“Nyɛkaia Mɛi Ni Nyiɛɔ Hiɛ Yɛ Nyɛteŋ Lɛ”
“Nyɛkaia mɛi ni nyiɛɔ hiɛ yɛ nyɛteŋ lɛ, mɛi ni wieɔ Nyɔŋmɔ wiemɔ lɛ amɛtsɔɔ nyɛ lɛ, ni be mli ni nyɛsusuɔ bɔ ni amɛjeŋba yɔɔ lɛ he lɛ “Nyɛkasea amɛhemɔkɛyeli lɛ.”—HEBRIBII 13:7, New World Translation.
1. Mɛɛ tsakemɔi tee nɔ yɛ anɔkwale jamɔ he yɛ afii ohai 19 lɛ naagbee mli, shi te ahala onukpai ni ji Kristofoi aha tɛŋŋ?
1 YƐ AFII ohai 19 lɛ naagbee fa lɛ mli lɛ, aje shishi akɛ aaato anɔkwale jamɔ ama shi kɛtsɔ Biblia kaselɔi akuu fioo ko ni amɛjɔɔ amɛhe nɔ ni kɛ Charles Taze Russell bɔɔ yɛ Pittsburgh, Pennsylvania lɛ nɔ.. Amɛje shishi klɛŋklɛŋ koni amɛtswa anɔkwale Biblia mli tsɔɔmɔ amɛma shi‘ekoŋŋ, nɔ ni eye ehe kwraa kɛjɛ Babilon-blema saji kɛ jeŋ nilee he. Shi, shishijee gbɛjianɔtoo kɛha saamɔ lɛ tee nɔ blɛoo yɛ asafo gbɛjianɔtoo mli. Eyɛ mli akɛ Biblia Kaselɔi lɛ yɛ onukpai kɛ onukpai asɛɛbii (asafoŋ sɔɔlɔi) moŋ, shi epasa jamɔ mli susumɔi komɛi hi gbɛjianɔtoo lɛ fai komɛi amli. Ejaakɛ kɛbashi afii ohai 20 lɛ amli tɔɔ lɛ asafoi lɛ tsɔɔ dɛmokrase oshikifɔɔ nɔ amɛhalaa onukpai, kɛtsɔɔ amɛniji ni amɛholeɔ nɔ lɛ anɔ.
2. Shi kɛlɛ, mɛɛ tɛi ni afolɔ ashwie shi ni nɔ kwɔlɔ ato amamɔ shi aha onukpai ni yɔɔ Yehowa webii ateŋ lɛ?
2 Yɛ enɛ po sɛɛ lɛ, ama tɛi ni afolɔ ashwie shi ni nɔ kwɔlɔ anɔ mi, ejaakɛ blɔfo Buu-Mɔɔ lɛ ni ji November 1, 1909 nɔ lɛ kɛɛ yɛ baafa 325 akɛ: “Yɛ Onukpai lɛ ahalamɔ mli lɛ, esa akɛ mɛi ni afee amɛ krɔŋkrɔŋ lɛ akai akɛ gbɛnaa nii lɛ ka amɛnɔ; ni esaaa akɛ amɛfɔɔ oshiki amɛhalaa mɔ ko, ní amɛkɛ hiɛdɔɔ susuuu Ŋwɛi suɔmɔnaa nii kɛ sɔlemɔ kɛha Ŋwɛi gbɛtsɔɔmɔ he.” Nɔ ni aŋma lɛ tee nɔ ema sui sɔrɔtoi etɛ ni kɔɔ mɔ ni ji onukpa kpakpa lɛ he lɛ nɔ mi: (1) Esa akɛ efee mɔ ni he esa yɛ nitsɔɔmɔ mli; (2) esa akɛ etsɔɔ anɔkwale shi jeee tɔmɔ; kɛ (3) heshibaa kɛ hetuu-kɛɛ hamɔ ji “shishijee taomɔ nii titri kɛha onukpayeli.”
ATO TEOKRASE GBƐJIANƆ AMA SHI EKOŊŊ
3, 4. Mɛɛ yinɔsane mli tsakemɔi ni kɔɔ halamɔi ni afeɔ ahaa asafo lɛ mli gbɛnaa nii ahe ba yɛ (a) 1919? (b) 1932? (d) 1938? kɛ (e) 1971?
3 Afi 1919 mli ato gbɛjianɔ klɛŋklɛŋ koni ato teokrase lɛ ni aaakwɛ halamɔi anɔ ekoŋŋ lɛ ama shi. Afɔ nine atsɛ asafoi lɛ koni amɛjie nyɛmi nuu ko ni yɔɔ ekaa yi amɛha akɛ sɔɔmɔ “gbɛtsɔɔlɔ,” koni enyiɛ hiɛ yɛ shiɛmɔ mli. Efeŋ mɔ ko ni aaahala lɛ ekoŋŋ daa afi shi moŋ Buu Mɔɔ Asafo lɛ, ni ji mɛi ni afɔ amɛ mu lɛ asafo lɛ najiaŋdamɔlɔi yɛ mla naa lɛ baahala lɛ tɛɛ. Kɛkɛ ni yɛ 1932 lɛ, akɛ sɔɔmɔ ajinafoi ni nyɛmimɛi ni amɛdara yɛ mumɔŋ ni hiɛ sɔɔmɔ gbɛhei sɔrɔtoi yɛ asafo lɛ mli shi kɛlɛ asafo lɛ halaa amɛ lɛ to onukpai ni ahala amɛ ni kɛ sɔɔmɔ “gbɛtsɔɔlɔ” lɛ baafee ekome kɛtsu nii lɛ najiaŋ. Aŋmɛɛ wiemɔ “onukpa” lɛ he ni akɛ “asafo sɔɔlɔ,” “Biblia kasemɔ sɔɔlɔ” kɛ ekrokomɛi tsu nii.
4 Nɛkɛ he ni atseɔ kɛjɛɔ mɛi ni asafo lɛ halaa amɛ nɛɛ he lɛ baaa aahu kɛyashi 1938, be mli ni atsɔɔ akɛ hewalɛ ni akɛhalaa mɛi nɛɛ yɛ Kristofoi asafo ni yɔɔ jeŋ fɛɛ lɛ Nɔyeli Kuu lɛ dɛŋ agbɛnɛ. Kɛjɛ nakai be lɛ nɔ kɛyaa lɛ. Asafo lɛ diɛŋtsɛ halaa hii ni sa akɛ “sɔɔlɔi,” koni amɛkwɛ nitsumɔi sɔrɔtoi ni yɔɔ asafo lɛ mli lɛ anɔ. Shi onukpa lɛ kɛ nɔkwɛlɔ lɛ nitsumɔi ahe shishinumɔ ni mli ka shi faŋŋ lolo je kpo yɛ May 1 kɛ July 1, 1972 Buu-Mɔɔ lɛ mli. Akɛ yiŋtooi ni ja ha yɛ nɔ hewɔ ni esa akɛ aku sɛɛ aya Biblia mli wiemɔi kɛha nuu ni eda, aloo onukpa (presbýteros) , kɛ nɔkwɛlɔ (epískopos) lɛ he.
5. (a) Mɛni hewɔ esa akɛ akwɛ jogbaŋŋ titri yɛ onukpai ni ajieɔ amɛ yi ahaa lɛ mli? (b) Mɛni nibii esa akɛ asusu he?
5 Aku sɛɛ ama tɛi ni nɔ kwɔlɔ ni mumɔ krɔŋkrɔŋ lɛ efolɔ eshwie shi ni ajaje yɛ Nyɔŋmɔ Wiemɔ lɛ mli lɛ nɔ mi shikome ekoŋŋ. Ni mɛni hewɔ? Ejaakɛ bɔni afee ni onukpa lɛ afee mɔ ni sa bulɛ lɛ esa akɛ efee mɔ ni ‘nyiɛɔ hiɛ’ yɛ Kristofoi ajeŋba mli kɛ agbɛnɛ yɛ sɔɔmɔ lɛ mli dani abaajie eyi ni ahala lɛ. (Hebribii 13:7, 17) No hewɔ lɛ, onukpai akuu lɛ kɛ oyaiyeli akafee amɛ nii yɛ onukpai heei ayijiemɔ mli. (1 Timoteo 3:6; 5:22) Kaimɔ akɛ, afiteɔ be kɛ sane hesusumɔ babaoo yɛ onukpa ni esaaa lɛ jiemɔ mli fe ni aaajie eyi koni ahala lɛ. Yɛ anɔkwale mli lɛ, gbɛtsɔɔmɔ ni fata he ni esa akɛ anyiɛ sɛɛ ji kɛji akɛ asafo lɛ buɔ nyɛmi nuu nɛɛ akɛ onukpa momo dani ahalaa lɛ. Ani ena amɛbulɛ kɛtsɔ Biblia mli taomɔ nii ni anaa yɛ ehe lɛ nɔ akɛ ŋwanejee ko bɛ eyi ni aaajie koni ahala lɛ lɛ he?
‘Mɔ Ni Yeɔ Ewe Nɔ Jogbaŋŋ’
6. Mɛni ji onukpa lɛ hesaai yɛ eweku lɛ gbɛfaŋ lɛ ekomɛi?
6 Nyɛhaa wɔsusua onukpai ahesaai ni bɔfo Paulo jaje lɛ ekomɛi ahe ekoŋŋ ni wɔkwɛ nɔ ni etsɔɔ kɛ akɛmiitsu nii diɛŋtsɛ ŋmɛnɛ. Paulo ŋma akɛ:
“Kɛ mɔ ko yɛ ni kpa ko bɛ ehe, ni eji mɔ ni yɔɔ ŋa kome, ni yɔɔ bii ni heɔ yeɔ ni awieee amɛhe akɛ nyenyeŋtswibɔlɔi loo toigbolɔi ji amɛ lɛ.”—Tito 1:6.
“Shi esa akɛ nɔkwɛlɔ lɛ ahi shi . . . [akɛ] . . . mɔ ni yeɔ lɛ diɛntsɛ ehe nɔ jogbaŋŋ, ni ebii boɔ lɛ toi kɛ woo fɛɛ, shi kɛ mɔ ko leee lɛ diɛŋtsɛ ewe nɔ yeli lɛ, te eeefee tɛŋŋ ekwɛ Nyɔŋmɔ asafo lɛ hu?”—1 Timoteo 3:2, 4, 5
7. Mɛɛ pɛpɛɛpɛ-ŋmɛɛ ni esa akɛ akwɛ lɛ jogbaŋŋ ataoɔ yɛ onukpa lɛ gbɛnaa nii kɛha eweku lɛ kɛ asafo lɛ he?
7 Taomɔ nii akɛ mɔ akwɛ ewe nɔ jogbaŋŋ lɛ kɛ kaa diɛŋtsɛ bafɔɔ onukpai babaoo nɔ. Te onukpa lɛ aaafee tɛŋŋ anyiɛ hiɛ yɛ asafo lɛ mli ni kɛlɛ ekaku ehiɛ eshwie eŋa kɛ ebii amumɔŋ kɛ henumɔŋ hiamɔ nii anɔ hu? Ebɛ mlɛo. Eka shi faŋŋ akɛ, mumɔŋ salɛ he miihia koni aŋmɛ pɛpɛɛpɛ yɛ nɛkɛ gbɛnaa nii sɔrɔtoi nɛɛ amli. Yɛ bei komɛi amli lɛ asafo lɛ mlibii biɔ be kɛ nibii ahe nitsumɔ ni kulɛ esa akɛ onukpa lɛ kɛha eweku lɛ yɛ gbɛ ni ja nɔ lɛ. Mɛni hewɔ eweku lɛ he susumɔ he hiaa waa nakai lɛ? Ejaakɛ kɛji akɛ eku ehiɛ eshwie ekomefeemɔ ni ka ekɛ eweku lɛ teŋ lɛ nɔ aloo gbekɛbii bibii lɛ batsɔmɔ mɛi ni amɛbuuu mumɔŋ nibii lɛ, belɛ yɛ enyɛmɔi kɛ ekãa ni efeɔ lɛ fɛɛ sɛɛ lɛ, efeŋ mɔ ni he esa akɛ efeɔ onukpa. No hewɔ lɛ, esa akɛ wɔkai akɛ nɔkwɛmɔ nitsumɔ lɛ jeɔ shishi yɛ shia! Hɛɛ, esa akɛ onukpa lɛ kɛ eweku lɛ, ajie pɛpɛɛpɛ ni aŋmɛɔ jogbaŋŋ kpo kɛ agbɛnɛ asafo lɛ yɛ enibimɔi amli—Efesobii 5:28-33; 6:4; 1 Timoteo 5:8; 1 Petro 3:7.
‘Jeee Mɔ Nl Feɔ Lɛ Diɛŋtsɛ Etsuinaa Nii Shi Mɔ Ni He Jɔ’
8, 9. Mɛɛ sui esa akɛ onukpa lɛ ajie lɛ kpo yɛ ‘bɔ ni ekɛ mɛi krokomɛi yeɔ haa lɛ mli?
8 Taomɔ nii krokomɛi ni ato naa lɛ yɛ babaoo kɛɛmɔ yɛ bɔ ni onukpa lɛ kɛ enanemɛi onukpai lɛ kɛ asafo lɛ fɛɛ yeɔ haa lɛ mli. Taakɛ Paulo tsɔɔ enɛ mli yɛ ewoji ni eŋmala eyaha Tito kɛ Timoteo lɛ mli lɛ:
“Ejaakɛ esa akɛ nɔkwɛlɔ lɛ kpa ko akahi ehe, akɛni Nyɔŋmɔ we nɔ tsulɔnukpa ji lɛ hewɔ lɛ jeee mɔ ni feɔ lɛ diɛŋtsɛ etsuinaa nii, jeee mlifutsɛ, . . . jeee ninekpokpookpotsɛ, . . . jeee kpɛkpɛɛlɔ.”—Tito 1:7, 8.
“Jeee ninekpokpookpotsɛ, shi moŋ mɔ ni he jɔ, mɔ ni beee.” 1 Timoteo 3:3.
9 Nɛkɛ taomɔ nii nɛɛ tsɔɔ akɛ esa akɛ onukpa lɛ atamɔ Kristo yɛ esubaŋ mli. Eji anɔkwale akɛ enɛ ji tɛ ni afo afɔ shi ni nɔ kwɔ. Shi nakai tɛ nɛɛ ji kɛha Kristofonyo fɛɛ Kristofonyo! Esa akɛ wɔ fɛɛ wɔfee Kristo kaselɔi, ni tsɔɔ akɛ esa akɛ wɔhe ajɔ. (1 Korintobii 11:1) Taakɛ Biblia mli niŋmalɔ Yakobo tsɔɔ mli lɛ: “Shi nilee ni jɛ ŋwɛi lɛ, tsutsu lɛ ehe tse, no sɛɛ lɛ ehe jɔ, ehiɛ ka shi, eboɔ toi, eyi obɔ kɛ mɔbɔnalɛ kɛ nibii kpakpai . . . Shi jalɛ yibii lɛ, hejɔlɛ mli aduɔ yɛ ahaa mɛi ni feɔ hejɔlɛ nii lɛ.”—Yakobo 3:17, 18.
10, 11. (a) Mɛɛ gbɛ nɔ onukpa lɛ subaŋ baanyɛ asa asafo lɛ he yɛ? (b) Kɛji akɛ sɔrɔtofeemɔi yɛ susumɔi amli po yɛ lɛ, mɛɛ sui ji nɔ ni esa akɛ ahi shi?
10 Ákɛ onukpai lɛ, ani wɔhaa ‘toiŋjɔlɛ hiɔ shi’? Onukpa ko basumɔŋ akɛ efee mɔ ni kɛ naataamɔ loo béi baa. Esa akɛ onukpai akuu Iɛ afee nɔkwɛmɔ nɔ kpakpa yɛ enɛ mli. Enɛ haŋ asafo lɛ ahao yɛ béi ni yɔɔ onukpai lɛ ateŋ lɛ hewɔ. Nyɛhaa wɔ fɛɛ wɔkaia Paulo wiemɔi lɛ: “No hewɔ lɛ miitao akɛ hii asɔle yɛ he fɛɛ he ni amɛhole niji ni he tse nɔ, ni mlifu loo ŋwanejee akaba mli.”—1 Timoteo 2:8.
11 Kɛ eyɛ mli aahu lɛ, sɔrɔtofeemɔ yɛ susumɔi amli baaba. Nuu ni he jɔ, ni ekolɛ eyɔɔ gbɛi loo ale lɛ waa lɛ efeŋ mɔ ni feɔ etsuinaa nii aloo kuɛŋtilɔ. Ebaasumɔ ni eŋmɛɛ saji ahe kɛji akɛ sane lɛ kɔɔɔ Ŋmalɛ mli shishitoo mlai ahe. Ni kɛji akɛ ekɔɔ nomɛi ahe lɛ, ebaana bɔ ni nilee yɔɔ henɔyeli ni eeehiɛ mli lɛ mli. Ebaakai shishitoo mla ni ajaje yɛ 1 Korintobii 13:4, 5 akɛ suɔmɔ “mli wooo la” lɛ.—Kolosebii 3:12-14.
‘ANƆKWA WIEMƆ LƐ MLI HIƐMƆ’
12. Mɛɛ taomɔ nii kroko ni he hiaa Paulo ma nɔ mi?
12 Mɛni baaye abua onukpa lɛ lolo ni ena hesaai ni he hiaa lɛ? Yɛ anɔkwale mli lɛ, yɛ shihilɛi komɛi amli lɛ, mɛni ebaanyɛ efee ni emɔ enɛɛmɛi amli? Wɔyɛ hetooi lɛ yɛ Paulo wiemɔi lɛ amli:
“Mɔ ni hiɛɔ tsɔɔmɔ lɛ naa anɔkwa wiemɔ lɛ mli [kpɛŋŋ], koni enyɛ ewie etsɔɔ mɛi yɛ nitsɔɔmɔ ni tsaa mɔ lɛ mli, ni mɛi ni kuɔ wiemɔ naa lɛ hu, eka amɛhiɛ”—Tito 1:9.
“Mɔ ni le nitsɔɔmɔ.”—1 Timoteo 3:2.
13. Te esa akɛ onukpa lɛ akwɛ emumɔŋ hewalɛnamɔ nɔ jogbaŋŋ eha tɛŋŋ?
13 “Mɛni onukpa lɛ baanyɛ afee bɔni afee ni ‘emɔ anɔkwa wiemɔ lɛ mli kpɛŋŋ’ ni efee “mɔ ni le nitsɔɔmɔ”? Klɛŋklɛŋ lɛ, esa akɛ eto be ema shi ni ekase Biblia lɛ daa lɛ diɛŋtsɛ. Nɔ ni fata enɛ he ji hesaamɔ kɛha Kristofoi akpeei kɛ wiemɔi ni akɛwo edɛŋ. Kɛha lɛ diɛŋtsɛ emumɔŋ hewalɛnamɔ hewɔ lɛ, esaaa akɛ nɛkɛ hesaamɔ nɛɛ feɔ hiɛaŋhiɛaŋ nɔ. Akɛ nɔkwɛmɔ nɔ lɛ, ebaanyɛ efolɔ Buu-Mɔɔ nikasemɔ lɛ mli hetooi lɛ ashishi yɛ be kukuoo mli, shi ani no tsɔɔ akɛ ekase sane lɛ! Ani enuɔ bɔ ni atsu saneyitso lɛ he nii jogbaŋŋ aha lɛ shishi? Ani ekane Biblia ŋmalɛi ni atsɛ lɛ ekɛto bɔ ni akɛtsɔɔ sane lɛ mli aha lɛ he? Eka shi faŋŋ akɛ enyɛŋ efee enɛ yɛ hetooi ashishi folɔmɔ yɛ be kukuoo mli lɛ mli. Mɔ diɛŋtsɛ teemɔŋ nikasemɔ kɛ weku nikasemɔ heɔ be.—Yoshua 1:8; Lala 1:2; 77:7, 13.
14. Mɛni onukpa lɛ baanyɛ afee koni ejwɛŋ gbɛ ni etsɔɔ nɔ etsɔɔ nii lɛ nɔ jogbaŋŋ?
14 Nɔ ni ji enyɔ lɛ, akɛni gbɛjianɔtoo ni deka bɛ mli lɛ eŋmɛɛɛ gbɛ ni afee nɔ fɛɛ nɔ hewɔ lɛ, esa akɛ onukpa lɛ ajwɛŋ Kristofoi awoji kɛ saji ni kɔɔ ‘enitsɔɔmɔ, wiemɔ kɛ tsɔɔmɔ kɛ bɔ ni ekãa mɛi ahiɛ’ lɛ he lɛ nɔ jogbaŋŋ. Yelikɛbuamɔ ko ni yɔɔ mlɛo yɛ enɛ mli ji ni ena woji sɔrɔtoi fioo ko ni ebua naa eto ni amɛhe tse. Ehe miihia kɛha onukpa lɛ titri akɛ enine ashɛ Ŋmalɛ naa adafitswaa ni ji anɔkwale nɔ oya, ni enɛ tsɔɔ Watch Tower Publication index wolo lɛ kɛ nitsumɔ. Mɛni hewɔ enɛɛmɛi fɛɛ he hiaa nakai lɛ? Bɔfo Paulo ŋma akɛ: “Ohiɛ ahi ohe nɔ kɛ̀ tsɔɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔ bo toi lɛ fɛɛ yiwala.”—1 Timoteo 4:16.
15. Mɛni hewɔ oshara yɔɔ ŋaawoo ni damɔɔɔ ŋmalɛ nɔ lɛ mli lɛ?
15 Hɛɛ, wala kɛ yiwalaheremɔ baanyɛ afee nibii ni yɔɔ ŋaawoo ni onukpa lɛ kɛhaa lɛ mli. Akɛ nɔkwɛmɔ nɔ lɛ, yɛ saji ni kɔɔ hɔ loo musu ni afiteɔ, lá ni agbalaa awoɔ mɔ mli kɛ Kristofonyo ni kɛ ehe wooo maŋsaji amli he lɛ, onukpa lɛ baanyɛ ana lɛ diɛŋtsɛ kɛ mɛi krokomɛi ahenilee, kɛ agbɛnɛ wekukpaa ni ka gbɔmɛi lɛ kɛ Yehowa teŋ lɛ nɔ hewalɛ waa yɛ gbɛ ni hi aloo ehiii nɔ. No hewɔ lɛ, wɔbaanyɛ wɔna akɛ nilee bɛ mli akɛ aaabɔ mɔdɛŋ aha sanebimɔi ahetoo yɛ be mli ni wɔleee aloo wɔbɛ nɔmimaa yɛ nɔ Biblia mli shishitoo mlai ni kɔɔ he lɛ. Ŋaawoo ni bɛ ŋmalɛ ko akɛ eshishitoo nɔ̃ ni hi lɛ baanyɛ aye awui ni anyɛŋ asaa—Filipibii 1:9, 10.
16. Mɛni hewɔ onukpai komɛi egbee esha ni hiɛdɔɔ yɔɔ mli mli lɛ, ni ani enɛ ji sane ko ni he ehiaaa?
16 Yiŋtoo kroko hewɔ ni esa akɛ okwɛ ohe nɔ jogbaŋŋ akɛ onukpa ji bɔ ni ehe hiaa akɛ ona ni oha wekukpaa kpakpa aba okɛ Yehowa teŋ lɛ. Nɔ ni yɔɔ awerɛho ji akɛ onukpai lɛ ateŋ mɛi komɛi ku amɛhiɛ amɛshwie nɛkɛ wekukpaa nɛɛ nɔ kɛyashɛ he ni no ha amɛgbee shi kɛbote eshai tamɔ gbalafitemɔ mli. Te enɛ aaafee tɛŋŋ aba lɛ nakai hu? Ekukufoo mli lɛ amɛŋmɛ gbɛ ni amɛha Yehowa kɛ eshiwooi lɛ tee sɛɛ. Amɛmumɔŋ ninaa nɔ baha loo efee kusuu, ni pɛsɛmkunya heloo akɔnɔi bahe shi. Akɛni ahorabɔɔ ni baa Yehowa gbɛi krɔŋkrɔŋ lɛ nɔ kɛ piŋmɔ ni enɛ ha eba amɛsuɔlɔi lɛ anɔ lɛ jeee amɛhe sane ko hewɔ lɛ, éha onukpai lɛ ateŋ mɛi fioo ko efee mɛi ni yeee amɛgbalashihilɛ mli shiwooi loo kitai lɛ anɔkwale. Eka shi faŋŋ akɛ, gbɔmɛi ni tamɔ nɛkɛ kɛ nanetɔtɔmɔ eba. Anyɛŋ aku hiɛ ashwie amɛ eshai lɛ anɔ akɛ nɔ ko ni yɔɔ fɛlɛfɛlɛ aloo ajie yɛ jwɛŋmɔ mli, akɛni yinɔ ni ŋmɛɔ bɔlɛnamɔ mli nifeemɔi fɛɛ gbɛ mli wɔyɔɔ lɛ hewɔ.—Mateo 13:41; 18:7-9; Hebribii 13:4.
Onukpai Anɔkwafoi Kɛ Amɛŋamɛi
17. Mɛɛ nɔkwɛmɔ nɔ kpakpa onukpai lɛ ateŋ mɛi ni fa lɛ feɔ?
17 Yɛ gbɛ kroko nɔ lɛ, esa akɛ awie akɛ, onukpai ni yɔɔ je lɛŋ fɛɛ lɛ edamɔ shi Shiŋŋ yɛ amɛ emuuyeli kɛ anɔkwayeli mli, ja amɛteŋ mɛi fioo ko pɛ. Amɛ nɔkwɛmɔ nɔ kpakpa yɛ asafoi fe 45,000 amli lɛ ji hewalɛwoo jɛɛhe kɛha Nyɔŋmɔ webii. Nɔkwɛlɔi ni kɛ hiɛdɔɔ tsuɔ nii lɛ bɛ deka kwraa jenamɔ kɛ jetsɛremɔ, tamɔ bɔfo Paulo, yɛ nɛkɛ “jaramɔ bei ni mli wa” nɛɛ amli. (2 Timoteo 3:1; Bɔfoi lɛ Asaji 20:31, New World Translation) Nɛkɛ onukpai nɛɛ miisumɔ ni amɛsara mɔ ni he yeɔ yɛ mumɔŋ lɛ yɛ eshia, ni bɔ ni ejɛkɛmɔ ji aloo kɔɔyɔɔŋ tsakemɔ yɔɔ lɛ kɔɔɔ he eko. Kwɛ bɔ ni eyɔɔ fɛo akɛ aaana nɛkɛ ‘onukpai’ nɛɛ akɛ amɛmiinyiɛ hiɛ yɛ sɔɔmɔ nitsumɔ lɛ mli daa!
18. Mɛɛ nitsumɔ kpakpa onukpai aŋamɛi tsuɔ yɛ asafo lɛ mli?
18 Wɔhiɛ sɔɔ afɔlei ni onukpai nɛɛ aŋamɛi lɛ shaa yɛ bei komɛi amli lɛ babaoo! Yɛ bei komɛi amli lɛ, ashiɔ yei nɛɛ yɛ shia yɛ be mli ni amɛwumɛi miifee kpeei krɛdɛɛi komɛi aloo amɛmiisara mɛi. Eshɛɔ be ni atsiɔ gbɛjianɔ ni mɔ diɛŋtsɛ eto lɛ jogbaŋŋ kɛha nɔ ko feemɔ lɛ atoɔ afa yɛ asafo lɛ mli hiamɔ nii ko ni eba hewɔ. Hɛɛ, wɔmiijie nɛkɛ nyɛmimɛi yei kpakpai nɛɛ ni tsiɔ amɛhe kɛjɛɔ mɔdɛŋ ni amɛaabɔ akɛ amɛaaha amɛwumɛi agba amɛ teemɔŋ saji komɛi yɛ ŋaa mli lɛ ayi. Amɛjieɔ bulɛ kpo amɛtsɔɔ onukpai lɛ ni amɛji sɛɛnamɔ kɛha asafo lɛ.—Okɛto Romabii 16:12; Tito 2:3-5 he.
19. (a) Ákɛ mɔ ko ji onukpa lɛ tsɔɔ mɛni? (b) Mɛɛ sane esa akɛ hii ni amɛjɔɔ amɛhe nɔ shi kɛlɛ amɛjeee onukpai lɛ abi amɛ diɛntsɛ amɛhe?
19 Kɛji akɛ wɔsusu nii ni onukpai lɛ tsuɔ yɛ Kristofoi asafo lɛ mli lɛ he ŋmɛnɛ ni wɔna bɔ ni amɛteŋ mɛi ni fa ji mɛi ni kɛ amɛhe shaa afɔle ni amɛnyiɛɔ hiɛ yɛ gbɛ kpakpa nɔ lɛ, wɔjɛɔ wɔtsuiŋ wɔdaa Yehowa shi yɛ suɔmɔ gbɛjianɔtoo ni ekɛba nɛɛ hewɔ. Hii ni yɔɔ nyɛmɔ, ni amɛhiɛ sɔɔ mumɔŋ nibii, ni kɛ amɛhe haa kɛhaa sɔɔmɔ yɛ asafo lɛ mli! No hewɔ ni Paulo baanyɛ akɛɛ Timoteo akɛ: “Kɛ mɔ ko miitao nɔkwɛmɔ nitsumɔ lɛ, eetao nitsumɔ kpakpa” lɛ. Nakai “nitsumɔ kpakpa” lɛ etsɔɔɔ gbɛhe, hewalɛ kɛ hiɛnyam, taakɛ eji yɛ Kristendom lɛ. Ebiɔ mɔ ni susuuu lɛ diɛŋtsɛ ehe tsɔ, ebiɔ afɔleshaa kɛ sɔɔmɔ. Kɛji akɛ oji nuu ni ojɔɔ ohe nɔ ni abaptisi bo shi kɛlɛ ojeee onukpa lɛ, ani oosumɔ ni ojɛ osuɔmɔ mli ni onine ashɛ nakai gbɛnaa nii lɛ nɔ kɛ yiŋtoo ni yɔɔ krɔŋŋ?—1 Timoteo 3:1; Luka 17:10.
20, 21. (a) Te esa akɛ wɔsusu onukpai anɔkwafoi ni yɔɔ asafo lɛ mli lɛ ahe wɔha tɛŋŋ? (b) Yɛ be mli ni wɔfeɔ enɛ lɛ, belɛ mɛni wɔjieɔ lɛ kpo lɛ?
20 Akɛ bulɛ haa mɛi ni kɛ anɔkwayeli nyiɛɔ hiɛ yɛ asafo lɛ mli lɛ. Anɔkwafoi ni yɔɔ asafo lɛ mli lɛ jɛɔ amɛsuɔmɔ mli amɛkpɛlɛɔ amɛsuɔmɔ nɔkwɛmɔ nɔ lɛ nɔ ni amɛnyiɛɔ Paulo ŋaawoo lɛ sɛɛ: “Nyɛkaia nyɛtsɔɔlɔi, mɛi ni wie Nyɔŋmɔ wiemɔ lɛ tsɔɔ nyɛ lɛ; nyɛkwɛa amɛjeŋba lɛ naagbee lɛ, ni nyɛkasea amɛhemɔkɛyeli lɛ. Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛ susumai lɛ ahe akɛ mɛi ni baabu he akɔntaa, koni amɛkɛ miishɛɛ afee nii nɛɛ; shi jeee ŋtsɔidɔɔmɔ; ejaakɛ no ehiii haaa nyɛ.”—Hebribii 13:7, 17.
21 Nyɛhaa wɔ fɛɛ wɔbaa wɔhe shi wɔhaa teokrase gbɛjianɔtoo lɛ ni wɔkɛ bulɛ aha onukpai lɛ ni nyiɛɔ hiɛ diɛŋtsɛ lɛ, koni amɛkɛ miishɛɛ afee enɛ shi jeee kɛ ŋtsɔidɔɔmɔ. Kɛ wɔfee enɛ lɛ, wɔtsɔɔ akɛ wɔkɛ bulɛ hu haa Jeŋ Muu Fɛɛ Nɔkwɛlɔ lɛ, Yehowa, kɛ e-Nɔkwɛlɔ Sɛɛyelɔ, Yesu Kristo.—1 Petro 2:25; Kpojiemɔ 1:1; 2:1–3:22.a
[Shishigbɛ niŋmaa]
a Ajie kɛjɛ September 1, 1983 Blɔfo Buu-Mɔɔ lɛ mli.
Ani Okaiɔ?
□ Mɛɛ tɛi ni afolɔ ashwie shi ni nɔ kwɔlɔ ataoɔ yɛ “onukpai ni ahala amɛ” lɛ adɛŋ?
□ Mɛɛ gbɛjianɔ ato kɛjɛ 1919 kɛyashi 1938 koni aku sɛɛ atswa teokrase gbɛjianɔtoo ama Kristofoi asafo lɛ mli ekoŋŋ?
□ Mɛɛ pɛpɛɛpɛ-ŋmɛɛ esa akɛ onukpa lɛ ahiɛ mli koni etsu egbɛnaa nii kɛha eweku lɛ kɛ asafo lɛ he nii?
□ Mɛɛ sui ni ekaaa esa akɛ onukpai ajie lɛ kpo yɛ bɔ ni amɛkɛ mɛi krokomɛi yeɔ haa lɛ mli?
□ Mɛni hewɔ ehe hiaa akɛ onukpa lɛ ‘amɔ anɔkwa wiemɔ lɛ mli kpɛŋŋ’ lɛ?
□ Mɛni hewɔ esa akɛ wɔda shi yɛ onukpai agbɛjianɔtoo ni yɔɔ asafo lɛ mli lɛ he lɛ?
[Akrabatsa ni yɔɔ baafa 18]
No hewɔ lɛ onukpai ni yɔɔ nyɛteŋ lɛ, mi ni ji nyɛnaanyo onukpa kɛ Kristo amanehului lɛ ahe odasefonyo ni baana anunyam, ni abaajie kpo lɛ hu eko lɛ, miiwie miitsɔɔ amɛ akɛ: Nyɛlɛa Nyɔŋmɔ asafoku ni yɔɔ nyɛteŋ lɛ, nyɛkwɛa nɔ, jeee nɔnyɛɛ naa shi moŋ yɛ suɔmɔ naa: asaŋ jeee sɛɛnamɔ ni yɔɔ hiɛgbele hewɔ, shi moŋ tsuijurɔ naa. Asaŋ jeee akɛ mɛi ni yeɔ asafoi lɛ anɔ nuŋtsɔmɛiasane, shi moŋ mɛi ni toɔ okadii amɛhaa asafoku lɛ. Ni beni tookwɛlɔ nukpa lɛ aaajie ehe kpo lɛ, amɛnine ashɛ anunyam akekre ni ŋalaaa lɛ nɔ.”—1 Petro 5:1-4
[Mfoniri ni yɔɔ baafa 14]
Onukpa Iɛ kɛ eweku lɛ tsuɔ nii yɛ shiɛmɔ mli yɛ nilee mli
[Mfoniri ni yɔɔ baafa 15]
Etoɔ be he gbɛjianɔ hu koni ekɛ esuɔlɔi lɛ ana hiɛtserɛjiemɔ kpakpa mli ŋɔɔmɔ