Yitso 11

Naagbee Gbii lɛ Nɛ!

 1. Mɛni hewɔ mɛi pii nuɔ he akɛ amɛtamɔ mɛi ni elaaje, yɛ be mli ni amɛsusuɔ shihilɛ ni yaa nɔ yɛ je lɛŋ lɛ he lɛ, shi nɛgbɛ abaana jeŋ saji lɛ amlitsɔɔmɔ ni anyɛɔ akɛ he fɔɔ nɔ lɛ yɛ?

TE FEE tɛŋŋ ni wɔ hamahama je nɛɛ bashɛ he ni eshɛ nɛɛ? Mɛni baaba enɔ yɛ wɔsɛɛ be mli? Ani obi saji ni tamɔ nɛkɛ pɛŋ? Mɛi pii nuɔ he akɛ amɛhiɛ feɔ amɛ yaa kɛ amɛkwɛ shihilɛ ni yɔɔ je lɛ mli lɛ. Nibii ni yɔɔ diɛŋtsɛ tamɔ tawuu, hela, kɛ awuiyeli haa gbɔmɛi susuɔ nɔ ni baaba wɔsɛɛ ko lɛ he. Nɔyeli mli hiɛnyiɛlɔi kɛ hiɛnɔkamɔ kpakpa ko haaa. Shi, haomɔ gbii nɛɛ amlitsɔɔmɔ ni anyɛɔ akɛ he fɔɔ nɔ lɛ yɛ Nyɔŋmɔ ŋɔɔ kɛtsɔ e-Wiemɔ lɛ nɔ. Biblia lɛ yeɔ ebuaa wɔ yɛ gbɛ ni anyɛɔ akɛ he fɔɔ nɔ lɛ nɔ, ni wɔleɔ he ni wɔshɛ yɛ be naa. Etsɔɔ wɔ akɛ wɔyɛ ŋmɛnɛŋmɛnɛ nibii agbɛjianɔtoo nɛɛ “naagbee gbii” lɛ amli.—2 Timoteo 3:1.

 2. Mɛɛ sane Yesu kaselɔi lɛ bi lɛ, ni te eha hetoo eha tɛŋŋ?

² Akɛ nɔkwɛmɔ nɔ lɛ, susumɔ hetoo ni Yesu kɛha sanebimɔi komɛi ni ekaselɔi lɛ tee amɛ shi lɛ he. Gbii etɛ dani Yesu baagbo lɛ, amɛbi lɛ akɛ: “Mɛni ji beni oba lɛ kɛ nibii agbɛjianɔtoo lɛ naagbee lɛ he okadi?”a (Mateo 24:3, NW) Yɛ hetoohamɔ mli lɛ, Yesu gba amɛ nibii pɔtɛɛ ni baaba je lɛŋ kɛ shihilɛi ni baatsɔɔ faŋŋ akɛ gbɛjianɔtoo ni sheee Nyɔŋmɔ gbeyei nɛɛ ebote enaagbee gbii amli.

 3. Mɛni hewɔ shihilɛi ni yɔɔ shikpɔŋ nɔ lɛ fite kwraa beni Yesu je nɔyeli shishi lɛ?

³ Taakɛ atsɔɔ yɛ yitso ni tsɔ hiɛ lɛ mli lɛ, Biblia be buu muɔ sane naa akɛ Nyɔŋmɔ Maŋtsɛyeli lɛ eje nɔyeli shishi momo. Shi te aaafee tɛŋŋ ni eeenyɛ eba lɛ nakai? Nibii afite kwraa moŋ, shi jeee ni eehi. Yɛ anɔkwale lɛ eje nɔyeli shishi. Mɛni hewɔ? Ojogbaŋŋ, Lala 110:2 bɔɔ wɔ amaniɛ akɛ Yesu baaye lumɔ yɛ be ko mli ‘yɛ ehenyɛlɔi lɛ ateŋ!’ Yɛ anɔkwale mli lɛ, klɛŋklɛŋ nifeemɔ akɛ ŋwɛi Maŋtsɛ lɛ ji ni eshɛrɛ Satan kɛ edaimonio bɔfoi lɛ eshwie shikpɔŋ lɛ nɔ he ko. Kpojiemɔ 12:9) Mɛni jɛ mli ba? Etamɔ bɔ pɛ ni Kpojiemɔ 12:12 gba fɔ shi lɛ: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.” Nakai “be fioo kɛkɛ” lɛ mli wɔyɔɔ nɛɛ.

 4. Mɛni ji naagbee gbii lɛ ahe nibii komɛi, ni mɛni amɛ tsɔɔ? (Kwɛmɔ akrabatsa lɛ.)

⁴ Belɛ ebɛ naakpɛɛ mɔ akɛ beni abi Yesu, nɔ ni beni eba lɛ kɛ nibii agbɛjianɔtoo lɛ naagbee lɛ he okadi lɛ baafee lɛ, ehetoo lɛ baafee nɔ ni hiɛdɔɔ yɔɔ mli. Anaa okadi lɛ mli nibii sɔrɔtoi lɛ yɛ akrabatsa ni yɔɔ baafa 102 lɛ. Taakɛ obaana lɛ, Kristofonyo bɔfo Paulo, Petro, kɛ Yohane kɛ naagbee gbii nɛɛ amlitsɔɔmɔ lolo haa wɔ. Eji anɔkwale akɛ, okadi lɛ kɛ naagbee gbii lɛ amli nibii pii tsɔɔ shihilɛi ni haomɔi yɔɔ mli. Ni kɛlɛ, esa akɛ gbalɛi nɛɛ amlibaa atsɔ wɔ yiŋ akɛ yiwalɛ gbɛjianɔtoo nɛɛ naagbee ebɛŋkɛ. Nyɛhaa wɔpɛia naagbee gbii nɛɛ amli nibii titrii lɛ ekomɛi amli jogbaŋŋ wɔkwɛa.

NAAGBEE GBII LƐ AHE NIBII

 5, 6. Gbalɛi ni kɔɔ tawuu kɛ hɔmɔ he lɛ miiba mli yɛ mɛɛ gbɛ nɔ?

⁵ “Maŋ aaate shi awo maŋ ni maŋtsɛyeli aaate shi awo maŋtsɛyeli.” (Mateo 24:7; Kpojiemɔ 6:4) Niŋmalɔ Ernest Hemingway tsɛ Jeŋ Ta I akɛ “gbɔmɔgbee ni yɔɔ gbeyei ni da fe fɛɛ ni kudɔmɔ bɛ he ni eba shikpɔŋ nɔ.” Taakɛ wolo, The World in the Crucible—1914-1919 tsɔɔ lɛ, eji “tawuu he nifeemɔ hee, klɛŋklɛŋ jeŋ ta yɛ adesai aniiashikpamɔ mli. Esɛɛkɛlɛ, emliwalɛ, kɛ bɔ ni edalɛ yɔɔ lɛ fe nɔ fɛɛ nɔ ni atsɔ hiɛ ale loo ni aakpa gbɛ.” Kɛkɛ ni Jeŋ Ta II, ni fite nii babaoo fe Jeŋ Ta I lɛ ba. Yinɔsane he nilelɔ, Hugh Thomas kɛɔ akɛ, “nɔ ni ehe shi yɛ afii ohai nyɔŋmai enyɔ lɛ mli ji tui ni atswiaa lɛ oyayaayai, tankii, B-52 (tawuu kɔɔyɔŋ lɛlɛ), nuklea okpɛlɛmii, kɛ naagbee lɛ, osaramaŋi. Nɔ ni ekadi lɛ ji tawuu ni ashwie la shi babaoo ni afite nii babaoo yɛ mli fe fɛɛ eko yɛ yinɔi krokomɛi amli.” Eji anɔkwale, awie babaoo yɛ tawuu kpamɔ he beni Bokagbɛ kɛ Anaigbɛ Mpleshii lɛ ba naagbee lɛ. Ni kɛlɛ, amaniɛbɔɔ ko buɔ akɔntaa akɛ beni atsɔɔ tawuu nii ni abaakpa amɛ kɛ nitsumɔ lɛ sɛɛ lɛ, nuklea okpɛlɛmii kɛjɛ 10,000 kɛmiiya 20,000 baahi shi lolo—efe tui kɛ okpɛlɛmii ni atswia yɛ Jeŋ Ta II mli lɛ nɔ̃ toi 900.

⁶ “Hɔmɔ baaba.” (Mateo 24:7, NW; Kpojiemɔ 6:5, 6, 8) Kɛjɛ 1914 kɛbaa nɛɛ kɛ hoo lɛ ana hɔmɔ sɔrɔtoi wuji 20 ni eba. Bangladesh, Burundi, Cambodia, China, Ethiopia, Greece, India, Nigeria, Russia, Rwanda, Somalia, kɛ Sudan fata hei ni eba yɛ lɛ ahe. Shi jeee be fɛɛ be niyenii ni bɛ lɛ kɛ hɔmɔ baa. Okwaayeli kɛ shika-helɛtemɔ he nilelɔi komɛi akuu ko mu sane naa akɛ, “niyenii ni anaa yɛ je lɛ mli yɛ afii nyɔŋmai abɔ nɛɛ mli lɛ efa babaoo fe gbɔmɛi ni baaye lɛ. Shi akɛni kɛ hoo lɛ gbɔmɛi akpekpei 800 hiɔ shi yɛ ohia futaa mli hewɔ lɛ, . . . amɛnyɛɛɛ amɛhe niyenii ni fa nɛɛ eko bɔ ni sa ni aaaha amɛje niyenii kpakpa ni amɛnaaa amɛye lɛ mli.” Yɛ shihilɛ lɛ ekomɛi amli lɛ, maŋkwramɔ ni kɛ ehe woɔ mli lɛ fata he. Dr. Abdelgalil Elmekki ni yɔɔ Toronto Univɛsiti lɛ tsiɔ nɔkwɛmɔ nii enyɔ ko ni emli lɛ hɔmɔ ye gbɔmɛi akpei abɔ yɛ be mli ni amɛmaji lɛ kɛ niyenii babaoo miimaje kɛmiiya maŋsɛɛ lɛ tã. Etamɔ nɔ ni nɔ yelii lɛ susuɔ maŋsɛɛ shika ni amɛaana ni amɛkɛfi amɛ tawuu lɛ asɛɛ lɛ he kwraa fe amɛ maŋbii ni amɛaalɛ amɛ lɛ ahe. Te Dr. Elmekki mu sane naa eha tɛŋŋ? Yɛ bei pii amli lɛ nɔ ni kɛ hɔmɔ baa ji “nijaa kɛ nɔyeli he gbɛjianɔtoo.”

 7. Mɛni ji anɔkwa saji ni kɔɔ tsɛŋemɔ-helai ahe ŋmɛnɛ?

⁷ “Gbele-helai.” (Luka 21:11; Kpojiemɔ 6:8) Spania influenza ni ba yɛ 1918-19 lɛ gbe kɛ hoo lɛ gbɔmɛi akpekpei 21. A. A. Hoehling ŋma yɛ The Great Epidemic lɛ mli akɛ, “be ko bako yɛ yinɔsane mli ni gbɔmɔgbelɔ ko egbe adesai babaoo yɛ oyaiyeli mli nɛkɛ yɛ je lɛ mli dã.” Ŋmɛnɛ, gbele-helai miiya nɔ. Daa afi lɛ, kansa loo heloo mli fala ni gbooo gbeɔ gbɔmɛi akpekpei enumɔ, musuŋtsɔmɔ helai gbeɔ fufɔbii kɛ gbekɛbii fe akpekpei etɛ, ni wɔlɔmɔ helai gbeɔ akpekpei etɛ. Helai ni haaa anyɛ amũ, titri lɛ nɔ ni mɔmɔɔ ŋmawui gbeɔ gbekɛbii ni yeko afii enumɔ lɛ ateŋ akpekpei 3.5 daa afi. Ni yibɔ ni yɔɔ gbeyei ni ji gbɔmɛi akpekpei toi akpei 2.5—gbɔmɛi ni yɔɔ jeŋ fɛɛ lɛ fã kpotoo—he yeɔ yɛ nu kpakpa ni anaaa loo nui ni mli ewo muji kɛ falefale-feemɔ ni bɛ hewɔ. AIDS hela lɛ hu kɛ kaimɔ haa gbɔmɔ akɛ, yɛ mɔdɛŋ ni ebɔɔ ni sa kadimɔ yɛ tsofafeemɔ mli lɛ fɛɛ sɛɛ lɛ, enyɛɛɛ ejie tsɛŋemɔ-helai kɛya.

 8. Gbɔmɛi miitsɔɔ akɛ amɛji “shika-suɔlɔi” yɛ mɛɛ gbɛ nɔ?

⁸ “Gbɔmɛi aaatsɔmɔ . . . shika-suɔlɔi.” (2 Timoteo 3:2) Etamɔ nɔ ni ninamɔ he hɔmɔ miiye gbɔmɛi ni yɔɔ maji ni yɔɔ jeŋ fɛɛ lɛ anɔ lɛ waa. Akɛ “omanye” ni mɔ ko eye lɛ toɔ shika ni baa mɔ lɛ kotoku mli lɛ he yɛ bei pii amli, ni akɛ “ninamɔ” toɔ nɔ ni mɔ ko yɔɔ lɛ he. Adafitswaa nitsumɔ ko mli onukpa lɛ sɛɛmɔ jaje akɛ, “heloo gbɛfaŋ ninamɔ baaya nɔ afee hewalɛ ni kanyaa Amerikabii . . . kɛ hewalɛ kroko ni he hiaa ni yaa hiɛ waa yɛ jarayeli nitsumɔi krokomɛi amli.” Ani enɛ miiya nɔ yɛ hei ni oyɔɔ lɛ?

 9. Mɛni abaanyɛ awie yɛ fɔlɔi anɔ toigbomɔ ni agba he sane afɔ shi lɛ he?

⁹ “Fɔlɔi anɔ toigbolɔi.” (2 Timoteo 3:2) Ŋmɛnɛŋmɛnɛ gbii nɛɛ amli fɔlɔi, tsɔɔlɔi, kɛ mɛi krokomɛi yɛ odaseyeli diɛŋtsɛ ni tsɔɔ akɛ gbekɛbii pii ebuuu mɔ ni amɛji toigbolɔi. Gbekɛbii nɛɛ ateŋ mɛi komɛi miifee nii kɛmiishi loo kɛmiikase amɛfɔlɔi asubaŋ. Gbekɛbii ni amɛyi faa babaoo miilaaje hemɔkɛyeli—ni amɛmiitse atua amɛmiishi—skul, mla lɛ, Nyɔŋmɔjamɔ, kɛ amɛfɔlɔi. Taakɛ tsutsu tsɔɔlɔ ko kɛɔ lɛ, “ákɛ nɔ ni eba ni afeɔ lɛ, etamɔ nɔ ni amɛbɛ bulɛ ko kwraa kɛha nɔ ko.” Shi yɛ miishɛɛ mli lɛ, gbekɛbii pii ni sheɔ Nyɔŋmɔ gbeyei lɛ feɔ nɔkwɛmɔ nɔ kpakpa yɛ jeŋba mli.

10, 11. Mɛɛ odaseyeli yɔɔ ni tsɔɔ akɛ gbɔmɛi ahiɛ ewo la ni amɛdɔɔɔ mɔ he?

¹⁰ “Mɛi ni hiɛ yɔɔ la.” (2 Timoteo 3:3) Hela wiemɔ ni atsɔɔ shishi akɛ “hiɛ yɔɔ la” lɛ tsɔɔ ‘hiɛ ejɔɔɔ, ni bɛ mɔbɔnalɛ kɛ henumɔ kɛha gbɔmɔ.’ Kwɛ bɔ ni enɛ sa mɛi ni kɛ ŋmɛnɛŋmɛnɛ beaŋ awuiyelii baa lɛ jogbaŋŋ ha! Adafitswaa wolo ko mli niŋmalɔ ko kɛɛ: “Shihilɛ efee nɔ ni piŋmɔ yɔɔ mli, akɛ lashishwiemɔ ni yɔɔ gbeyei ekpa mli fe fɛɛ akɛ ebiɔ henumɔ ni feɔ shikpilikpii dani mɔ ko baanyɛ akane daa gbi adafitswaa woji.” Polisi onukpa ko ni kwɛɔ shiai anɔ lɛ kɛɛ akɛ, etamɔ nɔ ni obalahii kɛ obalayei bibii pii ŋamɔɔ amɛhiŋmɛii yɛ nɔ ni jɛɔ amɛ nifeemɔi amli baa lɛ anɔ. Ekɛɛ: “Henumɔ ko yɛ akɛ, ‘Mileee nɔ ni baaba wɔ. Matao nɔ ni misumɔɔ lɛ ŋmɛnɛ.’ ”

¹¹ “Mɛi ni edɔɔɔ mɔ he.” (2 Timoteo 3:3) Atsɔɔ nɛkɛ wiemɔ kuku nɛɛ shishi kɛjɛ Hela wiemɔ ni eshishi ji “mɔ ni bɛ tsui ni enuuu nii ahe, mɔ ni tamɔɔɔ gbɔmɔ” mli, ni etsɔɔ “adebɔɔ mli hedɔɔ ni bɛ.” (The New International Dictionary of New Testament Theology) Hɛɛ, yɛ bei pii amli lɛ hedɔɔ elaaje yɛ shihilɛ ni esa akɛ eshwere yɛ mli lɛ mli—shia lɛ. Amaniɛbɔɔ ni kɔɔ bɔ ni afeɔ gbalashihilɛ mli hefatalɔi, gbekɛbii, kɛ fɔlɔi ni amɛdara yɛ afii amli lɛ niseniianii lɛ po efa babaoo ni egbaa mɔ naa. Kuu ko ni pɛiɔ nibii amli ye ŋkɔmɔ akɛ: “Basabasa ni afeɔ gbɔmɔ—kɛ eji magbamɔ loo tsimɔ, kakla ni akɛtsuɔ mɔ loo tu ni atswaa mɔ lɛ—baa shii abɔ yɛ weku kɔkrɔɔ lɛ mli fe he fɛɛ he yɛ gbɔmɛi ashihilɛ mli.”

12. Mɛni hewɔ abaanyɛ akɛɛ akɛ Nyɔŋmɔjamɔ su ko kɛkɛ gbɔmɛi hiɛ lɛ?

¹² “Mɛi ni hiɛ Nyɔŋmɔjamɔ su, shi amɛkwa emli hewalɛ lɛ.” (2 Timoteo 3:5) Biblia lɛ yɛ hewalɛ ni ekɛaatsake jeŋba koni ehi. (Efesobii 4:22-24) Ni kɛlɛ, ŋmɛnɛ, mɛi pii kɛ amɛjamɔ feɔ hiɛhaa nɔ̃ ni amɛhɔlɔɔ sɛɛ ni amɛkɛtsuɔ nibii ni ejaaa ni esaaa Nyɔŋmɔ hiɛ. Amale, juu, kɛ bɔlɛnamɔ mli jeŋba shara ji nibii ni jamɔ mli hiɛnyiɛlɔi kpɛlɛɔ nɔ. Jamɔi pii shiɛɔ suɔmɔ shi amɛfiɔ tawuu sɛɛ. Wolo tɛtrɛɛ ko ni atsɛɔ lɛ India Today lɛ mli niŋmaa titri ko kɛɛ: “Adesai efee amɛnanemɛi bɔɔ nii lɛ nihii nii ni ehiii kwraa yɛ Bɔlɔ ni Fe Fɛɛ lɛ gbɛi amli.” Yɛ anɔkwale mli lɛ, tawuu ni ashwie la shi yɛ mli fe fɛɛ yɛ nyɛsɛɛ nɛɛ amli lɛ—Jeŋ Tai I kɛ II—fɛ yɛ Kristendom teŋ diɛŋtsɛ.

13. Mɛɛ odaseyeli yɔɔ ni tsɔɔ akɛ aafite shikpɔŋ lɛ?

¹³ “Mɛi ni fiteɔ shikpɔŋ lɛ.” (Kpojiemɔ 11:18) Jeŋ nilelɔi fe 1,600, ni mɛi 104 ni na Nobel juromɔ nɔ lɛ eko fata he, ni jɛ jeŋ fɛɛ lɛ kpɛlɛ kɔkɔbɔɔ ko ni Jeŋ Nilelɔi ni Ehao Akuu lɛ kɛha lɛ nɔ, nɔ ni jajeɔ nɛkɛ: “Adesai kɛ adebɔɔ je lɛ miihe akpe hiɛ kɛ hiɛ. . . . Afii nyɔŋmai fioo ko pɛ eshwɛ ni hegbɛ ni akɛaatsi oshara ni baa nɛɛ naa lɛ aaalaaje.” Amaniɛbɔɔ lɛ kɛɛ akɛ gbɔmɔ nifeemɔi ni woɔ wala he gbeyei lɛ “baatsake je lɛ aahu akɛ wala nyɛŋ ahi mli yɛ gbɛ ni wɔle lɛ lɛ nɔ.” Ozone ni tãa, nu mli mujiwoo, kooi ni laajeɔ, shikpɔŋ sũ ni nyɛɛɛ aba nii, kɛ kooloi kɛ kwɛ̃ɛ nii sɔrɔtoi babaoo ni akpataa hiɛ lɛ ji nibii ni atsi tã akɛ naagbai ni he hiaa waa ni esa akɛ atsu he nii. Jeŋ Nilelɔi ni Ehao Akuu lɛ kɛɛ akɛ, “wɔ shihilɛ ni tamɔ nɔ ni alo ni mɔ nɛ kpasa mɔ nɛ lɛ ni ataa he lɛ baanyɛ akanya nifitemɔ ni baasa nibii ni ŋmɛɔ pɛpɛɛpɛ ni ebɔle wɔhe kɛkpe ni wɔnuuu shishi jogbaŋŋ kɛmɔ shi lɛ fɛɛ he.”

14. Te ooofee tɛŋŋ otsɔɔ akɛ Mateo 24:14 miiba mli yɛ wɔgbii nɛɛ amli?

¹⁴ “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ.” (Mateo 24:14) Yesu gba akɛ abaashiɛ Maŋtsɛyeli lɛ he sanekpakpa lɛ yɛ shikpɔŋ lɛ fɛɛ nɔ, ni akɛye jeŋmaji fɛɛ odase. Yɛ ŋwɛi yelikɛbuamɔ kɛ jɔɔmɔ hewɔ lɛ, Yehowa Odasefoi akpekpei abɔ miitu ŋmɛlɛtswai akpekpei toi akpei abɔ kɛmiiwo nɛkɛ shiɛmɔ kɛ kaselɔ-feemɔ nitsumɔ nɛɛ mli. (Mateo 28:19, 20) Hɛɛ, Odasefoi lɛ yooɔ akɛ amɛbaaye la yi sɔ̃ kɛji akɛ amɛjajeee sanekpakpa lɛ. (Ezekiel 3:18, 19) Shi amɛnaa miishɛɛ akɛ daa afi lɛ akpei abɔ kɛ shidaa kpɛlɛɔ Maŋtsɛyeli sane lɛ nɔ ni amɛbadamɔɔ shi akɛ anɔkwa Kristofoi, ni ji akɛ, ákɛ Yehowa Odasefoi. Eji hegbɛ ni ekaaa akɛ mɔ ko aaasɔmɔ Yehowa ni egbɛ Nyɔŋmɔ he nilee eshwa. Ni beni ashiɛ sanekpakpa nɛɛ atsɔɔ mɛi yɛ shikpɔŋ lɛ fɛɛ nɔ lɛ, nibii agbɛjianɔtoo fɔŋ nɛɛ naagbee lɛ baaba.

TSU ODASEYELI LƐ HE NII

15. Ŋmɛnɛŋmɛnɛ yiwalɛ gbɛjianɔtoo nɛɛ baaba naagbee yɛ mɛɛ gbɛ nɔ?

¹⁵ Mɛɛ gbɛ nɔ gbɛjianɔtoo nɛɛ naagbee baatsɔ aba? Biblia lɛ gbaa “amanehulu kpeteŋkpele” ni baaje shishi kɛ tutuamɔ ni je nɛŋ maŋkwramɔŋ hemɛi lɛ kɛbaaba “Babilon Kpeteŋkpele,” jeŋ apasa jamɔ maŋtsɛyeli lɛ nɔ lɛ he sane efɔɔ shi. (Mateo 24:21; Kpojiemɔ 17:5, 16) Yesu kɛɛ akɛ yɛ nɛkɛ be nɛɛ mli lɛ, ‘hulu baawo duŋ, ni nyɔŋtsere kpɛŋ, ni ŋulamii aaajɛ ŋwɛi agbeegbee shi, ni abaahoso ŋwɛi hewalɛi lɛ.’ (Mateo 24:29) Enɛ baanyɛ atsɔɔ ŋwɛi nibii ni baaba diɛŋtsɛ. Yɛ fɛɛ mli lɛ, abaakpa je lɛŋ jamɔ mli lai ni kpɛɔ lɛ he mama ni abaakpata amɛhiɛ. Kɛkɛ lɛ Satan, ni atsɛɔ lɛ “Gog ni jɛ Magog” lɛ kɛ gbɔmɛi ni afite amɛ lɛ baatsu nii ni amɛkɛ naagbee tutuamɔ aba Yehowa webii anɔ. Shi Satan yeŋ omanye, ejaakɛ Nyɔŋmɔ baahere amɛyiwala. (Ezekiel 38:1, 2, 14-23) “Amanehulu kpeteŋkpele” lɛ baashɛ enaagbee kwraa yɛ Harmagedon, “Nyɔŋmɔ Ofe lɛ gbi wulu lɛ nɔ ta” lɛ mli. Ebaajie Satan shikpɔŋ nɔ gbɛjianɔtoo lɛ mli nɔ fɛɛ nɔ ni eshwɛ lɛ kɛya, ni ebaagbele gbɛ kɛha naanɔ jɔɔmɔi ni baaho kɛba adesai ni ahere amɛ yiwala lɛ anɔ lɛ.—Kpojiemɔ 7:9, 14; 11:15; 16:14, 16; 21:3, 4.

16. Te wɔfeɔ tɛŋŋ wɔleɔ akɛ naagbee gbii nɛɛ ahe nibii ni agba afɔ shi lɛ kɔɔ wɔbe nɛɛ he?

¹⁶ Kɛ asusu he diɛŋtsɛ lɛ, gbalɛi ni kɔɔ naagbee gbii lɛ ahe lɛ mli nibii lɛ ekomɛi baafee tamɔ nɔ ni ekɔɔ yinɔsane mli bei krokomɛi ahe. Shi kɛ abua fɛɛ naa lɛ, gbalɛi amli odaseyelii lɛ tsɔɔ wɔ gbi nɛɛ. Akɛ nɔkwɛmɔ nɔ lɛ: Mɔ ko waonaa liamɔi lɛ feɔ mfoniri ko ni nyɛŋ afee gbɔmɔ aŋkro ko nɔ. Nakai nɔŋŋ hu naagbee gbii lɛ yɛ amɛ diɛŋtsɛ amɛ mfoniri ni kadiɔ amɛ, loo nibii komɛi ni baa. Enɛɛmɛi bafeɔ “waonaa kadimɔ nii” ni nyɛŋ afee be kroko ko nɔ. Kɛ asusu no kɛ nɔ ni Biblia lɛ tsɔɔ akɛ Nyɔŋmɔ ŋwɛi Maŋtsɛyeli lɛ miiye nɔ bianɛ lɛ he lɛ, odaseyeli lɛ kɛ nɔdaamɔ nɔ ni ma shi shiŋŋ haa ni haa mɔ muɔ sane naa akɛ naagbee gbii lɛ amli lɛlɛŋ wɔyɔɔ lɛ. Agbɛnɛ, Ŋmalɛ mli odaseyeli ni yɔɔ faŋŋ yɛ ni yeɔ odase akɛ etsɛŋ ni abaakpata ŋmɛnɛŋmɛnɛ yiwalɛ gbɛjianɔtoo nɛɛ hiɛ.

17. Mɛni esa akɛ nilee ni tsɔɔ akɛ naagbee gbii lɛ nɛ lɛ atsirɛ wɔ ni wɔfee?

¹⁷ Te obaakpɛlɛ odaseyeli ni tsɔɔ akɛ naagbee gbii lɛ nɛ lɛ nɔ oha tɛŋŋ? Susumɔ enɛ he: Kɛ ahum ko ni naa wa waa ni kpataa nii ahiɛ miiba lɛ, wɔtsɔɔ hiɛ wɔtoɔ gbɛjianɔ oya nɔŋŋ. Ojogbaŋŋ, esa akɛ nɔ ni Biblia lɛ gbaa kɛhaa ŋmɛnɛŋmɛnɛ gbɛjianɔtoo nɛɛ atsirɛ wɔ ni wɔfee enɛ. (Mateo 16:1-3) Wɔbaanyɛ wɔna faŋŋ akɛ jeŋ gbɛjianɔtoo nɛɛ naagbee gbii lɛ amli wɔyɔɔ lɛ. Esa akɛ enɛ akanya wɔ ni wɔfee tsakemɔi ni he hiaa lɛ koni wɔna Nyɔŋmɔ hiɛ duromɔ. (2 Petro 3:3, 10-12) Beni ewieɔ lɛ diɛŋtsɛ ehe akɛ yiwalaheremɔ najiaŋdamɔlɔ lɛ, Yesu kɛ tsɛmɔ ni he hiaa lɛ haa: “Nyɛhiɛ ahia nyɛhe nɔ, koni fufeemɔ kɛ daatɔɔ kɛ daaŋ-ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne. No hewɔ lɛ nyɛsaraa be fɛɛ be ni nyɛsɔlea, koni nyɛnyɛ nii ni baaba nɛɛ fɛɛ mli nyɛje, ni nyɛnyɛ gbɔmɔ Bi lɛ hiɛ nyɛdamɔ.”—Luka 21:34-36.

[Shishigbɛ niŋmai]

KAA ONILEE OKWƐ

Mɛni Biblia lɛ gba yɛ nibii ni baaba je lɛ mli lɛ he yɛ Kristo nɔyeli lɛ shishijee mli?

Mɛni ji naagbee gbii lɛ ahe nibii komɛi?

Mɛni tsɔɔ oyiŋ akɛ naagbee gbii lɛ nɛ?

[Akrabatsa ni yɔɔ baafa 102]

NAAGBEE GBII LƐ AHE NIBII KOMƐI

• Tawuu ni eko bɛ ni tamɔ nakai.—Mateo 24:7; Kpojiemɔ 6:4.

• Hɔmɔ.—Mateo 24:7; Kpojiemɔ 6:5, 6, 8.

• Tsɛŋemɔ-helai.—Luka 21:11; Kpojiemɔ 6:8.

• Mlakwamɔ ni baafa.—Mateo 24:12.

• Shikpɔŋ lɛ ni afiteɔ nɔ.—Kpojiemɔ 11:18.

• Shikpɔŋ hosomɔi.—Mateo 24:7.

• Jaramɔ bei ni naa wa.—2 Timoteo 3:1.

• Shika he suɔmɔ babaoo.—2 Timoteo 3:2.

• Fɔlɔi anɔ toigbomɔ.—2 Timoteo 3:2.

• Hedɔɔ ni bɛ.—2 Timoteo 3:3.

• Asumɔɔ ŋɔɔmɔ fe Nyɔŋmɔ.—2 Timoteo 3:4.

• Abɛ henɔyeli.—2 Timoteo 3:3.

• Asumɔɔɔ ekpakpa.—2 Timoteo 3:3.

• Asusuuu oshara ni baa lɛ he.—Mateo 24:39.

• Hefɛoyelɔi kpoɔ naagbee gbii lɛ amli odaseyeli lɛ.—2 Petro 3:3, 4.

• Nyɔŋmɔ Maŋtsɛyeli lɛ shiɛmɔ yɛ jeŋ muu fɛɛ.—Mateo 24:14.

[Baafa muu mfoniri ni yɔɔ baafa 101]