Kwɛmɔ Ni Oookwɛ Ofɔlɔi Ni Amɛdara Lɛ​—Yɛ Mɛɛ Gbɛ Nɔ?

TSOFAFEEMƆ lɛ kɛɛ akɛ: “Onyɛ lɛ miihe afee mɔ ni nyɛŋ anyiɛ agbɛnɛ, no hewɔ lɛ esa akɛ wɔtao shihilɛhe ko wɔha lɛ koni eyajɔɔ ehe yɛ jɛmɛ.”

Biyoo lɛ kɛ mlifu bɔi ehe tsɔmɔ. Ni nakai nɔŋŋ nyɛ lɛ fee, shi​—yɛ dɔlɛ gbɛfaŋ. Shia agbo ko ni emli hilɛ yɔɔ naagba baka ehiɛ, ni ena ehe akɛ mɔ ni ta yeimeji ni bɛ miishɛɛ lɛ ateŋ. Shi ebiyoo lɛ kɛ miishɛɛ gbee wie ni enɛ ha ehiɛ ba ehe nɔ.

“Kaahao, Awo. Mikɛ Jan baawie koni oba ni obahi wɔmasɛi.”

Enyɛ lɛ hoso eyitso. “Oh dabi, mibi Oweku lɛ he nibii babaoo ka anɔ ni oofee, ni . . . ”

Biyoo lɛ ŋma yɛ sɛɛ mli akɛ: “Enaabu kɛɛ ‘Dabi,’ shi ehiŋmɛi miikpa fai akɛ: ‘Ofainɛ kaashi mikomɛtoo; okɛmi aya.’”

Shi kɛlɛ, hiimeji kɛ yeimeji ashiai ni hi babaoo yɛ. Ani ebahiŋ akɛ nyɛ lɛ aaya ekome mli? Ejaakɛ agbɛnɛ biyoo nɛɛ baakwɛ enyɛ lɛ hu afata ewu lɛ he. Ani ebaanyɛ ekɛ ebiyoo lɛ weku lɛ ahi shi yɛ miishɛ mli?

Ŋwanejee ko kwraa bɛ he akɛ sanebimɔi babaoo ni tamɔ nɛkɛ teɔ shi. Yɛ be mli ni onukpai nɛɛ ayi faa lɛ, saji nɛɛ babaoo bakaa wekui sɔrɔtoi anɔ. Ani Biblia lɛ kɛ gbɛtsɔɔmɔ ko haa yɛ nɛkɛ sane nɛɛ he?

Yesu Nɔkwɛmɔnɔ Lɛ

Be mli ni Yesu Kristo tsotsoro Sɛŋmɔtso lɛ nɔ, yɛ piimɔ babaoo lɛ fɛɛ sɛɛ lɛ, no mli lɛ enyɛ ni gbɔɔ lɛ he sane yɛ ejwɛŋmɔŋ. Eka shi faŋŋ akɛ no mli lɛ Maria etsɔ okulafo, ni akɛni gbele ka Yesu hiɛ hewɔ lɛ, esusu enyɛ lɛ kwɛmɔ he yɛ sɛɛ mli beni etee lɛ. No mli lɛ eheloo gbɛfaŋ nyɛmimɛi lɛ heko lɛ amɛyeko lolo; amɛjeee ekaselɔi, No hewɔ lɛ Yesu kɛ enyɛ Maria kwɛmɔ fɔ Yohane, kaselɔ ni esumɔɔ esane jogbaŋŋ lɛ nɔ. Biblia lɛ wie nɔ ni ba yɛ sɛŋmɔtso lɛ masɛi lɛ he akɛ:

“No hewɔ lɛ, beni Yesu na enyɛ kɛ kaselɔ ni esumɔɔ [Yohane] lɛ damɔ shi lɛ, ekɛɛ enyɛ akɛ: ‘Awo, obi nɛ!’ Fee sɛɛ lɛ ekɛɛ kaselɔ lɛ akɛ: ‘Naa onyɛ nɛ!’ Ni kɛjɛ nakai ŋmlɛtswaa lɛ nɔ lɛ kaselɔ lɛ ŋɔ lɛ kɛtee lɛ diɛŋtsɛ ewe.”​—Yoh. 19:​26, 27.

Eji Nyɔŋmɔ suɔmɔnaa nii akɛ asusu fɔlɔi ahe babaoo, taakɛ emlai lɛ kɛɔ lɛ. No hewɔ lɛ Yesu miifee nii koni ekɛ kitai nyɔŋma lɛ mli nɔ ni ji emumɔ ni akɛha Israel lɛ akpa gbee akɛ: “Wo otsɛ kɛ onyɛ koni ogbii atsɛ yɛ shikpɔŋ lɛ ni Yehowa, o-Nyɔŋmɔ lɛ ŋɔ-hao lɛ nɔ.” No hewɔ lɛ Yehowa baajɔɔ mɔ ni jieɔ shidaa kpo kɛhaa efɔlɔi lɛ babaoo.​—2 Mose 20:⁠12.

Gbɛjianɔtoo Kpakpa Ni Akɛtsuuu Nii Dɔŋŋ

Shi taakɛ eji yɛ mlai babaoo gbɛfaŋ lɛ, Kita Ni Ji Enumɔ lɛ bafee nɔ ni abuuu. Yɛ pɛsɛmkunya hewɔ lɛ, Yudafoi babaoo je shishi amɛku amɛhiɛ amɛshwie amɛfɔlɔi anɔ, amɛhiɛ ekpa suɔmɔ gbɛ ni amɛkɛkwɛ amɛnɔ lɛ nɔ. Ye sɛɛ mli lɛ, jamɔ mli hiɛnyiɛlɔi po shi amɛtsitsi ni amɛkɛ mla ba akɛ abaanyɛ aku hiɛ ashwie fɔlɔi ni aaakwɛ amɛ lɛ nɔ, kɛ mɔ lɛ tsuɔ gbɛnaa nii ni ka enɔ yɛ jamɔŋ lɛ he nii pɛ kɛkɛ lɛ. Yesu te shi wo nɛkɛ tɔmɔ nɛɛ waa. Ekɛɛ akɛmɔ fɛɛ mɔ ni aaaku ehiɛ ashwie Nyɔŋmɔ kitai nɛɛ anɔ yɛ nɛkɛ gbɛ nɔ lɛ miija Nyɔŋmɔ efolo​—Marko 7:​6-10.

Yesu kaselɔi lɛ nu Nyɔŋmɔ taomɔnii akɛ akwɛ fɔlɔi kɛ fɔlɔi afɔlɔi ni ehiamɛ lɛ anɔ jogbaŋŋ lɛ shishi Bɔfo Paulo ŋma akɛ: “Shi kɛ̃ yoo okulafo ko yɛ bii loo nabii lɛ, amɛkase Nyɔŋmɔ gbeyeishemɔ yɛ amɛdiɛŋtsɛ amɛwe tsutsu, amɛto amɛfɔlɔi lɛ anajiaŋ pɛpɛɛpɛ; ejaakɛ enɛ yɛ fɛo ni eŋɔɔ Nyɔŋmɔ naa.” (1 Tim. 5:⁠4) Ani ekadi gbekɛbii lɛ anitsumɔ ni baa klɛŋklɛŋ lɛ? No ji akɛ amɛto amɛfɔlɔi kɛ amɛfɔlɔi afɔlɔi lɛ anajiaŋ pɛpɛɛpɛ yɛ kwɛmɔ ni amɛkwɛ amɛ yɛ be mli ni amɛdarako lɛ hewɔ. Hɛɛ, Nyɔŋmɔ kplɛɔ gbekebii ni aaakwɛ amɛfɔlɔi kɛ amɛfɔlɔi afɔlɔi ni amɛnyɛɛɛ amɛkwɛ amɛhe nɔ dɔŋŋ lɛ anɔ.

Ŋmɛnɛ, yɛ je lɛ mli lɛ ‘woo fioo ko pɛ akɛhaa tsɛ kɛ nyɛ.’ Su moŋ ni eba lɛ ji akɛ: “Mɔ fɛɛ mɔ akwɛ lɛ diɛŋtsɛ enɔ; haomɔ ni ka minɔ lɛ fa hami.” Nɔ ni ejɛ nɛkɛ yiwaa nɛɛ mli eba lɛ ka shi faŋŋ: Mɛi ni amɛdara lɛ ateŋ mɛi akpei babaoo kɛ ‘amɛshihilɛ naagbee be’ ni mli wa miikpe akɛni mɔ ko mɔ ko susuuu amɛhe dɔŋŋ lɛ hewɔ.

Shi esa akɛ asra nɛkɛ fɔlɔi ni amɛdara nɛɛ yɛ be kɛ bei amli ni akwɛ nɔ ni yaa nɔ yɛ amɛshiai amli. Ani amɛnaa nɔ fɛɛ nɔ ni he hiaa amɛ kɛ niyenii bɔni sa? Amɛhe tse? Ani esa akɛ asaa nɔ ko yɛ jɛmɛ? Ani amɛhe feɔ shoo? Te amɛgbɔmɔtsoŋ hewalɛ yɔɔ tɛɛŋ? Kaimɔ akɛ eji gbɛnaanii ni ka onɔ akɛ okwɛ amɛnɔ jogbaŋŋ

Nɔni fe fɛɛ lɛ, nɔ ni ofɔlɔi ni amɛdara lɛ hiaa titri ji ni ooojielɛ kpo otsɔɔ amɛ akɛ oosumɔ amɛ ni akɛ amɛhe efeee bo ahuntoo. Obaanyɛ okɛ onine afɔ amɛ kuɛ yɛ naanyobɔɔ gbɛ nɔ ni ofee amɛ atuu. Osuɔmɔ kpele he miihia mɛi ni amɛdara nɛɛ. Kɛ́ amɛmiiwie lɛ bɔɔ mɔdɛŋ ni obo amɛtoi jogbaŋŋ eyɛ mli akɛ ekolɛ onu nɔ ni amɛkɛɔ bo lɛ moŋ. Amɛhaoɔ waa kɛji akɛ amɛna akɛ mɛi booo amɛtoi ni abuuu amɛhe akɔntaa dɔŋŋ lɛ. Kɛ̃ amɛnu he nakai akɛ ataooo amɛ lɛ nɔ ni baajɛ mli aba ji mra gbele

Asafo Lɛ Baanyɛ Afee Babaoo

Shi ani esa akɛ aku hiɛ ashwie Kristofoi anɔkwafoi ni amɛdara ni amɛbɛ bii ni heɔ yeɔ lɛ asuɔmɔ yelikɛbuamɔ nɔ? Dabi, ehi jogbaŋŋ akɛ Kristofoi asafo lɛ. “Nyɔŋmɔ we” lɛ ajɛ amɛsuɔmɔ mli amɛkwɛ nɛkɛ Kristofoi anɔkwafoi ni amɛdara yɛ anɔkwale lɛ mli ni amɛnyɛɛɛ nɔ ko amɛtsu dɔŋŋ lɛ anɔ.​—1 Tim. 3: 15; 5:⁠16.

Yɛ enɛ hewɔ lɛ, Kristofonyo yoo ko ŋma akɛ: “Eyɛ mli akɛ miwu bɛ anɔkwale lɛ mli moŋ, ashi miikwɛ nyɛmiyoo ko ni eda (eye afii 86) nɔ yɛ miwu lɛ nɔkplɛmɔ naa aaafee afii ekpaa sɔŋŋ nɛ. Mina nyɛmiyoo nɛɛ he suɔmɔ waa; mibuɔ lɛ akɛ minaa. Klɛŋklɛŋ lɛ ewa, ejaakɛ efãa mɔ fɛɛ mɔ ni efee nɔ ni esumɔɔ. Shi yɛ Yehowa yelikɛbuamɔ naa lɛ, gbekɛbii lɛ po ebale enɛ.”

Nyɛminuu ko ‘hu ŋma yɛ nyɛmiyoo ko ni lɛ hu eda he akɛ: “Abaptisi lɛ be mli ni eye afii 76, yɛ be mli ni ehi shi akɛ oshija afii babaoo. Akɛni ehiɛ tsuihela hewɔ lɛ, etɔɔlɛ kɛ nyiɛmɔ ni ebiɔ ni akwɛ enɔ babaoo. Beni wɔbale lɛ lɛ, no mli lɛ eye afii 81 ni wɔdarako tsɔ ni wɔkɛ lɛ ehi shi afii babaoo yɛ biɛ. Wɔtoɔ gbɛjianɔ wɔhaa lɛ yɛ nɔ fɛɛ nɔ mli, wɔfɔɔ etadei ahe ni wɔhoɔ nii wɔhaa lɛ. Nikeenii ni fe fɛɛ ni wɔbaanyɛ wɔkɛke lɛ ji akɛ be mli ni wɔfɔ wɔbi nuu lɛ ni wɔkɛ egbɛi wolɛ.Efo ekɛɛ akɛ: ‘Agbɛnɛ etsɔ nanaa diɛŋtsɛ.’”

Mɛi krokomɛi ni yɔɔ Kristofoi asafo lɛ mli Iɛ hu baanyɛ afee babaoo ni amɛkwɛ akɛ onukpai ni yɔɔ asafo lɛ mli lɛ anine miishɛ yelikɛbuamɔ ni Yehowa Nyɔŋmɔ fa ni akɛha amɛ lɛ nɔ lo. Ani onaa akɛ hegbɛ yɛ ni obaanyɛ otsɔ nɔ owa mɛi krokomɛi yɛ nɛkɛ gbɛ nɔ?

Gbɛjianɔtoo Ni Nyɔŋmɔ Jɔɔ Nɔ

Ejeee nɔ ko bibioo akɛ mɔ aakwɛ fɔlɔi anɔ yɛ shia. Shi susumɔ nɔ ni mɛikomɛi ni fee nakai lɛ ekɛɛ lɛ he. Mɔ kome kɛɛ akɛ: “Eji odaseyeli ni ekaaa. Nyɛ ni eda ni fata weku lɛ he lɛ haa weku ekomefeemɔ lɛ yeɔ emuu.”

Kristofonyo kroko hu ŋma akɛ: “Wɔjɔɔmɔi lɛ ji akɛ wɔhiɛ esɔ wɔteŋ mɔ fɛɛ mɔ akɛ nuu kɛ eŋa, hɛɛ, wɔnyɛ wɔto wɔtsui shi yɛ enɛ mli.”

Mɔ kroko hu ŋma akɛ: “Beni awo kɛwo bahi shi lɛ no mli lɛ enyɛɛɛ efee nɔ ko nɔ ko. Shi fiofio lɛ emia ehiɛ etsu nibii yɛ weku lɛ mli ni amrɔ nɛɛ ehe ewa ni ena hewalɛ fe tsutsu.”

Mɛni obaafee kɛji akɛ ofɔlɔi enyɔ lɛ fɛɛ bafee mɛi ni helai haaa amɛnyɛ amɛtsu nɔ ko? Mɛni hewɔ otaaa shi diŋŋ ni osusu nibii fɛɛ ni fɔlɔi nɛɛ efee kɛha bo kɛjɛ ogbekɛbiiashi kɛbashi bianɛ lɛ ahe yɛ ojwɛŋmɔ mli. Bi ohe akɛ: Eji jeee amɛkulɛ nɛgbɛ miyɔɔ? Mɛɛ nɔkwɛmɔnɔ kpakpa po manyɛ mikɛha mibii kɛtsɔ kwɛmɔ ni mikɛaaha mifɔlɔi lɛ anɔ? Agbɛnɛ hu mɛni ji nɔ ni amɛtaoɔ ni mafee? Ehetoo ji akɛ: “Mɛi ni sa ejurɔfeemɔ lɛ, kaakama amɛ kɛji efeemɔ yɛ odɛŋ hewalɛ mli lɛ.”​—Abɛi 3:⁠27.

[Mfoniri ni yɔɔ baafa 3]

Yesu tuu enyɛ kwɛmɔ ewo ekaselɔ Yohane dɛŋ

[Mfoniri ni yɔɔ baafa 5]

Gbɛnaanii ka Kristofoi anɔ akɛ amɛwo amɛfɔlɔi anyɔmɔ yɛ kwɛmɔ ni amɛkɛha amɛ yɛ be mli ni amɛdarako lɛ hewɔ