Wolo Ni Akɛmaje Romabii Lɛ
15 Shi wɔ mɛi ni wɔhe wa lɛ, esa akɛ wɔye wɔbua mɛi ni he waaa+ lɛ koni amɛnyɛ amɛdamɔ nibii ni wa kɛhã amɛ lɛ anaa, ni esaaa akɛ wɔfeɔ nibii ni sa wɔ pɛ wɔhiɛ.+ 2 Nyɛhãa wɔteŋ mɔ fɛɛ mɔ asaa enyɛmi gbɔmɔ hiɛ koni ehi ehã enyɛmi lɛ, ni etswa lɛ ema shi hu.+ 3 Ejaakɛ Kristo lɛ po efeee nibii ni sa lɛ pɛ ehiɛ,+ shi tamɔ bɔ ni aŋma lɛ: “Mɛi ni jɛɔ bo lɛ ajɛmɔ lɛ ebakã minɔ.”+ 4 Ejaakɛ nibii fɛɛ ni aŋma ato momo lɛ, aŋma koni etsɔɔ wɔ nii,+ koni kɛtsɔ wɔshifimɔ+ kɛ agbɛnɛ hu, kɛtsɔ Ŋmalɛ lɛ mli miishɛjemɔ lɛ nɔ lɛ, wɔná hiɛnɔkamɔ.+ 5 Agbɛnɛ, Nyɔŋmɔ ni kɛ shifimɔ kɛ miishɛjemɔ hãa lɛ ahã nyɛná jwɛŋmɔ ni Kristo Yesu ná lɛ nɔŋŋ eko yɛ nyɛteŋ, 6 koni nyɛfee ekome+ ni nyɛkɛ gbee* kome awo wɔ-Nuŋtsɔ Yesu Kristo Nyɔŋmɔ kɛ e-Tsɛ lɛ hiɛ nyam.
7 No hewɔ lɛ, nyɛhereherea nyɛhe atuu,*+ tamɔ bɔ ni Kristo hu here wɔ atuu lɛ,+ ni nyɛkɛwo Nyɔŋmɔ hiɛ nyam. 8 Ejaakɛ miikɛɛ nyɛ akɛ, Kristo batsɔ mɛi ni afolɔ amɛ ketia lɛ asɔɔlɔ+ yɛ Nyɔŋmɔ anɔkwale lɛ hewɔ, koni ekɛma shiwoi ni Nyɔŋmɔ kɛhã amɛtsɛmɛi lɛ nɔ mi,+ 9 koni jeŋmaji lɛ awo Nyɔŋmɔ hiɛ nyam yɛ emɔbɔnalɛ lɛ hewɔ.+ Tamɔ bɔ ni aŋma lɛ, akɛ: “No hewɔ majaje bo matsɔɔ yɛ jeŋmaji lɛ ateŋ, ni malá majie ogbɛ́i lɛ yi lɛ.”+ 10 Ni esaa ekɛɛ: “Nyɛ jeŋmaji, nyɛkɛ emaŋ lɛ anyaa.”+ 11 Agbɛnɛ hu: “Nyɛ jeŋmaji fɛɛ, nyɛjiea Yehowa* yi, ni majimaji fɛɛ ajiea eyi.”+ 12 Agbɛnɛ hu, Yesaia kɛɛ akɛ: “Yishai shishifã lɛ baaba,+ mɔ ni baate shi koni ebaye jeŋmaji lɛ anɔ lɛ;+ ni lɛ enɔ jeŋmaji lɛ baatsɔ aná hiɛnɔkamɔ.”+ 13 Nyɔŋmɔ ni kɛ hiɛnɔkamɔ hãa lɛ ahã nyɛyimɔ obɔbɔ kɛ miishɛɛ kɛ toiŋjɔlɛ akɛni nyɛkɛ nyɛhiɛ fɔ̃ɔ enɔ lɛ hewɔ, koni nyɛtsɔ mumɔ krɔŋkrɔŋ lɛ hewalɛ nɔ nyɛná hiɛnɔkamɔ kɛteke nɔ.+
14 Agbɛnɛ, minyɛmimɛi, mi diɛŋtsɛ lɛ miyɛ nɔmimaa yɛ nyɛhewɔ, akɛ nyɛ diɛŋtsɛ hu nyɛyimɔ obɔbɔ kɛ ekpakpafeemɔ, ni nyɛyimɔ obɔbɔ kɛ nilee fɛɛ hu, ni akɛ, nyɛbaanyɛ nyɛwiewiee nyɛtsɔɔ nyɛhe.* 15 Shi yɛ saji komɛi ahe lɛ, miŋma nyɛ ni mikɛ nɔ ko eteee nyɛ, koni mikɛkai nyɛ ekoŋŋ, yɛ dromɔ ni Nyɔŋmɔ kɛdro mi 16 akɛ mifee Kristo Yesu tsulɔ mihã jeŋmaji lɛ hewɔ.+ Miitsu nitsumɔ krɔŋkrɔŋ ni ji Nyɔŋmɔ sane kpakpa lɛ shiɛmɔ lɛ,+ koni jeŋmaji nɛɛ afee afɔle ni sa ehiɛ, ni akɛ mumɔ krɔŋkrɔŋ efee lɛ krɔŋkrɔŋ lɛ.
17 No hewɔ lɛ, yɛ nibii ni kɔɔ Nyɔŋmɔ he lɛ amli lɛ, miyɛ yiŋtoo hewɔ ni esa akɛ manya yɛ Kristo Yesu hewɔ. 18 Ejaakɛ mikaŋ akɛ mawie nɔ ko akɛ ja nɔ ni Kristo tsɔ minɔ efee bɔ ni afee ni jeŋmaji lɛ abo toi lɛ; etsɔ miwiemɔ kɛ minifeemɔ, 19 okadii kɛ naakpɛɛ nii ahewalɛ,+ kɛ Nyɔŋmɔ mumɔ lɛ hewalɛ nɔ efee enɛ, enɛ hewɔ lɛ, mishiɛ Kristo he sane kpakpa lɛ fitsofitso kɛjɛ Yerusalem kɛbɔle shi aahu kɛyashɛ Ilirikum tɔ̃ɔ.+ 20 Anɔkwa, yɛ nɛkɛ gbɛ nɔ lɛ, oti ni mikɛma mihiɛ ji akɛ mijajeŋ sane kpakpa lɛ yɛ he ni atsĩ Kristo gbɛ́i lɛ tã momo yɛ lɛ, bɔ ni afee ni mikama mitsũ lɛ mima mɔ kroko faneshi nɔ; 21 shi tamɔ bɔ ni aŋma lɛ, akɛ: “Mɛi ni nine shɛko ehe amaniɛ nɔ lɛ baana, ni mɛi ni nuko lɛ baanu shishi.”+
22 Enɛ hewɔ hu ni atsĩ mi gbɛ shii abɔ ni minyɛko maba nyɛŋɔɔ lolo lɛ. 23 Shi amrɔ nɛɛ, shikpɔŋ ko bɛ kpokpai nɛɛ anɔ ni mishiɛko yɛ nɔ, ni afii babaoo nɛ* ni mishwe waa akɛ maba nyɛŋɔɔ. 24 No hewɔ lɛ, mihiɛ kã nɔ akɛ, kɛ́ miifã gbɛ kɛmiiya Spain lɛ, mabana nyɛ, koni kɛ́ mikɛnyɛ bahi shi ni miná miishɛɛ fioo lɛ, nyɛyajie mi gbɛ. 25 Shi amrɔ nɛɛ etsɛŋ ni mafã gbɛ kɛya Yerusalem koni mayasɔmɔ mɛi krɔŋkrɔŋi lɛ.+ 26 Ejaakɛ mɛi ni yɔɔ Makedonia kɛ Akaia lɛ kɛ miishɛɛ eŋɔ nibii ni amɛyɔɔ lɛ eko amɛhã akɛ onia kɛhã mɛi krɔŋkrɔŋi ni yɔɔ Yerusalem lɛ ateŋ ohiafoi lɛ.+ 27 Lɛɛlɛŋ, amɛfee nakai kɛ miishɛɛ, shi yɛ anɔkwale mli lɛ, amɛhiɛ amɛ nyɔmɔ; ejaakɛ kɛji jeŋmaji lɛ ená amɛnibii ni jɛ Nyɔŋmɔ ŋɔɔ lɛ eko lɛ, belɛ sɔ̃ kã jeŋmajiaŋbii lɛ hu anɔ akɛ amɛkɛ amɛheloonaa nibii asɔmɔ amɛ.+ 28 No hewɔ lɛ, kɛ́ migbe enɛ naa ni mikɛ onia* nɛɛ yahã amɛ shweshweeshwe lɛ, mabatsɔ nyɛŋɔɔ kɛya Spain. 29 Agbɛnɛ hu, mile akɛ kɛ́ miba nyɛŋɔɔ lɛ, mikɛ jɔɔmɔ ni eteke nɔ ni jɛ Kristo ŋɔɔ baaba.
30 Agbɛnɛ, nyɛmimɛi, miitsɔ wɔ-Nuŋtsɔ Yesu Kristo nɔ, ni miitsɔ mumɔ lɛ suɔmɔ lɛ nɔ miiwo nyɛ hewalɛ akɛ, nyɛfataa mihe ni wɔkɛ hiɛdɔɔ asɔlea wɔhãa Nyɔŋmɔ yɛ mihewɔ,+ 31 koni ajie mi+ kɛje mɛi ni heee yeee ni yɔɔ Yudea lɛ adɛŋ, koni sɔɔmɔ ni mayasɔmɔ yɛ Yerusalem lɛ asa mɛi krɔŋkrɔŋi lɛ ahiɛ jogbaŋŋ,+ 32 koni yɛ Nyɔŋmɔ suɔmɔ naa lɛ, mikɛ miishɛɛ aba nyɛŋɔɔ ni mi kɛ nyɛ fɛɛ lɛ, wɔwowoo wɔhe hewalɛ. 33 Nyɔŋmɔ ni hãa toiŋjɔlɛ lɛ kɛ nyɛ fɛɛ ahia shi.+ Amen.