Nyɛmimɛi Asuɔmɔ Feɔ Ni
Filemon Wolo lɛ Mli Saji Otii
YESU KRISTO kɛ “kita hee” ha esɛɛnyiɛlɔi lɛ akɛ amɛsumɔ amɛhe taakɛ bɔ ni esumɔ amɛ lɛ. (Yohane 13:34, 35) Yɛ nakai suɔmɔ lɛ hewɔ lɛ amɛbaagboi po amɛha amɛhe. Hɛɛ, nyɛmimɛi asuɔmɔ mli wa nakai ni efeɔ nii hu.
Bɔfo Paulo yɛ nɔmimaa akɛ nyɛmimɛi asuɔmɔ baatsirɛ Filemon, Kristofonyo ko ni kɛ ehe ebɔ Kolose, maŋtiase ko ni yɔɔ Asia Bibioo lɛ asafo lɛ he lɛ. Suɔmɔ ekanya Filemon momo ni egbele eshia eha koni akɛfee Kristofoi akpee he. Filemon tsulɔ, Onesimo ejo foi, ekolɛ eju shika koni ekɛfa gbɛ lɛ kɛya Roma, he ni yɛ sɛɛ mli lɛ ekɛ Paulo kpe ni ebaatsɔ Kristofonyo lɛ.
Beni awo lɛ tsuŋ yɛ Roma aaafee afi 60-61 Ŋ.B. mli lɛ, Paulo ŋma wolo ko, titri lɛ kɛyaha Filemon. Ekpa Filemon fai akɛ ehere Onesimo ni kuɔ esɛɛ kɛbaa lɛ atuu yɛ nyɛmimɛi asuɔmɔ mli. Kanemɔ nɛkɛ wolo nɛɛ, ni obaana akɛ eji suɔmɔ kɛ ŋaa he nɔkwɛmɔ nɔ fɛfɛo ko—nɔ ni Yehowa webii baanyɛ akase.
Yijiemɔ kɛha Suɔmɔ kɛ Hemɔkɛyeli
Yɛ be mli ni ewieɔ etsɔɔ Filemon kɛ mɛi krokomɛi lɛ, klɛŋklɛŋ lɛ, Paulo kɛ yijiemɔ ha. (Flm Kukuji 1-7) Bɔfo lɛ etee nɔ enu suɔmɔ ni Filemon yɔɔ kɛha Kristo kɛ mɛi krɔŋkrɔŋi lɛ fɛɛ kɛ ehemɔkɛyeli lɛ he. Enɛ tsirɛ Paulo koni eda Yehowa shi ni eha ena miishɛɛ kɛ miishɛjemɔ babaoo. Ani wɔjieɔ nanemɛi heyelilɔi ni yɔɔ suɔmɔ kɛ hemɔkɛyeli ni ekaaa lɛ ayi? Esa akɛ wɔfee nakai.
Asumɔɔ ŋaawoo ni damɔ suɔmɔ nɔ lɛ yɛ be fɛɛ mli, yɛ be mli ni akɛ nanemɛi Kristofoi yeɔ taakɛ Paulo wiemɔi lɛ tsɔɔ mli lɛ. (Flm Kukuji 8-14) Yɛ be mli ni ekɛ ŋaa etsu nii lɛ, bɔfo lɛ kɛɛ, eyɛ mli akɛ ebaanyɛ efa Filemon ni efee “nɔ ni sa” moŋ, shi ehala akɛ ekɛ ŋaawoo aaaha moŋ. Koni efee mɛni? Koni ehere tsulɔ Onesimo ekoŋŋ yɛ mlihilɛ mli! Kulɛ Paulo baasumɔ ni Onesimo kɛ sɔɔmɔ ni he yɔɔ sɛɛnamɔ lɛ aya nɔ aha lɛ, shi efeŋ nakai ni Filemon leee he eko.
Nibii ni tamɔ nɔ ni ehiii ni ba lɛ he eba sɛɛnamɔ, taakɛ Paulo kɛɛ yɛ enɛ sɛɛ lɛ. (Flm Kukuji 15-21) Yɛ anɔkwale mli lɛ, ekpakpa ejɛ Onesimo foijee lɛ mli eba. Mɛni hewɔ? Ejaakɛ agbɛnɛ Filemon baanyɛ ahere Iɛ akɛ Kristofonyo nyɛminuu anɔkwafo ni jɛɔ esuɔmɔ mli efeɔ nii, shi jeee akɛ tsulɔ ni yeee anɔkwale ni efeee nii yɛ suɔmɔ mli. Paulo bi ni Filemon ahere Onesimo taakɛ bɔ ni ebaahere lɛ Paulo lɛ pɛpɛɛpɛ. Kɛ Onesimo efee Filemon efɔŋ ko lɛ, bɔfo lɛ baasumɔ ni ewo nyɔmɔ. Bɔni afee ni enyɛ eha Filemon akpɛlɛ nɔ lɛ, Paulo kai lɛ akɛ ehiɛ lɛ bɔfo lɛ nyɔmɔ yɛ Kristofonyo ni ebatsɔ lɛ hewɔ. No hewɔ lɛ Paulo yɛ nɔmimaa akɛ Filemon baafee babaoo po fe bɔ ni abiɔ ni efee lɛ. Mɛɛ ŋaa kɛ suɔmɔ nibimɔ nɛ! Yɛ anɔkwale mli lɛ, enɛ ji gbɛ ni esa akɛ wɔtsɔ nɔ wɔkɛ nanemɛi Kristofoi aye yɛ.
Paulo kɛ ewolo lɛ ba naagbee kɛ hiɛnɔkamɔ, ŋamɔi kɛ ejurɔ ni ebiɔ ni aba amɛnɔ. (Flm Kukuji 22-25) Eyɛ hiɛnɔkamɔ akɛ yɛ sɔlemɔ ni mɛi krokomɛi sɔleɔ haa lɛ lɛ hewɔ lɛ, etsɛŋ ni abaaŋmɛɛ ehe kɛjɛ etsuŋwoo lɛ mli. (Taakɛ Paulo wolo ni ji enyɔ ni eŋma eyaha Timoteo lɛ tsɔɔ lɛ, aha nakai sɔlemɔi lɛ ahetoo.) Yɛ be mli ni ekɛ ewolo lɛ baa naagbee lɛ, Paulo kɛ ŋamɔi maje, ni etsɔɔ akɛ Yesu Kristo duromɔ kɛ mumɔ ni Filemon kɛ enanemɛi Yehowa jalɔi lɛ jieɔ lɛ kpo lɛ ahi shi.
[Akrabatsa/Mfoniri ni yɔɔ baafa 23]
Mɔ ni Fe Tsulɔ: Paulo wie yɛ Filemon tsulɔ Onesimo ni jo foi lɛ he akɛ: “Ekolɛ agbala nyɛmli fioo, koni ona lɛ daa, jeee akɛ tsulɔ dɔŋŋ, shi moŋ mɔ ni fe tsulɔ tete, mɔ ni ji suɔmɔ nyɛmi, ni ji minɔ titri, shi bo moŋ onɔŋ aaha yɛ heloo kɛ Nuŋtsɔ lɛ gbɛfaŋ fɛɛ.” (Filemon 15, 16) Aŋmɛɔ nyɔŋyeli gbɛ yɛ Roma Maŋtsɛyeli lɛ mli, ni Paulo yɔse nakai “hegbɛi ni yeɔ nɔ” lɛ. (Romabii 13:1-7) Ebiii ni tsulɔ loo nyɔŋ ko atse atua, shi eye ebua aŋkroaŋkroi ni tamɔ nɛkɛ koni amɛna mumɔŋ heyeli akɛ Kristofoi. Yɛ lɛ diɛŋtsɛ eŋaawoo kɛha tsuji koni amɛba amɛhe shi amɛha amɛ nuŋtsɔmɛi lɛ hewɔ lɛ, Paulo ha Onesimo ku esɛɛ kɛtee Filemon ŋɔɔ ekoŋŋ. (Kolosebii 3:22-24; Tito 2:9, 10) Onesimo fe je lɛŋ tsulɔ ko agbɛnɛ. Eji naanyo heyelilɔ ni asumɔɔ lɛ ni kɛ heshibaa ni akɛtoɔ nii ahe baaha Filemon akɛ tsulɔ kpakpa, mɔ ni kɛ shishitoo mlai ni Nyɔŋmɔ gbeyeishemɔ yɔɔ mli yeɔ enɔ ni jieɔ nyɛmimɛi asuɔmɔ kpo.