Gbala Nii​—Te Esa Akɛ Kristofoi Abu lɛ Tɛŋŋ?

AFEE nɛkɛ blema kusum ni ji gbala nii ni ahaa nɛɛ lolo yɛ maji babaoo anɔ. Yɛ bei babaoo mli lɛ, akɛ shika kɛ nikeenii sɔrɔtoi ni jara wa haa akɛ gbala nii nɛɛ. Gbala nii lɛ tsakeɔ yɛ hei sɔrɔtoi kɛ wekui sɔrɔtoi lɛ amli, yɛ bɔ ni ale mɛi lɛ aha kɛ he ni amɛskulyaa etee hiɛ kɛyashi kɛ nibii krokomɛi lɛ anaa. Yɛ maji komɛi amli lɛ, mla efo enɛ efɔ shi, eyɛ mli akɛ mɛi fioo ko pɛ yeɔ nɔ ni afo afɔ shi nɛɛ nɔ.

Enɛ he susumɔ jogbaŋŋ tsɔɔ akɛ ŋmɛnɛŋmɛnɛ kusum lɛ feɔ babaoo fe gbala nii ni awoɔ kɛkɛ. No hewɔ lɛ, eji nilee gbɛ akɛ ooosusu bɔ ni enɛ saa ohe akɛ Kristofonyo lɛ he.

Yɛ Papua New Guinea lɛ, gbala nii lɛ hamɔ tamɔ weku kome, ayemforo wu lɛ wekumɛi anibii ni ajieɔ ahaa weku kroko lɛ, ayemforo ni boteɔ gbalashihilɛ mli lɛ wekumɛi. Nyɔmɔ ni awoɔ lɛ nyɛɔ eshɛɔ kɛjɛ Amerika shika dɔlai 100 kɛyashi 46,000, yɛ bɔ ni ale ayemforo wu lɛ wekumɛi aha lɛ naa. Yɛ Sri Lanka lɛ, bɔ ni afeɔ lɛ lɛ yɛ sɔrɔto. Ayemforo lɛ fɔlɔi baawo gbala nii lɛ aha ayemforo wu lɛ. Nɔ ni fata nibii lɛ ahe ji jwetrii, nibii, shĩa, kɛ shika. No hewɔ lɛ eji kusum akɛ mɔ kɛ etsɛkwɛbi loo enyɛkwɛbi aaahi shi koni nibii ni ayɔɔ lɛ akaje weku lɛ mli.

Yɛ Afrika hei babaoo lɛ, gbala nii lɛ hamɔ ji kusumii ni abiɔ ni afee dani akpɛlɛ gbalashihilɛ lɛ nɔ akɛ eye emuu lɛ ateŋ ekome. Tsɛ ko ni jɛ Nigeria ni ebiyoo ko miisaa ehe kɛha gbalashihilɛ lɛ kɛɛ akɛ: “Yɛ Ibobii ateŋ lɛ, gbala nii lɛ he miihia dani abaakpɛlɛ gbala lɛ nɔ yɛ kusum naa. Gbala nii lɛ nɔkpɛlɛmɔ tsɔɔ akɛ obalayoo lɛ weku lɛ ekpɛlɛ nɔ yɛ gbɛ ko nɔ. Ekɛ gbɔmɛi lɛ ashishinumɔ yɛ gbala mli botemɔ he lɛ kpaa gbee. Yɛ enɛ hewɔ lɛ, akpɛlɛɛɛ yookpeemɔ yɛ sɔlemɔ tsu mli aloo yɛ maŋ nɔyeli lɛ mla kɛ ewoji amli lɛ nɔ ja aha gbala nii lɛ afata he.”

Bɔ Ni Eeenyɛ Esa Tsɛ Lɛ He Eha

Yɛ Afrikabii ateŋ lɛ, gbala nii lɛ ji okadi ni tsɔɔ akɛ nuu lɛ baanyɛ akwɛ weku lɛ nɔ. Ewekumɛi lɛ ekomɛi yaa obalayoo lɛ fɔlɔi aŋɔɔ koni amɛkɛ amɛ ayaye gbala nii lɛ naa. Yɛ hei pii lɛ, afeee nakai dɔŋŋ, ni tsɛmɛi lɛ moŋ yeɔ naa ni amɛtsɔɔ jara ni wa fe fɛɛ ni kɛ hooo lɛ esa akɛ amɛhe. Awoɔ kɛjɛ Amerika shika dɔla 20, ni ji bɔ ni Nigeria maŋ mla etsɔɔ lɛ, aahu kɛyashiɔ 3,000 aloo nɔ ni fe nakai. Akpaa gbɛ akɛ akɛ shika kɛ nikeenii krokomɛi baaba yɛ be mli ni nuu lɛ fɔlɔi yasaraa weku kroko lɛ klɛŋklɛŋ kwraa po lɛ. Kɛkɛ lɛ, taakɛ afeɔ yɛ Zaire lɛ, awoɔ shika babaoo “koni akɛgbele tsɛ lɛ naabu,” ni ji akɛ koni etsɔɔ gbala nii ni ebaahe yɛ ebiyoo lɛ he. Ni yɛ be mli ni awo shika ko po sɛɛ lɛ, anyɛɔ abiɔ ni awo nikeenii komɛi hu aha amɛ.

Nifeemɔi ni tamɔ enɛ lɛ baanyɛ awo mɔ hewalɛ ni efee shika suɔlɔ loo hiɛjoolɔ. Shi kɛlɛ, Biblia lɛ kɛɔ akɛ: “Ejaakɛ nibii fɔji fɛɛ ashishifa ji shika suɔmɔ.” (1 Timoteo 6:10) Yɛ hiɛjoomɔ hewɔ lɛ, mɛi baanyɛ atsɔmɔ amimyelɔi, ni enɛ kɛ Nyɔŋmɔ nɔkpɛlɛmɔ baaa. Biblia lɛ kɛɔ wɔ akɛ “hiɛjoolɔ ko ni ji wɔŋ jalɔ bɛ gbɛnaa yɛ Kristo kɛ Nyɔŋmɔ maŋtsɛyeli lɛ mli.”​—Efesobii 5:5; Okɛto Abɛi 20:​21; 1 Korintobii 5:​11; 6:10 he.

Shi kɛlɛ, nɔ ko bɛ ni ehiii yɛ gbala nii ni aaawo aha tsɛ lɛ akɛ najiaŋtoo ko yɛ ebiyoo ni etɔ lɛ yɛ etsɔsemɔ kɛ eskulyaa he lɛ he. Mɔ ni tsɔɔ eshaanuu nɛɛ baanyɛ abu gbala nii nɛɛ akɛ hiɛsɔɔ ni ejieɔ kpo etsɔɔ yɛ tsɔsemɔ ni akɛha ehefatalɔ nɛɛ hewɔ. Shi kɛlɛ, fɔlɔi komɛi bɔɔ mɔdɛŋ ni amɛnine ashɛ shika ni amɛfite lɛ fɛɛ nɔ, ni amɛnuɔ hɛ akɛ amɛbiyoo ni boteɔ gbalashihilɛ mli nɛɛ yeŋ ebuaŋ koni akɛkwɛ enyɛmimɛi bibii lɛ kɛya skul. Fɔlɔi ni tamɔ nɛkɛ lɛ taoɔ gbala nii ni jara wa fe fɛɛ ni amɛaana, tamɔ nɔ ni amɛkɛ amɛbiyei lɛ ewo jara. Shi nɔ ni sa akɛ amɛha amɛbii lɛ ji tsɔsemɔ kpakpa. Nɔ ni esa akɛ amɛkɛshwa ji bɔ ni amɛnyɛ amɛtsu enɛ he nii amɛha, ni jeee bɔ ni amɛbaanyɛ amɛna kɛjɛ amɛhe yɛ shika loo gbɛi gbɛfaŋ kɛtsɔ gbala nii ni jara wa nɔ. Ni eeenyiɛ fɔlɔi ahiɛ ni amɛsusu heloonaa sɛɛnamɔi ni bii baanyɛ amɛkɛba lɛ ahe moŋ lɛ, Biblia lɛ kɛɔ akɛ: “Esaaa akɛ bii tiãa nii toɔ amɛfɔlɔi, shi moŋ fɔlɔi ni tiãa nii toɔ amɛbii.”​—2 Korintobii 12:⁠14.

Nibii ni tsɛmɛi komɛi ni tsɛɔ amɛhe Kristofoi Iɛ biɔ lɛ kuɔ amɛhiɛ amɛshwieɔ obalahii Kristofoi ni taoɔ abi amɛbiyei lɛ ashi lɛ ashika gbɛfaŋ nyɛmɔi anɔ. Ni yɛ bei komɛi amli lɛ tsɛmɛi nɛɛ heee bɔ ni nɛkɛ obalahii Kristofoi nɛɛ baanyɛ aha lɛ ejaakɛ ekolɛ jeŋbii komɛi baa akɛ amɛbaaha fe nakai! Mɛi komɛi shiɔ hewielɔi lɛ amɛhaa amɛwekumɛi jeŋbii, ni amɛbiɔ gbala nii ni fa fe nine. Beni nɛkɛ niianaayeli nɛɛ yaa nɔ lɛ, shihilɛ lɛ nyɛɔ etsirɛɔ obalaŋtai nɛɛ kɛwoɔ ajwamaŋbɔɔ mli. Enɛ ji nɔ ni yaa nɔ yɛ jeŋ bii lɛ atɛŋ. Bei pii lɛ ebaa akɛ hefatalɔi enyɔ ni nijiaŋ eje wui nɛɛ ŋɔɔ hɔ ni amɛkɛnyɛɔ obalayoo lɛ fɔlɔi anɔ koni amɛkpɛlɛ bɔ ni nuu ni taoɔ abi eshi lɛ baanyɛ aha lɛ nɔ.

Esaaa akɛ Kristofoi feɔ amɛnii yɛ nɛkɛ gbɛ nɔ. Nyɔŋmɔ Wiemɔ lɛ hiɔ ajwamaŋbɔɔ, ni ashwieɔ mɛi ni kɛ amɛhe woɔ mli lɛ kɛjɛɔ asafo lɛ mli. (1 Korintobii 6:9; Hebribii 13:⁠4) Tsɛ lɛ nyɛŋ ajie ehe kɛjɛ shwamɔ mli kɛji nɔ ni ebiɔ ni jara wa tsɔ lɛ ha ebiyoo lɛ kɛ ehe yawo jeŋba shara mli. Nɛkɛ shwamɔ nɛɛ baanyɛ asa eshidaamɔ yɛ asafo lɛ mli he. Ni yɛ nakai gbɛ nɔŋŋ nɔ lɛ, ni eeekpɛlɛ ebiyoo lɛ gbala nii ni jɛ jeŋnyo dɛŋ koni ekɛ ebi ni ejɔɔ ehe nɔ lɛ aha lɛ lɛ jeee teokrase nifeemɔ. Enɛ feemɔ haa kɛ hooo lɛ eŋmɛɔ hegbɛi komɛi ni kulɛ abaanyɛ akɛwo edɛŋ yɛ asafo lɛ mli lɛ he. Fɔlɔi ni ji Kristofoi lɛ baasumɔ ni amɛbii lɛ ahe awa yɛ Kristofoi asafo lɛ mli ni esa akɛ amɛyɛ amɛbua amɛ ni amɛhiɛ jeŋba kpakpa mli. Esa akɛ amɛshwe ni amɛbiyei abote gbalashihilɛ mli yɛ miishɛɛ mli “yɛ Nuŋtsɔ lɛ mli,” kɛ wumɛi ni sumɔɔ Yehowa ni amɛyɔɔ bulɛ ni mli kwɔ kɛha emlai kɛ akpɔi lɛ hu.​—1 Korintobii 7:⁠39.

Ejeee Kristofoi asu akɛ aaabu gbala nii lɛ akɛ gbɛ ni atsɔɔ nɔ anaa shika kɛjɛɔ bii ahe, ni akɛ amimyeli aaahe fe bɔ ni sa. Esa akɛ tsɛ ni ji Kristofonyo lɛ akwɛ ehɛ nɔ jogbaŋŋ yɛ hiɛjoomɔ kɛ amimyeli he, akɛni enɛ baanyɛ asa emumɔŋ shidaamɔ kɛ hegbɛi ni enaa yɛ asafo lɛ mli lɛ he lɛ hewɔ.​—1 Korintobii 6:​9, 10.

Miishɛɛ sane ji akɛ, tsɛmɛi Kristofoi pii kɛ niiahesusumɔ etsu nii yɛ nɔ ni amɛheɔ yɛ gbala nii lɛ woo he lɛ mli, ni enɛ jieɔ jeŋba kpakpa kpo. Mɛi komɛi po ehala akɛ amɛheŋ gbala nii lɛ kwraa, bɔni afee ni amɛkɛkwɛ amɛhe nɔ jogbaŋŋ yɛ kusum nifeemɔ ni amɛaate shi amɛshi ni ekɛ mumɔŋ naagbai baanyɛ aba lɛ ahe.

Bɔ Ni Esaa Ayemforo Kɛ Ayemforowu Lɛ He Ehaa

Yɛ bei babaoo mli lɛ, obalayoo lɛ hiɛjoomɔ naa hewalɛ yɛ bɔ ni efɔlɔi heɔ akɛ gbala nii lɛ nɔ. Mɛi komɛi yɛ ni amɛbiɔ yookpeemɔ ni jara wa ni yɔɔ sɔkɔtrelee hu, ni bei komɛi po lɛ amɛfoɔ amɛkɛyeɔ amɛfɔlɔi atsui kɛha enɛ. Mɛi komɛi biɔ ni amɛfɔlɔi ahe nihoomɔ tsɛŋsii ni jara wa ni amɛkɛya amɛshia hee lɛ. No hewɔ lɛ bɔni afee ni enyɛ etsu nibii ni abiɔ nɛɛ ahe nii lɛ, tsɛ lɛ baana akɛ ehe miihia ni eŋmɛ gbala nii lɛ nɔ.

Ni yɛ sɛɛ mli lɛ, enɛ nyɛɔ ayɛmforowu lɛ nɔ ni ejeɔ gbalashihilɛ lɛ shishi kɛ nyɔmɔ ni da ni jɛ yookpeemɔ ni yɔɔ sɔkɔtrelee kɛ tsu mli saamɔ nibii ni jara wa hewɔ. Nyɔŋmɔ Wiemɔ lɛ kɛɔ akɛ “nilee ni jɛ ŋwɛi lɛ . . . ehiɛ ka shi.” Esa akɛ hefatalɔi obalaŋtai lɛ aha ‘gbɔmɛi fɛɛ ale amɛmlijɔlɛ lɛ’ kɛtsɔ gbɛjianɔ ni amɛaato yɛ yookpeemɔ lɛ he koni ekaha mɔ ko miimɔ nyɔmɔ lɛ nɔ.​—Yakobo 3:​17; Filipibii 4:⁠5.

Yɛ yookpeemɔ lɛ sɛɛ lɛ, ŋa lɛ baanyɛ aje shishi asusu suɔmɔ ni ewu lɛ yɔɔ kɛha lɛ lɛ mli kwɔlɛ kɛtsɔ gbala nii ni ewo lɛ nɔ. Ekolɛ ebaasusu akɛ ebɛ shweshweeshwe yɛ shika fioo ni ewo lɛ hewɔ. Ebaasusu akɛ kɛji akɛ esane je etsine ni eetao eshwie lɛ lɛ, ebaafee nakai amrɔ nɔŋŋ, ni eshika fioo ni ekɛwo eyi nyɔmɔ lɛ abɔ lɛ po. Eji anɔkwale akɛ wumɛi komɛi eha amɛŋamɛi lɛ eku sɛɛ amɛtee amɛfɔlɔi aŋɔɔ yɛ yiŋtoi komɛi ahewɔ, tamɔ bii ni amɛfɔɔɔ loo atuatsemɔ mumɔ ni amɛyɔɔ hewɔ. Atsɔɔ ŋaa gbɛ nɔ ni awoɔ enɛ feemɔ he hewalɛ kɛtsɔ kɛɛmɔ ni mɛi komɛi kɛɔ nuu ni ewo gbala nii lɛ akɛ: “Oyahe ŋa” lɛ nɔ. Kɛji gbala nii ni ewo lɛ jara wa lɛ, ebaanyɛ ebu eŋa lɛ akɛ abaawa ko ni eyahe moŋ fe ni eeebu lɛ akɛ enaanyo ni fe fɛɛ. Agbɛnɛ, yɛ yiŋtoi komɛi ahewɔ lɛ, tsɛmɛi lɛ ekomɛi kuɔ sɛɛ amɛkɛ gbala nii lɛ yahaa ni amɛhaa amɛbiyei lɛ shiɔ amɛwumɛi.

Mɛi ni kɛɔ akɛ gbala nii ni jara wa lɛ kuɔ enɛ naa akɛni ewa waa dani nine nyɛɔ eshɛɔ gbala nii lɛ nɔ loo anyɛɔ akuɔ sɛɛ akɛhaa lɛ hu yɛ. Amɛnuɔ he akɛ jara ni wa nɛɛ tsiɔ gbala mli botemɔ mra naa, akɛni eheɔ be babaoo dani nuu lɛ kɛbuaa ehe naa koni ekɛwo gbala nii lɛ hewɔ. Amɛnuɔ he akɛ nɛkɛ susumɔi nɛɛ yeɔ ebuaa ni anaa wumɛi ni edara ni nyɛɔ amɛtereɔ sɔ jogbaŋŋ kɛ gbalashihilɛi ni hiɔ shi hu.

Eyɛ mli akɛ enɛ ji anɔkwale yɛ bei komɛi amli moŋ, shi esaaa akɛ Kristofoi agbalashihilɛ lɛ hilɛ lɛ damɔɔ heloonaa niiahesusumɔ ni tamɔ nɛkɛ nɔ. Esaaa akɛ Kristofonyo wu lɛ anɔkwayeli damɔɔ nɔ ni baaŋmɛɛ lɛ kɛji gbala lɛ mli tse lɛ nɔ. Yɛ enɛ najiaŋ lɛ, esa akɛ Ŋmalɛ naa tɛ ni afo afɔ shi nɛɛ akudɔ lɛ: “Nɔ ni Nyɔŋmɔ eŋɔtsa lɛ, akaha gbɔmɔ miigbala mli.” (Mateo 19:⁠6) Yɛ nɔ najiaŋ ni amɛaabu amɛŋamɛi lɛ akɛ nibii ni amɛhe lɛ, awoɔ wumɛi lɛ akpɔ ni ‘amɛkɛ woo aha amɛ.’ (1 Petro 3:⁠7) Yesu kɛɛ akɛ kɛ nuu kɛ yoo bote gbalashihilɛ mli lɛ, amɛbatsɔɔ “heloo kome.” (Mateo 19:5; 1 Mose 2:24) Biblia lɛ woɔ wumɛi aŋaa ni amɛsumɔ amɛŋamɛi, ni amɛbu amɛ akɛ amɛjara wa ni amɛsumɔ amɛ, taakɛ amɛfeɔ amɛ diɛŋtsɛ amɛgbɔmɔtsei lɛ. (Efesobii 5:​28, 29) Kɛfata he lɛ, bɔ ni nuu ko sumɔɔ eŋa ehaa lɛ baaje kpo yɛ bɔ ni ekɛlɛ yeɔ ehaa yɛ afii ni nyiɛ yookpeemɔ lɛ sɛɛ lɛ mli. Kɛji wu lɛ eha gbala nii aloo dabi po lɛ, kɛ ekwɛɔ eŋa jogbaŋŋ ni eyeɔ lɛ anɔkwale yɛ suɔmɔ ni esumɔɔ lɛ lɛ mli lɛ, ani mɔ ko baaje he ŋwane akɛ esumɔɔɔ lɛ?

Gbala nii ni ahaa lɛ hu baanyɛ asa bɔni wu lɛ buɔ eŋa lɛ fɔlɔi ehaa lɛ he. Akɛni ewo jara ni wa waa hewɔ lɛ, ebaanu he akɛ ehiɛɛɛ amɛ nyɔmɔ ko dɔŋŋ, kɛ efi amɛ po. Kɛlɛ, Biblia lɛ kɛɔ akɛ: “Shi kɛ yoo okulafo ko yɛ bii loo nabii lɛ, amɛkase Nyɔŋmɔ gbeyeishemɔ yɛ amɛ diɛŋtsɛ amɛwe tsutsu, ni amɛto amɛfɔlɔi lɛ anajiaŋ pɛpɛɛpɛ; ejaakɛ enɛ yɛ fɛo ni eŋɔɔ Nyɔŋmɔ naa.” (1 Timoteo 5:⁠4) Kristofoi nyiɛɔ ŋaawoo nɛɛ sɛɛ, shi naagba baanyɛ aba kɛ wu lɛ ŋmɛ gbɛ ni eŋa lɛ gbala nii ni ewo lɛ ye jwɛŋmɔ ni akɛaatsu gbɛnaa nii ni jwere enɔ lɛ ahe nii lɛ nɔ.

Yaa Nɔ Oŋmɛ Pɛpɛɛpɛ

Kusum nifeemɔi komɛi ni akɛfataa gbala nii lɛ he lɛ baanyɛ ekɛ naagba aba obalanyo ni kɛ emumɔŋ nyɛmiyoo ni fɔlɔi jeee Kristofoi lɛ baabote gbalashihilɛ mli lɛ nɔ. Amɛbaabi ni ekɛ ehe awo nifeemɔi komɛi ni damɔ blematsɛmɛi ni ajaa amɛ kɛ susuma ni gbooo he hemɔkɛyeli nɔ lɛ amli. (Jajelɔ 9:​5, 10; Ezekiel 18:⁠4) Shi ani ebaanyɛ efee enɛ ni kɛlɛ ena Nyɔŋmɔ nɔkpɛlɛmɔ kɛ jɔɔmɔi ni Yehowa eto eha mɛi ni ‘amɛtsuu amɛsusumai ahe yɛ anɔkwale lɛ toiboo mli’ lɛ? (1 Petro 1:​22; Kpojiemɔ 18:⁠4) Kɛ abi nibii ni tamɔ nɛkɛ kɛjɛ Kristofonyo ni ejɔɔ ehe nɔ lɛ dɛŋ lɛ, esa akɛ ekpɛ eyiŋ be fɛɛ be akɛ “esa akɛ aboɔ Nyɔŋmɔ moŋ toi fe gbɔmɛi.”​—Bɔfoi lɛ Asaji 5:⁠29.

Ŋaawoo ni atsɔ hiɛ akɛha ni kɔɔ amimyeli he, ajwamaŋbɔɔ naa foijee, kɛ nanemɛi heyelilɔi pɛ ni akɛaabote gbalashihilɛ mli lɛ baa nakai nɔŋŋ kɛ yoo lɛ wekumɛi lɛ ji mɛi ni woɔ gbala nii lɛ. Esaaa akɛ je lɛ tɛi ni efolɔ lɛ kudɔɔ Kristofonyo obalayoo kɛ efɔlɔ kɛ amɛmiihala hefatalɔ akɛ wu. Gbalashihilɛ mli ni akɛ mɔ ko ni jeee Kristofonyo lɛ boteɔ lɛ ji Nyɔŋmɔ nɔ toigbele. Ekɛɛ Israelbii lɛ kɛtsɔ Mose nɔ akɛ: “Ni okɛ amɛ akɛaye yoowɛɛ; kaaŋɔ obiyoo oha ebinuu gbala, ni kaawɛ ebiyoo oha obinuu.” (5 Mose 7:​3, 4; 1 Korintobii 7:39) Eka shi faŋŋ akɛ efeŋ nɔ ni ja gbɛ akɛ obalaŋtai Kristofoi hii kɛ yei aaatswa amɛhe adafi yɛ adafitswaa woji amli akɛ amɛmiitao gbalashihilɛ mli hefatalɔi ni sa amɛ. Amɛnyɛmimɛi Kristofoi hii kɛ yei lɛ ateŋ esa akɛ amɛtaoɔ hefatalɔi ni sa kɛjɛɔ.

Gbalashihilɛ ji gbɛjianɔtoo ko ni he tse ni Yehowa kɛha, ni esa akɛ nɔ ni ekɛɔ yɛ he yɛ e-Wiemɔ lɛ mli lɛ akudɔ wɔ fɛɛ. Esa akɛ suɔmɔ ni mli kwɔ ni wɔyɔɔ kɛha Yehowa, kɛ wɔbii, kɛ wɔnanemɛi heyelilɔi lɛ anyiɛ wɔhiɛ ni wɔkudɔ wɔhe kɛjɛ nibii ni teɔ shi woɔ jalɛ kɛ ekpakpa lɛ ahe. (Lala 119:105; Hebribii 4:12) Eka shi faŋŋ akɛ Yehowa jɔɔmɔ baaka he ahi mɛi ni haa e-Wiemɔ lɛ kudɔɔ amɛ yɛ be mli ni amɛfeɔ yiŋkpɛi, jeee yɛ gbala nii hamɔ he pɛ kɛkɛ shi yɛ wala shihilɛ gbɛi fɛɛ amli lɛ anɔ.​—Abɛi 10:​22.