Ani Obɛ Deka yɛ Nitsumɔi Gbohii Amli aloo yɛ Yehowa Sɔɔmɔ Mli?

“OFAINƐ, mibɛ deka.” Enɛ ji naatsii wiemɔi ni Yehowa Odasefoi kɛ-kpeɔ beni amɛshiɛɔ Maŋtsɛyeli lɛ he sanekpakpa lɛ yɛ faŋŋ mli lɛ ateŋ ekome. (Mateo 24:14) Ni eyɛ mli akɛ bei komɛi lɛ, nakai wiemɔi “Mibɛ deka” lɛ jeee nɔ ko, fe naajiemɔ folo ko kɛkɛ moŋ, shi anɔkwale lɛ ji, mɛi pii bɛ deka lɛlɛŋ. “Je nɛŋ he naagbamɔ”​—ni ji deŋmegbomɔ ni ekɛaana daaŋ ŋmaa, shika ni aaana akɛwo he nyɔji, nitsumɔ yaa kɛ shia baa daa gbi, bii alɛɛ, shia, kɛ tsɔne, kɛ nibii krokomɛi ni ayɔɔ lɛ akwramɔ he shihilɛ lɛ ehe amɛbe kɛ nɔ fɛɛ nɔ.​—Mateo 13:⁠22.

Shi kɛlɛ, eyɛ mli akɛ gbɔmɛi bɛ deka lɛlɛŋ moŋ shi mɛi fioo ko pɛ kɛ amɛhe ewo nitsumɔi ni yibiwoo loo sɛɛnamɔ yɔɔ he diɛŋtsɛ lɛ amli. Etamɔ bɔ ni nilelɔ Salomo ŋma be ko lɛ: “Shi deŋme fɛɛ ni gbɔmɔ gboɔ kɛ etsui ni yeɔ yɛ hulu shishi nɛɛ, mɛni enaa yɛ mli? Ejaakɛ egbii lɛ fɛɛ lɛ, awerɛho sɔŋŋ ni, ni ehe naagbamɔ lɛ ŋkɔmɔyeli ni; ni asaŋ nyɔɔŋ tete lɛ, etsui enyɔɔɔ emli. Enɛ hu yakayaka nɔ ko ni.”​—Jajelɔ 2:​22, 23.

Biblia lɛ hu tsɛɔ nɛkɛ nitsumɔ ni sɛɛnamɔ bɛ he nɛɛ akɛ “nitsumɔi gbohii.” (Hebribii 9:14) Ani nitsumɔi nɛɛ yeɔ oshihilɛ nɔ? Esa akɛ osusu enɛ he jogbaŋŋ akɛ Kristofonyo, ejaakɛ Nyɔŋmɔ baawo “mɔ fɛɛ mɔ nyɔmɔ bɔ ni sa enitsumɔi lɛ.” (Lala 62:13) Ni akɛni “be lɛ faaa dɔŋŋ” hewɔ lɛ, esa akɛ wɔsusu he jogbaŋŋ bɔni afee ni wɔkafite wɔbe fɛɛ yɛ nitsumɔi ni ji nitsumɔi gbohii ahe. (1 Korintobii 7:29) Shi mɛni kwraa po ji nitsumɔi gbohii? Te esa akɛ wɔbu amɛ wɔha tɛŋŋ? Ni te wɔɔfee tɛŋŋ wɔna nɔmimaa akɛ wɔkɛ wɔ deka fɛɛ miitsu nitsumɔi ni sɛɛnamɔ diɛŋtsɛ yɔɔ he lɛ?

Bɔ ni Wɔɔfee Wɔyoo Nitsumɔi Gbohii

Paulo ŋma yɛ Hebribii 6:​1, 2 akɛ: “No hewɔ lɛ nyɛhaa wɔfɔ̃a Kristo shishijee saji lɛ ahe wiemɔ, ni wɔfo mli kɛya dalɛ mli; ni wɔkato nitsumɔi gbohii ahe tsuitsakemɔ kɛ Nyɔŋmɔ nɔ hemɔkɛyeli, kɛ baptisimɔi ahe nitsɔɔmɔ kɛ niji-kɛ-nɔshwiemɔ, kɛ gbohii ashitee kɛ naanɔ kojomɔ he saji lɛ ashishi ekoŋŋ.” Kadimɔ akɛ nɔ ni fata “shishijee saji lɛ” ahe hu ji “nitsumɔi gbohii ahe tsuitsakemɔ.” Akɛ Kristofoi lɛ, mɛi ni kaneɔ Paulo wolo nɛɛ etsake amɛtsuii momo kɛjɛ nitsumɔi gbohii tamɔ enɛɛmɛi amli. Yɛ mɛɛ gbɛ nɔ?

Dani amɛaakpɛlɛ Kristo nɔ lɛ, no mli lɛ klɛŋklɛŋ afii oha lɛ mli bii lɛ ateŋ mɛi komɛi kɛ amɛhe woɔ “heloo lɛ nitsumɔi” gbohii, ni ji, “ajwamaŋbɔɔ, muji nitsumɔ, nyenyeŋtswibɔɔ, wɔŋjamɔ, sũu” kɛ efɔji krokomɛi ni fata he lɛ amli. (Galatabii 5:​19-21) Eji atsiii naa kulɛ, nitsumɔi nɛɛ kɛ amɛ baawo mumɔŋ gbele mli. Shi kɛtsɔ mɔbɔnalɛ nɔ lɛ, atsake nakai Kristofoi lɛ kɛjɛ amɛhiɛkpatamɔ gbɛ lɛ nɔ, ni amɛtsake amɛtsuii, ni ‘aju amɛhe.’ No hewɔ lɛ amɛtsɔɔ nakai gbɛ nɔ amɛnaa shidaamɔ ni he tse yɛ Yehowa hiɛ.​—1 Korintobii 6:​9-11.

Shi kɛlɛ, jeee Kristofoi fɛɛ ehe hiaa ni amɛtsake amɛtsuii kɛjɛ nitsumɔi fɔji loo jeŋba shara he. Paulo ŋma ewolo lɛ eyaha Yudafoi heyelilɔi, ni ŋwanejee ko bɛ he akɛ amɛteŋ mɛi pii kɛ amɛhe ekpɛtɛ Mose Mla lɛ he gbagbalii dani amɛkpɛlɛ Kristo nɔ lɛ titri. Belɛ, mɛɛ nitsumɔi gbohii amɛtsake amɛtsuii kɛjɛ he lɛ mɔ? Eka shi faŋŋ akɛ tɔmɔ ko bɛ nyiɛmɔ ni amɛnyiɛ kusumii kɛ niyeli he taomɔ nii ni yɔɔ Mla lɛ mli lɛ sɛɛ lɛ he. Ani Mla lɛ bɛ “krɔŋkrɔŋ ni eja ni ehi hu”? (Romabii 7:12) Hɛɛ, shi Paulo wie Yudafoi lɛ ahe yɛ Romabii 10:​2, 3 lɛ akɛ: “Ejaakɛ miiye amɛhe odase akɛ amɛhiɛ dɔɔ yɛ Nyɔŋmɔ he moŋ, shi jeee nilee naa. Ejaakɛ ni amɛleee Nyɔŋmɔ jalɛ lɛ, shi amɛ diɛŋtsɛ amɛ jalɛ moŋ amɛtaoɔ amɛŋɔma shi hewɔ lɛ, amɛbaaa amɛhe shi amɛhaaa Nyɔŋmɔ jalɛ lɛ.”

Hɛɛ, Yudafoi lɛ kɛ tɔmɔ hé ye akɛ kɛji amɛnyiɛ Mla lɛ sɛɛ gbagbalii lɛ, amɛbaana yiwalaheremɔ. Shi, Paulo gbala mli etsɔɔ amɛ akɛ “abuuu gbɔmɔ bem kɛjɛɛɛ mla nitsumɔi amli, akɛ ja atsɔ Kristo Yesu nɔ hemɔkɛyeli lɛ nɔ kɛkɛ.” (Galatabii 2:16) Beni akɛ Kristo kpɔmɔ nɔ lɛ ha sɛɛ lɛ, Mla nitsumɔi​—ni bɔ ni amɛja loo amɛhi amɛha lɛ kɔɔɔ he eko​—lɛ bafee nitsumɔi gbohii ni sɛɛnamɔi ko kwraa bɛ amɛhe kɛha yiwalaheremɔ. No hewɔ lɛ Yudafoi ni yɔɔ jalɛ tsuii lɛ tao Nyɔŋmɔ hiɛ duromɔ kɛtsɔ amɛ-tsuii ni amɛtsake kɛjɛ nitsumɔi gbohii tamɔ enɛɛmɛi amli, ni amɛha abaptisi amɛ akɛ amɛhenɔjɔɔmɔ lɛ he ekadi lɛ nɔ.​—Bɔfoi lɛ Asaji 2:⁠38.

Mɛni wɔkaseɔ kɛjɛɔ enɛ mli? No ji akɛ nibii babaoo fata nitsumɔi gbohii ahe fe nibii fɔji kɛ jeŋba shara kɛkɛ; nɔ ni fata he ji nitsumɔ fɛɛ nitsumɔ ni egbo yɛ mumɔŋ, ni ji yaka nitsumɔ, loo nɔ ni wooo yibii. Shi ani Kristofoi fɛɛ tsakeee amɛtsuii kɛjɛɛɛ nitsumɔi gbohii nɛɛ amli dani abaptisiɔ amɛ? Anɔkwale ni, shi klɛŋklɛŋ afii oha lɛ mli Kristofoi lɛ ateŋ mɛi komɛi ku amɛsɛɛ kɛtee jeŋba shara mli ekoŋŋ. (1 Korintobii 5:⁠1) Ni yɛ Kristofoi ni ji Yudafoi lɛ ateŋ lɛ, mɛi komɛi miisumɔ lolo ni amɛku amɛsɛɛ kɛya Mose Mla lɛ he nitsumɔi gbohii lɛ atsumɔ mli ekoŋŋ. No hewɔ lɛ esa akɛ Paulo akai mɛnɛɛmɛi ni amɛkaku amɛsɛɛ kɛmiiya nitsumɔi gbohii ahe dɔŋŋ.​—Galatabii 4:​21; 5:⁠1.

Ni Wɔɔbu Wɔhe Kɛjɛ Nitsumɔi Gbohii Ahe

No hewɔ lɛ esa akɛ Yehowa webii ni yɔɔ ŋmɛnɛ lɛ akwɛ jogbaŋŋ ni amɛkagbɔjɔ kɛmiibote nitsumɔi gbohii ahe tsɔne lɛ mli. Nɔnyɛɛ ni baa wɔnɔ koni wɔŋmɛɛ wɔhe wɔha jeŋba shara, ni wɔkaye anɔkwa, ni wɔkɛ wɔhe awo bɔlɛnamɔ mli jeŋba gbonyo mli lɛ tutuaa wɔ kɛjɛɔ he fɛɛ he. Shi mɔbɔ sane ji akɛ, Kristofoi akpei abɔ ŋmɛɛɔ amɛhe amɛhaa nɛkɛ nɔnyɛɛi nɛɛ daa afi, ni kɛji amɛtsakeee amɛtsuii lɛ, ashwieɔ nɛkɛ mɛi nɛɛ kɛjɛɔ Kristofoi asafo lɛ mli. Belɛ, ehe miihia ni Kristofoi abo Paulo ŋaawoo ni yɔɔ Efesobii 4:​22-24 lɛ toi ŋmɛnɛ fe bei fɛɛ ni eho: “Akɛ nyɛshɛ nyɛ sá jeŋba lɛ naa gbɔmɔ momo ni efite yɛ shishiumɔ sɛɛdii lɛ anaa lɛ nyɛfɔ, ni nyɛtsɔmɔ mɛi heei yɛ nyɛjwɛŋmɔ mumɔ lɛ mli, ni nyɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.”

Shi eji anɔkwale akɛ, Efesobii ni Paulo ŋma wolo nɛɛ eyaha amɛ lɛ ewo gbɔmɔ hee lɛ momo bɔ ni sa. Shi Paulo ye ebua amɛ koni amɛna faŋŋ akɛ nakai feemɔ ji nifeemɔ ni baatsa nɔ be fɛɛ be! Abaanyɛ anyiɛ Kristofoi ahiɛ kɛya nitsumɔi gbohii amli ekoŋŋ, kɛ mɔdɛŋbɔɔ ni sɛɛ efooo, kɛtsɔ lakamɔ nibii ni yaa nɔ akɛ hewalɛi ni fiteɔ mɔ lɛ anɔ. Nakai nɔŋŋ eji yɛ wɔgbɛfaŋ ŋmɛnɛ. Esa akɛ wɔbɔ mɔdɛŋ be fɛɛ be akɛ wɔɔwo gbɔmɔtso hee lɛ, ni wɔkaŋmɛ gbɛ ni wɔshihilɛ momo lɛ mli kadimɔi ni wɔna lɛ eko kwraa miitara mli. Esa akɛ wɔkpoo​—ni wɔnyɛ​—heloo lɛ nitsumɔi fɔji lɛ fɛɛ yɛ esui sɔrɔtoi lɛ fɛɛ mli. Lalatsɛ lɛ woɔ wɔ ŋaa akɛ: “Nyɛ mɛi ni nyɛsumɔɔ Yehowa lɛ, nyɛnyɛa efɔŋ!”​—Lala 97:⁠10.

Esa yijiemɔ waa akɛ, Yehowa webii ni yɔɔ ŋmɛnɛ lɛ ateŋ mɛi babaoo ebo ŋaawoo nɛɛ toi ni amɛtee nɔ amɛhi shi yɛ jeŋba hetsemɔ mli. Shi kɛlɛ, mɛi komɛi eha nitsumɔi komɛi ni anyɛŋ akɛɛ doo akɛ amɛji nitsumɔi gbohii, shi yɛ naagbee lɛ, amɛbaafee yaka nitsumɔi ni wooo yibii lɛ egbala amɛjwɛŋmɔ. Akɛ nɔkwɛmɔ nɔ lɛ, mɛi komɛi eha shika namɔ he ŋaatsɔi komɛi, aloo heloonaa nii babaoo namɔ eŋɔ amɛ nom kɛtee kwraa. Shi Biblia lɛ bɔɔ wɔ kɔkɔ akɛ: “Shi mɛi ni taoɔ nii pii ana lɛ gbeɔ kaa kɛ tsɔne kɛ kwashiai akɔnɔi pii ni fiteɔ mɔ, ni tsiɔ mɛi ewoɔ hiɛkpatamɔ kɛ laajemɔ mli lɛ amli.” (1 Timoteo 6:⁠9) Yɛ mɛi krokomɛi hu agbɛfaŋ lɛ, jeŋ nilee kasemɔi ebatsɔ tsɔne kɛha amɛ. Eji anɔkwale, jeŋ nilee kasemɔ he miihia bɔ ni sa ni akɛaaná nitsumɔ atsu. Shi mɛi komɛi eye amɛhe wui waa yɛ mumɔŋ, yɛ jeŋ nilee mli tsɔsemɔ ni etee hiɛ waa ni amɛkɛ amɛbe fɛɛ yadi sɛɛ lɛ hewɔ.

Hɛɛ, nitsumɔi pii yɛ ni amɛjeee nɔ ni tɔmɔ diɛŋtsɛ yɔɔ he yɛ jeŋba gbɛfaŋ. Shi yɛ fɛɛ sɛɛ lɛ, kɛji amɛkɛ nɔ ko fataaa wɔshihilɛ he bianɛ, aloo amɛyeee amɛbuaaa wɔ ni wɔna Yehowa Nyɔŋmɔ hiɛ duromɔ lɛ. no lɛ nitsumɔi gbohii ni. Nitsumɔi nɛɛ fiteɔ be kɛ hewalɛ, shi amɛwooo mumɔŋ yibii ko kwraa, kɛ miishɛɛ ni hiɔ shi daa hu.​—Okɛto Jajelɔ 2:11 he.

Ŋwanejee ko bɛ he akɛ oobɔ mɔdɛŋ waa ni okɛ odeka fɛɛ atsu mumɔŋ nitsumɔi ni sɛɛnamɔ yɔɔ he. Shi kɛlɛ, eyeɔ ebuaa waa kɛji oka bo diɛŋtsɛ ohe okwɛ daa. Ekolɛ obaanyɛ obi ohe saji ni tamɔ enɛɛmɛi, yɛ be kɛ bei amli akɛ: ‘Ani mishiɛmɔyaa kɛ bɔ ni mikɛ mihe woɔ kpeeiyaa mli lɛ nɔ miigbɔ akɛni mikɛ mihe ewo heloonaa nitsumɔ ko ni he ehiaaa mli lɛ hewɔ?’ ‘Ani miyɛ be kɛha hiɛtserɛjiemɔ, shi be fioo pɛ minaa kɛhaa teemɔŋ kɛ weku nikasemɔ?’ ‘Ani mifiteɔ be kɛ hewalɛ ni mikɛkwɛɔ miheloonaa nii anɔ jogbaŋŋ, shi minaaa be ni mikɛaaye mabua mɛi ni ehia amɛ yɛ asafo lɛ mli, tamɔ mɛi ni he yeɔ kɛ mɛi ni edara yɛ afii amli lɛ?’ Ekolɛ nɛkɛ sanebimɔi nɛɛ ahetooi baaha eje kpo faŋŋ yɛ ogbɛfaŋ akɛ ehe miihia ni oha mumɔŋ nitsumɔi aye klɛŋklɛŋ gbɛhe.

Okɛ Odeka Fɛɛ Atsu Nii yɛ Yehowa Sɔɔmɔ Mli

Taakɛ 1 Korintobii 15:58 lɛ kɛɔ lɛ, nitsumɔ babaoo yɛ ni abaatsu “yɛ Nuŋtsɔ lɛ nitsumɔ lɛ mli.” Nɔ ni he hiaa fe fɛɛ ji Maŋtsɛyeli-shiɛmɔ kɛ kaselɔfeemɔ nitsumɔ lɛ. Paulo woɔ wɔ hewalɛ yɛ 2 Timoteo 4:5 akɛ: “Ha Sanekpakpa lɛ shiɛmɔ afee oshihilɛ mli nitsumɔ, yɛ sɔɔmɔ ni mɔɔ shi jogbaŋŋ mli.” (Jerusalem Bible) Onukpai kɛ asafoŋ sɔɔlɔi hu yɛ babaoo feemɔ yɛ tooku lɛ ahiamɔ nii ahe nitsumɔ mli. (2 Timoteo 3:​1, 5, 13; 1 Petro 5:⁠2) Weku yitsei​—ni amɛteŋ mɛi pii ji fɔlɔi komekomei pɛ lɛ​—hu yɛ gbɛnaa nii ni tsii yɛ amɛwekui lɛ ahe nitsumɔ mli kɛ agbɛnɛ yelikɛbuamɔ ni amɛkɛaaha amɛbii lɛ koni amɛdara yɛ wekukpaa ni ka amɛkɛ Nyɔŋmɔ teŋ lɛ mli. Nitsumɔi ni tamɔ nɛkɛ baanyɛ ekɛ tɔlɛ babaoo aba, ni bei komɛi lɛ, eyeɔ mɔ nɔ kwraa po. Shi nɔ ni tamɔɔɔ nitsumɔi gbohii kwraa lɛ, nɛkɛ nitsumɔi nɛɛ kɛ tsui ni nyɔɔ mɔ mli diɛŋtsɛ baa!

Naagba lɛ ji: Mɛɛ gbɛ nɔ mɔ ko baatsɔ ena be ni ekɛtsu nɛkɛ nitsumɔi kpakpai ni he yɔɔ sɛɛnamɔ nɛɛ fɛɛ? He-tsɔsemɔ kɛ mɔ diɛŋtsɛ gbɛjianɔtoo kpakpa he miihia. Paulo ŋma yɛ 1 Korintobii 9:​26, 27 lɛ akɛ: “No hewɔ lɛ, foi ni midaa lɛ, midaaa lɛ butubutu; nɔmɔ ni minɔɔ nɛɛ, jeee kɔɔyɔɔ mikɛnɔɔ; shi moŋ migbalaa mi diɛŋtsɛ migbɔmɔtso lɛ mai ni miyeɔ lɛ nyɔŋ, koni mi ni mishiɛɔ mitsɔɔ mɛi krokomɛi lɛ, mi diɛŋtsɛ lɛ akashɛ mi afɔ.” Gbɛ kome ni wɔɔtsɔ nɔ wɔkɛ shishitoo mla ni yɔɔ ŋmalɛ nɛɛ mli lɛ atsu nii ji ni wɔpɛi wɔ daa gbi nifeemɔi kɛ wɔshihilɛ diɛŋtsɛ mli wɔkwɛ yɛ be kɛ bei amli. Ekolɛ obaana akɛ obaanyɛ ojie nibii ni he ehiaaa ni fiteɔ obe kɛ ohewalɛ babaoo lɛ ateŋ pii kɛjɛ mli.

Akɛ nɔkwɛmɔ nɔ lɛ, ani ofiteɔ obe kɛ ohewalɛ babaoo yɛ TV kwɛmɔ, hiɛtserɛjiemɔ, woji gbohii akanemɔ, loo shwɛmɔi komɛi ni osumɔɔ mli? Taakɛ sane ko ni aŋma yɛ The New York Times lɛ mli lɛ tsɔɔ lɛ, kɛji aja mli lɛ, United State, Amerikabii ni hiɛ efa lɛ kɛ “nɔ ni fa fioo fe ŋmɛlɛtswai 30 [kwɛɔ TV] daa otsi.” Eka shi faŋŋ akɛ, abaanyɛ akɛ be ni tamɔ nɛkɛ atsu nii jogbaŋŋ! Nɔkwɛlɔ gbɛfalɔ ko ŋa bɔ amaniɛ akɛ: “Shwɛ fioo kulɛ minyɛ mijie nibii fɛɛ ni fiteɔ be, tamɔ televishin kwɛmɔ kɛjɛ mishihilɛ mli.” Mɛni jɛ mli ba? Enyɛ ekane Biblia ɛnsaiklopedia, ni ji Insight on the Scriptures ni afee lɛ wolokpoi enyɔ lɛ fɛɛ!

Ekolɛ ehe baahia hu ni osusu bɔ ni ooofee ni oha oshihilɛ afee mlɛo lɛ he. Salomo kɛɛ akɛ: “Nitsulɔ lɛ, eyɛ nii fioo jio, pii jio, ewɔ ŋɔɔ enaa; shi tɔɔ ni niiatsɛ tɔɔ lɛ haaa ewɔ.” (Jajelɔ 5:11) Ani otuu obe kɛ ohewalɛ babaoo owo heloonaa ninamɔ ni he ehiaaa lɛ he nitsumɔ mli? Yɛ anɔkwale mli lɛ, kɛji wɔyɛ nibii babaoo lɛ, nakai nɔŋŋ ehe bahiaa ni wɔkwra, ni wɔkwɛ nɔ, ni wɔsaa, ni wɔbu nibii babaoo nɛɛ fɛɛ ahe. Ani ehe baaba sɛɛnamɔ aha bo akɛ oooŋmɛɛ nɛkɛ nibii ni oyɔɔ nɛɛ ekomɛi ahe koni eha efee mlɛo kɛha bo?

Gbɛjianɔ kpakpa ni wɔɔto lɛ hu ji gbɛ kroko ni wɔɔtsɔ nɔ wɔkɛ wɔbe atsu nii yɛ gbɛ kpakpa nɔ. Esa akɛ be he gbɛjianɔtoo ni tamɔ nɛkɛ atsu mɔ lɛ hejɔɔmɔ kɛ ehiɛtserɛjiemɔ hu he nii. Shi esa akɛ aha mumɔŋ nibii aye klɛŋklɛŋ gbɛhe da. Esa akɛ ato be pɔtɛɛ ko ama shi kɛha asafoŋ kpeei fɛɛ yaa daa. Ekolɛ obaatsɔ hiɛ okpɛ oyiŋ hu yɛ gbii loo gbɛkɛnaashi pɔtɛɛ komɛi ni obaanyɛ otuu oha sanekpakpa shiɛmɔ nitsumɔ lɛ ahe. Kɛji oto gbɛjianɔ jogbaŋŋ lɛ, ekolɛ obaanyɛ oha gbɛfaŋnɔ ni onaa yɛ shiɛmɔ nitsumɔ lɛ mli lɛ aya hiɛ, ekolɛ kɛtsɔ sɔɔmɔ ni ooosɔmɔ akɛ gbɛgbalɔi awalɔ yɛ be kɛ bei amli lɛ nɔ. Shi, kwɛmɔ koni oto be hu kɛha oteemɔŋ kɛ weku nikase fɛɛ, kɛ hesaamɔ jogbaŋŋ kɛha kpeeiyaa. Kɛji osaa ohe jogbaŋŋ lɛ, jeee akɛ obaana nikasemɔ lɛ he sɛɛ babaoo kɛkɛ, shi moŋ nakai feemɔ baaha onyɛ owo mɛi krokomɛi ahewalɛ yɛ “suɔmɔ kɛ nitsumɔ kpakpai ahe” kɛtsɔ hetooi ni ohaa lɛ anɔ.​—Hebribii 10:⁠24.

Be ni oootao kɛha nikasemɔ lɛ baabi afɔleshaai komɛi. Akɛ nɔkwɛmɔ nɔ lɛ, Betel wekui ni yɔɔ jeŋ fɛɛ lɛ teɔ shi mra daa leebi bɔni afee ni amɛkɛsusu daa gbi ŋmalɛ lɛ he. Ani ebaahi kɛha bo akɛ oootao be fioo ko daa leebi kɛha bo diɛŋtsɛ oteemɔŋ nikasemɔ? Lalatsɛ lɛ wie akɛ: “Mite shi maŋkɛ mra ni mibolɔ; mihiɛ ka owiemɔi lɛ anɔ.” (Lala 119:147) Shi, yɛ anɔkwale mli lɛ, shitee mra nɛkɛ lɛ baabi ni oto be ni hi ni okɛbaawɔ, bɔni afee ni onyɛ oje gbi ni nyiɛ sɛɛ lɛ mli nitsumɔi ashishi kɛ hewalɛ hee, beni ona hejɔɔmɔ ni fa bɔ ni sa.

Sɛɛnamɔi ni Jɛɔ Wɔ Deka ni Wɔkɛtsuɔ Nii yɛ Yehowa Sɔɔmɔ Mli lɛ Mli Baa

‘Ni wɔɔteke nɔ yɛ Nuŋtsɔ lɛ nitsumɔ lɛ mli’ lɛ biɔ gbɛjianɔtoo, he-tsɔsemɔ, kɛ he-afɔleshaa. Shi obaana sɛɛnamɔi babaoo ni anyɛŋ akane mli ŋɔɔmɔ. No hewɔ lɛ, okɛ odeka fɛɛ atsu nii, jeee yɛ nitsumɔi gbohii loo yaka nitsumɔi ni kɛ nijiaŋwujee loo dɔlɛ baa lɛ amli, shi moŋ yɛ Yehowa sɔɔmɔ mli. Ejaakɛ nakai nitsumɔi lɛ pɛ anɔ obaatsɔ ojie ohemɔkɛyeli lɛ kpo, ni ona Nyɔŋmɔ nɔkpɛlɛmɔ, kɛ agbɛnɛ, yɛ naagbee lɛ, nyɔmɔwoo ni ji naanɔ wala lɛ!

[Mfoniri ni yɔɔ baafa 28]

Gbɛjianɔtoo kpakpa ni anyɛɔ akɛtsuɔ nii yeɔ ebuaa Kristofonyo ni ekɛ ebe tsuɔ nii yɛ nilee mli