Ani Obaanyɛ ‘Ole Ekpakpa kɛ Efɔŋ Mlikpamɔ’?
“Nɔ fɛɛ nɔ lɛ nyɛkaa nyɛkwɛa akɛ esa Nuntsɔ lɛ hiɛ lo.”—EFESOBII 5:10.
1. Mɛɛ gbɛ nɔ shihilɛ baanyɛ afee nɔ ni naa wa ŋmɛnɛ, ni mɛni hewɔ?
“YEHOWA, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Anɔkwa sane ni he hiaa ni Yeremia yɔse nɛɛ kɔɔ wɔhe babaoo ŋmɛnɛ. Mɛni hewɔ? Ejaakɛ taakɛ Biblia lɛ gba efɔ̃ shi lɛ, wɔyɛ “jaramɔ bei” amli. (2 Timoteo 3:1) Wɔkɛ shihilɛi ní naa wa ní biɔ ni wɔfee yiŋkpɛi kpeɔ gbi fɛɛ gbi. Yiŋkpɛi nɛɛ dara jio, amɛdaraaa jio, amɛbaanyɛ amɛná wɔ hilɛ-kɛhamɔ nɔ hewalɛ waa—yɛ gbɔmɔtsoŋ, henumɔŋ, kɛ mumɔŋ.
2. Mɛɛ nihalamɔi wɔbaanyɛ wɔbu lɛ akɛ ehe ehiaaa tsɔ, ni kɛlɛ te Kristofoi ni ejɔɔ amɛhe nɔ lɛ buɔ enɛ tɛŋŋ?
2 Wɔbaanyɛ wɔsusu nihalamɔi babaoo ni wɔfeɔ yɛ wɔdaa gbi shihilɛ mli lɛ he akɛ nɔ ni wɔfɔɔ feemɔ loo nɔ ni ehe ehiaaa tsɔ ko. Ákɛ nɔkwɛmɔnɔ lɛ, gbi fɛɛ gbi lɛ, ehe hiaa ni wɔhala nɔ ni wɔbaawo, nɔ ni wɔbaaye, gbɔmɛi ni wɔbaana, kɛ ekrokomɛi ni fata he. Wɔfeɔ nɛkɛ halamɔi nɛɛ kɛkɛ ní wɔsusuuu he tsɔ̃. Shi ani nakai saji lɛ ahe ehiaaa lɛɛlɛŋ? Kɛha Kristofoi ni ejɔɔ amɛhe nɔ lɛ, wɔsusuɔ nihalamɔi ni wɔfeɔ yɛ wɔ atadewoo kɛ hesaamɔ, wɔ niyeli kɛ ninumɔ mli lɛ he waa, ni wɔwiemɔ kɛ wɔjeŋba tsɔɔ be fɛɛ be akɛ wɔji Ŋwɛi Flooflonyo lɛ, ni ji Yehowa Nyɔŋmɔ tsuji. Akaiɔ wɔ yɛ bɔfo Paulo wiemɔi nɛɛ amli akɛ: “Kɛ́ nii nyɛyeɔ jio, nii nyɛnuɔ jio, aloo nɔ kroko ni nyɛfeɔ jio, nyɛfea fɛɛ nyɛkɛwoa Nyɔŋmɔ hiɛ nyam.”—1 Korintobii 10:31; Kolosebii 4:6; 1 Timoteo 2:9, 10.
3. Mɛɛ nihalamɔi komɛi hiɛdɔɔ yɔɔ he waa diɛŋtsɛ?
3 No sɛɛ lɛ, nihalamɔi ni hiɛdɔɔ babaoo yɔɔ mli hu yɛ. Ákɛ nɔkwɛmɔnɔ lɛ, yiŋkpɛɛ ni afeɔ akɛ abaabote gbalashihilɛ mli loo abaahi shi akɛ oshija lɛ baanyɛ aná mɔ ko shihilɛ nɔ hewalɛ waa. Kɛ́ mɔ ko baahala mɔ ko ni sa ni ekɛaabote gbalashihilɛ mli, ní ebaafee mɔ ko naanɔ hefatalɔ lɛ jeee sane bibioo.a (Abɛi 18:22) Kɛfata he lɛ, nanemɛi ni wɔhalaa kɛ mɛi ni wɔkɛbɔɔ, yɛ nikasemɔ mli, nitsumɔ mli, kɛ hiɛtserɛjiemɔ mli lɛ tsuɔ gbɛfaŋ nɔ ko ni he hiaa waa he nii, yɛ wɔmumɔŋ shihilɛ po mli—ni esaa wɔ naanɔ hilɛ-kɛhamɔ he.—Romabii 13:13, 14; Efesobii 5:3, 4.
4. (a) Mɛɛ nyɛmɔ abaaná he miishɛɛ waa? (b) Mɛɛ sanebimɔi ehe hiaa ni asusu he?
4 Akɛni wɔkɛ nihalamɔi nɛɛ fɛɛ kpeɔ hewɔ lɛ, sɛɛnamɔ yɛ he kɛha wɔ akɛ wɔɔná nyɛmɔ ní wɔkɛaale srɔto ni yɔɔ nɔ ni ja kɛ nɔ ni ejaaa, loo nɔ ni feɔ tamɔ nɔ ni ja kɛ nɔ ni ja diɛŋtsɛ lɛ teŋ. Biblia lɛ bɔɔ kɔkɔ akɛ: “Gbɛ ko yɛ ni ja yɛ gbɔmɔ hiɛ; shi enaagbee lɛ gbele gbɛi ni.” (Abɛi 14:12) No hewɔ lɛ, wɔbaanyɛ wɔbi akɛ: ‘Te wɔɔfee tɛŋŋ wɔná nyɛmɔ ni wɔkɛaale srɔto ni yɔɔ ekpakpa kɛ efɔŋ mli? Nɛgbɛ wɔbaanyɛ wɔná gbɛtsɔɔmɔ ni he hiaa yɛ wɔyiŋkpɛɛfeemɔ lɛ mli lɛ yɛ? Mɛni gbɔmɛi efee yɛ blema kɛ ŋmɛnɛŋmɛnɛ beaŋ yɛ enɛ gbɛfaŋ, ni mɛni ejɛ mli kɛba?’
Je Lɛŋ “Jeŋ Nilee kɛ Yaka Shishiumɔ”
5. Mɛɛ jeŋ mra be mli Kristofoi lɛ hi mli?
5 Klɛŋklɛŋ afii oha lɛ mli Kristofoi lɛ hi jeŋ ko ní Helabii kɛ Romabii anifeemɔi kɛ susumɔi ehe shi waa yɛ mli lɛ mli. Yɛ gbɛ ko nɔ lɛ, Romabii ashihilɛ gbɛ ni miishɛɛ kɛ ogbɔjɔ yɔɔ mli lɛ yɛ, ni mɛi babaoo buɔ no akɛ nɔ ko ni esa akɛ hiɛ akɔ nɔ. Yɛ gbɛ kroko nɔ lɛ, jeee Plato kɛ Aristotle jeŋ nilee susumɔi lɛ pɛ jeŋ nilelɔi lɛ ná he miishɛɛ, shi moŋ jeŋ nilelɔi akuu hee ni te shi yɛ Epikurobii kɛ Staobii lɛ ateŋ lɛ anɔ̃ lɛ hu yɛ. Beni bɔfo Paulo ba Ateene yɛ emaŋsɛɛ sanekpakpa shiɛmɔ he gbɛfaa ni ji enyɔ lɛ mli lɛ, ekɛ Epikurobii kɛ Staobii ajeŋ nilelɔi ni nu he akɛ amɛnɔ kwɔlɔ fe “naafuu tsɛ nɛɛ,” ni ji Paulo lɛ kpe.—Bɔfoi lɛ Asaji 17:18.
6. (a) Mɛni aka mra be mli Kristofoi lɛ ekomɛi ni amɛfee? (b) Mɛɛ kɔkɔbɔɔ Paulo kɛha?
6 No hewɔ lɛ, ewaaa akɛ aaanu nɔ hewɔ ni mra be mli Kristofoi lɛ ateŋ mɛi komɛi nya gbɔmɛi ni ebɔle amɛhe kɛkpe lɛ agbɛ̀i ni yɔɔ haŋtsii kɛ amɛshihilɛ gbɛ̀i lɛ ahe lɛ shishi. (2 Timoteo 4:10) Etamɔ nɔ ni mɛi ni kɛ amɛhe wo shihilɛ lɛ mli lɛ ná sɛɛnamɔi babaoo, ni etamɔ nɔ ni sane ko kwraa bɛ nihalamɔi ni amɛfee lɛ mli. Etamɔ nɔ ni je lɛ yɛ nɔ ko ni jara wa ni ekɛaaha ní eko bɛ Kristofoi ashihilɛ gbɛ ni biɔ henɔjɔɔmɔ lɛ mli. Shi kɛlɛ, bɔfo Paulo bɔ kɔkɔ akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yaka shishiumɔ akaŋɔ nyɛ nom, yɛ gbɔmɛi ablema saji kɛ je nɛŋ shishijee nibii ni jeee Kristo lɛ anaa.” (Kolosebii 2:8) Mɛni hewɔ Paulo kɛɛ nakai?
7. Mɛɛ sɛɛnamɔ diɛŋtsɛ yɔɔ je lɛŋ nilee lɛ he?
7 Paulo kɛ nakai kɔkɔbɔɔ lɛ ha ejaakɛ ena akɛ oshara diɛŋtsɛ yɛ mɛi ni je lɛ gbalaa amɛ lɛ asusumɔi lɛ ahe. Wiemɔ “jeŋ nilee kɛ yaka shishiumɔ” ni ekɛtsu nii lɛ sa kadimɔ waa. Wiemɔ “jeŋ nilee” lɛ shishi diɛŋtsɛ ji “nilee suɔmɔ kɛ esɛɛtiumɔ.” No diɛŋtsɛ baanyɛ afee nɔ ni sɛɛnamɔ yɔɔ he. Yɛ anɔkwale mli lɛ, Biblia lɛ woɔ nilee kɛ sɛɛyoomɔ ni ja lɛ sɛɛtiumɔ he hewalɛ yɛ Abɛi awolo lɛ mli titri. (Abɛi 1:1-7; 3:13-18) Shi kɛlɛ, Paulo kɛ “jeŋ nilee” fata “yaka shishiumɔ” he. Yɛ gbɛ kroko nɔ lɛ, Paulo bu nilee ni je lɛ kɛhaa lɛ akɛ yaka shishiumɔ. Taakɛ toofu ni afu ji lɛ, etamɔ nɔ ni wa, shi sɛɛnamɔ ko kwraa bɛ he. Kɛ́ mɔ ko damɔ nɔ ko ni bɛ nɔdaamɔ nɔ, tamɔ je lɛŋ “jeŋ nilee kɛ yaka shishiumɔ” nɔ ehala nɔ ni ja kɛ nɔ ni ejaaa lɛ, no lɛ eka shi faŋŋ akɛ ebaafee efolo, kɛ hiɛkpatamɔ po.
Mɛi ni “Tsɛɔ Efɔŋ akɛ Ekpakpa kɛ Ekpakpa Hu akɛ Efɔŋ”
8. (a) Namɛi aŋɔɔ gbɔmɛi yaa kɛha ŋaawoo? (b) Mɛɛ ŋaawoo amɛkɛhaa?
8 Nibii tamɔ nakai nɔŋŋ ŋmɛnɛ. Yɛ nɔ fɛɛ nɔ ni adesai feɔ lɛ mli lɛ, gbɔmɛi ni he esa yɛ jɛmɛ. Gbalashihilɛ kɛ weku he ŋaawolɔi, woloŋmalɔi, mɛi ni tsɛɔ amɛhe tsofafeelɔi, ŋulamiiaŋkwɛlɔi, mumɔi atsɛlɔi, kɛ mɛi krokomɛi efee klalo akɛ amɛkɛ ŋaawoo baaha—yaka. Shi mɛɛ ŋaawoo amɛkɛhaa? Bei pii lɛ, atsiɔ jeŋba kpakpa he shishitoo mla ni Biblia lɛ kɛhaa lɛ kɛyaa sɛɛ, ni akɛ nɔ ni akɛɛ atsɛɔ lɛ jeŋba hee lɛ haa. Ákɛ nɔkwɛmɔnɔ lɛ, beni Canada adafitswaa wolo titri ni ji The Globe and Mail wieɔ yɛ kpoomɔ ni nɔyeli lɛ kpoo akɛ ekɛ “hii kɛ hii loo yei kɛ yei agbalashihilɛ mlibotemɔ” ní akɛaawo mla shishi lɛ he lɛ, ekɛɛ akɛ: “Yɛ afi 2000 lɛ mli lɛ, ebafee nɔ ni shishinumɔ bɛ mli kwraa akɛ akɛ nɔ ko ni mɛi enyɔ ni sumɔɔ amɛhe ni etuu amɛhe amɛha amɛhe sumɔɔ waa lɛ aaakama amɛ yɛ bɔɔ su kome ni amɛyɔɔ lɛ hewɔ.” Nɔ ni yaa nɔ ŋmɛnɛ ji akɛ, esa akɛ aŋmɛ nɔ fɛɛ nɔ gbɛ, esaaa akɛ awieɔ ashiɔ nɔ ko. Nɔ ko nɔ ko bɛ ni abuɔ lɛ akɛ ehiii kwraa; nɔ kpakpa ko bɛ ni yeɔ emuu ni nɔ fɔŋ ko bɛ ni ehiii kwraa.—Lala 10:3, 4.
9. Bei pii lɛ, mɛni mɛi ni asusuɔ akɛ abuɔ amɛ yɛ shihilɛ mli lɛ feɔ?
9 Mɛi krokomɛi kwɛɔ mɛi ni eye omanye yɛ shihilɛ kɛ shika he saji amli—shikatsɛmɛi kɛ mɛi ni ehe gbɛi lɛ—akɛ nɔkwɛmɔnii yɛ amɛyiŋkpɛɛfeemɔ mli. Eyɛ mli akɛ abuɔ niiatsɛmɛi kɛ mɛi ni ehe gbɛi lɛ yɛ ŋmɛnɛ je nɛŋ moŋ, shi bei pii lɛ, amɛnaabu folo kɛkɛ amɛkɛwieɔ jeŋba kpakpa tamɔ anɔkwayeli kɛ hekɛnɔfɔɔ he. Kɛ́ mɛi babaoo miitao hewalɛ kɛ nii lɛ, egbaaa amɛnaa kwraa akɛ amɛaaku amɛhiɛ amɛshwie jeŋba he shishitoo mlai anɔ ni amɛnaanaa nɔ. Kɛ́ mɛi komɛi miitao ni amɛhe gbɛi lɛ, amɛkuɔ amɛhiɛ amɛshwieɔ jeŋba kpakpai fɛɛ ni akpɛlɛɔ nɔ lɛ nɔ ni amɛkɔɔ jeŋba ni yɔɔ naakpɛɛ ni haa mɔ he jɔ̃ɔ ehe. Nɔ ni ejɛ mli kɛba ji gbɔmɛi ni sumɔɔ ninamɔ, ní amɛŋmɛɔ nɔ fɛɛ nɔ feemɔ gbɛ, ni amɛkɛɔ akɛ, “Nɔ fɛɛ nɔ hi.” Ani eyɛ naakpɛɛ akɛ adesai ajwɛŋmɔ efutu amɛ ni amɛnaaa nɔ ni amɛfeɔ yɛ nɔ ni ji ekpakpa kɛ efɔŋ he?—Luka 6:39.
10. Mɛɛ gbɛ nɔ Yesaia wiemɔi ni kɔɔ ekpakpa kɛ efɔŋ he lɛ efee anɔkwale yɛ?
10 Awerɛho sane ni jɛɔ yiŋkpɛɛ gbonyo ni adamɔɔ gbɛtsɔɔmɔ ni ejaaa nɔ afeɔ lɛ mli kɛbaa lɛ ebɔle wɔhe kɛkpe, kɛ́ wɔɔtsi fioo ko tã lɛ—gbalamlitsemɔ kɛ wekui ni mli egbala, tsofai fɔji kɛ dãa ni wa kɛ nitsumɔ, oblahii kɛ oblayei akuu ni yi wa, jeŋba shara, kɛ bɔlɛnamɔ mli tsɛŋemɔ helai. Yɛ anɔkwale mli lɛ, te wɔɔfee tɛŋŋ wɔkpa nibii kpakpai agbɛ yɛ be mli ni gbɔmɛi kpooɔ ekpakpa kɛ efɔŋ he shishitoo mlai fɛɛ lɛ? (Romabii 1:28-32) Etamɔ bɔ pɛ ni gbalɔ Yesaia jaje lɛ: “Kpóo ha mɛi ni tsɛɔ efɔŋ akɛ ekpakpa kɛ ekpakpa hu akɛ efɔŋ! mɛi ni ŋɔɔ duŋ feɔ la, ní amɛŋɔɔ la hu amɛfeɔ duŋ, mɛi ni ŋɔɔ joomɔ feɔ ŋɔɔmɔ, ní amɛŋɔɔ ŋɔɔmɔ amɛfeɔ joomɔ lɛ! Kpóo ha mɛi ni buɔ amɛhe nilelɔi, kɛ mɛi ni amɛtsɛɔ amɛhe hiɛtɛ̃lɔi lɛ!”—Yesaia 5:20, 21.
11. Mɛni hewɔ nilee bɛ mli akɛ mɔ ko kɛ ehe aaafɔ̃ lɛ diɛŋtsɛ enɔ beni ekpɛɔ eyiŋ yɛ ekpakpa kɛ efɔŋ he lɛ?
11 Anɔkwale ni eji akɛ Nyɔŋmɔ gbala nakai blema Yudafoi ni “buɔ amɛhe nilelɔi” lɛ atoi lɛ haa ebafeɔ nɔ ni he hiaa waa akɛ, wɔɔtsi wɔhe kɛjɛ wɔhe ni wɔkɛaafɔ̃ wɔhe nɔ kɛfee ekpakpa kɛ efɔŋ he yiŋkpɛɛ lɛ he. Ŋmɛnɛ, gbɔmɛi babaoo kpɛlɛɔ jwɛŋmɔ ni ji “feemɔ nɔ ni otsui sumɔɔ,” loo “feemɔ nɔ ni osusuɔ akɛ eja” lɛ nɔ. Ani nakai gbɛ ni amɛtsɔɔ nɔ lɛ ja? Jeee taakɛ Biblia lɛ tsɔɔ lɛ, nɔ ni kɛɔ yɛ faŋŋ mli akɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa; namɔ aaanyɛ ale?” (Yeremia 17:9) Ani okɛ ohe baafɔ̃ kutumpɔfo ni ehiii lɛ nɔ ni ekudɔ bo yɛ oyiŋkpɛɛfeemɔ mli? Dabida. Yɛ anɔkwale mli lɛ, ekolɛ obaafee nɔ kroko kwraa yɛ nɔ ni nakai mɔ lɛ kɛɔ bo akɛ ofee lɛ he. No hewɔ ni Biblia lɛ kaiɔ wɔ akɛ: “Mɔ ni kɛ ehiɛ fɔ̃ɔ lɛ diɛŋtsɛ etsui nɔ lɛ, kwashia ni; shi mɔ ni nyiɛɔ nilee mli lɛ, aaahere eyiwala.”—Abɛi 3:5-7; 28:26.
Nyɛhaa Wɔkasea Nɔ ni Nyɔŋmɔ Sumɔɔ
12. Mɛni hewɔ ehe hiaa ni wɔyoo “Nyɔŋmɔ suɔmɔnaa nii” lɛ?
12 Akɛni esaaa akɛ wɔkɛ wɔhe fɔ̃ɔ je lɛ nilee nɔ loo wɔnɔ yɛ nɔ ni kɔɔ ekpakpa kɛ efɔŋ he hewɔ lɛ, mɛni esa akɛ wɔfee? Kadimɔ ŋaawoo ni yɔɔ faŋŋ ni jɛ bɔfo Paulo ŋɔɔ nɛɛ: “Nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ní etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.” (Romabii 12:2) Mɛni hewɔ ehe hiaa ni wɔyoo Nyɔŋmɔ suɔmɔnaa nii lɛ? Yehowa kɛ yiŋtoo ni yɔɔ tɛ̃ɛ shi hewalɛ yɔɔ mli haa yɛ Biblia lɛ mli akɛ: “Bɔ ni ŋwɛi kwɔ fe shikpɔŋ lɛ, nakai migbɛ̀i lɛ kwɔ fe nyɛgbɛ̀i lɛ, ni mijwɛŋmɔi lɛ hu kwɔ fe nyɛjwɛŋmɔi lɛ!” (Yesaia 55:9) No hewɔ lɛ, yɛ nɔ najiaŋ ni wɔkɛ wɔhe aaafɔ̃ nɔ ni akɛɛ atsɛɔ lɛ jwɛŋmɔ kpakpa loo henumɔ kpakpa nɔ lɛ, awoɔ wɔ hewalɛ akɛ: “Nɔ fɛɛ nɔ lɛ nyɛkaa nyɛkwɛa akɛ esa Nuntsɔ lɛ hiɛ lo.”—Efesobii 5:10.
13. Yesu wiemɔi ni aŋma afɔ̃ shi yɛ Yohane 17:3 lɛ maa nɔ mi akɛ ehe miihia ni wɔle nɔ ni Nyɔŋmɔ sumɔɔ lɛ yɛ mɛɛ gbɛ nɔ?
13 Yesu Kristo ma bɔ ni enɛ he hiaa lɛ nɔ mi beni ekɛɛ akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ he nilee.” (Yohane 17:3, NW) Wiemɔ ‘aaaná ohe nilee’ lɛ tsɔɔ babaoo fe ‘lee’ kɛkɛ. Taakɛ Vine’s Expository Dictionary lɛ tsɔɔ lɛ, “etsɔɔ tsakpaa ni kã mɔ ni leɔ lɛ kɛ nɔ ni aleɔ lɛ teŋ; yɛ enɛ gbɛfaŋ lɛ, nɔ ni ale lɛ he yɛ sɛɛnamɔ babaoo kɛha mɔ ni le lɛ, ni no hewɔ lɛ, eteeɔ wekukpaa shi.” Wekukpaa ní akɛ mɔ ko aaaná lɛ tsɔɔ babaoo fe le ni aleɔ nɔ ni mɔ lɛ ji loo nɔ ni egbɛi ji. Nɔ ni fata he ji le ni aleɔ nɔ ni nakai mɔ lɛ sumɔɔ kɛ nɔ ni esumɔɔɔ, nibii ni jara wa kɛha lɛ, eshishitoo mlai—ni oooye nɔ.—1 Yohane 2:3; 4:8.
Nyɛhaa Wɔtsɔsea Wɔhenumɔ Nii Lɛ
14. Mɛni Paulo kɛɛ no ji srɔtofeemɔ titri ni yɔɔ mumɔŋ abifabii kɛ mɛi ni edara lɛ ateŋ?
14 Belɛ, te wɔɔfee tɛŋŋ wɔle ekpakpa kɛ efɔŋ mlikpamɔ? Paulo wiemɔi ni ekɛha klɛŋklɛŋ afii oha lɛ mli Hebri Kristofoi lɛ kɛ hetoo lɛ haa. Eŋma akɛ: “Mɔ fɛɛ mɔ ni yeɔ fufɔ lɛ, ekpako jalɛ wiemɔ lɛ shi; ejaakɛ fufɔoo ji lɛ. Shi mɛi ni edara lɛ anɔ̃ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.” Paulo kɛ “fufɔ” ni etsɔɔ mli yɛ kuku ni tsɔ hiɛ lɛ mli akɛ “Nyɔŋmɔ wiemɔi lɛ amli shishijee nibii lɛ” to “niyenii kpakpa,” ni ji “mɛi ni edara lɛ anɔ,” “mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ” lɛ he.—Hebribii 5:12-14.
15. Mɛni hewɔ nitsumɔ dɛŋdɛŋ he hiaa koni akɛna Nyɔŋmɔ he anɔkwa nilee lɛ?
15 Enɛ tsɔɔ akɛ, klɛŋklɛŋ kwraa lɛ, esa akɛ wɔtsu nii waa koni wɔná Nyɔŋmɔ shishitoo mlai ni yɔɔ e-Wiemɔ, Biblia lɛ mli lɛ he shishinumɔ ni ja. Jeee nibii ni esa akɛ wɔfee kɛ nɔ ni esaaa akɛ wɔfeɔ he mla kakadaŋŋ wɔtaoɔ. Biblia lɛ jeee nakai wolo. Yɛ no najiaŋ lɛ, Paulo tsɔɔ mli akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” (2 Timoteo 3:16, 17) Bɔni afee ni wɔná nakai nitsɔɔmɔ, hiɛkamɔ, kɛ tsɔsemɔ lɛ he sɛɛ lɛ, esa akɛ wɔkɛ wɔjwɛŋmɔ kɛ wɔjwɛŋmɔŋ nyɛmɔ atsu nii. Enɛ biɔ mɔdɛŋbɔɔ, shi nɔ ni jɛɔ mli baa—ní haa ‘eyeɔ emuu ni asaa lɛ pɛpɛɛpɛ ahaa nitsumɔ kpakpa fɛɛ nitsumɔ kpakpa’—lɛ sa.—Abɛi 2:3-6.
16. Ákɛ aaatsɔse mɔ ko henumɔ nii lɛ tsɔɔ mɛni?
16 Agbɛnɛ hu, taakɛ Paulo tsɔɔ lɛ mɛi ni edara lɛ “eha amɛhenumɔ nii lɛ ele ekpakpa kɛ efɔŋ mlikpamɔ.” Biɛ ji he ni sane oti lɛ yɔɔ. Wiemɔ “eha amɛhenumɔ nii lɛ ele” lɛ tsɔɔ diɛŋtsɛ akɛ “atsɔse henumɔ nii lɛ (tamɔ kpɔiaŋgbɔlemɔ mli akaŋshilɔ).” (Kingdom Interlinear Translation) Kpɔiaŋgbɔlemɔ mli akaŋshilɔ ni he esa waa lɛ kɛ ŋaa nɔ̃ ko ni ahala tamɔ, dade kokroo loo dade ni akɛfɔ̃ tso nɔ tsuɔ nii ekɛtsɔmɔɔ ehe oyayaayai ni efeɔ tamɔ nɔ ni emli etsiii kwraa. Enyɛɔ ekudɔɔ egbɔmɔtso lɛ he nii lɛ kwraa be fɛɛ be, ni enaa amrɔ nɔŋŋ nɔ ni esa akɛ efee bɔni afee ni enyɛ egbe enifeemɔ lɛ naa yɛ omanyeyeli mli. Nɔ ni haa enyɛɔ efeɔ enɛɛmɛi fɛɛ ji tsɔsemɔ kɛ hesaamɔ ni wa ni efeɔ daa lɛ.
17. Mɛɛ shishinumɔ naa esa akɛ wɔtamɔ kpɔiaŋgbɔlemɔ mli akaŋshilɔ yɛ?
17 Yɛ mumɔŋ gbɛfaŋ lɛ, kɛ́ wɔmiisumɔ ni wɔná nɔmimaa akɛ yiŋkpɛi kɛ nihalamɔi ni wɔfeɔ lɛ ja be fɛɛ be lɛ, no lɛ esa akɛ wɔ hu wɔtsɔse wɔhe tamɔ kpɔiaŋgbɔlemɔ mli akaŋshilɔ. Esa akɛ wɔná wɔhenumɔ nii kɛ wɔgbɔmɔtso lɛ he nii lɛ anɔ hewalɛ be fɛɛ be. (Mateo 5:29, 30; Kolosebii 3:5-10) Ákɛ nɔkwɛmɔnɔ lɛ, ani otsɔseɔ ohiŋmɛii koni ekakwɛ nibii gbohii loo otoii koni ekabo lalai kɛ wiemɔi ni baa shi toi? Eji anɔkwale akɛ, nakai nibii ni esaaa lɛ ebɔle wɔ fɛɛ wɔhe kɛkpe. Shi kɛlɛ, ekã he eji wɔgbɛnaa nii akɛ wɔhaŋ ehe shi yɛ wɔtsui kɛ wɔjwɛŋmɔ mli. Wɔbaanyɛ wɔkase lalatsɛ lɛ, mɔ ni la akɛ: “Mikɛ nɔ ko gbonyo ko etoŋ mihiɛ; minyɛ̃ɔ nifɔjianifeemɔ; ekpɛtɛŋ mihe. . . . Mɔ ni maleɔ lɛ, edamɔŋ shi yɛ mihiɛ.”—Lala 101:3, 7.
Tsɔsemɔ Ohenumɔ Nii lɛ Kɛtsɔ Ekɛ Nitsumɔ Nɔ
18. Mɛni wiemɔ ‘fɔ ni afɔɔ feemɔ’ ni yɔɔ Paulo nii amlitsɔɔmɔ ni tsɔɔ mɔ ko henumɔ nii ní aaatsɔse lɛ lɛ mli lɛ tsɔɔ?
18 Esa akɛ wɔkai akɛ “fɔ” ni ‘wɔɔfɔ feemɔ’ lɛ nɔ wɔbaanyɛ wɔtsɔ wɔtsɔse wɔhenumɔ nii lɛ ni ele ekpakpa kɛ efɔŋ mlikpamɔ. Yɛ gbɛ kroko nɔ lɛ, be fɛɛ be ni wɔkɛ yiŋkpɛɛ ko baakpe lɛ, esa akɛ wɔkɛ wɔjwɛŋmɔŋ nyɛmɔi atsu nii ni wɔkɛle Biblia shishitoo mlai ni yɔɔ mli kɛ bɔ ni wɔbaanyɛ wɔkɛtsu nii wɔha. Ha efee osu akɛ obaapɛi nibii amli yɛ Biblia kasemɔ woji ni “tsulɔ anɔkwafo kɛ nilelɔ” lɛ efee lɛ mli. (Mateo 24:45) Eji anɔkwale akɛ, wɔbaanyɛ wɔtao yelikɛbuamɔ kɛjɛ Kristofoi ni edara yɛ mumɔŋ lɛ aŋɔɔ. Shi kɛlɛ, yɛ naagbee mli kwraa lɛ, wɔbaanyɛ wɔná sɛɛnamɔ babaoo yɛ mɔdɛŋ ni wɔ diɛŋtsɛ wɔbaabɔ ni wɔkɛkase Nyɔŋmɔ Wiemɔ lɛ, ni wɔsɔle wɔha Yehowa kɛha egbɛtsɔɔmɔ kɛ emumɔ lɛ.—Efesobii 3:14-19.
19. Kɛ́ wɔtee nɔ wɔtsɔse wɔhenumɔ nii lɛ fiofio lɛ, mɛɛ jɔɔmɔi baanyɛ afee wɔ nɔ?
19 Yɛ be mli ni wɔtsɔseɔ wɔhenumɔ nii lɛ fiofio lɛ, oti ni ma wɔhiɛ lɛ ji “koni wɔkakã he wɔfee abifabii ni tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ amɛ, ni ekpalaa amɛ kɛyaa kɛbaa yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa.” (Efesobii 4:14) Yɛ no najiaŋ lɛ, kɛtsɔ Nyɔŋmɔ suɔmɔnaa nii lɛ ahe nilee kɛ shishinumɔ ni wɔyɔɔ lɛ nɔ lɛ, wɔbaanyɛ wɔfee yiŋkpɛi bibii kɛ ewuji ni nilee yɔɔ mli, ní he yɔɔ sɛɛnamɔ kɛha wɔ, ní baatswa wɔnanemɛi jalɔi lɛ ema shi, ni nɔ ni fe fɛɛ lɛ ebaasa wɔ ŋwɛi Tsɛ lɛ hiɛ. (Abɛi 27:11) Mɛɛ jɔɔmɔi kɛ hebuu enɛ ji yɛ jaramɔ bei nɛɛ amli nɛkɛ!
[Shishigbɛ niŋmaa]
a Yɛ adesai ashihilɛ mli haomɔi ni fe fɛɛ lɛ amli 40 ní Dr. Thomas Holmes kɛ Dr. Richard Rahe bua naa lɛ mli lɛ, hefatalɔ gbele, gbalafitemɔ, kɛ gbalamlitsemɔ ji nibii etɛ ni ba klɛŋklɛŋ gbɛhe lɛ. Gbalashihilɛ mlibotemɔ ba gbɛhe ni ji kpawo.
Ani Obaanyɛ Otsɔɔ Mli?
• Mɛɛ nyɛmɔ he hiaa wɔ koni wɔkɛfee yiŋkpɛi kpakpai?
• Mɛni hewɔ nilee bɛ mli akɛ wɔɔkwɛ gbɔmɛi ni ale amɛ waa loo wɔkɛ wɔhe baafɔ̃ wɔhenumɔi anɔ beni wɔfeɔ yiŋkpɛɛ yɛ ekpakpa kɛ efɔŋ he lɛ?
• Mɛni hewɔ esa akɛ wɔná nɔmimaa yɛ nɔ ni Nyɔŋmɔ sumɔɔ lɛ he beni wɔfeɔ yiŋkpɛɛ lɛ, ni te wɔɔfee tɛŋŋ wɔfee enɛ?
• ‘Wɔhenumɔ nii ni wɔɔtsɔse lɛ’ lɛ tsɔɔ mɛni?
[Mfoniri ni yɔɔ baafa 9]
Sɛɛnamɔ bɛ he akɛ wɔbaakwɛ niiatsɛmɛi kɛ mɛi ni ehe gbɛi lɛ kɛha gbɛtsɔɔmɔ
[Mfoniri ni yɔɔ baafa 10]
Taakɛ kpɔiaŋgbɔlemɔ mli akaŋshilɔi ji lɛ, esa akɛ wɔna wɔhenumɔi kɛ gbɔmɔtso lɛ he nii lɛ fɛɛ nɔ hewalɛ