Oblahii Kɛ Oblayei—nyɛtsɔsea Nyɛhenumɔ Nii lɛ!
“Shi mɛi ni edara lɛ anɔ̃ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.”—HEBRIBII 5:14.
1, 2. (a) Kɛ́ akɛ shihilɛ ni wɔyɔɔ mli ŋmɛnɛ lɛ to blema Kristofoi ni hi Efeso lɛ anɔ̃ he lɛ, te anaa tɛŋŋ? (b) Mɛɛ nyɛmɔi baanyɛ abu ohe kɛjɛ oshara mli, ni obaanyɛ oná nyɛmɔi nɛɛ yɛ mɛɛ gbɛ nɔ?
“NYƐKWƐA bɔ ni nyɛaafee ní nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛdekã he nii, ejaakɛ gbii nɛɛ gbii fɔji ni.” (Efesobii 5:15, 16) Kɛjɛ be mli ni bɔfo Paulo ŋmala nakai wiemɔi lɛ afii akpei enyɔ ni eho nɛ lɛ, ‘gbɔmɛi fɔji kɛ shishiulɔi ewo wu yɛ efɔŋ mli.’ Wɔyɛ “jaramɔ bei,” aloo taakɛ shishitsɔɔmɔ kroko tsɛɔ lɛ lɛ, bei ni “eyi obɔ kɛ oshara” mli.[1]—2 Timoteo 3:1-5, 13; Phillips.
2 Shi kɛlɛ, obaanyɛ ojo awui ní osharai ni baanyɛ atee amɛhe yɛ ogbɛ nɔ lɛ baanyɛ aye bo lɛ naa foi kɛtsɔ ‘hiɛtɛɛ, nilee kɛ jwɛŋmɔ’ ní oooná lɛ nɔ. (Abɛi 1:4) Abɛi 2:10-12 lɛ kɛɔ akɛ: “Ejaakɛ ŋaalee aaabote otsui mli ni nilee aaaŋɔɔ osusuma naa; jwɛŋmɔ aaabaa oyi jogbaŋŋ, sane shishinumɔ aaabu ohe, ní ejieo kɛjɛ gbɛ fɔŋ nɔ, kɛjɛ mɛi ni wieɔ nibii kɔ̃ɔdɔ̃ji lɛ adɛŋ.” Shi te ooofee tɛŋŋ onyɛ oná nɛkɛ sui nɛɛ? Hebribii 5:14 lɛ kɛɔ akɛ: “Mɛi ni edara lɛ anɔ̃ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.” Taakɛ eji yɛ ŋaalee fɛɛ ŋaalee gbɛfaŋ lɛ, le ní mɔ ko aaale ehenumɔ nii kɛ nitsumɔ jogbaŋŋ lɛ biɔ tsɔsemɔ. Hela wiemɔ ni Paulo kɛtsu nii lɛ shishinumɔ diɛŋtsɛ ji ‘ní átsɔse mɔ ko jogbaŋŋ tamɔ kpɔiaŋgbɔlelɔ.’[2] Mɛɛ gbɛ nɔ oootsɔ oje tsɔsemɔ nɛɛ shishi?
Ohenumɔ Nii lɛ Tsɔsemɔ
3. Mɛɛ gbɛ nɔ oootsɔ okɛ ohenumɔ nii atsu nii kɛji ehe miihia ni okpɛ oyiŋ yɛ sane ko he?
3 Kadimɔ akɛ otsɔseɔ ohenumɔ nii—ni ji nyɛmɔ ni oyɔɔ ní okɛyooɔ ekpakpa kɛjɛɔ efɔŋ he lɛ—kɛtsɔɔ ‘fɔ ní okɛfɔɔ nitsumɔ’ lɛ nɔ. Kɛ́ esa akɛ okpɛ oyiŋ yɛ sane ko he lɛ, efɔɔɔ kaa akɛ ohiɛ ní oooka, kanyamɔ ko kɛkɛ ní okɛaatsu nii, loo ní ooofee nɔ ni mɛi krokomɛi fɛɛ feɔ lɛ baafee nɔ ni nilee yɔɔ mli. Kɛ́ obaafee yiŋkpɛi ni nilee yɔɔ mli lɛ, no lɛ esa akɛ okɛ ohenumɔ nii lɛ atsu nii. Yɛ mɛɛ gbɛ nɔ? Klɛŋklɛŋ kwraa lɛ, kɛtsɔ pɛimɔ ni ooopɛi shihilɛ lɛ mli jogbaŋŋ koni ole anɔkwa saji lɛ fɛɛ lɛ nɔ. Kɛ́ ehe miihia lɛ, bi saji. Bɔɔ mɔdɛŋ ni ole hegbɛi ni obaanyɛ okɛtsu nii. Abɛi 13:16 lɛ kɛɔ akɛ: “Hiɛtɛ̃lɔ fɛɛ hiɛtɛ̃lɔ feɔ enii nilee mli.” No sɛɛ lɛ, bɔɔ mɔdɛŋ ni ole Biblia mlai loo shishitoo mlai ni kɔɔ nakai sane lɛ he. (Abɛi 3:5) Shi, dani ooonyɛ ofee enɛ lɛ, ja oyɛ Biblia lɛ he nilee dã. No hewɔ ni Paulo woɔ wɔ hewalɛ ní wɔye “niyenii kpakpa” lɛ—ní wɔkase anɔkwale lɛ “lɛɛmɔ kɛ kɛlɛ kɛ mlikwɔlɛ kɛ nɔkwɔlɛ.”—Efesobii 3:18.
4. Mɛni hewɔ Nyɔŋmɔ shishitoo mlai ahe nilee he hiaa lɛ?
4 Nakai ní wɔɔfee lɛ he miihia ejaakɛ wɔyeee emuu, ni wɔtɔ̃ɔ babaoo. (1 Mose 8:21; Romabii 5:12) Yeremia 17:9 lɛ kɛɔ akɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa.” Kɛ́ wɔhaaa shishitoo mlai ni Nyɔŋmɔ gbeyeishemɔ yɔɔ mli akudɔ wɔ lɛ, no lɛ wɔbaanyɛ wɔlaka wɔhe, ni wɔɔsusu akɛ nɔ̃ fɔŋ lɛ ji ekpakpa—akɛni wɔheloo lɛ shweɔ nakai nii lɛ hewɔ kɛkɛ. (Okɛto Yesaia 5:20 he.) Lalatsɛ lɛ ŋma akɛ: “Te oblanyo aaafee tɛŋŋ ni eeeha egbɛ lɛ he atseŋ? No ji akɛ ekwɛ ehe nɔ jogbaŋŋ yɛ owiemɔ lɛ naa. Okpɔi lɛ haa mináa yitsoŋ, hewɔ lɛ minyɛɔ apasa gbɛ̀i fɛɛ.”—Lala 119:9, 104.
5. (a) Mɛni hewɔ oblahii kɛ oblayei komɛi diɔ apasa gbɛ̀i asɛɛ lɛ? (b) Mɛɛ gbɛ nɔ oblayoo ko tsɔ eha anɔkwale lɛ tsɔ enɔ̃?
5 Mɛni hewɔ oblahii kɛ oblayei komɛi ní atsɔse amɛ yɛ Kristofoi ashiai amli lɛ eyadi apasa gbɛ̀i asɛɛ lɛ? Ani eeenyɛ efee akɛ gbɔmɛi nɛɛ ‘yooo nii ni ji Nyɔŋmɔ suɔmɔnaa nii kpakpai ni sa ehiɛ jogbaŋŋ ni hi kɛwula shi lɛ’? (Romabii 12:2) Ekolɛ amɛteŋ mɛi komɛi kɛ amɛfɔlɔi baa kpeei ni amɛnyɛɔ amɛkɛɔ Biblia shishijee tsɔɔmɔi lɛ ekomɛi kɛjɛɔ amɛjwɛŋmɔ mli. Shi kɛ́ abi ní amɛye amɛhemɔkɛyelii lɛ ahe odase loo amɛtsɔɔ Nyɔŋmɔ Wiemɔ lɛ mli nibii ni mli kwɔlɔ lɛ ekomɛi amli lɛ, eyɛ nijiaŋwujee akɛ aaana akɛ amɛnilee mli kwɔɔɔ kwraa. Abaanyɛ alaka oblahii kɛ oblayei ni tamɔ nɛkɛ yɛ gbɛ ní waaa kwraa nɔ. (Efesobii 4:14) Kɛ́ enɛ ji anɔkwale yɛ ogbɛfaŋ lɛ, no lɛ, mɛni hewɔ otswaaa ofai shi akɛ ooofee tsakemɔi? Nyɛmi yoo fioo ko kaiɔ akɛ: “Mitao nibii amli. Mibi mihe akɛ, ‘Te mifeɔ tɛŋŋ mileɔ akɛ enɛ ji jamɔ ni ja lɛ? Te mifeɔ tɛŋŋ mileɔ akɛ Nyɔŋmɔ ko yɛ ní atsɛɔ lɛ Yehowa hu?’ ”a Ŋmalɛi lɛ amli kwɛmɔ jogbaŋŋ kɔne nyɛmi yoo nɛɛ yiŋ akɛ nibii ni ekase kɛjɛ efɔlɔi aŋɔɔ lɛ ji anɔkwale lɛɛlɛŋ!—Okɛto Bɔfoi lɛ Asaji 17:11 he.[3]
6. Mɛɛ gbɛ nɔ oootsɔ ‘oka nɔ fɛɛ nɔ okwɛ akɛ esa Nuntsɔ’ Yehowa “hiɛ lo’’?
6 Akɛni akɛ Yehowa shishitoo mlai ahe nilee ewula bo hewɔ lɛ, obaanyɛ otsɔ gbɛ ni waaa nɔ ‘oka nɔ fɛɛ nɔ okwɛ akɛ esa Nuntsɔ lɛ hiɛ lo.’ (Efesobii 5:10) Ni kɛlɛ, kɛ́ obɛ nɔmimaa yɛ nilee gbɛ ní esa akɛ okɔ yɛ shihilɛ pɔtɛɛ ko mli hu? Sɔlemɔ obi Yehowa gbɛtsɔɔmɔ. (Lala 119:144) Bɔɔ mɔdɛŋ ní okɛ ofɔlɔi loo Kristofonyo ko ní eda yɛ mumɔŋ asusu sane lɛ he. (Abɛi 15:22; 27:17) Obaanyɛ oná gbɛtsɔɔmɔ ni yeɔ buaa hu kɛtsɔ saji amli ní oootao yɛ Biblia lɛ kɛ Buu Mɔɔ Asafo lɛ woji amli lɛ nɔ. (Abɛi 2:3-5) Babaoo ní okɛ ohenumɔ nii lɛ tsuɔ nii lɛ, babaoo ní amɛnaa baa ji no.
Sɛɛyoomɔ ní Akɛaatsu Nii yɛ Hiɛtserɛjiemɔ Mli
7, 8. (a) Mɛɛ gbɛ nɔ oootsɔ okɛ ohenumɔ nii atsu nii ni okɛna kɛji esa akɛ oya henaabuamɔ ko shishi loo esaaa? (b) Mɛni ji Biblia lɛ susumɔ yɛ hiɛtserɛjiemɔ he?
7 Agbɛnɛ, ha wɔkwɛ gbɛ ni oootsɔ nɔ okɛ ohenumɔ nii lɛ atsu nii yɛ shihilɛi pɔtɛɛ komɛi amli. Ákɛ nɔkwɛmɔnɔ lɛ, ŋɔɔ lɛ akɛ afɔ̃ bo nine kɛtee henaabuamɔ ko shishi. Ekolɛ onine eshɛ ehe wolo ní akala ní akɛmiitswa henaabuamɔ lɛ he adafi po nɔ. Akɛɛ bo akɛ Odasefoi oblahii kɛ oblayei saŋŋ baaba jɛmɛ. Shi abaahe shika fioo ko koni akɛtsu nyɔmɔ ni abaabɔ lɛ he nii. Ani esa akɛ oya?
8 Ojogbaŋŋ, okɛ ohenumɔ nii lɛ atsu nii. Klɛŋklɛŋ lɛ, lé anɔkwalei ni kɔɔ he lɛ fɛɛ. Te henaabuamɔ nɛɛ baada aha tɛŋŋ? Namɛi baaba jɛmɛ? Mɛɛ be ebaaje shishi? Mɛɛ be abaakpa? Mɛɛ nifeemɔi ato he gbɛjianɔ? Te abaakwɛ nɔ aha tɛŋŋ? No sɛɛ lɛ, taomɔ saji amli fioo, ni opɛi saji otii tamɔ “Hiɛtserɛjiemɔ Henaabuamɔi,” kɛ “Hiɛtserɛjiemɔ” mli yɛ Watch Tower Publications Indexb lɛ mli. Mɛni ekolɛ osaji amlipɛimɔ lɛ baajie lɛ kpo? Nɔ kome ji akɛ, Yehowa ebuuu henaabuamɔ ní akɛnaa miishɛɛ lɛ fɔ́. Yɛ anɔkwale mli lɛ, Jajelɔ 8:15 lɛ kɛɔ akɛ, kɛfata nii ní atsuɔ kɛ mɔdɛŋbɔɔ he lɛ, “ekpakpa ko bɛ ha gbɔmɔ yɛ hulu shishi nɛɛ fe nɔ ni eeeye nii ni enu ní ená miishɛɛ.” Ejaakɛ, Yesu Kristo diɛŋtsɛ po tee okpɔlɔŋmɛɛ krɛdɛɛi ashishi, kɛ kɛ́ hoo lɛ, yookpeemɔ kome hu. (Luka 5:27-29; Yohane 2:1-10) Kɛ́ aha eŋmɛ pɛpɛɛpɛ lɛ, hiɛtserɛjiemɔ henaabuamɔi ahe baanyɛ aba sɛɛnamɔ.
9, 10. (a) Mɛɛ osharai henaabuamɔi komɛi baanyɛ ekɛba? (b) Mɛɛ sanebimɔi obaanyɛ obi ohe dani okpɛ oyiŋ akɛ obaaya henaabuamɔ ko shishi aloo oyaaa?
9 Shi kɛlɛ, henaabuamɔi ní atooo he gbɛjianɔ jogbaŋŋ lɛ baanyɛ ekɛ naagbai aba. Yɛ 1 Korintobii 10:8 lɛ, wɔkaneɔ bɔ ni naanyobɔɔi ní nilee bɛ mli lɛ kɛ mɛi lɛ yawo ajwamaŋbɔɔ mli, ní “gbi kome nɔ lɛ [Israelbii ní yeee anɔkwa lɛ] akpei nyɔŋmai enyɔ kɛ etɛ nyɔnyɔi lɛ.” Wɔnaa kɔkɔbɔɔ kroko hu ni sa hesusumɔ waa yɛ Romabii 13:13 lɛ: “Nyɛhaa wɔbaa wɔjeŋ fɛfɛo bɔ ni sa shwane, jeee yɛ yakayaka shwɛmɔ kɛ dãatɔɔ mli; jeee ajwamaŋbɔɔ kɛ nyenyeŋtswibɔɔ mli, jeee béi kɛ awuŋayeli mli.” (Okɛto 1 Petro 4:3 he.) Eji anɔkwale akɛ, anyɛŋ atsɔɔ yibɔ pɔtɛɛ ko ní esa akɛ amɛba henaabuamɔ ko shishi. Shi niiashikpamɔ tsɔɔ akɛ, kɛ́ henaabuamɔ ko da waa lɛ, ewa akɛ aaanyɛ akwɛ nɔ jogbaŋŋ. Enyɛŋ eba akɛ henaabuamɔi bibii ní akwɛɔ nɔ jogbaŋŋ lɛ baanyɛ atsɔ “okpɔlɔŋmɛɛi kɛ hoofeemɔi.”—Galatabii 5:21, Byington.[4]
10 Ŋwanejee ko bɛ he akɛ, osaji amlitaomɔ lɛ baatée sanebimɔi krokomɛi ashi, tamɔ ákɛ: Ani Kristofoi komɛi ní amɛdara yɛ mumɔŋ kɛ afii amli baaba henaabuamɔ lɛ shishi? Yɛ anɔkwale mli lɛ, namɔ tsɛ́ɔ henaabuamɔ lɛ? Ani yiŋtoo ní akɛbuaa he naa lɛ ji ní akɛwo naanyobɔɔ kpakpa he hewalɛ, aloo ní sɛɛnamɔ ajɛ mli aba kɛha mɔ ko? Ani naatsii komɛi yɛ mɛi ni baanyɛ aba jɛmɛ lɛ agbɛfaŋ? Kɛ́ henaabuamɔ lɛ baaba nɔ yɛ otsi lɛ naagbee lɛ, ani abaakpa yɛ be ni sa mli bɔni afee ni mɛi ni ba lɛ anyɛ amɛkɛ amɛhe awo Kristofoi asɔɔmɔ nitsumɔ lɛ mli enɔ jetsɛremɔ? Kɛ́ abaatswa lalai ni abaajo hu lɛ, ani ekɛ tɛi ni afolɔ ashwie shi kɛha Kristofoi lɛ baakpã gbee? (2 Korintobii 6:3) Ekolɛ nɛkɛ saji nɛɛ abimɔ efeŋ mlɛo. Shi Abɛi 22:3 lɛ bɔɔ kɔkɔ akɛ: “Hiɛtɛ̃lɔ naa efɔŋ ní baa, ni eteeɔ ehe, shi mɛi ni náko jwɛŋmɔ lɛ batsɔɔ he kɛhoɔ, ni amɛnaa nɔ̃.” Hɛɛ, obaanyɛ ojo oshara shihilɛi anaa foi kɛtsɔ ohenumɔ nii lɛ kɛ nitsumɔ nɔ.
Sɛɛyoomɔ yɛ Owolo Kasemɔ he Gbɛjianɔtoo Mli
11. Oblahii kɛ oblayei baanyɛ amɛkɛ amɛhenumɔ nii atsu nii ni amɛkɛto amɛwɔsɛɛ be he gbɛjianɔ yɛ mɛɛ gbɛ nɔ?
11 Biblia lɛ kɛɔ akɛ nilee yɛ mli ákɛ aaato gbɛjianɔ kɛha wɔsɛɛ. (Abɛi 21:5) Ani okɛ ofɔlɔi esusu owɔsɛɛ he? Ekolɛ oto gbɛjianɔ akɛ okɛ ohe baawo be-fɛɛ sɔɔmɔ nitsumɔ lɛ mli akɛ gbɛgbalɔ. Yɛ anɔkwale mli lɛ, wala be mli nitsumɔ ko bɛ ní haa mɔ tsui nyɔɔ emli babaoo fe enɛ. Kɛ́ ooná nikasemɔ sui kpakpai ni ooná hesaai yɛ sɔɔmɔ nitsumɔ lɛ mli lɛ, no lɛ oosaa ohe kɛha owala be mli nitsumɔ ni yɔɔ miishɛɛ nɛɛ. Ani osusu gbɛ ní oootsɔ nɔ okwɛ ohe yɛ sɔɔmɔ nitsumɔ lɛ mli lɛ he? Kɛji wɔsɛɛ lɛ, ohala akɛ obaaná weku lɛ, ani obaanyɛ otsu ogbɛnaa nii krokomɛi ni ekɛbaafata he lɛ ahe nii? Nibii ni tamɔ enɛɛmɛi ahe yiŋkpɛi ní ŋmɛɔ pɛpɛɛpɛ, ní anyɛɔ akɛtsuɔ nii lɛ, biɔ ni okɛ ohenumɔ nii atsu nii.
12. (a) Wekui komɛi ehala akɛ amɛbaatsake amɛhe amɛwo shika gbɛfaŋ shihilɛi ní tsakeɔ lɛ amli yɛ mɛɛ gbɛ nɔ? (b) Ani woloŋlee mli tsɔsemɔ babaoo ní aaaná kɛya hiɛ lɛ tsɔɔ doo akɛ ekɛ gbɛgbamɔ ní akɛaafee oti ni ma hiɛ lɛ kpãaa gbee? Tsɔɔmɔ mli.
12 Yɛ hei komɛi lɛ, anyɛɔ anáa ŋaa loo ninenaa nitsumɔ mli tsɔsemɔ yɛ nitsumɔ lɛ mli. Oblahii kɛ oblayei komɛi yɛ ní kaseɔ weku lɛ nitsumɔ loo amɛnáa tsɔsemɔ kɛjɛɔ nanemɛi ni edara, ni yɔɔ nitsumɔi lɛ adɛŋ. Mɛi krokomɛi hu yɛ ni beni amɛyaa skul lɛ, amɛkaseɔ nibii ni wɔsɛɛ ko lɛ, ehe baaba sɛɛnamɔ kɛha amɛ yɛ nitsumɔ mli. Kɛ́ hegbɛi ni tamɔ nɛkɛ bɛ lɛ, yɛ be mli ní asusu saji ahe jogbaŋŋ sɛɛ lɛ, fɔlɔi lɛ baanyɛ ato gbɛjianɔ koni amɛbii lɛ aná woloŋlee mli tsɔsemɔ babaoo lolo yɛ nɔtsamɔ skul lɛ sɛɛ. Gbɛjianɔ ní aaato kɛtsɔ hiɛ yɛ nɛkɛ gbɛ nɔ koni anyɛ atsu dalɛ be mli gbɛnaa nii ahe nii, kɛ titri lɛ, bɔni afee ní anyɛ akɛ he awo gbɛgbamɔ sɔɔmɔ lɛ mli yɛ be kakadaŋŋ mli lɛ jeee nɔ ni kɛ Nyɔŋmɔ Maŋtsɛyeli lɛ ní akɛaaye klɛŋklɛŋ gbɛhe lɛ kpãaa gbee. (Mateo 6:33) Ni woloŋlee mli tsɔsemɔ babaoo ní aaana kɛya hiɛ lɛ etsɔɔɔ akɛ anyɛŋ asɔmɔ akɛ gbɛgbalɔ. Ákɛ nɔkwɛmɔnɔ lɛ, kulɛ Odasefonyo oblayoo ko miitao ní ekɛ be babaoo afee gbɛgbalɔ. Beni egbe nɔtsamɔ skul naa lɛ, efɔlɔi—ní amɛ diɛŋtsɛ hu amɛji daa gbɛgbalɔi lɛ—to gbɛjianɔ amɛha lɛ ní etsa skul lɛ nɔ kɛya hiɛ saŋŋ. Enyɛ ekɛ ehe wo gbɛgbamɔ sɔɔmɔ lɛ mli beni eyaa skul lɛ, ni amrɔ nɛɛ ekase nitsumɔ ní enyɛɔ ekɛkwɛɔ ehe beni eyaa nɔ esɔmɔɔ akɛ gbɛgbalɔ lɛ.[6]
13. Te esa akɛ wekui asusu nibii ni baajɛ woloŋlee mli tsɔsemɔ babaoo ní aaaná lɛ mli aba lɛ he amɛha tɛŋŋ?
13 Yɛ woloŋlee mli tsɔsemɔ babaoo ní aaaná lɛ gbɛfaŋ lɛ, weku fɛɛ weku yɛ hegbɛ, ni eji egbɛnaa nii hu akɛ lɛ diɛŋtsɛ ekpɛ eyiŋ. Kɛ́ ahala tsɔsemɔ nɛɛ yɛ gbɛ ni sa nɔ lɛ, ebaanyɛ eye ebua. Shi kɛlɛ, ebaanyɛ efee tsɔne. Kɛ́ oosusu tsɔsemɔ ni tamɔ nɛkɛ he lɛ, mɛni ji oti ni ma ohiɛ? Ani no ji ní okɛsaa ohe koni onyɛ otsu dalɛ be mli gbɛnaa nii ahe nii yɛ gbɛ ni woo yɔɔ mli nɔ? Aloo ani “nii wuji otaoɔ oha ohe”? (Yeremia 45:5; 2 Tesalonikabii 3:10; 1 Timoteo 5:8; 6:9) Ni kɛ́ abaatiu woloŋlee mli tsɔsemɔ babaoo sɛɛ ní ahiii shia, ní ekolɛ awɔɔ skul lɛ mli hu? Ani ebaafee nɔ ni nilee yɔɔ mli, yɛ kɔkɔbɔɔ ní Paulo kɛha akɛ “naanyobɔɔ fɔŋ fiteɔ jeŋba kpakpa” lɛ hewɔ? (1 Korintobii 15:33; 2 Timoteo 2:22) Kaimɔ hu akɛ “be lɛ faaa dɔŋŋ.” (1 Korintobii 7:29) Be enyiɛ obaatuu oha nɛkɛ tsɔsemɔ nɛɛ? Ani obaahe óblahiaŋ loo óblayeiaŋ be lɛ mli babaoo? Kɛ́ nakai lɛ, mɛɛ gbɛ nɔ oootsɔ ní okɛ hewalɛwoo ní Biblia lɛ kɛhaa akɛ “asaŋ kaimɔ obɔlɔ lɛ yɛ oblahiaŋ gbii lɛ amli” lɛ atsu nii? (Jajelɔ 12:1) Kɛfata he lɛ, ani nibii ni obaakase lɛ baaha oná be kɛha Kristofoi anitsumɔi ni he hiaa tamɔ kpeeiyaa, shiɛmɔ nitsumɔ lɛ, kɛ teemɔŋ nikasemɔ? (Mateo 24:14; Hebribii 10:24, 25) Kɛ́ ohenumɔ nii lɛ amli wa waa lɛ, no lɛ ohiɛ kpaŋ mumɔŋ otii ní okɛaamamɔ ohiɛ beni okɛ ofɔlɔi toɔ gbɛjianɔ kɛhaa wɔsɛɛ lɛ nɔ kɔkɔɔkɔ.
Ní Aaaha Bulɛ Aba Nyiɛmɔ ni Tsɔɔ Gbalashihilɛ Hiɛ lɛ He
14. (a) Mɛɛ shishitoo mlai esa akɛ ekudɔ mɛi enyɔ ni kɛ amɛhe nyiɛɔ kɛha gbalashihilɛ mlibotemɔ, beni amɛjieɔ suɔmɔ kpo amɛtsɔɔ amɛhe lɛ? (b) Mɛi ni kɛ amɛhe nyiɛɔ kɛha gbalashihilɛ mlibotemɔ lɛ ekomɛi efeee yiŋkpɛɛ kpakpa yɛ enɛ gbɛfaŋ yɛ mɛɛ gbɛ nɔ?
14 He kroko ni ohenumɔ nii ahe hiaa yɛ hu ji nyiɛmɔ ní tsɔɔ gbalashihilɛ hiɛ lɛ mli. Eji adebɔɔ su ákɛ ooosumɔ ni ojie suɔmɔ kpo otsɔɔ mɔ ko ní osusuɔ ehe. Eka shi faŋŋ akɛ gbalashihilɛ mli hefatalɔi ni he tse, ni yɔɔ Salomo Lalai lɛ amli lɛ jie suɔmɔ nifeemɔi komɛi akpo amɛtsɔɔ amɛhe dani amɛbote gbalashihilɛ mli. (Salomo Lalai 1:2; 2:6; 8:5) Ŋmɛnɛ hu, ekolɛ mɛi enyɔ ni kɛ amɛhe miinyiɛ kɛha gbalashihilɛ mlibotemɔ lɛ baanu he akɛ niji amlihiɛmɔ, naashɔmɔ, kɛ amɛhe fuamɔ ja gbɛ, titri lɛ, kɛ́ eshwɛ fioo ni amɛbaabote gbalashihilɛ mli lɛ. Shi kaimɔ akɛ: “Mɔ ni kɛ ehiɛ fɔ̃ɔ lɛ diɛŋtsɛ etsui nɔ lɛ, kwashia ni.” (Abɛi 28:26) Dɔlɛ sane ji akɛ, mɛi ni taoɔ ní amɛkɛ amɛhe abote gbalashihilɛ mli lɛ ateŋ mɛi saŋŋ kɛ sɛɛyoomɔ eyatsuuu nii, kɛtsɔ amɛhe ní amɛkɛwo shihilɛ ni baanyɛ aka amɛ ní amɛkɛ amɛhe awo jeŋba shara mli lɛ nɔ. Suɔmɔ kpojiemɔi lɛ amli waa ní anyɛɛɛ akudɔ; nifeemɔi ni he tseee jɛɔ mli baa ni emli woɔ wu kɛyaa bɔlɛnamɔ mli jeŋba shara po mli.
15, 16. Mɛɛ henɔkwɛmɔi ni nilee yɔɔ mli mɛi ni kɛ amɛhe nyiɛɔ kɛha gbalashihilɛ mlibotemɔ lɛ baanyɛ amɛkɛtsu nii koni amɛnyiɛmɔ lɛ afee nɔ ni bulɛ yɔɔ mli?
15 Kɛ́ okɛ mɔ ko miinyiɛ kɛha gbalashihilɛ mlibotemɔ lɛ, no lɛ eeefee nilee gbɛ akɛ okɛ mɔ lɛ kome pɛ akahi he ko yɛ shihilɛi komɛi ní esaaa mli. No hewɔ lɛ, ekolɛ nɔ ni baahi fe fɛɛ ji ní nyɛkɛ nyɛhe anyiɛ kɛfata mɛi krokomɛi ahe, aloo yɛ he ní mɛi krokomɛi miina nyɛ. Mɛi ní miitao amɛkɛ amɛhe abote gbalashihilɛ mli lɛ ekomɛi toɔ gbɛjianɔ koni mɔ ko afata amɛhe. Agbɛnɛ hu, susumɔ Hoshea 4:11 lɛ mli wiemɔi lɛ ahe okwɛ: “Wein kɛ wein hee fiteɔ mɔ jwɛŋmɔ.” Dãa baanyɛ afite yiŋkpɛɛ kpakpa, ní eha mɛi enyɔ lɛ afee nii ni amɛbaashwa amɛhe yɛ mli yɛ sɛɛ mli.[7]
16 Abɛi 13:10 lɛ kɛɔ akɛ: “Hewoo lɛ, béi kɛkɛ ekɛbaa; shi mɛi ni boɔ ŋaawoo toi lɛ, amɛle nii.” Hɛɛ, ‘nyɛboa ŋaawoo toi,’ ní nyɛsusu bɔ ni nyɛbaafee nyɛnii nyɛha lɛ he. Nyɛjea husui nyɛwoa suɔmɔ kpojiemɔi ahe, ní mɔ fɛɛ mɔ abu enaanyo henumɔi kɛ ehenilee. (1 Korintobii 13:5; 1 Tesalonikabii 4:3-7; 1 Petro 3:16) Ekolɛ nɛkɛ sane ní henumɔ yɔɔ mli nɛɛ he wiemɔ baawa kɛjɛ shishijee, shi ebaanyɛ etsĩ naagbai ní hiɛdɔɔ yɔɔ mli, ní baanyɛ ate shi yɛ sɛɛ mli lɛ anaa.
Ní Aaatsɔɔ Wɔ Nii ‘Kɛjɛ Wɔblahiaŋ’
17. David ‘kɛ ehiɛ fɔ̃’ Yehowa ‘nɔ kɛjɛ eblahiaŋ’ yɛ mɛɛ gbɛ nɔ, ni mɛɛ nikasemɔ yɔɔ enɛ mli kɛha oblahii kɛ oblayei ŋmɛnɛ?
17 Satan tsɔnei anaa foi ní oooje lɛ baabi ni ohiɛ ahi ohe nɔ be fɛɛ be—kɛ bei komɛi lɛ, ekãa kpele hu. Ejaakɛ, bei komɛi lɛ, obaana akɛ jeee otipɛŋfoi pɛ kɛkɛ okɛkpãaa gbee, shi moŋ okɛ jeŋ muu lɛ fɛɛ hu. Lalatsɛ David sɔle akɛ: “Bo, Nuntsɔ Yehowa, ji mihiɛnɔkamɔ, bo onɔ mikɛ mihiɛ fɔ̃ kɛjɛ miblahiaŋ. Nyɔŋmɔ, otsɔɔ mi nii kɛjɛ miblahiaŋ, ni miijaje onaakpɛɛ nitsumɔi lɛ kɛbashi ŋmɛnɛ.” (Lala 71:5, 17)c Ale David akɛ mɔ ko ni yɔɔ ekãa. Shi mɛɛ be ená ekãa nɛɛ? Beni eji oblanyo! Dani ekɛ Goliat kpee hiɛ kɛ hiɛ ní ale jogbaŋŋ lɛ aaaba po lɛ, no mli lɛ David ejie ekãa ni ekaaa kpo momo yɛ etsɛ tooi lɛ ahebuu mli—ni egbe jata kɛ oshishibrishi fɛɛ. (1 Samuel 17:34-37) Shi kɛlɛ, David kɛ ekãa fɛɛ ekãa ni ejie lɛ kpo lɛ he yijiemɔ ha Yehowa, ni etsɛ́ lɛ ‘mɔ ni ekɛ ehiɛ fɔ̃ enɔ kɛjɛ eblahiaŋ.’ Bɔ ni David nyɛ́ ekɛ ehe kpasa Yehowa lɛ ha enyɛ́ ekpee kaa fɛɛ kaa ni ekɛkpe lɛ naa. Bo hu obaana akɛ kɛ́ okɛ ohe kpasa Yehowa lɛ, ebaaha bo ekãa kɛ hewalɛ koni ‘okɛye je lɛ nɔ kunim.’—1 Yohane 5:4.
18. Mɛɛ ŋaawoo akɛhaa oblahii kɛ oblayei ni sheɔ Nyɔŋmɔ gbeyei lɛ ŋmɛnɛ?
18 Oblahii kɛ oblayei babaoo ni tamɔ bo kɛ ekãa ekɔ amɛshidaamɔ, ni amɛmiisɔmɔ amrɔ nɛɛ akɛ sanekpakpa shiɛlɔi ní abaptisi amɛ. Wɔmiida Nyɔŋmɔ shi yɛ nyɛ oblahii kɛ oblayei lɛ ahemɔkɛyeli lɛ hewɔ! Nyɛyaa nɔ nyɛtswaa nyɛfai shi akɛ nyɛbaajo je lɛ fitemɔ lɛ naa foi. (2 Petro 1:4) Nyɛyaa nɔ nyɛkɛ nyɛhenumɔ nii ní akɛ Biblia lɛ etsɔse lɛ lɛ atsua nii. Nakai feemɔ baabu nyɛhe kɛjɛ oshara mli amrɔ nɛɛ, ni naagbee lɛ, ebaama nyɛyiwalaheremɔ hu nɔ mi. Yɛ anɔkwale mli lɛ, taakɛ wɔ naagbee nikasemɔ lɛ baatsɔɔ lɛ, nyɛbaaha nyɛshihilɛ aye omanye.
[Shishigbɛ niŋmai]
a Kwɛmɔ saneyitso ni ji “Young People Ask . . . How Can I Make the Truth My Own?” ni yɔɔ October 22, 1998 Awake! lɛ mli lɛ.
b Saneyitso ni ji “Henaabuamɔi ni Akɛjieɔ Hiɛtserɛ—Na Emli Sɛɛnamɔi lɛ Amli Ŋɔɔmɔ, Kwa Emli Osharai Lɛ” ni jeɔ kpo yɛ August 15, 1992 Buu-Mɔɔ lɛ mli lɛ hiɛ saji babaoo ni he yɔɔ sɛɛnamɔ, yɛ nɛkɛ saneyitso nɛɛ he.
c Lala 71 lɛ feɔ tamɔ nɔ ni eji Lala 70 lɛ, ní awieɔ he yɛ klɛŋklɛŋ kuku lɛ mli akɛ David lala lɛ nɔtsamɔ.[8]
Sanebimɔi Kɛha Emlitĩi
◻ Mɛɛ gbɛ nɔ oblanyo loo oblayoo baatsɔ atsɔse ehenumɔ nii?
◻ Oblanyo loo oblayoo baanyɛ ekɛ ehenumɔ nii atsu nii yɛ Kristofoi ahenaabuamɔ shishi ni eeeya lɛ gbɛfaŋ yɛ mɛɛ gbɛ nɔ?
◻ Mɛɛ otii abaanyɛ asusu he kɛ́ mɔ ko miito eskulyaa he gbɛjianɔ?
◻ Hii kɛ yei ní kɛ amɛhe miinyiɛ kɛha gbalashihilɛ mlibotemɔ baanyɛ ajo bɔlɛnamɔ mli jeŋba shara he tsɔne lɛ naa foi yɛ mɛɛ gbɛ nɔ?
[Mfoniri ni yɔɔ baafa 15]
Bɔ ni ataoɔ saji amli ahaa lɛ kasemɔ baaye abua bo ní otsɔse ohenumɔ nii
[Mfoniri ni yɔɔ baafa 16]
Henaabuamɔi bibii anɔkwɛmɔ yɛ mlɛo, ni enyɛŋ eba akɛ amɛaatsɔmɔ hoofeemɔi ni anyɛɛɛ akudɔ
[Mfoniri ni yɔɔ baafa 16]
Esa akɛ fɔlɔi aye abua amɛbii lɛ ní amɛto amɛskulyaa he gbɛjianɔ
[Mfoniri ni yɔɔ baafa 17]
Nuu kɛ yoo nyiɛmɔ kɛha gbalashihilɛ yɛ kuu mli lɛ ji hebuu