Nɔ Hewɔ ni Ehe Hiaa Akɛ Oya Kristofoi Akpeei
ROSARIO, ni yɔɔ South America lɛ kɛ nyɔji babaoo nya Biblia ni ekɛ Elizabeth kaseɔ lɛ he. Rosario mii shɛ ehe beni ekase Nyɔŋmɔ Maŋtsɛyeli lɛ kɛ bɔ ni ekɛ Paradeiso shihilɛ baaba shikpɔŋ nɔ lɛ. Ni kɛlɛ, be fɛɛ be ni Elizabeth aaafɔ lɛ nine koni eba kpeei yɛ Maŋtsɛyeli Asa lɛ nɔ lɛ, ebaaa. Enu he akɛ ebaanyɛ ekase Biblia lɛ yɛ shia, koni etsu nɔ ni ekɛɔ lɛ he nii, ni ebaafee nakai ni eyaaa asafoŋ kpeei. Ani bo hu osusu sɛɛnamɔ diɛŋtsɛ ni yɔɔ Kristofoi akpeei amli kɛha bo lɛ he? Mɛni hewɔ Nyɔŋmɔ toɔ gbɛjianɔ koni ewebii akpe kutuu lɛ?
Akɛni Kristofoi ni hi shi yɛ klɛŋklɛŋ afii oha lɛ mli lɛ yɛ sɔrɔto kwraa yɛ gbɔmɛi ni ebɔle amɛhe lɛ ahe hewɔ lɛ, naanyobɔɔ kpakpa he miihia kɛha amɛyibaamɔ. Bɔfo Paulo ŋma wolo eyaha mra be mli Kristofoi asafo lɛ ekome akɛ: ‘Nyɛbatsɔmɔ mɛi ni kpa ko bɛ amɛhe ni leee efɔŋ yɛ yinɔ ni ekɔdɔ mli, mɛi ateŋ ni nyɛkpɛɔ yɛ tamɔ kanei yɛ je nɛŋ lɛ.’ (Filipibii 2:15) Kristofoi kɛ shihilɛ ni mli wa waa kpe yɛ Yudea, ni amɛ ji mɛi ni Paulo ŋma amɛ akɛ: “Nyɛhaa wɔsusua wɔhewɔhe, koni wɔkanya wɔhe kɛya suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛikomɛi fɔɔ feemɔ lɛ, shi moŋ wɔwowoo wɔhe hewalɛ, ni babaoo hu nakai akɛni nyɛnaa akɛ gbi lɛ miibɛŋkɛ nɛɛ.” (Hebribii 10:24, 25, New World Translation) Te wɔfeɔ tɛŋŋ wɔkanyaa wɔhe kɛyaa suɔmɔ kɛ nitsumɔi kpakpai ahe kɛtsɔ kpee kutuu nɔ lɛ?
Bɔ ni Kristofoi “Jɔɔ” Amɛhe “Naa” Amɛhaa
Hela wiemɔ ni Paulo kɛtsu nii ni atsɔɔ shishi akɛ “kanya” lɛ shishinumɔ diɛŋtsɛ ji “ajɔ naa.” Biblia mli abɛbua ko tsɔɔ bɔ ni Kristofoi “jɔɔ” amɛhe “naa” lɛ mli beni ekɛɔ akɛ: “Dade jɔɔ dade naa, ni gbɔmɔ kome jɔɔ mɔ kroko hiɛ.” (Abɛi 27:17, NW; Jajelɔ 10:10) Wɔtamɔ dɛŋdadei ni daa naajɔɔ he hiaa wɔ. Akɛni Yehowa ni wɔjieɔ suɔmɔ kpo wɔtsɔɔ lɛ kɛ wɔyiŋ ni wɔkpɛɔ ni damɔ wɔhemɔkɛyeli nɔ lɛ tsɔɔ akɛ wɔyɛ sɔrɔto yɛ je lɛ he hewɔ lɛ, ehe hiaa ni wɔtsɔmɔ gbɛi ni yɔɔ sɔrɔto yɛ mɛi ni fa lɛ anɔ̃ he lɛ nɔ be fɛɛ be.
Mɔdɛŋ ni wɔɔbɔ ni wɔfee mɛi ni yɔɔ sɔrɔto be fɛɛ be lɛ baanyɛ afite ekaa ni wɔyɔɔ kɛha nitsumɔi kpakpai lɛ. Shi kɛ wɔfutu mɛi krokomɛi ni sumɔɔ Yehowa lɛ, wɔjɔɔ wɔnanemɛi ahiɛ—wɔkanyaa wɔhe kɛyaa suɔmɔ kɛ nitsumɔi kpakpai ahe. Shi yɛ gbɛ kroko nɔ lɛ, kɛ wɔ pɛ wɔyɔɔ lɛ, wɔfɔɔ wɔ pɛ he susumɔ titri. Jeŋba shara, pɛsɛmkunya, loo kwashiai asusumɔi komɛi baabote wɔjwɛŋmɔ mli. “Mɔ ni etse ehe lɛ, akɔnɔ nii etaoɔ, ni etseɔ nɔ ni hi ha lɛ lɛ fɛɛ hiɛ atua.” (Abɛi 18:1) No hewɔ ni Paulo ŋma wolo eyaha asafo ni yɔɔ Tesalonika maŋtiase lɛ mli lɛ akɛ: “Nyɛtsɛa nyɛtsui nyɛŋmɛa nyɛmli, ni mɔ aha enaanyo nane amɔ shi, taakɛ bɔ nɔŋŋ ni nyɛfeɔ lɛ.”—1 Tesalonikabii 5:11.
Beni Rosario gbe eshishijee Biblia mli tsɔɔmɔi lɛ akasemɔ naa lɛ, eka he etee nɔ efee mɔ ni kɛ asafo lɛ ebɔɔɔ. No hewɔ lɛ akɛni Elizabeth nyɛɛɛ ni ekɛ yelikɛbuamɔ babaoo aha lɛ lolo hewɔ lɛ, ekpa lɛ saramɔ. Nyɔji komɛi asɛɛ lɛ, kpokpaa nɔkwɛlɔ ko yasara Rosario ni ebi lɛ akɛ: “Kɛji akɛ weku lɛ mli bii lɛ ateŋ mɔ fɛɛ mɔ baanyɛ ana niyenii kpakpa aye yɛ maŋ niyeli he po lɛ, mɛni ji nɔ ni weku lɛ mli bii lɛ ateŋ mɔ fɛɛ mɔ baalaaje akɛni amɛyeee nii kutuu yɛ shia lɛ hewɔ?” Rosario ha hetoo akɛ: “Amɛbaalaaje weku lɛ mli naanyobɔɔ lɛ.” Enu shishi, ni eje shishi akɛ eeeba kpeei daa. Ena bɔ ni sɛɛnamɔ yɔɔ he waa lɛ akɛ agbɛnɛ ebaa kpeei lɛ fɛɛ eko daa.
Ni ooonu ni mɛi krokomɛi miitsɔɔ hemɔkɛyeli ni amɛyɔɔ yɛ nibii ni oheɔ oyeɔ lɛ nɔŋŋ mli lɛ woɔ mɔ hewalɛ, ni nakai eji yɛ be mli ni onaa bɔ ni hemɔkɛyeli ni tamɔ nɛkɛ etsake amɛshihilɛ lɛ. Paulo le enɛ kɛjɛ lɛ diɛŋtsɛ eniiashikpamɔ mli, ni eŋma wolo eyaha asafo ni yɔɔ Roma lɛ akɛ: “Miishwe akɛ mana nyɛ, koni mikɛ mumɔŋ duromɔ keenii lɛ eko abaha nyɛ, bɔni afee ni aŋɔwaje nyɛ, no ji akɛ, ashɛje mi kɛ nyɛ fɛɛ mii yɛ nyɛteŋ, yɛ hemɔkɛyeli ni yɔɔ mi kɛ nyɛ fɛɛ mli lɛŋ.” (Romabii 1:11, 12) Yɛ anɔkwale mli lɛ, afii pii ho dani Paulo nyɛ eyasara Roma, ni beni efee nakai lɛ, no mli lɛ eji gbokɛlɛfonyo yɛ Romabii lɛ adɛŋ. Shi beni ena nyɛmimɛi ni jɛ Roma, ni amɛnyiɛ fe shitoi 40 loo kilomitai 60 kɛjɛ maŋtiase lɛ mli koni amɛkɛ lɛ abakpe lɛ, ‘Paulo da Nyɔŋmɔ shi, ni ena tsui.’—Bɔfoi lɛ Asaji 28:15.
Mumɔŋ Niyenii Namɔ yɛ Jaramɔ Bei Amli
Yɛ be mli ni Paulo yɔɔ shia ko mli akɛ gbokɛlɛfonyo yɛ Roma lɛ, eŋma Hebribii lɛ akɛ amɛkakwa amɛhe naabuamɔ. Wiemɔi ni ekɛfata he nɛɛ tsɔɔ nɔ ko diɛŋtsɛ kɛhaa wɔ: “Ni babaoo ni nyɛnaa akɛ gbi lɛ miibɛŋkɛ nɛɛ.” (Hebribii 10:25, NW) Yehowa Odasefoi etee nɔ amɛjɛ Ŋmalɛi lɛ amli amɛtsɔɔ akɛ afi 1914 kadi je nɛɛ naagbee be lɛ shishijee, ni akɛ “gbɔmɛi ni kwa Nyɔŋmɔ lɛ ahiɛkpatamɔ gbi lɛ” ebɛŋkɛ. (2 Petro 3:7) Taakɛ Biblia mli wolo ni ji Kpojiemɔ tsɔɔ lɛ, beni ajɛ ŋwɛi ashɛ Abonsam afɔ yɛ naagbee be lɛ shishijee mli lɛ, emli fu naakpa, “ni eyiŋ etee ni ekɛ yoo lɛ seshibii ni eshwɛ ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ ayawuu.” (Kpojiemɔ 12:7-17) No hewɔ lɛ, Nyɔŋmɔ kitai lɛ anɔ yeli ewa waa bianɛ; ehe miihia ni wɔkɛ wɔnanemɛi heyelilɔi lɛ akpe babaoo. Kpeei baaye abua wɔ ni ewaje wɔhemɔkɛyeli kɛ suɔmɔ ni wɔyɔɔ kɛha Nyɔŋmɔ lɛ koni wɔnyɛ wɔku Abonsam tutuamɔi lɛ anaa.
Suɔmɔ kɛha Nyɔŋmɔ kɛ hemɔkɛyeli tamɔɔɔ tsũi ni amamɔ ni hiɔ shi daa. Shi moŋ, etamɔ nibii ni wala yɔɔ mli ni daa fiofio kɛtsɔɔ amɛlɛɛ daa nɔ, shi egboɔ kɛ alɛɛɛ lɛ. No hewɔ ni Yehowa kɛ mumɔŋ niyenii haa daa koni ekɛwaje ewebii lɛ. Niyenii ni tamɔ nɛkɛ he miihia wɔ fɛɛ, shi nɛgbɛ wɔnine baashɛ nɔ yɛ, yɛ Nyɔŋmɔ gbɛjianɔtoo lɛ kɛ ekpeei lɛ asɛɛ? He ko he ko bɛ.—5 Mose 32:2; Mateo 4:4; 5:3.
Yesu bi sane ko ni baanyɛ aye abua wɔ ni wɔna bɔ ni elɛɔ Kristofoi asafo lɛ ehaa. Ebi akɛ: “Belɛ namɔ ji tsulɔ anɔkwafo kɛ nilelɔ, mɔ ni enuŋtsɔ ŋɔ lɛ eto ewebii lɛ anɔ, koni eha amɛ amɛŋmaa yɛ be ni sa nɔ lɛ? Ajɔɔ nakaitsulɔ lɛ, mɔ ni beni enuŋtsɔ baa lɛ, ni eeebanina lɛ akɛ eefee nakai lɛ.” (Mateo 24: 45, 46) Namɔ Yesu hala yɛ klɛŋklɛŋ afii oha lɛ mli koni elɛ esɛɛnyiɛlɔi lɛ, ni namɔ ena ni eelɛ amɛ yɛ anɔkwayeli mli beni eku esɛɛ eba yɛ Maŋtsɛyeli hewalɛ mli lɛ? Eka shi faŋŋ akɛ adesa ko ehiko shi kɛtsɔko nɛkɛ afii ohai abɔ nɛɛ fɛɛ mli. Odaseyeli ni yɔɔ lɛ tsɔɔ akɛ tsulɔ lɛ ji Kristofoi ni akɛ mumɔ efɔ amɛ mu lɛ asafo lɛ, taakɛ Israel maŋ lɛ ji Nyɔŋmɔ tsulɔ yɛ bei ni tsɔ Kristofoi abei lɛ hiɛ lɛ mli lɛ. (Yesaia 43:10) Hɛɛ, Yesu kɛ wɔmumɔŋ niyenii lɛ tsɔɔ nakai jeŋ muu fɛɛ Kristofoi ni afɔ amɛ mu lɛ asafo lɛ, ni ŋmɛnɛ ekɛ mumɔŋ niyenii tsɔɔ Yehowa Odasefoi asafoi sɔrɔtoi lɛ anɔ lɛ nɔ.
Bɔfo Paulo tee nɔ etsɔɔ gbɛjianɔ ni Yesu eto koni etsɔ nɔ ekɛ mumɔŋ niyenii aha lɛ mli lolo akɛ: “Ekwɔ kɛtee ŋwɛi, ni eŋɔ nomii anom, ni ekɛ nikeenii ha gbɔmɛi. . . . Ni lɛ nɔŋŋ eha mɛi komɛi tsɔmɔ bɔfoi, ni mɛi komɛi gbalɔi, mɛi komɛi hu sanekpakpa jajelɔi, ni mɛi komɛi hu nɔkwɛlɔi kɛ tsɔɔlɔi, koni aŋɔsaa hetselɔi lɛ aha sɔɔmɔ nitsumɔ lɛ, kɛ Kristo gbɔmɔtso lɛ tswaa; kɛyashi beyinɔ ni wɔ fɛɛ wɔɔshɛ Nyɔŋmɔ Bi lɛ nɔ hemɔkɛyeli kɛ ehe nilee ekomefeemɔ lɛ he, ni wɔfee nuu ni eye emuu yɛ Kristo dalɛ muu lɛ susumɔ naa.”—Efesobii 4:8, 11-13.
Asafoi lɛ amli titri—yɛ kpeei ashishi —nɛkɛ ‘gbɔmɛi ateŋ nikeenii’ nɛɛ tswaa nyɛmimɛi amɛmaa shi. Akɛ nɔkwɛmɔ nɔ lɛ, yɛ Antiokia lɛ, “Yuda kɛ Sila lɛ, akɛ nɔ, ni amɛ diɛŋtsɛ hu gbalɔi ji amɛ lɛ, amɛkɛ wiemɔ babaoo shɛje nyɛmimɛi lɛ amii, ni amɛwo amɛ hewalɛ.” (Bɔfoi lɛ Asaji 15:32) Wiemɔi ni hii ni he esa yɛ mumɔŋ ŋmɛnɛ lɛ kɛhaa lɛ hu baalɛ wɔhemɔkɛyeli koni ekagbi loo efee nɔ ni tsuuu nii.
Ebaanyɛ efee anɔkwale akɛ wɔtee wɔhiɛ jogbaŋŋ yɛ yelikɛbuamɔ ni asafo lɛ mlinyo ko kɛhaa lɛ hewɔ eyɛ mli akɛ ekolɛ wɔjeko kpeeiyaa shishi. Biblia lɛ kɛɔ akɛ be yɛ ni ehe hiaa “akɛ atsɔɔ nyɛ Nyɔŋmɔ wiemɔi lɛ amli shishijee nibii lɛ . . . ni nyɛtsɔmɔ mɛi ni fufɔ ehia amɛ, ni jeee niyenii kpakpa.” (Hebribii 5:12) Shi mɔ ko nyɛŋ ahi shi akɛ mɔ ni yeɔ fufɔ daa. Kristofoi akpeei kɛ Biblia mli tsɔsemɔ he gbɛjianɔtoo ni baaha suɔmɔ kɛha Nyɔŋmɔ kɛ emli hemɔkɛyeli ahi shi kɛ agbɛnɛ yelikɛbuamɔ ni anyɛɔ akɛtsuɔ nii koni anyɛ atsu “Nyɔŋmɔ yiŋtoo muu lɛ fɛɛ” he nii haa daa. (Bɔfoi lɛ Asaji 20:27) Enɛ fe “fufɔ.” Biblia lɛ yaa nɔ ekɛɔ akɛ: “Mɛi ni edara lɛ anɔ ji niyenii kpakpa [ni wa], mɛi ni fɔ ni amɛfɔɔ feemɔ lɛ eha amɛ henumɔ nii lɛ ele ekpakpa kɛ efɔŋ mlikpamɔ.” (Hebribii 5:14) Asusuɔ saji pii ahe yɛ kpeei ashishi ni ekolɛ efataaa tsɔsemɔ ni akɛhaa yɛ shia Biblia kasemɔ mli lɛ he, tamɔ Biblia mli gbalɛi ni he hiaa lɛ ni akaseɔ kuku fɛɛ kuku lɛ kɛ bɔ ni wɔɔfee ni wɔkase Nyɔŋmɔ yɛ wɔ diɛŋtsɛ wɔshihilɛi amli ni asusuɔ he jogbaŋŋ kɛyaa shɔŋŋ lɛ.
Yehowa Odasei loo Kaimɔi—Amɛtamɔ Gbee Yɛ Osɛɛ
Yehowa tsɔɔ nɛkɛ asafoŋ nikasemɔi nɛɛ anɔ etsɔɔ wɔ nɔ gbɔmɛi ni esa akɛ wɔji yɛ be fɛɛ mli. Nɛkɛ kaimɔi loo odasei nɛɛ ahe miihia. Kɛ nomɛi bɛ lɛ, etsɛɛɛ ni wɔtsɔɔ wɔhe kɛyaa pɛsɛmkunya, henɔwomɔ, kɛ hiɛjoomɔ he. Kaimɔi ni jɛ Ŋmalɛi lɛ amli lɛ baaye abua wɔ ni wɔna wɔkɛ adesai krokomɛi kɛ Nyɔŋmɔ diɛŋtsɛ teŋ wekukpaa kpakpa ni yeɔ omanye mli ŋɔɔmɔ. Mɔ ni ŋma Lala 119:59 (NW) lɛ jaje akɛ: “Mijwɛŋ migbɛi lɛ ahe, ni mitsɔmɔ minaji kɛtee okaimɔi lɛ ahe.”
Yɛ be mli ni wɔyaa Kristofoi akpeei daa lɛ, wɔkpaa bɔ ni Yehowa gbalɛ kɛtsɔ Yesaia nɔ lɛ tsuɔ nii ehaa lɛ shi, nɔ ni kɛɔ nɛkɛ lɛ: “Otsɔɔlɔ Kpeteŋkpele lɛ kɛ ehe eteeŋ dɔŋŋ, ni okɛ ohiŋmɛii diɛŋtsɛ aaana o-Tsɔɔlɔ Kpeteŋkpele lɛ. Ni otoii aaanu wiemɔ ko yɛ osɛɛ akɛ: ‘Gbɛ lɛ nɛ. Nyɛnyiɛa nɔ.’” Yehowa kwɛɔ wɔ nɔyaa nɔ, ni ejɛɔ suɔmɔ mli ejajeɔ wɔ kɛ wɔtsɔ gbɛ ni ejaaa nɔ. (Yesaia 30:20, 21, NW; Galatabii 6:1) Ni ekɛ yelikɛbuamɔ babaoo haa fe enɛ.
Mumɔ Krɔŋkrɔŋ ni Wɔnine Aaashɛ Nɔ Kɛtsɔ Asafo lɛ Nɔ
Kɛ wɔkɛ Yehowa Odasefoi tee Kristofoi akpeei daa lɛ, Nyɔŋmɔ mumɔ krɔŋkrɔŋ lɛ, ni yɔɔ ewebii anɔ lɛ woɔ wɔ hewalɛ. (1 Petro 4:14) Kɛfata he lɛ, mumɔ krɔŋkrɔŋ hala nɔkwɛlɔi Kristofoi ni yɔɔ asafo lɛ mli lɛ. (Bɔfoi lɛ Asaji 20:28) Nɛkɛ nifeemɔ hewalɛ ni jɛ Nyɔŋmɔ ŋɔɔ nɛɛ naa Kristofonyo lɛ nɔ hewalɛ waa. Biblia lɛ kɛɔ akɛ: “Mumɔ lɛ yibii ji suɔmɔ, miishɛɛ, toiŋjɔlɛ, mlihilɛ, ejurɔfeemɔ, hemɔkɛyeli, mlijɔlɛ, henɔyeli.” (Galatabii 5: 22, 23, NW) Mumɔ krɔŋkrɔŋ ni tsuɔ nii kɛtsɔɔ Nyɔŋmɔ gbɛjianɔtoo lɛ nɔ lɛ hu baaye abua wɔ ni wɔna nɔ ni Yehowa esaa eto kɛha mɛi ni sumɔɔ lɛ lɛ he shishinumɔ ni yɔɔ naakpɛɛ ni mli ka shi faŋŋ. Yɛ be mli ni Paulo tsɔɔ mli akɛ gbɔmɛi ni ehe gbɛi yɛ nibii agbɛjianɔtoo nɛɛ mli lɛ nuŋ shishi lɛ sɛɛ lɛ, eŋma akɛ: “Shi wɔ lɛ, Nyɔŋmɔ etsɔ emumɔ lɛ nɔ ejie kpo etsɔɔ wɔ.”—1 Korintobii 2:8-10.
Yɛ mumɔŋ niyenii ni woɔ hemɔkɛyeli hewalɛ lɛ sɛɛ lɛ, asafo lɛ kɛ tsɔsemɔ haa mɛi ni sumɔɔ ni amɛkɛ amɛhe awo asafo lɛ nitsumɔ titri lɛ mli lɛ. Mɛni ji no?
Tsɔsemɔ ni Asafo lɛ Kɛhaa
Kristofoi asafo lɛ jeee kwasafoŋ kuu ko ni mɛi jieɔ amɛhiɛtserɛ yɛ mli ni ekolɛ amɛwoɔ amɛhe hewalɛ ni amɛhi shi yɛ gbɛ kpakpa nɔ. Yesu kɛ nitsumɔ wo asafo lɛ dɛŋ ni amɛkɛ Maŋtsɛyeli lɛ he sanekpakpa lɛ ayaha mɛi ni yɔɔ mumɔŋ duŋ mli lɛ. (Bɔfoi lɛ Asaji 1:8; 1 Petro 2:9) Kɛjɛ be mli ni ato shishi yɛ Pentekoste afi 33 Ŋ.B. kɛbaa fɛɛ lɛ, eji shiɛlɔi agbɛjianɔtoo. (Bɔfoi lɛ Asaji 2:4) Ani ona niiashikpamɔ ko ni ji mɔdɛŋ ni obɔɔ koni ogba Yehowa yiŋtoi ahe sane otsɔɔ mɔ ko, shi onyɛɛɛ otsɔ eyiŋ? Asafoŋ kpeei kɛ tsɔsemɔ haa mɔ aŋkro lɛ yɛ nitsɔɔmɔ he ŋaa mli. Kɛ wɔkase Biblia mli nɔkwɛmɔ nii lɛ, wɔleɔ bɔ ni wɔɔfee ni wɔkɛ mɔ ko akpa gbee yɛ sane ko he, ni wɔya nɔ wɔkɛ lɛ asusu saji ahe, bɔ ni akɛ Ŋmalɛi lɛ tsuɔ nii akɛ nɔ ni adamɔɔ nɔ akɛ sane-naatsɔɔmɔ ni ja haa, kɛ bɔ ni wɔɔfee wɔye wɔbua mɛi krokomɛi ni amɛjwɛŋ kɛtsɔ sanebimɔi kɛ nɔkwɛmɔ nii anɔ. Hesaai ni tamɔ nɛkɛ yeɔ buaa bo ni onaa miishɛɛ ni nɔ bɛ kɛjɛɔ mɔ kroko ni oyeɔ obuaa lɛ koni enu Biblia mli anɔkwale lɛ shishi lɛ mli.
Kristofoi asafo lɛ ji mumɔŋ abobaa he diɛŋtsɛ yɛ jeŋ ni béi kɛ jeŋba shara eyi mli obɔ nɛɛ mli. Eyɛ mli akɛ gbɔmɛi ni yeee emuu yɔɔ mli moŋ, shi eji toiŋjɔlɛ kɛ suɔmɔ hejɔɔmɔ he. No hewɔ lɛ, feemɔ mɔ ni yaa emli kpeei lɛ fɛɛ shishi, koni bo diɛŋtsɛ okpa anɔkwale ni lalatsɛ lɛ wiemɔi nɛɛ ji lɛ shi okwɛ: “Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ! . . . Ejaakɛ Yehowa ewo jɔɔmɔ kɛ wala shi eha jɛi kɛyashi naanɔ.”—Lala 133:1, 3.