔlɛ ni eye emuu kwraa kɛmɔ shi mli ŋɔɔmɔ, ni enaaa yeyeeye-feemɔ, gbeyeishemɔ, aloo jwɛŋmɔŋ naagba ko kwraa. No hewɔ lɛ, kpoo-feemɔ kɛ toiŋjɔlɛ ko yɛ ni ebɔle Yehowa anunyam lɛ he yɛ emaŋtsɛsɛi lɛ nɔ, taakɛ bɔ ni kwaabuɛtɛ ni hiɛ smaragde-tɛ su ni Yohane na yɛ ninaa mli lɛ ji lɛ. (Kpojiemɔ 4:​2, 3) Etoiŋjɔlɛ lɛ mli lɛɛɔ kɛtekeɔ lɛ kɛyaa shɔŋŋ kɛyashɛɔ mɛi fɛɛ ni baaŋmɛ lɛ gbɛ ni eye ebua amɛ lɛ aŋɔɔ. Ani obaaha eye ebua bo?” Nyɛminuu Wilcox tsi yelikɛbuamɔi enyɔ komɛi ni he hiaa waa lɛ ata, sɔlemɔ kɛ shwe ni ashweɔ akɛ akɛ hiɛ aaafɔ Yehowa nɔ. (Mika 7:7; Filipibii 4:⁠6) Etsɔɔ mli akɛ, nɔ ko nɔ ko bɛ ni Nyɔŋmɔ baaŋmɛ gbɛ ni eba wɔnɔ ni eeeye wɔ awui kɛya naanɔ.

Lloyd Barry, ni eji Nɔyeli Kuu lɛ mli mɔ kome lɛ tsa nɔ kɛ wiemɔ ni yitso ji “Yaa nɔ Oŋmɔ.” Eje shishi akɛ, “Tsofa kpakpa waa ji ŋmɔlɔ.” Ekaiɔ nakai wiemɔ kuku lɛ jogbaŋŋ ejaakɛ mra mli yɛ 1955 mli lɛ, no ji saneyitso ni aŋma yɛ Awake! ni je kpo klɛŋklɛŋ kwraa yɛ Japan wiemɔ mli lɛ sɛɛ. Shi mɛɛ ŋmɔlɔ atsɔɔ lɛ? Jeee nɔ ni naa wa waa, loo “kwashiai aŋmɔlɔ” ni nilee bɛ mli lɛ. (Jajelɔ 7:⁠6) Shi moŋ, eji maŋsɛɛ sanekpakpa shiɛlɔi kɛ mɛi krokomɛi ni hereɔ David ninefɔɔ akɛ ‘amɛmii ashɛ amɛhe yɛ Yehowa mli’ daa lɛ nɔ lɛ aŋmɔlɔ fɛfɛo ni tsɔɔ miishɛɛ lɛ. (Lala 32:11) Nyɛminuu Barry tsɔɔ mli akɛ yɛ kaai ni mli wa ni Hiob kɛkpe lɛ fɛɛ sɛɛ lɛ, enyɛ etee nɔ eŋmɔ, ejaakɛ ele akɛ eehiɛ emuuyeli mli kɛmiiha Nyɔŋmɔ. Maŋsɛɛ sanekpakpa shiɛlɔi ni damɔɔ shi shiŋŋ yɛ niiashikpamɔi ni kaa mɔ tamɔ Hiob nɔ lɛ mli lɛ anine baashɛ jɔɔmɔi babaoo nɔ yɛ naagbee kwraa. (Hiob 29:​24; 42:12) Wielɔ lɛ mu esane lɛ naa akɛ: “Nyɛyaa nɔ nyɛtsua nii daa, nyɛyaa nɔ nyɛŋmɔa, ni nyɛ hu nyɛaakpa Yehowa naanɔ ŋmɔlɔ ni tsɔɔ enɔkpɛlɛmɔ lɛ eko.”

Wielɔ ni tsa nɔ ji Richard E. Abrahamson, ni ehala saneyitso ni ji “Nyɛmlijɔlɛ lɛ Nyɛhaa Gbɔmɛi Fɛɛ Alea,” ni damɔ Filipibii 4:5 lɛ nɔ. Taakɛ Hela wiemɔ ni atsɔɔ shishi kɛjɛ mli lɛ tsɔɔ lɛ, wiemɔ “mlijɔlɛ” lɛ nyɛɔ etsɔɔ “sane he ni aŋmɛɔ” hu. Maŋsɛɛ sanekpakpa shiɛlɔi lɛ ateŋ mɛi komɛi ena naagbai komɛi yɛ nibii ni ekolɛ amɛsumɔɔ lɛ ahewɔ. Mɔ kome ko naa kpɛ ehe waa yɛ bɔ ni enaanyo maŋsɛɛ sanekpakpa shiɛlɔ ko fo keesuu eha yɛ niyeli he lɛ hewɔ. Yɛ afi 22 ni ekɛhi maŋsɛɛ sanekpakpa shiɛmɔ nitsumɔ lɛ mli sɛɛ lɛ, mɔ ni enɛ fee lɛ naakpɛɛ lɛ yoo akɛ naagbai lɛ pii yɛ ni ejɛɔ nibii ni he ehiaaa tamɔ ekolɛ bɔ ni mɔ ko fo keesuu eha. No hewɔ lɛ wielɔ lɛ wo ŋaa akɛ: “Kasemɔ bɔ ni afeɔ atsakeɔ he awoɔ shihilɛi sɔrɔtoi amli, tamɔ tso ni miikpee ahum. Sɛɛnamɔi babaoo jɛɔ sane he ni aŋmɛɔ lɛ mli baa, tamɔ ni mɔ ko aaanyɛ edamɔ kaai ni ekɛkpeɔ lɛ naa ni enyɛ ekɛ ehe akpɛtɛ enitsumɔ lɛ he kɛ jwɛŋmɔŋ toiŋjɔlɛ.”

Milton G. Henschel, ni eji Nɔyeli Kuu lɛ mli mɔ kome lɛ wie yitso ni ji “Agbele Shinaa Kpele ni kɛ Mɔ Yaa Nitsumɔ Mli lɛ Naa” lɛ he. Nyɛminuu Henschel tsɔɔ mli akɛ Yesu sumɔɔ gbɔmɛi asane, ni emusuŋ shaa lɛ yɛ amɛhewɔ, ni etsɔɔ amɛ nii babaoo. Bɔfo Paulo ŋma Korintobii lɛ kɛjɛ Efeso akɛ: “Ejaakɛ agbele shinaa kpeteŋkpele naa aha mi, ni nitsumɔ pii yɛ, shi mɛi ni kuɔ naa hu lɛ ayi fa.” (1 Korintobii 16:​9, 10) Yɛ nɛkɛ shitee-kɛ-woo nɛɛ fɛɛ sɛɛ lɛ, Paulo tsɔɔ nii yɛ Tirano nikasemɔ he lɛ shitaramɔ he lɛ afii enyɔ sɔŋŋ, ni enɛ ha abale Maŋtsɛyeli lɛ he sane lɛ yɛ Asia niiaŋ fɛɛ. (Bɔfoi lɛ Asaji 19:​9, 10) Shinaa ni naa egbele nɛɛ ha eye omanye yɛ eshiɛmɔ nitsumɔ lɛ mli. Beni klɛŋklɛŋ afii oha lɛ baa naagbee lɛ, no mli lɛ, Efeso asafo lɛ ka he eyɛ lolo.​—Kpojiemɔ 2:​1-7.

Jack D. Redford, ni tsɔɔ nii yɛ Gilead lɛ wie yitso ni ji “Nyɛkaa Nyɛ Diɛŋtsɛ Nyɛhe Nyɛkwɛa” lɛ he. (2 Korintobii 13:⁠5) Gilead maŋsɛɛ sanekpakpa shiɛlɔi egbele shikpɔji heei anaa ni amɛwo asafoi ni ato momo lɛ hewalɛ, ni amɛŋmɛ amɛtsui shi babaoo ni amɛkɛte shi amɛwo nibii ni Abonsam baasumɔ ni ekɛlaka amɛ ni amɛgba afa lɛ hu. Ni mɛi heei yaa nɔ amɛfataa amɛhe be fɛɛ be. Nitsɔɔlɔ lɛ kɛ niiashikpamɔi enyɔ ni mli ka shi faŋŋ tsu nii ni ekɛtsɔɔ bɔ ni ehe hiaa ni aka hemɔkɛyeli akwɛ lɛ mli. Maŋsɛɛ sanekpakpa shiɛlɔ ko laaje hegbɛi ni eyɔɔ lɛ yɛ be mli ni ekɛ henɔwomɔ kpoo kɔkɔbɔɔ ŋaawoo ni akɛha lɛ yɛ gbɛ fɔŋ ko ni ekɔ lɛ hewɔ lɛ. Nɔ ni tamɔɔɔ enɛ lɛ, nyɛmiyoo kroko ko hi nitsumɔ ni aha lɛ lɛ mli aahu kɛ miishɛɛ, eyɛ mli akɛ yɛ klɛŋklɛŋ nyɔji etɛ lɛ mli lɛ, hela ko mɔ lɛ ni eha eyitsɔi fɛɛ shɛ ni emu toi hu ni eta loo ni eshwɛ ehewolo kɛ ewui pɛ. Aaafee afii 42 sɛɛ nɛɛ, eka he eyɛ jɛmɛ lolo, ni eye ebua mɛi 156 kɛyashɛ baptisimɔ he kɛtsɔ Biblia mli nikasemɔ nɔ. Nyɛminuu Redford mu naa akɛ: “Nyɛtea shi nyɛwoa Abonsam, ni eeejo nyɛnaa foi. Nyɛkahea nii ni ekɛlakaa nyɛ lɛ kɔkɔɔkɔ. Nyɛyaa nɔ nyɛkaa nyɛ diɛŋtsɛ nyɛhe nyɛkwɛa. Yehowa baabu nyɛhe.”

No sɛɛ lɛ, nitsɔɔlɔ kroko, Ulysses V. Glass wie yɛ yitso ni ji “Heshibalɔi ji Mɛi ni Yɔɔ Nilee” lɛ he. (Abɛi 11:⁠2) Ekɛ nineshi watsi ko ni kɛ hulu hewalɛ tsuɔ nii lɛ fee he mfoniri ni ekɛtsɔɔ mli akɛ Nyɔŋmɔ Wiemɔ lɛ mli la lɛ baanyɛ aha “hewalɛ” ahi wɔmli. “Shi,” etsɔɔ mli akɛ, “jwɛŋmɔ kɛkɛ haaa mɔ nilee. Shi moŋ Nyɔŋmɔ biɔ heshibaa hu shi.” (Mika 6:⁠8) Heshibaa baaha wɔshe Nyɔŋmɔ gbeyei, ni “Yehowa gbeyeishemɔ ji nilee shishijee.” (Abɛi 9:10) Lɛlɛŋ, esa akɛ wɔsusu wɔhe yɛ gbɛ kpakpa nɔ; ni wɔɔbu wɔhe mɛi ni he bɛ sɛɛnamɔ ko lɛ baanyɛ afite nibii babaoo. Yehowa kɛ nyɛmɔi krɛdɛɛi komɛi eha mɛi komɛi, taakɛ efee yɛ be mli ni amaa kpeebuu lɛ, shi esa akɛ wɔtsu nii kɛshɛ anɔkwayeli he yɛ heshibaa mli. Nyɛminuu Glass kɛɛ klasbii lɛ akɛ, “Beni nikasemɔ lɛ yaa nɔ lɛ, nyɛha ana bɔ ni abaanyɛ akɛ he afɔ nyɛnɔ kɛ bulɛ ni nyɛyɔɔ hu lɛ he odaseyeli yɛ faŋŋ mli. Nyɛjiea nɛkɛ anɔkwayeli nɛɛ nɔŋŋ kpo yɛ nyɛnitsumɔ lɛ mli, ni Nyɔŋmɔ baajɔɔ nyɛ.”

Albert D. Schroeder, ni eji Nɔyeli Kuu lɛ mli mɔ kome lɛ wie sane ni wɔwieɔ he ni yitso ji “Awula Amɛ Kɛha Maŋsɛɛ Sanekpakpa Shiɛmɔ Nitsumɔ yɛ 1990 Afii lɛ Amli” nɛɛ he. Eje shishi akɛ: “1990 afii lɛ eje shishi kɛ hoofeemɔ momo. Ahoso Europa Bokagbɛ maji lɛ ateŋ babaoo. Nyɔji pii nɛ ni ajie Berlin Gbogbo lɛ. The New York Times lɛ ŋma saneyitso ko akɛ: ‘August 1990, Nyɔŋ ni Hoso Je Lɛ.’ No hewɔ lɛ, nyɛ mɛi ni nyɛgbe skul lɛ naa nɛɛ, hosomɔ beaŋ nyɛyɔɔ nɛɛ. Ani nyɔji enumɔ ni nyɛkɛkase nii lɛ esaa nyɛ kɛha enɛ? Eka shi faŋŋ akɛ hɛɛ!” Kɛkɛ ni etsi New World Translation of the Holy Scriptures with References lɛ he nibii ni he yɔɔ sɛɛnamɔ lɛ ekomɛi ata kɛ bɔ ni ekasemɔ eha Nyɔŋmɔ Wiemɔ lɛ ebafee nɔ ni hiɛ ka lɛ hu. Dɛŋdade kroko ni he wa ni ewula nikaselɔi lɛ waa ji “All Scripture Is Inspired of God and Beneficial,” ni amrɔ nɛɛ asaa akala lɛ ehee yɛ 1990 lɛ. Esa akɛ wolo ni je kpo nyɛsɛɛ nɛɛ ni yitso ji Mankind’s Search for God lɛ afee yelikɛbuamɔ kpele kɛha maŋsɛɛ sanekpakpa shiɛlɔi lɛ. Nyɛminuu Schroeder mu naa akɛ: “No hewɔ lɛ, nyɛmimɛi, nyɛdaa Yehowa shi yɛ tsɔsemɔ ni jara wa waa​—ni ma shi shiŋŋ ni anyɛŋ ahoso ni nyɛnine eshɛ nɔ nɛɛ hewɔ. Nyɛkɛ Yehowa jɔɔmɔi ajea kpo kɛyaa ni nyɛnaa hekɛnɔfɔɔ kwraa yɛ emli kɛ wɔhiɛnyiɛlɔ ni he yɔɔ naakpɛɛ lɛ hu, Yesu Kristo. Lɛlɛŋ, wiemɔi ni wɔyɔɔ yɛ Ŋmalɛi lɛ amli lɛ jɛ Nyɔŋmɔ mumɔ mli ni ebaabu nyɛhe ni ebaatsɔɔ nyɛ gbɛ yɛ maŋsɛɛ sanekpakpa shiɛmɔ nitsumɔ lɛ mli.”

Akane ŋamɔi ni akɛmaje kɛjɛ maji 11 nɔ lɛ atsɔɔ. Kɛkɛ ni nikaselɔi lɛ anine shɛ amɛyijiemɔ woji anɔ, ni amɛteŋ mɔ kome kane wolo ko ni tsɔɔ amɛtsuiaŋ henumɔ lɛ eha Nɔyeli Kuu lɛ kɛ Betel weku lɛ.

Akɛ Buu-Mɔɔ nikasemɔ ko ni akɛ be kuku ko fee fata shwane kpee lɛ he, ni David L. Walker ni eji Watchtower Farms Ajinafoi Akuu lɛ mli mɔ kome lɛ kwɛ nɔ. Kɛkɛ ni nikaselɔi lɛ kɛ saneyitso ni kanyaa mɔ ni ji “Hewalɛ ni Sɔlemɔ Yɔɔ yɛ Shiɛmɔ Mli” lɛ fee shiɛmɔ mli niiashikpamɔi ahe nɔkwɛmɔ nii. Asafo ko ni yɔɔ jɛmɛ niiaŋ lɛ fee drama ni yitso ji Aha Amɛye Amɛhe Koni Amɛha Anɔkwa Jamɔ Aya Hiɛ, ni damɔ bɔ ni Ezra ku esɛɛ kɛtee Yerusalem koni eyasaa etswa anɔkwa jamɔ ema shi ekoŋŋ lɛ nɔ lɛ amɛtsɔɔ. Nyɛminuu Frederick W. Franz, ni ji Gilead Skul lɛ sɛinɔtalɔ lɛ kɛ sɔlemɔ ko ni kanyaa mɔ mu nifeemɔ lɛ fɛɛ naa.

[Mfoniri ni yɔɔ baafa 24]

Watchtower Bible School of Gilead Iɛ Klasbii ni Ji 89 Nɔ

Gbɛi ni yɔɔ shishi Iɛ miitsɔɔ bɔ ni amɛdamɔ shi Iɛ mli kɛjɛ hiɛgbɛ kɛyaa sɛɛgbɛ ni amɛgbɛi Iɛ jeɔ shishi kɛjɛɔ abɛku gbɛ kɛyaa ninejurɔ gbɛ. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.