Namɔ Baafee Mɔ ni Yehowa Ekpɛlɛ Enɔ?

“Nyɛtsua nyɛ diɛŋtsɛ nyɛ yiwalaheremɔ he nii . . .; ejaakɛ suɔmɔ ni aaasumɔ jio, feemɔ ni aaafee jio, Nyɔŋmɔ ji mɔ ni tsuɔ fɛɛ yɛ nyɛmli yɛ emlihilɛ naa.”​—FILIPIBII 2:​12, 13.

 1, 2. Mɛɛ shihilɛ mli Yesu nine shɛ ŋwɛi nɔkpɛlɛmɔ be wiemɔ nɔ yɛ, ni mɛni hewɔ esa akɛ wɔnya enɛ he lɛ?

EJI tsakemɔ be yɛ yinɔsane mli. Yohane Baptisilɔ lɛ miishiɛ Nyɔŋmɔ wiemɔ lɛ ni eemii mɛi ni amɛtsake amɛtsui lɛ nu. Kɛkɛ ni nuu ko ni Yohane le akɛ eji jalɔ ba eŋɔɔ; lɛ ji Yesu. Ebɛ esha ko ni ehe baahia ni etsake etsui yɛ he, ni kɛlɛ ebi ni abaptisi lɛ ‘koni atsu nɔ fɛɛ nɔ ni ja gbɛ he nii.’​—Mateo 3:​1-15.

² Yɛ be mli ni Yohane efee nakai yɛ heshibaa mli, ni Yesu je kpo kɛjɛ nu lɛ mli sɛɛ lɛ, “agbele ŋwɛi naa aha lɛ, ni ena Nyɔŋmɔ mumɔ lɛ miikpeleke shi tamɔ okpo kɛmiiba enɔ.” Nɔ ni fe nakai lɛ, “gbee ko jɛ ŋwɛi kɛɛ: ‘Mɔ nɛɛ ji mi-Bi, ni misumɔɔ, ni mikpɛlɛ enɔ lɛ.’” (Mateo 3:​16, 17; Marko 1:​11, New World Translation) Mɛɛ adafitswaa nɛ! Wɔ fɛɛ wɔnyaa mɔ ko ni wɔbuɔ lɛ lɛ ni wɔɔsa ehiɛ lɛ he. (Bɔfoi lɛ Asaji 6:​3-6; 16:​1, 2; Filipibii 2:​19-22; Mateo 25:21) Belɛ susumɔ bɔ ni ooonu he oha kɛji akɛ Nyɔŋmɔ Ofe lɛ aaatswa adafi akɛ, ‘Mikpɛlɛ onɔ’ lɛ!

 3. Mɛni esa akɛ wɔsusu he waa yɛ Nyɔŋmɔ nɔkpɛlɛmɔ he?

³ Ani mɔ ko baanyɛ afee mɔ ni Nyɔŋmɔ ekpɛlɛ enɔ ŋmɛnɛ? Akɛ nɔkwɛmɔ nɔ lɛ, ŋɔɔ gbɔmɔ ni ‘bɛ hiɛnɔkamɔ ko ni ebɛ Nyɔŋmɔ ko yɛ je lɛ mli,’ ni ‘atse lɛ kɛjɛ wala ni ji Nyɔŋmɔ nɔ lɛ he’ lɛ nɛkɛ okwɛ. (Efesobii 2:​12; 4:18) Ani ebaanyɛ eshi nakai shihilɛ lɛ mli kɛya shihilɛ ni jɔɔmɔ yɔɔ mli ni ji mɔ ni Yehowa ekpɛlɛ enɔ ni eeetsɔ lɛ mli? Kɛji nakai lɛ, yɛ mɛɛ gbɛ nɔ? Nyɛhaa wɔkwɛa.

Mɛni Ji Nɔ Ni Ewiemɔi Lɛ Tsɔɔ?

 4. (a) Mɛni ji shihinumɔ ni yɔɔ Hela wiemɔ “mikpɛlɛ enɔ” ni yɔɔ Nyɔŋmɔ wiemɔ lɛ mli lɛ shishi? (b) Mɛni hewɔ gbɛ ni atsɔ nɔ akɛtsu nii yɛ sane nɛɛ mli lɛ he hiaa waa lɛ?

⁴ Sanekpakpa lɛ ni ŋma Nyɔŋmɔ wiemɔi “mikpɛlɛ [Yesu] enɔ” lɛ kɛ Bela feemɔ-wiemɔ eu·do·keʹo tsuɔ nii. (Mateo 3:​17; Marko 1:​11; Luka 3:22) Eshishi ji “esa hiɛ jogbaŋŋ, akwɛ lɛ kɛ duromɔ, anya he,” ni egbɛi su lɛ hiɛ shishinumɔ ni ji “na he tsui, esa hiɛ, duromɔ, ashwe, asumɔ.” Akɛ eu·do·keʹo tsuuu nii kɛhaaa ŋwɛi nɔkpɛlɛmɔ pɛ. Akɛ nɔkwɛmɔ nɔ lɛ, Kristofoi ni yɔɔ Makedonia lɛ ‘yɛ he tsui’ akɛ amɛkɛ mɛi krokomɛi aaaja amɛshika. (Romabii 10:1; 15:​26; 2 Korintobii 5:8; 1 Tesalonikabii 2:8; 3:⁠1) Ni kɛlɛ, Nyɔŋmɔ ji mɔ ni wie nɔkpɛlɛmɔ ni Yesu nine shɛ nɔ lɛ, shi jeee gbɔmɛi. Akɛ nɛkɛ wiemɔ nɛɛ tsuɔ nii akɛtoɔ Yesu he yɛ ebaptisimɔ lɛ sɛɛ pɛ. (Mateo 17:5; 2 Petro 1:17) Nɔ ni yɔɔ miishɛɛ lɛ, Luka 2:52 kɛ wiemɔ kroko​—kha’ris​—tsu nii yɛ be mli ni ewieɔ Yesu he akɛ obalanyo ni abaptisiko lɛ ni nine shɛ Nyɔŋmɔ kɛ gbɔmɛi “aduromɔ” nɔ lɛ he.

 5. (a) Akɛ Nyɔŋmɔ baanyɛ akpɛlɛ adesai ni yeee emuu lɛ anɔ lɛ, enɛ jɛɔ kpo yɛ mɛɛ gbɛ nɔ? (b) Namɛi ji ‘tsuijurɔnaa bii’ lɛ?

⁵ Ani eeenyɛ eba akɛ wɔ hu ni wɔji adesai ni yeee emuu lɛ nine aaashɛ Nyɔŋmɔ nɔkpɛlɛmɔ nɔ? Yɛ miishɛɛ mli lɛ, hetoo lɛ ji hɛɛ. Beni afɔ Yesu lɛ, ŋwɛibɔfoi lɛ tswa adafi akɛ: “Anunyam aha Nyɔŋmɔ yɛ ŋwɛi fioofio, ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ [eu·do·kiʹas].” (Luka 2:14) Yɛ hela wiemɔ diɛŋtsɛ mli lɛ, ŋwɛibɔfoi lɛ miila jɔɔmɔ ni baa “gbɔmɛi ni asusu amɛhe jogbaŋŋ” aloo “gbɔmɛi ni Nyɔŋmɔ kpɛlɛɔ amɛnɔ” lɛ ahe lala.a Nilelɔ Hans Bietenhard ŋma yɛ nɛkɛ en an·throʹpois eu·do·kiʹas ni akɛtsuɔ nii lɛ he akɛ: “Wiemɔ kuku lɛ kɔɔ gbɔmɛi ni Nyɔŋmɔ yɔɔ amɛhe tsui lɛ ahe . . . No hewɔ lɛ jeee tsuijurɔ ni gbɔmɛi aaana yɛ mɛi ahe lɛ he sane wɔwieɔ yɛ biɛ lɛ . . . Shi wɔmiiwie Nyɔŋmɔ maŋtsɛyeli kɛ eduromɔ suɔmɔnaa nii, ni haa ehalaa gbɔmɛi kɛhaa yiwalaheremɔ kɛhaa lɛ diɛŋtsɛ ehe lɛ he.” No hewɔ lɛ, taakɛ Yehowa Odasefoi ejɛ jeeŋmɔ amɛtsɔɔ mli lɛ, Luka 2:14 tsɔɔ akɛ kɛtsɔ henɔjɔɔmɔ kɛ baptisimɔ nɔ lɛ, adesai ni yeee emuu lɛ baanyɛ atsɔmɔ tsuijurɔnaa bii, gbɔmɛi ni Nyɔŋmɔ ekpɛlɛ amɛnɔ!b

 6. Mɛni ehe hiaa ni wɔkase lolo yɛ Nyɔŋmɔ nɔkpɛlɛmɔ he?

⁶ Shi, ekolɛ obaayoo nɔ sɔrɔtofeemɔ ni yɔɔ ‘Nyɔŋmɔ henyɛlɔi ni hiɛ jwɛŋmɔi ni yɔɔ nitsumɔi fɔji anɔ’ ni mɔ ko ji lɛ kɛ ni aaakpɛlɛ mɛi anɔ akɛ wɔ-Nyɔŋmɔ ni ja ni yɔɔ nilee lɛ hefatalɔi lɛ teŋ. (Kolosebii 1:​21; Lala 15:​1-5) No hewɔ lɛ, eyɛ mli akɛ otsui baanyɔ omli akɛ ooonu akɛ adesai baanyɛ atsɔmɔ mɛi ni akpɛlɛ amɛnɔ moŋ, shi obaasumɔ ni ole nɔ ni yɔɔ enɛ mli loo ekɔɔ he. Wɔbaanyɛ wɔjɛ Nyɔŋmɔ tsutsu nitsumɔi amli wɔkase babaoo yɛ enɛ he.

Ehere Gbɔmɛi Kɛha Eŋɔɔ

 7. 2 Mose 12:38 tsɔɔ mɛni yɛ Nyɔŋmɔ subaŋ he?

⁷ Afii ohai abɔ dani adafitswaa ni yɔɔ Luka 2:14 lɛ aaaba lɛ, Yehowa here gbɔmɛi akɛ amɛba eŋɔɔ ni amɛbaja lɛ. Shi, no mli lɛ, Nyɔŋmɔ kɛ Israel maŋ lɛ pɛ ni amɛjɔɔ amɛhe nɔ amɛha lɛ lɛ yeɔ. (2 Mose 19:​5-8; 31:​16, 17) Shi kaimɔ akɛ, beni Israel shi Mizraim nyɔŋyeli mli lɛ, “futufutu gbɔmɛi babaoo hu fata amɛhe kɛtee.” (2 Mose 12:38) Nɛkɛ gbɔmɛi ni jeee Israelbii ni kɛ Nyɔŋmɔ webii hi shi ni ye haomɔi ni ba Mizraim nɔ lɛ he odase lɛ hala akɛ amɛkɛ Israel baaya agbɛnɛ. Eka shi faŋŋ akɛ amɛteŋ mɛi komɛi batsɔmɔ mɛi ni amɛtsake kɛba Yuda jamɔ mli kwraa.

 8. Mɛɛ gbɔi sɔrɔtoi enyɔ nɛkɛ hi Israel, ni mɛni hewɔ sɔrɔtofeemɔ yɔɔ bɔ ni Israelbii lɛ kɛ amɛyɛ ha lɛ mli lɛ?

⁸ Mla kpaŋmɔ lɛ kpɛlɛ shihilɛ mli ni mɛi ni jeee Israelbii lɛ yɔɔ kɛ akɛ amɛ miito Nyɔŋmɔ kɛ ewebii lɛ ahe lɛ nɔ. Gbɔi lɛ ekomɛi ji gbɔmɛi ni hiɔ Israel shikpɔŋ lɛ nɔ kɛkɛ, he ni esa akɛ amɛbo shishijee mlai atoi yɛ, tamɔ nɔ ni akɛteɔ shi awoɔ gbɔmɔgbee kɛ nɔ ni biɔ ni aye Hejɔɔmɔ Gbi lɛ nɛkɛ. (Nehemia 13:​16-21) Ni amɛaakpɛlɛ nɛkɛ gbɔmɛi nɛɛ anɔ akɛ nyɛmimɛi lɛ, Israelnyo kwɛɔ jogbaŋŋ bɔ ni sa kɛ ekɛ amɛ miiwie aloo ekɛ amɛ miiye, ejaakɛ amɛnako amɛfee Nyɔŋmɔ maŋ lɛ fa. Akɛ nɔkwɛmɔ nɔ lɛ, beni aŋmɛɛɛ Israelnyo gbɛ koni ehe ni eye loo ni ashwieee ela shi jogbaŋŋ akɛni lɛ diɛŋtsɛ egbo hewɔ lɛ, nɛkɛ gbɔi nɛɛ ni tsakeko kɛbako Yuda jamɔ mli lɛ baanyɛ ayɛ loo ni tamɔ nɛkɛ. (5 Mose 14:​21; Ezekiel 4:14) Yɛ bɛ ni sa mli lɛ, nɛkɛ gbɔi ni hiɔ shikpɔŋ lɛ nɔ lɛ atɛŋ mɛi komɛi baanyiɛ mɛi krokomɛi ni batsɔmɔ heyelilɔi ni afolɔ amɛ ketia lɛ asɛɛ. No mli pɛ abaanyɛ akɛ amɛ aye akɛ nyɛmimɛi yɛ anɔkwa jamɔ mli, ni ehe baahia ni amɛye Mla muu lɛ fɛɛ nɔ. (3 Mose 16:​29; 17:​10; 19:​33, 34; 24:22) Rut, Moabyoo lɛ kɛ Naeman, Sirianyo kpitiyelɔ lɛ jeee Israelbii, shi Nyɔŋmɔ here amɛ.​—Mateo 1:5; Luka 4:⁠27.

 9. Mɛɛ gbɛ nɔ Salomo tsɔ ema su ni Nyɔŋmɔ hiɛ yɛ gbɔi loo maŋsɛɛbii ahe lɛ nɔ mi yɛ?

⁹ Yɛ Maŋtsɛ Salomo gbii lɛ amli lɛ, wɔnaa bɔ ni Nyɔŋmɔ here gbɔmɛi ni jeee Israelbii lɛ hu. Yɛ bɛ mli ni egbeleɔ sɔlemɔtsu lɛ naa lɛ, Salomo sɔle akɛ: “Ni gbɔ tete ni jɛɛɛ omaŋ Israelbii lɛ atɛŋ, shi moŋ ogbɛi lɛ hewɔ ejɛ maŋsɛɛ shɔŋŋ eba . . . Kɛ eba ni ebasɔle yɛ nɛkɛ shia nɛɛ hiɛ lɛ: bo toi yɛ ŋwɛi, . . . bɔni afee ni shikpɔŋ lɛ nɔ majimaji fɛɛ alɛ ogbɛi lɛ, koni amɛsheɔ gbeyei tamɔ omaŋ Israel.” (1 Maŋtsɛmɛi 8:​41-43) Hɛɛ, Yehowa kpɛlɛɔ gbɔi anɔkwafoi ni taoɔ esɛɛ gbɛ lɛ asɔlemɔi anɔ. Ekolɛ mɛnɛɛmɛi hu baakase emlai lɛ, ni amɛŋmɛ gbɛ ni afolɔ amɛ ketia, ni amɛbatsɔmɔ ewebii ni ajɔɔ amɛ lɛ ateŋ mɛi komɛi.

10. Kulɛ te Yudafoi lɛ kɛ Etiopia piafonyo lɛ baaye aha tɛŋŋ, ni mɛni hewɔ ketiafoo he ba sɛɛnamɔ kɛha lɛ lɛ?

¹⁰ Nuu ko ni fee enɛ yɛ sɛɛ mli bei lɛ amli ji Maŋnyɛ Kandake ni yɔɔ Etiopia shɔŋŋ lɛ shika nɔkwɛlɔ lɛ. Eka shi faŋŋ akɛ, be mli ni enu Yudafoi lɛ kɛ amɛjamɔ lɛ he klɛŋklɛŋ lɛ, no mli lɛ eshihilɛ loo jamɔ gbɛi lɛ ji nɔ ni Yehowa ekpɛlɛɛɛ nɔ. No hewɔ lɛ ehɛ baahia ni Yudafoi lɛ ato amɛtsui shi amɛha nuu ni ji gbɔ nɛɛ yɛ bɛ mli ni ekaseɔ Mla lɛ koni ele Nyɔŋmɔ taomɔ nii lɛ. Eka shi faŋŋ akɛ etee hiɛ efee tsakemɔi ni he hiaa lɛ koni ehe abasa koni afo lɛ ketia. Bɔfoi lɛ Asaji 8:27 kɛɔ wɔ akɛ “ebaho Yerusalem eyaja Nyɔŋmɔ.” (2 Mose 12:​48, 49) Enɛ baatsɔɔ akɛ no mli lɛ eji mɔ ni etsake ebatsɔ Yudanyo. No hewɔ lɛ ebaje shihilɛ ni baaha ekpɛlɛ Mesia lɛ nɔ ni ebatsɔ ekaselɔ ni abaptisi lɛ mli, koni ebakpɛlɛ Nyɔŋmɔ suɔmɔnaa nifeemɔ ni yaa ehiɛ lɛ nɔ.

Mɛi ni Heee Yeee lɛ kɛ Kristofoi Asafo Lɛ

11, 12. (a) Mɛɛ tsakemɔ kroko ba beni abaptisi Etiopianyo lɛ? (b) Enɛ kɛ Filipibii 2:​12, 13 kpaa gbee yɛ mɛɛ gbɛ nɔ‘?

¹¹ Yesu kɛɛ ekaselɔi lɛ akɛ: “No hewɔ lɛ nyɛyaa ni nyɛyafeɔ jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛyɛ nii fiaa ni mikɛɛ nyɛ lɛ nɔ.” (Mateo 28:​19, 20) Etiopianyo lɛ ni etsake ejamɔ ni wɔtsi eta momo lɛ yɛ Yehowa kɛ mumɔ krɔŋkrɔŋ lɛ he nilee momo. No hewɔ lɛ beni Filipo ye bua lɛ ni enu shishi ni ekpɛlɛ Yesu, Nyɔŋmɔ Bi ni ji Mesia lɛ nɔ lɛ, abaanyɛ abaptisi lɛ. Belɛ ebaanyɛ efee Yehowa webii ni nyiɛ Kristo sɛɛ ni akpɛlɛ amɛnɔ lɛ atɛŋ mɔ ko. No hewɔ lɛ, taakɛ abaakpa gbɛ lɛ, ebaabu ehe akɔntaa eha Nyɔŋmɔ, ejaakɛ ebaabi ‘ni eye nii fiaa ni afa’ Kristofoi lɛ nɔ. Shi nɔ ni fataa nɛkɛ akɔntaa ni eeebu ehe eha Nyɔŋmɔ nɛɛ he baa ji naakpɛɛ gbɛkpamɔ ko: yiwalaheremɔ!

¹² Yɛ sɛɛ mli lɛ, Paulo ŋma akɛ ehɛ miihia ni Kristofoi fɛɛ ‘aya nɔ atsu amɛ diɛŋtsɛ amɛ yiwalaheremɔ he nii kɛ gbeyeishemɔ kɛ hekpokpomɔ.’ Ni kɛlɛ, amɛbaanyɛ amɛfee nakai, “ejaakɛ suɔmɔ ni aaasumɔ jio, feemɔ ni aaafee jio, Nyɔŋmɔ ji mɔ ni tsuɔ fɛɛ yɛ [amɛ] mli yɛ emlihilɛ [eudo-ki’as] naa.”​—Filipibii 2:​12, 13.

13. Te Kristofoi kɛ mɛi ni efeee oya koni amɛna nu mli baptisimɔ taakɛ Etiopia piafonyo lɛ fee lɛ baaye aha tɛŋŋ?

¹³ Jeee mɛi fɛɛ ni kɛ anɔkwa Kristofoi babɔɔ lɛ efee klalo loo amɛhe esa taakɛ Etiopianyo lɛ ji akɛ amɛkɛ oyaiyeli aaana baptisimɔ. Akɛni amɛteŋ mɛi komɛi jeee Yudafoi loo amɛjeee mɛi ni amɛtsake amɛjamɔ hewɔ lɛ, Yehowa kɛ egbɛi ahe nilee fioo ko pɛ amɛyɔɔ aloo amɛbɛ eko kwraa; ni asaŋ etɛi ni efolɔ eshwie shi lɛ kudɔɔɔ amɛjeŋbai. Mɛɛ gbɛ nɔ aaatsɔ ni akɛ amɛ aye yɛ? Esa akɛ Kristofoi anyiɛ Yesu nɔkwɛmɔ nɔ lɛ sɛɛ. Ewooo eshafeemɔ he hewalɛ ni ekpɛlɛɛɛ nɔ hu. (Yohane 5:14) Ni kɛlɛ, eŋmɛ etsui shi eha eshafeelɔi ni agbala amɛ kɛbɛŋkɛ lɛ ni agbɛnɛ amɛsumɔɔ akɛ amɛaaha amɛshihilɛ gbɛi kɛ Nyɔŋmɔ nɔ akpa gbee lɛ.​—Luka 15:1-7.

14, 15. Yɛ Kristofoi ni afɔ amɛ mu lɛ asɛɛ lɛ, mɛɛ gbɔmɛi sɔrɔtoi nɛkɛ yaa kpeei yɛ Korinto, ni sɔrɔtofeemɔ yɛ amɛmumɔŋ nɔyaa mli yɛ mɛɛ gbɛ nɔ?

¹⁴ Ákɛ Kristofoi kɛ mɛi ni kaseɔ Nyɔŋmɔ he nii lɛ ye yɛ tsuishiŋmɛɛ mli lɛ jeɔ kpo faŋŋ yɛ Paulo wiemɔi ni kɔɔ kpeei ni efee yɛ Korinto lɛ he lɛ mli. Yɛ be mli ni ewieɔ mumɔ lɛ naakpɛɛ nikeenii lɛ kɛ nitsumɔ ni shishijee mli lɛ ekadi Kristojamɔ akɛ Nyɔŋmɔ jɔɔmɔ yɔɔ nɔ lɛ he lɛ, Paulo tsi “heyelilɔi” kɛ “mɛi ni heee yeee” ta. (1 Korintobii 14:22) “Heyelilɔi” lɛ ji mɛi ni kpɛlɛ Kristo nɔ ni abaptisi amɛ lɛ. (Bɔfoi lɛ Asaji 8:​13; 16:​31-34) “Korintobii lɛ ateŋ mɛi pii hu ni nu lɛ, amɛhe amɛye, ni abaptisi amɛ.”​—Bɔfoi lɛ Asaji 18:⁠8.

¹⁵ Taakɛ 1 Korintobii 14:24 tsɔɔ lɛ, ‘mɛi ni heee yeee loo gbɔmɛi ni leee mli eko’ hu ba Korinto kpeei ashishi ni ahere amɛ hiɛmɛɛ yɛ jɛmɛ.c Eka shi faŋŋ akɛ amɛ nɔyaa yɛ Nyɔŋmɔ Wiemɔ lɛ kasemɔ kɛ ekɛ nitsumɔ mli lɛ baafee sɔrɔto. Mɛi komɛi po yɛ ni amɛka he amɛmiifee esha. Mɛi krokomɛi hu ena hemɔkɛyeli bɔ ni sa, ni amɛfee tsakemɔi komɛi po yɛ amɛshihilɛi amli, ni dani amɛaana baptisimɔ po lɛ, no mli lɛ amɛje shishi amɛmiigba mɛi krokomɛi nɔ ni amɛkase lɛ.

16. Kristofoi lɛ ateŋ ni nɛkɛ gbɔmɛi nɛɛ yɔɔ yɛ asafoŋ kpeei ashishi lɛ he baaba sɛɛnamɔ aha amɛ yɛ mɛɛ gbɛ nɔ?

¹⁶ Shi, mɛi ni abaptisiko amɛ nɛɛ ateŋ mɔ ko mɔ ko bɛ “Nuŋtsɔ lɛ mli.” (1 Korintobii 7:39) Kɛji akɛ amɛba amɛjeŋ yɛ gbɛ gbonyo nɔ yɛ amɛtsutsu shihilɛ mli ni mumɔŋ tɔmɔi yɛ amɛhe lɛ, shishinumɔ yɛ he akɛ ebaahe be dani amɛbaatsake kɛba Nyɔŋmɔ tɛi ni efolɔ eshwie shi lɛ ahe. Dani enɛ aaaba lɛ, bei abɔ ni amɛbɔɔɔ mɔdɛŋ akɛ amɛaatsɔ wiemɔ gbonyo ko nɔ amɛfite asafo lɛ hemɔkɛyeli kɛ hetsemɔ lɛ, ahereɔ amɛ kɛbaa mli. Nɔ ni amɛna ni amɛnu yɛ kpeei lɛ ashishi lɛ ‘baanyɛ akã amɛ’ beni ‘amɛtsuiiaŋ teemɔŋ nibii jeɔ kpo lɛ.’​—1 Korintobii 14:​23-25; 2 Korintobii 6:⁠14.

Ni Aaahi Shi Akɛ Mɔ ni Nyɔŋmɔ Ekpɛlɛ Enɔ Kɛha Yiwalaheremɔ

17. Luka 2:14 na mɛɛ mlibaa yɛ klɛŋklɛŋ afii oha lɛ mli?

¹⁷ Kɛtsɔ maŋshiɛmɔ ni Kristofoi ni abaptisi amɛ yɛ klɛŋklɛŋ afii oha lɛ mli lɛ kɛ amɛhe wo mli lɛ nɔ lɛ, akpei abɔ nu sanekpakpa lɛ. Amɛhe nɔ ni amɛnu lɛ amɛye, amɛtsake kɛjɛ amɛtsutsu shihilɛ lɛ mli, abaptisi amɛ, ni ‘amɛkɛ amɛnaabu jaje kɛha yiwalaheremɔ.’ (Romabii 10:​10-15; Bɔfoi lɛ Asaji 2:​41-44; 5:​14; Kolosebii 1:23) Ŋwanejee ko bɛ he akɛ mɛi ni abaptisi amɛ ni hi shi yɛ nakai bei lɛ amli lɛ yɛ Yehowa nɔkpɛlɛmɔ, ejaakɛ ekɛ mumɔ krɔŋkrɔŋ lɛ fɔ amɛ mu, ni eŋɔ amɛ akɛ emumɔŋ bii. Bɔfo Paulo ŋma akɛ: “Ni ejie wɔ yɛ esuɔmɔ mli eto eha ehe ni wɔtsɔmɔ ebii yɛ Yesu Kristo hewɔ, taakɛ bɔ ni sa ehiɛ [eu·do·kiʹan] yɛ esuɔmɔ naa.” (Efesobii 1:⁠5) No hewɔ lɛ, nɔ ni bɔfoi lɛ gba fɔ shi yɛ Yesu fɔmɔ he lɛ je shishi eba mli anɔkwale yɛ nakai afii oha lɛ mli: “Ana gbɔmɛi ahe tsuijurɔ [aloo, mɛi ni yɔɔ Nyɔŋmɔ nɔkpɛlɛmɔ].”​—Luka 2:⁠14.

18. Mɛni hewɔ Kristofoi ni afɔ amɛ mu lɛ nyɛŋ amɛku amɛhiɛ amɛshwie nɔkpɛlɛmɔ shidaamɔ ni amɛyɔɔ yɛ Nyɔŋmɔ hiɛ lɛ nɔ akɛ nɔ ko kɛkɛ lɛ?

¹⁸ Bɔni afee ni amɛhiɛ nakai toiŋjɔlɛ lɛ mli lɛ, ehe bahia ni nakai gbɔmɛi ‘tsuijurɔnaa bii’ lɛ “kɛ gbeyeishemɔ kɛ hekpokpomɔ atsua [amɛ] diɛŋtsɛ [amɛ] yiwalaheremɔ lɛ he nii.” (Filipibii 2:12) Enɛ bɛ mlɛo, ejaakɛ amɛka he amɛji gbɔmɛi ni yeee emuu. Amɛkɛ kaai kɛ nɔnyɛɛi ni baaha amɛfee efɔŋ baakpe. Kɛ amɛŋmɛɛ amɛhe amɛha nɔ fɔŋ feemɔ lɛ, amɛbaalaaje Nyɔŋmɔ nɔkpɛlɛmɔ lɛ. No hewɔ lɛ, Yehowa jɛ esuɔmɔ mli eto gbɛjianɔ kɛha mumɔŋ tookwɛlɔi ni baaye abua ni amɛbu asafo lɛ he.​—1 Petro 5:​2, 3.

19, 20. Mɛɛ gbɛjianɔ Nyɔŋmɔ to koni Kristofoi ni abaptisi amɛ lɛ aya nɔ afee etsuji ni ekpɛlɛ amɛnɔ?

¹⁹ Asafoŋ onukpai ni tamɔ nɛkɛ kɛ Paulo ŋaawoo nɛɛ baato amɛtsui mli: “Anyɛmimɛi, kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ nyɛsaa nakai mɔ lɛ ekoŋŋ yɛ mlijɔlɛ mumɔ mli; ni ole ohe nɔkwɛmɔ, koni bo hu akakao.” (Galatabii 6:⁠1) Taakɛ wɔbaanyɛ wɔnu shishi lɛ, mɔ ni kɛ ehe haa nifeemɔ ni he hiaa ni ji baptisimɔ lɛ tereɔ gbɛnaa nii ni tsii ni ji ehe akɔntaa ni ebaabu, taakɛ eji anɔkwale yɛ gbɔ ni batsɔɔ mɔ ni etsake ejamɔ ni afo lɛ ketia yɛ Israel lɛ he lɛ. Ni kɛlɛ, kɛji akɛ Kristofonyo ni abaptisi lɛ lɛ tɔ lɛ, ebaanyɛ ena yelikɛbuamɔ ni suɔmɔ yɔɔ mli yɛ asafo lɛ mli.

²⁰ Onukpai komɛi ni yɔɔ asafo lɛ mli lɛ baanyɛ ni amɛye amɛbua mɔ ni egbee nɔ fɔŋ feemɔ ni hiɛdɔɔ yɔɔ mli nɛɛ mli lɛ. Yuda ŋma akɛ: “Mɛi komɛi lɛ nyɛnaa amɛ mɔbɔ, shi mɛi komɛi hu, nyɛkɛ hegbeyeiwoo aherea amɛ yiwala, ni nyɛshaa amɛ kɛjɛa la lɛ mli, ni nyɛhia atade ni akɛ heloo ewo he muji lɛ tete.”(Yuda 22, 23) Asafo lɛ mli nyo ni abaptisi lɛ ni aye abua lɛ yɛ nɛkɛ gbɛ nɔ lɛ baanyɛ aya nɔ ni ena Yehowa nɔkpɛlɛmɔ kɛ toiŋjɔlɛ ni bɔfoi lɛ wie he yɛ Yesu fɔmɔ mli lɛ.

21, 22. Mɛni baaba kɛji mɔ ko batsɔ eshafeelɔ ni tsakeee etsui, ni te asafo lɛ mli bii anɔkwafoi lɛ baafee amɛnii yɛ enɛ he amɛha tɛŋŋ?

²¹ Eyɛ mli akɛ efɔɔɔ kaa moŋ, shi shihilɛi lɛ ekomɛi baa ni nɔ fɔŋ feelɔ lɛ tsakeee etsui. Kɛkɛ lɛ onukpai lɛ baashwie lɛ koni akɛbu asafo lɛ hetsemɔ he koni muji akaba he. Enɛ ba nuu ko ni abaptisi lɛ yɛ Korinto ni tee nɔ ekɛ ehe wo jeŋba shara mli lɛ nɔ. Paulo wo asafo lɛ ŋaa akɛ: “Nyɛkɛ ajwamaŋbɔlɔi akabɔ; jeee je nɛŋ ajwamaŋbɔlɔi loo hiɛjoolɔi loo amimyelɔi loo wɔŋjalɔi ahe kwraa miwieɔ nɛɛ, ejaakɛ amɛ ni kulɛ, ja nyɛje je lɛŋ; shi agbɛnɛ miiŋma nyɛ akɛ nyɛkɛ amɛ akabɔ: Kɛji mɔ ko ni atsɛɔ lɛ nyɛmi lɛ ji ajwamaŋbɔlɔ loo hiɛjoolɔ loo wɔŋjalɔ loo mɔjɛlɔ loo daatɔlɔ loo amimyelɔ lɛ, lɛ lɛ nyɛkɛ lɛ akayea nii tete.”​—1 Korintobii 5:​9-11.

²² Akɛni Korintonyo lɛ ekɔ gbɛ ni he hiaa ni ji baptisimɔ gbɛ lɛ momo, ni ebafee mɔ ni Nyɔŋmɔ ekpɛlɛ enɔ kɛ asafo lɛ mli nyo hewɔ lɛ, shwiemɔ ni ashwieɔ lɛ lɛ ji hiɛdɔɔ sane. Paulo tsɔɔ akɛ esaaa akɛ Kristofoi lɛ kɛ lɛ bɔɔ, ejaakɛ ekpoo nɔkpɛlɛmɔ shidaamɔ ni eyɔɔ yɛ Nyɔŋmɔ hiɛ lɛ. (Okɛto 2 Yohane 10, 11 he.) Petro ŋma yɛ mɛi ni ashwie amɛ nɛɛ ahe akɛ: “Ejaakɛ faŋ nɔ ni amɛnaaa amɛle jalɛ lɛ, fe nɔ ni amɛle ni kɛlɛ amɛkpale kɛjɛ krɔŋkrɔŋ ni atiu awo amɛdɛŋ lɛ he lɛ. Shi anɔkwa abɛ lɛ eba mli yɛ amɛhe akɛ: ‘Gbee kuɔ esɛɛ kɛyaa lɛ diɛŋtsɛ eshwee he, ni kplotoo ni aju ehe lɛ yakokoloɔ ŋmɔtɔ mli.’”​—2 Petro 2:​21, 22.

23. Mɛni ji shihilɛ ni yɔɔ klɛŋklɛŋ afii oha lɛ mli Kristofoi lɛ ateŋ yɛ Nyɔŋmɔ nɔkpɛlɛmɔ ni amɛaahiɛ mli lɛ he?

²³ Eka shi faŋŋ akɛ Yehowa ebuŋ aŋkroaŋkroi nɛɛ akɛ mɛi ni ekpɛlɛ amɛnɔ dɔŋŋ, ejaakɛ ashwie amɛ akɛni amɛji efɔŋ feelɔi ni tsakeee amɛtsui hewɔ. (Hebribii 10:​38; okɛto 1 Korintobii 10:5 he.) Eka shi faŋŋ akɛ, mɛi fioo ko pɛ ji mɛi ni ashwieɔ amɛ kɛjɛɔ asafo lɛ mli. Mɛi ni fa ni nine shɛ “duromɔ kɛ toiŋjɔlɛ nɔ kɛjɛ Nyɔŋmɔ ŋɔɔ” lɛ ‘aŋɔ amɛ akɛ bii yɛ emlihilɛ naa’ ni amɛhi shi nakai akɛ anɔkwafoi​—Efesobii 1:​2, 5, 8-10.

24. Mɛni hu yɔɔ nɛkɛ sane nɛɛ mli ni esa akɛ wɔsusu he lolo?

²⁴ Nakai pɛ eji yɛ wɔbe nɛɛ hu mli. Shi nyɛhaa wɔsusua bɔ ni aaanyɛ aye abua ‘mɛi ni heee yeee loo gbɔmɛi foji’ lɛ ni amɛbatsɔmɔ mɛi ni Nyɔŋmɔ ekpɛlɛ amɛnɔ ŋmɛnɛ kɛ nɔ ni abaanyɛ afee ni akɛye abua amɛ kɛji akɛ amɛtɔ̃ yɛ gbɛ lɛ nɔ lɛ he. Nikasemɔ ni nyiɛ sɛɛ nɛɛ baatsu saji nɛɛ ahe nii.

[Shishigbɛ niŋmai]

Ani Okaiɔ?

◻ Taakɛ Ŋmalɛi lɛ tsɔɔ Iɛ, kɛjɛ mɛɛ be ni mɛɛ gbɛ nɔ Nyɔŋmɔ aaanyɛ akpɛlɛ adesai anɔ yɛ?

◻ Mɛni ji su ni Nyɔŋmɔ hiɛ yɛ gbɔi ni yɔɔ ewebii Iɛ ateŋ Iɛ he, shi mɛni hewɔ ehe hiaa ni Israelbii aŋmɛ pɛpɛɛpɛ yɛ henɔkwɛmɔ kɛ tsuishiŋmɛɛ he Iɛ?

◻ Te wɔbaamu sane naa wɔha tɛŋŋ yɛ anɔkwale ni eji akɛ ‘mɛi ni heee yeee’ hu baa Kristofoi akpeei ashishi yɛ Korinto Iɛ?

◻ Yɛ mɛɛ gbɛ nɔ Nyɔŋmɔ eto gbɛjianɔ koni eye ebua Kristofoi ni abaptisi amɛ Iɛ ni amɛhi shi akɛ etsuji ni ekpɛlɛ amɛnɔ?