Nyɛyaa Nɔ Nyɛtswaa Nyɛhe Nyɛmaa Shi
“Wiemɔ sha ko wiemɔ sha ko akaje nyɛnaa kwraa; shi moŋ wiemɔ ni hi ni ehia, koni eha mɔ nane amɔ shi.”—EFESOBII 4:29.
1, 2. (a) Mɛni hewɔ abaanyɛ akɛɛ yɛ gbɛ ni ja nɔ akɛ wiemɔ ji naakpɛɛ nii lɛ? (b) Mɛɛ kɔkɔbɔɔ ni kɔɔ bɔ ni wɔkɛ wɔlilɛi tsuɔ nii haa lɛ he lɛ sa jogbaŋŋ?
“WIEMƆ ji ŋkunyaayeli kpãa ni fimɔɔ nanemɛi, wekui kɛ gbɔmɛi asafoi efeɔ amɛ ekome . . . Adesa jwɛŋmɔ lɛ mli ejɛɔ kɛ bɔ ni [lilɛi lɛ mli] fãji lɛ tsɔmɔɔ lɛ ehaa lɛ nɔ wɔtsɔɔ wɔfeɔ gbɛɛmɔi ni kanyaa suɔmɔ, hiɛkɔɔ, bulɛ—yɛ anɔkwale mli lɛ adesa henumɔi fɛɛ.”—Hearing, Taste and Smell.
2 Wɔlilɛi lɛ feɔ babaoo fe henɔ ni haa amiɔ nii loo asaa nii anaa; eji wɔnyɛmɔ ni haa wɔnyɛɔ wɔtsɔɔ bɔ ni wɔsusuɔ ni wɔnuɔ nii ahe wɔhaa lɛ fa. Yakobo ŋma akɛ: “Lilɛi hu, henɔ bibioo ni. No nɔŋŋ wɔkɛjɔɔ Nuŋtsɔ [Yehowa] kɛ Tsɛ lɛ, ni nɔŋŋ hu wɔkɛ-lomɔɔ gbɔmɛi ni abɔ ‘yɛ Nyɔŋmɔ subaŋ nɔ’ lɛ.” (Yakobo 3:5, 9) Hɛɛ, wɔbaanyɛ ni wɔkɛ wɔlilɛii atsu nii yɛ gbɛi kpakpai anɔ, tamɔ yɛ Yehowa yijiemɔ mli. Shi akɛni wɔyeee emuu hewɔ lɛ, wɔbaanyɛ ni wɔkɛ wɔlilɛii atsu nii ni wɔkɛwie wiemɔi ni yeɔ awui loo esaaa yɛ gbɛ ni waaa kwraa nɔ. Yakobo ŋma akɛ: “Minyɛmimɛi, enɛɛmɛi nɛɛ, esaaa akɛ ebaa lɛ nɛkɛ.”—Yakobo 3:10.
3. Mɛɛ wɔwiemɔ he nibii sɔrɔtoi enyɔ esa akɛ wɔgbala wɔjwɛŋmɔ kɛya nɔ?
3 Yɛ be mli ni adesa ko nyɛŋ aye elilɛi nɔ yɛ emuuyeli mli lɛ, esa akɛ wɔbɔ mɔdɛŋ ni wɔya hiɛ yɛ nakai feemɔ mli. Bɔfo Paulo woɔ wɔ ŋaa akɛ: “Wiemɔ sha ko wiemɔ sha ko akaje nyɛnaa kwraa; shi moŋ wiemɔ ni hi ni ehia, koni eha mɔ nane amɔ shi, ni akɛduro mɛi ni nuɔ lɛ.” (Efesobii 4:29) Kadimɔ akɛ akwɛɔ nɛkɛ famɔ nɛɛ yɛ gbɛi enyɔ nɔ: nɔ ni esa akɛ wɔbɔ mɔdɛŋ ni wɔkwa, kɛ nɔ ni esa akɛ wɔbɔ mɔdɛŋ ni wɔfee. Nyɛhaa wɔsusuɔ gbɛi enyɔ nɛɛ fɛɛ he.
Kwa Wiemɔ Sha
4, 5. (a) Mɛɛ mple Kristofoi shiɔ yɛ yakayaka wiemɔ he? b) Mɛɛ mfoniri baanyɛ afee nɔ ni sa “wiemɔ sha”?
4 Klɛŋklɛŋ lɛ, Efesobii 4:29 woɔ wɔ hewalɛ akɛ: “Wiemɔ sha ko wiemɔ sha ko akaje nyɛnaa kwraa.” Ekolɛ enɛ feemɔ efeŋ nɔ ni yɔɔ mlɛo. Yiŋtoo kome ji akɛ yakayaka wiemɔ egbɛ eshwa jeŋ ni ebɔle wɔhe kɛkpe lɛ mli fɛɛ. Obalaŋtai Kristofoi pii nuɔ yakayaka wiemɔi nɛɛ daa gbi, ejaakɛ nanemɛi skulbii baasusu akɛ emaa wiemɔ nɔ mi loo ehaa amɛfeɔ mɛi ni yɔɔ hewalɛ. Wɔnyɛŋ wɔkwa wiemɔi gbohii nɛɛ anumɔ kwraa, shi wɔbaanyɛ, ni esa akɛ wɔbɔ mɔdɛŋ diɛŋtsɛ koni eko akaka wɔhe. Amɛbɛ gbɛhe yɛ wɔjwɛŋmɔ loo daaŋ.
5 Yiŋtoo titri ni yɔɔ Paulo kɔkɔbɔɔ nɛɛ sɛɛ ji Hela wiemɔ ko ni kɔɔ loo ni efite loo aduawa ni ekpɔtɔ he. Feemɔ enɛ he mfoniri okwɛ: Oona ni nuu ko tsui miite shi ni agbɛnɛ emli bafu waa. Yɛ naagbee lɛ efɛ́ kɛ mlila ni ona ni loo ko ni ekpɔtɔ ni esha miifa kpo kɛmiijɛ edaaŋ. Agbɛnɛ ona ni aduawa ni esha ni miije fu jɛ edaaŋ bagbee shi ni efɛ eshwie gbɔmɛi ni bɛŋkɛ jɛmɛ lɛ fɛɛ he. Namɔ ji nɛkɛ nuu nɛɛ? Kwɛ wɔtsui ni baafa kɛ eji wɔteŋ mɔ ko! Ni kɛlɛ mfoniri ni tamɔ nɛkɛ baasa wɔ, kɛ ‘wɔha wiemɔi shara jɛ wɔnaa.’
6. Efesobii 4:29 kɔɔ nii ahe ni awieɔ nyanyaanya ni ehiii lɛ he yɛ mɛɛ gbɛ nɔ?
6 Gbɛ kroko ni abaanyɛ akɛ Efesobii 4:29 atsu nii ji ni wɔkwa nii ahe wiemɔ nyanyaanya be fɛɛ be. Wɔkpɛlɛɔ nɔ akɛ, mɔ fɛɛ mɔ yɛ nɔ ni esusuɔ yɛ nibii ni esumɔɔɔ loo ekpɛlɛɛɛ nɔ lɛ he, shi ani okɛ mɔ ni wieɔ nibii ni ejaaa babaoo (loo ewieɔ wiemɔi pii) yɛ mɔ fɛɛ mɔ he, yɛ he fɛɛ he, loo nɔ ni aaatsi ta pɛ lɛ he lɛ ehi shi da? (Okɛto Romabii 12:9; Hebribii 1:9 he.) Ewiemɔ fiteɔ nii, ehaa mɔ yeɔ awerɛho, loo ekpataa nii ahiɛ. (Lala 10:7; 64:2-4; Abɛi 16:27; Yakobo 4:11, 12) Ekolɛ enyɛŋ eyoo bɔ ni etamɔ mɛi ni wieɔ shiɔ nii ni Maleaki tsɔɔ bɔ ni amɛji lɛ eha. (Maleaki 3:13-15) Kwɛ bɔ ni etsui baafa aha akɛ mɔ ni damɔ shi kwɛɔ lɛ lɛ aaakɛɛ lɛ akɛ loo ni miije fu kɛ aduawa ni esha miijɛ edaaŋ miishwie shi!
7. Mɛɛ hekaa-kɛ-kwɛmɔ loo mlipɛimɔ esa akɛ wɔteŋ mɔ fɛɛ mɔ afee?
7 Yɛ be mli ni ewaaa akɛ wɔɔyoo kɛ mɔ kroko wieɔ nibii ni ejaaa loo ewieɔ eshiɔ nii be fɛɛ be lɛ, kɛlɛ bi ohe akɛ, ‘Ani mitamɔ nakai? Ani mifeɔ nakai lɛlɛŋ?’ Ebaafee nɔ ni nilee yɔɔ mli akɛ wɔɔsusu su loo mumɔ ni yɔɔ wɔ wiemɔi asɛɛ lɛ he yɛ be kɛ bei amli. Ani amɛji nɔ ni ehiii titri, nɔ ni wieɔ shiɔ nii? Ani wɔtamɔ Hiob nanemɛi apasa miishɛjelɔi etɛ lɛ? (Hiob 2:11; 13:4, 5; 16:2; 19:2) Mɛni hewɔ otaooo nɔ ni hi koni otsi no ta? Kɛ sanegbaa ko ji nɔ ni wieɔ shiɔ nii be fɛɛ be lɛ, mɛni hewɔ okudɔɔɔ enɛ ni okɛya sanegbaa ni tswaa mɔ emaa shi he?
8. Mɛɛ nikasemɔ Maleaki 3:16 kɛhaa yɛ wiemɔ he, ni te wɔɔfee tɛŋŋ wɔtsɔɔ akɛ wɔkɛ ŋaawoo lɛ miitsu nii?
8 Maleaki kɛ sɔrɔto-feemɔ nɛɛ ha: “Kɛkɛ ni mɛi ni sheɔ Yehowa gbeyei lɛ kɛ amɛhe wie, ni Yehowa bo toi, ni enu, ni aŋma kaimɔ wolo yɛ ehiɛ aha mɛi ni sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ.” (Maleaki 3:16) Ani okadi bɔ ni Nyɔŋmɔ hereɔ wiemɔ ni tswaa mɔ emaa shi lɛ nɔ lɛ? Te sanegbaa ni tamɔ nɛkɛ baanyɛ asa mɛi ni kɛ amɛhe bɔɔ lɛ ahe aha tɛŋŋ? Wɔbaanyɛ wɔkase nii kɛjɛ wɔdaa gbi wiemɔi amli diɛŋtsɛ. Kwɛ bɔ ni ebaanyɛ efee nɔ ni hi kɛha wɔ kɛ mɛi krokomɛi kɛji wɔsanegbaa jieɔ ‘yijiemɔ afɔlei ni wɔshaa wɔhaa Nyɔŋmɔ’ lɛ kpo.—Hebribii 13:15.
Bɔɔ Mɔdɛŋ Otswa Mɛi Krokomɛi Oma Shi
9. Mɛni hewɔ Kristofoi akpeei ji bei ni hi jogbaŋŋ ni amɛkɛaatswa mɛi ama shi loo aha amɛnane amɔ shi lɛ?
9 Asafoŋ kpeei ashishi ji he ni hi fe fɛɛ ni wɔkɛaawie ‘nɔ fɛɛ nɔ ni hi ni aaaha mɛi ni nuɔ lɛ anane amɔ shi’ lɛ ahe. (Efesobii 4:29) Wɔbaanyɛ wɔfee nakai yɛ be mli ni wɔhaa Biblia mli saji ahe wiemɔ ko, beni wɔkɛ wɔhe woɔ nɔkwɛmɔ nɔ ko feemɔ mli, loo beni wɔhaa sanebimɔi ahetoo lɛ. Wɔkɛ enɛ haa Abɛi 20:15 baa mli: “Nilee naabu lɛ, jwine ni jara wa ni.” Ni namɔ le tsuii abɔ ni wɔwiemɔ saa he loo etswaa amɛ emaa shi?
10. Yɛ be mli ni wɔsusu mɛi ni wɔkɛ amɛ fɔɔ sanegbaa lɛ he lɛ, mɛɛ tsakemɔi baafee nɔ ni sa? (2 Korintobii 6:12, 13)
10 Dani kpeei aaaje shishi kɛ kpamɔ sɛɛ ji be ni hi jogbaŋŋ ni akɛ sanegbaa ni haa mɛi ni nuɔ lɛ nane mɔɔ shi haa mɛi. Ewaaa akɛ wɔkɛ nɛkɛ be nɛɛ aaafee be ni wɔkɛ wekumɛi kɛ nanemɛi fioo ni bɛŋkɛ wɔ kpaakpa ni wɔnaa amɛhe miishɛɛ lɛ gbaa sane. (Yohane 13:23; 19:26) Shi, yɛ Efesobii 4:29 kɛ gbeekpamɔ naa lɛ, mɛni hewɔ otaooo mɛi krokomɛi ni okɛ amɛ agba sane? (Okɛto Luka 14:12-14 he.) Wɔbaanyɛ wɔtsɔ hiɛ wɔsusu he koni wɔwie pii fe “oshwiee” kɛkɛ ni wɔkɛŋaa mɛi heei komɛi, mɛi ni amɛdara yɛ afii amli, loo obalaŋtai lɛ, ni wɔkɛ gbekɛbii lɛ po atara shi ni wɔkɛ amɛ agba sane yɛ amɛŋɛlɛ nɔ. Miishɛɛ diɛŋtsɛ ni wɔjieɔ lɛ kpo yɛ amɛhe kɛ wiemɔi ni haa mɔ nane mɔɔ shi bei nɛɛ baaha mɛi krokomɛi babaoo anyɛ awie kɛ David henumɔ ni yɔɔ Lala 122:1 lɛ.
11. (a) Mɛɛ su mɛi pii ena yɛ shitaramɔ he? (b) Mɛni hewɔ mɛi komɛi jeɔ gbɛ amɛtsakeɔ amɛshitaramɔ hei amli lɛ?
11 Nɔ kroko ni yeɔ buaa sanegbaa ni tswaa mɔ maa shi hu ji ni wɔɔtsake wɔshitaramɔ hei yɛ kpeei ashishi lɛ mli. Ehe miihia ni nyɛ ni haa bi fufɔ lɛ ata shinaa naa loo sɛɛ gbɛ, ni obubuafo hu baanyɛ ata sɛii ni ato lɛ naabu gbɛ, shi wɔ mɛi ni wɔshwɛ lɛ hu? Su ko kɛkɛ baaha wɔku sɛɛ wɔyatara hei pɔtɛɛ komɛi; loofɔlɔ po kuɔ esɛɛ kɛyaa eshibumɔ he yɛ henumɔ naa. (Yesaia 1:3; Mateo 8:20) Eyɛ faŋŋ akɛ, akɛni wɔbaanyɛ wɔtara he fɛɛ he hewɔ lɛ, mɛni hewɔ wɔtsakeee wɔshitaramɔ hei lɛ amli—ninejurɔgbɛ, abɛkugbɛ, hiɛ gbɛ kɛ hei krokomɛi—koni onyɛ ole mɛi krokomɛi lɛ jogbaŋŋ? Yɛ be mli ni mla ko bɛ akɛ wɔfee enɛ lɛ, onukpai lɛ kɛ mɛi ni amɛdara yɛ mumɔŋ lɛ ateŋ mɛi komɛi ni tsakeɔ amɛshitaramɔ hei lɛ ena akɛ efeɔ mlɛo kɛhaa amɛ akɛ amɛkɛ nɔ ni hi aaaha mɛi pii koni amɛnane amɔ shi fe mɛi fioo ko ni ji nanemɛi ni bɛŋkɛ amɛ lɛ pɛ.
Tswaa Mɛi Oma shi yɛ Nyɔŋmɔ Gbɛ Nɔ
12. Mɛɛ su ni esaaa ajie lɛ kpo yɛ yinɔsane be fɛɛ mli?
12 Esa akɛ suɔmɔ ni Kristofonyo lɛ yɔɔ akɛ eeetswa mɛi krokomɛi ema shi lɛ atsirɛ lɛ ni ekase Nyɔŋmɔ yɛ enɛ mli moŋ fe ni eeenyiɛ adesa su ni haa afeɔ mlai babaoo lɛ sɛɛ.a Jeeŋmɔ beebe adesa jɛ esumɔ akɛ eeeye mɛi ni ebɔle ehe kɛkpe lɛ anɔ, ni Nyɔŋmɔ tsuji lɛ ateŋ mɛi komɛi po kɛ amɛhe eha nifeemɔ ni tamɔ nɛkɛ. (1 Mose 3:16; Jajelɔ 8:9) Yɛ Yesu gbii lɛ amli lɛ, Yudafoi ni ji jamɔ mli hiɛnyiɛlɔi lɛ ‘fimɔɔ jatsui ni tsii amɛkɛtereɔ mɛi, shi amɛ diɛŋtsɛ lɛ amɛkɛ amɛwao kome etaaa he.’ (Mateo 23:4) Amɛha kusumii ni naagba ko bɛ he lɛ batsɔmɔ blema saji ni anyɛɔ mɔ nɔ koni aye nɔ. Akɛni amɛsusuɔ adesai akpɔi loo mlai ahe babaoo fe nine hewɔ lɛ, amɛku amɛhiɛ amɛshwie nibii ni Nyɔŋmɔ buɔ akɛ amɛhe hiaa titri lɛ anɔ. Mlai babaoo ni amɛfee ni damɔɔɔ Ŋmalɛ nɔ lɛ etswaaa mɔ ko emaaa shi ni ehaaa mɔ ko nane amɔ shi; eka shi faŋŋ akɛ amɛgbɛ jeee Nyɔŋmɔ gbɛ.—Mateo 23:23, 24; Marko 7:1-13.
13. Mɛni hewɔ esaaa akɛ atoɔ mlai babaoo he gbɛjianɔ ahaa nanemɛi Kristofoi lɛ?
13 Kristofoi miisumɔ diɛŋtsɛ ni amɛkɛ amɛhe akpɛtɛ ŋwɛi mlai ahe. Eyɛ mli akɛ ekolɛ wɔbaanyɛ wɔfee mɛi ni feɔ mlai ni tsii. Mɛni hewɔ? Nɔ kome ji akɛ, taomɔ nii loo Suɔmɔnaa nii yɛ sɔrɔto, no hewɔ lɛ, mɛi komɛi baasumɔ nɔ ni mɛi krokomɛi sumɔɔɔ ni amɛnuɔ he akɛ esa akɛ afo mli lɛ. Esoroɔ Kristofoi hu, yɛ amɛnɔyaa ni kɛ amɛ yaa mumɔŋ dalɛ mli lɛ he. Shi ani mlai babaoo feemɔ ji Nyɔŋmɔ gbɛ ni atsɔɔ nɔ akɛyeɔ abuaa mɔ koni mɔ lɛ ashwere kɛya mumɔŋ dalɛ mli? (Filipibii 3:15; 1 Timoteo 1:19; Hebribii 5:14) Kɛji akɛ mɔ ko miidi gbɛ ko ni tamɔ nɔ ni yɔɔ keketee loo oshara yɔɔ mli po sɛɛ lɛ, ani mla ni afeɔ akɛtsiɔ lɛ gbɛ lɛ ji enaa tsabaa ni hi fe fɛɛ? Nyɔŋmɔ gbɛ ji ni mɛi ni he esa lɛ abɔ mɔdɛŋ ni amɛsaa mɔ ni tɔ̃ɔ lɛ kɛtsɔ mlijɔlɛ gbɛ ni amɛaatsɔ nɔ amɛkɛ lɛ asusu saji ahe lɛ nɔ.—Galatabii 6:1.
14. Mɛɛ yiŋtoi ahe nii mlai ni Nyɔŋmɔ kɛha Israel lɛ tsu?
14 Lɛlɛŋ, yɛ be mli ni Nyɔŋmɔ kɛ Israelbii lɛ tsuɔ nii akɛ ewebii lɛ, eto mlai ohai abɔ ni kɔɔ sɔlemɔwe jamɔ, afɔleshaai, kɛ hetsemɔ po he. Enɛ sa jogbaŋŋ kɛha maŋ ni esoro lɛ kwraa lɛ, ni mlai lɛ pii tsɔɔ nɔ ko yɛ gbalɛ mli, ni eye ebua koni enyiɛ Yudafoi lɛ ahiɛ kɛya Mesia lɛ ŋɔɔ. Paulo ŋma akɛ: “Mla lɛ etsɔ wɔtsɔselɔ kɛmiiya Kristo ŋɔɔ, koni hemɔkɛyeli mli abu wɔ bem yɛ. Shi ni hemɔkɛyeli ba nɛɛ, wɔbɛ tsɔselɔ lɛ shishi dɔŋŋ.” (Galatabii 3:19, 23-25) Beni afo Mla lɛ mli yɛ sɛŋmɔtso lɛ nɔ lɛ sɛɛ lɛ, Nyɔŋmɔ kɛ mlai babaoo ni ato naa ni kɔɔ shihilɛ mli nibii babaoo he haaa Kristofoi lɛ, tamɔ nɔ ni nomɛi ji gbɛ ni aaatsɔ nɔ atswa amɛ ama shi yɛ hemɔkɛyeli mli.
15. Mɛɛ gbɛtsɔɔmɔ Nyɔŋmɔ kɛha ejalɔi ni ji Kristofoi?
15 Shi, wɔjeee mɛi ni bɛ mla. Nyɔŋmɔ woɔ wɔ kita akɛ wɔtsi wɔhe kɛjɛ wɔŋjamɔ, ajwamaŋbɔɔ kɛ gbalafitemɔ, kɛ la ni akɛtsuɔ nii yɛ gbɛ fɔŋ nɔ lɛ he. Eje gbɛ egu gbɔmɔgbee, amale, mumɔi atsɛmɔ kɛ eshafeemɔi krokomɛi (Bɔfoi lɛ Asaji 15:28, 29; 1 Korintobii 6:9, 10; Kpojiemɔ 21:8) Ni ekɛ ŋaawoo ni mli ka shi faŋŋ haa yɛ saji pii ahe yɛ e-Wiemɔ lɛ mli. Ni kɛlɛ, gbɛnaa nii ka wɔnɔ akɛ wɔkase ni wɔkɛ Biblia mli shishitoo mlai atsu nii babaoo fe bɔ ni eji yɛ Israelbii lɛ agbɛfaŋ. Onukpai lɛ baanyɛ atswa mɛi krokomɛi ama shi kɛtsɔ yelikɛbuamɔ ni amɛkɛaaha amɛ ni amɛna ni amɛsusu nɛkɛ shishitoo mlai nɛɛ ahe fe ni amɛaatao loo amɛfee mlai kɛkɛ lɛ nɔ.
Onukpai ni Tswaa Mɔ Maa Shi
16, 17. Mɛɛ nɔkwɛmɔ nɔ kpakpa bɔfoi lɛ fee amɛfɔ shi yɛ mlai ni afeɔ ahaa nanemɛi jalɔi lɛ mli?
16 Paulo ŋma akɛ: “Shi yɛ he ni wɔshwere kɛyashɛ lɛ fɛɛ sɛɛ lɛ, nyɛhaa wɔnyiɛa jogbaŋŋ yɛ nɛkɛ susumɔ kpãa nɛɛ nɔŋŋ naa.” (Filipibii 3:16, New World Translation) Yɛ nakai nikwɛmɔ yɛ Nyɔŋmɔ gbɛ nɔ nɛɛ naa lɛ, bɔfo lɛ kɛ mɛi krokomɛi ye yɛ gbɛ ni tswaa mɔ maa shi nɔ. Akɛ nɔkwɛmɔ nɔ lɛ, sanebimɔ ko te shi akɛ ani esa akɛ aye loo ni ekolɛ ahe kɛjɛ wɔji asɔlemɔtsu mli aloo akaye. Ani nɛkɛ onukpa nɛɛ kɛ mlai komɛi mamɔ shi kɛha mɛi fɛɛ ni yɔɔ mra be mli asafoi lɛ amli lɛ, ekolɛ bɔni afee ni gbeekpamɔ loo saji amli afee faŋŋ? Dabi. Ekpɛlɛ nɔ akɛ sɔrɔto-feemɔ ni yɔɔ nilee kɛ nɔyaa ni kɛ mɔ yaa mumɔŋ dalɛ mli lɛ baanyɛ anyiɛ nakai Kristofoi lɛ ahiɛ kɛya nibii sɔrɔtoi ni amɛsumɔɔ lɛ ahalamɔ ahe. Shi lɛ lɛ, etswa efai shi akɛ ebaato okadi kpakpa efɔ shi.—Romabii 14:1-4; 1 Korintobii 8:4-13.
17 Kristofoi a-Hela Ŋmalɛi lɛ tsɔɔ akɛ bɔfoi lɛ kɛ ŋaawoo ni yeɔ buaa ha yɛ aŋkroaŋkro saji ahe, tamɔ yɛ atadei kɛ hesaamɔ he, shi amɛfeee mlai ni baakɔ mɔ fɛɛ mɔ he. Ŋmɛnɛ, enɛ feɔ nɔkwɛmɔ nɔ kpakpa kɛha nɔkwɛlɔi ni ji Kristofoi fɛɛ, ni yɔɔ he miishɛɛ akɛ amɛaatswa asafo kuu lɛ amɛma shi lɛ. Ni ekɛ gbɛ ni Nyɔŋmɔ tsɔ nɔ ekɛ blema Israel ye lɛ po tsuɔ nii diɛŋtsɛ.
18. Mɛɛ mlai Yehowa kɛha Israel yɛ atadewoo he?
18 Nyɔŋmɔ kɛ atadewoo he mlai babaoo haaa Israelbii Iɛ. Eka shi faŋŋ akɛ hii kɛ yei wo ŋwɛigbɛ loo nɔshwiemɔ atadei ni je amɛhe, eyɛ mli akɛ ekolɛ yoo nɔ̃ baanyɛ afee nɔ ni alo samai awo mli loo ehiɛ sui sɔrɔtoi. Hii kɛ yei fɛɛ hu woɔ sa-dhin’, loo shishigbɛ atade. (Kojolɔi 14:12; Abɛi 31:24; Yesaia 3:23) Mɛɛ atadei ahe mlai Nyɔŋmɔ kɛha? Hii akawo yei atadei ni yei hu akawo hii atadei, eka shi faŋŋ akɛ yɛ hii kɛ hii kɛ yei kɛ yei ni baanyɛ amɛkɛ amɛhe afee yakayakanii lɛ hewɔ. (5 Mose 22:5) Bɔni afee ni ana akɛ amɛyɛ sɔrɔto yɛ jeŋmaji ni ebɔle amɛhe Iɛ ahe lɛ, Israelbii lɛ baafee amanyai amɛwo amɛtadei lɛ anaa ni amɛkɛ kpãa bluu afimɔ amanyai lɛ anɔ, kɛ ekolɛ kpãai kɛ amɛnaa amanyai yɛ nɔshwiemɔ atadei lɛ koji. (4 Mose 15:33-41) Enɛ ji gbɛtsɔɔmɔ titri ni Mla lɛ kɛha yɛ atadei sɔrɔtoi ni akpɛɔ lɛ ahe.
19, 20. (a) Mɛɛ gbɛtsɔɔmɔ Biblia lɛ kɛhaa Kristofoi yɛ atadewoo kɛ hesaamɔ he? (b) Mɛɛ jwɛŋmɔ esa akɛ onukpai lɛ ana yɛ mlai ni aaafee yɛ bɔ ni mɔ ko saa ehe ehaa lɛ he?
19 Yɛ be mli ni Kristofoi bɛ Mla lɛ shishi lɛ, ani wɔyɛ mlai krokomɛi ni atsɔɔ mli fitsofitso ni kɔɔ atadewoo loo hesaamɔ he ni akɛmamɔ shi aha wɔ yɛ Biblia lɛ mli? Dabi. Nyɔŋmɔ kɛ shishitoo mlai ni ŋmɛɔ pɛpɛɛpɛ ni wɔbaanyɛ wɔkɛtsu nii ha. Paulo ŋma akɛ: “Yei hu, amɛkɛ atade ni sa kɛ hiɛ ni gboɔ nɔ kɛ jwɛŋmɔ ni sa awula amɛhe, jeee kɛ yigbɔɔ loo shika loo adiagba loo atade ni jara wa.” (1 Timoteo 2:9) Petro wo hewalɛ akɛ, ni aaama gbɔmɔtso hewulamɔ nɔ mi moŋ lɛ, esa akɛ Kristofoi yei agbala amɛjwɛŋmɔ kɛya “tsuiiaŋ gbɔmɔ ni aŋɔtee lɛ, yɛ mumɔ ni he jɔ ni yɔɔ kpoo lɛ nibii ni fiteee lɛ” anɔ. (1 Petro 3:3, 4) Akɛ aŋma ŋaawoo ni tamɔ nɛkɛ afɔ shi lɛ tsɔɔ akɛ ehe bahia ni klɛŋklɛŋ afii oha lɛ mli Kristofoi lɛ ateŋ mɛi komɛi afee mɛi ni saa amɛhe ni amɛwoɔ atade hu yɛ hiɛshikamɔ mli. Ni kɛlɛ, ni aaabi—loo aaagu—atadei komɛi ni akpɛ lɛ woo lɛ, bɔfoi lɛ kɛ ŋaawoo ni tswaa mɔ maa shi loo ehaa mɔ nane mɔɔ shi pɛ ha.
20 Abuɔ Yehowa Odasefoi ni akɛ woo ha amɛ hu yɛ he fɛɛ he yɛ hiɛshikamɔ mli ni amɛsaa amɛhe yɛ lɛ hewɔ. Ni kɛlɛ, anyɛɔ awoɔ atadei sɔrɔtoi komɛi yɛ maji sɔrɔtoi amli kɛ agbɛnɛ yɛ asafo ko loo akutso mli po. Shi onukpa ko ni sumɔɔ atadei kɛ hesaamɔi pɔtɛɛ komɛi lɛ baanyɛ akpɛ eyiŋ nakai aha ehe kɛ eweku lɛ. Shi yɛ asafo kuu lɛ gbɛfaŋ lɛ, ehe miihia ni eha Paulo sane nɛɛ ahi ejwɛŋmɔ mli: “Jeee akɛ nyɛhemɔkɛyeli lɛ nyɔŋ wɔyeɔ, shi moŋ nyɛmiishɛɛ lɛ hefatalɔi nitsulɔi ji wɔ, ejaakɛ hemɔkɛyeli mli nyɛdamɔ shi yɛ.” (2 Korintobii 1:24) Hɛɛ, kɛ onukpai lɛ ku henumɔ ko ni aaatsirɛ amɛ koni amɛto mlai amɛmamɔ shi amɛha asafo lɛ naa lɛ, eyeɔ ebuaa ni etswaa mɛi krokomɛi ahemɔkɛyeli emaa shi.
21. Te onukpai lɛ aaafee tɛŋŋ ni amɛkɛ yelikɛbuamɔ ni tswaa mɔ maa shi aha kɛ mɔ ko teke atadewoo yɛ hiɛshikamɔ mli?
21 Taakɛ eji yɛ klɛŋklɛŋ afii oha lɛ mli lɛ, yɛ bei komɛi amli lɛ, mɔ hee loo mɔ ni egbɔjɔ yɛ mumɔŋ lɛ baanyɛ adi nifeemɔ loo gbɛ ko ni nilee bɛ mli lɛ sɛɛ yɛ atadewoo loo hesaamɔ kɛ jwinei ni akɛwulaa he lɛ amli. Kɛkɛ lɛ mɛni? Galatabii 6:1 kɛ gbɛtsɔɔmɔ haa onukpai Kristofoi ni sumɔɔ diɛŋtsɛ akɛ amɛaaye amɛbua lɛ ekoŋŋ. Dani onukpa ko aaakpɛ eyiŋ akɛ ekɛ ŋaawoo aaaha lɛ, ebaanyɛ ni ekɛ onukpa kroko agba he sane yɛ nilee mli, ni ekaya onukpa ni ele akɛ esumɔɔ loo esusuɔ nii ahe tamɔ bɔ ni efeɔ lɛ nɔŋŋ lɛ ŋɔɔ. Kɛ je lɛ su yɛ atadewoo loo hesaamɔ mli miisa mɛi pii ahe yɛ asafo lɛ mli lɛ, onukpai akuu lɛ baanyɛ akpɛ amɛyiŋ yɛ gbɛ ni hi fe fɛɛ ni amɛaatsɔ nɔ amɛye amɛbua lɛ he, tamɔ kɛtsɔ kpee lɛ fa ko ni akɛaatsu he nii yɛ mlihilɛ mli koni etswa amɛ ema shi lɛ nɔ, aloo kɛtsɔ yelikɛbuamɔ pɔtɛɛ ni akɛaaha aŋkroaŋkroi lɛ nɔ. (Abɛi 24:6; 27:17) Oti ni ma amɛhiɛ ji ni amɛwo hewalɛ ni akɛ jwɛŋmɔ ni yɔɔ 2 Korintobii 6:3 lɛ atsu nii: “Wɔtooo mɔ ko mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ.”
22. (a) Kɛ sɔrɔto-feemɔi bibii ni kɔɔ bɔ ni asusuɔ nibii komɛi ahe ahaa lɛ yɛ po lɛ, mɛni hewɔ esaaa akɛ efeɔ naagba lɛ? (b) Mɛɛ nɔkwɛmɔ nɔ kpakpa ko Paulo kɛha?
22 Kristofoi onukpai ni ‘lɛɔ Nyɔŋmɔ asafo kuu ni yɔɔ amɛteŋ lɛ’ miisumɔ ni amɛfee taakɛ Petro tsɔɔ mli lɛ, ni ji akɛ, ‘amɛkaye Nyɔŋmɔ nii lɛ anɔ nuŋtsɔmɛi asane.’ (1 Petro 5:2, 3) Sanebimɔi baanyɛ ate shi yɛ saji ni kɔɔ sɔrɔtofeemɔ ni baanyɛ aba nɔ ni asumɔɔ lɛ amli lɛ he yɛ amɛsuɔmɔ nitsumɔ lɛ mli. Ekolɛ nɔ ni afɔɔ feemɔ yɛ maŋ lɛ mli ji ní ate shi adamɔ shi ni akane kukuji lɛ yɛ Buu-Mɔɔ Nikasemɔ lɛ mli. Abaanyɛ ato kpee kɛha shiɛmɔyaa lɛ he gbɛjianɔ kɛ nibii krokomɛi babaoo ni kɔɔ sɔɔmɔ nitsumɔ lɛ he lɛ ahe gbɛjianɔ yɛ bɔ ni atsuɔ lɛ yɛ he ni ayɔɔ lɛ naa. Ni kɛlɛ, ani ekɛ oshara baaba kɛji akɛ mɔ ko hiɛ jwɛŋmɔ ko ni esoro no fioo yɛ enɛ he? Nɔkwɛlɔi ni yɔɔ suɔmɔ lɛ miisumɔ ni “afee nii fɛɛ bɔ ni yɔɔ fɛo kɛ gbɛnaa-gbɛnaa,” ni wiemɔ nɛɛ ji nɔ ni Paulo kɛtsu nii yɛ naakpɛɛ nikeenii lɛ ahe. Shi emli saji lɛ tsɔɔ akɛ nɔ ni Paulo nyaa he titri ji “ni asafo lɛ nane amɔ shi.” (1 Korintobii 14:12, 40) Etsɔɔɔ su ko akɛ eesumɔ ni efee mlai babaoo ni bɛ naagbee, tamɔ nɔ ni nɔ fɛɛ nɔ ni aaafee yɛ ekomefeemɔ ni yɔɔ kpɛŋŋ mli, loo hesaa ni hi kɛwula shi ji oti ni ma ehiɛ. Eŋma akɛ: “Nuŋtsɔ lɛ eha wɔ [hegbɛ] ni wɔkɛha nyɛnane amɔ shi, shi jeee ni wɔkɛwule nyɛ.”—2 Korintobii 10:8.
23. Mɛni ji gbɛi komɛi ni wɔɔtsɔ nɔ wɔkase Paulo nɔkwɛmɔ nɔ ni kɔɔ mɛi krokomɛi ni ehaa amɛnane mɔɔ shi lɛ ahe lɛ?
23 Sanebimɔ ko bɛ he akɛ Paulo tsu nii koni ekɛha mɛi krokomɛi anane amɔ shi loo etswa amɛ ema shi kɛtsɔ wiemɔ kpakpa ni woɔ mɔ hewalɛ nɔ. Ní ekɛ nanemɛi akuu fioo ko aaabɔ lɛ, ebɔ mɔdɛŋ kɛfata he koni eyasara nyɛmimɛi hii kɛ yei babaoo, mɛi ni he wa yɛ mumɔŋ kɛ mɛi ni ehe hiaa ni atswa amɛ ama shi loo aha amɛnaji amɔ shi titri lɛ fɛɛ. Ni ema suɔmɔ nɔ mi moŋ—fe mlai—ejaakɛ “suɔmɔ haa mɔ nane mɔɔ shi.”—1 Korintobii 8:1.
[Shishigbɛ niŋmai]
a Mlai sɔrɔtoi ahe baahia yɛ shihilɛi komɛi ahewɔ yɛ weku ko mli. Biblia lɛ kɛ hegbɛ haa fɔlɔi akɛ amɛkpɛ amɛyiŋ yɛ saji ahe amɛha amɛbii bibii lɛ.—2 Mose 20:12; Abɛi 6:20; Efesobii 6:1-3.
Saji Otii ni Akɛtiɔ Mli
◻ Mɛni hewɔ tsakemɔ sa kɛ wɔkɛ wɔhe haa wiemɔ ni ehiii loo wɔwieɔ nyanyaanya lɛ?
◻ Mɛni wɔbaanyɛ wɔfee ni wɔha mɛi anane amɔ shi babaoo loo wɔtswa amɛ wɔma shi yɛ asafo lɛ mli?
◻ Yɛ mlai pii ni afeɔ ahaa mɛi krokomɛi lɛ gbɛfaŋ lɛ, mɛni ji nɔkwɛmɔ nɔ ni tsɔɔ Nyɔŋmɔ gbɛ yɛ enɛ he?
◻ Mɛni baaye abua onukpai lɛ koni amɛkafee gbɔmɛi amlai amɛha asafo kuu lɛ?