Yijiemɔ Afɔlei ni Saa Yehowa Hiɛ
“Nyɛŋɔ nyɛ gbɔmɔtsei lɛ nyɛdamɔ shi akɛ afɔle ni hiɛ kã, ni he tse, ni sa Nyɔŋmɔ hiɛ.”—Romabii 12:1.
1. Kɛ́ akɛaato he lɛ, mɛni Biblia lɛ kɛɔ yɛ afɔlei ni ashã yɛ Mose Mla lɛ shishi lɛ jarawalɛ lɛ he?
“AKƐNI nii kpakpai ni baaba lɛ asusuma kɛkɛ mla lɛ hiɛ, ni jeee nibii lɛ asubaŋ diɛŋtsɛ ni hewɔ lɛ, enyɛŋ ekɛ daa afi afɔlei ni amɛshãa nɔtonɔto lɛ aha mɛi ni babɛŋkɛɔ lɛ ahi kɛwula shi, gbi ko gbi ko.” (Hebribii 10:1) Bɔfo Paulo ma sane ko ni ekɛ ekãa jaje lɛ nɔ mi akɛ, sɛɛnamɔ ko ni hiɔ shi daa yɛ gbɔmɔ yiwalaheremɔ gbɛfaŋ bɛ afɔlei fɛɛ ni ashã yɛ Mose Mla lɛ shishi lɛ ahe.—Kolosebii 2:16, 17.
2. Mɛni hewɔ ejeee nɔ ni sɛɛnamɔ bɛ he akɛ wɔɔbɔ mɔdɛŋ ni wɔnu sane mlitsɔɔmɔ ni yɔɔ Biblia lɛ mli ni kɔɔ Mla lɛ mli nikeenii kɛ afɔlei ahe lɛ shishi lɛ?
2 Ani enɛ tsɔɔ akɛ saji ni yɔɔ Mose Woji Enumɔ lɛ mli ni kɔɔ nikeenii kɛ afɔleshaai ahe lɛ he bɛ sɛɛnamɔ kɛha Kristofoi ŋmɛnɛ? Yɛ anɔkwale mli lɛ, aŋkroaŋkroi ni amɛkɛ amɛgbɛi eha akɛ mɛi ni fata Teokrase Sɔɔmɔ Skul lɛ he yɛ Yehowa Odasefoi asafoi srɔtoi amli yɛ jeŋ fɛɛ lɛ kane Biblia lɛ mli klɛŋklɛŋ woji enumɔ lɛ fɛɛ nyɛsɛɛ nɛɛ yɛ be ni sɛɛ kɛ fioo fe afi pɛ mli. Mɛi komɛi ebɔ mɔdɛŋ akɛ amɛaamia amɛhiɛ ni amɛkane ni amɛnu emli saji lɛ fɛɛ shishi fitsofitso. Ani amɛ mɔdɛŋbɔɔ lɛ fɛɛ efee efolo? Enɛ nyɛŋ aba lɛ nakai, ejaakɛ “nibii abɔ ni aŋma ato momo lɛ, wɔ diɛŋtsɛ wɔhe nitsɔɔmɔ hewɔ aŋma ato lɛ, koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ aná hiɛnɔkamɔ.” (Romabii 15:4) Belɛ, sanebimɔ lɛ ji akɛ, Mɛɛ “nitsɔɔmɔ” kɛ “miishɛjemɔ” wɔbaanyɛ wɔná kɛjɛ nakai saji babaoo ni yɔɔ Mla lɛ mli ni kɔɔ nikeenii kɛ afɔlei ahe lɛ mli?
Kɛha Wɔ Nitsɔɔmɔ kɛ Miishɛjemɔ
3. Mɛni ji wɔhiamɔ nii titri?
3 Eyɛ mli akɛ abiii ni wɔshã afɔlei diɛŋtsɛ yɛ gbɛ ni Mla lɛ tsɔɔ lɛ naa moŋ, shi nɔ ni afɔlei lɛ tsu kɛha Israelbii lɛ kɛyashɛ he ko lɛ he miihia wɔ waa lolo, ni ji, ni akɛ wɔhe eshai ake wɔ ni wɔná Nyɔŋmɔ duromɔ mli ŋɔɔmɔ. Akɛni wɔshãaa afɔlei diɛŋtsɛ dɔŋŋ hewɔ lɛ, te wɔɔfee tɛŋŋ ni wɔnine aaashɛ sɛɛnamɔi ni tamɔ nɛkɛ nɔ? Yɛ be mli ni Paulo etsɔɔ fatɔɔi ni yɔɔ kooloi afɔleshaai ahe lɛ mli lɛ sɛɛ lɛ, ejaje akɛ: ‘Beni Yesu baa je nɛŋ lɛ, ekɛɛ: “Afɔle kɛ nikeenii lɛ osumɔɔɔ, shi gbɔmɔtso osaa oha mi; shãa afɔlei kɛ esha he afɔlei esaaa ohiɛ. No ni mikɛɛ: Naa, miba, aŋma mihe sane yɛ wolokpo lɛ mli, ní mibafee bo, Nyɔŋmɔ, osuɔmɔnaa nii lɛ.”’—Hebribii 10:5-7.
4. Mɛɛ gbɛ nɔ Paulo kɛ Lala 40:7-9 kɛyashi Yesu Kristo he yɛ?
4 Beni Paulo tsɛɔ wiemɔ sɛɛ kɛjɛɔ Lala 40:7-9 lɛ, etsɔɔ akɛ Yesu baaa ni ebahã “afɔle kɛ niyenii afɔle,” “shãa afɔlei kɛ esha he afɔlei,” lɛ akã he ahi shi daa, nii ni yɛ be mli ni Paulo ŋmalaa enɛɛmɛi fɛɛ lɛ no mli lɛ Nyɔŋmɔ ekpɛlɛɛɛ nɔ dɔŋŋ lɛ. Shi moŋ Yesu ba kɛ gbɔmɔtso ni eŋwɛi Tsɛ lɛ esaa, eko ni kɛ nɔ ni Nyɔŋmɔ saa beni E-bɔ Adam lɛ yeɔ egbɔ pɛpɛɛpɛ yɛ gbɛ fɛɛ gbɛ nɔ. (1 Mose 2:7; Luka 1:35; 1 Korintobii 15:22, 45) Ákɛ Nyɔŋmɔ Bi ni yeɔ emuu lɛ, Yesu nitsumɔ ji ni ebafee yoo lɛ “seshi” ni agba ehe sane afɔ̃ shi yɛ 1 Mose 3:15 lɛ. Ebaato gbɛjianɔ koni ‘etswa Satan yitso nɔ̃,’ eyɛ mli akɛ ebaatswa Yesu diɛŋtsɛ ‘nanetsitsi nɔ̃.’ Nɛkɛ gbɛ nɔ Yesu batsɔ nɔ̃ ni Yehowa kɛha kɛha adesai ayiwalaheremɔ, ní hii ni yɔɔ hemɔkɛyeli ekpa gbɛ kɛjɛ Habel yinɔ lɛ.
5, 6. Mɛɛ gbɛ ni hi fe fɛɛ ni atsɔɔ nɔ abɛŋkɛɔ Nyɔŋmɔ, Kristofoi yɔɔ?
5 Beni Paulo wieɔ nitsumɔ krɛdɛɛ ni Yesu tsu nɛɛ he lɛ, ekɛɛ akɛ: “Mɔ ni leee esha lɛ, wɔ hewɔ lɛ [Nyɔŋmɔ] ha etsɔ esha, koni wɔ lɛ wɔtsɔmɔ Nyɔŋmɔ jalɛ yɛ emli.” (2 Korintobii 5:21) Abaanyɛ atsɔɔ wiemɔ “ha etsɔ esha” lɛ shishi hu akɛ ‘fee lɛ esha afɔleshaa.’ Bɔfo Yohane kɛɛ akɛ: “Lɛ ji wɔhe eshai lɛ ahe kpatamɔnɔ; shi jeee wɔnɔ̃ lɛ kɛkɛ he, shi moŋ jeŋ muu lɛ fɛɛ nɔ̃ lɛ hu he.” (1 Yohane 2:2) No hewɔ lɛ, yɛ be mli ni Israelbii lɛ ná nɔ ko ni sɛɛ etsɛŋ ni amɛtsɔ nɔ amɛbɛŋkɛ Nyɔŋmɔ kɛtsɔ amɛ afɔleshaai anɔ lɛ, Kristofoi yɛ nɔdaamɔ nɔ ni hi kwraa fe no, ní amɛtsɔɔ nɔ amɛyaa Nyɔŋmɔ ŋɔɔ—Yesu Kristo afɔleshaa lɛ. (Yohane 14:6; 1 Petro 3:18) Kɛ wɔná kpɔmɔ afɔle ni Nyɔŋmɔ kɛha lɛ mli hemɔkɛyeli ni wɔbo Lɛ toi lɛ, wɔ hu akɛ wɔhe eshai baake wɔ ni wɔbaaná Nyɔŋmɔ duromɔ kɛ ejɔɔmɔ mli ŋɔɔmɔ. (Yohane 3:17, 18) Ani enɛ haaa wɔná miishɛɛ? Shi kɛlɛ, mɛɛ gbɛ nɔ wɔɔtsɔ wɔjie lɛ kpo wɔtsɔɔ akɛ wɔyɛ kpɔmɔ afɔleshãa lɛ mli hemɔkɛyeli?
6 Beni bɔfo Paulo tsɔɔ mli akɛ Kristofoi yɛ nɔdaamɔ nɔ ni hi kwraa ni amɛtsɔɔ nɔ amɛbɛŋkɛɔ Nyɔŋmɔ lɛ sɛɛ lɛ, etsɔɔ gbɛ̀i srɔtoi etɛ ni wɔbaanyɛ wɔtsɔ nɔ wɔjie wɔhemɔkɛyeli kɛ hiɛsɔɔ kpo wɔha Nyɔŋmɔ gbɛjianɔtoo ni suɔmɔ yɔɔ mli lɛ, taakɛ wɔkaneɔ yɛ Hebribii 10:22-25 lɛ. Eyɛ mli akɛ Paulo kɛ eŋaawoo lɛ ha mɛi ni yɔɔ ‘hekrɔŋkrɔŋ lɛ mlibotemɔ hegbɛ’ lɛ titri—ni ji akɛ, Kristofoi ni afɔ amɛ mu ni hiɛ ŋwɛi tsɛmɔ lɛ moŋ—shi yɛ anɔkwale mli lɛ, ehe miihia ni adesai fɛɛ abo Paulo wiemɔi ni jɛ mumɔŋ lɛ toi kɛji akɛ amɛmiisumɔ ni Yesu kpatamɔ afɔleshaa lɛ he aba sɛɛnamɔ kɛha amɛ.—Hebribii 10:19.
Okɛ Afɔlei ni He Tse ni Muji ko Bɛ He Aha
7. (a) Yɛ mɛɛ gbɛ nɔ Hebribii 10:22 jieɔ nɔ ni afee yɛ afɔleshaa mli lɛ kpo? (b) Mɛni ehe bahia ni afee koni aná nɔmimaa akɛ afɔle ko saa Nyɔŋmɔ hiɛ?
7 Klɛŋklɛŋ lɛ, Paulo wo Kristofoi hewalɛ akɛ: “Nyɛhaa wɔkɛ anɔkwa tsui ababɛŋkɛa yɛ hemɔkɛyeli ni wɔyɔɔ hewalɛ yɛ nɔ lɛ mli, kɛ tsui hu ni atsuu he ni ebɛ henilee fɔŋ ko dɔŋŋ, kɛ gbɔmɔtso ni akɛ nu ni mli tse eju he.” (Hebribii 10:22) Wiemɔ ni akɛtsu nii yɛ biɛ lɛ tsɔɔ nɔ ni afeɔ diɛŋtsɛ yɛ afɔle ni ashãa yɛ Mla lɛ shishi lɛ mli ni tɔmɔ ko kwraa bɛ he. Enɛ sa, ejaakɛ kɛji akɛ aaakpɛlɛ afɔleshaa ko nɔ lɛ, ja akɛha kɛ jwɛŋmɔ kpakpa, ni esa akɛ efee nɔ ko ni he tse ni ehe buleko. Kooloo ni akɛ lɛ shãa afɔle lɛ jɛ shia kooloi akuu lɛ mli, ni ji akɛ amɛji kooloi ni he tse, ni ‘yɔɔ hewalɛ’ ni kpa ko bɛ he. Kɛji akɛ afɔleshaa lɛ ji loofɔji anɔ lɛ, esa akɛ efee kosɛɛ okpoi loo okpoi bibii. Kɛ atsu nɔ ni abiɔ nɛɛ ahe nii lɛ, ‘akɛ duromɔ baahe kɛjɛ edɛŋ ni akɛkpata aha lɛ.’ (3 Mose 1:2-4, 10, 14; 22:19-25) Mãsha ko ni damɔ shi kɛha fitemɔ bɛ niyenii afɔle lɛ mli; ni akɛ wo, ni ekolɛ eeenyɛ efee aduawai amli nu ni haa nii fuɔ loo eshaa wooo mli. Kɛ́ akɛ afɔlei lɛ—kooloo loo niyenii nɔ̃—ha yɛ afɔleshaa latɛ lɛ nɔ lɛ, akɛ ŋoo ni báa nii ayi woɔ mli.—3 Mose 2:11-13.
8. (a) Mɛni atao yɛ gbɔmɔ ni kɛ afɔleshaa nikeenii lɛ baa lɛ he? (b) Te wɔɔfee tɛŋŋ wɔná nɔmimaa akɛ Yehowa kpɛlɛɔ wɔ jamɔ nɔ?
8 Ni mɔ ni kɛ nikeenii lɛ baa lɛ hu? Mla lɛ tsɔɔ akɛ esa akɛ mɔ fɛɛ mɔ ni baa Yehowa hiɛ lɛ afee mɔ ni he tse ni buleko ehe. Klɛŋklɛŋ lɛ, esa akɛ mɔ ni ebule ehe yɛ yiŋtoo ko hewɔ lɛ ashã esha loo sɔ̃ afɔle koni eku sɛɛ ená shidaamɔ ni he tse yɛ Yehowa hiɛ, koni E-nyɛ ekpɛlɛ eshãa afɔle loo niyenii afɔle lɛ nɔ. (3 Mose 5:1-6, 15, 17) No hewɔ lɛ, ani wɔhiɛ sɔɔ bɔ ni ehe hiaa ni wɔhiɛ shidaamɔ ni he tse mli be fɛɛ be yɛ Yehowa hiɛ lɛ? Kɛji akɛ wɔmiisumɔ ni wɔjamɔ lɛ afee nɔ ni Nyɔŋmɔ kpɛlɛɔ nɔ lɛ, no lɛ esa akɛ wɔhe afee oya yɛ nɔ fɛɛ nɔ ni kuɔ Nyɔŋmɔ mlai amli lɛ jajemɔ mli. Esa akɛ wɔkɛ wɔhe aha nii ni Nyɔŋmɔ kɛha ni baaye abua wɔ lɛ oya—“asafo lɛ mli onukpai lɛ” kɛ Yesu Kristo, ni ji “wɔhe eshai lɛ ahe kpatamɔnɔ” lɛ.—Yakobo 5:14; 1 Yohane 2:1, 2.
9. Mɛɛ srɔtofeemɔ titri yɔɔ afɔlei ni ashãa ahaa Yehowa lɛ kɛ nɔ ni akɛhaa apasa nyɔŋmɔi lɛ ateŋ?
9 Yɛ anɔkwale mli lɛ, heyeli kɛmiijɛ hebulemɔ fɛɛ hebulemɔ mli ni amaa nɔ mi lɛ, ji srɔtofeemɔ titri ni kã afɔlei ni akɛhaa Yehowa lɛ kɛ nɔ ni gbɔmɛi ni yɔɔ jeŋmaji ni ebɔle Israel he lɛ kɛhaa apasa nyɔŋmɔi lɛ teŋ. Beni wolo ko wieɔ nifeemɔ ni yɔɔ srɔto yɛ Mose Mla lɛ mli afɔleshaai nɛɛ ahe lɛ, ekɛɛ akɛ: “Ekolɛ wɔbaanyɛ wɔkadi akɛ ekɛ ŋkunyaayeli loo nibimɔ bɛ tsakpaa ko; jamɔ mli sɛkɛyeli bɛ mli, he ni abamɔɔ kɛ klante bɛ mli, aloo sɔlemɔwe ajwamaŋbɔɔ, agu dãanumɔ kɛ bɔlɛnamɔ mli sakasakafeemɔ kɛ fɔmɔ he kusum nifeemɔi kwraa; akɛ gbɔmɛi eshãaa afɔlei; ashãaa afɔlei ahaaa gbohii.” Enɛɛmɛi fɛɛ gbalaa jwɛŋmɔ kɛyaa anɔkwa sane kome nɔ: Yehowa yɛ krɔŋkrɔŋ, ni ekuuu ehiɛ efɔ̃ɔɔ loo ekpɛlɛɛɛ esha loo fitemɔ fɛɛ fitemɔ nɔ. (Habakuk 1:13) Esa akɛ jamɔ kɛ afɔlei ni ashãa ahaa lɛ lɛ afee nɔ ni he tse ni kpa ko bɛ—he yɛ gbɔmɔtsoŋ, jeŋba mli kɛ mumɔŋ.—3 Mose 19:2; 1 Petro 1:14-16.
10. Yɛ Paulo ŋaawoo ni aŋma afɔ̃ shi yɛ Romabii 12:1, 2 lɛ kɛ gbeekpamɔ naa lɛ, mɛɛ hekaa-kɛ-kwɛmɔ esa akɛ wɔfee?
10 Yɛ enɛ hewɔ lɛ, esa akɛ wɔpɛi wɔ diɛŋtsɛ wɔmli yɛ wɔshihilɛ mli nibii fɛɛ kwa mli koni wɔná nɔmimaa akɛ Yehowa kpɛlɛɔ sɔɔmɔ ni wɔkɛhaa lɛ lɛ nɔ. Esaaa akɛ wɔsusuɔ kɔkɔɔkɔ akɛ bei abɔ ni wɔnáa gbɛfaŋnɔ ko yɛ Kristofoi akpeei kɛ agbɛnɛ yɛ sɔɔmɔ nitsumɔ lɛ mli nɛɛ, nɔ ni wɔfeɔ yɛ teemɔŋ yɛ wɔshihilɛ mli lɛ kɔɔɔ he eko. Esaaa akɛ wɔnuɔ he hu akɛ Kristofoi anitsumɔi amli ni wɔkɛ wɔhe woɔ lɛ haa wɔyeɔ wɔhe kɛjɛɔ bɔ ni ehe hiaa ni wɔhi shi yɛ Nyɔŋmɔ mlai anaa yɛ wɔshihilɛ mli nibii krokomɛi amli lɛ mli. (Romabii 2:21, 22) Wɔnyɛŋ wɔkpa Nyɔŋmɔ jɔɔmɔ kɛ eduromɔ gbɛ kɛ́ wɔŋmɛ gbɛ ni nɔ fɛɛ nɔ ni he tseee loo abule lɛ yɛ ehiɛ lɛ woɔ wɔsusumɔi loo nifeemɔi ahe muji. Ha Paulo wiemɔi lɛ ahi ojwɛŋmɔ mli: “No hewɔ lɛ, anyɛmimɛi, mikɛ Nyɔŋmɔ mlitsɔlɛi miikpa nyɛ fai, akɛ nyɛŋɔ nyɛgbɔmɔtsei lɛ nyɛdamɔ shi akɛ afɔle ní hiɛ kã ni he tse ní sa Nyɔŋmɔ hiɛ ní nyɛjamɔ lɛ afee mumɔŋ jamɔ. Ni nyɛjeŋba akatamɔ jeŋbii ajeŋba, shi moŋ nyɛkɛ nyɛjwɛŋmɔ ni etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ni sa ehiɛ jogbaŋŋ ni hi kɛwula shi lɛ.”—Romabii 12:1, 2.
Okɛ Yijiemɔ Afɔlei ni Jɛ Tsui Muu Fɛɛ Mli Aha
11. Mɛni fata wiemɔ ‘hiɛnɔkamɔ jajemɔ,’ ni atsĩ tã yɛ Hebribii 10:23 lɛ he?
11 Beni eŋmaa wolo eyaha Hebribii lɛ, Paulo gbala jwɛŋmɔ yɛ no sɛɛ kɛtee anɔkwa jamɔ lɛ fã ko ni he hiaa nɔ, akɛ: “Nyɛhaa wɔmɔa wɔhiɛnɔkamɔ jajemɔ lɛ mli ni awaa ni ekagbugbã, ejaakɛ mɔ ni wo shi lɛ anɔkwafo ni.” (Hebribii 10:23) Wiemɔ ni ji ‘hiɛnɔkamɔ jajemɔ’ lɛ shishi diɛŋtsɛ ji “sane jajemɔ,” ni Paulo hu wieɔ “yijiemɔ afɔle” he. (Hebribii 13:15) Enɛ kaiɔ wɔ afɔle pɔtɛɛ ni gbɔmɛi tamɔ Habel, Noa, kɛ Abraham shã lɛ.
12, 13. Mɛni Israelnyo kpɛlɛɔ nɔ beni ekɛ shãa afɔle haa lɛ, ni mɛni wɔbaanyɛ wɔfee koni wɔjie nakai su lɛ nɔŋŋ kpo?
12 Kɛ́ Israelnyo kɛ shãa afɔle ha lɛ, efee nakai ‘yɛ lɛ diɛŋtsɛ esuɔmɔnaa yɛ Yehowa hiɛ.’ (3 Mose 1:3) Etsɔɔ afɔle ni tamɔ nɛkɛ nɔ ejɛɔ esuɔmɔ mli ejajeɔ yɛ faŋŋ, loo ekpɛlɛɔ Yehowa jɔɔmɔi kɛ eduromɔ babaoo ni eyɔɔ kɛha ewebii lɛ nɔ. Kaimɔ akɛ shãa afɔle lɛ he nɔ ko ni yɔɔ srɔto ji akɛ ashãa afɔle muu lɛ fɛɛ yɛ afɔleshaa latɛ lɛ nɔ—eji hetuu-kɛhamɔ kɛ henɔjɔɔmɔ kwraa he okadi ni sa. Nɔ ni kɛ enɛ yeɔ egbɔ lɛ, wɔjieɔ wɔhemɔkɛyeli kpo yɛ kpɔmɔ afɔleshaa lɛ mli kɛ wɔ shidaa kɛha nakai gbɛjianɔtoo lɛ kɛ́ wɔjɛ wɔsuɔmɔ kɛ wɔtsui muu fɛɛ mli wɔkɛ wɔ “yijiemɔ afɔle . . . ni ji naabui ni jajeɔ egbɛi lɛ ayibii lɛ” ha Yehowa.
13 Yɛ be mli ni Kristofoi eshãaa afɔlei diɛŋtsɛ—kɛ kooloi loo kɛ ŋmɔshi nibii lɛ—gbɛnaa nii kã amɛnɔ akɛ amɛye Maŋtsɛyeli sanekpakpa lɛ he odase ni amɛfee mɛi Yesu Kristo kaselɔi. (Mateo 24:14; 28:19, 20) Ani okɛ hegbɛi lɛ tsuɔ nii ni okɛnaa Nyɔŋmɔ Maŋtsɛyeli lɛ he sanekpakpa lɛ shiɛmɔ mli gbɛfaŋnɔ yɛ faŋŋ mli koni gbɔmɛi babaoo lolo anyɛ aba ni amɛbale naakpɛɛ nibii ni Nyɔŋmɔ yɔɔ kɛha adesai ni feɔ toiboo lɛ? Ani ojɛɔ osuɔmɔ mli okɛ obe kɛ ohewalɛ tsuɔ nii ni okɛtsɔɔ mɛi ni yɔɔ wiemɔ lɛ he miishɛɛ lɛ anii, ni oyeɔ obuaa amɛ koni amɛbatsɔmɔ Yesu Kristo kaselɔi? Sɔɔmɔ lɛ mli ni wɔkɛ wɔhe woɔ yɛ ekãa naa lɛ tamɔ shãa afɔle ni jeɔ ŋma, ni esaa Nyɔŋmɔ hiɛ jogbaŋŋ.—1 Korintobii 15:58.
Omli Afili Bo yɛ Nyɔŋmɔ kɛ Gbɔmɛi ni Okɛ Amɛ Bɔɔ lɛ Mli
14. Te Paulo wiemɔi ni yɔɔ Hebribii 10:24, 25 tamɔ shidaa afɔle he jwɛŋmɔ lɛ ha tɛŋŋ?
14 Yɛ naagbee lɛ, Paulo gbala jwɛŋmɔ kɛtee wekukpaa ni kã wɔkɛ nanemɛi Kristofoi ateŋ yɛ be mli ni wɔjáa Nyɔŋmɔ lɛ nɔ. “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ gbi lɛ miibɛŋkɛ nɛɛ.” (Hebribii 10:24, 25) Wiemɔi ni ji “wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe,” “wɔkakwa wɔhe naabuamɔ,” kɛ “wɔwowoo wɔhe ŋaa” lɛ fɛɛ kaiɔ wɔ nɔ ni shidaa afɔle lɛ fee eha Nyɔŋmɔ webii lɛ yɛ Israel.
15. Mɛni wɔnaa ni je amɛhe yɛ shidaa afɔle lɛ kɛ Kristofoi akpeei lɛ mli?
15 Atsɔɔ wiemɔ ni ji “shidaa afɔlei” lɛ shishi yɛ bei komɛi amli akɛ “toiŋjɔlɛ afɔlei.” Hebri wiemɔ kɛha “toiŋjɔlɛ” yɛ biɛ lɛ tsɔɔ nɔ ko ni fa, ekolɛ etsɔɔ akɛ nɔ ni jɛɔ afɔlei ni tamɔ nɛkɛ ni akɛhe woɔ mli lɛ mli baa ji mɔ kɛ Nyɔŋmɔ teŋ toiŋjɔlɛ, kɛ mɔ kɛ nanemɛi jálɔi ateŋ toiŋjɔlɛ. Woloŋlelɔ ko wie yɛ shidaa afɔle lɛ gbɛfaŋ akɛ: “Yɛ anɔkwale mli lɛ, miishɛɛ naanyobɔɔ be ni akɛ Kpaŋmɔ Nyɔŋmɔ lɛ náa, ni emli lɛ E-baa shi ni ebatsɔɔ Israel Gbɔ yɛ afɔleshaa niyenii lɛ shishi, tamɔ bɔ ni eji amɛ Gbɔfeelɔ be fɛɛ be lɛ diɛŋtsɛ nɛ.” Enɛ kaiɔ wɔ Yesu shiwoo lɛ, akɛ: “He ni mɛi enyɔ loo mɛi etɛ ebua amɛhe naa yɛ, yɛ migbɛi anɔ lɛ, miyɛ amɛteŋ yɛ jɛi.” (Mateo 18:20) Be fɛɛ be ni wɔɔya Kristofoi akpee lɛ, wɔnáa naanyobɔɔ ni tswaa mɔ emaa shi, tsɔsemɔ wiemɔ ni woɔ mɔ hewalɛ, kɛ susumɔ akɛ wɔ-Nuntsɔ Yesu Kristo kɛ wɔ yɛ jɛmɛ lɛ he sɛɛ. No haa Kristofoi akpee feɔ miishɛɛ be kɛ be ni woɔ mɔ hemɔkɛyeli hewalɛ lɛɛlɛŋ lɛ.
16. Beni shidaa afɔle lɛ yɔɔ wɔjwɛŋmɔ mli lɛ, mɛni haa Kristofoi akpeei feɔ nɔ ni miishɛɛ krɛdɛɛ ko yɔɔ mli waa lɛ?
16 Yɛ shidaa afɔle lɛ mli lɛ, too lɛ fɔ lɛ fɛɛ—ni hà emlinii lɛ ahe, sabai lɛ ahe, fɔ ni tsotsoro mlɛbo lɛ he lɛ, kɛ fɔ ni yɔɔ hɛ lɛ he lɛ, kɛ agbɛnɛ lei muu lɛ fɛɛ ni fɔ hà he lɛ—akɛhaa Yehowa kɛtsɔ shã ni ashãa lɛ nɔ, ahaa ejeɔ lasu yɛ afɔleshaa latɛ lɛ nɔ. (3 Mose 3:3-16) Abuɔ fɔ lɛ akɛ kooloo lɛ fã ni nɔ bɛ ni hi fe fɛɛ. Shã ni ashãa yɛ afɔleshaa latɛ lɛ nɔ lɛ feɔ nɔ ni hi fe fɛɛ ni akɛhaa Yehowa lɛ he okadi. Nɔ ni haa Kristofoi akpeei feɔ miishɛɛ nɔ̃ titri ji akɛ, jeee nii kɛkɛ atsɔɔ wɔ shi wɔkɛ yijiemɔ hu haa Yehowa. Wɔfeɔ enɛ kɛtsɔɔ wɔhe ni wɔkɛwoɔ mli—kɛ wɔ heshibaa kɛ wɔ mɔdɛŋbɔɔ ni hi fe fɛɛ—yɛ lala ni wɔɔla yɛ miishɛɛ mli, yɛ sane toiboo jogbaŋŋ mli, kɛ sane hetoo ni wɔɔha kɛ efeemɔ aaahi lɛ nɔ. Lalatsɛ lɛ bo akɛ: “Haleluya! Nyɛlaa lala hee nyɛhaa Yehowa; nyɛjiea eyi yɛ mɛi krɔŋkrɔŋi agwabɔɔ lɛ mli!”—Lala 149:1.
Jɔɔmɔi Babaoo ni Jɛ Yehowa Ŋɔɔ Miimɛ Wɔ
17, 18. (a) Mɛɛ afɔle kpeteŋkpele ko Salomo shã beni egbeleɔ Yerusalem sɔlemɔtsu lɛ naa lɛ? (b) Mɛɛ jɔɔmɔi jɛ sɔlemɔtsu lɛ naagbelemɔ lɛ mli ba kɛha gbɔmɛi lɛ?
17 Beni agbeleɔ sɔlemɔtsu ni yɔɔ Yerusalem lɛ naa, yɛ nyɔŋ ni ji kpawo lɛ nɔ yɛ afi 1026 D.Ŋ.B. lɛ, Maŋtsɛ Salomo ‘shã afɔle kpeteŋkpele ko yɛ Yehowa hiɛ,’ ni nɔ ni ekɛfee ji “shãa afɔlei kɛ niyenii afɔlei kɛ shidaa afɔlei lɛ ahe fɔi lɛ.” Nɔ ni fata niyenii afɔle ni eshã lɛ he ji tsinai 22,000 kɛ tooi 120,000 ni akɛshã afɔle yɛ nakai be lɛ mli.—1 Maŋtsɛmɛi 8:62-65.
18 Ani obaanyɛ osusu shika ni afite kɛ nitsumɔ babaoo ni atsu yɛ gbijurɔyeli kpeteŋkpele ni tamɔ nɛkɛ shishi lɛ he? Kɛlɛ, eyɛ faŋŋ akɛ jɔɔmɔi ni Israel nine shɛ nɔ lɛ fa babaoo kwraa fe nɔ ni afite yɛ he lɛ. Yɛ gbijurɔyeli lɛ naagbee lɛ, Salomo “jie maŋ lɛ gbɛ amɛtee; ni amɛjɔɔ maŋtsɛ lɛ, ni amɛyiŋ amɛtee amɛbuui amli kɛ miishɛɛ kɛ tsuijurɔ yɛ ejuji fɛɛ ni Yehowa efee etsulɔ David kɛ emaŋ Israel lɛ hewɔ.” (1 Maŋtsɛmɛi 8:66) Lɛɛlɛŋ, taakɛ Salomo wie he lɛ, “Yehowa jɔɔmɔ lɛ, no feɔ mɔ niiatsɛ; shi deŋmegbomɔ nyɛŋ ekɛ nɔ ko afata he.”—Abɛi 10:22.
19. Mɛni wɔbaanyɛ wɔfee koni wɔnine ashɛ jɔɔmɔi wuji anɔ kɛjɛ Yehowa dɛŋ bianɛ, ni agbɛnɛ kɛmiiya naanɔ?
19 Be ni akɛ “nibii lɛ asubaŋ diɛŋtsɛ” lɛ eto “nii kpakpai ni baaba lɛ asusuma” kɛkɛ lɛ najiaŋ lɛ mli wɔyɔɔ lɛ. (Hebribii 10:1) Yesu Kristo, ni miitsu nii akɛ Osɔfonukpa kpeteŋkpele ni afee ehe mfoniri diɛŋtsɛ lɛ, ebote ŋwɛi diɛŋtsɛ lɛ mli momo ni ekɛ lɛ diɛŋtsɛ elá lɛ jara eyaha koni ekɛkpata eha mɛi fɛɛ ni yɔɔ afɔle ni eshã lɛ mli hemɔkɛyeli lɛ. (Hebribii 9:10, 11, 24-26) Yɛ nakai afɔleshaa kpeteŋkpele lɛ hewɔ, ni kɛtsɔ wɔtsui muu fɛɛ mli ni wɔɔjɛ wɔkɛ wɔ yijiemɔ afɔlei ni he tse ni muji ko bɛ he aaaha Nyɔŋmɔ lɛ nɔ lɛ, wɔ hu wɔbaanyɛ wɔya wɔhiɛ “kɛ miishɛɛ kɛ tsuijurɔ,” ni wɔkwɛ jɔɔmɔi babaoo ni baajɛ Yehowa ŋɔɔ aba lɛ gbɛ.—Maleaki 3:10.
Te Obaaha Hetoo Oha Tɛŋŋ?
• Mɛɛ nikasemɔ kɛ miishɛjemɔ wɔbaanyɛ wɔná kɛjɛ Mla lɛ mli saji ni kɔɔ afɔleshaai kɛ nikeenii ahe lɛ mli?
• Mɛni ji klɛŋklɛŋ taomɔ nii ni baaha afɔleshaa ko afee nɔ ni akpɛlɛɔ nɔ, ni mɛɛ shishinumɔ enɛ hiɛ kɛha wɔ?
• Mɛni wɔbaanyɛ wɔkɛha ni kɛ akɛto he lɛ etamɔ suɔmɔ mli ni ajɛɔ ashãa afɔle?
• Mɛɛ gbɛi anɔ abaanyɛ akɛ Kristofoi akpeei ato shidaa afɔle he?
[Mfoniri ni yɔɔ baafa 18]
Yehowa kɛ Yesu kpɔmɔ afɔleshaa lɛ ha kɛha adesai ayiwalaheremɔ
[Mfoniri ni yɔɔ baafa 20]
Bɔni afee ni Yehowa akpɛlɛ wɔsɔɔmɔ nɔ lɛ, esa akɛ wɔye wɔhe kɛjɛ hebulemɔi fɛɛ mli
[Mfoniri ni yɔɔ baafa 21]
Kɛji akɛ wɔkɛ wɔhe wo sɔɔmɔ nitsumɔ lɛ mli lɛ, wɔkpɛlɛɔ hi ni Yehowa hi lɛ nɔ yɛ faŋŋ mli