Fɔlɔi, Kwɛmɔ Krɛdɛɛ He Miihia Nyɛbii Lɛ
“Obii lɛ aaatamɔ mutsei bibii kɛaabɔle okpɔlɔ lɛ.”—LALA 128:3.
1. Abaanyɛ akɛ dumɔ nii ahe humɔ kɛ kwɛmɔ ato bii atsɔsemɔ he yɛ mɛɛ gbɛ nɔ?
GBEKƐBII daraa tamɔ kwɛɛnii loo tsei nɔŋŋ yɛ gbɛi pii anɔ. No hewɔ lɛ ebɛ naakpɛɛ, akɛ Biblia lɛ wieɔ nuu ŋa he akɛ “weintso ni woɔ yibii” ni ekɛ ebii lɛ toɔ ‘mutsei bibii ni ebɔle ekpɔlɔ he’ lɛ he. (Lala 128:3) Okwaafonyo baakɛɛ bo akɛ dumɔ nii bibii ahe nitsumɔ bɛ mlɛo, titri lɛ yɛ be mli ni kɔɔyɔŋ tsakemɔ kɛ sũ lɛ ehiii tsɔ̃ lɛ. Nakai nɔŋŋ hu yɛ “naagbee gbii” ni ji jaramɔ bei nɛɛ amli lɛ, ewa waa akɛ aaalɛ loo atsɔse gbekɛbii ni amɛfee mɛi ni baa amɛjeŋ jogbaŋŋ, onukpai ni sheɔ Nyɔŋmɔ gbeyei.—2 Timoteo 3:1-5.
2. Mɛni he hiaa daa koni nine ashɛ ŋmaakpamɔ babaoo nɔ?
2 Bɔni afee ni okwaafonyo akpa yibii kpakpai babaoo lɛ, sũ loo shikpɔŋ ni baa nii, hulu, kɛ nu he miihia. Kɛfata ŋmɔ lɛ mli kɛ nɔ ni adu lɛ he humɔ he lɛ, esa akɛ eto gbɛjianɔ koni ekɛ tsofai ni baagbe kooloi kɛ jwɛi ni fiteɔ edumɔnii lɛ ashwa ŋmɔ lɛ mli kɛ yibaamɔ nibii krokomɛi hu. Ekɛ bei ni mli wawai baakpe beni edumɔnii lɛ kwɛ̃ɔ ni amɛdaraa lɛ, aahu kɛyashi nikpamɔ be mli tɔ̃ɔ. Kwɛ awerɛho ni eeeye kɛ enibaanii lɛ fite! Ni kɛlɛ, kwɛ bɔ ni okwaafonyo mii baashɛ ehe aha, beni yɛ etɔlɛ babaoo lɛ sɛɛ lɛ, ekpaa yibii babaoo lɛ!—Yesaia 60:20-22; 61:3.
3. Te nɔ ni he hiaa fe ekroko kɛ akɛ dumɔ nii to gbekɛbii ahe lɛ, ni mɛɛ kwɛmɔ krɛdɛɛ nɛkɛ esa akɛ gbekɛbii anine ashɛ nɔ?
3 Adesa shihilɛ ni yeɔ omanye lɛ jara wa aahu fe okwaafonyo nikpamɔ nii. No hewɔ lɛ ebɛ naakpɛɛ akɛ ni aaalɛ loo atsɔse gbekɛ yɛ omanyeyeli mli lɛ baanyɛ ahe be kɛ mɔdɛŋbɔɔ babaoo fe ni aaana nibaa nii babaoo. (5 Mose 11:18-21) Kɛ atɛo gbekɛ fioo yɛ wala abɔɔ loo trom mli, ni ashwa nɔ nu ni akɛ suɔmɔ tsɔse lɛ ni afo husui kpakpai awo ehe lɛ, ebaanyɛ eda ni egba mumɔŋ afofro loo fɔfɔii yɛ jeŋ ni jeŋba mli helai yeɔ lɛ ni ekpɔtɔ nɛɛ po mli. Shi kɛ afee lɛ niseniianii loo anyɛ enɔ lɛ, gbekɛ lɛ baaŋala yɛ emligbɛ ni ekolɛ ebaagbo yɛ mumɔŋ. (Kolosebii 3:21; okɛto Yeremia 2:21; 12:2 he.) Yɛ anɔkwale mli lɛ, kwɛmɔ krɛdɛɛ he miihia gbekɛbii fɛɛ!
Daa Gbi Kwɛmɔ Kɛmiijɛ Gbekɛbiiashi
4. Mɛɛ kwɛmɔ loo nɔ nɔjwɛŋmɔ he hiaa gbekɛbii “kɛjɛ gbekɛbiiashi”?
4 Ehe miihia ni fɔlɔi agbala amɛjwɛŋmɔ kɛya fufɔo ni afɔ lɛ ehee lɛ nɔ be fɛɛ be. Shi, ani gbɔmɔtsoŋ loo heloo naa kwɛmɔ pɛ he hiaa gbekɛ lɛ daa gbi? Bɔfo Paulo ŋma eyaha Nyɔŋmɔ tsulɔ Timoteo akɛ: “Ogbekɛbiiashi ojɛ ole ŋmalɛi krɔŋkrɔŋi lɛ, ni aaanyɛ aha ole nii . . . kɛya yiwalaheremɔ mli lɛ.” (2 Timoteo 3:15) No hewɔ lɛ fɔlɔi akwɛmɔ ni Timoteo nine shɛ nɔ, kɛjɛ egbekɛbiiashi lɛ, ji mumɔŋ nɔ̃ hu. Shi gbekɛbiiashi jeɔ shishi kɛjɛɔ mɛɛ be?
5, 6. (a) Mɛni Biblia lɛ kɛɔ yɛ mɔ ni afɔko lɛ lɛ he? (b) Mɛni tsɔɔ akɛ esa akɛ fɔlɔi asusu abifao ni afɔko lɛ lɛ he?
5 Akɛ Hela wiemɔ ni Paulo kɛtsu nii yɛ biɛ (breʹphos) lɛ hu toɔ gbekɛ ni afɔko lɛ lɛ he. Elisabet, Yohane Baptisilɔ lɛ nyɛ lɛ kɛɛ ewekunyo Maria akɛ: “Shi naa, amrɔ pɛ ni oŋamɔ gbee lɛ gbɛɛ yɛ mitoiŋ lɛ, abifao [breʹphos] lɛ kɛ mlifilimɔ tumɔ yɛ mimusuŋ.” (Luka 1:44) No hewɔ lɛ, atsɛɔ mɛi ni afɔko amɛ lɛ po akɛ abifabii, ni Biblia lɛ tsɔɔ akɛ amɛbaanyɛ amɛfee nibii ni yaa nɔ yɛ musu lɛ sɛɛ lɛ he nɔ ko. No hewɔ lɛ, ani esa akɛ, akɛ abifao ni afɔko lɛ lɛ mumɔŋ hilɛ-kɛhamɔ afata kwɛmɔ ni tsɔɔ fɔmɔ hiɛ, ni awoɔ hewalɛ yɛ he bei pii ŋmɛnɛ lɛ he?
6 Nɔ ko ni esa akɛ asusu he nɛ, ejaakɛ odaseyelii jieɔ lɛ kpo akɛ, nɔ ni abifabii ni afɔko amɛ lɛ nuɔ lɛ he baanyɛ aba sɛɛnamɔ aha amɛ loo eeenyɛ eye amɛ awui. Lala nɔkwɛlɔ ko na akɛ etamɔ nɔ ni ele lalai ni etoɔ he gbɛjianɔ ni etiɔ mli elaa lɛ jogbaŋŋ yɛ naakpɛɛ gbɛ ko nɔ, titri lɛ nɔ ni akɛ violin ni gbee da lɛ tswaa lɛ. Beni etsĩ lalai ni etiɔ mli lɛ ata etsɔɔ enyɛ, ni ji violin saŋkutswalɔ ni he esa waa ni no ji enitsumɔ lɛ, enyɛ lɛ kɛɛ lɛ akɛ nɛkɛ lalai nɛɛ nɔŋŋ ji nɔ ni etiɔ mli etswaa beni ehiɛ lɛ hɔ lɛ. Nakai nɔŋŋ hu kɛ abifabii ni afɔko amɛ lɛ anyɛmɛi lɛ kɛ TV nɔ shwɛmɔi akwɛmɔ fee amɛsubaŋ lɛ, eeesa gbekɛbii nɛɛ ahe yɛ gbɛ ni ehiii nɔ. No hewɔ lɛ tsofa-feemɔ he wolo ko wie “hɔ ni TV kwɛmɔ ena enɔ hewalɛ” lɛ he.
7. (a) Fɔlɔi pii egbala amɛjwɛŋmɔ kɛtee abifao ni afɔko lɛ lɛ mumɔŋ hilɛ-kɛhamɔ nɔ yɛ mɛɛ gbɛ nɔ? (b) Mɛɛ nyɛmɔi gbekɛ yɔɔ?
7 Akɛni fɔlɔi pii eyoo bɔ ni kanyamɔ kpakpa he yɔɔ sɛɛnamɔ kɛha abifabii hewɔ lɛ, fɔlɔi pii jeɔ shishi amɛkaneɔ nii, amɛwieɔ, ni amɛlaa amɛhaa amɛbii ni yɔɔ musuŋ lɛ po dani afɔɔ amɛ. Obaanyɛ ofee nakai nɔŋŋ. Eyɛ mli akɛ obi fufɔo lɛ nuŋ wiemɔi lɛ ashishi moŋ, shi ogbee kɛ ŋɔɔmɔ ni haa ehe jɔɔ lɛ ni suɔmɔ yɔɔ mli lɛ he baaba sɛɛnamɔ aha lɛ. Ni yɛ fɔmɔ sɛɛ lɛ, abifao lɛ baaje shishi anu owiemɔi ashishi, ekolɛ oya po fe bɔ ni osusuɔ. Gbekɛ kaseɔ wiemɔi ni yɔɔ hwanyaŋŋ yɛ afii enyɔ loo etɛ pɛ sɛɛ beni eyɔɔ he ni awieɔ wiemɔ nɛɛ babaoo yɛ lɛ. Gbekɛ hu baanyɛ aje shishi akase Biblia mli anɔkwale ni ji “wiemɔ krɔŋŋ” lɛ.—Zefania 3:9. New World Translation.
8. (a) Eka shi faŋŋ akɛ mɛni Biblia lɛ tsɔɔ beni ekɛɔ akɛ Timoteo le ŋmalɛi krɔŋkrɔŋi lɛ ‘kɛjɛ gbekɛbiiashi’ lɛ? (b) Mɛni bafee anɔkwale yɛ Timoteo he?
8 Mɛni Paulo tsɔɔ beni ekɛɛ akɛ Timoteo ‘le ŋmalɛi krɔŋkrɔŋi lɛ kɛjɛ egbekɛbiiashi’ lɛ? Nɔ ni etsɔɔ yɛ faŋŋ mli ji akɛ, Timoteo ena mumɔŋ tsɔsemɔ kɛjɛ be mli ni eji fufɔoo, shi jeee kɛjɛ be mli ni eji gbekɛ nuu fioo lɛ kɛkɛ. Ni enɛ kɛ Hela wiemɔ breʹphos, ni kɔɔ abifao ni afɔ lɛ ehee he lɛ kpaa gbee. (Luka 2:12, 16; Bɔfoi lɛ Asaji 7:19) Timoteo nine shɛ mumɔŋ tsɔsemɔ ni enyɛɔ ekaiɔ lɛ fɛɛ nɔ kɛjɛ enyɛ Eunike kɛ enaa Loise ŋɔɔ. (2 Timoteo 1:5) Wiemɔ akɛ, ‘Bɔ ni akudɔɔ tsofɔ lɛ ahaa lɛ, nakai tso lɛ daa ebatsɔɔ’ lɛ kɔɔ Timoteo he diɛŋtsɛ. ‘Atsɔse lɛ yɛ gbɛ ni sa akɛ etsɔ nɔ’ lɛ nɔ, ni nɔ ni jɛ mli ba ji Nyɔŋmɔ tsulɔ kpakpa ni ebatsɔ.—Abɛi 22:6; Filipibii 2:19-22.
Kwɛmɔ Krɛdɛɛ ni He Hiaa Lɛ
9. (a) Mɛni esa akɛ fɔlɔi akwa feemɔ, ni mɛni hewɔ? (b) Mɛni ehe hiaa ni fɔlɔi afee beni gbekɛ lɛ daa lɛ, ni mɛɛ nɔkwɛmɔ nɔ esa akɛ amɛdi sɛɛ?
9 Gbekɛbii hu tamɔ kwɛɛnii ejaakɛ amɛ fɛɛ amɛbɛ su kome lɛ nɔŋŋ, ni jeee amɛ fɛɛ amɛtsuɔ kwɛmɔ kome ni akɛhaa amɛ lɛ ahe nii. Fɔlɔi ni le nii lɛ kɛ bulɛ baaha sɔrɔto-feemɔ nɛɛ ni amɛkɛ gbekɛ kome etoŋ mɔ kroko he. (Okɛto Galatabii 6:4 he.) Kɛ obii lɛ aaadara ni amɛtsɔmɔ onukpai kpakpai lɛ, no lɛ ehe miihia ni oyoo sui sɔrɔtoi ni amɛhiɛ lɛ, oye obua ni ekpakpai lɛ adara, ni ojie gbohii lɛ kɛjɛ mli. Ni kɛji akɛ oyoo gbɔjɔmɔ loo su ko ni ehiii, ekolɛ yɛ anɔkwa ni ayeee, heloo naa nibii taomɔ, loo pɛsɛmkunya hu? Okɛ mlihilɛ ajaje enɛ, taakɛ Yesu kɛ mlihilɛ jaje ebɔfoi lɛ. (Marko 9:33-37) Titri lɛ, jiemɔ gbekɛ fɛɛ gbekɛ yi be fɛɛ be yɛ emɔdɛŋbɔɔ kɛ esui kpakpai lɛ ahewɔ.
10. Mɛni titri he hiaa gbekɛbii, ni mɛɛ gbɛ nɔ abaatsɔ ni akɛ enɛ aha amɛ?
10 Nɔ ni he hiaa gbekɛbii titri ji kwɛmɔ ni suɔmɔ yɔɔ mli ni akɛhaa amɛ. Yesu he be koni ekɛ kwɛmɔ krɛdɛɛ ni tamɔ nɛkɛ aha gbekɛbii lɛ yɛ esɔɔmɔ lɛ naagbee be ni deka bɛ mli kwraa lɛ po mli. (Marko 10:13-16, 32) Fɔlɔi, nyɛnyiɛa nakai nɔkwɛmɔ nɔ lɛ sɛɛ! Kaafee pɛsɛmkunya, shi moŋ taomɔ be ni okɛ obii ahi shi. Ni kaaha ohiɛ miigbo akɛ ooojie suɔmɔ diɛŋtsɛ kpo otsɔɔ amɛ. Okɛ oniji abala amɛ, taakɛ Yesu fee lɛ. Okɛ hedɔɔ fuamɔi kɛ naashɔmɔi ni miishɛɛ yɔɔ mli aloo amɛ atuu. Beni abi fɔlɔi ni amɛbii etsɔmɔ obalaŋtai ni baa amɛjeŋ jogbaŋŋ lɛ sane yɛ nɔ̃ ŋaawoo ni amɛkɛaaha fɔlɔi krokomɛi lɛ he lɛ, nɔ ni atsi ta shii abɔ yɛ hetooi ni akɛha lɛ mli ji: ‘Suɔmɔ babaoo,’ ‘na be oha amɛ ni okɛ amɛ fɛɛ ahi shi,’ ‘jiemɔ bulɛ kpo otsɔɔ,’ ‘bo amɛ toi diɛŋtsɛ,’ ‘okɛ gbɛtsɔɔmɔ aha moŋ fe wiemɔ babaoo,’ ‘feemɔ mɔ ni damɔɔ shihilɛ ni yɔɔ diɛŋtsɛ naa.’
11. (a) Te esa akɛ fɔlɔi abu kwɛmɔ krɛdɛɛ ni amɛkɛaaha amɛbii lɛ amɛha tɛŋŋ? (b) Mɛɛ be fɔlɔi baanyɛ ni amɛna amɛkɛ amɛbii ateŋ sanegbaa ni sɛɛnamɔ yɔɔ he lɛ amli ŋɔɔmɔ?
11 Kwɛmɔ krɛdɛɛ ni tamɔ nɛkɛ ni akɛhaa lɛ baanyɛ afee miishɛɛ nɔ. Fɔlɔ ko ni eye omanye ŋma akɛ: “Beni wɔbihii enyɔ lɛ darako lɛ, bɔ ni wɔsaa amɛ kɛhaa wɔɔ, wɔkaneɔ woji wɔtsɔɔ amɛ, wɔhaa amɛ mama yɛ saa nɔ, ni wɔkɛ amɛ sɔleɔ lɛ ji miishɛɛ be.” Be ni ayeɔ kutuu nɛkɛ lɛ haa anaa hegbɛ agbaa saji ni baawo fɔlɔ lɛ kɛ ebi lɛ fɛɛ hewalɛ. (Okɛto Romabii 1:11, 12 he.) Gbalashihilɛ mli hefatalɔi ko bo bɔ ni amɛbi ni eye afii etɛ lɛ sɔle ebi ni Nyɔŋmɔ ajɔɔ “Wally” ni ji bɔ ni gbekɛ lɛ tsɛɔ “Malawi” lɛ toi. Etee nɔ esɔle eha “Wally” yɛ gbɛkɛ ni tsara nɔ ba lɛ fɛɛ mli, ni enɛ wo fɔlɔi lɛ hewalɛ waa beni amɛyoo akɛ eetsɔɔ nyɛmimɛi ni yɔɔ Malawi, ni no mli lɛ amɛnaa yiwaa mli amanehulu lɛ. Yoo ko kɛɛ akɛ: ‘Beni miye afii ejwɛ pɛ lɛ, minyɛ ye bua mi ni mikase ŋmalɛi miwo miyitsoŋ, ni milaa Maŋtsɛyeli lalai beni midamɔ sɛi nɔ ni mitsumɔɔ tsɛŋsii kɛ plɛtei ni mimami shaa mli lɛ amli lɛ.’ Ani obaanyɛ osusu bei ni okɛ obii lɛ fɛɛ baanyɛ ana hewalɛwoi ni jɛɔ nyɛ fɛɛ nyɛŋɔɔ baa lɛ mli ŋɔɔmɔ lɛ he?
12. Fɔlɔi Kristofoi kɛ mɛni baaha amɛbii yɛ nilee mli, ni mɛɛ gbɛi nɛkɛ abaanyɛ atsɔ nɔ afee enɛ?
12 Fɔlɔi Kristofoi ni le nii lɛ toɔ gbɛjianɔ amɛhaa daa nikasemɔ. Eyɛ mli akɛ obaanyɛ otsɔ sanebimɔ-kɛ-hetoo nɔ ofee enɛ moŋ, shi ani obaanyɛ oha shihilɛ lɛ afee miishɛɛ nɔ̃ kɛtsɔ tsakemɔi ni oooha eba nikasemɔ lɛ mli titri lɛ kɛha gbekɛbii ni darako lɛ? Obaanyɛ okɛ Biblia mli saji ahe mfonirii ni oootɛŋ, Biblia mli saji ni ooogba, loo ni ooobo sane ko ni abi gbekɛ lɛ ekome ni esaa ehe yɛ mli lɛ toi lɛ afata he. Ha Nyɔŋmɔ Wiemɔ lɛ afee nɔ ni ŋɔɔ jogbaŋŋ kɛha obii lɛ koni amɛshwe enɛ. (1 Petro 2:2, 3) Tsɛ ko kɛɛ: ‘Beni gbekɛbii lɛ darako tsɔ lɛ, wɔkɛ amɛ wamɔɔ yɛ shikpɔŋ ni wɔfeɔ Biblia mli gbɔmɛi ni ehe gbɛi lɛ anifeemɔi ahe nɔkwɛmɔ nɔ wɔkɛkaseɔ amɛ. Gbekɛbii lɛ sumɔɔ enɛ waa.’
13. Mɛɛ sɛɛnamɔ yɔɔ nii ni afeɔ akwɛɔ dã lɛ he, ni mɛni nyɛbaati mli nyɛfee nyɛkwɛ yɛ nɛkɛ bei nɛɛ amli?
13 Nɔ ni jɛɔ nibii ni afeɔ akwɛɔ lɛ mli baa hu ji sanegbaa babaoo ejaakɛ amɛyeɔ amɛbuaa gbekɛbii lɛ koni amɛsaa amɛhe amɛha nibii ni baaba yɛ shihilɛ diɛŋtsɛ mli. Kusserow bii lɛ ateŋ mɔ kome—ni amɛyi 11 lɛ fɛɛ ye Nyɔŋmɔ anɔkwa yɛ Nazi yiwaa be lɛ mli lɛ—wie efɔlɔi ahe akɛ: “Amɛtsɔɔ wɔ bɔ ni wɔɔfee wɔnii wɔha kɛ gbɛ ni wɔɔtsɔ nɔ wɔkɛ Biblia lɛ afã wɔhe. [1 Petro 3:15] Yɛ bei pii amli lɛ wɔfeɔ nɔ ni atsɔɔ wɔ lɛ wɔkwɛɔ, wɔbiɔ saji ni wɔhaa sanebimɔi ahetoo.” Mɛni hewɔ ofeee nakai nɔŋŋ? Obaanyɛ oha oshiɛmɔ wiemɔ lɛ otsɔɔ ni akwɛ bɔ ni obaafee lɛ oha, ni fɔlɔ lɛ baanyɛ afee ehe shiatsɛ. Aloo nɔ ni afeɔ he nɔkwɛmɔ nɔ akwɛɔ lɛ baanyɛ afee nɔ ni kɔɔ kaai ni baa mɔ ko shihilɛ mli diɛŋtsɛ lɛ ahe. (Abɛi 1:10-15) Yoo niŋmalɔ ko kɛɛ akɛ: “Shihilɛi ni mli wawai ni afeɔ enɛ he nɔkwɛmɔ nɔ akwɛɔ lɛ baanyɛ atswa gbekɛ lɛ hesaai kɛ hekɛnɔfɔɔ ama shi. Abaanyɛ akɛ mɔ ko ni efee ehe naanyo ni kɛ zigaret, dãa, loo tsɔfa fɔŋ ko miiha obi lɛ afee nɔkwɛmɔ nɔ akwɛ.” Nɔkwɛmɔ nii ni afeɔ akwɛɔ nɛɛ baanyɛ aye abua bo ni oyoo bɔ ni obi lɛ baatsu sane lɛ he nii aha yɛ shihilɛi ni tamɔ nɛkɛ mli.
14. Mɛni hewɔ obii lɛ ni okɛ amɛ aaasusu saji ahe yɛ suɔmɔ kɛ musuŋtsɔlɛ mli lɛ he hiaa waa nakai lɛ?
14 Kɛ okɛ obi miigba sane lɛ, okɛ musuŋtsɔlɛ gbɛ ni wiemɔi ni nyiɛ sɛɛ nɛɛ ŋmalɔ lɛ kɛtsu nii lɛ nɔŋŋ atsu nii: “Mibi, ohiɛ akakpa mimla lɛ nɔ, shi ha otsui ato mikitai lɛ! Ejaakɛ gbii asɛɛjɛkɛmɔ kɛ wala afii kɛ hejɔlɛ amɛaaŋɔ-fata he amɛhao.” (Abɛi 3:1, 2) Ani esaŋ obi lɛ tsui he kɛ okɛ suɔmɔ tsɔɔ mli oha lɛ akɛ osumɔɔ toiboo ejaakɛ enɛ baaha ena toiŋjɔlɛ kɛ gbii asɛɛjɛkɛmɔ—yɛ anɔkwale mli lɛ, naanɔ wala yɛ Nyɔŋmɔ toiŋjɔlɛ jeŋ hee lɛ mli? Susumɔ obi lɛ su kɛ baŋ he yɛ be mli ni ojɛɔ Nyɔŋmɔ Wiemɔ lɛ mli okɛ lɛ susuɔ saji ahe lɛ. Tsɔ sɔlemɔ nɔ ofee enɛ, ni Yehowa baajɔɔ omɔdɛŋbɔi lɛ anɔ. Nibii kpakpai baanyɛ ajɛ sanegbai ni damɔ Biblia nɔ ni suɔmɔ kɛ musuŋtsɔlɛ yɔɔ mli lɛ mli aba ni ekɛ naanɔ sɛɛnamɔi hu baaba.—Abɛi 22:6.
15. Mɛɛ gbɛ nɔ fɔlɔi aaatsɔ ni amɛye amɛbua amɛbii koni amɛna tsabaa amɛha amɛnaagbai?
15 Kɛ sanegbaa ni tamɔ nɛkɛ baaa yɛ nikasemɔ be ni oto he gbɛjianɔ lɛ mli po lɛ, kaaha saji krokomɛi miigbala ojwɛŋmɔ kɛmiijɛ he. Jeee nɔ ni obi lɛ kɛɔ lɛ pɛ toi esa akɛ obo jogbaŋŋ, shi gbɛ ni etsɔɔ nɔ etsɔɔ ejwɛŋmɔ lɛ hu. Mɔ ko ni yɔɔ enɛ he nilee wo ŋaa akɛ: “Kwɛmɔ obi lɛ. Gbalamɔ ojwɛŋmɔ fɛɛ kɛya enɔ. Ehe miihia ni onu shishi, shi jeee ni onu nɔ ni ekɛɔ lɛ pɛ kɛkɛ. Fɔlɔi ni bɔɔ mɔdɛŋ fioo kɛfataa he nɛkɛ lɛ baanyɛ ni amɛkɛ sɔrɔto-feemɔ agbo aba amɛbii lɛ ashihilɛ mli.” Gbekɛbii ni yɔɔ ŋmɛnɛ lɛ kɛ naagbai ni hiɛdɔɔ yɔɔ mli kpeɔ shii abɔ yɛ skul kɛ hei krokomɛi. Akɛ fɔlɔ lɛ, ha gbekɛ lɛ ajɛ esuɔmɔ mli ewie, ni oye obua lɛ ni esusu saji ahe yɛ Nyɔŋmɔ gbɛ nɔ. Kɛji akɛ obɛ nɔmimaa yɛ gbɛ ni oootsɔ nɔ otsu naagba lɛ he nii lɛ he lɛ, taomɔ Ŋmalɛi lɛ kɛ woji ni atsɔ “tsulɔ anɔkwafo kɛ nilelɔ” lɛ nɔ akɛha lɛ amli. (Mateo 24:45) Tsɔ gbɛ fɛɛ gbɛ nɔ okɛ nɔjwɛŋmɔ loo kwɛmɔ krɛdɛɛ ni he hiaa obi lɛ aha lɛ koni okɛna naagba lɛ naa tsabaa.
Buu Be ni Nyɛyeɔ Kutuu lɛ akɛ Ehe Hiaa Waa
16, 17. (a) Mɛni hewɔ kwɛmɔ kɛ tsɔɔmɔ krɛdɛɛ he hiaa gbekɛbii ŋmɛnɛ lɛ? (b) Mɛni ehe hiaa ni gbekɛbii ale beni amɛfɔlɔi kɛ tsɔsemɔ eha amɛ lɛ?
16 Kwɛmɔ krɛdɛɛ he miihia obalaŋtai waa ŋmɛnɛ fe be fɛɛ, ejaakɛ “naagbee gbii” lɛ amli wɔyɔɔ lɛ, ni “jaramɔ bei” hu nɛ. (2 Timoteo 3:1-5; Mateo 24:3-14) Anɔkwa nilee ni “hereɔ etsɛ yiwala” lɛ he miihia fɔlɔi kɛ amɛbii fɛɛ. (Jajelɔ 7:12) Akɛni nilee ni Nyɔŋmɔ gbeyeishemɔ yɔɔ mli lɛ kɔɔ nilee ni damɔ Biblia nɔ ni akɛtsuɔ nii yɛ gbɛ ni ja nɔ lɛ he hewɔ lɛ, daa tsɔsemɔ ni jɛ Nyɔŋmɔ Wiemɔ lɛ mli lɛ he miihia gbekɛbii lɛ. No hewɔ lɛ, okɛ obii lɛ akase Ŋmalɛi lɛ. Gbaa amɛ Yehowa he sane, tsɔɔmɔ etaomɔ nii amli jogbaŋŋ, ni oha amɛkɛ miishɛɛ akpa be mli ni eshiwoi kpakpai lɛ aaaba mli lɛ gbɛ. Wiemɔ nibii ni tamɔ nɛkɛ he yɛ shĩa, beni gbekɛbii lɛ nyiɛ omasɛi—yɛ anɔkwale mli lɛ, yɛ be fɛɛ be ni sa mli.—5 Mose 6:4-7.
17 Okwaafoi le akɛ jeee dumɔ nii fɛɛ shwereɔ yɛ shihilɛ kome too lɛ nɔŋŋ shishi. Kwɛmɔ krɛdɛɛ he miihia kwɛɛnii. Nakai nɔŋŋ hu gbekɛ fɛɛ gbekɛ yɔɔ sɔrɔto ni kwɛmɔ krɛdɛɛ, nitsɔɔmɔ, kɛ tsɔsemɔ he miihia lɛ. Akɛ nɔkwɛmɔ nɔ lɛ, fɔlɔ lɛ hiɛ ni ekɛaakwɛ gbekɛ lɛ ni tsɔɔ akɛ ekpɛlɛɛɛ nɔ ni yaa nɔ lɛ nɔ lɛ baafee nɔ ni fa ni baafo gbekɛ lɛ gbɛ fɔŋ lɛ sɛɛ, yɛ be mli ni tsɔsemɔ ni mli wa he baahia gbekɛ kroko lɛ. Shi ehe miihia ni obii lɛ fɛɛ ale nɔ hewɔ ni osumɔɔɔ wiemɔi loo nifeemɔi komɛi lɛ, ni esa akɛ fɔlɔi enyɔ lɛ fɛɛ akpa gbee koni tsɔsemɔ lɛ afee ekome. (Efesobii 6:4) Ehe miihia waa titri kɛha fɔlɔi Kristofoi akɛ amɛkɛ gbɛtsɔɔmɔ ni mli ka shi faŋŋ ni kɛ Ŋmalɛi lɛ kpaa gbee aha.
18, 19. Mɛɛ gbɛnaa nii ka fɔlɔi Kristofoi anɔ yɛ amɛbii ahe, ni kɛ atsu nakai nitsumɔ lɛ he nii jogbaŋŋ lɛ mɛni ekolɛ eeenyɛ ejɛ mli aba?
18 Esa akɛ okwaafonyo atɛo loo edu ni ehu enibii ahe yɛ be ni sa pɛpɛɛpɛ mli. Kɛ eshashao shi loo eku ehiɛ eshwie enibaa nii anɔ lɛ, nɔ ko fioo ko pɛ ebaakpa loo enaŋ nɔ ko kwraa. Ojogbaŋŋ, obii bibii lɛ tamɔ “dumɔ nii” ni miidara ni kwɛmɔ krɛdɛɛ he hiaa amɛ bianɛ nɔŋŋ, ni jeee wɔsɛɛ nyɔŋ lɛ nɔ loo wɔsɛɛ afi. Kaaku ohiɛ oshwie hegbɛi ni jara wa waa ni baa ni aaaha amɛya amɛhiɛ yɛ mumɔŋ yɛ Nyɔŋmɔ Wiemɔ lɛ kɛ gbeekpamɔ naa koni ojie je lɛŋ susumɔi ni baaha amɛŋala ni amɛgboi yɛ mumɔŋ lɛ nɔ. Buu ŋmɛlɛtswai kɛ gbii ni onaa hegbɛ okɛ obii hiɔ hekome lɛ akɛ nɔ ni he hiaa waa, ejaakɛ nɛkɛ bei nɛɛ hoɔ oyayaayai. Tsu nii waa ni okɛtɛo sui ni Nyɔŋmɔ gbeyeishemɔ yɔɔ mli ni he hiaa kɛha miishɛɛ shihilɛ akɛ Yehowa tsuji anɔkwafoi lɛ owo obii lɛ amli. (Galatabii 5:22, 23; Kolosebii 3:12-14) Enɛ jeee mɔ kroko nitsumɔ; bo onitsumɔ ni, ni Nyɔŋmɔ baanyɛ aye abua bo koni otsu enɛ.
19 Okɛ mumɔŋ gboshinii kpakpa aha obii lɛ. Okɛ amɛ akase Nyɔŋmɔ Wiemɔ lɛ, okɛ amɛ fɛɛ ana hiɛtserɛjiemɔ kpakpa mli ŋɔɔmɔ kutuu. Ŋɔɔ obii bibii lɛ ofata ohe kɛya Kristofoi akpeei, ni okɛ amɛ afata ohe kɛya Maŋtsɛyeli shiɛmɔ nitsumɔ lɛ nɔ. Tswaa su kɛ baŋ ni Yehowa kpɛlɛɔ nɔ lɛ owo osuɔmɔ bii lɛ amli, ni eka shi faŋŋ akɛ amɛaaha ona miishɛɛ babaoo yɛ sɛɛ mli afii lɛ amli. Lɛlɛŋ, “jalɔ tsɛ aaanya babaoo; ni mɔ ni fɔɔ bi nilelɔ lɛ, emii aaashɛ ehe yɛ ehewɔ. Ha otsɛ kɛ onyɛ mii ashɛ amɛhe, ni mɔ ni fɔo lɛ hu anya.”—Abɛi 23:24, 25.
Nyɔmɔwoo Babaoo
20. Mɛni ji nɔ titri ni haa mɔ ko bafeɔ obalaŋtai bibii afɔlɔ ni eye omanye?
20 Gbekɛbii akwɛmɔ kɛ amɛtsɔsemɔ ji nitsumɔ ko ni yɔɔ hwanyaŋŋ ni sɛɛ kɛ. Atsɛɔ nɛkɛ ‘mutsei bibii ni ebɔle okpɔlɔ he’ nɛɛ atsɔsemɔ ni amɛbatsɔmɔ onukpai ni sheɔ Nyɔŋmɔ gbeyei ni woɔ Maŋtsɛyeli yibii lɛ akɛ nitsumɔ ni heɔ afii 20. (Lala 128:3; Yohane 15:8) Nitsumɔ nɛɛ bafeɔ nɔ ni wa waa beni gbekɛbii lɛ naa afii nyɔŋma kɛ etɛ kɛyaa, beni nɔnyɛɛ ni baa amɛnɔ lɛ faa yɛ bei pii amli, ni fɔlɔi naa akɛ ehe miihia ni amɛha mɔdɛŋ ni amɛbɔɔ ni amɛye amɛbua gbekɛbii lɛ afa lɛ. Shi nɔ titri ni haa ayeɔ omanye lɛ yɛ nakai nɔŋŋ—ni aaafee mɛi ni boɔ sane toi, mɛi ni jieɔ miishɛɛ kɛ shishinumɔ kpo. Kaimɔ akɛ ojwɛŋmɔ ni ooonyɛ ogbala kɛaaya obii lɛ anɔ diɛŋtsɛ lɛ he miihia amɛ. Obaanyɛ oha ojwɛŋmɔ ahi amɛnɔ yɛ nɛkɛ gbɛ nɔ kɛtsɔ suɔmɔ diɛŋtsɛ ni ooojie kpo yɛ amɛhilɛ-kɛhamɔ he lɛ nɔ. Bɔni afee ni oye obua amɛ lɛ, ehe baahia ni okɛ ohe aha amɛ, kɛtsɔ be, suɔmɔ, kɛ amɛhe susumɔ ni he hiaa amɛ diɛŋtsɛ lɛ ni okɛaaha amɛ lɛ nɔ.
21. Mɛni baanyɛ afee nyɔmɔwoo yɛ kwɛmɔ krɛdɛɛ ni akɛhaa gbekɛbii lɛ hewɔ?
21 Nyɔmɔwoo ni baajɛ mɔdɛŋ ni obɔɔ koni okwɛ musuŋbii ni jara wa waa ni Yehowa kɛwo odɛŋ lɛ anɔ lɛ mli aba lɛ baaha otsui anyɔ omli babaoo fe okwaafonyo fɛɛ okwaafonyo nibaa nii babaoo ni eeekpa. (Lala 127:3-5) No hewɔ lɛ fɔlɔi, nyɛyaa nɔ ni nyɛkɛ kwɛmɔ krɛdɛɛ ahaa nyɛbii lɛ. Nyɛfea nakai koni ahi aha amɛ ni nyɛkɛwo wɔŋwɛi Tsɛ, Yehowa, hiɛ nyam.
Te Obaaha Hetoo Tɛŋŋ?
◻ Mɛɛ gbɛ nɔ abaanyɛ akɛ dumɔ nii ahe humɔ kɛ kwɛmɔ ato bii atsɔsemɔ he yɛ?
◻ Mɛɛ kwɛmɔ nɛkɛ esa akɛ gbekɛ nine ashɛ nɔ daa gbi kɛjɛ egbekɛbiiashi?
◻ Mɛɛ kwɛmɔ krɛdɛɛ nɛkɛ he hiaa gbekɛbii, ni mɛɛ gbɛ nɔ aaatsɔ ni akɛ enɛ aha?
◻ Mɛni hewɔ esa akɛ okɛ kwɛmɔ krɛdɛɛ aha obii?