Obaanyɛ Oye Gbɛtsii Nii Nɛɛ Anɔ Kunim!
JUMBO jɛt kɔɔyɔŋ lɛlɛ baanyɛ atere gbɔmɛi ohai abɔ kɛ jatsũi ni tsiimɔ shɛɔ tɔn abɔ. Te kɔɔyɔŋ lɛlɛ ni tsii nɛɛ aaafee tɛŋŋ ashi shikpɔŋ? Yɛ ekukufoo mli lɛ, kɛtsɔ hewalɛ ko ni woɔ lɛ kɛyaa ŋwɛigbɛ lɛ nɔ.
Kɛ kɔɔyɔŋ lɛlɛ lɛ wo foi kɛtsɔ foijee he lɛ, kɔɔyɔɔ hoɔ kɛ foi kɛtsɔɔ efiji ni edɔrɔ lɛ ashishi. Enɛ kɛ hewalɛ ko ni woɔ lɛ kɛyaa ŋwɛigbɛ baa. Beni ena hewalɛ nɛɛ bɔ ni fa lɛ, lɛlɛ lɛ baanyɛ aye ehe kɛjɛ shikpɔŋ ni efa kɛya kɔɔyɔŋ. Shi, kɔɔyɔŋ lɛlɛ ni awo lɛ jatsũ fe nine lɛ nyɛŋ ana hewalɛ ni fa ni baawo nɔ kɛya kɔɔyɔŋ.
Wɔ hu wɔbaanyɛ wɔfee mɛi ni wɔtere jatsũ ni tsii. Afii ohai abɔ ni eho nɛ, ni Maŋtsɛ David kɛɛ akɛ ‘etɔmɔi lɛ tsii fe lɛ.’ (Lala 38:5) Nakai nɔŋŋ hu Yesu Kristo bɔ kɔkɔ akɛ wɔkafee mɛi ni shihilɛ mli yeyeeye-feemɔ tsii yɛ wɔ nɔ. (Luka 21:34) Susumɔi kɛ henumɔi ni ehiii baanyɛ atsii yɛ wɔ nɔ kɛyashɛ he ni ebaawa kɛha wɔ akɛ “wɔɔfa kɛya kɔɔyɔŋ.” Ani nɔ ko etsii yɛ onɔ yɛ nakai gbɛ nɔ? Aloo gbɛtsii nii ko ebaka omumɔŋ nɔyaa lolo lɛ hiɛ? Kɛji nakai ni lɛ, mɛni baanyɛ aye abua?
Ani Eje Otsine?
Tsinejee—nii ni mɛi fɔɔ he wiemɔ ŋmɛnɛ lɛ—baanyɛ afee jwɛŋmɔŋ gbɛtsii nii, kɛha Yehowa webii lɛ ateŋ mɛi komɛi po. Obalahii kɛ obalayei titri yɔɔ su ni haa amɛkuɔ amɛhiɛ amɛshwieɔ nifeemɔi komɛi anɔ akɛ ejeɔ mɔ tsine. Ani onuɔ he nakai yɛ bei komɛi amli yɛ Kristofoi akpeei ahe? Kɛji nakai ni lɛ, mɛni obaanyɛ ofee koni oha kpee ni oyaa lɛ afee nɔ ni kanyaa bo?
Ohe ni okɛaawo mli ji tsabaa lɛ. Paulo ŋma kɛyaha obalanyo Timoteo akɛ: “Ni obɔ Nyɔŋmɔ-jamɔ moŋ he mɔdɛŋ. Ejaakɛ gbɔmɔtso he mɔdɛŋbɔɔ he sɛɛnamɔ faaa, shi Nyɔŋmɔ-jamɔ he yɛ sɛɛnamɔ yɛ nii fiaa mli, ni eyɛ wala ni yɔɔ agbɛnɛ nɛɛ kɛ nɔ ni baaba lɛ he shiwoo.” (1 Timoteo 4:7, 8) Wolo ni kɔɔ gbɔmɔtsoŋ gbɔlemɔ he lɛ kanemɔ baafee nɔ ni jeɔ mɔ tsine kɛ wɔdiii gbɔlemɔ ni ewoɔ he ŋaa lɛ sɛɛ. Ato Kristofoi akpeei ahe gbɛjianɔ koni egbɔle wɔjwɛŋmɔi, ni ebaafee nakai kɛ wɔsaa wɔhe ni wɔkɛ wɔhe wo mli. He ni akɛwoɔ mli nɛɛ baaha kpeei afee nɔ ni sɛɛnamɔ kɛ miishɛɛ yɔɔ mli babaoo.
Obalayoo Kristofonyo ko ni atsɛɔ lɛ Mara wie yɛ enɛ he akɛ: “Kɛ misaaa mihe kɛhaaa kpeei lɛ, minaaa he miishɛɛ. Shi, kɛ mitsɔ hiɛ misaa mihe lɛ, mijwɛŋmɔ kɛ mitsui boɔ toi. Shishinumɔ baa kpeei lɛ amli babaoo, ni mikpaa mihe ni mikɛbaawo mli lɛ gbɛ.”
Sane toiboo ni aaakase hu baaye abua. Lala kpakpa toiboo waaa ni eŋɔɔ mɔ naa amrɔ nɔŋŋ. Shi jeee tsui ni nyɔɔ mɔ mli lɛ fɛɛ baa amrɔ nɔŋŋ. Kpee he gbɛjianɔtoo lɛ haa wɔtsui nyɔɔ wɔmli kɛ wɔbo nɔ ni akɛɔ lɛ toi jogbaŋŋ. Kristofonyo ko ni atsɛɔ lɛ Rachel kɛɛ: “Kɛ miishɛɛ bɛ wielɔ lɛ wiemɔ mli lɛ, ehe hiaa ni maha mijwɛŋmɔ ahi wiemɔ lɛ nɔ waa. Mla ni mito miha mihe ji, ‘Kɛ wiemɔ lɛ eŋɔɔɔ lɛ, ehe hiaa ni mikɛ mijwɛŋmɔ ama nɔ babaoo.’ . . . Misusuɔ ŋmalɛi lɛ ahe waa, ni mifeɔ bɔ ni manyɛ koni mana babaoo kɛjɛ mli.” Ehe miihia ni wɔtsɔse wɔhe tamɔ Rachel, bɔni afee ni wɔbo sane toi. Abɛi awolo lɛ kɛɔ akɛ: “Mibi, bo minilee lɛ toi, ni oka otoi oha misanesɛɛkɔmɔ lɛ.”—Abɛi 5:1.
Saji komɛi ni akɛhaa yɛ kpeei ashishi lɛ baanyɛ atamɔ sane-mlitii. Ni ehe miihia hu! Kaimɔi he hiaa Nyɔŋmɔ tsuji fɛɛ. Yelikɛbuamɔi fɛɛ ni nine aaashɛ nɔ lɛ he miihia heloo ni yeee emuu lɛ, kɛ ekɔnɔi gbohii, kɛ ekaimɔ ni tɔɔ fã lɛ. Bɔfo Petro ‘kaiɔ nanemɛi heyelilɔi lɛ yɛ nibii komɛi ahe, eyɛ mli akɛ amɛle momo ni amɛnane emɔ shi shiŋŋ yɛ anɔkwale lɛ mli.’ (2 Petro 1:12) Yesu hu tsɔɔ mli akɛ, “maŋ tsɔselɔ fɛɛ tsɔselɔ . . . tamɔ nuu ko, shiatsɛ ko, ni jieɔ nii heei kɛ nii memeji kɛjɛɔ ejwetri fiase lɛ mli.” (Mateo 13:52, NW) No hewɔ lɛ, yɛ be mli ni wɔ kpeei kɛ Ŋmalɛ mli susumɔi ni wɔle, loo ‘jwetrii memeji’ baa lɛ, ‘jwetrii heei’ yɛ be fɛɛ be ni baaŋɔɔ wɔnaa.
Nɔ ni baajɛ wɔfai shi ni wɔɔtswa akɛ wɔɔna kpeei lɛ ahe sɛɛ kɛmɔ shi lɛ mli aba ji mumɔŋ hewalɛwoo diɛŋtsɛ. Yesu kɛɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ [mɛi ni kpaa mumɔ lɛ he fai].” (Mateo 5:3, NW, shishigbɛ niŋmaa) Su ni tamɔ nɛkɛ ni anaa yɛ mumɔŋ niyenii kpakpa ni akɛhaa yɛ kpeei ashishi lɛ he lɛ baashwie tsinejee lɛ kɛya.—Mateo 24:45-47.
Nɔkwɛmɔ Nɔ Fɔŋ Eje Onijiaŋ Wui?
Ani mɔ ko ni yɔɔ nyɛ asafo lɛ mli lɛ subaŋ ehao bo? Ekolɛ osusu akɛ, ‘Te nyɛmi ko aaafee tɛŋŋ aba ejeŋ nɛkɛ, ni kɛlɛ eya nɔ ena shidaamɔ kpakpa hu?’ Susumɔi ni tamɔ nɛkɛ baanyɛ atsɔ jwɛŋmɔŋ gbɛtsii nii, ni ehaŋ wɔna sɛɛnamɔ ni yɔɔ naanyobɔɔ kpakpa ni wɔɔnyɛ wɔkɛ Nyɔŋmɔ webii ana lɛ mli lɛ.—Lala 133:1.
Ekolɛ asafo lɛ mli bii komɛi ni yɔɔ Kolose lɛ yɛ naagba ko ni tamɔ nakai. Paulo wo amɛ ŋaa akɛ: “Ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe.” (Kolosebii 3:13) Paulo yoo akɛ, ekolɛ Kolose Kristofoi lɛ ateŋ mɛi komɛi eba amɛjeŋ yɛ gbɛ ni ehiii nɔ, ni enɛ eha mɛi komɛi miiwie he yɛ gbɛ ni ja nɔ. No hewɔ lɛ, esaaa akɛ wɔhaa efeɔ wɔ naakpɛɛ tsɔ̃, kɛ anaaa Kristofoi asui komɛi yɛ wɔnyɛmimɛi hii loo yei lɛ ateŋ mɔ ko he yɛ bei komɛi amli. Yesu kɛ ŋaawoo kpakpa ha yɛ naagbai ni hiɛdɔɔ yɔɔ mli lɛ asaamɔ he. (Mateo 5:23, 24; 18:15-17) Shi, wɔbaanyɛ wɔdamɔ wɔnanemɛi heyelilɔi lɛ afatɔɔi anaa ni wɔkɛ sane ake amɛ yɛ bei pii amli. (1 Petro 4:8) Yɛ anɔkwale mli lɛ, nifeemɔ ni tamɔ nɛkɛ baanyɛ afee nɔ ni hi kɛha wɔ kɛ mɛi krokomɛi. Mɛni hewɔ nɛkɛ sane lɛ ji?
Abɛi 19:11 kɛɔ akɛ: “Gbɔmɔ ni yɔɔ jwɛŋmɔ lɛ emli fuuu mra, ni ehiɛ ni ekuɔ efɔɔ nɔtɔmɔ nɔ lɛ, ehiɛnyam ni.” Kwɛ bɔ ni ehi jogbaŋŋ moŋ akɛ okɛ sane aaake fe ni oooŋmɛ mlifu kɛ hetsɛ̃ gbɛ koni efite nii! Salvador, onukpa ko ni ale lɛ akɛ esumɔɔ mɔ waa lɛ kɛɛ: “Kɛ nyɛmi ko fee mi efɔŋ loo ejɛ mi lɛ, mibiɔ mihe akɛ: ‘Mɛɛ gbɛ nɔ matsɔ maye mabua minyɛmi lɛ? Te mafee tɛŋŋ makwa mikɛ lɛ teŋ wekukpaa ni jara wa nɛɛ laajemɔ?’ Mihiɛ yɛ bɔ ni ewaaa akɛ aaawie nɔ ko ni ehiii lɛ nɔ be fɛɛ be. Kɛ mɔ ko wie wiemɔi ni jwɛŋmɔ bɛ mli lɛ, tsabaa ni hi fe fɛɛ ji ni egbala nɔ ni ewie lɛ sɛɛ ni eje fɛɛ shishi ekoŋŋ. Shi enɛ ehiŋ feemɔ, no hewɔ lɛ, mitsɔɔ gbɛ ni hi fe fɛɛ lɛ nɔ, ni mikuɔ mihiɛ mishwieɔ wiemɔ lɛ nɔ. Mibuɔ enɛ akɛ heloo ni yeee emuu lɛ mlifu wiemɔi moŋ, fe bɔ ni minyɛmi lɛ ji diɛŋtsɛ lɛ kpojiemɔ.”
Ekolɛ obaanu he akɛ enɛ wiemɔ waaa kwraa tamɔ efeemɔ. Shi kɛlɛ, babaoo damɔ bɔ ni wɔkudɔɔ wɔjwɛŋmɔ wɔhaa lɛ nɔ. Paulo wo ŋaa akɛ: “Nii abɔ ni adɔɔ he, . . . enɛɛmɛi anɔ nyɛjwɛŋa.” (Filipibii 4:8) “Adɔɔ he” shishi diɛŋtsɛ ji “nɔ ni kanyaa hedɔɔ.” Yehowa miisumɔ ni wɔsusu nibii ni hi yɛ gbɔmɛi amli lɛ he, wɔkɛ wɔjwɛŋmɔ ama nɔ ni kanyaa hedɔɔ moŋ nɔ fe hetsɛ̃. Lɛ diɛŋtsɛ ekɛ enɛ he nɔkwɛmɔ nɔ ni fe fɛɛ haa wɔ. Lalatsɛ lɛ kaiɔ wɔ akɛ: “Kɛji bo, Yehowa, okɛɛ ooodi nishaianii asɛɛ lɛ, kulɛ Nuntsɔ [Yehowa], namɔ po aaanyɛ shi adamɔ?”—Lala 103:12; 130:3.
Eji anɔkwale akɛ, yɛ bei komɛi amli lɛ, nyɛmi ko subaŋ baafee nɔ ni ehiii, shi wɔ nanemɛi jalɔi lɛ ateŋ mɛi ni fa ji Kristofoi ashihilɛ he nɔkwɛmɔ nii kpakpai ni nɔ bɛ. Kɛ wɔkai enɛ lɛ, wɔbaana miishɛɛ tamɔ David, ‘ni wɔda Yehowa shi babaoo, ni wɔjie eyi yɛ mɛi pii ateŋ.’—Lala 109:30.
Ani Odasefonyo ni Oji lɛ Tamɔ Nɔ Ko ni Wa Tsɔ?
Nɔ ni yɔɔ mɔbɔ ji, yɛ jwɛŋmɔŋ gbɛtsii nii kroko hewɔ lɛ, mɛi komɛi ejeko Yehowa yijiemɔ shishi lolo. Hii babaoo ni jeee Yehowa Odasefoi kwɛɔ amɛ wekui, ni amɛfiɔ amɛŋamɛi asɛɛ po yɛ Kristofoi asɔɔmɔ lɛ mli. Amɛyɛ naanyobɔɔ su, ni ekolɛ amɛnyaa asafo lɛ nifeemɔi ahe, shi amɛtsiɔ amɛhe kɛjɛɔ Nyɔŋmɔ tsuji ni ejɔɔ amɛhe nɔ ni amɛaafee lɛ he. Mɛni tsiɔ amɛ gbɛ?
Ekolɛ naagba kome baanyɛ afee akɛ, nɛkɛ wumɛi nɛɛ naa amɛ ŋamɛi ateokrase nitsumɔ ni deka bɛ mli lɛ, ni amɛnuɔ he akɛ Odasefonyo ni mɔ ko aaaji lɛ biɔ babaoo tsɔ̃. Aloo ekolɛ amɛsheɔ gbeyei akɛ amɛnyɛŋ amɛkɛ amɛhe awo shia kɛ shia shiɛmɔ nitsumɔ lɛ mli kɔkɔɔkɔ. Yɛ amɛjwɛŋmɔ naa lɛ, etamɔ nɔ ni gbɛnaa nii lɛ haa jɔɔmɔi lɛ anɔ. Mɛni hewɔ jwɛŋmɔŋ gbɛtsii nii? Biblia kaselɔi lɛ ateŋ mɛi ni fa kaseɔ anɔkwale lɛ ni amɛkɛtsuɔ nii fiofio. Shi, yɛ bei pii amli lɛ, wumɛi ni heee yeee lɛ fɛɛ le Kristofoi agbɛnaa nii lɛ fɛɛ jogbaŋŋ dani amɛnaa kanyamɔ kɛhaa amɛ nɔkpɛlɛmɔ.
Manuel, ni yɔɔ shihilɛ nɛɛ mli lɛ tsɔɔ mli akɛ: “Mifata miŋa he kɛtee kpeei wuji kɛ asafoŋ kpeei afii nyɔŋma. Kɛ mawie anɔkwale lɛ, misumɔɔ Odasefoi lɛ anaanyobɔɔ fe gbɔmɛi ni yɔɔ je lɛ mli lɛ nɔ̃, ni mimii shɛɔ mihe akɛ maye mabua amɛ beni manyɛ. Suɔmɔ ni yɔɔ amɛteŋ lɛ sa mihiɛ waa. Shi, shia kɛ shia yaa he jwɛŋmɔ lɛ ji gbɛtsii nii agbo ko kɛha mi, ni miishe gbeyei akɛ minanemɛi nitsulɔi baaye mihe fɛo.
“Miŋa toɔ etsui shi waa ehaa mi, ni enyɛɛɛ minɔ kɔkɔɔkɔ akɛ mikase Biblia lɛ. Lɛ kɛ gbekɛbii lɛ fɛɛ ‘shiɛ’ kɛtsɔ amɛ nɔkwɛmɔ nɔ kpakpa nɔ titri. José, ni ji onukpa yɛ asafo lɛ mli lɛ na mihe miishɛɛ krɛdɛɛ ko. Misusuɔ akɛ, ehewalɛwoo lɛ ha yɛ naagbee lɛ mikɛ hiɛdɔɔ je nikasemɔ shishi. Beni abaptisi mi sɛɛ lɛ, miyoo akɛ gbɛtsii nii lɛ yɛ mi diɛŋtsɛ mijwɛŋmɔ mli babaoo moŋ fe nɔ fɛɛ nɔ. Beni mikpɛ miyiŋ akɛ masɔmɔ Yehowa pɛ kɛkɛ ni minine shɛ eyelikɛbuamɔ ni baaha maye migbeyeishemɔi lɛ anɔ kunim nɔ.”
Mɛɛ gbɛ ŋamɛi kɛ Kristofoi onukpai aaatsɔ nɔ aye abua wumɛi ni tamɔ Manuel ni amɛye amɛ jwɛŋmɔŋ gbɛtsii nii lɛ anɔ kunim? Biblia kasemɔ baanyɛ atswa hiɛsɔɔ kɛ suɔmɔ ni aaana akɛ aaafee Nyɔŋmɔ suɔmɔnaa nii ama shi. Yɛ anɔkwale mli lɛ, Ŋmalɛ mli nilee ni yeɔ emuu ji nɔdaamɔ nɔ kɛha hemɔkɛyeli ni aaana kɛ hekɛnɔfɔɔ ni ayɔɔ yɛ hiɛnɔkamɔ ni ka wɔhiɛ lɛ mli.—Romabii 15:13.
Mɛni baawo wumɛi ni tamɔ nɛkɛ hewalɛ ni amɛkpɛlɛ Biblia mli nikasemɔ nɔ? Yɛ bei komɛi amli lɛ, naanyo ni ekɛ nyɛminuu ko ni nuɔ mɔ shishi ni yɔɔ asafo lɛ mli aaabɔ lɛ ji nɔ titri ni yeɔ buaa. Ekolɛ onukpa ko loo nyɛminuu kroko ni yɔɔ niiashikpamɔ baanyɛ atao akɛ eeele wu lɛ. Kɛ ato wekukpaa kpakpa afɔ shi pɛ kɛkɛ lɛ, nɔ ni he baahia lɛ pɛ ji ni mɔ ko abi ni ekɛ lɛ akase nii. (1 Korintobii 9:19-23) Yɛ nakai beaŋ nɔŋŋ lɛ, Kristofonyo ŋa hiɛtɛlɔ lɛ baanyɛ ekɛ mumɔŋ niyenii bibii komɛi aha ewu ni heee yeee lɛ, ni eyoo akɛ ekolɛ ekpɛlɛŋ nɔnyɛɛ nɔ.—Abɛi 19:14.
Taakɛ Manuel kase kɛtsɔ niiashikpamɔ nɔ lɛ, kɛ mɔ ko na mumɔŋ hewalɛ pɛ kɛkɛ lɛ, gbɛtsii nii ni tamɔ gɔji lɛ batsɔmɔɔ tamɔ akofii. Yehowa woɔ mɛi ni sumɔɔ ni amɛsɔmɔ lɛ lɛ hewalɛ. (Yesaia 40:29-31) Abaanyɛ ajie gbɛtsii nii lɛ kɛya yɛ Nyɔŋmɔ hewalɛ kɛ sɛɛfimɔ ni Odasefoi ni amɛdara lɛ kɛhaa lɛ mli. Kɛkɛ lɛ shia kɛ shia nitsumɔ lɛ efeŋ nɔ ni woɔ mɔ he gbeyei tsɔ̃, ni nanemɛi nitsulɔi enyɛŋ amɛnɔ babaoo, beni susuma muu fɛɛ mli sɔɔmɔ bafeɔ nɔ ni ŋɔɔ waa lɛ.—Yesaia 51:12; Romabii 10:10.
Hewalɛ ni Kanyaa Mɔ lɛ ni Aaahiɛ Mli
Abaanyɛ aye gbɛtsii nii anɔ kunim, tamɔ etɛ ni wɔsusu he lɛ. Kɛ kɔɔyɔŋ lɛlɛ fã lɛ, ebiɔ tsɔne hewalɛ ni eye muu kɛ agbɛnɛ ekudɔlɔi lɛ ajwɛŋmɔ fɛɛ ni aaahi nɔ. Kɛ kɔɔyɔŋ lɛlɛ lɛ miifa lɛ, tsɔnei lɛ gbalaa mũ ni akɛwoɔ mli lɛ babaoo fe bɔ ni eji yɛ egbɛfaa lɛ mli nifeemɔ ko mli. Nakai nɔŋŋ dani aaaye he kɛaajɛ susumɔi kɛ henumɔi ni ejaaa he lɛ biɔ mɔdɛŋbɔɔ kɛ nɔjwɛŋmɔ ni yeɔ emuu. Eshishijee baanyɛ afee nɔ ni wa fe fɛɛ, shi kɛ abɔi yaa pɛ kɛkɛ lɛ nɔyaa efee mlɛo.—Okɛto 2 Petro 1:10 he.
Hiɛyaa yaa nɔ kɛ abo Ŋmalɛ mli hewalɛwoo toi amrɔ nɔŋŋ. (Lala 119:60) Wɔbaanyɛ wɔna nɔmimaa akɛ asafo lɛ baasumɔ ni eye ebua. (Galatabii 6:2) Shi, nɔ ni he hiaa fe fɛɛ ji sɛɛfimɔ ni jɛ Yehowa Nyɔŋmɔ ŋɔɔ. Taakɛ David kɛɛ lɛ, “ajie Yehowa yi, mɔ ni daa nɛɛ etereɔ wɔjatsui lɛ ehaa wɔ lɛ.” (Lala 68:20) Kɛ wɔjie wɔjatsui lɛ wɔshwie shi yɛ sɔlemɔ mli lɛ, amɛbafeɔ nɔ ni etsiii.
Yɛ bei komɛi amli lɛ kɔɔyɔŋ lɛlɛ fãa beni nugbɔ enɛ ni jeŋ efee kusuu, etsɔɔ atatu kusuu mli, kɛboteɔ ŋwɛi atatu ni hulu kpɛɔ shwieɔ nɔ babaoo mli. Wɔ hu wɔbaanyɛ wɔshi susumɔi ni ejaaa lɛ yɛ wɔ sɛɛ. Wɔbaanyɛ wɔtsɔ nɔ ni tamɔ atatu kusuu lɛ mli kɛ ŋwɛi yelikɛbuamɔ, ni wɔyana miishɛɛ babaoo yɛ la ni ebɔle Yehowa jeŋ muu fɛɛ jalɔi aweku lɛ he kɛkpe lɛ mli.
[Mfonirii ni yɔɔ baafa 23]
Wɔbaanyɛ wɔye jwɛŋmɔŋ gbɛtsii nii anɔ kunim, kɛ Yehowa yelikɛbuamɔ