Ná Miishɛɛ Beni Omɛɔ Yehowa
ANI oye aduawa ŋmilikiti pɛŋ? Ekã shi faŋŋ akɛ onyãaa bɔ ni ehà odaŋ lɛ he kwraa. Aduawa heɔ be dani etsuɔ, shi ehi jogbaŋŋ akɛ ooomɛ ni etsu dani oye. Shihilɛi komɛi hu yɛ ní kɛ́ oŋmɛ otsui shi yɛ mli lɛ, obaaná he sɛɛ waa. Biblia lɛ kɛɔ akɛ: “Ehi akɛ afee dioo amɛ Yehowa yiwalaheremɔ.” (Yaafo 3:26; Tito 2:13) Mɛɛ shihilɛi amli esa akɛ Kristofoi amɛ Yehowa? Kɛ́ wɔmɛ Yehowa lɛ, mɛɛ sɛɛ wɔbaaná?
Mɛni Mɛ ni Aaamɛ Nyɔŋmɔ lɛ Tsɔɔ?
Ákɛ Kristofoi lɛ, ‘wɔmiikwɛ gbɛ, ni wɔmiishwe Yehowa gbi lɛ baa lɛ.’ Wɔmiikpa gbɛ akɛ ebaakpɔ̃ wɔ beni ‘eeekpata gbɔmɛi ní kwá Nyɔŋmɔ lɛ ahiɛ’ lɛ. (2 Petro 3:7, 12) Yehowa diɛŋtsɛ miishwe akɛ efo efɔŋfeemɔi fɛɛ sɛɛ, shi eŋmɛ etsui shi bɔni afee ni ehere Kristofoi ayiwala yɛ gbɛ ni baawo egbɛi lɛ hiɛnyam nɔ. Biblia lɛ kɛɔ akɛ: ‘Nyɔŋmɔ miisumɔ akɛ ejie emlifu kpo etsɔɔ ni eha ale ehe ni wa lɛ, ni kɛlɛ eŋmɛɔ eyi shi babaoo ehiɛɔ mlifu nii ni sa fitemɔ lɛ; ni asaŋ ehaa aleɔ enunyam falɛ lɛ hu yɛ emɔbɔnalɛ nii ni asaa ato aha anunyam lɛ anɔ lɛ.’ (Romabii 9:22, 23) Taakɛ Yehowa fee yɛ Noa gbii lɛ amli lɛ, ele be ni sa ni ekɛaakpɔ̃ ewebii lɛ ŋmɛnɛ. (1 Petro 3:20) No hewɔ lɛ, ákɛ aaamɛ Nyɔŋmɔ lɛ biɔ ni amɛ be ni ekɛbaatsu saji ahe nii lɛ.
Beni wɔyaa nɔ wɔmɛɔ Yehowa gbi lɛ, ekolɛ bɔ ni jeŋba yaa nɔ efiteɔ yɛ je lɛŋ lɛ baaha wɔdɔmɔ ŋtsɔi bei komɛi. Yɛ bei ni tamɔ nɛkɛ mli lɛ, ehi jogbaŋŋ akɛ wɔɔsusu nɔ ni Nyɔŋmɔ gbalɔ Mika ŋma lɛ he, akɛ: “Mɔ krɔŋkrɔŋ elaaje kɛjɛ shikpɔŋ lɛ nɔ, ni anɔkwafo bɛ gbɔmɛi ateŋ.” Kɛkɛ ni ekɛfata he akɛ: “Shi mi lɛ, makwɛ Yehowa gbɛ, mamɛ miyiwalaheremɔ Nyɔŋmɔ lɛ.” (Mika 7:2, 7) Mɛni ‘mɛ ni wɔɔmɛ’ lɛ biɔ ni wɔfee? Akɛni ebɛ mlɛo ákɛ aaamɛ hewɔ lɛ, te wɔɔfee tɛŋŋ wɔná miishɛɛ beni wɔmɛɔ Nyɔŋmɔ lɛ?
Miishɛɛ ni Akɛaamɛ
Wɔbaanyɛ wɔkase su kpakpa ni akɛmɛɔ lɛ kɛjɛ Yehowa dɛŋ. Ekã he eji “miishɛɛ Nyɔŋmɔ” lolo. (1 Timoteo 1:11, NW) Ekɛ miishɛɛ mɛɔ ejaakɛ eeya nɔ eetsu eyiŋtoo akɛ ebaaha mɛi ni sumɔɔ lɛ lɛ aye emuu tamɔ bɔ ni eto yɛ shishijee mli eha adesai beni ebɔ amɛ lɛ he nii. (Romabii 5:12; 6:23) Enaa nibii kpakpai ni jɛɔ nii ni etsuɔ lɛ mli kɛbaa—mɛi akpekpei abɔ ni eke kɛba anɔkwa jamɔ mli lɛ. Yesu kɛɛ akɛ: “Mitsɛ miitsu nii kɛbashi be nɛɛ, no hewɔ ni mi hu mitsuɔ lɛ.” (Yohane 5:17) Mɛi krokomɛi ni aaaye abua amɛ lɛ ji nɔ̃ titri ni haa anáa miishɛɛ. (Bɔfoi lɛ Asaji 20:35) Yɛ nakai gbɛ nɔ nɔŋŋ lɛ, anɔkwa Kristofoi taaa shi efolo amɛmɛɛɛ. Yɛ no najiaŋ lɛ, amɛyaa nɔ amɛyeɔ amɛbua mɛi krokomɛi koni amɛkase Nyɔŋmɔ yiŋtoo kɛha adesai lɛ he nii.
Anɔkwafoi etee nɔ amɛná he miishɛɛ akɛ amɛaajie Nyɔŋmɔ yi beni amɛmɛɔ lɛ ni etsu saji ahe nii lɛ. Ákɛ nɔkwɛmɔnɔ lɛ, susumɔ lalatsɛ David he okwɛ. Maŋtsɛ ni David sɔmɔɔ lɛ lɛ wa lɛ yi, enaanyo ni bɛŋkɛ lɛ kpaakpa tsɔɔ esɛɛ gbɛ, ni ebi te shi ewo lɛ. Yɛ shihilɛi nɛɛ eko fɛɛ eko mli lɛ, ani David ná miishɛɛ beni emɛɔ Yehowa be ní eto ni ekɛbaajie lɛ lɛ? Lala 71 lɛ ni ekã shi faŋŋ akɛ David ji mɔ ni ŋma lɛ kɛɔ akɛ: “Shi mi lɛ, maŋmɛ mitsui shi daa, ni maha oyijiemɔ lɛ afa kɛya nɔ. Minaabu aaagba ojalɛ lɛ kɛ oyiwalaheremɔ lɛ he sane daanɛɛ.” (Lala 71:14, 15) Yɛ nɔ najiaŋ ni David kɛ nijiaŋwujee aaamɛ lɛ, ekɛ ebe fɛɛ tsu nii kɛjie Yehowa yi ni ewo mɛi krokomɛi hewalɛ yɛ anɔkwa jamɔ mli, ni no ha ená miishɛɛ.—Lala 71:23.
Anyɛŋ akɛ mɛ ni amɛɔ Yehowa lɛ ato bɔ ni akɛ tsuiyeli mɛɔ tsɔne ko ní ekpe sɛɛ lɛ he. Shi abaanyɛ akɛto miishɛɛ ni fɔlɔi kɛmɛɔ beni amɛbi daa ebatsɔɔ onukpa ní amɛbaanyɛ amɛkɛ lɛ ashi amɛtsitsi lɛ he. Nibii babaoo yɛ ni fɔlɔi nɛɛ baatsu—nitsɔɔmɔ, gbɛtsɔɔmɔ, kɛ tsɔsemɔ—koni gbekɛ lɛ ada kɛbatsɔ gbɔmɔ kpakpa. Yɛ nakai gbɛ nɔ nɔŋŋ lɛ, wɔ mɛi ni wɔmɛɔ Yehowa lɛ naa miishɛɛ yɛ yelikɛbuamɔ ni wɔkɛhaa mɛi krokomɛi koni amɛtsi amɛbɛŋkɛ Nyɔŋmɔ lɛ mli. Wɔ hu wɔmiisumɔ ni Nyɔŋmɔ akpɛlɛ wɔ nɔ, koni yɛ naagbee lɛ ehere wɔyiwala.
Wɔnijiaŋ Ejeee Wui
Ákɛ aaamɛ Yehowa lɛ tsɔɔ akɛ esa akɛ wɔya nɔ wɔsumɔ lɛ, ní wɔsɔmɔ lɛ daa ní wɔnijiaŋ akaje wui. Enɛ baanyɛ afee nɔ ni wa. Ŋmɛnɛ, Nyɔŋmɔ tsuji babaoo yɛ akutsei ni ayeɔ mɔ fɛɛ mɔ ni hiɔ shi akɛ eyɛ hemɔkɛyeli yɛ Nyɔŋmɔ shiwooi amli lɛ ahe fɛo lɛ amli. Shi kɛlɛ, susumɔ Israelbii anɔkwafoi ni tee nɔ amɛná hiɛnɔkamɔ beni aŋɔ amɛ nom afii 70 kɛtee Babilon lɛ anɔkwɛmɔnɔ lɛ he okwɛ. Mɛni ye kɛbua amɛ ni amɛfee nakai? Ŋwanejee ko kwraa bɛ he akɛ lalai lɛ ni amɛkane lɛ wo amɛ hewalɛ. Lalai ni ekolɛ ewo amɛ hewalɛ yɛ nakai beaŋ lɛ ateŋ ekome kɛɔ akɛ: “Ewiemɔ lɛ nɔ mihiɛ kã. Misusuma miimɛ Nuŋtsɔ lɛ fe bɔ ni bulɔi mɛɔ jetsɛremɔ, fe bɔ ni bulɔi mɛɔ jetsɛremɔ. Israel, ŋɔɔ ohiɛ ofɔ̃ Yehowa nɔ!”—Lala 130:5-7.
Yudafoi ni tee nɔ amɛkane amɛhiɛnɔkamɔ lɛ he sane, ní amɛwie he lɛ anijiaŋ ejeee wui, ni ajɔɔ amɛ beni akpata Babilon hiɛ lɛ. Yudafoi akpekpei abɔ ku amɛsɛɛ kɛtee Yerusalem oya nɔŋŋ. Aŋma yɛ nakai gbii lɛ ahe akɛ: “Beni Yehowa kpala Zion nomii lɛ kɛba lɛ, . . . wɔdaŋ yimɔ obɔbɔ kɛ ŋmɔlɔ.” (Lala 126:1, 2) Nakai Yudafoi lɛ anijiaŋ ejeee wui, shi amɛtee nɔ amɛwaje amɛhemɔkɛyeli lɛ. Ni amɛlá kɛjie Yehowa yi ni amɛfɔ̃ɔɔ.
Nakai nɔŋŋ hu anɔkwa Kristofoi ni mɛɔ Nyɔŋmɔ yɛ “je nɛŋ naagbee” be lɛ mli lɛ bɔɔ mɔdɛŋ akɛ amɛwaje amɛhemɔkɛyeli lɛ be fɛɛ be. Amɛkaseɔ Nyɔŋmɔ Wiemɔ lɛ, amɛwoɔ amɛhe hewalɛ, ni amɛyaa nɔ amɛjieɔ Yehowa yi kɛtsɔ e-Maŋtsɛyeli lɛ he sanekpakpa lɛ shiɛmɔ nɔ.—Mateo 24:3, 14.
Mɛ ni Wɔɔmɛ Bɔni Afee ni Wɔná Tsɔsemɔ He Sɛɛ
Nyɔŋmɔ gbalɔ Yeremia ŋma akɛ: “Ehi akɛ afee dioo amɛ Yehowa yiwalaheremɔ.” (Yaafo 3:26) Yeremia miitsɔɔ akɛ, esaaa akɛ Nyɔŋmɔ webii lɛ wieɔ amɛshiɔ gbɛ ni Yehowa tsɔ nɔ egbala amɛtoi beni eha akpata Yerusalem hiɛ lɛ. Yɛ no najiaŋ lɛ, esa akɛ amɛkase nii kɛjɛ nɔ ni ba lɛ mli, kɛtsɔ amɛtoigbele gbɛ̀i lɛ anɔ ni amɛaajwɛŋ ni amɛtsake amɛsubaŋ lɛ nɔ.—Yaafo 3:40, 42.
Abaanyɛ akɛ bɔ ni wɔnáa Yehowa tsɔsemɔ he sɛɛ lɛ ato bɔ ni aduawa tsuɔ lɛ he. Biblia lɛ wie tsɔsemɔ ni Nyɔŋmɔ kɛhaa lɛ he akɛ: “Ewoɔ hejɔlɛ yibii ní ji jalɛ lɛ ehaa mɛi ní etsɔ nɔ ekase nɔ ko lɛ.” (Hebribii 12:11) Taakɛ bɔ ni aduawa heɔ be dani etsuɔ lɛ, nakai nɔŋŋ wɔsubaŋ ni wɔɔtsake yɛ tsɔsemɔ ni Nyɔŋmɔ kɛhaa wɔ lɛ naa lɛ baahe be. Ákɛ nɔkwɛmɔnɔ lɛ, kɛ́ jeŋba gbonyo ko ni wɔba ha ahe sɔɔmɔ hegbɛ ko yɛ wɔdɛŋ yɛ asafo lɛ mli lɛ, shwelɛ ni wɔyɔɔ akɛ wɔɔmɛ Nyɔŋmɔ lɛ baaye abua wɔ koni wɔnijiaŋ akɛje wui. Yɛ shihilɛi ni tamɔ nakai mli lɛ, wɔbaanyɛ wɔná hewalɛwoo kɛjɛ David wiemɔ ni jɛ mumɔŋ nɛɛ mli akɛ: “Ejaakɛ hiŋmɛitswaa kɛkɛ emlifu lɛ hiɔ shi, shi emlihilɛ lɛ hiɔ shi ewalabe fɛɛ mli; yaafo batoɔ mɔ gbɛkɛ, shi leebi lɛ miishɛɛ baa!” (Lala 30:6) Kɛ́ wɔŋmɛ wɔtsui shi, ni wɔkɛ ŋaawoo ni akɛhaa wɔ kɛjɛɔ Nyɔŋmɔ Wiemɔ lɛ kɛ esafo lɛ mli lɛ tsu nii lɛ, be baashɛ ni wɔbaaná “miishɛɛ.”
Mumɔŋ Dalɛ Heɔ Be
Kɛ́ oji oblanyo loo mɔ ko ni abaptisi bo etsɛko lɛ, ekolɛ obaasumɔ ni oná sɔɔmɔ hegbɛi komɛi yɛ Kristofoi asafo lɛ mli. Shi eheɔ be dani mɔ ko náa mumɔŋ salɛ ni baaha enyɛ etsu gbɛnaa nii ni tamɔ nɛkɛ lɛ ahe nii. No hewɔ lɛ, okɛ hegbɛ ni oná amrɔ nɛɛ atsu nii kɛya ohiɛ yɛ mumɔŋ. Ákɛ nɔkwɛmɔnɔ lɛ, oblahiiaŋ gbii lɛ ji be ni sa jogbaŋŋ ní obaanyɛ okɛkane Biblia muu lɛ fɛɛ, oná Kristofoi asui, ni okase bɔ ni afeɔ kaselɔi ahaa. (Jajelɔ 12:1) Kɛ́ okɛ heshibaa ŋmɛ otsui shi lɛ, Yehowa baaha oná sɔɔmɔ hegbɛi babaoo yɛ be ni sa mli.
Kaselɔ feemɔ nitsumɔ lɛ hu biɔ tsuishitoo. Taakɛ bɔ ni okwaafonyo yaa nɔ eshwieɔ eŋmɔshi nii anɔ nu kɛyashiɔ beni Nyɔŋmɔ haa eshwereɔ lɛ, nakai nɔŋŋ kaselɔ feemɔ nitsumɔ lɛ ji. (1 Korintobii 3:7; Yakobo 5:7) Ebiɔ ni wɔkɛ nyɔji babaoo loo afii po ato wɔtsui shi ni wɔkɛ mɛi krokomɛi akase Biblia lɛ dani amɛná Yehowa mli hemɔkɛyeli ní amɛjie hiɛsɔɔ kpo amɛtsɔɔ lɛ. Mɛ ni wɔɔmɛ Yehowa lɛ biɔ ni wɔto wɔtsui shi kɛ́ nikaselɔi lɛ kɛ nɔ ni wɔkɛ amɛ kaseɔ lɛ tsuuu nii yɛ shishijee mli po. Kɛ́ hiɛsɔɔ fioo ko pɛ kpo amɛjie po lɛ, no baanyɛ atsɔɔ akɛ Yehowa mumɔ lɛ miiná amɛnɔ hewalɛ. Kɛ́ oto otsui shi lɛ, ekolɛ Yehowa baaha onikaselɔ lɛ abatsɔ Kristo kaselɔ, ni omii baashɛ ohe.—Mateo 28:20.
Jiemɔ Suɔmɔ Kpo Kɛtsɔ Mɛ ni Ooomɛ lɛ Nɔ
Nyɛmi yoo onukpa ko ni yɔɔ Andes shia ŋa lɛ nɔ yɛ South America lɛ shihilɛ he susumɔ baaha ona akɛ mɛ ni mɔ ko aaamɛ lɛ baanyɛ atsɔɔ akɛ mɔ lɛ yɛ suɔmɔ kɛ hekɛnɔfɔɔ. Ekɛ nyɛmi yoo ko ni lɛ hu eji Kristofonyo lɛ pɛ ji Yehowa Odasefoi yɛ amɛkrowa lɛŋ. Kwɛ bɔ ni amɛkɛ miishɛɛ baakwɛ amɛnanemɛi Kristofoi lɛ asaramɔ gbɛ. Be ko lɛ, nɔkwɛlɔ gbɛfalɔ ko ní miiya eyasara amɛ klɛŋklɛŋ kwraa lɛ dũ gbɛ. Enɛ hewɔ lɛ, ehe bahia ni esaa eku esɛɛ kɛya he ni eje gbɛfãa lɛ shishi kɛjɛ lɛ, ni enɛ he lɛ ŋmɛlɛtswai babaoo. Beni yɛ naagbee lɛ ena akrowa lɛ yɛ shɔŋŋ lɛ, no mli lɛ atswa fe maŋkɛ ŋmɛlɛ 12. Beni ena akɛ kane ko miikpɛ lɛ, efee lɛ naakpɛɛ ejaakɛ sarawa hewalɛ bɛ jɛmɛ. Emii shɛ ehe waa beni eshɛ akrowa lɛ klotia ni ena akɛ nyɛmi yoo onukpa lɛ ji mɔ ni hiɛ osɔnɔ kɛdamɔ jɛmɛ lɛ! Nyɛmi yoo lɛ le akɛ bɔ fɛɛ bɔ ni fee lɛ nɔkwɛlɔ lɛ baaba, no hewɔ lɛ eemɛ.
Kɛ́ wɔná tsuishitoo ni tamɔ nɛkɛ lɛ, wɔbaaná miishɛɛ beni wɔmɛɔ Yehowa lɛ. Wɔle akɛ bɔ fɛɛ bɔ ni fee lɛ, ebaaye eshiwoi anɔ. Ni taakɛ eji yɛ nɔkwɛlɔ gbɛfalɔ lɛ gbɛfaŋ lɛ, wɔhiɛ sɔɔ mɛi ni jɛɔ suɔmɔ mli amɛmɛɔ wɔ lɛ. Belɛ, ebɛ naakpɛɛ mɔ akɛ Nyɔŋmɔ hiɛ sɔɔ mɛi ni mɛɔ lɛ lɛ. Biblia lɛ kɛɔ akɛ: “Yehowa mii shɛɔ . . . mɛi ni hiɛ kã emɔbɔnalɛ nɔ lɛ.”—Lala 147:11.
[Mfoniri ni yɔɔ baafa 18]
Mɛi ni kɛ amɛbe fɛɛ jieɔ Nyɔŋmɔ yi lɛ náa miishɛɛ akɛ amɛaamɛ Yehowa