Nɔkwɛlɔi Ni Kwɛɔ Tooku Lɛ Nɔ

BE NI Yesu yɔɔ shikpɔŋ lɛ nɔ lɛ, ekɛ enifeemɔi tsɔɔ akɛ lɛ ji “tookwɛlɔ kpakpa lɛ.” (Yoh. 10:11) Be ni ena mɛi babaoo ko nyiɛ esɛɛ lɛ, “amɛnii fee lɛ mɔbɔ, ejaakɛ afee amɛ niseniianii, ni akpoo amɛ tamɔ gwantɛŋi ni bɛ kwɛlɔ.” (Mat. 9:36) Petro kɛ bɔfoi krokomɛi lɛ na akɛ mɛi lɛ asane kã etsui nɔ waa. Yesu efeee enii tamɔ amale tookwɛlɔi ni yɔɔ Israel lɛ kwraa. Amale tookwɛlɔi loo nɔkwɛlɔi nɛɛ ku amɛhiɛ amɛshwie Nyɔŋmɔ webii lɛ anɔ aahu akɛ, Nyɔŋmɔ webii lɛ fee yuuyaa, ejaakɛ atsɔɔɔ amɛ Nyɔŋmɔ he nii! (Eze. 34:7, 8) Yesu tsɔɔ Nyɔŋmɔ webii lɛ nii, ni ekwɛ amɛ jogbaŋŋ aahu akɛ, ekɛ ewala po fɔ̃ shi ehã amɛ. Enɔkwɛmɔnɔ kpakpa lɛ hã bɔfoi lɛ na bɔ ni amɛbaafee amɛye amɛbua mɛi ni yɔɔ hemɔkɛyeli lɛ koni amɛku amɛsɛɛ kɛba Yehowa, ni ji ‘tookwɛlɔ kɛ nɔkwɛlɔ ni kwɛɔ amɛsusumai anɔ’ lɛ ŋɔɔ.​—1 Pet. 2:25.

² Be ko be ni Yesu kɛ Petro wieɔ lɛ, ehã efee faŋŋ akɛ, ehe miihia waa ni alɛ gwantɛŋi lɛ ni akwɛ amɛ. (Yoh. 21:15-17) Ekã shi faŋŋ akɛ, enɛ ná Petro nɔ hewalɛ waa, ni sɛɛ mli lɛ, ekɛɛ asafoŋ onukpai ni sɔmɔ yɛ blema Kristofoi asafo lɛ mli lɛ akɛ: “Nyɛkwɛa Nyɔŋmɔ tooku ni yɔɔ nyɛshishi lɛ nɔ tamɔ tookwɛlɔi feɔ lɛ, ni nyɛsɔmɔa akɛ nɔkwɛlɔi, jeee tamɔ nɔ ni aanyɛ nyɛnɔ, shi moŋ nyɛjɛa nyɛsuɔmɔ mli nyɛfea nakai yɛ Nyɔŋmɔ hiɛ; ni jeee yɛ sɛɛnamɔ gbonyo hewɔ hu, shi moŋ tsuijurɔ naa; jeee akɛ mɛi ni yeɔ Nyɔŋmɔ tooku, ni ji egboshinii lɛ anɔ akɛ nuŋtsɔmɛi, shi moŋ nyɛfea nɔkwɛmɔnɔ nyɛhãa tooku lɛ.” (1 Pet. 5:1-3) Nɔ ni Petro wie lɛ kɔɔ nɔkwɛlɔi ni yɔɔ asafo lɛ mli ŋmɛnɛ lɛ hu ahe. Asafoŋ onukpai kaseɔ Yesu, ni amɛjɛɔ amɛsuɔmɔ kɛ amɛtsui mli amɛnyiɛɔ hiɛ yɛ Yehowa sɔɔmɔ lɛ mli kɛfeɔ nɔkwɛmɔnɔ amɛhãa tooku lɛ.​—Heb. 13:7.

³ Wɔhiɛ sɔɔ nɔkwɛlɔi ni mumɔ krɔŋkrɔŋ lɛ ehole yɛ asafo lɛ mli lɛ waa. Wɔnáa bɔ ni amɛkwɛɔ wɔ amɛhãa lɛ he sɛɛ yɛ gbɛi babaoo anɔ. Akɛ nɔkwɛmɔnɔ lɛ, nɔkwɛlɔi lɛ woɔ asafoŋbii lɛ hewalɛ ni amɛnáa dekã kɛyeɔ amɛbuaa amɛteŋ mɔ fɛɛ mɔ. Daa otsi lɛ, amɛkwɛɔ asafoŋ kpeei anɔ jogbaŋŋ, ni no hãa asafo lɛ mli bii lɛ fɛɛ ahe waa yɛ hemɔkɛyeli lɛ mli. (Rom. 12:8) Akɛni amɛbɔɔ mɔdɛŋ amɛbuɔ wɔhe kɛjɛɔ efɔŋfeelɔi kɛ mɛi krokomɛi ni baanyɛ aye wɔ awui lɛ ahe hewɔ lɛ, wɔnuɔ he akɛ wɔyɛ shweshweeshwe. (Yes. 32:2; Tito 1:9-11) Amɛnyiɛɔ hiɛ yɛ shiɛmɔ nitsumɔ lɛ mli hu, ni enɛ woɔ wɔ hewalɛ ni wɔya nɔ wɔkɛ ekãa ashiɛ sane kpakpa lɛ daa nyɔɔŋ nɔ. (Heb. 13:15-17) Yehowa tsɔɔ hii ni ji “nikeenii” nɛɛ anɔ etswaa asafo lɛ emaa shi.​—Efe. 4:8, 11, 12.

⁴ Bɔ ni afee ni akwɛ asafo lɛ nɔ jogbaŋŋ lɛ, esa akɛ mɛi ni aholeɔ koni amɛsɔmɔ akɛ nɔkwɛlɔi lɛ ashɛ taomɔ nii ni yɔɔ Nyɔŋmɔ Wiemɔ lɛ mli lɛ ahe. Kɛ́ mɛi ni aholeɔ lɛ shɛɛɛ taomɔ nii nɛɛ ahe lɛ, anyɛŋ akɛɛ akɛ akɛ mumɔ krɔŋkrɔŋ lɛ ni hole amɛ. (Bɔf. 20:28) Ŋmalɛ naa taomɔ nii ni esa akɛ mɔ ko ashɛ he dani awo lɛ nɔkwɛlɔ yɛ asafo lɛ mli lɛ jeee shwɛmɔ sane, ejaakɛ sɔ̃ ni kã nɔkwɛlɔi lɛ anɔ lɛ tsii. Shi taomɔ nii nɛɛ bɛ lɛ bɔ ni hii ni ji Kristofoi ni sumɔɔ Yehowa, ni miisumɔ ni ekɛ amɛ atsu nii lɛ nyɛŋ ashɛ he. Esa akɛ mɛi fɛɛ ana faŋŋ akɛ, nɔkwɛlɔi nɛɛ kɛ Biblia mli mlai kɛ shishitoo mlai tsuɔ nii daa yɛ amɛshihilɛ mli.

⁵ Bɔfo Paulo tsĩ Ŋmalɛ naa taomɔ nii ni esa akɛ nɔkwɛlɔi fɛɛ ashɛ he lɛ tã yɛ klɛŋklɛŋ wolo ni eŋma emaje Timoteo kɛ wolo ni eŋma emaje Tito lɛ mli. Paulo wie yɛ 1 Timoteo 3:1-7 lɛ akɛ: “Kɛ́ mɔ ko miitao etsɔ nɔkwɛlɔ lɛ, eetao nitsumɔ kpakpa. Esa akɛ nɔkwɛlɔ lɛ afee mɔ ko ni anáŋ ehe sane fɔŋ ko awie, wu ni yɔɔ ŋa kome, mɔ ni ŋmɛɔ pɛpɛɛpɛ yɛ enifeemɔi amli, mɔ ni jwɛŋɔ jogbaŋŋ, mɔ ni nyiɛɔ yɛ gbɛjianɔtoo naa, gbɔfeelɔ, mɔ ni baanyɛ atsɔɔ nii, jeee dãatɔlɔ, jeee mɔ ko ni sumɔɔ nɔmɔ, shi moŋ mɔ ni nuɔ nii ashishi, jeee béilɔ, jeee shikasuɔlɔ, mɔ ni kwɛɔ lɛ diɛŋtsɛ eshĩa nɔ jogbaŋŋ, ni ebii boɔ lɛ toi ni amɛkɛ nibii efeee shwɛmɔ (ejaakɛ kɛ́ mɔ ko leee bɔ ni eeefee ekwɛ lɛ diɛŋtsɛ eshĩa nɔ lɛ, te eeefee tɛŋŋ ekwɛ Nyɔŋmɔ asafo lɛ nɔ lɛ?), jeee mɔ ni batsɔ Kristo kaselɔ etsɛko koni ekawó ehe nɔ ni egbee kojomɔ ni Abonsam gbee mli lɛ mli. Agbɛnɛ hu, esa akɛ mɛi ni yɔɔ sɛɛ lɛ hu aye ehe odase kpakpa koni ekawo ehe hiɛgbele ni egbee Abonsam tsɔne mli.”

⁶ Yɛ wolo ni Paulo ŋma emaje Tito lɛ mli lɛ, ewie akɛ: “Mishi bo yɛ Kreta koni ojaje nibii ni ejaaa lɛ, ni ohole asafoŋ onukpai yɛ maŋ fɛɛ maŋ mli, tamɔ bɔ ni mikɛ gbɛtsɔɔmɔ hã bo lɛ: kɛ́ nuu ko yɛ ni sane ko bɛ ehe, ni eji wu ni yɔɔ ŋa kome, ni eyɛ bii ni heɔ yeɔ ni awieee amɛhe akɛ amɛnyiɛɔ basabasa loo amɛji atuatselɔi. Nɔkwɛlɔ lɛ, akɛni eji shĩa nɔkwɛlɔ ni Nyɔŋmɔ ehala lɛ hewɔ lɛ, esa akɛ efee mɔ ni sane ko bɛ ehe, jeee mɔ ni yeɔ etsuinaa sane, jeee mɔ ni mli fuɔ mramra, jeee dãatɔlɔ, jeee mɔ ni sumɔɔ nɔmɔ, jeee mɔ ni kɛ amimyeli tiuɔ sɛɛnamɔ gbonyo sɛɛ, shi moŋ gbɔfeelɔ, mɔ ni sumɔɔ ekpakpa, mɔ ni jwɛŋɔ jogbaŋŋ, jalɔ, anɔkwafo, mɔ ni yeɔ ehe nɔ, mɔ ni yɛ enitsɔɔmɔ he ŋaa gbɛfaŋ lɛ, ehiɛɔ anɔkwa wiemɔ lɛ mli kpɛŋŋ, koni enyɛ ekɛ tsɔɔmɔ ni hãa mɔ náa hewalɛ lɛ awo mɛi hewalɛ, koni ekɛjaje mɛi ni wieɔ shiɔ tsɔɔmɔ nɛɛ hu.”​—Tito 1:5-9.

⁷ Anɔkwa, Ŋmalɛ naa taomɔ nii kɛhã nɔkwɛlɔi lɛ woɔ Kristofoi hii komɛi ahe gbeyei, ni amɛnuɔ he akɛ amɛnyɛŋ amɛshɛ he. Shi esaaa akɛ amɛnijiaŋ jeɔ wui. Kɛ́ amɛmia amɛhiɛ lɛ, amɛbaanyɛ amɛshɛ he. Kɛ́ amɛjie Kristofoi asui kpakpai ni abiɔ ni nɔkwɛlɔi ajie lɛ kpo lɛ akpo lɛ, no baawo asafoŋbii lɛ hewalɛ ni amɛ hu amɛjie sui nɛɛ akpo. Paulo ŋma akɛ, akɛ nɔkwɛlɔi ehã akɛ nikeenii “kɛhã mɛi krɔŋkrɔŋi lɛ ajajemɔ, kɛhã sɔɔmɔ nitsumɔ, kɛ agbɛnɛ hu, koni akɛtswa Kristo lɛ gbɔmɔtso lɛ ama shi, kɛyashi be ni wɔ fɛɛ wɔbaafee ekome yɛ hemɔkɛyeli lɛ kɛ Nyɔŋmɔ Bi lɛ he nilee krɔŋŋ lɛ mli, ni wɔtsɔ nuu ni eda kɛshɛ Kristo lɛ dalɛ lɛ he.”​—Efe. 4:8, 12, 13.

⁸ Esaaa akɛ aholeɔ gbekɛbii hii loo hii ni batsɔmɔ Kristo kaselɔi etsɛko akɛ nɔkwɛlɔi. Moŋ lɛ, esa akɛ ahole mɛi ni kɛ Biblia mli shishitoo mlai etsu nii yɛ amɛshihilɛ mli be kplaŋŋ, ni le Biblia lɛ mli jogbaŋŋ, ni nuɔ Ŋmalɛ lɛ shishi jogbaŋŋ, ni sumɔɔ asafoŋbii lɛ waa. Esa akɛ amɛfee mɛi ni kɛ́ nɔ ko eyaaa nɔ jogbaŋŋ lɛ, amɛbaaná ekãa amɛwie ni amɛsheee gbeyei. Agbɛnɛ hu, esa akɛ amɛfee mɛi ni baanyɛ ajaje efɔŋfeelɔi, ni amɛbu tooku lɛ he kɛjɛ mɔ fɛɛ mɔ ni baanyɛ aye amɛ awui lɛ he. (Yes. 32:2) Esa akɛ asafoŋbii lɛ fɛɛ ana faŋŋ akɛ, nɔkwɛlɔi lɛ ji mumɔŋ gbɔmɛi ni sumɔɔ Nyɔŋmɔ tooku lɛ waa.

⁹ Esa akɛ mɛi ni aholeɔ akɛ nɔkwɛlɔi lɛ afee mɛi ni hiɛ kã shi yɛ nɔ fɛɛ nɔ ni amɛfeɔ lɛ mli. Kɛ́ mɔ lɛ ebote gbalashihilɛ mli lɛ, esa akɛ ekɛ gbɛtsɔɔmɔ ni Biblia lɛ kɛhã yɛ gbalashihilɛ he lɛ atsu nii, ni tsɔɔ akɛ, esa akɛ efee wu ni yɔɔ ŋa kome ni kwɛɔ lɛ diɛŋtsɛ eshĩa nɔ jogbaŋŋ. Kɛ́ eyɛ bii ni heɔ yeɔ, ni bii nɛɛ boɔ lɛ toi ni amɛkɛ nibii efeee shwɛmɔ ni awieee amɛhe akɛ amɛnyiɛɔ basabasa loo amɛji atuatselɔi lɛ, asafoŋbii lɛ shashaoŋ shi kwraa akɛ amɛbaaya eŋɔɔ amɛyabi ŋaawoo yɛ weku shihilɛ mli saji kɛ Kristofoi ashihilɛ he saji ahe. Kɛfata he lɛ, esa akɛ nɔkwɛlɔ lɛ afee mɔ ko ni anáŋ ehe sane fɔŋ ko awie ni sane ko bɛ ehe ni mɛi ni yɔɔ sɛɛ lɛ po yeɔ ehe odase kpakpa. Ekɛ ehe wooo jeŋba gbonyo ko mli ni ebaaba lɛ akɛ mɔ ko baanyɛ adamɔ no nɔ ni ekɛ sane afɔ̃ enɔ ni ekɛgbe asafo lɛ he guɔ. Ejeee mɔ ko ni ajaje lɛ yɛ efɔŋfeemɔ ko ni yɔɔ hiɛdɔɔ he etsɛko. Asafoŋbii lɛ miisumɔ ni amɛkase enɔkwɛmɔnɔ kpakpa lɛ, ni amɛyɛ he miishɛɛ akɛ amɛbaaba amɛhe shi amɛhã lɛ ni etsɔɔ amɛ gbɛ yɛ Nyɔŋmɔjamɔ mli.​—1 Kor. 11:1; 16:15, 16.

¹⁰ Hii ni shɛɔ taomɔ nii nɛɛ ahe lɛ baanyɛ asɔmɔ yɛ Kristofoi asafo lɛ mli tamɔ bɔ ni onukpai ni hi shi yɛ Israel ni awie amɛhe akɛ amɛji “hii ni hiɛ kã shi, ni le nii, ni yɔɔ niiashikpamɔ” lɛ sɔmɔ Israelbii lɛ. (5 Mo. 1:13) Eyɛ mli akɛ asafoŋ onukpai lɛ yeee emuu moŋ, shi ale amɛ yɛ asafo lɛ kɛ akutso lɛ mli akɛ mɛi ni ja ni sheɔ Nyɔŋmɔ gbeyei, ni amɛba amɛjeŋ yɛ Biblia mli shishitoo mlai lɛ anaa be kplaŋŋ. Akɛni amɛhe bɛ shwamɔ ko hewɔ lɛ, amɛbaanyɛ amɛwie kɛ nɔmimaa amɛtsɔɔ asafoŋbii lɛ.​—Rom. 3:23.

¹¹ Esa akɛ hii ni aholeɔ amɛ akɛ nɔkwɛlɔi lɛ afee mɛi ni ŋmɛɔ pɛpɛɛpɛ yɛ amɛnifeemɔi amli, kɛ agbɛnɛ hu, yɛ bɔ ni amɛkɛ mɛi yeɔ amɛhãa lɛ mli. Amɛbɛ sheketee. Moŋ lɛ, amɛŋmɛɔ pɛpɛɛpɛ yɛ amɛshihilɛ mli ni amɛyeɔ amɛhe nɔ. Amɛŋmɛɔ pɛpɛɛpɛ yɛ nibii tamɔ niyeli, ninumɔ, hiɛtserɛjiemɔ, kɛ shwɛmɔ mli. Amɛŋmɛɔ pɛpɛɛpɛ hu yɛ dãa ni wa kɛnitsumɔ mli, ni no hewɔ lɛ, anyɛŋ akɛ sane afɔ̃ amɛnɔ akɛ amɛji dãatɔlɔi. Akɛni kɛ́ mɔ ko tɔ dãa lɛ, enyɛɛɛ ejwɛŋ jogbaŋŋ, ni ewaa kɛhãa lɛ akɛ ebaaye ehe nɔ hewɔ lɛ, mɔ ko ni tamɔ nakai lɛ nyɛŋ akwɛ asafoŋbii lɛ anɔ jogbaŋŋ ni eye ebua amɛ ni amɛsɔmɔ Nyɔŋmɔ.

¹² Dani nɔkwɛlɔ lɛ baanyɛ akwɛ asafoŋbii lɛ anɔ jogbaŋŋ lɛ, esa akɛ efee mɔ ko ni nyiɛɔ yɛ gbɛjianɔtoo naa. Kɛ́ mɔ ko nyiɛɔ yɛ gbɛjianɔtoo naa lɛ, abaana yɛ bɔ ni esaa ehe ehãa, bɔ ni ekuraa eshĩa lɛ, kɛ nibii ni efeɔ daa lɛ amli. Mɔ ko ni tamɔ nɛkɛ lɛ tsiii be ewooo be mli; ele nɔ ni esa akɛ etsu, ni etsɔɔ hiɛ etoɔ gbɛjianɔ koni enyɛ etsu he nii. Ekɛ Nyɔŋmɔ shishitoo mlai tsuɔ nii.

¹³ Esa akɛ nɔkwɛlɔ lɛ afee mɔ ni nuɔ nii ashishi. Esa akɛ enyɛ ekɛ asafoŋ onukpai krokomɛi lɛ afee ekome kɛtsu nii. Esaaa akɛ enaa ehe tsɔ, ni esaaa akɛ ekpaa babaoo gbɛ kɛjɛɔ mɛi krokomɛi adɛŋ. Akɛni nɔkwɛlɔ lɛ nuɔ nii ashishi hewɔ lɛ, ekome esane eŋɔɔɔ enaa, ni ebuuu esusumɔ akɛ no hi fe asafoŋ onukpai krokomɛi lɛ anɔ. Ele akɛ, mɛi krokomɛi bɔɔ mɔdɛŋ fe lɛ yɛ nibii komɛi amli. Kɛ́ asafoŋ onukpa ko hã esusumɔi damɔ Ŋmalɛ lɛ nɔ jogbaŋŋ ni ebɔ mɔdɛŋ ekase Yesu Kristo nɔkwɛmɔnɔ lɛ, no tsɔɔ akɛ enuɔ nii ashishi. (Fip. 2:2-8) Esaaa akɛ asafoŋ onukpa lɛ feɔ béilɔ loo mɔ ko ni sumɔɔ nɔmɔ, shi moŋ esa akɛ ebu mɛi ni ena amɛ akɛ amɛnɔ kwɔlɔ fe lɛ. Ejeee mɔ ni yeɔ etsuinaa sane, ni tsɔɔ akɛ, ejeee mɔ ni be fɛɛ be lɛ, emaa nɔ mi veveeve akɛ afee nɔ ni etaoɔ loo akɛ esusumɔ atsu nii. Ejeee mɔ ni mli fuɔ mramra, shi moŋ ekɛ mɛi yeɔ yɛ toiŋjɔlɛ mli.

¹⁴ Kɛfata he lɛ, esa akɛ mɔ ni sɔmɔɔ akɛ nɔkwɛlɔ yɛ asafo lɛ mli lɛ afee mɔ ni jwɛŋɔ jogbaŋŋ. Ni tsɔɔ akɛ, esa akɛ efee mɔ ko ni susuɔ nii ahe jogbaŋŋ dani ekpɛɔ eyiŋ. Enuɔ Yehowa shishitoo mlai lɛ ashishi jogbaŋŋ ni ele bɔ ni akɛtsuɔ nii hu. Mɔ ni jwɛŋɔ jogbaŋŋ lɛ boɔ ŋaawoo toi ni ekɛ gbɛtsɔɔmɔ tsuɔ nii. Efeee osato.

¹⁵ Paulo kɛɛ Tito akɛ, esa akɛ nɔkwɛlɔ lɛ afee mɔ ni sumɔɔ ekpakpa. Esa akɛ efee jalɔ kɛ anɔkwafo. Ejieɔ sui nɛɛ akpo yɛ bɔ ni ekɛ mɛi yeɔ ehãa lɛ mli, ni esumɔɔ ni afee nɔ ni hi kɛ nɔ ni ja be fɛɛ be. Ekɛ Yehowa jamɔ shwɛɛɛ kwraa ni ehiɔ shi yɛ shishitoo mlai ni ja lɛ anaa be fɛɛ be. Enyɛɔ ekɛ saji ni esaaa akɛ mɔ fɛɛ mɔ kɛkɛ leɔ lɛ toɔ. Agbɛnɛ hu, ejɛɔ etsuiŋ efeɔ mɛi gbɔ, ni ekɛ ehe kɛ nibii ni eyɔɔ lɛ shãa afɔle kɛyeɔ ebuaa mɛi krokomɛi.​—Bɔf. 20:33-35.

¹⁶ Esa akɛ nɔkwɛlɔ lɛ afee mɔ ni baanyɛ atsɔɔ nii, koni enyɛ esɔmɔ jogbaŋŋ yɛ asafo lɛ mli. Tamɔ bɔ ni Paulo ŋma emaje Tito lɛ, esa akɛ nɔkwɛlɔ lɛ afee “mɔ ni yɛ enitsɔɔmɔ he ŋaa gbɛfaŋ lɛ, ehiɛɔ anɔkwa wiemɔ lɛ mli kpɛŋŋ, koni enyɛ ekɛ tsɔɔmɔ ni hãa mɔ náa hewalɛ lɛ awo mɛi hewalɛ, koni ekɛjaje mɛi ni wieɔ shiɔ tsɔɔmɔ nɛɛ hu.” (Tito 1:9) Esa akɛ ele bɔ ni akɛ mɛi susuɔ nii ahe ahãa, enyɛ ejaje mɛi ni wieɔ shiɔ anɔkwale lɛ ajwɛŋmɔ, ni enyɛ ekɛ Ŋmalɛ lɛ atsu nii jogbaŋŋ ni ekɛkɔne mɛi ayiŋ koni ehã amɛhemɔkɛyeli lɛ mli awa. Agbɛnɛ hu, kɛ́ ewie nɔ ko lɛ, esa akɛ enyɛ ekɛ odaseyeli ni maa nɔ ni ewie lɛ nɔ mi ahã. Esa akɛ nɔkwɛlɔ lɛ afee mɔ ko ni nyɛɔ etsɔɔ nii yɛ bei ni hi kɛ bei ni mli wa fɛɛ amli. (2 Tim. 4:2) Enyɛɔ etoɔ etsui shi ni ekɛ mlijɔlɛ jajeɔ mɔ ko ni ekɔ gbɛ fɔŋ. Agbɛnɛ hu, kɛ́ mɔ ko yiŋ miifee lɛ kɔshikɔshi lɛ, enyɛɔ eyeɔ ebuaa lɛ ni edamɔ shi shiŋŋ yɛ anɔkwale lɛ mli, ni ewoɔ mɔ lɛ hewalɛ ni ehã ehemɔkɛyeli lɛ atsirɛ lɛ ni etsu nitsumɔi kpakpai. Kɛ́ enyɛɔ etsɔɔ nii jogbaŋŋ yɛ mɛi pii ahiɛ jio, aŋkroaŋkroi nii enyɛɔ etsɔɔ jio lɛ, abaanyɛ akɛɛ akɛ nɔkwɛlɔ lɛ shɛɔ taomɔ nii ni he hiaa nɛɛ he.

¹⁷ Ehe miihia ni asafoŋ onukpai lɛ atsu shiɛmɔ nitsumɔ lɛ kɛ hiɛdɔɔ. Enɛ ji nɔ kome ni baatsɔɔ akɛ amɛmiibɔ mɔdɛŋ akɛ amɛbaakase Yesu. Yesu hãaa nɔ ko nɔ ko he ahia lɛ fe shiɛmɔ nitsumɔ lɛ, ni eye ebua ekaselɔi lɛ koni amɛ hu amɛbatsɔmɔ sane kpakpa shiɛlɔi ni bɔɔ mɔdɛŋ. (Mar. 1:38; Luka 8:1) Kɛ́ asafoŋ onukpai lɛ bɔ mɔdɛŋ amɛtsu shiɛmɔ nitsumɔ lɛ yɛ dekã ni amɛbɛ lɛ fɛɛ sɛɛ lɛ, no baawo asafo muu lɛ fɛɛ hewalɛ ni amɛ hu amɛkɛ hiɛdɔɔ atsu shiɛmɔ nitsumɔ lɛ. Ni kɛ́ asafoŋ onukpai lɛ kɛ amɛweku lɛ mli bii kɛ asafoŋbii krokomɛi lɛ tee shiɛmɔ lɛ, amɛbaaná hegbɛ amɛwo asafoŋbii lɛ hewalɛ, ni asafoŋbii lɛ hu baawo amɛ hewalɛ.​—Rom. 1:11, 12.

¹⁸ Kɛ́ osusu taomɔ nii lɛ fɛɛ ahe lɛ, ekolɛ obaanu he akɛ efa tsɔ bɔ ni mɔ ko baanyɛ ashɛ he ni ahala lɛ akɛ nɔkwɛlɔ. Anɔkwa, nɔkwɛlɔ ko bɛ ni baanyɛ ashɛ Ŋmalɛ naa taomɔ nii nɛɛ ateŋ eko fɛɛ eko he jogbaŋŋ kɛmɔ shi, shi esaaa akɛ ebaa lɛ akɛ asafoŋ onukpa ko shɛɛɛ taomɔ nii lɛ ateŋ ekome ko he kwraa bɔ ni abaanyɛ abu efãtɔɔ lɛ akɛ eji gbɔjɔmɔ ni yɔɔ hiɛdɔɔ. Ebaanyɛ eba lɛ akɛ, asafoŋ onukpa ko shɛɔ taomɔ nii nɛɛ ateŋ ekomɛi ahe waa fe asafoŋ onukpai krokomɛi, ni ebaanyɛ eba lɛ hu akɛ, asafoŋ onukpai krokomɛi lɛ hu shɛɔ taomɔ nii krokomɛi ahe waa fe lɛ. Kɛ́ eba lɛ nakai lɛ, onukpai akuu muu lɛ fɛɛ náa sui kpakpai ni he hiaa koni anyɛ akwɛ Nyɔŋmɔ asafo lɛ nɔ jogbaŋŋ lɛ.

¹⁹ Kɛ́ onukpai akuu lɛ kpe koni amɛjie nyɛmimɛi hii ayi ni ahole amɛ akɛ nɔkwɛlɔi lɛ, ehi akɛ amɛbaahã bɔfo Paulo wiemɔi ni nyiɛ sɛɛ nɛɛ ahi amɛjwɛŋmɔ mli, akɛ: “Miikɛɛ nyɛteŋ mɔ fɛɛ mɔ akɛ ekabu ehe tsɔ fe bɔ ni sa akɛ ebuɔ ehe, shi moŋ esusu nii ahe bɔ ni baahã ejwɛŋ jogbaŋŋ, yɛ hemɔkɛyeli falɛ ni Nyɔŋmɔ ehã mɔ fɛɛ mɔ lɛ naa.” (Rom. 12:3) Esa akɛ asafoŋ onukpai lɛ ateŋ mɔ fɛɛ mɔ ana ehe akɛ mɔ ni baa shi yɛ onukpai lɛ ateŋ. Kɛ́ aasusu he kɛji mɔ ko shɛɔ taomɔ nii lɛ ahe lo lɛ, esaaa akɛ onukpai lɛ ateŋ mɔ ko feɔ ehe ‘jalɔ kɛtekeɔ nɔ.’ (Jaj. 7:16) Onukpai lɛ le Ŋmalɛ naa taomɔ nii kɛhã nɔkwɛlɔi lɛ jogbaŋŋ, ni amɛkwɛɔ kɛji mɔ ni asusuɔ ehe lɛ shɛɔ taomɔ nii nɛɛ ahe bɔ ni sa. Amɛhãa ehiɔ amɛjwɛŋmɔ mli akɛ, wɔteŋ mɔ ko bɛ ni yeɔ emuu, shi yɛ nakai beiaŋ nɔŋŋ lɛ, amɛkwɛɛɛ hiɛiaŋ, ni amɛfeee osato hu. Enɛ hewɔ lɛ, kɛ́ amɛmiijie mɛi ayi lɛ, amɛfeɔ nakai yɛ gbɛ ni hãa anaa akɛ amɛyɛ bulɛ kɛhã Yehowa taomɔ nii ni ja lɛ, ni amɛmiisumɔ hu ni nibii aya lɛ jogbaŋŋ yɛ asafo lɛ mli. Amɛsɔleɔ ni amɛsusuɔ mɔ fɛɛ mɔ ni amɛjieɔ eyi lɛ he jogbaŋŋ, ni agbɛnɛ hu, amɛhãa Nyɔŋmɔ mumɔ krɔŋkrɔŋ lɛ tsɔɔ amɛ gbɛ. Enɛ ji sɔ̃i ni yɔɔ hiɛdɔɔ ni amɛtsuɔ he nii lɛ ateŋ ekome, ni no hewɔ lɛ, esa akɛ amɛhã Paulo kɔkɔbɔɔ ni nyiɛ sɛɛ nɛɛ ahi amɛjwɛŋmɔ mli be ni amɛtsuɔ he nii lɛ. Paulo wie akɛ: “Okɛ oniji akaŋmɛlɛ mɔ ko nɔ oya.”​—1 Tim. 5:21, 22.

²⁰ Hii ni edara yɛ mumɔŋ lɛ kɛ amɛnifeemɔ tsɔɔ akɛ mumɔ krɔŋkrɔŋ lɛ ni kudɔɔ amɛ, ni amɛwoɔ mumɔ lɛ yibii yɛ amɛshihilɛ mli. Paulo tsĩ sui nɛɛhu ni feɔ mumɔ lɛ yibii lɛ tã, nomɛi ji “suɔmɔ, miishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, henɔyeli.” (Gal. 5:22, 23) Kɛ́ nɔkwɛlɔi jie sui nɛɛ kpo lɛ, no hãa nyɛmimɛi lɛ atsui nyɔɔ amɛmli ni eyeɔ ebuaa asafoŋbii lɛ hu ni amɛfeɔ ekome kɛtsuɔ sɔɔmɔ krɔŋŋ lɛ. Amɛjeŋba kɛ yibii ni amɛnitsumɔi lɛ woɔ lɛ tsɔɔ akɛ mumɔ krɔŋkrɔŋ lɛ ni hole amɛ.​—Bɔf. 20:28.

²¹ Ehe miihia ni onukpai lɛ afee ekome kɛtsu nii koni no ahã ekomefeemɔ ahi asafo lɛ mli. Eyɛ mli akɛ esoro bɔ ni amɛteŋ mɔ fɛɛ mɔ feɔ enii ehãa moŋ, shi kɛ́ amɛteŋ mɔ fɛɛ mɔ jɛ bulɛ mli ebo enyɛmi toi lɛ, no baahã ekomefeemɔ ahi amɛteŋ, tsɛbelɛ jeee nɔ fɛɛ nɔ mli amɛbaakpã gbee yɛ. Kɛ́ onukpai akuu lɛ kpɛ yiŋ yɛ sane ko he ni eteee shi ewooo Biblia mli shishitoo mla ko lɛ, esa akɛ amɛteŋ mɔ fɛɛ mɔ ajɛ etsuiŋ ekpɛlɛ nɔ, ni ekwɛ koni atsu yiŋkpɛɛ lɛ he nii. Kɛ́ mɔ ko kpɛlɛɔ yiŋkpɛi ni eteee shi ewooo Biblia lɛ anɔ, tsɛbelɛ esoro yiŋ ni kulɛ ebaasumɔ ni akpɛ lɛ, no tsɔɔ akɛ “hiɛshikamɔ ni jɛ ŋwɛi lɛ,” ni ‘sumɔɔ toiŋjɔlɛ, ni nuɔ nii ashishi’ lɛ ji nɔ ni kudɔɔ lɛ. (Yak. 3:17, 18) Esaaa akɛ asafoŋ onukpa ko susuɔ akɛ enɔ kwɔ fe onukpai krokomɛi lɛ, ni esaaa akɛ asafoŋ onukpa ko bɔɔ mɔdɛŋ akɛ ekɛ esusumɔi baafi mɛi krokomɛi lɛ anɔ. Kɛ́ asafoŋ onukpai fee ekome kɛtsu nii koni nibii aya lɛ jogbaŋŋ yɛ asafo lɛ mli lɛ, no tsɔɔ akɛ amɛkɛ Yehowa efee ekome kɛmiitsu nii.​—1 Kor., yitso 12; Kol. 2:19.

²² Esa akɛ Kristofoi hii ni edara yɛ mumɔŋ lɛ ashwe akɛ amɛbaatsɔmɔ nɔkwɛlɔi. (1 Tim. 3:1) Shi kɛ́ mɔ ko miisɔmɔ akɛ asafoŋ onukpa lɛ, ebaabi nitsumɔ kɛ he-kɛ-afɔleshaa. No tsɔɔ akɛ esa akɛ ená dekã ehã nyɛmimɛi lɛ ni eye ebua amɛ yɛ Nyɔŋmɔjamɔ saji amli. Kɛ́ mɔ ko miibɔ mɔdɛŋ koni eshɛ Ŋmalɛ naa taomɔ nii kɛhã nɔkwɛlɔi lɛ ahe lɛ, no tsɔɔ akɛ eetao etsɔ nɔkwɛlɔ.

²³ Hela baanyɛ atswa mɔ ko ni esɔmɔ jogbaŋŋ afii babaoo lɛ ojo loo mɔ nɛɛ baanyɛ agbɔjɔ kwraa yɛ gbɔmɔtsoŋ. Ekolɛ gbɔlɛ hewɔ lɛ, enyɛŋ etsu nitsumɔi ni nɔkwɛlɔi tsuɔ kɛkwɛɔ tooku lɛ tamɔ efeɔ tsutsu lɛ. Kɛ́ nakai ni po lɛ, esa akɛ ajie bulɛ kpo atsɔɔ lɛ ni ana lɛ akɛ asafoŋ onukpa, ejaakɛ ekã he eji mɔ ko ni awó lɛ onukpa. Ehe ehiaaa ni ekpa sɔɔmɔ yɛ egbɔmɔtsoŋ gbɔjɔmɔi lɛ ahewɔ. Esa akɛ abu lɛ akɛ esa woo toi enyɔ, tamɔ abuɔ onukpai krokomɛi ni tsuɔ nii waa ni kɛ amɛnyɛmɔi fɛɛ kwɛɔ tooku lɛ.

²⁴ Shi kɛ́ nyɛmi nuu ko susuɔ akɛ ehi akɛ ekpa sɔɔmɔ akɛni eshihilɛ etsake ni no hewɔ lɛ enyɛɛɛ esɔmɔ tamɔ tsutsu lɛ, ebaanyɛ efee nakai. (1 Pet. 5:2) Esa akɛ aya nɔ abu lɛ. Ebaanyɛ eya nɔ eye ebua babaoo yɛ asafo lɛ mli, eyɛ mli akɛ etsuuu nitsumɔi kɛ sɔ̃i ni asafoŋ onukpai tsuɔ he nii lɛ dɔŋŋ.

²⁵ Asafoŋ onukpai lɛ tsuɔ sɔ̃i srɔtoi ahe nii yɛ asafo lɛ mli. Mɔ ko sɔmɔɔ akɛ onukpai akuu lɛ saji ahe gbɛjianɔtolɔ, mɔ ko hu sɔmɔɔ akɛ woloŋmalɔ, mɔ kroko hu sɔmɔɔ akɛ shiɛmɔ nitsumɔ lɛ nɔkwɛlɔ, mɔ ko hu sɔmɔɔ akɛ Buu-Mɔɔ Nikasemɔ lɛ nɔkwɛlɔ, ni mɔ kroko hu sɔmɔɔ akɛ Wɔshiɛmɔ Kɛ Wɔshihilɛ Asafoŋ Kpee lɛ nɔkwɛlɔ. Onukpai lɛ babaoo hu sɔmɔɔ akɛ shiɛmɔyaa kui anɔkwɛlɔi. Onukpai lɛ tsuɔ sɔɔmɔ hegbɛi nɛɛ ahe nii be kplaŋŋ; abɛ be pɔtɛɛ ni amɛsɔɔmɔ hegbɛi nɛɛ baaba naagbee. Shi kɛ́ nyɛmi nuu ko fã, enyɛɛɛ etsu asafoŋ sɔ̃i ahe nii yɛ gbɔmɔtsoŋ hewalɛ ni ebɛ lɛ hewɔ, loo ahã ekpa sɔɔmɔ akɛni eshɛɛɛ Ŋmalɛ naa taomɔ nii lɛ ahe lɛ, abaahala onukpa kroko ni etsu nakai sɔ̃i lɛ ahe nii. Yɛ asafoi ni asafoŋ onukpai lɛ ayi faaa yɛ mli lɛ, ehe baahia ni asafoŋ onukpa ko atsu sɔ̃i fe ekome he nii kɛyashi abaahole nyɛmimɛi hii krokomɛi ni shɛɔ taomɔ nii lɛ ahe lɛ akɛ asafoŋ onukpai.

²⁶ Onukpai akuu lɛ saji ahe gbɛjianɔtolɔ lɛ sɔmɔɔ akɛ sɛinɔtalɔ yɛ onukpai akuu lɛ kpeei ashishi. Ebaa ehe shi ni ekɛ onukpai krokomɛi lɛ feɔ ekome kɛtsuɔ nii kɛkwɛɔ Nyɔŋmɔ tooku lɛ. (Rom. 12:10; 1 Pet. 5:2, 3) Esa akɛ efee mɔ ko ni toɔ nibii ahe gbɛjianɔ jogbaŋŋ ni kwɛɔ nii anɔ jogbaŋŋ.​—Rom. 12:8.

²⁷ Woloŋmalɔ lɛ kwɛɔ asafo lɛ woji anɔ, ni ewóɔ onukpai lɛ atoi nɔ yɛ saji komɛi ni he hiaa lɛ ahe. Kɛ́ ehe miihia lɛ, abaanyɛ ahã asafoŋ onukpa kroko loo asafoŋ sɔɔlɔ ni sa aye abua lɛ.

²⁸ Shiɛmɔ nitsumɔ nɔkwɛlɔ lɛ ji mɔ ni toɔ shiɛmɔ nitsumɔ lɛ kɛ nibii krokomɛi ni kɔɔ he lɛ ahe gbɛjianɔ. Etsɔɔ hiɛ etoɔ gbɛjianɔ koni enyɛ esara shiɛmɔyaa kuu kome shi kome daa nyɔɔŋ nɔ yɛ otsi lɛ naagbee. Yɛ asafoi ni shiɛmɔyaa kui lɛ ayi faaa yɛ mli lɛ amli lɛ, ebaanyɛ esara kuu fɛɛ kuu shii enyɔ yɛ afi mli. Kɛ́ eyasara kuu ko lɛ, lɛ ebaakwɛ kpeei kɛhã shiɛmɔyaa lɛ nɔ, ekɛ kuu lɛ mli bii lɛ ateŋ mɛi komɛi baaya shiɛmɔ, ni ebaaye ebua shiɛlɔi lɛ kɛfee sɛɛkuukɛsaramɔi kɛ Biblia mli nikasemɔi.

²⁹ Sɔɔmɔ hegbɛi ni he hiaa waa yɛ asafo lɛ mli lɛ ateŋ ekome ji, ni mɔ ko baasɔmɔ akɛ kuu nɔkwɛlɔ. Sɔ̃i ni etsuɔ he nii lɛ ji (1) eyeɔ ebuaa shiɛmɔyaa kuu lɛ mli bii lɛ ateŋ mɔ fɛɛ mɔ koni amɛhe awa yɛ hemɔkɛyeli lɛ mli; (2) eyeɔ ebuaa kuu lɛ mli bii lɛ ateŋ mɔ fɛɛ mɔ koni amɛkɛ amɛhe awo shiɛmɔ nitsumɔ lɛ mli daa yɛ gbɛ ni mɔɔ shi ni hãa mɔ náa miishɛɛ nɔ; ni agbɛnɛ hu (3) eyeɔ ebuaa asafoŋ sɔɔlɔi ni yɔɔ ekuu lɛ mli lɛ ni etsɔseɔ amɛ koni amɛbɔ mɔdɛŋ amɛshɛ taomɔ nii kɛhã nɔkwɛlɔi lɛ he. Onukpai akuu lɛ ji mɛi ni baahala mɔ ni sa jogbaŋŋ kɛhã sɔi nɛɛ fɛɛ ahe nitsumɔ.

³⁰ Yɛ bɔ ni kuu nɔkwɛlɔi anitsumɔ lɛ yɔɔ lɛ hewɔ lɛ, kɛ́ ebaahi lɛ, esa akɛ ahã asafoŋ onukpa afee kuu nɔkwɛlɔ lɛ. Aloo abaanyɛ ahã asafoŋ sɔɔlɔ ko ni bɔɔ mɔdɛŋ lɛ asɔmɔ kɛyashi abaaná asafoŋ onukpa ko ni baakwɛ kuu lɛ nɔ. Kɛ́ asafoŋ sɔɔlɔ ko kwɛɔ shiɛmɔyaa kuu ko nɔ lɛ, atsɛɔ lɛ kuu sɔɔlɔ, ejaakɛ ejeee nɔkwɛlɔ yɛ asafo lɛ mli. Moŋ lɛ, esɔmɔɔ yɛ asafoŋ onukpai lɛ agbɛtsɔɔmɔ naa.

³¹ Kuu nɔkwɛlɔ lɛ nitsumɔi ni he hiaa waa lɛ ateŋ ekome ji, ni enyiɛ ekuu lɛ hiɛ kɛya shiɛmɔ. Kɛ́ efolɔɔɔ shiɛmɔ mli, ni ekɛ hiɛdɔɔ kɛ ekãa shiɛɔ lɛ, no baawo ekuu lɛ mli bii lɛ hewalɛ. Akɛni shiɛlɔi lɛ ahiɛ sɔɔ hewalɛwoo kɛ bɔ ni ayeɔ abuaa amɛ kɛ́ akpe kɛhã shiɛmɔ lɛ hewɔ lɛ, ebaahi akɛ ato be ni hi kɛhã kuu lɛ mli bii lɛ ateŋ mɛi pii koni akpe kɛya shiɛmɔ. (Luka 10:1-16) Esa akɛ nɔkwɛlɔ lɛ akwɛ akɛ ebaaná shikpɔŋkuku ni da saŋŋ bɔ ni afee ni amɛyatsu mli nii. Lɛ ebaakwɛ kpee kɛhã shiɛmɔyaa lɛ nɔ, ni ebaajara shiɛlɔi lɛ kɛhã shiɛmɔ nakai gbi lɛ. Kɛ́ enyɛɛɛ eba kpee kɛhã shiɛmɔ lɛ, esa akɛ eto gbɛjianɔ koni asafoŋ onukpa loo sɔɔlɔ ko ayakwɛ nɔ, ni kɛ́ enáaa amɛteŋ mɔ ko lɛ, ebaanyɛ ehã shiɛlɔ ko ni sa ayakwɛ nɔ koni shiɛlɔi lɛ anine ashɛ gbɛtsɔɔmɔ ni sa nɔ.

³² Esa akɛ kuu nɔkwɛlɔ lɛ atsɔ hiɛ ato gbɛjianɔ kɛhã shiɛmɔ nitsumɔ nɔkwɛlɔ lɛ saramɔ lɛ, ewó ekuu lɛ mli bii lɛ atoi nɔ yɛ saramɔ lɛ he, ni ekɛ amɛ awie bɔ ni amɛbaaná saramɔ lɛ he sɛɛ lɛ he. Kɛ́ ahã mɛi fɛɛ ni yɔɔ kuu lɛ mli lɛ le saramɔ lɛ he saji fitsofitso lɛ, ebaanyɛ ehã amɛkɛ miishɛɛ afi shiɛmɔ nitsumɔ nɔkwɛlɔ lɛ saramɔ lɛ sɛɛ.

³³ Ajeɔ gbɛ afeɔ shiɛmɔyaa kuu fɛɛ kuu bibioo. Enɛ hãa kuu nɔkwɛlɔ lɛ leɔ mɛi fɛɛ ni yɔɔ ekuu lɛ mli lɛ jogbaŋŋ. Akɛni eji tookwɛlɔ ni yɔɔ suɔmɔ hewɔ lɛ, esusuɔ amɛteŋ mɔ fɛɛ mɔ he jogbaŋŋ. Eyeɔ ebuaa amɛteŋ mɔ fɛɛ mɔ ni ewoɔ amɛ hewalɛ koni amɛkɛ amɛhe awo shiɛmɔ nitsumɔ lɛ mli ni amɛya asafoŋ kpeei hu. Kɛfata he lɛ, ebɔɔ mɔdɛŋ akɛ ebaafee nɔ fɛɛ nɔ ni sa kɛye ebua amɛteŋ mɔ fɛɛ mɔ koni amɛhe awa yɛ hemɔkɛyeli lɛ mli. Kɛ́ amɛteŋ mɔ ko he miiye loo ehao lɛ, eyasaraa lɛ ni ewoɔ lɛ hewalɛ. Ewieɔ etsɔɔ amɛ loo ewoɔ amɛ ŋaa ni baanyɛ awo amɛ hewalɛ ni amɛbɔ mɔdɛŋ amɛshɛ taomɔ nii kɛhã sɔɔmɔ hegbɛi krokomɛi yɛ asafo lɛ mli lɛ ahe koni amɛnyɛ amɛye amɛbua amɛnyɛmimɛi lɛ jogbaŋŋ fe tsutsu lɛ. Ekã shi faŋŋ akɛ, kuu nɔkwɛlɔ lɛ yeɔ ebuaa mɛi ni yɔɔ ekuu lɛ mli lɛ titri. Shi akɛ asafoŋ onukpa kɛ tookwɛlɔ lɛ, ejɛɔ suɔmɔ mli esusuɔ mɛi fɛɛ ni yɔɔ asafo lɛ mli lɛ ahe ni eyeɔ ebuaa amɛteŋ mɔ fɛɛ mɔ ni ehe miihia ni aye abua lɛ lɛ.​—Bɔf. 20:17, 28.

³⁴ Sɔ̃ kroko ni kuu nɔkwɛlɔ lɛ tsuɔ he nii ji, eyeɔ ebuaa kɛheɔ ekuu lɛ mli bii lɛ ashiɛmɔyaa he amaniɛbɔi lɛ. Ekɛ amaniɛbɔi ni ehe lɛ hãa woloŋmalɔ lɛ. Shiɛlɔi ni yɔɔ ekuu lɛ mli lɛ baanyɛ aye abua lɛ kɛtsɔ amɛshiɛmɔyaa he amaniɛbɔi lɛ ni amɛkɛbaahã yɛ be naa lɛ nɔ. Kɛ́ nyɔɔŋ lɛ gbo nɔŋŋ lɛ, esa akɛ amɛkɛ amɛmaniɛbɔi lɛ ahã kuu nɔkwɛlɔ lɛ loo amɛkɛwo adeka ni ato akɛ akɛ shiɛmɔyaa he amaniɛbɔi awo mli yɛ Maŋtsɛyeli Asa lɛ nɔ lɛ mli.

³⁵ Onukpai akuu lɛ saji ahe gbɛjianɔtolɔ lɛ, woloŋmalɔ lɛ, kɛ shiɛmɔ nitsumɔ nɔkwɛlɔ lɛ ji mɛi ni feɔ Asafoŋ Sɔɔmɔ Ajinafoi Akuu lɛ, ni amɛtsuɔ sɔ̃i komɛi ahe nii. Akɛ nɔkwɛmɔnɔ lɛ, amɛ amɛkpɛlɛɔ nɔ koni akpee yoo loo afee yara yɛ Maŋtsɛyeli Asa lɛ nɔ, ni amɛ amɛjaraa shiɛlɔi amɛwoɔ shiɛmɔyaa kui lɛ amli. Ajinafoi nɛɛ hu kpɛlɛɔ gbɛbimɔ kɛhã daa gbɛgbamɔ, gbɛgbalɔi awamɔ nitsumɔ lɛ, kɛ sɔɔmɔ nitsumɔi krokomɛi lɛ anɔ. Sɔɔmɔ ajinafoi akuu lɛ tsuɔ nii yɛ onukpai akuu lɛ gbɛtsɔɔmɔ naa.

³⁶ Nitsumɔhe nine lɛ tsɔɔ nitsumɔ pɔtɛɛ ni nyɛmimɛi hii nɛɛ, kɛ agbɛnɛ hu, Buu-Mɔɔ Nikasemɔ nɔkwɛlɔ lɛ, Wɔshiɛmɔ Kɛ Wɔshihilɛ Asafoŋ Kpee lɛ nɔkwɛlɔ lɛ, kɛ mɛi krokomɛi ni yɔɔ onukpai akuu lɛ mli lɛ tsuɔ.

³⁷ Onukpai akuu ni yɔɔ asafo fɛɛ asafo mli lɛ kpeɔ yɛ be kɛ beiaŋ kɛsusuɔ saji ni baahã asafo lɛ ashwere yɛ mumɔŋ lɛ ahe. Afeɔ onukpai akpee kɛ́ kpokpaa nɔkwɛlɔ lɛ basara asafo lɛ. Kpokpaa nɔkwɛlɔ lɛ saramɔ lɛ sɛɛ nyɔji etɛ lɛ, onukpai lɛ toɔ gbɛjianɔ ni amɛkpeɔ ekoŋŋ. Anɔkwa, onukpai lɛ baanyɛ akpe be fɛɛ be ni shihilɛ ko baabi ni amɛkpe lɛ.

³⁸ Nɔkwɛlɔi lɛ yeee emuu; fɛɛ sɛɛ lɛ, awoɔ asafoŋbii lɛ fɛɛ hewalɛ ni amɛba amɛhe shi amɛhã amɛ ejaakɛ eji Yehowa gbɛjianɔtoo. Nɔkwɛlɔi lɛ baabu amɛnifeemɔi lɛ ahe akɔntaa amɛhã lɛ. Amɛji Yehowa kɛ eteokrase nɔyeli lɛ najiaŋdamɔlɔi. Hebribii 13:17 lɛ kɛɔ akɛ: “Nyɛboa mɛi ni nyiɛɔ hiɛ yɛ nyɛteŋ lɛ toi ni nyɛbaa nyɛhe shi nyɛhãa amɛ, ejaakɛ amɛmiibu nyɛhe, ni amɛbaabu enɛ he akɔntaa, koni amɛkɛ miishɛɛ afee enɛ, shi jeee kɛ mligbigblimɔ, ejaakɛ no baaye nyɛ awui.” Bɔ ni Yehowa kɛ mumɔ krɔŋkrɔŋ lɛ tsuɔ nii kɛholeɔ hii nɛɛ, nakai nɔŋŋ ekɛ mumɔ krɔŋkrɔŋ lɛ baatsu nii kɛjie nuu ko akɛ nɔkwɛlɔ kɛ́ ejieee mumɔ lɛ yibii lɛ kpo, ni eshɛɛɛ Ŋmalɛ naa taomɔ nii lɛ ahe.

³⁹ Asafoŋ onukpai lɛ tsuɔ nii waa. Wɔhiɛ sɔɔ nitsumɔ ni amɛtsuɔ lɛ kɛ nɔkwɛmɔnɔ kpakpa ni amɛfeɔ lɛ waa, aloo jeee nakai? Yɛ wolo ni Paulo ŋma emaje asafo ni yɔɔ Tesalonika lɛ mli lɛ, ewo nyɛmimɛi lɛ hewalɛ akɛ: “Nyɛmimɛi, . . . wɔmiikpa nyɛ fai akɛ, nyɛjiea bulɛ kpo nyɛtsɔa mɛi ni tsuɔ nii waa yɛ nyɛteŋ, ni amɛkwɛɔ nyɛnɔ yɛ Nuŋtsɔ lɛ mli, ni amɛwieɔ amɛtsɔɔ nyɛ lɛ; ni nyɛhiɛ asɔ amɛ waa diɛŋtsɛ yɛ suɔmɔ mli yɛ nitsumɔ ni amɛtsuɔ lɛ hewɔ.” (1 Tes. 5:12, 13) Bɔ ni asafoŋ onukpai tsuɔ nii waa lɛ ji nɔ ni hãa sɔɔmɔ ni wɔkɛhãa Nyɔŋmɔ lɛ feɔ mlɛo ni wɔkɛ miishɛɛ sɔmɔɔ. Yɛ klɛŋklɛŋ wolo ni Paulo ŋma emaje Timoteo lɛ hu mli lɛ, ewie su ni esa akɛ asafoŋbii lɛ ajie lɛ kpo yɛ nɔkwɛlɔi lɛ ahe lɛ he akɛ: “Asafoŋ onukpai lɛ, ni ji mɛi ni kwɛɔ nii anɔ jogbaŋŋ lɛ, abu amɛ akɛ amɛsa woo toi enyɔ, titri lɛ, mɛi ni tsuɔ nii waa yɛ wiemɔ kɛ nitsɔɔmɔ mli lɛ.”​—1 Tim. 5:17.

⁴⁰ Bei komɛi lɛ, ahalaa asafoŋ onukpai komɛi ni amɛsɔmɔ akɛ Helatsɛmɛi Asaramɔ Kui amli bii. Onukpai krokomɛi sɔmɔɔ akɛ Ajinafoi Akuu Ni Kɛ Helatsamɔhei Sharaa, ni amɛyasaraa helatsamɔhei kɛ datrɛfoi koni amɛwo amɛ hewalɛ ni amɛya nɔ amɛkwɛ Yehowa Odasefoi ni amɛhãaa amɛ lá. Kɛfata he lɛ, amɛhãa datrɛfoi leɔ gbɛi krokomɛi ni amɛbaanyɛ amɛtsɔ nɔ amɛfee nakai. Nɔkwɛlɔi krokomɛi hu hãa Maŋtsɛyeli lɛ he nibii lɛ shwereɔ, ejaakɛ amɛyeɔ amɛbuaa ni amamɔɔ Maŋtsɛyeli Asai kɛ Kpeei Asai ni akuraa, loo amɛsɔmɔɔ akɛ Kpee Wulu Ajinafoi Akuu. Yehowa asafo lɛ mli bii lɛ fɛɛ hiɛ sɔɔ bɔ ni nyɛmimɛi hii nɛɛ tsuɔ nii waa lɛ kɛ amɛhe ni amɛkɛshãa afɔle lɛ hu jogbaŋŋ. Anɔkwa, ‘wɔyaa nɔ wɔbuɔ gbɔmɛi ni tamɔ nɛkɛ lɛ akɛ mɛi ni sa woo.’​—Fip. 2:29.

⁴¹ Gbɛtsɔɔmɔ Kuu lɛ toɔ gbɛjianɔ ni aholeɔ asafoŋ onukpai ni sa akɛ kpokpaa nɔkwɛlɔi koni amɛsɔmɔ asafoi lɛ. Nitsumɔhe nine lɛ tsuɔ amɛ ni amɛyasaraa asafoi ni yɔɔ amɛkpokpai lɛ anɔ lɛ, bei pii lɛ, shii enyɔ yɛ afi mli. Yɛ be kɛ beiaŋ lɛ, amɛyasaraa gbɛgbalɔi ni miisɔmɔ yɛ shikpɔŋkukuji ni etsetsee amɛhe banee lɛ amli. Amɛtsɔɔ hiɛ amɛtoɔ amɛsaramɔ lɛ he gbɛjianɔ, kɛkɛ lɛ amɛhã asafo fɛɛ asafo ele kɛtsɔ hiɛ kwraa bɔ ni afee ni asafoŋbii lɛ aná amɛsaramɔ lɛ he sɛɛ.

⁴² Onukpai akuu lɛ saji ahe gbɛjianɔtolɔ lɛ nyiɛɔ hiɛ kɛtoɔ nibii ahe gbɛjianɔ koni kpokpaa nɔkwɛlɔ lɛ saramɔ lɛ awo mɔ fɛɛ mɔ hewalɛ yɛ mumɔŋ. (Rom. 1:11, 12) Kɛ́ ahã onukpai akuu lɛ saji ahe gbɛjianɔtolɔ lɛ le esaramɔ lɛ he sane kɛ nibii ni he baahia kpokpaa nɔkwɛlɔ lɛ kɛ eŋa (kɛ́ ebote gbalashihilɛ mli) lɛ, onukpai akuu lɛ saji ahe gbɛjianɔtolɔ lɛ tsɔɔ nyɛmimɛi srɔtoi anɔ etoɔ wɔɔhe kɛ nibii krokomɛi ni he baahia lɛ ahe gbɛjianɔ. Ekwɛɔ koni mɔ fɛɛ mɔ, ni kpokpaa nɔkwɛlɔ lɛ hu fata he lɛ, ale gbɛjianɔ ni ato lɛ.

⁴³ Kpokpaa nɔkwɛlɔ lɛ biɔ onukpai akuu lɛ saji ahe gbɛjianɔtolɔ lɛ gbɛjianɔ ni ato yɛ asafoŋ kpeei kɛ kpeei kɛhã shiɛmɔyaa lɛ ahe. Adamɔɔ ŋaa ni kpokpaa nɔkwɛlɔ lɛ baawo kɛ gbɛtsɔɔmɔi ni nitsumɔhe nine lɛ kɛhã lɛ anɔ atoɔ gbɛjianɔ nɛɛ. Esa akɛ atsɔ hiɛ kwraa ahã mɔ fɛɛ mɔ ale be kɛ he ni abaafee asafoŋ kpeei, kpee ni akɛ gbɛgbalɔi lɛ baafee, kɛ kpee ni akɛ onukpai kɛ asafoŋ sɔɔlɔi lɛ baafee lɛ yɛ, kɛ agbɛnɛ hu, be kɛ he ni abaafee kpeei kɛhã shiɛmɔyaa lɛ yɛ.

⁴⁴ Jufɔ shwane lɛ, kpokpaa nɔkwɛlɔ lɛ kwɛɔ Asafo Lɛ Shiɛlɔ He Saji fɔm lɛ, asafoŋ kpeeibaa he amaniɛbɔi, shikpɔŋkuku he woji, kɛ shika he akɔntaabui lɛ amli. Enɛ hãa enaa nibii ni esa akɛ eye ebua asafo lɛ yɛ mli kɛ bɔ ni ebaafee eye ebua mɛi ni tsuɔ nibii nɛɛ ahe nii lɛ hu. Esa akɛ onukpai akuu lɛ saji ahe gbɛjianɔtolɔ lɛ ahã kpokpaa nɔkwɛlɔ lɛ nine ashɛ woji nɛɛ anɔ kɛtsɔ hiɛ.

⁴⁵ Be ni kpokpaa nɔkwɛlɔ lɛ ebasara asafo lɛ, enáa be ehãa nyɛmimɛi lɛ, ni ekɛ amɛ gbaa sane aŋkroaŋkro bɔ ni ebaanyɛ, ni efeɔ nakai yɛ asafoŋ kpeei ashishi, be ni ekɛ amɛ nyiɛ shiɛmɔ nɔ, be ni ekɛ amɛ miiye nii, kɛ bei krokomɛi amli. Agbɛnɛ hu, ekɛ onukpai kɛ asafoŋ sɔɔlɔi lɛ kpeɔ koni ejɛ Ŋmalɛ lɛ mli ewie etsɔɔ amɛ, ewo amɛ ŋaa, ni ewo amɛ hewalɛ koni amɛkwɛ tooku lɛ jogbaŋŋ. (Abɛi 27:23; Bɔf. 20:26-32; 1 Tim. 4:11-16) Kɛfata he lɛ, ekɛ gbɛgbalɔi lɛ kpeɔ koni ewo amɛ hewalɛ ni eye ebua amɛ aŋkroaŋkroi yɛ naagbai ni ekolɛ amɛkɛkpeɔ yɛ shiɛmɔ nitsumɔ lɛ mli lɛ ahe.

⁴⁶ Kɛ́ saji krokomɛi yɛ ni esa akɛ atsu he nii lɛ, kpokpaa nɔkwɛlɔ lɛ yeɔ ebuaa kɛtsuɔ he nii yɛ otsi lɛ mli bɔ ni ebaanyɛ. Kɛ́ anyɛɛɛ atsu sane ko he nii agbe naa yɛ nakai otsi lɛ mli lɛ, ebaanyɛ eye ebua onukpai lɛ loo mɛi ni he yɔɔ sane lɛ mli lɛ koni amɛtao nii amli kɛle Ŋmalɛ naa gbɛtsɔɔmɔ ni kɔɔ sane lɛ he. Kɛ́ esa akɛ nitsumɔhe nine lɛ atsu nɔ ko yɛ sane lɛ he lɛ, ekɛ onukpai lɛ baaŋma wolo kɛtsɔɔ sane lɛ mli.

⁴⁷ Kɛ́ kpokpaa nɔkwɛlɔ lɛ basara asafo lɛ, ekɛ amɛ yaa asafoŋ kpeei ni afeɔ daa otsi lɛ. Yɛ be kɛ beiaŋ lɛ, atsɔɔ gbɛtsɔɔmɔi ni nitsumɔhe nine lɛ kɛhãa lɛ anɔ afeɔ tsakemɔi yɛ kpeei lɛ amli. Ehãa wiemɔi ni baawo nyɛmimɛi lɛ hewalɛ, ekanya amɛ, etsɔɔ amɛ gbɛ, ni ewaje amɛ. Ebɔɔ mɔdɛŋ eyeɔ ebuaa nyɛmimɛi lɛ koni amɛsumɔ Yehowa, Yesu Kristo, kɛ asafo lɛ.

⁴⁸ Yiŋtoi ahewɔ ni kpokpaa nɔkwɛlɔ lɛ saraa asafoi lɛ ateŋ ekome ji, ni ewo nyɛmimɛi lɛ hewalɛ ni amɛkɛ hiɛdɔɔ atsu shiɛmɔ nitsumɔ lɛ, ni ekɛ ŋaawoi ni sa ahã yɛ enɛ he. Asafoŋbii lɛ ateŋ mɛi babaoo baanyɛ ato gbɛjianɔ koni amɛtsu shiɛmɔ nitsumɔ lɛ jogbaŋŋ kɛmɔ shi yɛ nakai otsi lɛ mli, ekolɛ kɛtsɔ gbɛgbalɔi awamɔ nitsumɔ lɛ ni amɛbaatsu yɛ nyɔɔŋ ni ebasara amɛ lɛ mli lɛ nɔ. Mɔ fɛɛ mɔ ni miisumɔ ni ekɛ lɛ loo eŋa atsu nii lɛ baanyɛ ahã ele kɛtsɔ hiɛ. Kɛ́ okɛ kpokpaa nɔkwɛlɔ lɛ loo eŋa lɛ yafee Biblia mli nikasemɔ kɛ sɛɛkuukɛsaramɔ lɛ, ewoɔ yibii kpakpai waa. Mɔdɛŋ ni obɔɔ koni oye obua yɛ otsi ni ebasara lɛ mli lɛ sa yijiemɔ waa.​—Abɛi 27:17.

⁴⁹ Daa afi lɛ, atoɔ kpokpaa nɔ kpeei srɔtoi enyɔ ahe gbɛjianɔ ahãa kpokpaa fɛɛ kpokpaa. Kpokpaa nɔkwɛlɔ lɛ ji mɔ ni kwɛɔ ni akɛ kpeei lɛ ahe gbɛjianɔ ni ato lɛ tsuɔ nii. Kpokpaa nɔkwɛlɔ lɛ holeɔ kpee nɔkwɛlɔ kɛ kpee nɔkwɛlɔ sɛɛmɔ. Amɛkɛ lɛ feɔ ekome kɛkwɛɔ koni akɛ kpokpaa nɔ kpeei lɛ ahe gbɛjianɔ ni ato lɛ atsu nii. Enɛ yeɔ ebuaa kpokpaa nɔkwɛlɔ lɛ koni ekɛ ejwɛŋmɔ ama nifeemɔi ni baaya nɔ yɛ kpee lɛ shishi lɛ anɔ titri. Kpokpaa nɔkwɛlɔ lɛ halaa hii krokomɛi ni sa hu koni amɛkwɛ nitsumɔi krokomɛi ni atsuɔ yɛ kpee lɛ he lɛ anɔ. Agbɛnɛ hu, etoɔ gbɛjianɔ ni akwɛɔ kpokpaa lɛ shika he saji amli yɛ be kɛ beiaŋ. Yɛ kpokpaa nɔ kpee lɛ ekome shishi lɛ, nitsumɔhe nine najiaŋdamɔlɔ ko sɔmɔɔ akɛ wielɔ ni ebasara kpokpaa lɛ. Bei komɛi lɛ, ajaraa kpokpai komɛi amli ni afeɔ kpokpaa nɔ kpee lɛ ahãa fã fɛɛ fã yɛ gbɛ jekɛmɔ hewɔ, loo akɛni he ni afeɔ kpee lɛ yɛ lɛ edaaa lɛ hewɔ.

⁵⁰ Kpokpaa nɔkwɛlɔ lɛ kɛ eshiɛmɔyaa he amaniɛbɔɔ lɛ majeɔ nitsumɔhe nine lɛ daa nyɔɔŋ nɔ. Kɛ́ ekɛ shika tsu nibii komɛi tamɔ egbɛfãa, eniyenii, ewɔɔhe, kɛ nibii krokomɛi ni he hiaa koni enyɛ etsu esɔɔmɔ lɛ he nii, ni asafo ni eyasara lɛ nyɛɛɛ awo shika lɛ fɛɛ lɛ, ebaanyɛ ehã nitsumɔhe nine lɛ ale shika ni eshwɛ ni esa akɛ awo lɛ. Asafo lɛ najiaŋdamɔlɔi ni fãa gbɛ lɛ le akɛ kɛ́ amɛkɛ Yehowa Maŋtsɛyeli lɛ he nibii ye klɛŋklɛŋ gbɛhe lɛ, amɛnine baashɛ amɛheloonaa hiamɔ nii anɔ, tamɔ bɔ ni Yesu wo shi lɛ. (Luka 12:31) Esa akɛ asafoi lɛ ana akɛ, eji hegbɛ kpele ni amɛná akɛ amɛbaafee onukpai nɛɛ ni bɔɔ mɔdɛŋ kɛsɔmɔɔ amɛ lɛ gbɔ.​—3 Yoh. 5-8.

⁵¹ Maŋ fɛɛ maŋ nɔ ni Yehowa Odasefoi anitsumɔhe nine yɔɔ lɛ, ayɛ hii ni edara yɛ mumɔŋ aaafee etɛ loo nɔ ni sɔmɔɔ akɛ Nitsumɔhe Nine Ajinafoi Akuu, ni amɛ amɛkwɛɔ shiɛmɔ nitsumɔ lɛ nɔ yɛ nakai maŋ lɛ kɛ maji krokomɛi ni yɔɔ amɛshishi lɛ anɔ. Hii nɛɛ ateŋ mɔ kome sɔmɔɔ akɛ Nitsumɔhe Nine Ajinafoi Akuu lɛ saji ahe gbɛjianɔtolɔ.

⁵² Mɛi ni sɔmɔɔ akɛ Nitsumɔhe Nine Ajinafoi Akuu lɛ tsuɔ saji ni kɔɔ asafoi fɛɛ ni yɔɔ nitsumɔhe nine lɛ shikpɔŋkuku lɛ mli lɛ ahe lɛ he nii. Ajinafoi akuu lɛ kwɛɔ Maŋtsɛyeli lɛ he sane kpakpa lɛ ni ashiɛɔ yɛ nitsumɔhe nine lɛ shikpɔŋkuku lɛ mli lɛ nɔ, ni amɛkwɛɔ koni ato asafoi kɛ kpokpai ashishi bɔ ni afee ni akɛ yelikɛbuamɔ ni sa ahã nyɛmimɛi lɛ. Nitsumɔhe Nine Ajinafoi Akuu lɛ hu yeɔ amɛbuaa koni maŋsɛɛ sɔɔlɔi, gbɛgbalɔi krɛdɛi, daa gbɛgbalɔi, kɛ gbɛgbalɔi awalɔi anyɛ atsu amɛshiɛmɔ nitsumɔ lɛ jogbaŋŋ. Kɛ́ abaafee kpokpaa nɔ kpeei kɛ kpeei wuji lɛ, ajinafoi akuu nɛɛ toɔ kpeei lɛ ahe gbɛjianɔ ni amɛkɛ nifeemɔi woɔ mɛi adɛŋ hu koni afee “nibii fɛɛ bɔ ni yɔɔ fɛo, kɛ agbɛnɛ hu, yɛ gbɛjianɔtoo naa.”​—1 Kor. 14:40.

⁵³ Ahalaa Maŋ Ajinafoi Akuu yɛ maji komɛi ni bɛ nitsumɔhe nine, shi Nitsumɔhe Nine Ajinafoi Akuu ni yɔɔ maŋ kroko nɔ lɛ ni kwɛɔ nitsumɔ lɛ nɔ yɛ jɛmɛ lɛ anɔ. Enɛ hãa akwɛɔ shiɛmɔ nitsumɔ lɛ nɔ jogbaŋŋ yɛ he ni Maŋ Ajinafoi Akuu lɛ sɔmɔɔ yɛ lɛ. Amɛkwɛɔ Betel Shĩa kɛ ɔfisii lɛ anɔ, amɛ amɛtsuɔ woji kɛ amaniɛbɔi ni aŋmalaa lɛ ahe nii, ni amɛ amɛkwɛɔ shiɛmɔ nitsumɔ lɛ nɔ yɛ nakai maŋ lɛ nɔ. Maŋ Ajinafoi Akuu lɛ kɛ Nitsumɔhe Nine Ajinafoi Akuu lɛ feɔ ekome kɛtsuɔ nii koni Maŋtsɛyeli lɛ he nibii lɛ ashwere.

⁵⁴ Gbɛtsɔɔmɔ Kuu lɛ ni halaa mɛi fɛɛ ni sɔmɔɔ akɛ Nitsumɔhe Nine Ajinafoi Akuu kɛ Maŋ Ajinafoi Akuu lɛ.

⁵⁵ Be kɛ beiaŋ lɛ, Gbɛtsɔɔmɔ Kuu lɛ toɔ gbɛjianɔ koni nyɛmimɛi hii ni sa ayasara nitsumɔhe niji fɛɛ ni yɔɔ je lɛŋ lɛ. Atsɛɔ nyɛmimɛi hii nɛɛ akɛ nitsumɔhe yitso najiaŋdamɔlɔi. Nitsumɔ titri ni amɛtsuɔ ji, ni amɛwo Betel weku lɛ mli bii lɛ hewalɛ, ni amɛye amɛbua Nitsumɔhe Nine Ajinafoi Akuu lɛ kɛtsu naagbai ni ekolɛ eba loo sanebimɔi ni ete shi yɛ shiɛmɔ kɛ kaselɔfeemɔ nitsumɔ lɛ hewɔ lɛ ahetoo. Nyɛmimɛi hii nɛɛ kɛ kpokpaa nɔkwɛlɔi komɛi kpeɔ, ni bei komɛi lɛ, amɛkɛ maŋsɛɛ sɔɔlɔi lɛ hu kpeɔ. Amɛkɛ kpokpaa nɔkwɛlɔi lɛ kɛ maŋsɛɛ sɔɔlɔi lɛ susuɔ naagbai ni amɛkɛkpeɔ kɛ amɛhiamɔ nii ahe, ni amɛwoɔ amɛ hewalɛ yɛ nitsumɔ titri ni amɛtsuɔ, ni ji Maŋtsɛyeli shiɛmɔ kɛ kaselɔfeemɔ nitsumɔ lɛ he.

⁵⁶ Nɔ ni kã nitsumɔhe yitso najiaŋdamɔlɔ lɛ tsui nɔ titri ji, ni ele bɔ ni Maŋtsɛyeli shiɛmɔ kɛ kaselɔfeemɔ nitsumɔ lɛ kɛ nitsumɔi krokomɛi ni asafoi lɛ tsuɔ lɛ ewo yibii ehã. Kɛ́ be baaŋmɛ gbɛ lɛ, eyasaraa wiemɔ shishitsɔɔmɔ ɔfisii lɛ hu. Kɛ́ nitsumɔhe yitso najiaŋdamɔlɔ ko yasara nitsumɔhe nine ko lɛ, ekɛ ehe woɔ Maŋtsɛyeli shiɛmɔ nitsumɔ lɛ mli bɔ ni ebaanyɛ.

⁵⁷ Wɔnáa suɔmɔ mli ni Kristofoi hii ni edara yɛ mumɔŋ lɛ jɛɔ amɛkwɛɔ wɔ kɛ nitsumɔ ni amɛtsuɔ waa lɛ he sɛɛ babaoo. Be ni wɔyaa nɔ wɔbaa wɔhe shi wɔhãa nɔkwɛlɔi ni ahala akɛ amɛkwɛ tooku lɛ nɔ lɛ, belɛ wɔkɛ Kristo Yesu, ni ji asafo lɛ Yitso lɛ, miifee ekome ji no. (1 Kor. 16:15-18; Efe. 1:22, 23) Enɛ hãa Nyɔŋmɔ mumɔ lɛ hiɔ asafoi ni yɔɔ jeŋ fɛɛ lɛ anɔ, ni atsɔɔ Nyɔŋmɔ Wiemɔ lɛ nɔ akudɔɔ nitsumɔ ni atsuɔ yɛ shikpɔŋ lɛ nɔ fɛɛ lɛ.​—Lala 119:105.