Ni Wɔkɛ Tsuishiŋmɛɛ Aaada Foi Lɛ
“Nyɛhaa . . . wɔkɛ tsuishitoo ada foi ni ka wɔhiɛ lɛ.”—HEBRIBII 12:1.
1. (a) Mɛni akɛfɔɔ wɔhiɛ kɛji wɔjɔɔ wɔhe nɔ wɔha Yehowa Nyɔŋmɔ? (b) Mɛɛ foidamɔ esa akɛ Kristofonyo asaa ehe kɛha?
BENI wɔjɔɔ wɔhe nɔ wɔha Yehowa kɛtsɔ Yesu Kristo nɔ lɛ, kɛkɛ ni, kɛ wɔɔkɛɛ lɛ, Nyɔŋmɔ kɛ mfonirifeemɔŋ foidamɔ ko fɔ wɔhiɛ. Akɛ jweremɔ nɔ ko baaha mɛi fɛɛ ni gbeɔ naa yɛ omanyeyeli mli lɛ yɛ foidamɔ lɛ naagbee. Mɛɛ jweremɔ nɔ? Naanɔ wala! Kɛji Kristofonyo foidalɔ lɛ nine baashɛ nɛkɛ jweremɔ nɔ ni yɔɔ nyam nɛɛ nɔ lɛ, no lɛ ehe miihia ni esaa ehe jogbaŋŋ, jeee kɛha gbɛ kuku foijee ni yɔɔ oya, shi moŋ kɛha gbɛ kakadaŋŋ nɔ foijee. No hewɔ lɛ tsuishiŋmɛɛ he baahia lɛ. Ebaabi ni eŋmɛ etsui shi yɛ gbɛ kakadaŋŋ nɛɛ mli tɔlɛ lɛ diɛŋtsɛ mli kɛ agbɛnɛ tɛmɔtɛi hu ni ekɛkpeɔ yɛ foidamɔ lɛ mli lɛ mli.
2, 3. (a) Mɛni baaye abua wɔ ni wɔda Kristofoi afoi lɛ kɛyashi naagbee? (b) Mɛɛ gbɛ nɔ nyamɔ ye ebua Yesu ni ekɛ tsuishiŋmɛɛ da foi lɛ yɛ?
2 Mɛni baaye abua wɔ ni wɔnyɛ wɔda foi ni tamɔ nɛkɛ kɛyagbe naa? Ojogbaŋŋ, mɛni ye bua Yesu ni enyɛ eŋmɛ etsui shi beni eji gbɔmɔ yɛ shikpɔŋ nɔ lɛ? Ena mligbɛ hewalɛ ko kɛjɛ su ni ji nyamɔ lɛ mli. Hebribii 12:1-3 kaneɔ akɛ: “No hewɔ lɛ, agbɛnɛ wɔ hu, gbii abɔ ni wɔyɔɔ odasefoi babaoo ni ebɔle wɔ tamɔ atatu nɛɛ, nyɛhaa wɔkɛ jatsu fɛɛ jatsu aŋmɛa shi, kɛ esha ni ebɔlɛ wɔhe kpula lɛ, ni wɔkɛ tsuishitoo ada foi ni ka wɔhiɛ lɛ, ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ, mɔ ni nyamɔ ni ka ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ. No hewɔ lɛ nyɛjwɛŋa mɔ ni ŋmɛ etsui shi eha naashai ni eshafeelɔi ŋmɛ lɛ nɛɛ he, koni ekaje nyɛtsine ni nyɛsusumai lɛ anijiaŋ miije wui.”
3 Yɛ emaŋ sɔɔmɔ nitsumɔ lɛ mli fɛɛ lɛ, Yesu nyɛ etee nɔ eda foi lɛ yɛ Yehowa he nyamɔ lɛ hewɔ. (Okɛto Nehemia 8:10 he.) Enyamɔ lɛ ye ebua lɛ ni eŋmɛ etsui shi yɛ sɛŋmɔtso nɔ gbele ni yɔɔ hiɛgbele lɛ po mli, ni no sɛɛ lɛ ena miishɛɛ loo nyamɔ ni anyɛŋ atsɔɔ mli ni ji shi ni atee lɛ kɛjɛ gbohii ateŋ, ni aha ekwɔ kɛtee e-Tsɛ ninejurɔ nɔ, koni ejɛ jɛmɛ ni ekwɛ ni agbe Nyɔŋmɔ nitsumɔ lɛ naa kwraa lɛ. Etsɔ etsuishiŋmɛɛ akɛ mɔ ni fiɔ Nyɔŋmɔ sɛɛ lɛ nɔ etee nɔ ehiɛ enaanɔ wala hegbɛ lɛ mli. Hɛɛ, taakɛ Luka 21:19 kɛɔ lɛ: “Tsuishiŋmɛɛ nyɛkɛaahere nyɛsusumai lɛ.”
4. Mɛɛ nɔkwɛmɔ nɔ Yesu fee efɔ shi eha enanemɛi foidalɔi lɛ, ni esa akɛ wɔha wɔjwɛŋmɔ ahi mɛni nɔ?
4 Yesu Kristo fee nɔkwɛmɔ nɔ ni hi fe fɛɛ eha enanemɛi foidalɔi lɛ, ni enɔkwɛmɔ nɔ lɛ maa nɔ mi kɛhaa wɔ akɛ wɔ hu wɔɔnyɛ wɔye kunim. (1 Petro 2:21) Nɔ ni Yesu kɛɔ wɔ akɛ wɔfee lɛ, wɔbaanyɛ wɔfee. Bɔni eŋmɛ etsui shi lɛ, wɔ hu wɔbaanyɛ wɔfee nakai. Ni beni wɔkɛ shiŋŋ-feemɔ yaa nɔ wɔkaseɔ lɛ lɛ, esa akɛ wɔha wɔjwɛŋmɔi ahi yiŋtoi ahewɔ ni wɔnyaa lɛ anɔ. (Yohane 15:11, 20, 21) Miishɛɛnamɔ baawaje wɔ ni wɔya nɔ wɔda foi lɛ yɛ Yehowa sɔɔmɔ mli kɛyashi be mli ni wɔnine aaashɛ jweremɔ nɔ ni yɔɔ nyam ni ji naanɔ wala lɛ nɔ.—Kolosebii 1:10, 11.
5. Mɛɛ gbɛ nɔ wɔɔtsɔ wɔnya ni wɔna hewalɛ hu kɛha foidamɔ ni ka wɔhiɛ lɛ?
5 Yehowa haa wɔ hewalɛ ni fa kɛteke nɔ, bɔni afee ni wɔya nɔ yɛ foidamɔ lɛ mli. Kɛji aawa wɔ yi lɛ, nakai hewalɛ lɛ kɛ nilee ni wɔyɔɔ yɛ nɔ hewɔ ni wɔnaa hegbɛ akɛ wɔɔtsɔ yiwaa mli lɛ woɔ wɔ hewalɛ. (2 Korintobii 4:7-9) Nɔ fɛɛ nɔ ni baa wɔnɔ yɛ Nyɔŋmɔ gbɛi lɛ hiɛnyamwoo kɛ emaŋtsɛyeli lɛ sɛɛfimɔ hewɔ lɛ bafeɔ yiŋtoo ni wɔdamɔɔ nɔ wɔnaa miishɛɛ ni mɔ ko nyɛɛɛ ahe yɛ wɔdɛŋ. (Yohane 16:22) Enɛ haa wɔnuɔ nɔ hewɔ ni, beni Yudafoi a-Sanhedrin lɛ fa ni ayi bɔfoi lɛ yɛ naakpɛɛ nibii ni Yehowa Nyɔŋmɔ fee yɛ Yesu gbɛfaŋ lɛ he odase ni amɛye lɛ hewɔ lɛ sɛɛ lɛ, amɛna miishɛɛ lɛ shishi, ejaakɛ “egbɛi lɛ ahewɔ lɛ abu amɛ mɛi ni sa akɛ abɔɔ amɛ ahora.” (Bɔfoi lɛ Asaji 5:41, 42) Amɛnyamɔ lɛ jɛɛɛ yiwaa lɛ diɛŋtsɛ mli, shi moŋ kɛjɛ mligbɛ miishɛɛnamɔ ko ni mli kwɔ ni jɛ le ni amɛle akɛ amɛmiisa Yehowa kɛ Yesu hiɛ lɛ mli.
6, 7. Mɛni hewɔ Kristofonyo foidalɔ lɛ mli aaanyɛ afili lɛ yɛ be mli ni enaa amanehulu po lɛ, ni mɛni baajɛ mli aba?
6 Hewalɛ kroko ni wajeɔ wɔ yɛ wɔshihilɛi amli hu ji hiɛnɔkamɔ ni Nyɔŋmɔ kɛma wɔhiɛ lɛ. Taakɛ Paulo wie he lɛ: “Agbɛnɛ, akɛ nɔ ni atsɔ hemɔkɛyeli nɔ abu wɔ bem hewɔ lɛ, wɔkɛ Nyɔŋmɔ teŋ yɛ hejɔlɛ yɛ wɔ-Nuŋtsɔ Yesu Kristo hewɔ; lɛ enɔ wɔtsɔ ni wɔkɛ hemɔkɛyeli lɛ ena gbɛ hu kɛba duromɔ ni wɔdamɔ mli nɛɛ mli, ni wɔshwaa wɔfɔɔ Nyɔŋmɔ anunyam lɛ ni wɔhiɛ ka nɔ lɛ nɔ. Shi jeee no kɛkɛ, shi moŋ wɔshwaa yɛ amanehului amli hu, ejaakɛ wɔle akɛ amanehulu lɛ tsɛɔ tsuishiŋmɛɛ kɛbaa, ni tsuishiŋmɛɛ lɛ hu tsɛɔ niiashikpamɔ kɛbaa; ni niiashikpamɔ lɛ tsɛɔ nɔhiɛkamɔ kɛbaa; ni nɔhiɛkamɔ lɛ wooo mɔ hiɛgbele.”—Romabii 5:1-5.
7 Amanehului ni wɔnaa lɛ diɛŋtsɛ jɛɛɛ nɔ ni haa mɔ miishɛɛ, shi kɛlɛ toiŋjɔlɛ yibii ni ewoɔ yɛ sɛɛ mli lɛ feɔ nakai. Nɛkɛ yibii nɛɛ ji tsuishiŋmɛɛ, shihilɛ ni akpɛlɛ nɔ, hiɛnɔkamɔ, kɛ nakai hiɛnɔkamɔ lɛ mlibaa. Wɔtsui shi ni wɔŋmɛɔ lɛ haa wɔnaa Nyɔŋmɔ nɔkpɛlɛmɔ. Ni kɛji wɔna Nyɔŋmɔ nɔkpɛlɛmɔ lɛ, wɔbaanyɛ wɔkɛ hekɛnɔfɔɔ ana hiɛnɔkamɔ akɛ shiwooi ni ekɛha lɛ baaba mli. Nɛkɛ hiɛnɔkamɔ nɛɛ haa wɔyaa nɔ wɔnyiɛɔ gbɛ ni ja lɛ nɔ ni ewoɔ wɔ hewalɛ yɛ amanehulu shishi aahu kɛyashiɔ be mli ni hiɛnɔkamɔ lɛ baa mli.—2 Korintobii 4:16-18.
Miishɛɛ Ji Mɛi ni Ŋmɛɔ Amɛtsui Shi Lɛ!
8. Mɛni hewɔ nɛkɛ be ni wɔkɛmɛɔ nɛɛ jeee be fitemɔ kɛha wɔ lɛ?
8 Beni wɔmɛɔ be ni ajɛ ŋwɛi ato ni abaajara jweremɔ nii lɛ aha foidalɔi lɛ, tsakemɔi komɛi baa ni wɔnaa mli niiashikpamɔ. Ni nomɛi ji mumɔŋ hiɛyaa yɛ wɔgbɛfaŋ ni jɛɔ kaai ni wɔkɛkpeɔ yɛ omanyeyeli mli baa lɛ mli, ni ehaa wɔnaa Nyɔŋmɔ hiɛ duromɔ babaoo. Emaa mɛi ni wɔji nɔ mi ni ehaa wɔnaa hegbɛ ni wɔkɛjieɔ nakai sui kpakpai ni anɔkwafoi ni hi shi yɛ blema bei amli, titri lɛ wɔ Nɔkwɛmɔ Nɔ, Yesu Kristo jie lɛ kpo lɛ eko kpo. Kaselɔ Yakobo kɛɛ: “Minyɛmimɛi, kɛji nyɛgbee kaai sɔrɔtoi pii amli lɛ, nyɛbua lɛ miishɛɛ sɔŋŋ; ejaakɛ nyɛle akɛ nyɛhemɔkɛyeli kaa lɛ tsɛɔ tsuishiŋmɛɛ kɛbaa. Ni nyɛhaa tsuishiŋmɛɛ lɛ agbea enitsumɔ naa kɛwulaa shi, koni nyɛhi kɛwula shi, ni nyɛye emuu, ni nɔ ko nɔ ko akashwɛ nyɛ.” (Yakobo 1:2-4) Hɛɛ, ekolɛ wɔbaakpa gbɛ akɛ wɔkɛ kaai sɔrɔtoi pii baakpe, shi enɛɛmɛi baaye abua ni eha wɔya nɔ wɔna sui kpakpai. No hewɔ lɛ wɔtsɔɔ nakai feemɔ nɔ wɔtsɔɔ faŋŋ akɛ wɔbaaya nɔ yɛ foidamɔ nɛɛ mli kɛyashi wɔnine aaashɛ jweremɔ nɔ lɛ nɔ, ni tɛmɔtɛi ni wɔkɛkpeɔ lɛ kɔɔɔ he eko.
9, 10. (a) Mɛni hewɔ mɛi ni ŋmɛɔ amɛtsui shi yɛ kaai amli lɛ yɔɔ miishɛɛ lɛ, ni te esa akɛ wɔkpee kaai anaa wɔha tɛŋŋ? (b) Namɛi ji blemabii ni na miishɛɛ lɛ, ni te wɔɔfee tɛŋŋ ni wɔfata amɛhe hu?
9 Belɛ, ebɛ naakpɛɛ akɛ Yakobo kɛɛ: “Ajɔɔ nuu ni ŋmɛɔ etsui shi yɛ kaa mli lɛ, ejaakɛ, kɛ aka lɛ ni esa lɛ, eeena wala akekre, ni Nuŋtsɔ lɛ [Yehowa] ewo shi eha mɛi ni sumɔɔ lɛ lɛ”! (Yakobo 1:12) No hewɔ lɛ nyɛhaa wɔyaa nɔ wɔkpeei kaai anaa be fɛɛ be, ni wɔkɛ Nyɔŋmɔ gbeyeishemɔ sui ni baawaje wɔ ni wɔnyɛ wɔye mli omanye lɛ awula wɔhe.—2 Petro 1:5-8.
10 Kaimɔ akɛ gbɛ ni Nyɔŋmɔ tsɔɔ nɔ ekɛ wɔ yeɔ lɛ jeee ehee loo nɔ ni yɔɔ naakpɛɛ. Ekɛ anɔkwafoi “odasefoi babaoo . . . tamɔ atatu” ni hi shi yɛ blema bei amli lɛ ye yɛ nakai gbɛ nɔŋŋ nɔ yɛ be mli ni amɛtsɔɔ amɛshidaamɔ ni yɔɔ shiŋŋ kɛha Nyɔŋmɔ lɛ. (Hebribii 12:1) Aŋma bɔ ni Nyɔŋmɔ kpɛlɛ amɛnɔ ha lɛ yɛ e-Wiemɔ lɛ mli, ni wɔbuɔ amɛ fɛɛ akɛ amɛyɛ miishɛɛ ejaakɛ amɛhiɛ amɛshidaamɔ lɛ mli yɛ kaa shishi. Yakobo kɛɛ: “Minyɛmimɛi, nyɛŋɔa gbalɔi ni wie yɛ Nuŋtsɔ lɛ [Yehowa] gbɛi amli lɛ nyɛfea amanehulu kɛ tsuishiŋmɛɛ he okadii. Naa, wɔjɔɔ mɛi ni ŋmɛɔ amɛtsui shi lɛ. Nyɛnu Hiob tsuishiŋmɛɛ lɛ he, ni nyɛna Nuŋtsɔ lɛ [Yehowa] naagbee lɛ; akɛ Nuŋtsɔ lɛ [Yehowa] mli tsɔɔ lɛ babaoo, ni emli jɔ hu.” (Yakobo 5:10, 11) Agba afɔ shi akɛ mɛi komɛi baapue yɛ jeŋ shihilɛ nɛɛ mli ni amɛaasɔmɔ Yehowa yɛ emuuyeli mli, yɛ nɛkɛ naagbee gbii ni jaraa babaoo nɛɛ mli, tamɔ bɔ ni nakai gbalɔi lɛ fee yɛ blema afii ohai abɔ ni eho lɛ amli lɛ nɔŋŋ. Ani eŋɔɔɔ wɔnaa akɛ wɔ ji mɛi ni feɔ nakai lɛ?—Daniel 12:3; Kpojiemɔ 7:9.
Sɛɛfimɔ ni Wɔɔna Kɛaajɛ Yehowa Wiemɔ ni Woɔ Mɔ Hewalɛ lɛ Mli
11. Mɛɛ gbɛ nɔ Nyɔŋmɔ Wiemɔ lɛ baanyɛ aye abua wɔ ni wɔŋmɛ wɔtsui shi yɛ, ni mɛni hewɔ esaaa ni wɔfeɔ tamɔ tɛsaa shikpɔŋ ni yɔɔ Yesu abɛbua lɛ mli lɛ?
11 Paulo tsɔɔ yelikɛbuamɔ nɔ kroko kɛha tsuishiŋmɛɛ beni ekɛɛ akɛ “wɔkɛ tsuishitoo aŋmɛ wɔtsui shi, ni wɔtsɔ hewalɛwoo ni jɛ Ŋmalɛi lɛ amli lɛ nɔ wɔhiɛ wɔhiɛnɔkamɔ lɛ mli kpɛŋŋ” lɛ. (Romabii 15:4, The Twentieth Century New Testament) Esa akɛ anɔkwale lɛ, ni ji Nyɔŋmɔ Wiemɔ lɛ, ahe shi jogbaŋŋ yɛ wɔmli bɔni afee ni eha wɔkpɛlɛ nɔ yɛ gbɛ ni ja nɔ be fɛɛ be. Wɔnaŋ sɛɛ ko kwraa kɛji wɔfee wɔhe tamɔ nakai tɛsaa shikpɔŋ ni awie he yɛ Yesu abɛbua ni kɔɔ nidulɔ lɛ he lɛ mli lɛ: “Nakai nɔŋŋ kɛ̃ mɛi ni adũ amɛ yɛ tɛsaai anɔ lɛ ji mɛi ni nuɔ wiemɔ lɛ, ni amrɔ lɛ amɛkɛ miishɛɛ mɔɔ mli, shi amɛbɛ shishifa yɛ amɛ diɛŋtsɛ amɛmli, hewɔ lɛ be fioo ko kɛkɛ amɛhiɔ shi, ni kɛ amanehulu loo yiwalɛ te shi yɛ wiemɔ lɛ hewɔ lɛ, etsɛɛɛ kɛkɛ ni amɛnane tɔ̃tɔ̃ɔ.” (Marko 4:16, 17) Anɔkwale ni jɛ Nyɔŋmɔ Wiemɔ lɛ mli lɛ boteee mɛnɛɛmɛi amli jogbaŋŋ kɛmɔɔɔ shi; no hewɔ lɛ, amanehulu bei amli lɛ, amɛnaaa kanyamɔ ko kɛjɛɛɛ mli akɛ hewalɛ kɛ hiɛnɔkamɔ anɔkwa jɛɛhe.
12. Mɛni esaaa akɛ wɔlakaa wɔhe yɛ he kɛji wɔmiikpɛlɛ sanekpakpa lɛ nɔ?
12 Esaaa akɛ mɛi ni kpɛlɛɔ Maŋtsɛyeli lɛ” he sanekpakpa lɛ nɔ lɛ ateŋ mɔ ko lakaa ehe yɛ nɔ ni baanyiɛ sɛɛ aba he. Eekɔ shihilɛ gbɛ ko ni kɛ amanehulu loo yiwaa baaba enɔ. (2 Timoteo 3:12) Shi esa akɛ ebu lɛ “miishɛɛ sɔŋŋ” akɛ ena hegbɛ akɛ eeetsɔ kaai sɔrɔtoi amli yɛ Nyɔŋmɔ Wiemɔ lɛ ni ehiɛ mli kpɛŋŋ ni ewieɔ he etsɔɔ mɛi krokomɛi hu lɛ hewɔ.—Yakobo 1:2, 3.
13. Mɛɛ gbɛ nɔ ni mɛni hewɔ Paulo mli fili lɛ yɛ Kristofoi ni yɔɔ Tesalonika lɛ ahewɔ lɛ?
13 Yɛ klɛŋklɛŋ afii oha lɛ mli lɛ, shitee-kɛ-wolɔi ni yɔɔ Tesalonika lɛ fee basabasa yɛ Paulo shiɛmɔ lɛ hewɔ. Beni Paulo tee Beroea lɛ, nɛkɛ yiwalɔi nɛɛ tiu lɛ kɛtee jɛmɛ hu bɔni afee ni amɛyatee naagba babaoo shi. Ni bɔfo ni awaa lɛ yi lɛ ŋma wolo eyaha anɔkwafoi ni eshwɛ yɛ sɛɛ yɛ Tesalonika lɛ akɛ: “Esa wɔ akɛ wɔdaa Nyɔŋmɔ shi daa yɛ nyɛhewɔ bɔ ni sa, anyɛmimɛi, ejaakɛ nyɛhemɔkɛyeli lɛ miida naakpa, ni nyɛ fɛɛ nyɛteŋ mɔ fɛɛ mɔ suɔmɔ ni ekɛsumɔɔ enanemɛi lɛ miifa kɛmiiya nɔ aahu, no hewɔ lɛ wɔ diɛŋtsɛ tete wɔshwaa wɔfɔɔ nyɛnɔ yɛ Nyɔŋmɔ asafoi lɛ amli, yɛ nyɛtsuishiŋmɛɛ kɛ nyɛhemɔkɛyeli ni nyɛhiɛ yɛ nyɛyiwalɛi kɛ nyɛmanehului ni nyɛmia nyɛhiɛ yɛ mli lɛŋ lɛ ahewɔ, nii ni ji Nyɔŋmɔ kojomɔ ni ja gbɛ lɛ he okadi ni anaa faŋŋ, koni abu nyɛ akɛ nyɛsa Nyɔŋmɔ maŋtsɛyeli ni nyɛnaa hewɔ nɔ lɛ.” (2 Tesalonikabii 1:3-5) Yɛ amanehului ni amɛna yɛ henyɛlɔi adɛŋ lɛ fɛɛ sɛɛ lɛ, Tesalonika Kristofoi lɛ dara akɛ mɛi ni tamɔ Kristo kɛ agbɛnɛ yɛ yifalɛ hu mli. Te fee tɛŋŋ ni enɛ ba lɛ nakai? Ejaakɛ amɛna hewalɛ kɛjɛ Yehowa wiemɔ ni woɔ mɔ hewalɛ lɛ mli. Amɛbo Nuŋtsɔ lɛ famɔi atoi ni amɛtee nɔ amɛda foi lɛ kɛ tsuishiŋmɛɛ.—2 Tesalonikabii 2:13-17.
Kɛha Mɛi Krokomɛi Ayiwalaheremɔ
14. (a) Mɛɛ yiŋtoi ahewɔ wɔkɛ miishɛɛ hiɔ sɔɔmɔ lɛ mli yɛ amanehului ni wɔkɛkpeɔ lɛ fɛɛ sɛɛ lɛ? (b) Mɛni he wɔsɔleɔ yɛ, ni mɛni hewɔ?
14 Nyɔŋmɔ bembuu titri hewɔ ni wɔkɛ anɔkwayeli ŋmɛɔ wɔtsui shi yɛ amanehului kɛ yiwaai ahewɔ ni wɔyeee he ŋkɔmɔ lɛ. Shi yiŋtoo kroko ni pɛsɛmkunya bɛ mli hewɔ wɔbaa wɔhe shi wɔhaa nibii ni tamɔ nakai lɛ: bɔni afee ni wɔkɛ Maŋtsɛyeli lɛ he miishɛɛ sane lɛ aha mɛi krokomɛi koni ana shiɛlɔi pii kɛha Nyɔŋmɔ Maŋtsɛyeli lɛ ni ‘amɛkɛ amɛnaabu ajaje kɛshɛ yiwalaheremɔ he.’ (Romabii 10:10) Esa akɛ mɛi ni tsuɔ nii yɛ Nyɔŋmɔ sɔɔmɔ mli lɛ asɔle ni nikpamɔ Nuŋtsɔ lɛ ajɔɔ amɛnitsumɔ lɛ nɔ kɛtsɔ Maŋtsɛyeli lɛ he shiɛlɔi pii ni ekɛaaba mli lɛ nɔ, (Mateo 9:38) Paulo ŋma Timoteo akɛ: “Nii ni onu yɛ minaa yɛ odasefoi pii ahiɛ lɛ, no nɔŋŋ otuu owo gbɔmɛi anɔkwafoi adɛŋ, mɛi ni yɔɔ hewalɛ ni amɛkɛaatsɔɔ mɛi krokomɛi hu lɛ. Miamɔ ohiɛ yɛ amanehulu mli, taakɛ Yesu Kristo tabilɔ kpakpa ko.”—2 Timoteo 2:2, 3.
15. Mɛni hewɔ esa akɛ wɔba wɔjeŋ tamɔ asraafoi kɛ akaŋshilɔi ni “miishi mple hu lɛ”?
15 Asraafonyo tsiɔ ehe kwraa kɛjɛɔ maŋnyo ni jeee asraafonyo lɛ shihilɛ ni yɔɔ ogbɔjɔ lɛ he. Nakai nɔŋŋ hu, esaaa ni wɔkɛ wɔhe woɔ mɛi ni fataaa Nuŋtsɔ lɛ asraafoi lɛ ahe, shi moŋ, yɛ anɔkwale mli lɛ amɛfata henyɛlɔi lɛ ahe lɛ asaji amli. No hewɔ lɛ, Paulo tee nɔ eŋma Timoteo akɛ: “Mɔ ko enyiɛɛɛ ta gbɛ ni ekɛ ehe wo shia saji amli, koni esa mɔ ni fa lɛ kɛtee ta lɛŋ lɛ hiɛ. Ni kɛji mɔ ko miishi mple hu lɛ, afiŋ lɛ kunimyeli akekre, akɛ ja eshi lɛ mla naa.” (2 Timoteo 2:4, 5) Kɛji foidalɔi lɛ miibɔ mɔdɛŋ ni amɛye kunim yɛ “wala akekre” lɛ he foidamɔ lɛ mli lɛ, no lɛ esa akɛ amɛkase henɔyeli ni amɛtsi amɛhe kɛjɛ jatsui ni tsii ni sɛɛnamɔ bɛ he lɛ kɛ nibii ni baatɔ̃tɔ̃ amɛnaji hu lɛ ahe. Yɛ nɛkɛ gbɛ nɔ lɛ amɛjwɛŋmɔ baanyɛ ahi yiwalaheremɔ sanekpakpa lɛ ni amɛkɛaaha mɛi krokomɛi lɛ pɛ nɔ.—Yakobo 1:12; okɛto 1 Korintobii 9:24, 25 he.
16. Mɛni anyɛŋ afimɔ, ni namɛi ahewɔ wɔŋmɛɔ wɔtsui shi lɛ?
16 Akɛni wɔsumɔɔ Nyɔŋmɔ kɛ mɛi ni tamɔ gwantɛŋi ni taoɔ amɛna lɛ lɛ hewɔ lɛ, wɔkɛ miishɛɛ kpeeɔ shihilɛi ni wɔkɛkpeɔ lɛ anaa bɔni afee ni wɔkɛ yiwalaheremɔ sanekpakpa lɛ aya mɛi krokomɛi aŋɔɔ. Henyɛlɔi baanyɛ amɛtsi wɔnaa yɛ Nyɔŋmɔ Wiemɔ lɛ shiɛmɔ mli. Shi anyɛŋ atsi Nyɔŋmɔ Wiemɔ lɛ naa, ni anyɛŋ afimɔ wiemɔ ni wɔɔwie wɔtsɔɔ mɛi krokomɛi ni etsɔ amɛyiwalaheremɔ lɛ hu. Paulo tsɔɔ nɔ hewɔ ni esumɔɔ ni ekpee kaa naa lɛ mli etsɔɔ Timoteo akɛ: “Ohiɛ ahi Yesu Kristo ni te shi kɛjɛ gbohii ateŋ ni jɛ David seshi mli lɛ nɔ, yɛ misanekpakpa lɛ naa, no he amane nɔŋŋ minaa, kɛyashi kpaai amli tete, tamɔ efɔŋfeelɔ ko; shi kɛlɛ Nyɔŋmɔ wiemɔ lɛ awooo lɛ kpaa. Enɛ hewɔ lɛ mimiaa mihiɛ yɛ saji fɛɛ mli yɛ mɛi ni ahalaa amɛ lɛ ahewɔ, koni amɛ hu amɛnine ashɛ walaheremɔ ni yɔɔ Kristo Yesu mli lɛ kɛ naanɔ anunyam lɛ nɔ.” (2 Timoteo 2:8-10) Ŋmɛnɛ, jeee shwɛɛnii fioo ni ato amɛhe gbɛjianɔ kɛha ŋwɛi Maŋtsɛyeli lɛ pɛ yɔɔ wɔjwɛŋmɔ mli, shi moŋ asafo babaoo ni ji Tookwɛlɔ Kpakpa, Yesu Kristo tooi krokomɛi lɛ hu, asafo babaoo ni baana shikpɔŋ nɔ Paradeiso mli amɛhi yɛ Kristo Maŋtsɛyeli lɛ mli lɛ.—Kpojiemɔ 7:9-17.
17. Mɛni hewɔ esaaa akɛ wɔkpaa foidamɔ lɛ, ni kɛji wɔtee nɔ wɔda foi lɛ kɛyashi naagbee lɛ, mɛni jɛɔ mli baa?
17 Kɛji wɔji mɛi ni kpaa nitsumɔ lɛ, no lɛ wɔyeŋ wɔbuaŋ wɔ diɛŋtsɛ wɔhe kɛ mɛi krokomɛi hu ni amɛna yiwalaheremɔ. Kɛ wɔŋmɛ wɔtsui shi yɛ Kristofoi afoidamɔ lɛ mli, ni tɛmɔtɛi ni wɔkɛkpeɔ lɛ kɔɔɔ he eko lɛ, no lɛ wɔɔfee wɔhe mɛi ni efee klalo daa nɛɛ kɛha jweremɔ nɔ lɛ, ni wɔɔye wɔbua mɛi krokomɛi yɛ gbɛ pɔtɛɛ nɔ kɛha yiwalaheremɔ, yɛ be mli ni wɔfeɔ hewalɛwoo he nɔkwɛmɔ nɔ kɛhaa mɛi krokomɛi lɛ. Bɔ fɛɛ bɔ ni wɔhiɛnɔkamɔ ji, kɛ ŋwɛi nɔ jio, shikpɔŋ nɔ nɔ jio lɛ, Paulo su ni ji “miitiu oti lɛ kɛyashɛ . . . jweremɔ nɔ lɛ he” lɛ ji su kpakpa ni esa akɛ wɔkase—Filipibii 3:14, 15.
Shifimɔ ni Wɔkɛaaya Nɔ yɛ Foidamɔ lɛ Mli
18. Jweremɔ nɔ lɛ ni wɔnine aaashɛ nɔ lɛ damɔ mɛni nɔ, shi kɛji wɔɔhiɛ mli kɛyashi naagbee lɛ, mɛni esa akɛ wɔkwa?
18 Ni wɔɔgbe wɔ Kristofoi agbɛ ni wɔkɔ lɛ nɔ nyiɛmɔ naa yɛ kunimyeli mli ni wɔkɛbu Yehowa bem ni wɔnine ashɛ jweremɔ nɔ ni esaa eto wɔ lɛ nɔ lɛ biɔ shifimɔ ni wɔkɛaaya nɔ yɛ foidamɔ lɛ jɛkɛmɔ fɛɛ mli. No hewɔ lɛ, kɛji wɔkɛ jatsui ni tsuuu jalɛ he nii shwie wɔnɔ lɛ, no lɛ wɔnyɛŋ wɔhiɛ mli kɛyashi naagbee. Kɛji wɔjie nakai nibii lɛ yɛ wɔhe po lɛ, taomɔ nii lɛ ka he emli wa bɔ ni ebiɔ ni wɔwaje wɔhe jogbaŋŋ bɔ ni wɔɔnyɛ kɛji wɔɔnyɛ wɔshɛ he. No hewɔ lɛ, Paulo wo ŋaa akɛ: “Nyɛhaa wɔkɛ jatsu fɛɛ jatsu aŋmɛa shi, kɛ esha ni ebɔle wɔhe kpula lɛ, ni wɔkɛ tsuishitoo ada foi ni ka wɔhiɛ lɛ.” (Hebribii 12:1) Taakɛ Yesu fee lɛ, esaaa ni wɔjwɛŋmɔ hiɔ amanehului ni wɔkɛaakpe lɛ anɔ fe nine, shi moŋ esa akɛ wɔbu nomɛi akɛ nyɔmɔ bibioo ni wɔwoɔ kɛhaa jweremɔ nɔ ni yɔɔ nyam lɛ.—Okɛto Romabii 8:18 he.
19. (a) Mɛɛ hekɛnɔfɔɔ Paulo jie lɛ kpo beni ebɛŋkɛ ewala naagbee lɛ? (b) Beni wɔbɛŋkɛɔ tsuishiŋmɛɛ he foidamɔ lɛ naagbee lɛ, mɛɛ hekɛnɔfɔɔ esa akɛ wɔna yɛ nyɔmɔwoo ni awo shi yɛ he lɛ mli?
19 Beni Paulo bɛŋkɛ ewala shihilɛ lɛ naagbee gbɛ lɛ, enyɛ ekɛɛ akɛ: “Ta kpakpa lɛ, miwuu; foidamɔ lɛ, mida migbe naa; hemɔkɛyeli lɛ, mihiɛ mli tswɛ; nɔ ni eshwɛ ni ka shi ha mi ji jalɛ akekre lɛ.” (2 Timoteo 4:7, 8) Wɔmiida nɛkɛ tsuishiŋmɛɛ he foi nɛɛ bɔni afee ni wɔnine ashɛ jweremɔ nɔ ni ji naanɔ wala nɔ. Kɛji wɔtsuishiŋmɛɛ lɛ tã loo eba naagbee akɛni foidamɔ lɛ sɛɛ jɛkɛ fioo fe bɔ ni wɔyasusu beni wɔje foidamɔ lɛ shishi lɛ, no lɛ wɔnine baanyɛ shi beni wɔbɛŋkɛ nyɔmɔwoo ni awo shi yɛ he lɛ he kpaakpa. Ojwɛŋmɔ akafee bo enyɔnyɔ. Ŋwanejee ko kwraa bɛ he akɛ nyɔmɔwoo lɛ yɛ.
20. Mɛni esa akɛ efee wɔfaishitswaa kɛyashi wɔbaashɛ foidamɔ lɛ naagbee?
20 No hewɔ lɛ ekaba akɛ eeetɔ wɔhiŋmɛii kɛ kwɛmɔ ni wɔkwɛɔ gbɛ akɛ amanehulu kpeteŋkpele lɛ aaaje shishi, ni ekɛ hiɛkpatamɔ aba Babilon Kpeteŋkpele lɛ nɔ klɛŋklɛŋ kɛ agbɛnɛ Abonsam gbɛjianɔtoo ni eshwɛ lɛ hu nɔ lɛ he. (2 Petro 3:11, 12) Yɛ okadii ni jeɔ kpo faŋŋ ni ebɔle wɔhe lɛ hewɔ lɛ, eba akɛ wɔɔkwɛ wɔhiɛ yɛ hemɔkɛyeli mli. Eba akɛ wɔɔwaje hewalɛ ni wɔkɛŋmɛɔ wɔtsui shi lɛ, ni eba akɛ wɔkɛ ekaa aaaya nɔ yɛ foidamɔ ni Yehowa Nyɔŋmɔ kɛfɔ wɔhiɛ lɛ mli, kɛyashi wɔbaashɛ naagbee lɛ he ni wɔnine aaashɛ jweremɔ nɔ lɛ nɔ, kɛha Yehowa bembuu kɛtsɔ Yesu Kristo nɔ.
Te Obaaha Hetoo Oha Tɛŋŋ?
◻ Mɛɛ foidamɔ esa akɛ Kristofonyo asaa ehe kɛha?
◻ Mɛni hewɔ nyamɔ he hiaa waa kɛha foidamɔ Iɛ?
◻ Mɛɛ yiŋtoi titrii ahewɔ wɔyaa nɔ wɔhiɔ sɔɔmɔ lɛ mli yɛ amanehului Iɛ fɛɛ asɛɛ lɛ?
◻ Mɛni hewɔ esaaa akɛ wɔkpaa foidamɔ ni Nyɔŋmɔ kɛto wɔhiɛ lɛ?
[Mfoniri ni yɔɔ baafa 15]
Esa akɛ Kristofoi aŋmɛ amɛtsui shi, tamɔ afeɔ yɛ foidamɔ kakadaŋŋ mli lɛ
[Mfoniri ni yɔɔ baafa 17]
Kɛji foidalɔi Iɛ baashɛ “wala akekre” Iɛ he lɛ, no Iɛ esa akɛ amɛkase henɔyeli