Hefɛo Diɛŋtsɛ—Obaanyɛ Oha Eya Hiɛ
BIBLIA lɛ yɛ ŋaawoo kɛha hii kɛ yei fɛɛ yɛ sane ni kɔɔ hefɛo he lɛ mli. Kɛha hii lɛ ekɛɔ akɛ: “Obalahii ahefɛo ji amɛhewalɛ.” (Abɛi 20:29, New World Translation.) Hɛɛ, obalaŋtai ahewalɛ kɛ nyɛmɔ baanyɛ afee nɔ ni yɔɔ fɛo. Shi mɛni baa kɛji akɛ obalaŋtaiaŋ hewalɛ nɛɛ naa ba shi? Biblia mli abɛbua lɛ kɛɔ akɛ: “Waŋ lɛ, hefɛo akekere ni, kɛ ana lɛ yɛ jalɛ gbɛ nɔ lɛ.” (Abɛi 16:31, New World Translation.) Jalɛ ji mligbɛ hefɛo lɛ fa ko. Kɛ obalanyo tao enɛ lɛ, ebaahi shi yɛ emli yɛ be mli ni ebalaŋtaiaŋ hewalɛ lɛ nɔ egbɔ lɛ.
Yɛ yei agbɛfaŋ lɛ, Biblia lɛ kɛɔ akɛ: “Hiɛnyam lɛ lakamɔ ni, ni hefɛo hu lɛ yakayaka nɔ ni; shi yoo ni sheɔ Yehowa gbeyei lɛ, aaakafo lɛ!” (Abɛi 31:30) Yoo ni he yɔɔ fɛo lɛ eji hefatalɔ ni asumɔɔ. Shi kɛji akɛ osatofeemɔ kɛ pɛsɛmkunya ji nɔ ni hɔ nɛkɛ gbɔmɔtsoŋ hefɛo nɛɛ sɛɛ lɛ, belɛ hefɛo lɛ bafeɔ hiɛaŋhiɛaŋ nɔ, ni ehaa mligbɛ taŋ nii ko nɔ. Kɛji akɛ hefɛo lɛ ta lɛ, mɛni baashwɛ? Kwɛ bɔ ni ehi moŋ akɛ mligbɛ hefɛo, ni damɔ ‘Yehowa gbeyeishemɔ’ nɔ kɛ kponɔgbɛ hefɛo aaakpa gbee.
Gbɔmɔ Su Kɛ Baŋ Tsakemɔ
Ani aaanyɛ ana nɛkɛ mligbɛ hefɛo nɛɛ? Hɛɛ. Yɛ anɔkwale mli lɛ, kɛha Kristofoi lɛ, eji nɔ ni esa akɛ ana. Nyɔŋmɔ buɔ anɔkwa hefɛo waa. “Efee nɔ fɛɛ nɔ fɛfɛo yɛ ebe naa.” (Jajelɔ 3:11, Revised Standard Version.) Ekpɛlɛŋ mɛi ni amɛjeŋba tsɔɔ akɛ amɛbɛ mligbɛ sui ni suɔmɔ yɔɔ mli lɛ ajamɔ lɛ nɔ.
Bɔfo Paulo wiemɔi ni eŋma eyaha Kolosebii lɛ tsɔɔ bɔ ni ehe hiaa akɛ aaana mligbɛ hefɛo nɛɛ. Klɛŋklɛŋ lɛ, ewo ŋaa akɛ: “Shi agbɛnɛ lɛ nyɛ hu nyɛshɛrɛa nɛkɛ nii nɛɛ fɛɛ nyɛshwiea, nii ni ji mlifu, mlila, nishaianii, musubɔɔ wiemɔ, hiɛgbeji awiemɔ lɛ, kɛjɛa nyɛdaaŋ. Nyɛkamalemalea nyɛhe, ejaakɛ nyɛjie gbɔmɔ momo lɛ kɛ enitsumɔi lɛ nyɛshwie.” Hɛɛ, mɔ fɛɛ mɔ ni feɔ nibii ni yɔɔ taŋ nɛɛ bafeɔ mɔ ni Nyɔŋmɔ hiɔ lɛ—kɛ nii ni adesai ni jwɛŋmɔ mli tse hiɔ. Kɛkɛ ni Paulo tee nɔ akɛ: “Ni nyɛwo gbɔmɔ hee ni tsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa.” (Kolosebii 3:8-10) Esa akɛ ‘wɔwo’ susumɔ gbɛ kɛ henumɔ gbɛ ko ni kɛ Nyɔŋmɔ suɔmɔnaa nifeemɔ kpaa gbee. Mɛni ji sui komɛi ni anaa yɛ nɛkɛ “gbɔmɔ hee” nɛɛ mli?
Kristofoi Asui
Biblia lɛ tsiɔ sui fɛfɛji babaoo ni feɔ enɛ lɛ ta. Shi Yesu wiemɔi nɛɛ tsɔɔ shishitoo kɛha nɛkɛ mligbɛ hefɛo nɛɛ mli akɛ: “Suɔmɔ Nuŋtsɔ [Yehowa] o-Nyɔŋmɔ lɛ kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ. Kitai lɛ amli otu kɛ ewulu nɛ. Ni nɔ ni nyiɛ sɛɛ lɛ tamɔ no, akɛ: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’” (Mateo 22:37-39) Suɔmɔ kɛha Nyɔŋmɔ nyiɛɔ wɔhiɛ koni wɔfee gbɔmɛi ni esumɔɔ. Nɛkɛ suɔmɔ nɛɛ tsirɛɔ wɔ koni wɔwie ehe wɔtsɔɔ mɛi krokomɛi, wɔye wɔbua amɛ, koni amɛ hu amɛle amɛ-Bɔlɔ lɛ.—Yesaia 52:7.
Bɔfo Paulo tsɔɔ sui krokomɛi ni feɔ gbɔmɔ hee nɛɛ mli akɛ: “Suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ; enɛɛmɛi lɛ mla ko eguuu.”—Galatabii 5:22, 23.
Kɛfata he lɛ, Biblia lɛ kɛɔ wumɛi pɔtɛɛ akɛ: “Wu lɛ ji ŋa lɛ yitso, taakɛ bɔ ni Kristo hu ji asafo lɛ yitso . . . Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔɔ asafo lɛ ni eŋɔ lɛ diɛŋtsɛ ehe eha yɛ ehewɔ” lɛ. (Efesobii 5: 23, 25) Yɛ ŋamɛi agbɛfaŋ lɛ, Biblia lɛ kɛɔ akɛ: “Nyɛ yeigbayei lɛ, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, tamɔ bɔ ni nyɛfeɔ nyɛhaa Nuŋtsɔ lɛ . . . ŋa lɛ hu ashɛ ewu.” (Efesobii 5:22, 33) Kwɛ bɔ ni weku shihilɛ feɔ fɛo ha yɛ be mli ni wu lɛ tsuɔ egbɛnaa nii ahe nii yɛ suɔmɔ mli, yɛ gbɛ ni pɛsɛmkunya bɛ mli nɔ, yɛ tsuishitoo mli! Kwɛ bɔ ni efeɔ mlɛo kɛhaa nuu lɛ akɛ eeetsu egbɛfaŋnɔ lɛ he nii yɛ be mli ni yoo lɛ jieɔ mligbɛ hefɛo kpo etsɔɔ kɛtsɔɔ suɔmɔ nɔ ni etsɔɔ ekɛfiɔ esɛɛ ni ekɛ lɛ eshiii akaŋ loo ewieee eshiii lɛ lɛ nɔ. Weku shihilɛ yɛ shihilɛi kpakpai ni tamɔ nɛkɛ shishi lɛ baanyɛ afee nɔ ni yɔɔ fɛo diɛŋtsɛ.
Nɔkwɛmɔ nii ni akɛha yɛ sane ni tsɔ enɛ hiɛ lɛ mli lɛ tsɔɔ sui komɛi ni tamɔ nakai kɛ nitsumɔ. Shulamit obalayoo lɛ tsɔɔ suɔmɔ ni mli kwɔ ni eyɔɔ kɛha enaanyo tookwɛlɔ lɛ yɛ be fɛɛ mli yɛ be mli ni ekpoo akɛ eeeshi lɛ ni ehala Salomo shihilɛ ni kpɛlɛɔ kaŋkaŋ lɛ. Yosef jie fɔmɔ su mli ekpakpafeemɔ kpo yɛ be mli ni ekpoo akɛ eeefee esha eshi enuŋtsɔ, Potifar lɛ. Agbɛnɛ ejie henɔyeli kpo etsɔɔ yɛ be mli ni ejo foi moŋ fe ni eeeha Potifar ŋa lɛ alaka lɛ lɛ. Ni ejie mlijɔlɛ, toiŋjɔlɛ kɛ tsuishiŋmɛɛ kpo yɛ be mli ni ekpoo akɛ eeeha shihilɛi ni mli wawai ni etsɔ mli lɛ adɔ lɛ lɛ.
Hefɛo Yɛ Jeŋ Ni Yɔɔ Taŋ Mli
Ani anyɛɔ atsuɔ sui fɛfɛji nɛɛ ahe nii ŋmɛnɛ? Mɛi pii susuuu nakai. Shi moŋ amɛfeɔ amɛnii tamɔ jeŋ ni taoɔ ekome enɔ, ni ehaa nɔ fɛɛ nɔ, ni amɛyɔɔ mli nɛɛ kɛtsɔɔ keketee ni amɛfeɔ yɛ kponɔgbɛ lɛ nɔ. Amɛnuɔ he akɛ bɔni afee ni amɛje mli lɛ, ebiɔ ni amɛfee mɛi ni yi wa, mɛi ni taoɔ hiɛnyam, amɛkɛ amɛ nɔ fɛɛ nɔ aye klɛŋklɛŋ gbɛhe ni amɛha nɔ fɛɛ nɔ ni amɛnine baashɛ nɔ. Nɔ ni tamɔɔɔ nakai lɛ, Biblia lɛ woɔ hewalɛ akɛ: ‘Nyɛkaŋmɛa mligbalamɔi aloo yaka anunyam taomɔ gbɛ, shi moŋ nyɛkɛ heshibaa jwɛŋmɔ abubuaa nyɛnanemɛi fe nyɛhe; nyɛteŋ mɔ fɛɛ mɔ akafo enɔ mli, shi efo enaanyo nɔ mli.’ (Filipibii 2:3, 4) Ejɛ bɔ ni adesai fɛɛ yeee nɛkɛ ŋaawoo kpakpa nɛɛ nɔ lɛ hewɔ ni adesa weku muu lɛ fɛɛ yaa nɔ amɛfiteɔ babaoo nakai lɛ.
Kɛfata he lɛ, yɛ ŋmɛnɛŋmɛnɛ je nɛɛ mli lɛ, adamɔɔ shika loo gbɛhe nɔ abuɔ mɔ ko akɛ mɔ lɛ eye omanye. Abuɔ niiatsɛ lɛ akɛ eye omanye. Shi, yɛ nii ni abuɔ loo nii ni sɛɛnamɔ diɛŋtsɛ yɔɔ he lɛ gbɛfaŋ lɛ, shikatsɛ loo ohiafo ni mɔ ko ji lɛ he ehiaaa kwraa. Yɛ anɔkwale mli lɛ, osharai yɛ ninamɔ mli. Biblia lɛ bɔɔ kɔkɔ akɛ: “Shi mɛi ni taoɔ nii pii ana lɛ gbeɔ kaa kɛ tsɔne kɛ kwashiai akɔnɔi pii ni fiteɔ mɔ ni tsiɔ mɔ ewoɔ hiɛkpatamɔ kɛ laajemɔ mli lɛ amli.” Ekɛfata he akɛ: “Ejaakɛ nibii fɔji fɛɛ ashishifa ji shika suɔmɔ.”—1 Timoteo 6:9, 10.
Shi, gbɔmɛi pɛsɛmkunya tsɛmɛi, ni haa nɔ fɛɛ nɔ, ni diɔ heloo gbɛfaŋ nibii asɛɛ, ni yi wa lɛ yeɔ “omanye” ŋmɛnɛ yɛ be kukuoo ko mli. Shi ejeee omanyeyeli diɛŋtsɛ, ejaakɛ nɔ ni nɛkɛ shihilɛ gbɛ ni yɔɔ taŋ nɛɛ feɔ lɛ—gbɛi fitemɔ, gbalashihilɛ ni fiteɔ, helai, kɛ nijiaŋwujee—lɛ fa babaoo. Abɔ gbɔmɔ yɛ Nyɔŋmɔ subaŋ nɔ, shi kɛji akɛ etse atua waa nɛkɛ eshi Nyɔŋmɔ sui ni shishijee lɛ akɛwo emli lɛ, enyɛŋ ena miishɛɛ kɔkɔɔkɔ.—1 Mose 1:27.
Mligbɛ Hefɛo Ni Aaana
Belɛ te wɔɔfee tɛŋŋ wɔte shi wɔwo hewalɛ ni je nɛɛ naa yɛ mɔ nɔ lɛ ni wɔna sui kpakpai ni Nyɔŋmɔ gbeyeishemɔ yɔɔ mli? Beni Paulo tsi sui ni ji ‘suɔmɔ, miishɛɛ, hejɔlɛ, tsuishiŋmɛɛ, mlihilɛ, ejurɔfeemɔ, hemɔkɛyeli, mlijɔlɛ, kɛ henɔyeli’ lɛ ta lɛ, etsɛ amɛ akɛ “mumɔ lɛ yibii.” (Galatabii 5:22, 23) No hewɔ lɛ Nyɔŋmɔ mumɔ lɛ he miihia kɛji akɛ wɔɔna nɛkɛ mligbɛ sui ni yɔɔ fɛo nɛɛ.
Shi yɛ mɛɛ gbɛ nɔ? Ojogbaŋŋ, kɛ wɔkase Biblia lɛ, ni jɛ Nyɔŋmɔ mumɔ lɛŋ lɛ, ebaaye ebua wɔ ni wɔyoo nɛkɛ sui nɛɛ ni ewo suɔmɔ ni wɔyɔɔ akɛ wɔɔkase amɛ lɛ mli hewalɛ. (2 Timoteo 3:16) Yehowa Odasefoi yɛ he miishɛɛ be fɛɛ be akɛ amɛaaye amɛbua yɛ nitsumɔ ni tamɔ nɛkɛ mli, ejaakɛ amɛbuɔ enɛ akɛ amɛsɔɔmɔ nitsumɔ ni amɛkɛaaye amɛbua gbɔmɛi ni amɛkase Biblia lɛ fa. Wɔ diɛŋtsɛ wɔmli ni wɔɔpɛi yɛ anɔkwayeli mli lɛ baaye abua wɔ ni wɔna he ni wɔtɔɔ fa yɛ, ni wɔbaanyɛ wɔsɔle kɛha
Nyɔŋmɔ mumɔ lɛ yelikɛbuamɔ yɛ nɛkɛ hei nɛɛ. Nanemɛi Nyɔŋmɔ jalɔi ni wɔkɛ amɛ aaabɔ lɛ baaye abua wɔ tamɔ tipɛŋfoi asɛɛfimɔ ni he hiaa wɔ lɛ, ni Nyɔŋmɔ mumɔ lɛ baaye abua wɔ yɛ biɛ, taakɛ Yesu kɛɛ lɛ, “he ni mɛi enyɔ loo mɛi etɛ ebua amɛhe naa yɛ, yɛ migbɛi anɔ lɛ, miyɛ amɛteŋ yɛ jɛi.”—Mateo 18:20.
Jeŋ Ko Ni Yɔɔ Fɛo Ka Wɔhiɛ
Yɛ adebɔɔ naa lɛ, wɔteŋ mɔ ko mɔ ko nyɛŋ ayɛ efatɔi anɔ kunim, shi kɛ wɔbɔ mɔdɛŋ akɛ wɔɔna nɛkɛ mligbɛ hefɛo nɛɛ, Nyɔŋmɔ baajɔɔ wɔmɔdɛŋbɔi lɛ anɔ. Ni ekɛ gbɛ ni yɔɔ naakpɛɛ ko baawo wɔ nyɔmɔ. Biblia lɛ eŋma Nyɔŋmɔ yiŋtoo ni etsɛŋ ni ebaaba kɛ gbɛjianɔtoo hee ni akɛbaato ŋmɛnɛŋmɛnɛ nɔ nɛɛ najiaŋ lɛ he sane efɔ shi eha wɔ. Emli ni “jalɔi lɛ shikpɔŋ lɛ aaatsɔ amɛ nɔ, ni amɛaahi nɔ daa.” (Lala 37:29) Yesu diɛŋtsɛ kɛɛ: “Miishɛɛ ji mɛi ni he jɔ lɛ, ejaakɛ shikpɔŋ lɛ aaatsɔ amɛ nɔ.”—Mateo 5:5, New World Translation.
Yɛ nakai be lɛ mli lɛ, akɛ hefɛo ni yɔɔ kpoo ni toiŋjɔlɛ yɔɔ mli baato nibii agbɛjianɔtoo nɛɛ mli akaŋshii kɛ pɛsɛmkunya ni yɔɔ taŋ lɛ najiaŋ. “Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee tamɔ bɔ ni nu ha ŋshɔ shishi lɛ.” (Yesaia 11:9) Yɛ anɔkwale mli lɛ, Nyɔŋmɔ “aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.
Ani shihilɛ ni tamɔ nɛkɛ ŋɔɔ onaa? Amɛbaanyɛ amɛba mli ejaakɛ shikpɔŋ lɛ nɔ bii lɛ baana mligbɛ hefɛo ni damɔ suɔmɔ kɛha Nyɔŋmɔ kɛ naanyo nɔ. Ni Nyɔŋmɔ ewo shi akɛ mɛi ni sɔmɔɔ lɛ bianɛ, ni amɛnaa “gbɔmɔ hee” lɛ ni amɛbɔɔ mɔdɛŋ waa akɛ amɛaanyiɛ tɛi ni efolɔ eshwie shi lɛ anaa lɛ nine baashɛ nakai shiwoo lɛ nɔ. Hefɛo, ni ji gbɔmɔtsoŋ nɔ, nyɛŋ ekɛ jɔɔmɔi nɛɛ aba. Belɛ kwɛ bɔ ni ehi moŋ akɛ wɔɔna mligbɛ hefɛo ni jara wa, ni sɛɛ tsɛɔ ni ŋɔɔ adesai ni hiɛ jwɛŋmɔ kpakpa kɛ Nyɔŋmɔ fɛɛ naa lɛ!
[Mfoniri ni yɔɔ baafa 6]
Esa akɛ gbɔmɛi ni he yɔɔ fɛo yɛ gbɔmɔtsoŋ Iɛ akwa pɛsɛmkunya kɛ gbɔmɛi ayiŋ kɔnemɔ. Shi moŋ amɛbɔ mɔdɛŋ ni amɛtao mligbɛ hefɛo ni sa Nyɔŋmɔ hiɛ Iɛ